ရှမ်းပြည်နယ် မြောက်ပိုင်း ကျောက်မဲမြို့နယ် တော့စန်ကျေးရွာအနီး ဖေဖော်ဝါရီ ၇ ရက်မှ စတင်ကာ ဖြစ်ပွားနေသော တိုက်ပွဲများကြောင့် ရွာများတွင် မြကျင်း(ခံတုတ်ကျင်း)များတူးကာ ပုန်းအောင်းနေရသော ရွာသားများကို ကျောက်မဲ ကယ်ဆယ်ရေး ကော်မတီမှ သွားရောက် ခေါ်ဆောင်လာကြောင်း သိရှိရသည်။
“ကျွန်တော်တို့ ဖေဖော်ဝါရီလ ၁၃ ရက်က သွားခေါ်တယ်။ ည ၁၂ နာရီလောက် ရောက်ပါတယ်။ တခြား ရွာတွေမှာလည်း နောက်ထပ်လည်း ကျန်သေးတယ်။ သွားဖို့ရှိပါသေးတယ်’’ ဟု ကျောက်မဲ ကယ်ဆယ်ရေး ကော်မတီမှ ပြန်ကြားရေး တာဝန်ရှိသူ ဦးပက ပြောသည်။
လက်ရှိတွင် ကျောက်မဲမြို့အတွင်း စစ်ရှောင်စခန်း အရေအတွက်မှာ ဖေဖော်ဝါရီ ၁၆ ရက်ထိ ၁၅ ခု ရှိလာပြီး အဆိုပါ စခန်းများတွင် စစ်ဘေးရှောင်ဦးရေ ၃၀၀၀ ခန့် ရောက်ရှိ ခိုလှုံနေကြကာ ဆက်လက်၍ ရောက်ရှိလာနိုင် သေးကြောင်း သိရသည်။
“ကျွန်တော်တို့ မြေကျင်းတူးထားပြီး အသံတွေကြားရင် ပြေးဝင်နေရတယ်။ ပါခါးရွာမှာတောင် မီးရောင်မြင်လို့ လက်နက်ကြီးနဲ့ ထုလိုက်တာ ရွာသားတချို့ ဒဏ်ရာတွေ ရသေးတယ်။ ထမင်းငတ်တယ်။ ဘယ်မှလည်း မထွက်ရဲဘူး။ အခုလိုလာခေါ်တော့မှ ထွက်လာရဲတာပါ။ ကျန်တဲ့လူတွေ ရှိပါသေးတယ်။ တစ်နေ့လုံး ပစ်နေတာ။ ညဆိုရင် တစ်နာရီလောက်နားပြီး ပြန်ပစ်တယ်။ ဘယ်အချိန် ဗုံးကျမလဲမသိ စိုးရိမ်နေရပါတယ်’’ ဟု ကျောက်မဲ စစ်ရှောင်စခန်းရှိ တော့စန်ရွာသား ဦးစိုင်းမောင်က ပြောသည်။
ပန်စံရွာတွင် ကျန်နေသော ရွာသားများမှာလည်း လမ်းတွင် ရောက်ရှိခိုက် ညောင်းမောင်ရွာတွင် ပစ်ခတ်မှုများ ဖြစ်နေခြင်းကြောင့် ပန်စံရွာသားများမှာ ရွာတွင်းသို့ ပြန်ဝင်ကာ ပုန်းအောင်း နေခဲ့ကြသဖြင့် ၎င်းတို့ကိုလည်း သွားရောက် ခေါ်ဆောင်မည်ဖြစ်ကြောင်း သိရသည်။
သတင်း - MMK
Photo - Saung Phyu
The Ladies News
https://www.facebook.com/News.TheLadies
တိုက်ပွဲဖြစ်သည့် ရွာများမှ ရွာသားများကို ကျောက်မဲကော်မတီက သွားရောက် ကယ်ဆယ်
Reviewed by THITHTOOLWIN
on
18:38
Rating: