ထိုင်းနိုင်ငံ ဘော်ထောင်းမြို့၌ မြန်မာလုပ်သားနှစ်ဦး ဆီကန်ထဲ သန့်ရှင်းရေးလုပ်ရင်း သေဆုံး

ထိုင်းနိုင်ငံ ဘော်ထောင်းမြို့ ပေါ်ထောင်းရပ်ကွက်ရှိ သုံးပြီးသား ဆီအဟောင်းကိုပြန်လည်ပြုပြင် ထုတ်လုပ်သည့် ဖါးမိုးဆားပိတိုးဓာတုကုမ္ပဏီလီမိတက်၏ ဆီတိုင်ကီထဲသို့ စက်ရုံလုပ်သားနှစ်ဦး သန့်ရှင်းရေး ၀င်လုပ်ရင်း သေဆုံးမှု ဖေဖော်ဝါရီလ(၁၈)ရက်နေ့က ဖြစ်ပွားကြောင်း ချွန်ပူးလီးရဲတပ်ဖွဲ့မှ သိရသည်။

အဆိုပါ ကုမ္ပဏီဝင်းထဲရှိ ဆီတိုင်ကီအဟောင်းဘေးနားတွင် အလုပ်သမားများ စုအုံနေသည့်အတွက် ဝင်ရောက်စစ်ဆေးရာမှ ဆီတိုင်ကီထဲတွင် အလုပ်သမား(၂)ဦးသေဆုံးနေသည်ကို တွေ့ရခြင်းဖြစ်ပြီး အဆိုပါ ရုပ်အလောင်းများအား ဘော်ထောင်းကူညီရေးအသင်းမှ ဆယ်ယူပေးခဲ့ခြင်းဖြစ်ကြောင်း သိရသည်။

ယင်းအလုပ်သမား နှစ်ယောက်သည် မြန်မာနိုင်ငံသားဖြစ်ပြီး အသက်(၂၅) နှစ်မှ အသက်(၃၀)ကြား အရွယ်များဖြစ်ကြောင်း သိရသည်။

အလောင်းများအား ဆရာဝန်မှ ခွဲစိတ်ကြည့်ရာ အောက်ဆီဂျင်မရဘဲ သေဆုံးခြင်းဖြစ်ကြောင်း အတည်ပြုပေးခဲ့သည်။

အဆိုပါ သေဆုံးမှုနှင့် ပတ်သက်၍ အလုပ်သမားများကို စုံစမ်းစစ်ဆေးရာ အလုပ်သမားတစ်ယောက်သည် သုံးပြီးသားဆီအဟောင်း ဆယ်ရာခိုင်နှုန်းခန့်ကျန်နေသည့် ဆီတိုင်ကီထဲတွင် သန့်ရှင်းရေးလုပ်နေရာမှ အချိန်ကြာသွားပြီး ပြန်မလာသည့်အတွက် နောက်ထပ် အလုပ်သမားတစ်ယောက်က ဆင်းပြီးရှာဖွေရာမှ နှစ်ဦးလုံး အသက်ဆုံးရှုံးသွားခြင်းဖြစ်ကြောင်း သိရသည်။

သတင်း။ ။ ‪နန်းမောက်ကွမ်‬
Tachileik News Agency
http://www.tachileik.net/2016/02/bhn.html