တိုက်ပွဲပြင်းထန်နေသည့် လွိုင်ကော်မြို့တွင် စစ်ကောင်စီတပ်များက အပြစ်မဲ့ပြည်သူ ၂ ဦးအား စနိုက်ပါဖြင့် ပစ်ခတ်သတ်ဖြတ်
လွိုင်ကော်၊ ဇန်နဝါရီ ၂၁ ရက်
စစ်ကောင်စီတပ်နှင့် ကရင်နီတပ်မတော်နှင့် PDF ပူးပေါင်းအဖွဲ့တို့အကြား တိုက်ပွဲပြင်းထန်နေသည့် ကရင်နီ(ကယား)ပြည်နယ်၊ လွိုင်ကော်မြို့နယ်၌ ယနေ့တွင် စစ်ကောင်စီတပ်များက အပြစ်မဲ့ပြည်သူ ၂ ဦးအား စနိုက်ပါဖြင့် ပစ်ခတ်သတ်ဖြတ်ခဲ့ကြောင်း သတင်းရရှိသည်။
သေဆုံးသူ ၂ ဦးမှာ တိုက်ပွဲများ ဖြစ်ပွားနေစဥ်အတွင်း စစ်ကောင်စီတပ်များ၏ စနိုက်ပါဖြင့် ပစ်ခတ်ခံခဲ့ရသူ ဒေါဥခူရပ်ကွက်နေ ပြည်သူ ၂ ဦးဖြစ်ကြောင်း ဒေသခံတစ်ဦးထံမှ သိရသည်။
" တိုက်ပွဲဖြစ်နေတဲ့အချိန် သူတို့ဘာကြောင့် အပစ်ခံရလဲဆိုတာတော့ မသိရဘူး။ အလောင်းသွားကောက်တဲ့အချိန်မှ သူတို့ ၂ ယောက် သေမှန်းသိရတယ်။ ခေါင်းတွေချည်း အပစ်ခံထားရတာ" ဟု လွိုင်ကောင်မြို့ခံတစ်ဦးက ဧရာဝတီတိုင်းမ်ကို ပြောသည်။
ထို့အပြင် စစ်ကောင်စီတပ်များက လွိုင်ကော်မြို့နှင့် ဒီးမော့ဆိုမြို့နယ်တဝိုက်တွင် လေကြောင်းဖြင့် ကင်းထောက်မှုများပြုလုပ်ခဲ့ပြီး လက်နက်ကြီးများဖြင့် ပစ်ခတ်ခဲ့ကာ မိုင်းလုံးရပ်ကွက်ရှိ GTC ကျောင်းအား မီးရှို့ဖျက်ဆီးခဲ့ကြောင်း ဒေသခံများထံမှ သိရသည်။
လွိုင်ကော်မြို့နယ်တွင် စစ်ကောင်စီတပ်နှင့် ဒေသခံကာကွယ်ရေးတပ်ဖွဲ့များအကြား ဇန်နဝါရီလ လဆန်းပိုင်းမှ စတင်ကာ ယနေ့အချိန်အထိ တိုက်ပွဲများဆက်လက်ပြင်းထန်နေပြီး ဒေသခံပြည်သူအများစုမှာ ရှမ်းပြည်နယ်(တောင်ပိုင်း)သို့ နေရပ်စွန့်ခွာ စစ်ဘေးရှောင်နေရကြောင်း ဒေသခံများထံမှသိရသည်။
Ayeyarwaddy Times
Reviewed by THITHTOOLWIN
on
21:52
Rating:
No comments:
Post a Comment