သံလွင်မြစ်ကမ်း မယ့်ခါးထာ့စစ်ကောင်စီတပ်ကို ထိုင်းဘက်က ရိက္ခာပို့ပေး

ဓာတ်ပုံ - မယ့်ခါးထာ့စစ်ကောင်စီတပ်ဖွဲ့ဝင်တွေကို လှေတစ်စင်းက ဒီနေ့ရိက္ခာသွားပို့ခဲ့သည့်မြင်ကွင်း။ 

ဇန်နဝါရီလ ၁၇ ရက်နေ့၊ ၂၀၂၂ 

ထိုင်း-မြန်မာနယ်စပ် သံလွင်မြစ်ကမ်းမှာရှိတဲ့ မယ့်ခါးထာ့စစ်ကောင်စီတပ်စခန်းကို ဒီနေ့ဇန်နဝါရီ ၁၇ ရက်နေ့မှာ ထိုင်းဘက်ခြမ်းရှိ သောလယ်ထာ့ရွာမှ လှေတစ်စင်းက စားသောက်ကုန်တချို့ပို့ဆောင်ပေးတယ်လို့ မျက်မြင်ဒေသခံတချို့ကပြောပါတယ်။ 

စစ်ကောင်စီတပ်ဖွဲ့တွေအတွက် ဒီနေ့ပို့ဆောင်သည့် ရိက္ခာတွေထဲမှာ ကြက်၊ ကြက်ဥ၊ ငါးသေတ္တာ၊ ဆီ၊ ဆားနှင့် အခြောက်အခြမ်းတချို့ပါဝင်တယ်လို့ ဒေသခံရဲ့ပြောပြချက်အရသိရပါတယ်။ 

မယ့်ခါးထာ့စစ်ကောင်စီတပ်စခန်းနှင့် အနီးအနားရှိ လယ်တိုးစစ်ကောင်စီတပ်စခန်းသည် ရိက္ခာပြတ်လပ်မှုတွေရှိနေလို့ ထိုင်းနိုင်ငံဘက်ရှိ ဒေသခံရွာသားတွေကို တစ်လ ၂ ကြိမ် ရိက္ခာပို့ပေးဖို့ပြောဆိုတာတွေရှိတယ်လို့ ဒေသခံအဆိုအရသိရပါတယ်။ ဒါပေမဲ့ စစ်ကောင်စီတပ်ကို ရိက္ခာပို့ပေးတာကို ဒေသခံထိုင်း-ကရင်ရွာသားတချို့ကလည်း သဘောမကျပဲ ရိက္ခာမပို့ပေးဖို့ ပြောဆိုမှုတွေရှိတယ်လို့ဆိုပါတယ်။ 

"လယ်တိုးစခန်းဆိုရင် ရိက္ခာမရောက်တာကြာပြီးလို့သိရတယ်။ ဖာပွန်ကနေ ကုန်းကြောင်းနဲ့ ရိက္ခာပို့တာ မရောက်ဘူး။ လမ်းမှာ KNLA တပ်တွေကြားဖြတ်တိုက်ခိုက်တာ။ ရှေ့တန်းကစခန်းတွေရိက္ခာပြတ်လပ်နေလို့ ထိုင်းဘက်ကို အကူအညီတောင်းတာ။ သူတို့တောင်းတာ တစ်လ ၂ ခါပို့ပေးဖို့။ ဒါပေမဲ့ ဒေသခံတွေမကြိုက်လို့ တစ်လ ၁ ခါပို့ပေးတာ" လို့ ဒေသခံတစ်ဦးကပြောပါတယ်။ 

ပြီးခဲ့တဲ့ ၂၀၂၁ ဧပြီလနှင့် မေလတုန်းက စစ်ကောင်စီလေကြောင်းတိုက်ခိုက်မှုနှင့် လက်နက်ကြီးပစ်ခတ်မှုကြောင့် ထိုင်းနိုင်ငံဘက်ခြမ်းရှိ ထိုင်း-ကရင်ရွာဖြစ်တဲ့ ထန့်တဖန်ကျေးရွာ ခေါ် မယ်ခါးထာ့ရွာအတွင်းနှင့် အနီးအနားပတ်ဝန်းကျင်းတွေမှာ လက်နက်ကြီးကျည်ဆံတချို့ကျရောက်ခဲ့တယ်လို့ ဒေသခံပြောပြချက်အရသိရပါတယ်။ 

ဒါ့အပြင် သံလွင်မြစ်ပေါ်သွားလာနေသည့် အရပ်သားလှေတွေကိုလည်း စစ်ကောင်စီတပ်ဖွဲ့တွေက ခြိမ်းခြောက်တာ၊ ပစ်ခတ်တာတွေလုပ်ခဲ့ပြီး အစားအသောက်တချို့ကိုလည်း ပိုက်ဆံမပေးပဲ ယူဆောင်တာတွေရှိခဲ့တယ်လို့ ဒေသခံတွေကပြောပါတယ်။ 

Salween Press