ချယ်ရီဦးကုမ္ဗဏီက Romanson နာရီအလုံး ၉၀၀ကျော် လိမ်လည်တင်သွင်းမှု ပြည်ထောင်စုအစိုးရအဖွဲ့မှ ပြန်လည်စစ်ဆေးမည်

Naing မိသားစုပိုင် နာမည်ကျော် ချယ်ရီဦး နာရီ ကုမ္ဗဏီက ဆွစ်ဇာလန်နိုင်ငံလုပ် ကမ္ဘာကျော် နာရီ အမှတ်တံဆိပ် ဖြစ်သည့် Romanson နာရီအလုံး ၉၀၀ ကျော်ကို ပြုလုပ်သည့် နိုင်ငံအမှတ်အသား မပါဘဲ ကိုရီးယား နိုင်ငံထုတ်ဟု တင်သွင်းလာမှုကို ပြည်ထောင်စု အစိုးရအဖွဲ့မှ အစမှအဆုံး ပြန်လည် စစ်ဆေးသွားမည် ဖြစ်ကြောင်း သိရသည်။

ဖြစ်စဉ်မှာ စက်တင်ဘာလ ၃ ရက်နေ့က လေကြောင်းမှတဆင့် ချယ်ရီဦးကုမ္ဗဏီအမည်ဖြင့်တင်သွင်းလာသော နာရီများကို ရန်ကုန်အပြည်ပြည်ဆိုင်ရာလေဆိပ်တွင် တာဝန်ကျသောအကောက်ခွန်ဌာနနှင့် Mobile Team အဖွဲ့တို့ ပူးပေါင်းစစ်ဆေးခဲ့ရာ လိုင်စင်နှင့် အရေအတွက်တူသော်လည်း ထုတ်လုပ်သည့်နိုင်ငံ(Made In)မပါရှိသည့်နာရီအလုံး ၈၀၀နှင့် ဆွစ်ဇာလန်နိုင်ငံထုတ်(Swiss Made)ပါ နာရီ ၁၃၇လုံး စုစုပေါင်း နာရီ ၉၃၇လုံး စစ်ဆေးတွေ့ရှိခဲ့ခြင်း ဖြစ်သည်။

“အကောက်ခွန်စစ်ဆေးရေးအဖွဲ့ဝင် ဒုအကောက်ခွန်မှူးဦးဖြိုးစံက စစ်ဆေးတွေ့ရှိမှုကင်းရှင်းတယ်ဆိုပြီး လက်မှတ်ထိုးပေးလိုက်တော့ နာရီတွေအားလုံး ကုမ္ဗဏီက ထုတ်ယူသွားတယ်၊ သူ့အနေနဲ့ ဒုအကောက်ခွန်မှူးဆိုပေမယ့် Mobile Team အဖွဲ့က တာဝန်ခံမဟုတ်ဘူး၊ အဲဒါကို ကျနော်တို့နဲ့ မတိုင်ပင်ဘဲ ဒီအတိုင်း တာဝန်ပေါ့လျော့စွာ လက်မှတ်ထိုးပေးလိုက်တယ်၊ အခု သူ့ကိုလည်း သက်ဆိုင်ရာဌာနက အရေးယူထားတယ်၊ ကိစ္စကို အစအဆုံးပြန်စစ်ဆေးဖို့ ပြည်ထောင်စုအစိုးရအဖွဲ့ကို စာတင်လိုက်တယ်၊ အခု ဖြစ်စဉ်အားလုံးကို သက်ဆိုင်ရာဌာနဆိုင်ရာအားလုံးပူးပေါင်းစစ်ဆေးမယ်”ဟု စီးပွား/ကူးသန်းဝန်ကြီးဌာန၊ Mobile Team စစ်ဆေးရေးအဖွဲ့မှ ညွှန်ကြားရေးမှူးဦးတင်ရဲဝင်း က ပြောသည်။

