မုန်တိုင်းတိုက်ခတ်၊ မိုးသီးကြွေ လူ ၅ ဦးသေ၊ အိမ် ၅၀၀၀ ပျက်စီး

မန္တလေးတိုင်းဒေသကြီး အမရပူရမြို့နယ်မှာ ဧပြီလ ၂၂ ရက်နေ့က မိုးသီးများကြွေကျထားသည်ကို တွေ့ရစဉ်။ Photo: ဦးစိုးမြင့် (အမရပူရမြို့နယ်)

စစ်ကိုင်း၊ မန္တလေး နဲ့ ရှမ်းပြည်နယ်တို့မှာ မနေ့က လေပြင်းတိုက်ခတ်ပြီး မိုးသီးတွေ ကြွေကျခဲ့တာကြောင့် အိမ်ခြေ ငါးထောင်နီးပါး ပျက်စီးခဲ့သလို လူ ငါးဦးသေဆုံးပြီး ထိခိုက်ဒဏ်ရာရရှိသူတွေ ရှိခဲ့ပါတယ်။

မန္တလေးတိုင်းဒေသကြီးက မြို့နယ် ၅ ခုမှာ နေအိမ် ပျက်စီးမှုတွေ ရှိပြီး ကျောက်ဆည်မြို့နယ် ရေသရောက်ကျေးရွာမှာဆိုရင် သေဆုံးသူ ငါးဦးရှိသလို ပျောက်ဆုံးသူ တစ်ဦးရှိတယ်လို့ မန္တလေးတိုင်းဒေသကြီး စိုက်ပျိုးရေး မွေးမြူရေးနဲ့ ဆည်မြောင်းဝန်ကြီး ဒေါက်တာစိုးသန်း က ပြောပါတယ်။

အလားတူ စစ်ကိုင်းတိုင်းဒေသကြီး ရေဦး၊ အရာတော် နဲ့ မြင်းမူမြို့နယ်တို့မှာလည်း အိမ်ခြေ နှစ်ထောင်နီးပါးပျက်စီးခဲ့ပါတယ်။

ပြီးခဲ့တဲ့ဧပြီလ ၂၁-ရက်နေ့ကလည်း စစ်ကိုင်းတိုင်း ကလေးမြို့နယ်နဲ့ မုံရွာမြို့နယ်တွေမှာ လေပြင်းတိုက်ခတ်မှုကြောင့် လူနှစ်ဦးသေဆုံးခဲ့ပြီး မန္တလေးတိုင်း ပြင်ဦးလွင် မြို့နယ်မှာလည်း လျှပ်စစ်ဓာတ်အားခွဲရုံတွေနဲ့ လူနေအိမ်ခြေတချို့ပျက်စီးခဲ့ပါတယ်။

လေပြင်းတိုက်တာ၊ မိုးသီးကြွေတာ၊ မိုးကြိုးပစ်တာ၊ အချိန်အခါမဟုတ် မိုးရွာတာ တွေဟာ တိုင်းဒေသကြီးနဲ့ ပြည်နယ် ၁၂ ခုမှာ အခုရက်ပိုင်းအတွင်း ဆက်လက်ဖြစ်ပေါ် နိုင်တဲ့အတွက် သတိထားနေထိုင်ကြဖို့ မိုးလေ၀သနဲ့ဇလဗေဒ ပညာရှင် ဒေါက်တာထွန်းလွင် က သတိပေးထားပါတယ်။

RFA Burmese
http://www.rfa.org/burmese/