ဆင်နှင့်တူသည့် သန္ဓေပြောင်းဝက်ပေါက်လေး ကမ္ဘောဒီးယားတွင် မွေးဖွား

ကမ္ဘောဒီးယားနိုင်ငံမှ ဆင်နှင့်တူသည့် သန္ဓေပြောင်း ၀က်ပေါက်လေးတစ်ကောင်၏ပုံက အင်တာနက် တွင် ပြန့်နှံ့လာကြောင်း သိရသည်။

ဆင်နှင့်တူသော နှာမောင်းရှည်နှင့်အတူ ယပ်တောင်ကဲ့သို့ရှည်လျားသည့်နားရွက်များပါရှိသော ၀က်ဖြူ လေးကို ကမ္ဘောဒီးယားနိုင်ငံအနောက်ပိုင်းရှိ ပရာမွိုင်းမြို့တွင် မွေးဖွားခဲ့ခြင်းဖြစ်သည်။ ၀က်ကလေးအနေဖြင့် ပိန်သယောင်ရှိသော်လည်း မျက်ခွံများကို ဖွင့်နိုင်ခြင်းမရှိသေးပေ။ ထို့ပြင် ပုံမှန်မဟုတ်သည့် ခန္ဓာကိုယ် ဖွဲ့စည်း တည်ဆောက်ပုံကြောင့် လမ်းလည်း ကောင်းစွာလျှောက်နိုင်ခြင်းမရှိပေ။

ဝက်ကလေးအနေဖြင့် ဆက်လက်၍ အသက်ရှင်၊ မရှင်ကိုလည်းကောင်း၊ မည်သည့်အကြောင်းကြောင့် ယခုခဲ့သို့ သန္ဓေပြောင်းသည့် အသွင်သဏ္ဍာန်ဖြစ်ပေါ်နေရသည်ကိုလည်းကောင်း မည်သူမျှ ရှင်းပြနိုင်ခြင်းမရှိပေ။ ၂၀၁၄ ခုနှစ်အတွင်းကလည်း အလားတူ ဆင်နှင့်တူသည့် ၀က်ပေါက်လေးတစ်ကောင်ကို တရုတ်နိုင်ငံအရှေ့ တောင်ပိုင်း ကျင်လင်းမြို့တွင် မွေးဖွားခဲ့ခြင်းဖြစ်သည်။ သို့သော်လည်း ပါးစပ်ပေါက်မပါဝင်သည့် အဆိုပါဝက် ကလေးမှာ မွေးဖွားပြီးနောက် နှစ်နာရီအကြာတွင် သေဆုံးသွားခဲ့သည်။

 တရုတ်နိုင်ငံတွင် ၂၀၁၀ ခုနှစ် အတွင်း ကလည်းကောင်း၊ ၂၀၁၅ ခုနှစ် ဇွန်လကလည်းကောင်း အလားတူ ဆင်နှင့်အသွင်တူသည့် သန္ဓေပြောင်း ၀က်ပေါက်လေးများ မွေးဖွားခဲ့ဖူးသည်ဟု သိရသည်။

Ref: Daily Mail (စည်သူ)
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal