နေရပ်မပြန်နိုင်သေးဘဲ အခက်အခဲရှိနေဆဲ လေးကေ့ကော် စစ်ဘေးဒုက္ခသည်များ

(ပိုမိုများပြားလာသော စစ်ဘေးဒုက္ခသည်များဆိုင်ရာအချက်အလက်ဖော်ပြချက်)

ကရင်ပြည်နယ် လေးကေကော်ဒေသမှာ ကရင်အမျိုးသားလွတ်မြောက်ရေးတပ်မတော် KNLA နဲ့ စစ်ကောင်စီတပ်တို့အကြား ၁၄ ရက်ကြာတဲ့အထိ တိုက်ပွဲတွေ ဆက်လက်ဖြစ်ပွားနေလို့ ထိုင်းဘက်ကို စစ်ရှောင်တွေ ထွက်ပြေး ဝင်ရောက်လာမှု ပိုများလာနေတယ်လို့ ကရင်လူ့အခွင့်အရေးအဖွဲ့က ပြောပါတယ်။

 ဒီဇင်ဘာ ၁၅ ရက်နေ့ကစပြီး လေးကေကော်ဒေသမှာ KNLA တပ်မဟာ ၆ နဲ့ စစ်ကောင်စီတပ်တို့အကြား စစ်ရေးပဋိပက္ခတွေ ပြင်းထန်နေပြီး စစ်ကောင်စီဘက်က လေယာဉ်၊ တင့်ကား၊ လက်နက်ကြီးတွေနဲ့ တိုက်ခိုက်မှုတွေကို လုပ်ဆောင်နေခဲ့တာပါ။

အထူးသဖြင့် လေးကေကော်မြို့သစ်၊ ထီးမယ်ဝါးခီးနဲ့ မယ်ထော်သလေးကျေးရွာတွေကို စစ်ကောင်စီက လေယာဉ်နဲ့ ဗုံးကြဲတိုက်ခိုက်တာတွေ အဓိကထား လုပ်ဆောင်နေခဲ့တာဖြစ်ပါတယ်။

 လက်ရှိမှာတော့ KNLA နဲ့ စစ်ကောင်စီတပ်တို့ တိုက်ပွဲတွေ ဆက်လက်ပြင်းထန်နေတဲ့အတွက်ကြောင့် ထိုင်းနိုင်ငံဘက်ကို စစ်ရှောင်တွေ ဝင်ရောက်မှု ပိုများလာတယ်လို့ ကရင်လူ့အခွင့်အရေးအဖွဲ့ KHRG ပြောခွင့်ရ စောနန္ဒဆူးက ပြောပါတယ်။

 “ပစ်ခတ်မှုတွေလည်း ရှိနေတုန်းပဲ ။ ပြည်တွင်းမှာလည်း နယ်စပ်တလျှောက်မှာလည်း အခြေအနေတွေက မကောင်းသေးဘူး။ ထွက်ပြေးလာတဲ့သူက ပိုပိုပြီး များလာတယ်” လို့ ဆိုပါတယ်။

ဒါ့အပြင် တိုက်ပွဲတွေကြောင့် မြန်မာဘက်ခြမ်းက ကျေးရွာနဲ့ တောတောင်တွေထဲမှာ ပိတ်မိနေတဲ့ စစ်ရှောင်တွေထံ သွားရောက် အကူအညီပေးဖို့ အခက်အခဲရှိနေပြီး၊ တချို့ ကျေးရွာတွေမှာ ဖုန်းလိုင်း အင်တာနက်လိုင်းတွေ ဖြတ်တောက်ခံထားရတာ ဖြစ်ပါတယ်။

KNU ထိန်းချုပ်နယ်မြေဖြစ်တဲ့ လေးကေကော်မြို့သစ် တိုက်ပွဲတွေကြောင့် ထွက်ပြေးတိမ်းရှောင်နေရတဲ့ စစ်ရှောင်ပြည်သူ ၁၀၀၀၀ ကျော်ထိ ရှိလာပြီး၊ အခုအခါမှာတော့ စစ်ရှောင်တွေအတွက် အစားအသောက်နဲ့သောက်ရေကအစ လိုအပ်ချက်တွေ ရှိနေတာ ဖြစ်ပါတယ်။

+++++++++++++++++++++++++++++++++++++++++ 

မြန်မာပြည်တောင်ပိုင်းဒေသတလျှောက်ဖြစ်တဲ့ ပဲခူးတိုင်း၊ မွန်ပြည်နယ်၊ ကရင်ပြည်နယ်နှင့် တနင်္သာရီတိုင်းတို့တွင် ခပ်စိတ်စိတ်ဖြစ်ပွားလာသော လက်နက်ကိုင်တိုက်ပွဲ၏ နောက်ဆက်တွဲအဖြစ် ဒေသခံတို့ နေရပ်စွန့်ခွာကာ စစ်ဘေးဒုက္ခသည်များအဖြစ် ပြေးလွှားနေကြရသည်။

