Sydney ကဖေးဆိုင် စီးနင်းမှု သေနတ်သမားနဲ့အတူ ဓားစာခံ ၂ ဦးသေဆုံး

ဓားစာခံတွေကို တရက်နီးပါး ဖမ်းဆီး ထားခဲ့တဲ့ သြစတြေးလျနိုင်ငံ ဆစ်ဒနီမြို့က ချော့ကလက်ကဖေး ဆိုင်ကို လက်နက်အပြည့်နဲ့ ရဲတွေ ဝင်ရောက် စီးနင်းခဲ့တဲ့ အတွက် သေနတ်သမားနဲ့ အတူ ဓားစာ ခံနှစ်ဦးပါ အပါအဝင် လူပေါင်း ၃ ဦး သေဆုံး ခဲ့ရတယ်လို့ ရဲတွေက အတည်ပြု ပြောဆို ပါတယ်။

သေနတ်သမားက လူပေါင်း ၁၇ ယောက်ကို ၁၆ နာရီကြာ ဖမ်းဆီးခဲ့တာ ဖြစ်ပါတယ်။ အသက် ၅၀ အရွယ် သေနတ်သမားဟာ Man Haron Monis ဖြစ်ပြီး အီရန်နိုင်ငံကနေ ပြောင်းရွှေ့အခြေချလာသူဖြစ်တယ်လို့ New South Wales ရဲတွေကပြောပါတယ်။ သေဆုံးခဲ့ရသူနှစ်ဦးမှာ တစ်ဦးက အသက် ၃၄ နှစ်အရွယ် အမျိုးသားဖြစ်ပြီး နောက်တဦးက အသက် ၃၈ နှစ်အရွယ် အမျိုးသမီးတဦးဖြစ်ပါတယ်။

ဆိုင်ထဲကို ရဲတွေဝင်ရောက်ချိန်မှာ အပြန်အလှန်ပစ်ခတ်မှုတွေ ဖြစ်ပွားခဲ့ကြောင်းနဲ့ သူတို့ ဘယ်လိုသေဆုံးကြတယ်ဆိုတာကို အသေအချာ မပြောနိုင်သေးဘူးလို့ ပြည်နယ်ရဲမင်းကြီး Andrew Scipione ကပြောပါတယ်။ဒါ့အပြင် အခုတိုက်ခိုက်မှုဟာ တခြားဖြစ်ရပ်တွေနဲ့ ဆက်နွယ်မှုမရှိတဲ့ သီးခြား ဖြစ်ရပ်တခုလို့ဆိုပါတယ်။ နောက်ဓားစာခံ လေးဦးနဲ့ ရဲအရာရှိတဦးကတော့ ဒဏ်ရာတွေရခဲ့ကြပေမယ့် အသက်အန္တရာယ် သိပ်မရှိဘူးလို့လည်း ပြောပါတယ်။

သေနတ်သမားဟာ တနင်္လာနေ့မနက် ၉ နာရီ ၄၅ လောက်မှာ ဆစ်ဒနီမြို့ရဲ့ လူစည်ကားရာရပ်ကွက် Martin Place က Lindt ချော့ကလက်ကဖေးဆိုင်ကို စီးနင်းပြီး ဓားစာခံတွေ ဖမ်းဆီးခဲ့တာဖြစ်ပါတယ်။ တနင်္လာနေ့မှာ ဓားစာခံ ၅ ဦး လွတ်မြောက်လာသလို အင်္ဂါနေ့မနက်အစောပိုင်း ရဲတွေဝင်ရောက် မစီးနင်းခင်မှာလည်း နောက်ထပ် ၅ ဦး ထပ်မံလွတ်မြောက်သွားခဲ့ပါတယ်။ အခုလို လွတ်မြောက်သွားသူတွေထဲက သုံးဦးထက်မနည်းကို အရေးပေါ် ကယ်ဆယ်ရေး လုပ်သားတွေက ကယ်တင်ခဲ့တာ ဖြစ်ပါတယ်။

