မြောင် - မေ ၁၇၊ ၂၀၂၂၊
ချောင်းဦး - မြင်းမူ လမ်းတွင် စစ်ကောင်စီကင်းပုန်းလာချသည့် အန်စာတုံးကားတစ်စီးကို ယနေ့မွန်းလွဲ ၁ နာရီခန့်က မြောင်ပြည်သူ့ကာကွယ်ရေးပူးပေါင်းတပ် CDSOM က မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ငါးဦးသေဆုံးခဲ့ပြီး နှစ်ဦးထိခိုက်ဒဏ်ရာရရှိခဲ့ကြောင်း သိရသည်။
မိုင်းဆွဲတိုက်ခိုက်ပြီးနောက် သေဆုံးသည့် စစ်ကောင်စီတပ်ဖွဲ့ဝင်အရေအတွက်ကို သွားရောက်အတည်ပြုရာတွင် အလောင်းများကို တွေ့ရှိခဲ့ခြင်းဖြစ်သည်ဟု မြောင်ပြည်သူ့ကာကွယ်ရေးပူးပေါင်းတပ် CDSOM မှ တာဝန်ရှိသူတစ်ဦးက The 74 Media ကိုပြောသည်။
“မိုင်းဆွဲပြီး ပြန်လာအတည်ပြုနိုင်ဖို့ ပြန်သွားကြည့်တာမှာ ကားဘေးမှာ အလောင်းတွေချထားတာတွေ့ရတယ်။ ငါးကောင်ထဲက တစ်ကောင်ကတော့ ခါးပိုင်းစုတ်ပြတ်ပြီး လွင့်ထွက်သွားတာ” ဟုသူကပြောသည်။
ယနေ့နံနက် ၅ နာရီခန့်က မိုင်းခွဲတိုက်ခိုက်ရန်စောင့်ဆိုင်းနေသည့် မြောင်ပြည်သူ့ကာကွယ်ရေးပူးပေါင်းတပ် CDSOM ကို စစ်ကောင်စီတပ်က အလစ်ဝင်တိုက်ခဲ့သဖြင့် ပစ္စည်းများ ဆုံးရှုံးခဲ့ရသောကြောင့် ပြန်လည် တိုက်ခိုက်ခဲ့ခြင်းဖြစ်ကြောင်း သူကဆက်ပြောသည်။
အလစ်တိုက်ခိုက်ခံရချိန်တွင် မြောင်ပြည်သူ့ကာကွယ်ရေးပူးပေါင်းတပ် CDSOM က အိန္ဒိယတစ်တောင့်ထိုး တစ်လက်၊ ဘက်ထရီအိုး နှစ်လုံး၊ ဖုန်းနှစ်လုံးနှင့် မီးကြိုးခွေတစ်ခွေတို့ ဆုံးရှုံးခဲ့ရကြောင်းသိရသည်။
မွန်းလွဲပိုင်းတိုက်ခိုက်မှုတွင် CDSOM ကဦးဆောင်ပြီး M2W က ထုတ်လုပ်သောမိုင်းဖြင့် ကန္တာရသိမ်းငှက်၊ တူမီးဖိုက်တာ၊ CRA ချောင်းဦး၊ black Eagle မြင်းမူ၊ M2W၊ C.R.F မြင်းမူတို့ ပူးပေါင်း တိုက်ခိုက်ခဲ့ခြင်းဖြစ်ကြောင်း သိရသည်။
မြောင်မြို့နယ်သို့ စစ်ရေးလှုပ်ရှားမှုပြုလုပ်လာသည့် စစ်ကောင်စီစစ်ကြောင်းကို မေလ ၂ရက်နေ့ကလည်း မြောင်ပြည်သူ့ကာကွယ်ရေးပူးပေါင်းတပ်ဖွဲ့က တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃၅ ဦးခန့် သေဆုံးခဲ့သည်။
The 74 Media
Reviewed by THITHTOOLWIN
on
23:35
Rating:
No comments:
Post a Comment