တရုတ်နိုင်ငံသားတစ်ဦး သတ်ဖြတ်ခံရခြင်းနှင့် စပ်လျဉ်း၍ သမ္မတ ရှီကျင့်ဖျင် က အပြင်းအထန် ရှုတ်ချ

 ပေကျင်း ၊ ၂၀-၁၁-၂၀၁၅

ISIS အစ္စလာမ်မစ် စစ်သွေးကြွ များ လက်အတွင်း ဖမ်းဆီးခံထား ရသည့် တရုတ်နိုင်ငံသား တစ်ဦး သတ်ဖြတ် ခံရခြင်းနှင့် စပ်လျဉ်း၍ ယင်းနိုင်ငံ သမ္မတ ရှီကျင့်ဖျင် က ယမန်နေ့တွင် အပြင်းအထန် ရှုတ်ချခဲ့ကြောင်း သိရသည်။

ဖန်ကျင်းဟွီ (ပုံ) အမည်ရှိ အဆိုပါ တရုတ် နိုင်ငံသားသည် ISIS အစ္စလာမ်မစ် စစ်သွေးကြွ များ၏ ဖမ်းဆီးခြင်းကို ယခုနှစ် စက်တင်ဘာလ အစောပိုင်းက ခံခဲ့ရခြင်း ဖြစ်ပြီး စစ်သွေးကြွ များသည် ၄င်းနှင့်အတူ နော်ဝေ နိုင်ငံသား ဓားစာခံ တစ်ဦးကိုပါ ဖမ်းဆီးထား ခဲ့ခြင်း ဖြစ်သည်။

သို့သော် ISIS အစ္စလာမ်မစ် စစ်သွေးကြွ များသည် ၄င်းတို့နှစ်ဦးကို မည်သည့် နေရာတွင် မည်သည့် အချိန်က ဖမ်းဆီး ခဲ့ခြင်းနှင့် စပ်လျဉ်း၍ အတိအကျ ထုတ်ပြန်ခဲ့ခြင်း မရှိပေ။ စစ်သွေးကြွ များသည် ဖန်ကျင်းဟွီနှင့် နော်ဝေနိုင်ငံသား အိုလေးဂျိုဟန် ဂရင်းဂါ့ဒ် အမည်ရှိ အမျိုးသား များကို ပြန်လည် လွှတ်ပေးရန် တောင်းဆိုထားသည့် ငွေကြေးကိုတရုတ်နှင့် နော်ဝေ နိုင်ငံတို့က ပေးအပ်ရန် ငြင်းဆိုပြီး နောက်ပိုင်းတွင် သတ်ဖြတ်ခဲ့ခြင်း ဖြစ်သည်။

ISIS အစ္စလာမ်မစ် စစ်သွေးကြွ များ၏ လုပ်ဆောင်ချက်ကို တရုတ် အစိုးရက အပြင်းအထန် ရှုတ်ချကြောင်းနှင့် အကြမ်းဖက် ဝါဒသည် လူသားများ အားလုံး၏ ရန်သူဖြစ်ကြောင်း၊ ထို့ကြောင့် လူသားများကို ခြိမ်းခြောက်လျက် ရှိသည့် အကြမ်းဖက်မှု များကို တိုက်ဖျက် သွားမည် ဖြစ်ကြောင်း မနီလာမြို့သို့ ရောက်ရှိနေသည့် တရုတ် သမ္မတ ရှီကျင့်ဖျင် က ပြောကြား ခဲ့ကြောင်း သိရသည်။

PyiChitThar
http://www.pyichitthar.com