မတ်လ ၂၂ ရက်၊ ၂၀၂၂ ခုနှစ်။
ကရင်ပြည်နယ် မြဝတီမြို့ သင်္ဃန်းညီနောင်အထွက် အာရှလမ်းရှိ မြို့ဝင်ကြေးကောက်သည့်ဂိတ်အား ယနေ့ နံနက်ပိုင်းက လက်နက်ကိုင်အဖွဲ့တစ်ခုမှ သေနတ်ဖြင့်ပစ်ခတ်ခဲ့ရာ ဂိတ်ရှိ အမျိုးသား ၃ ဦးကျည်ထိမှန်ခဲ့ပြီး ထိုထဲမှ ၁ ဦးသေဆုံးမှုရှိခဲ့ကြောင်း သိရသည်။
အဆိုပါ မြို့ဝင်ကြေး ကောက်ခံဂိတ်ကို မတ်လ ၂၂ ရက်၊ နံနက် ၉ နာရီခန့်က လက်နက်ကိုင်အဖွဲ့တစ်ခုမှ အဝေးကနေလှမ်းပစ်ခဲ့ခြင်းဖြစ်ကြောင်း ၎င်းဂိတ်နှင့် နီးစပ်သူတစ်ဦးက ပြောသည်။
"ဖြစ်တာက ဒီနေ့မနက် ၉ နာရီလောက်က ဖြစ်သွားတာပါ။ လက်နက်ကိုင်အဖွဲ့ တစ်ခုက အဝေးကနေ လှမ်းပစ်တာဂိတ်မှာရှိတဲ့ အမျိုးသား ၃ ဦး သေနတ်ကျည် ထိမှန်ခဲ့ပါတယ်။ ၁ ယောက်ကတော့ ဆေးရုံကို ပို့ဆောင်စဉ်မှာပဲ သေဆုံးသွားပြီးကျန်တဲ့ ၂ ယောက်ကလည်း ဒဏ်ရာပြင်းထန်တဲ့ အခြေအနေမှာ ရှိတယ်" လို့ ဂိတ်နှင့်နီးစပ်သူတစ်ဦးက ပြောသည်။
ယနေ့ နံနက် သေနတ်ပစ်ခံရ၍ သေဆုံးသွားသူမှာ ကရင်ငြိမ်းချမ်းရေးကောင်စီ KNU/KNLA-PC မှ တပ်ဖွဲ့ဝင် တစ်ဦးဖြစ်ပြီး သင်္ဃန်းညီနောင်အထွက် AK ဂိတ်ဟု လူသိများသော ၎င်းမြို့ဝင်ကြေးကောက်ခံဂိတ်သည် ကရင်လက်နက်ကိုင် ၄ ဖွဲ့မှ လေလံရထားပြီး မြို့ဝင်ကြေးကို ယင်းတို့နှင့်နီးစပ်သည့် တပ်ဖွဲ့ဝင် မိသားစုများမှ ကောက်ခံပေးလျက်ရှိသည်။
အဆိုပါ ဂိတ်ကိုလည်း မူလနေရာဟောင်းမှ ယခင်ဌာနဆိုင်ရာ အဖွဲ့စုံ ဂိတ်နေရာသို့ ပြောင်းရွှေ့ထားကြောင်း သိရသည်။
Karen Information Center -KIC
Reviewed by THITHTOOLWIN
on
21:42
Rating:
No comments:
Post a Comment