စစ်​ကောင်စီစစ်​ကြောင်းမှ စစ်​ရှောင်များရှိရာ​ နေရာသို့လက်နက်ကြီးဖြင့် ပစ်ခတ်ခဲ့​သော​ကြောင့် စစ်​ရှောင် ငါးဦး​သေဆုံး

ရေဦး - မေ ၂၀၊ ၂၀၂၂။ 

စစ်​​ကောင်စီစစ်​ကြောင်း၏ လက်နက်ကြီးပစ်ခတ်မှု​ကြောင့် စစ်ကိုင်းတိုင်း‌ ​ရေဦးမြို့နယ် မူးမြစ်တစ်ဖက်ကမ်းရှိ တာတိုင်​ကျေးရွာမှ စစ်ရှောင် ငါးဦး ယမန်​နေ့ မွန်းလွှဲ သုံးနာရီက သေဆုံးခဲ့ကြောင်း သိရသည်။ 

စစ်ကောင်စီတပ်မှ စစ်သည်အင်အား ၉၀ ဦး ခန့်ဖြင့် ပေါက်သာရွာ မှ ချောင်းဦး‌ပေါက်ရွာသို့ ထွက်လာချိန်တွင် မိုင်းဆွဲတိုက်ခိုက်ခံခဲ့ရသဖြင့် မူးမြစ်တစ်ဖက်ကမ်းရှိ တာတိုင်ရွာမှ စစ်​ရှောင်များကို လက်နက်ကြီးဖြင့် ပစ်ခတ်ခဲ့​ကြောင်း ရေဦးမြို့နယ် ပြည်သူ့ကာကွယ်ရေးတပ်ဖွဲ့ (တောင်ပိုင်း) မှ သတင်းနှင့်ပြန်ကြားရေး တာဝန်ခံတစ်ဦးက The 74 Media ကိုပြောသည်။ 

“ပေါက်သာရွာဘက်က စစ်ရှောင်နေတဲ့ ရွာသားတွေက ကမ်းဘေးကနေ ကြည့်နေတဲ့အချိန်မှာ အဲ့ရွာသားတွေထဲကို သူတို့(စစ်​ကောင်စီ)လှမ်းပြီးတော့ လက်နက်ကြီးနဲ့ပစ်တယ်” ဟု ပြောသည်။ 

စစ်​ကောင်စီစစ်​ကြောင်း၏ လက်နက်ကြီး​ကြောင့် တာတိုင်​ကျေးရွာမှ စစ်ရှောင် ၁၁ ဦးတွင် ၅ ဦး​သေဆုံးခဲ့​ပြီး ၂ဦးဒဏ်ရာပြင်းထန်ခဲ့ကြောင်း သူကဆိုသည်။ 

​​လက်နက်ကြီးထိမှန်၍ သေဆုံးခဲ့သောပြည်သူများမှာ ​ပေါက်​သာကျေးရွာမှ တာတိုင်​ကျေးရွာသို့ စစ်​ရှောင်လာ​သော ဦးဝင်းကို အသက် ၅၀ နှစ်၊ ကိုကျော်နိုင် အသက် ၄၁ နှစ်၊ ကိုနိုင်လင်းမောင် ၃၇ နှစ်၊ ကိုပြေ  ၂၇ နှစ်နှင့် ဦးတင်လင်း ၅၂ နှစ်တို့ဖြစ်ကြောင်း သိရသည်။ 

စစ်​ကောင်စီစစ်​ကြောင်းက စစ်​ရှောင်များကို ထိုကဲ့သို့ လက်နက်ကြီးပစ်ခတ်ပြီး​နောက် ရေဦးပြည်သူ့ကာကွယ်ရေးတပ်ဖွဲ့နှင့် စစ်ကောင်စီစစ်​ကြောင်း တိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့ဝင် ၃၀ ဦးခန့် သေဆုံးခဲ့ကြောင်း သိရသည်။ 

စစ်ကောင်စီစစ်​ကြောင်းသည် လွန်ခဲ့သည့် သုံးရက်ကလည်း ချောင်းဦးမြို့ရှိ ပိဋက္က​ကျေးရွာတွင် ၁ အိမ်၊ မူးသာကုန်းရွာတွင် ၄ အိမ်နှင့် ယမန်နေ့က ဇိန်ဇွန်းကျေးရွာတွင် ၅ အိမ်၊ ပေါက်သာတွင် ၃ အိမ် စုစု​ပေါင်း ပြည်သူများ၏ နေအိမ်  ၁၃ အိမ် မီးရှို့ဖျက်ဆီးခဲ့ကြောင်းသိရသည်။

The 74 Media