တင်သွင်းလာသည့်နာရီများအနက် ၁၃၇လုံးမှာ ဆွစ်ဇာလန်နိုင်ငံထုတ်ဖြစ်ကြောင်း၊ နာရီဒိုင်ခွက်နှင့် အောက်ခံအဖုံးတို့တွင် အထင်အရှားပါရှိသော်လည်း အကောက်ခွန်တာဝန်ရှိသူက ကိုရီးယားထုတ်ဟုသတ်မှတ်ကာ ထုတ်ယူခွင့်ပြုခဲ့သလို ကျန်အလုံး ၈၀၀မှာလည်း နာရီဒိုင်ခွက်တွင် Romanson တံဆိပ်သာပါရှိသည့်အတွက် မြန်မာနိုင်ငံရောက်မှ ဆွစ်ဇာလန်မှ ထုတ်သည်ဟု ရိုတ်နှိပ်ကာ ဈေးတင်ရောင်းချနိုင်သောကြောင့် တိုင်းပြည်အတွက်များစွာ နစ်နာကြောင်း၊ တင်သွင်းတန်ဖိုးမှာလည်း ဒေါ်လာ ၄၀ သာ ဖြစ်သည့်အတွက် Romanson အစစ်ဖြစ်ရန် မသေချာကြောင်း ညွှန်မှူးက ဆက်လက်ပြောကြားသည်။

“Romanson ဆိုတာ တကယ့်ကမ္ဘာကျော် Swiss တံဆိပ်အမှတ်အသားပါ၊ တလုံးကို အနည်းဆုံး ၁ သိန်းခွဲကနေ အများဆုံး ၆ သိန်းအထိ တန်ကြေးရှိတယ်၊ အဲဒါကို တဖက်နိုင်ငံကနေ ဘယ်နိုင်ငံထုတ်လုပ်တယ်ဆိုတာ မပါဘဲနဲ့ ဒီအတိုင်းဈေးပေါပေါနာရီတွေ တင်သွင်းလာပြီး ဒီရောက်မှ Swiss Made လို့ကပ်ပြီး ဈေးတင်ရောင်းချလိုက်ရင်တော့ ပြည်သူတွေနစ်နာပါလိမ့်မယ်၊ အဲဒါကြောင့် ဘရန်းဆိုတိုင်း အတုအစစ်ခွဲခြားတတ်တဲ့ တတ်ကျွမ်းသူနဲ့ တိုင်ပင်ပြီးမှ ၀ယ်သင့်တယ်”ဟု မဟာဗန္ဓုလလမ်းရှိ နာရီအရောင်းဆိုင်တဆိုင်မှ အရောင်းမန်နေဂျာတဦးက အကြံပြုသည်။

ချယ်ရီဦးကုမ္ဗဏီသည် ရန်ကုန်၊ မန္တလေး၊ နေပြည်တော်၊ မော်လမြိုင်မြို့တို့တွင် နာရီအရောင်းပြခန်းများစွာ ဖွင့်လှစ်ရောင်းချနေသော သက်တမ်းရင့် နာရီအရောင်းဆိုင်တဆိုင်ဖြစ်ပြီး Swiss Made နာရီများကို မြန်မာနိုင်ငံကိုယ်စားလှယ်အနေနှင့် ၀ယ်ယူရောင်းချနေသော ဆိုင်ဖြစ်ကြောင်း သိရသည်။

“နာရီခွက်နှင့် ဒိုင်ခွက်တွေက Swiss Made တွေပါ၊ ကိုရီးယားနိုင်ငံမှာ တပ်ဆင်ပြီး မြန်မာနိုင်ငံကိုတဆင့် ပြန်သွင်းပါတယ်၊ အခုပြဿနာနှင့် ပတ်သက်လို့ ဘာမှ မသိရှိပါဘူး”ဟု ချယ်ရီဦးအရောင်းတာဝန်ခံတဦးက ဆိုသည်။

မြတ်ထွဋ်ကျော်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal?fref=nf