မွန်ပြည်နယ်၊ မော်လမြိုင်၊ သထုံနှင့် ရေးမြို့တို၌ ယနေ့စက်တင် ဘာလ ၉ ရက်နေ့တွင် အာဏာသိမ်းစစ်ကောင်စီတပ်သားများ တိုက်ခိုက်ခံရပြီး စစ်ကောင်စီတပ်သားများ ထိခိုက်မှုရှိခဲ့ကြောင်း သိရသည်။
မော်လမြိုင်မြို့၊ မြိုင်သာယာရပ်ကွက်၊ ဦးစစ်မောင်လမ်း၌ နံနက် ၈ နာရီဝန်းကျင်က စစ်ကောင်စီတပ်သားများစီးနင်းလာသည့် ခြောက်ဘီးကားကြီးတစ်စီးကို ရှေ့ထွက်မိုင်းဖြင့် ဖောက်ခွဲတိုက်ခိုက်ခဲ့ကြောင်း Federal Freedom UG က သတင်းထုတ်ပြန်သည်။
၎င်းစစ်ဆင်ရေးသည် မောင်မောင်ကျော် စစ်ဆင်ရေးဖြစ်ပြီး စစ် ကောင်စီတပ်သားများ ထိခိုက်မှုအသေးစိတ်ကို မသိရှိရသေးဟု ဆိုသည်။
ဒါအပြင် နံနက် ၁၁ နာရီဝန်းကျင်တွင်လည်း သထုံမြို့နယ် မီတာရုံးကို သထုံမြို့နယ်ပြည်သူ့ကာကွယ်ရေးအဖွဲ့ (ပကဖ)မှ နန်းထိုက်အောင် စစ်ဆင်ရေးအဖြစ် လက်ပစ်ဗုံး ၂ လုံးဖြင့် သွားရောက်ပစ် ခတ်ခဲ့ကြာင်း သိရသည်။
အဆိုပါတိုက်ခိုက်မှုကြောင့် ဘန်ဘာအတွင်းကင်းစောင့်ရင်း ဖုန်းသုံးနေသည့် စစ်ကောင်စီတပ်သား နှစ်ဦးထိမှန်ခဲ့ကြောင်း သထုံပြည်သူ့ ကာကွယ်ရေးတပ်ဖွဲ့က သတင်းထုတ်ပြန်ထားသည်။
ရေးမြို့တွင်လည်း နံနက် ၁၁ နာရီခွဲကျော်က မြို့လယ်ရှိ ခရိုင်ရုံးကို ၄၀ မမဖြင့် ပစ်ခတ်ခဲ့ကြောင်း ရေးဘီလူးအဖွဲ့က သတင်းထုတ်ပြန်ထားသည်။
Tachileik News Agency
No comments:
Post a Comment