စစ်တပ်ရိက္ခာပို့ကားနှင့် KNDF အဖွဲ့ဝင်များ ယနေ့ထိပ်တိုက်တွေ့ဆုံခဲ့ပြီး အကြမ်းဖက်စစ်သား (၄) ဦးသေ

Photo : KNDF

လွိုင်ကော်၊ ဇွန် (၃၀)

ကရင်နီ (ကယား) ပြည်နယ်၊ လွိုင်ကော်-လောပိတလမ်းပေါ်၌ ယနေ့နံနက်ပိုင်းက စစ်ကောင်စီ၏ ရိက္ခာပို့ကားတစ်စီးနှင့် ထိပ်တိုက်တွေ့ခဲ့ပြီး အကြမ်းဖက်စစ်သား (၄) ဦးကို ရှင်းလင်းနိုင်ခဲ့သည်ဟု ကရင်နီအမျိုးသားများကာကွယ်ရေးတပ် (KNDF) က ယနေ့ညပိုင်းတွင် သိမ်းဆည်ရမိခဲ့သည့် ပစ္စည်းများနှင့်အတူ ထုတ်ပြန်လိုက်သည်။

လောပိတအမှတ်(၂) သင်္ဘောပင်စခန်းနှင့် ဒန်းဦးဘုရားကျောင်းကြား လမ်းမပေါ်၌ KNDF တပ်ရင်းအမှတ်(၁၀)မှ ကင်းလှည့်လှုပ်ရှားမှု ပြုလုပ်နေစဉ် စစ်ကောင်စီကားနှင့် ထိပ်တိုက်တွေ့ကာ တိုက်ပွဲဖြစ်ပွားခဲ့ခြင်းဖြစ်သည်ဟု ဆိုသည်။

တိုက်ပွဲမှာ နံနက် (၈:၄၅)မိနစ် မှ (၉:၀၅)မိနစ်ထိ ကြာမြင့်ခဲ့ပြီး တပ်ရေးဗိုလ်ကြီးတစ်ဦး၊ တပ်ကြပ်ကြီးတစ်ဦးနှင့် တပ်သားနှစ်ဦး စုစုပေါင်း (၄) ဦး သေဆုံးခဲ့ကြောင်း ထုတ်ပြန်ချက်တွင်ဖော်ပြထားသည်။

တိုက်ပွဲအပြီး ယာဉ်ပေါ်ပါသည့် တပ်ရေးဗိုလ်ကြီး ကိုင်ဆောင်သည့် ၉ မမ ပစ္စတို သေနတ်(၁)လတ် ၊ ကျည် (၁၂)တောင့်နှင့် ဖုန်း (၂)လုံးတို့ကို သိမ်းဆည်းရမိခဲ့ပြီး KNDF ဘက်မှ အထိအခိုက်မရှိဘဲ ပြန်ဆုတ်ခွာနိုင်ခဲ့သည်ဟု ဆိုသည်။

စစ်ကောင်စီ၏ လောပိတအခြေစိုက် အမှတ်(၇၂)တပ်ရင်းက တိုက်ပွဲ ဖြစ်ပွားရာအနီးရှိ ကျေးရွာများဘက်သို့ လက်နက်ကြီးများ ရမ်းသမ်းပစ်ခတ်ခဲ့သည့်အတွက် လေးအိမ်စုရွာအတွင်း လက်နက်ကြီးကျရောက်၍ နေအိမ်တစ်လုံး ထိခိုက်ပျက်ဆီးသွားကြောင်းလည်း သိရသည်။ 

Lu Nge Khit