နောက်ပိုင်းပြသခဲ့တဲ့ ဗွီဒီယိုရုပ်သံမှာတော့ ဝတ်စုံပြည့်နဲ့ ရဲတွေက ဆိုင်ကိုဝိုင်းထားပြီး ဆိုင်အရှေ့ပေါက်ကနေ ဝင်ရောက်တိုက်ခိုက်ခဲ့တာဖြစ်ပါတယ်။ ဓားစာခံတွေ ဖမ်းဆီးခဲ့သူဟာ ရဲနဲ့ဆက်သွယ်ခဲ့ပေမယ့် သူဘာ့ကြောင့်အခုလို လုပ်ရတယ်ဆိုတာကို ညှိနှိုင်းသူတွေ မသိခဲ့ရဘူးလို့ ရဲပြောခွင့်ရက ပြောပါတယ်။

Man Haron Monis ဟာ အာဖဂန်နစ္စတန်မှာ တိုက်ပွဲတွေကြား သေဆုံးခဲ့ရတဲ့ သြစတြေးလျတပ်သားတွေရဲ့မိသားစုတွေဆီ သွားရောက်ပြီး ဝေဖန် အပြစ်တင်တဲ့စာတွေ ပေးဝေတာမျိုး လုပ်ဆောင်ခဲ့သူဖြစ်ပါတယ်။ သူဟာ ၂၀၁၃ ခုနှစ်မှာ သူ့ဇနီးဟောင်း အသတ်ဖြတ်ခံရမှုမှာ ပါဝင်ပတ်သက်နေသူ တယောက်ဖြစ်သလို ဒီနှစ်အစောပိုင်းမှာလည်း အမျိုးသမီးတဦးကို လိင်ပိုင်းဆိုင်ရာစော်ကားမှုနဲ့ တရားစွဲခံခဲ့ရတာပါ။

ကဖေးဆိုင်ထဲမှာ အဖမ်းအဆီးခံနေရစဉ်အတွင်း ဓားစာခံတွေဟာ မှန်ပြူတင်းကို မျက်နှာပြုပြီး လက်မြှောက်ရပ်နေကြသလို အမည်းရောင်အလံမှာ အစ္စလာမ်တွေရဲ့ Shahada လို့ခေါ်တဲ့ ဘုရားသခင်ဟာ အလ္လာတဦးထဲရှိပြီး သူ့တမန်တော်က မိုဟာမက်ဖြစ်ကြောင်း အဖြူရောင်နဲ့ ရေးသားထားတဲ့ စာတမ်းကိုပါ မှန်ပြူတင်းကနေ တွေ့မြင်ကြရပါတယ်။ ဒါဟာ IS အစ္စလန်စစ်သွေးကြွအဖွဲ့ အပါအဝင် အစ္စလာမ်အစွန်းရောက်တွေ လွှင့်ထူလေ့ရှိတဲ့ အလံဖြစ်ပါတယ်။

ကဖေးဆိုင်နားမှာရှိတဲ့ အမေရိကန်ကောင်စစ်ဝန်ရုံးအပါအဝင် အဆောက်အဦးတွေထဲကလူတွေကို တနင်္လာနေ့က ဖယ်ရှားခိုင်းခဲ့သလို မနီးမဝေးက ဆစ်ဒနီမြို့ရဲ့ နာမည်ကျော် Opera House မှာလည်း မသင်္ကာဖွယ် အထုပ်တထုပ်တွေ့ခဲ့တာမို့ လူတွေဖယ်ရှားခိုင်းခဲ့တာပါ။ ဆိုင်တဝိုက်က လမ်းတွေတင်မက အောက်ဘက်မှာပြေးနေတဲ့ မြေအောက်ရထားလမ်းကိုပါ ပိတ်ပစ်ခဲ့ပါတယ်။

ဒီနှစ်အစောပိုင်းကတည်းက သြစတြေးလျနိုင်ငံမှာ ပြည်တွင်းအကြမ်းဖက်သမားတွေရဲ့အန္တရာယ်ကို စိုးရိမ်တဲ့အတွက် သတိပေးမှုအဆင့်ကို တိုးမြှင့်ထားခဲ့ပါတယ်။အရှေ့အလယ်ပိုင်းဒေသမှာ သွားရောက်တိုက်ခိုက်နေတဲ့ သြစတြေးလျနိုင်ငံသား စုစုပေါင်း ၇၀ လောက် ရှိမယ်လို့လည်း ခန့်မှန်းထားပါတယ်။

ဗွီအိုအေ (မြန်မာဌာန)
http://burmese.voanews.com/content/sydney-cafe-seige-leaves-gunman-and-2-hostages-/2560032.html