ရပ် ကျေးအုပ်ချုပ်ရေး ဥပဒေ ပြင်ဆင်ရန်မရှိ

ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်စိုးကို မေလ ၉ ရက်နေ့က ပြည်သူ့လွှတ်တော်မှာ တွေ့ရစဉ်။ Photo: ဝင်းနောင်တိုး/ RFA

ရပ်ကွက် သို့မဟုတ် ကျေးရွာအုပ်စု အုပ်ချုပ်ရေး ဥပဒေကို လတ်တလောမှာ ပြင်ဆင်ရေးဆွဲဖို့ အစီအစဉ် မရှိကြောင်း ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်အောင်စိုးက ဒီနေ့ ပြည်သူ့လွှတ်တော်မှာ ပြောလိုက် ပါတယ်။

တရားဥပဒေစိုးမိုးရေးအားကောင်းလာစေဖို့အတွက် ၂၀၁၂ ခုနှစ် ရပ်ကွက်၊ ကျေးရွာအုပ်စုအုပ်ချုပ်ရေး ဥပဒေ ကို ပြည်သူ့ဆန္ဒနဲ့ အညီ ပြန်လည်ရေးဆွဲဖို့ အစီအစဉ် ရှိ မရှိ ကို ပြည်သူ့လွှတ်တော် ကိုယ်စား လှယ် ဦးကံဦး က မေးမြန်းရာမှာ ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်ချုပ်အောင်စိုး က ပြန်လည်ဖြေကြားခဲ့တာဖြစ် ပါတယ်။

ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေကို လွန်ခဲ့တဲ့ ၂၀၁၂ ခုနှစ်က ပြည်ထဲရေး ဝန်ကြီးဌာနက ရေး ဆွဲပြဌာန်းထားတာဖြစ်ပါတယ်။

အဲဒီဥပဒေအရ ရပ်ကွက်/ကျေးရွာအုပ်ချုပ်ရေးမှူးတွေကို မရွေးချယ်ခင် ဆယ်အိမ်စုကိုယ်စားလှယ်တွေကို အရင်ရွေး ချယ်ပြီးမှ အဲဒီဆယ်အိမ်စုကိုယ်စားလှယ်တွေ ထဲကနေ ရပ်ကွက်/ကျေးရွာအုပ်ချုပ် ရေးမှူးတွေကို ပြန်လည်ရွေးချယ် ရတာဖြစ်ပါတယ်။

ကိုယ်စားလှယ်တွေအချင်းချင်း မဲပေးရွေးချယ်ရတာ ဖြစ်တဲ့အတွက် လာဘ်ပေးလာဘ်ယူမှုတွေ ရှိနေကြောင်း လွှတ်တော်ကိုယ်စားလှယ် ဦးကံဦးက လွှတ်တော် မှာ ပြောခဲ့ပါတယ်။

အမျိုးသားလွှတ်တော် ဥပဒေကြမ်းကော်မတီက ရပ်ကွက်/ကျေးရွာအုပ်စု အုပ်ချုပ်ရေးဥပဒေကို ပြင်ဆင်ပြီး ပြီးခဲ့တဲ့ မေလ ၆ ရက်နေ့က လွှတ်တော်ထံ တင်သွင်းထားပါတယ်။

RFA Burmese
http://www.rfa.org/burmese