တအာင်းပလာင် TNLA နှင့် တိုက်ပွဲတွင် တပ်မတော်မှ လေကြောင်း အသုံးပြုတိုက်ခိုက်မှုများရှိ

တအာင်းဒေသတွင် မြန်မာ့တပ်မတော် နှင့် တအာင်းအမျိုးသား လွတ်မြောက်ရေး တပ်မတော် (TNLA) တို့ ထိတွေ့တိုက်ပွဲဖြစ်ပွားမှု ယခုရက်ပိုင်းတွင် များပြားလာခဲ့ပြီး မြန်မာ့တပ်မတော်မှ လေကြောင်း အသုံးပြု တိုက်ခိုက်မှုများလည်း ရှိကြောင်း TNLA ပြန်ကြားရေးမှသိရသည်။

“မတ်လ ၁ ရက်နေ့ကနေ မတ်လ ၇ ရက် ဒီနေ့အထိ တိုက်ပွဲတွေဖြစ်တယ်။ တိုက်ပွဲတွေက ဒီလထဲမှာတင် ၁၀ ကြိမ်ကျော် ရှိသွားပြီ၊ အစိုးရဘက်က အင်အား ဖြည့်တင်းမှုတွေကလည်း တအားများလာတယ်” ဟု TNLA ပြောခွင့်ရ တာအိုက်ကျော်က The Ladies သို့ပြောသည်။

ကျောက်မဲမြို့နယ်၊ ပါလိုင်ကျေးရွာနှင့် ကျောက်ဖြူကျေးရွာ ကြားတွင် မတ်လ ၇ ရက်က ထိတွေ့တိုက်ပွဲ ဖြစ်ပွားမှုများရှိခဲ့ပြီး မြန်မာ့တပ်မတော်က လေကြောင်း စတင်အသုံးပြု တိုက်ခိုက်ခဲ့ခြင်းဖြစ်ကြောင်း ၎င်းကဆိုသည်။

လတ်တလော အခြေအနေများအရ မြန်မာ့တပ်မတော်နှင့် TNLA တို့အကြား ထိတွေ့မှုများ ပိုမိုများပြားလာနိုင်သည့် အနေအထားတွင် ရှိနေပြီး ဒေသခံပြည်သူများ အနေဖြင့်လည်း ဒုက္ခ ရောက်နိုင်ဖွယ်ရှိကြောင်း ၎င်းကဆိုသည်။

“ဒုက္ခသည်တွေက ရှိပြီးသားထက် ပိုပြီးဒုက္ခရောက်နိုင်တဲ့ သူတွေရှိတယ်။ မနှစ်က တိုက်ပွဲဖြစ်ပြီး၊ တိုက်ပွဲကတော့ ပြီးပြီ။ ဒါပေမဲ့ ညရောက်တဲ့အခါ အစိုးရဘက်က လက်နက်ကြီးတွေနဲ့ ရွာထဲပစ်တယ်။ ပစ်တော့ ရွာသားတွေက တစ်ယောက်မှ မနေရဲဘူး။ အကုန်လုံး ထွက်ပြေးသွားတယ်” ဟု TNLA ပြောခွင့်ရ တာအိုက်ကျော်က ဆက်လက် ပြောကြားသည်။

အဆိုပါ အခြေအနေနှင့် ပတ်သက်၍ တပ်မတော်ဘက်မှ တစ်စုံတစ်ရာ အတည်ပြုချက် ရယူရန် ကြိုးစားခဲ့သော်လည်း မရခဲ့ချေ။

လွန်ခဲ့သည့် ရက်သတ္တပတ်များအတွင်း ရှမ်းပြည်နယ် မြောက်ပိုင်းဒေသို့ တပ်မတော်မှ အင်အား အလုံးအရင်ဖြင့် တပ်များ နေရာချထားမှု ပြုလုပ်လာကြောင်း သတင်းမီဒီယာများက ဖော်ပြကြသည်။

ကေအိုင်အေ ကချင်လွတ်မြောက်ရေး တပ်ဖွဲ့မှ တပ်မဟာ ၆ ကို ဖွဲ့စည်းမှုနှင့် ပတ်သက်၍ လည်း ပြည်ထောင်စု ငြိမ်းချမ်းရေး ဖော်ဆောင်မှု လုပ်ငန်းကော်မတီမှ ကန့်ကွက်ကြောင်း ကြေညာချက် ထုတ်ပြန်ထားပြီး ကေအိုင်အေတပ်ဖွဲ့နှင့် တပ်မတော်တို့အကြား ရှမ်းပြည်နယ် မြောက်ပိုင်းတွင် တိုက်ပွဲများ ပြန်လည် ဖြစ်ပွားနေသည်။

“ဖေဖဝါရီလကုန် မတ်လဆန်းမှာ ရှမ်းပြည်မြောက်ပိုင်းကို စစ်အင်အားများစွာ ဖြည့်တင်းနေတယ်ဆိုတဲ့ သတင်းများ တက်လာခဲ့ပြီးနောက် ဒီရက်ပိုင်းတွေအတွင်း ရှမ်းမြောက်မှာ တိုက်ပွဲတွေ ခပ်စိပ်စိပ်ဖြစ်လာတာ တွေ့ရပါတယ်။ စစ်ပွဲတွေ မတည်ငြိမ်မှုတွေဟာ NLD အစိုးရသစ် ကျော်လွှားရမယ့် ကြီးမားတဲ့ စိန်ခေါ်မှုတစ်ခုပါပဲ” ဟု တိုင်းရင်းသား အရေးနှင့် စစ်ရေးလေ့လာသူ ဦးမောင်မောင်စိုးက သုံးသပ်သည်။

သတင်း - ဇော်မင်းထွန်း
The Ladies News
https://www.facebook.com/News.TheLadies