ရွှေကူတွင် စစ်ကောင်စီတပ်အချို့ကို မြို့လှ PDF နှင့် KIA ပူးပေါင်းတပ် တိုက်ခိုက်၊ သေဆုံးထိခိုက်မှု အများအပြားရှိ

ဓာတ်ပုံ -မြို့လှ PDF တပ်ဖွဲ့

ရွှေကူ၊ ဇန်နဝါရီ ၉

ရွှေကူမြို့နယ် ပိန်းခွံဘက်မှ ဆင်းလာသည့် အကြမ်းဖက်စစ်ကောင်စီတပ် အင်အား ၁၅၀ ခန့်ကို ယမန်နေ့ ဇန်နဝါရီ ၈ ရက်နေ့ မနက် ၁၀ နာရီခန့်က ရွှေငြိမ်းချမ်းရွာအနီးတွင် မြို့လှ PDF နှင့် KIA ပူးပေါင်းတပ်က ကြိုးမိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၁၀ ဦးထက်မနည်း သေဆုံးခဲ့ကြောင်း မြို့လှ PDF က ယနေ့ ထုတ်ပြန်သည်။

ထို့ပြင် ယင်းနေ့ညနေပိုင်းကလည်း မင်းကျောင်းကုန်း မှ ချီတက်လာသည့် အင်အား ၄၀ ခန့်ပါသည့် စစ်ကောင်စီတပ်ကို သာယာကုန်းရွာအနီးတွင် မြို့လှ PDF မှ မိုင်း ၄ လုံးဖြင့် တိုက်ခိုက်ခဲ့ရာ ၁၄ ဦးထက်မနည်း သေဆုံးခဲ့ကြောင်း သိရသည်။

အဆိုပါ တိုက်ခိုက်မှုများတွင် နှစ်ဖက်အပြန်အလှန် ပစ်ခတ်တိုက်ခိုက်မှုများ ရှိခဲ့သော်လည်း မြို့လှ PDF နှင့် KIA ပူးပေါင်းတပ်တို့သည် အထိအခိုက်မရှိ ဆုတ်ခွာနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။

Lu Nge Khit