မတ္တရာနယ်ထဲ သောင်းကျန်းနေတဲ့ စစ်အုပ်စုကို မတ္တရာ ပကဖ နှင့် မန္တလေး PDF ပေါင်းပြီး မိုင်းဆွဲတိုက်ခိုက်၊ စကစ (၁၀)ယောက် သေ ဟုဆို

ဇွန် - ၁၂

မန္တလေးတိုင်း မတ္တရာမြို့နယ်ထဲ ရွာစဉ်ပတ်မွှေ သောင်းကျန်းနေတဲ့ အကြမ်းဖက် စစ်အုပ်စုရဲ့ ကားနှစ်စီးကို ဒီကနေ့ နေ့လည်ပိုင်းမှာ မတ္တရာ ပကဖ နှင့် မန္တလေး PDF တို့ ပူးပေါင်းပြီး မိုင်းထောင်ဖောက်ခွဲ တိုက်ခိုက်ခဲ့ရာမှာ စကစ (၁၀)ဦးထက်မနည်း သေနိုင်တယ်လို့ ပြည်သူ့ကာကွယ်ရေး တပ်ဖွဲ့ - မတ္တရာမြို့နယ် (ပကဖ) က သတင်းထုတ်ပြန်ပါတယ်။

မတ္တရာမြို့နယ် ရေကြည်ကျေးရွာအုပ်စု တောင်နီတောင်ခေါင်း ဒေသဘက် ဝင်မွှေသောင်းကျန်းပြီး ပြန်လာတဲ့ အကြမ်းဖက် စစ်အုပ်စုရဲ့ ကားနှစ်စီးကို ဒီကနေ့ ဇွန်(၁၂)ရက် နေ့လည်(၂)နာရီကျော်မှာ မတ္တရာမြို့နယ် အရှေ့ပိုင်း ကင်းရွာအနီးက ကျောက်ကြမ်းတောင်အနီးမှာ မတ္တရာ ပကဖ နှင့် Mandalay People’s Defence Force (ပြည်သူ့ကာကွယ်ရေး တပ်မတော် - မန္တလေး) – PDF မန္တလေးတို့ ပူးပေါင်းပြီး မိုင်းဆွဲ တိုက်ခိုက်ခဲ့တာလို့ ဆိုပါတယ်။

“ပြင်းထန်သော ပဒေသာမိုင်း အမျိုးအစားဖြစ်ပြီး စစ်ခွေး (၁၀)ဦး ပွဲချင်းပြီး သေကာ ပြင်းထန်ဒဏ်ရာရသူ ရှိနိုင်ကြောင်း မြေပြင်သတင်းများအရ အတည်ပြုနိုင်ခဲ့သည်” လို့ မတ္တရာ ပကဖ က ဖော်ပြပါတယ်။

အကြမ်းဖက် စစ်အုပ်စုဟာ မတ္တရာနယ်ထဲ ရွာစဉ်ပတ်မွှေ သောင်းကျန်းနေပြီး ဒေသခံပြည်သူတွေကို သတ်ဖြတ်တာ၊ ဖမ်းဆီးငွေညှစ်တာ၊ နေအိမ်မီးရှို့တာ၊ ကျေးရွာတွေကို ဝင်စီးပြီး ဒေသခံပြည်သူတွေရဲ့ တန်ဘိုးကြီး ပစ္စည်းတွေကို ဓားပြတိုက်လုယက် ခိုးယူတာတွေ ထင်တိုင်းကျဲ ကျူးလွန်နေတာ ဖြစ်ပါတယ်။

Mandalay Free Press - MFP