ငွေဆောင် ၊ဇန်နဝါရီ ၂၄ ရက်
ဧရာ၀တီတိုင်းဒေသကြီး၊ ပုသိမ်မြို့နယ်၊ ငွေဆောင်မြို့ရှိ ဘုန်းမောင်ဂျိုင်ကျေးရွာမှ ဒေသခံရွာသား၁၄ဦးအား ယမန်နေ့က စစ်ကောင်စီတပ်များ ဖမ်းသွားကြောင်း သတင်းရရှိသည်။
"ငွေဆောင်ဘူးကွဲအထိုင်တပ်ကအင်အားတော်တော်များတယ်လက်နက်အပြည့်အစုံနဲ့ ရွာကိုပိတ်ဆို့ပြီး နာမည်အတိအကျနဲ့ဖမ်းခေါ်သွားတာ"ဟု ငွေဆောင်မြို့ခံတစ်ဦးက ဧရာဝတီတိုင်းမ်ကို ပြောသည်။
ဖမ်းဆီးခံရတဲ့ ရွာသား၁၄ဦးမှာ PDF နှင့် အဆက်အသွယ်ရှိသူများအဖြစ် ဒေသခံ သတင်းပေး(ဒလန်) ၂ ဦး၏ သတင်းပေးမှုကြောင့် ဖမ်းဆီးခံရခြင်းဖြစ်သည်ဟု ငွေဆောင်မြို့ခံတစ်ဦးက ဆိုသည်။
"ရွာက ဒလန်တွေကပေးတဲ့ စာရင်းနဲ့လာတာစစ်တပ်ချည်းပဲရဲတောင်မပါဘူး။ ဖမ်းထားတဲ့တစ်ချို့က ငွေဆောင်ကဆန္ဒပြပွဲတွေမှာပါတဲ့လူရှိတယ်တစ်ချို့က သာမန်နေတဲ့သူတွေပါ" ဟု ငွေဆောင်မြို့ခံတစ်ဦးက ပြောသည်။
၎င်းတို့အား လက်ရှိတွင် ငွေဆောင်နယ်မြေရဲစခန်းတွင် ဖမ်းဆီးထားပြီး စစ်ဆေးမှုများပြုလုပ်နေသည်ဟု သိရသည်။
ယခုရက်ပိုင်းအတွင်း ငွေဆောင်ကမ်းခြေမြို့တွင် စစ်တပ်နဲ့ရဲပူးပေါင်းစစ်ဆေးမှုများတင်းကြပ်နေပြီး လွန်ခဲ့တဲ့ ဒေသခံပြည်သူ ၂ ဦး၏ဖုန်းများအား ယူဆောင်စစ်ဆေးကာ ဖမ်းဆီးထားကြောင်း ဒေသခံများထံမှ သိရသည်။
Ayeyarwaddy Times
Reviewed by THITHTOOLWIN
on
19:04
Rating:
No comments:
Post a Comment