CB ဦးခင်မောင်အေး သိမ်းထားသည့် လယ်ယာမြေများ ပြန်လည်ရရှိရေး တောင်ငူ ၊ နဂါးမောက်ကျေးရွာ ဒေသခံများ ဆန္ဒပြ

ပဲခူးတိုင်းဒေသကြီး တောင်ငူမြို့နယ် နဂါးမောက်ကျေးရွာ သိမ်းဆည်းခံ လယ်ယာမြေများ ပြန်လည်ရရှိရေးအတွက် ဒေသခံ လယ်သမားများက ဖေဖော်ဝါရီ ၇ ရက်တွင် ဆန္ဒထုတ်ဖော်ခဲ့ကြသည်။

အဆိုပါ ဆန္ဒထုတ်ဖော်မှုတွင် CB ဘဏ်ဥက္ကဋ္ဌ ဦးခင်မောင်အေး ပိုင်ဆိုင်သည့် ကောင်းမြန်မာအောင် ကုမ္မဏီက တောင်သူများအပေါ် တရားစွဲဆိုထားသည့် အမှုများ အမြန်ဆုံး ရုပ်သိမ်းပေးရန်နှင့် သိမ်းဆည်းခံ မြေများ အတွက် ထိုက်တန်သော နစ်နာကြေး လျော်ကြေးပေးရန် ၊ ကုမ္မဏီက သိမ်းယူထားသည့် ဒေသခံများ၏ စိုက်ပျိုးမြေများအား ဒေသခံများက လွတ်လပ်စွာ ပြန်လည်လုပ်ပိုင်ခွင့် ရရှိရေး စသည့်အချက်များကို ကျေးရွာဒေသခံများက တောင်းဆိုခဲ့ကြသည်။

“ ဦးခင်မောင်အေးကို ဆန္ဒပြတာ လယ်တွေသိမ်းထားလို့၊ နေပြည်တော်က ပြန်ချပေးတယ်။ သူကမပေးတာ။ တောင်သူတွေကို မပေးသေးဘူး။ နေပြည်တော်က ပြန်ပေးပြီ၊ ပေးဖို့ပြန်ပြီး အမိန့်ချထားတယ် ပြောတယ်။ တောင်သူတွေက ပြန်မရသေးဘူး ” ဟု တောင်ငူမြို့ ဒေသခံတစ်ဦးက The Ladies သို့ပြောသည်။

ကောင်းမြန်မာအောင် ကုမ္ပဏီသည် ၂၀၀၉ ခုနှစ်မှ စတင်၍ တောင်ငူမြို့ နဂါးမောက်ကျေးရွာ အုပ်စုရှိ မြေဧက ၂,၄၀၀ အား ရာဘာစိုက်ခင်း စိုက်ပျိုးရန် လုပ်ပိုင်ခွင့်ရရှိခဲ့ပြီး ယင်းအထဲမှ မြေဧကအချို့၌ ကျွန်းစိုက်ခင်းများကို စိုက်ပျိုး လုပ်ကိုင်ခဲ့ကြောင်း ဒေသခံများထံမှ သိရပြီး အဆိုပါ မြေများအားလုံးမှာ ယခင်က ဒေသခံ တောင်သူများက ပိုင်ဆိုင်ခဲ့ခြင်း ဖြစ်သည်။

မြေသိမ်းခံ တောင်သူများသည် အင်အား နှစ်ရာခန့်ဖြင့် တောင်ငူမြို့ အရှေ့ဘက် အောင်နန်းတံခါးမုခ်ဦး မှစတင်၍ ကြွေးကြော်သံများဖြင့် ဆန္ဒထုတ်ဖော်ခဲ့ကြပြီး မင်းကြီးညိုရုပ်တုမှ တစ်ဆင့် ဗိုလ်မှူးဖိုးကွန်းလမ်း၊ ကုန်သည်ကြီးလမ်းများသို့ ၀င်ရောက် ဆန္ဒထုတ်ဖော်ခဲ့ကြကာ တောင်ငူမြို့ ကန်လမ်း၊ CB ဘဏ် ဥက္ကဋ္ဌ ဦးခင်မောင်အေး ပိုင်ဆိုင်သည့် တော်ဝင်ကေတုမတီဟိုတယ် ရှေ့တွင် ကြွေးကြော် ဆန္ဒထုတ်ဖော် ခဲ့ကြသည်။

