မြိုင်မြို့နယ်ထဲက ရဲစခန်းတစ်ခုကို PDF ပူးပေါင်းတပ်က တိုက်ခိုက်သိမ်းပိုက်၊ လက်နက်ခဲယမ်းတွေလည်း သိမ်းဆည်းရမိ

ဇန်နဝါရီ ၃၀ ရက်၊ မြိုင်

မကွေးတိုင်း မြိုင်မြို့နယ် လင်းကတော ရဲစခန်းကို မနေ့ နေ့လယ် ၂ နာရီဝန်းကျင်မှာ PDF ပူးပေါင်းတပ်ဖွဲ့တွေက တိုက်ခိုက်သိမ်းပိုက်ပြီး မီးရှို့ဖျက်ဆီးခဲ့တယ်လို့ သိရပါတယ်။

အဆိုပါ ရဲစခန်းကို ရေစကြို၊ မြိုင်နဲ့ ဆားလင်းကြီးမြို့နယ် ပြည်သူ့ကာကွယ်ရေးတပ်ဖွဲ့တို့က ပူးပေါင်းပြီး ၁ နာရီကြာ တိုက်ပွဲဆင်နွှဲခဲ့တယ်လို့ ရေစကြို PDF က မနေ့ ဇန်နဝါရီ ၂၉ ရက် ည ၉ နာရီကျော်မှာ ထုတ်ပြန်ထားပါတယ်။

ပုသိမ်မုံရွာ လမ်းဆုံမှာရှိတဲ့ ဂိတ်စခန်းကိုလည်း မီးရှို့ဖျက်ဆီးခဲ့ပြီး စစ်ကောင်စီတပ်၊ ရဲတွေ ဒဏ်ရာတွေနဲ့ စခန်းစွန့်ခွာ ထွက်ပြေးခဲ့တဲ့အတွက် မိသားစုဝင်တွေကို ဖမ်းဆီးရမိခဲ့ပေမဲ့ ပြည်သူလူထုဘက် ရပ်တည်ကြဖို့ မှာကြားပြီး လွှတ်ပေးခဲ့ကြတယ်လို့ ဆိုပါတယ်။

ပူးပေါင်းတပ်ဖွဲ့ဘက်က G-3 ၅ လက်၊ ကျည် (၄၀၀)၊ အူစီ ၃ လက်၊ ကျည် (၂၀၀)၊ ခြောက်လုံးပြူး ၁ လက်၊ ဗုံးသီး ၇ လုံး၊ Laptop ၂ လုံး၊ Printer ၁ လုံး၊ ဆိုင်ကယ် ၄ စီးနဲ့ တခြား စစ်ဘက်အသုံးဆောင် အပါအဝင် စာရင်းဇယားတွေ သိမ်းဆည်းရမိခဲ့လို့ ဖော်ပြထားပါတယ်။

Shwe Phee Myay News Agency