မဲခေါင်၊ စက်တင်ဘာ ၉
မွန်ပြည်နယ်၊ သထုံမြို့နယ်၊ လျှပ်စစ်မီတာရုံးရှေ့က စစ်ကောင်စီအဖွဲ့တွေရဲ့ လုံခြုံရေးဘန်ကာထဲ သထုံမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) က ဒီကနေ့မနက် ၁၀ နာရီကျော်လောက်မှာ ဗုံး ၂ လုံးပစ်ထည့်ခဲ့တယ်လို့ သိရပါတယ်။
နန်းထိုက်အောင်စစ်ဆင်ရေးလို့ အမည်ပေးထားတဲ့ အဲ့ဒီဗုံးပစ်ထည့်မှုမှာ ဘန်ကာထဲမှာ ဖုန်းသုံးနေတဲ့ စစ်ကောင်စီတပ်ဖွဲ့ဝင် ၂ ယောက်ထိခိုက်ခဲ့တယ်လို့ သထုံမြို့နယ် ပြည်သူ့ကာကွယ်ရေးတပ်ဖွဲ့ ( ပကဖ) က ပြောပါတယ်။
“သူတို့ဘန်ကာက လမ်းမနဲ့ကပ်လျက်ရှိတာ၊ ကင်းကျတာက နှစ်ယောက်ထဲ ကျန်တဲ့လူတွေက မီတာရုံးထဲမှာ ရှိတဲ့အချိန်မှာ ပစ်ထည့်တာပါ” လို့ ဗုံးပစ်ထည့်ခဲ့တဲ့ သထုံမြို့နယ် ပြည်သူ့ကာကွယ်ရေးတပ်ဖွဲ့ ( ပကဖ ) က မဲခေါင်သတင်းဌာနကို ပြောပါတယ်။
ဗုံးပစ်ထည့်ပြီး ပေါက်ကွဲသွားချိန်မှာ ဒဏ်ရာရှိတာတွေရှိပြီး မြို့တွင်းမှာဖြစ်တဲ့အတွက် စစ်ကောင်စီဘက်က ပြန်လည်ပစ်ခတ်ချိန်မရလိုက်ဘူးလို့ သထုံ ပကဖ က ပြောပါတယ်။ စစ်ဆင်ရေးပြီးနောက် မြို့ပြင်မှာ စစ်ကောင်စီအဖွဲ့ပေါင်းစုံနဲ့ စစ်ဆေးတာတွေ လုပ်နေတယ်လို့ သိရပါတယ်။
သထုံ ပကဖ ဟာ စက်တင်ဘာ ၅ ရက် ည ၇ နာရီခန့်က နန်းထိုက်အောင်စစ်ဆင်ရေးအဖြစ် သထုံမြို့ ကြာပန်းတိုးဂိတ်နားက စစ်ကောင်စီစစ်ဆေးရေးဂိတ်ကို ၄၀ မမနဲ့သွားရောက်ပစ်ခတ်ခဲ့ပါသေးတယ်။
MeKong News - မဲခေါင်သတင်း
Reviewed by THITHTOOLWIN
on
19:38
Rating:
No comments:
Post a Comment