ရခိုင်ပြည်နယ် မြို့အ၀င် ဂိတ်များတွင် အထူး ရှာဖွေ စစ်ဆေးမှုများပြုလုပ်

စစ်တွေ၊ နိုဝင်ဘာ ၁၉

ရခိုင်ပြည်နယ် ကားလမ်းပေါ်ရှိ မြို့အ၀င်ဂိတ်များတွင် အထူးရှာဖွေ စစ်ဆေးမှုများကို အာဏာပိုင်များက ယနေ့ နိုဝင်ဘာလ ၁၉ ရက်နေ့တွင် ပြုလုပ်ခဲ့သည်ဟု သိရသည်။

ထိုသို့ ပြုလုပ်သည်ကို သတင်းမီဒီယာသမားများကို ဖိတ်ခေါ်ပြီး ပြသခဲ့ကြောင်း ယင်းအခမ်းအနားသို့ တက်ရောက်ခဲ့သူ နိရဉ္စရာ လက်ထောက် အယ်ဒီတာ ဦးစံမောင်သန်းက ပြောသည်။

“ စစ်ဆေးတာက စစ်တွေမြို့ပြင် ကျောက်တန်းဂိတ်မှာပါ။ ရန်ကုန်နဲ့ စစ်တွေ ကားလမ်းပေါ်က ကားတွေအကုန်လုံးကို စစ်ဆေးပါတယ်။ မိူင်းရှာ ကရိယာတွေနဲ့ ရှာဖွေသလို အနံ့ခံ ခွေးတွေနဲ့လည်း ကားပေါ်မှာ ပါလာတဲ့ ပစ္စည်းတွေ အကုန်လုံးကို ရှာဖွေ စစ်ဆေးတာကို တွေ့ရပါတယ်။ လူတွေကိုလည်း ကားပေါ်က ဆင်းခိုင်းပြီး ရှာဖွေမှုတွေ လုပ်ပါတယ်” ဟု သူက ပြောသည်။

ယင်းစစ်ဆေးမှုကို ရခိုင်ပြည်နယ် လုံခြုံရေးနှင့် နယ်စပ်ရေးရာ ၀န်ကြီး အပါအ၀င် ပြည်နယ်၊ ခရိုင်၊ မြို့နယ် အဆင့် ရဲမှူးကြီးများက တိုက်ရိုက်ကိုင်တွယ် ဆောင်ရွက်ခဲ့ပြီး စစ်တပ်နှင့် ရဲတပ်ဖွဲ့ပေါင်း အင်အား ၃၀ ခန့်ပါဝင်သည်ဟု သိရသည်။

မီဒီယာများကို ခေါ်ယူ ပြသရခြင်းနှင့် ပတ်သက်ပြီး စစ်တွေ ခရိုင် ရဲမှူးကြီးက “ အဓိကတော့ လုံခြုံရေး၊ လူမှောင်ခို နှိမ်နှင်းရေးနဲ့ မူးယစ်ဆေးဝါး နှိမ်နှင်းရေးတို့ အတွက် ပြုလုပ်ဖြစ်ပါတယ်။ ဒီလို လုံခြုံရေးဆောင်ရွက်နေတာကို အများပြည်သူတွေ သိရှိစေလိုတဲ့ အတွက် မီဒီယာတွေကို ဖိတ်ခေါ်ရတာ ဖြစ်ပါတယ်” ဟု ရှင်းလင်း ပြောဆိုသည်။

ယခုကဲ့သို့ လုံခြုံရေး တိုးမြင့်ပြီး စစ်ဆေးရှာဖွေမှု တိုးမြင့် လုပ်ဆောင်ခြင်းနှင့် ပတ်သက်ပြီး ရခိုင်ပြည်နယ် ရဲမှူးကြီး နေမျိုးသို့ ဆက်သွယ်မေးမြန်းရာ ရွေးကောက်ပွဲ အလွန် အဖျက်အမှောင့်များ မဖြစ်ပေါ်ရန် ရည်ရွယ်၍ လုပ်ဆောင်ခြင်း ဖြစ်ကြောင်း ပြောဆိုသည်။

“ ခုလို ရှာဖွေ စစ်ဆေးမှုတွေကို စစ်တွေ- ရန်ကုန်ကားလမ်းတစ်လျှောက်ရှိ မြို့အ၀င် ဂိတ်တွေ၊ ကားကိတ်တွေမှာ ပြုလုပ်တာ ဖြစ်ပါတယ်။ စစ်တွေမြို့အ၀င် ကျောက်တန်းဂိတ်၊ ကျောက်တော်မှာလည်း အဲဒီအတိုင်းပါဘဲ။ အမ်းတို့မှာလည်း ပူးပေါင်းဂိတ်တွေမှာ ရှာဖွေ စစ်ဆေးမှုတွေ လုပ်ပါတယ်။ အဓိကတော့ ရွေးကောက်ပွဲ အလွန် မှာ အဖျက် အမှောင့်တွေ မဖြစ်ပေါ်ရအောင် ဆောင်ရွက်တာပါဘဲ” ဟု ရဲမှူးကြီးကဆိုသည်။

ရခိုင်ပြည်နယ် တွင် ဗုံးခွဲရန် အကြမ်းဖက် အဖွဲ့အစည်းများ ၀င်ရောက်နေသော သတင်းကြောင့် ယခုလို ရှာဖွေမှုတွေ ပြုလုပ်နေကြောင်း ဒေသခံများအကြား သတင်းများ ဖြစ်ပေါ်နေခြင်းနှင့် ပတ်သက်ပြီး မေးမြန်းရာ ရဲမှူး နေမျိုးက “ ဟိုဘက်တွေမှာလဲ အခု ပြင်သစ်မှာ ဖြစ်တဲ့ ပစ်ခတ်မှုတွေ၊ IS နဲ့ ဖြစ်နေတာတွေလည်း ကြားမှာပေါ့။ ပြင်သစ်တို့ အဲဒါမျိုးတွေကို ဖြစ်နေတဲ့ အတွက် ဒီဘက်မှာလည်း လုံခြုံရေး တိုးမြှင့် လုပ်တာ ဖြစ်တယ်။ ကမ္ဘာဖြစ်နေတဲ့ အနေအထားနဲ့ ဒီမှာ ဖြစ်နေတာနဲ့ပိုပြီး သေချာအောင် လုပ်တဲ့ သဘောပါ” ဟု ပြောဆိုသည်။

Arakan State
https://www.facebook.com/NarinjaraNews/