မော်လမြိုင်၊ နိုဝင်ဘာ ၁၆
ကရင်ပြည်နယ် ဖာပွန်ဒေသမှာ နှစ်ရက်အတွင်း KNLA တပ်မဟာ ၅နဲ့ စစ်ကောင်စီတပ်တို့ကြား တိုက်ပွဲကြီး ခြောက်ကြိမ်ဖြစ်ပွားခဲ့ရာ စစ်ကောင်စီဘက်က တပ်ရင်းမှူးတစ်ဦးအပါအဝင် (၃၂) ဦး သေဆုံးသွားခဲ့ပြီး အယောက် ၅၀ ကျော် ထိခိုက်ဒဏ်ရာရရှိသွားခဲ့တယ်လို့ ကေအဲန်ယူ မူတြော်သတင်းစဉ်က ထုတ်ပြန်ထားပါတယ်။
နိုဝင်ဘာ ၁၁ ရက်နေ့က စကခ ၈ လက်အောက်ခံ ခမရ(၄၀၆) စစ်ကောင်စီတပ်တွေဟာ ဖာပွန်ခရိုင် တောင်သုံးလုံးဒေသထဲကို ဝင်ရောက်လာတာကြောင့် ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅နဲ့ တစ်ရက်အတွင်း ရင်ဆိုင်တိုက်ပွဲကြီး ၅ ကြိမ်ဖြစ်ပွားခဲ့ရာ စစ်ကောင်စီဘက်က ၁၄ ဦးသေဆုံးခဲ့ပြီး ၂၁ ဦးထိခိုက်ဒဏ်ရာရရှိသွားခဲ့တာပါ။
ဒါ့အပြင် နိုဝင်ဘာ ၁၂ ရက်နေ့ကလည်း ဖာပွန်ခရိုင် မထောဒေသမှာ ရင်ဆိုင်တိုက်ပွဲကြီးထပ်မံဖြစ်ပွားခဲ့ရာ စစ်ကောင်စီဘက်က ၁၄ ဦးသေဆုံးခဲ့ပြီး ၃၄ ဦးဒဏ်ရာရရှိခဲ့ကာ သေဆုံးသူတွေထဲမှာ တပ်ရင်းမှူးတစ်ဦးနဲ့ တပ်ခွဲမှူးတစ်ဦးပါဝင်တယ်လို့ ထုတ်ပြန်ချက်မှာ ဖော်ပြထားပါတယ်။
အဲ့ဒီနေ့မွန်းလွဲပိုင်းမှာ ဖာပွန် ဘောကျို့ထမှာ ရင်ဆိုင်တိုက်ပွဲတစ်ကြိမ် ဖြစ်ပွားခဲ့ပြီး စစ်ကောင်စီဘက်က ၄ ဦးသေဆုံးခဲ့ပြီး တစ်ဦးဒဏ်ရာရရှိသွားခဲ့သေးတာဖြစ်ပြီး ညနေပိုင်းမှာလည်း ခေါပုတ်ဒေသမှာ ရိက္ခာသယ်ယူပို့ဆောင်နေတဲ့ မြင်းလားတပ်ကို ကြားဖြတ်တိုက်ခိုက်ခဲ့ရာ မြင်းအချို့သေဆုံးခဲ့သေးတယ်လို့ သိရပါတယ်။
ဒီလ နိုဝင်ဘာလဆန်းပိုင်းကနေစပြီး စစ်ကောင်စီတပ်နဲ့ နယ်ခြားစောင့်တပ် (BGF) တပ်ဖွဲ့တို့ဟာ ကေအဲန်ယူ ထိန်းချုပ်နယ်မြေဖြစ်တဲ့ ဖာပွန်ခရိုင် တပ်မဟာ ၅ ဒေသထဲကို နယ်မြေထိန်းချုပ်ဖို့အတွက် တပ်အင်အားတွေပိုမိုဖြည့်ဆည်းလာတာကြောင့် နယ်မြေခံ KNLA တပ်မဟာ ၅ နဲ့ တိုက်ပွဲတွေ နေ့စဉ်ဖြစ်ပွားခဲ့တယ်လို့ ကေအဲန်ယူ မူတြော်သတင်းစဉ်ရဲ့ ထုတ်ပြန်ချက်အရ သိရပါတယ်။
သတင်း-သံလွင်တိုင်းမ် - Than Lwin Times
Reviewed by THITHTOOLWIN
on
17:14
Rating:
No comments:
Post a Comment