ကုန်းသီးဖြင့်ပစ်ခံရသည့် မန္တလာမင်းခရီးသည်တင်ယာဉ်ပြန်လည်ပြင်ဆင်ပြီးစီး

နေပြည်တော် ဖေဖော်ဝါရီ ၂၂

ရန်ကုန်-မန္တလေး အမြန်လမ်း ပေါ်တွင် ရန်ကုန်မှ မန္တလေးသို့ စတင် ထွက်ခွာလာသည့် မန္တလာမင်း ခရီးသည်တင်ယာဉ်ကို ဖေဖော်ဝါရီ ၂၁ ရက် ည ၉ နာရီက ကုန်းသီးဖြင့် ပစ်ခတ်ခံခဲ့ရပြီး ပြစ်မှုကျူးလွန်သူများ ကို ဖမ်းဆီးရမိခြင်းမရှိသေးကြောင်း နှင့် မော်တော်ယာဉ်ကို ပြန်လည်ပြင်ဆင်ပြီးစီးသွားပြီ ဖြစ်ကြောင်း သိရသည်။

မန္တလာမင်း ယာဉ်အမှတ် 9K/ ---- မော်တော်ယာဉ်သည် ရန်ကုန်မှ စတင်ထွက်ခွာလာခဲ့ပြီး အမြန်လမ်း မိုင်တိုင်အမှတ် ၃၇ မိုင် ၇ ဖာလုံအရောက်တွင် ယခုကဲ့သို့ ပစ်ခတ်ခံရခြင်းဖြစ်သည်။ ပစ်ခတ်မှု ကြောင့် မော်တော်ယာဉ်၏ ညာဘက် မှန်ကွဲခဲ့ပြီး ထိခိုက်ဒဏ်ရာရရှိမှု မရှိ ကြောင်း အမြန်လမ်းရဲတပ်ဖွဲ့မှူးရုံးမှ သိရသည်။

''ကျွန်တော်က မိုင်တိုင် ၁၁၉ မှာ ဆိုင်ကယ်နဲ့ကား တိုက်မိတဲ့ အတွက် အမြန်လမ်းရဲတပ်ဖွဲ့ဝင် တွေ၊ ကြက်ခြေနီတပ်ဖွဲ့ဝင်တွေနဲ့ အတူ အကူအညီသွားပေးနေတာပါ။ အပစ်ခံရတဲ့ကားက ကျွန်တော် နောက်ဆုံးဝယ်ထားတဲ့SCANIA Marcopolo ပါ။ ကြားကြားချင်း တော့ ပါလာတဲ့ခရီးသည်တွေအတွက် စိုးရိမ်လိုက်မိတယ်။ နောက်တော့ ထိခိုက်ဒဏ်ရာမရတာကို သိရတယ်။ ကားပျက်စီးတာကို မစိုးရိမ်ပါဘူး။ ကားတွေက အလုံးစုံအာမခံရှိပေမယ့် ခရီးသည်နဲ့ ယာဉ်မောင်းကိုတော့ စိုးရိမ်ခဲ့တယ်။ မဆင်မခြင်လုပ်ရပ် ဖြစ်တာမို့ အမြန်ဆုံးဖမ်းမိစေချင် တယ်''ဟု မော်တော်ယာဉ် ပိုင်ရှင် ကိုဇော်မိုး(ပိုင်အိုးနီးယား)က ပြောကြားသည်။

ယနေ့ မွန်းလွဲပိုင်းတွင် ကုန်းသီး ထိမှန်ထားသည့် ကားဘော်ဒီနှင့် ညာဘက်မှန်တို့ကို လဲလှယ်တပ်ဆင် ပြီးစီးခဲ့ပြီး ခရီးသည်များကိုလည်း ယင်းနေ့ည ပစ်ခတ်ခံရအပြီး ဂိတ်မှ အခြားမော်တော်ယာဉ်ကို အချိန် မဆိုင်းဘဲပို့ကာ ပြောင်းလဲစီးနင်းစေ ခဲ့ကြောင်း သိရသည်။

''ပစ်ခတ်သူကို ဖမ်းဆီးရမိခြင်း မရှိသေးပါဘူး။ ရထားတုန်းကလည်း ခဲနဲ့ပစ်တာမျိုး ရှိခဲ့ကြတယ်။ အနီး အနားကျေးရွာတွေအထိ လိုက်လံ စုံစမ်းစစ်ဆေးနေပါတယ်။ အမြန် လမ်းရဲတပ်ဖွဲ့ဝင်တွေအားလုံး သတိ နဲ့ စစ်ဆေး စောင့်ကြည့်မှုတွေလုပ် နေပါတယ်။ အခုနောက်ပိုင်းမှာ လုံခြုံ ရေးနဲ့ ခရီးသည်တွေရဲ့ အသက် အန္တရာယ်အတွက် အချိန်နဲ့အမျှ အမြန်လမ်းရဲတပ်ဖွဲ့က လုပ်ကိုင်ပေး နေရဲ့သားနဲ့ အခုလိုဖြစ်ရတာကို စုံစမ်းဖော်ထုတ်သွားမယ်''ဟု အမြန် လမ်းရဲတပ်ဖွဲ့မှူးရုံးမှ တာဝန်ရှိသူ တစ်ဦးက ပြောကြားသည်။

သတင်း-ခင်ရတနာ
ဓာတ်ပုံ-ဇော်မိုး(ပိုင်အိုးနီးယား)
MOI Webportal Myanmar
https://www.facebook.com/MOIWebportalMyanmar