စစ်ကောင်စီဝန်ကြီး ဒေါ်သက်သက်ခိုင် တက်ရောက်ဖဲကြိုးဖွင့်လှစ်မည့် ဈေးသစ်ဖွင့်ပွဲ အနီးတွင် မိုင်းပေါက်ကွဲ
 |
| Photo -CJ |
မြစ်ကြီးနား - ဇန်နဝါရီ ၁၆၊ ၂၀၂၂။
စစ်ကောင်စီ၏ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး တက်ရောက်ဖွင့်လှစ်မည့် မြစ်ကြီးနားမြို့ ရှိ အေးမြသာယာအဆင့်မြှင့်ဈေး အနီးတွင် ယမန်နေ့ မွန်းလွဲ သုံးနာရီခန့်က မိုင်းပေါက်ကွဲခဲ့ကြောင်းသိရသည်။
ပြည်ထောင်စုဝန်ကြီး ဒေါ်သက်သက်ခိုင် မတက်ရောက်ခင် ၄၅ မိနစ်ခန့်အလိုတွင် ဈေးအနီးရှိ လမ်းသွယ်(၉)မှ အုတ်ခုံတွင် ပေါက်ကွဲမှုဖြစ်ပွားခဲ့ကြောင်း လုံခြုံရေးကြောင့် အမည်မဖော်လိုသည့် ရပ်ကွက်နေပြည်သူတစ်ဦးက The 74 Mediaကိုပြောသည်။
"ဗုံးပေါက်ပြီးတာတောင် လာတယ်ဆိုတော့ သူတို့လူကြီးမလာခင် လမ်းရှင်းလိုက်တာမျိုး ဖြစ်နိုင်တယ်လို့ ပြောကြတာပေါ့။ ဗုံးက ဈေးမှာ မပေါက်ပဲ ဈေးထောင့်မှာ ပေါက်တာဆိုတော့" ဟုပြောသည်။
ပေါက်ကွဲမှုဖြစ်ပွားပြီးနောက် အေးမြသာယာ အဆင့်မြင့်ဈေးအတွင်းတွင် စစ်ကောင်စီတပ်ဖွဲ့ဝင်များက လုံးခြုံရေးတင်းကြပ်စွာဖြင့် မိုင်းရှာဖွေမှုများ ပြုလုပ်ခဲ့ကြောင်း အခြား ရပ်ကွက်နေပြည်သူတစ်ဦးက ပြောသည်။
"စျေးထဲမှာ မိုင်းရှာခွေးနဲ့ ပိုက်စိတ်တိုက်ရှာတယ် ၂ နာရီကတည်းက လုံခြုံရေးအပြည့် အရပ်ဝတ်တွေပါပါတယ်။ ဒေါ်သက်သက်ခိုင်ရဲ့ကား လာတာနဲ့ ကုန်စုံဆိုင်တန်းလျားနဲ့ လမ်းတွေအားလုံးပိတ်လိုက်တာ ဟုတ်တယ်။ ဈေးအထိဝင်သွားတယ်တဲ့ လုံခြုံရေးတွေအများကြီးပဲ" ဟုပြောသည်။
ပေါက်ကွဲမှုဖြစ်ပွားပြီး ၄၅ မိနစ်ခန့်အကြာတွင် ပြည်ထောင်စုဝန်ကြီး ဒေါ်သက်သက်ခိုင် ရောက်ရှိလာပြီးနောက် ဖဲကြိုးဖြတ်ဖွင့်လှစ်ပေးပြီးနောက် တစ်နာရီခန့် အကြာတွင် ပလနရပ်ကွက်သို့ ပြန်လည်ထွက်ခွာခဲ့ကြောင်း သိရသည်။
ဒေါ်သက်သက်ခိုင်ရောက်ရှိနေသည့် မြစ်ကြီးနားမြို့ လမ်းတစ်လျောက်တွင် စစ်ကောင်စီတပ်ဖွဲ့ဝင်များ ယခင်နေ့များထက်ပို၍ လုံခြုံရေးတင်းကြပ်စွာ စောင့်ကြည့် နေရာယူထားကြောင်းသိရသည်။
မြစ်ကြီးနားမြို့ နန်ကျင်ကျေးရွာတွင်လည်း ဇန်နဝါရီလ ၁၃ ရက်နေ့ညက Mytel တာဝါတိုင် ဖောက်ခွဲဖျက်ဆီးခံခဲ့ရသည်။
The 74 Media
Reviewed by THITHTOOLWIN
on
23:02
Rating:
No comments:
Post a Comment