အဓိကအားဖြင့် စစ်ဘေးဒုက္ခသည်များသည် မိမိတို့၏ နေရပ်ကို စွန့်ခွာကာ ကျန်းမာရေးစောင့်ရှောက်မှုအားနည်းသည့်၊ သဘာဝဘေးဒဏ်ခံရသည့် နေရာများသို့ ရွေ့ပြောင်းနေထိုင်ကြရသည်။

စစ်အုပ်စုအာဏာသိမ်းပြီးနောက် ပိုမိုတိုးပွားလာသော ပဋိပက္ခတွေအကြား လက်ရှိတွင် မြန်မာပြည်တောင်ပိုင်းဒေသ၌ စစ်ဘေးဒုက္ခသည်များ တစ်သိန်းနှစ်သောင်းကျော်လာပြီဖြစ်သည်။

ပဲခူးတိုင်းရှိ ရွှေကျင်၊ ကျောက်ကြီးနှင့် ညောင်လေးပင်မြို့နယ်တွေမှာ တိုက်ပွဲဖြစ်ပွားမှုတွေကြောင့် ယခုနှစ်ဆန်းပိုင်းကတည်းက စစ်ဘေးဒုက္ခသည် ၃၀၀၀၀ ကျော်ဟာ ရွှေ့ပြောင်းနေထိုင်နေရပါတယ်။

မွန်ပြည်နယ်ရှိ ကျိုက်ထိုနှင့် ဘီးလင်းမြို့နယ်ထဲမှာတော့ စစ်ဘေးရှောင် ၃၉၀၀ ကျော်ဟာ ရွှေ့ပြောင်းနေထိုင်နေရပါတယ်။

ကရင်ပြည်နယ်ရှိ လှိုင်းဘွဲ့၊ ကော့ကရိတ်နဲ့ ဖာပွန်မြို့နယ်အပြင် မြဝတီမြို့နယ်ထဲမှာတော့ စစ်ဘေးရှောင် ၉၀၂၂၀ ဟာ တောတွင်းနေရာတွေမှာ ရွှေ့ပြောင်းနေထိုင်နေရပါတယ်။ ကရင်ပြည်နယ်ထဲက မြိုင်ကြီးငူစစ်ရှောင်စခန်းမှာတော့ ၂၀၁၆ ခုနှစ်ကတည်းက စစ်ဘေးရှောင် ၅၀၀၀ ကျော်ရှိနေခဲ့ပါတယ်။ ဆက်လက်ပြီး ကော့ကရိတ်ဒေသအတွင်းက ရွာတွေမှာလည်း တိုက်ပွဲကြောင့် စစ်ဘေးဒုက္ခသည် ၅၀၀ ကျော် ထပ်ရှိလာနေပါတယ်။

တနင်္သာရီတိုင်းထဲက မြို့နယ်အချို့မှာလည်း စစ်ဘေးဒုက္ခသည် ၃၇၀၀ ကျော်ဟာ ရွှေ့ပြောင်းနေထိုင်နေရပါတယ်။ 

စစ်ဘေးဒုက္ခသည်တွေဟာ တိုက်ပွဲဖြစ်ပွားတာနဲ့ ဘေးကင်းရာကိုရှောင်နေရတာ၊ ကျန်းမာရေးစောင့်ရှောက်မှုအဆင်ပြေပြေမရှိတာ၊ သဘာဝဘေးတွေကြုံနေရတာအပြင် ပညာသင်ကြားခွင့်တွေလည်း ဆုံးရှုံးနေပါတယ်။

သံလွင်တိုင်းမ်သတင်းဌာန

စစ်ဘေးဒုက္ခသည်များ၏ အချက်အလက်ကိုတော့ ကရင်အမျိုးသားအစည်းအရုံးနှင့် ကရင်လူ့အခွင့်အရေးအဖွဲ့တွေကနေတဆင့် ရယူပြုစုတာဖြစ်ပြီး မြေပြင်စာရင်းကို အခြေပြုပါတယ်။

မှတ်ချက် - မြန်မာပြည်အနှံ့အပြားတွင် စစ်ဘေးဒုက္ခသည်ပေါင်း ၉၀၀၀၀၀ ကျော်ရှိနေပြီးဖြစ်ပါတယ်။ သံလွင်တိုင်းမ်သတင်းဌာနမှ ယင်း၏အခြေပြုရာဒေသဖြစ်သော မြန်မာပြည်တောင်ပိုင်းဒေသ၏ စစ်ဘေးဒုက္ခသည်များ၏ အခြေအနေကိုသာ ဖော်ပြထားခြင်းဖြစ်ပါတယ်။

Than Lwin Times