ထို့နောက် တော်ဝင်ကေတုမတီဟိုတယ် လမ်းမှ ဗိုလ်မှုးဖိုးကွန်းလမ်းမသို့ ပြန်လည် ၀င်ရောက်ကာ ဆန္ဒ ထုတ်ဖော်ပွဲ စတင်ခဲ့သည့် မင်းကြီးညို ရုပ်တုရှေ့တွင် ဆန္ဒထုတ်ဖော်မှုကို အဆုံးသတ်ခဲ့ကြသည်။

သိမ်းဆည်းခံမြေများနှင့် ပတ်သက်၍ တောင်ငူမြို့နယ် နဂါးမောက် ကျေးရွာအုပ်စု ကောင်းမြန်မာအောင် ကုမ္ပဏီ လုပ်ပိုင်ခွင့်ရ စိုက်ပျိုးမြေများ စွန့်လွှတ်ပွဲနှင့် နစ်နာကြေးငွေများ ထပ်မံပေးအပ်ပွဲ အခမ်းအနားကို တော်ဝင်ကေတုမတီဟိုတယ် ဘုရင့်နောင်ခန်းမတွင် ပြီးခဲ့သည့် ဇန်န၀ါရီလ ၁၁ ရက်နေ့ နံနက် ၁၀ နာရီက ကျင်းပခဲ့ပြီး၊ ကုမ္ပဏီ၏သစ်တောလုပ်ငန်း ဒု-အထွေထွေမန်နေဂျာ ဦးစောမောင်က နဂါးမောက်ကျေးရွာအုပ်စုရှိ မြေလွှတ်မြေရိုင်း ၂,၄၀၀ ခန့်အနက် ကျွန်းသစ်မာ စိုက်ပျိုးပြီးစိုက်ခင်း ၅၁၁.၃၈ ဧကမှအပ ကျန် ၁၈၈၈.၆၂ ဧကအား ကောင်းမြန်မာအောင် ကုမ္ပဏီဥက္ကဋ္ဌ ဦးခင်မောင်အေး၏ ညွှန်ကြားချက်အရ နဂါးမောက်အုပ်စုနေ ပြည်သူများ စိတ်ချမ်းမြေ့စေရန် အလို့ငှာ စွန့်လွှတ်ကြောင်း ကြေညာခဲ့သေးသည်။

အဆိုပါအခမ်းအနားတွင် တောင်သူလယ်သမားပါတီ ဥက္ကဋ္ဌ ဦးကျော်စိုးမိုးက စိုက်ပျိုးပြီး ၅၁၁.၃၈ ဧကအတွင်းမှ တောင်သူများအား တစ်ဧကလျှင် သုံးသိန်းပြည့်မီအောင် မူလ၀ယ်ဈေးမှ လိုငွေများ ထပ်မံပေးမည်ဖြစ်ကြောင်း၊ မူလရောင်းချခဲ့သူများက မိမိတို့မြေ ပြန်လိုချင်လျှင် မူရင်းဈေးအတိုင်း ငွေပြန်သွင်းပြီး ပြန်ယူနိုင်ကြောင်း တို့ကို ရှင်းလင်း ပြောကြားခဲ့ကြောင်း သိရသည်။

သတင်း - ဇော်မင်းထွန်း
ဓာတ်ပုံ - မင်းသွေးနီဖေ့စ်ဘုတ်
The Ladies News Journal
https://www.facebook.com/News.TheLadies