သီပေါမြို့နယ် ဆီဆုံရွာမှ အမျိုးသားတစ်ဦး နေအိမ်တွင် သေနတ်ဖြင့် ပစ်သတ်ခံရ

ရှမ်းပြည်နယ်(မြောက်ပိုင်း) သီပေါမြို့နယ် မိုင်းလင်းကျေးရွာအုပ်စု ဆီဆုံရွာသစ်တွင် အမျိုးသားတစ်ဦးအား ၎င်း၏နေအိမ်ခြံဝင်းအတွင်း ဇူလိုင်လ (၆)ရက်နေ့ နံနက်(၁)နာရီဝန်းကျင်တွင် သေနတ်ဖြင့် လာရောက်ပစ်ခတ်သွားသဖြင့် သေဆုံးသွားကြောင်း သိရသည်။

သေနတ်ဖြင့်ပစ်ခတ်ခံရသူမှာ အသက်(၅၂)နှစ်အရွယ် ဦးကျော်ဝင်းနိုင်ဆိုသူဖြစ်ပြီး နေအိမ်ခြံဝင်း တံခါးအနီးတွင် သေနတ်ဒဏ်ရာ(၃)ချက်ဖြင့်သေဆုံးနေခြင်းဖြစ်ကြောင်း သီပေါမြို့နယ်ရဲတပ်ဖွဲ့က အတည်ပြုပြောကြားသည်။

“ရဲတပ်ဖွဲ့လည်း ရောက်ရှိစစ်ဆေးနေတယ်။ ကျွန်တော်တို့ကတော့ အလောင်းကိုသွားသယ်ပြီး သီပေါ ပြည်သူ့ဆေးရုံ ရင်ခွဲရုံကို ပို့ဆောင်ပေးထား တယ်” ဟု နယ်စည်းမခြား ပရဟိတအသင်း(သီပေါ) မှ ကိုမျိုး က ပြောသည်။

အဆိုပါပစ်ခတ်ခံရမှုနှင့်ပတ်သက်၍ သီပေါမြို့နယ်ရဲစခန်းတွင် သေမှုသေခင်းအမှတ်စဉ် ၈၆/၂၀၁၈ ဖြင့် စစ်ဆေးဆောင်ရွက်နေကြောင်း သိရသည်။

၂၀၁၈ ခုနှစ် ဇန်နဝါရီလမှ ဇူလိုင်လအထိ သီပေါမြို့ နယ်အတွင်း သေနတ်ဖြင့်ပစ်ခတ်ခံရမှု (၅)မှုဖြစ်ပွားပြီး လူ(၅)ဦးသေဆုံးခဲ့ကာ ပစ်ခတ်မှု(၁)ခုမှ ကျူးလွန်သူကို ဖမ်းဆီးရမိထားကာ ကျန်အမှုများမှာ စုံစမ်းဆဲဖြစ်ကြောင်း သိရသည်။

သတင်း - နေဖြိုးမြင့်
ဓါတ်ပုံ - နယ်စည်းမခြားပရဟိတ(သီပေါ)
Tachileik News Agency
https://www.facebook.com/TachileikNewsAgency/