 |
| အင်းစိန်ထောင်မှပြန်လွတ်လာသူများ၊ ဂျွန် ၃၀၊ ၂၀၂၁။ |
ပုဒ်မ ၅၀၅(က) နဲ့ စွဲဆိုခံရတဲ့ အကျဉ်းသား ၇၀၀ကျော်ကို အင်းစိန်ထောင်ကနေ ပြန်လွတ်ပေးလိုက်ကြောင်း စစ်ကောင်စီက သတင်းထုတ်ပြန်ခဲ့ပေမဲ့ တကယ်တမ်းတော့ ဒီထက်နည်းတဲ့ အရေအတွက်ပဲ လွတ်မြောက်လာတယ် လို့အကျဉ်းသားတွေကို လိုက်ပါကူညီပေးနေတဲ့ ရှေ့နေတွေက ပြောပါတယ်။ စစ်ကောင်စီက ထုတ်ပြန်တဲ့အတိုင်း လွတ်မြောက်လာခဲ့လား ဆိုတာကတော့ ပြန်စိစစ်ဖို့ခက်ခဲတယ်လို့လည်း ရှေ့နေတွေက ပြောပါတယ်။ ရန်ကုန်ကပေးပို့လာတဲ့ ဒီသတင်းကိုတော့ ဗွီအိုအေမြန်မာပိုင်းသတင်းထောက် ကိုသိန်းထိုက်ဦး က ပြောပြပေးမှာပါ။
ရန်ကုန် အင်းစိန်ထောင်ကနေ ဗုဒ္ဓဟူးနေ့က ပြန်လွတ်ပေးလိုက်တဲ့ အကျဉ်းသားအရေအတွက်ဟာ ၇၂၁ ယောက်ရှိတယ်လို့ စစ်ကောင်စီက သတင်းထုတ်ပြန် ခဲ့ပေမဲ့ တကယ်တန်းပြန်လွတ်လာတဲ့အရေအတွက်က အငြင်းပွားစရာ ဖြစ်နေပါတယ်။ ပြန်လွတ်လာတဲ့ အကျဉ်းသားတွေရဲ့ အချက်အလက်က ရှေ့နေတွေဆီကိုလည်း မရောက်တဲ့အတွက် ဒီအရေအတွက်က မှန်ကန်ရဲ့လားဆိုတာ တပ်အပ် မပြောနိုင်ကြောင်း ဒီအကျဉ်းသားတွေကို လိုက်ပါကူညီပေးနေတဲ့ ရှေ့နေတွေက ဗွီအိုအေကို ပြောပါတယ်။
တကယ်တမ်း အကျဉ်းသား ၇၀၀ ကျော် လွတ်မြောက်ခဲ့တယ်ဆိုလျှင် အင်းစိန်ထောင်ထဲမှာ မြို့နယ်အလိုက်ဖွင့်ထားတဲ့ အထူးတရားရုံး (၃၈) ခုကနေ ပျမ်းမျှအယောက် ၂၀ စီလွတ်မြောက်လာရမယ့်အခြေအနေဖြစ်တယ်လို့ ရှေ့နေဦးခင်မောင်မြင့်က တွက်ဆပြပါတယ်။
“ နှစ်ဘက် မှန်၏၊ မှား၏ ဆင်ခြင်ကြည့်တဲ့အခါမှာ ခုနကပြောတဲ့ လူတွေကျန်နေတယ် ဆိုတာကလည်း မှန်နိုင်တဲ့ အခြေအနေတရပ်ရှိတယ်။ အကယ်၍သာ ၇၂၁ ယောက်လုံး လွတ်လာမယ်ဆိုခဲ့ရင် ၃၈ ရုံးဆိုတော့ တရုံးတရုံးမှာ အနည်းဆုံး ၁၀ ယောက်ကနေ အများဆုံး ၂၀ အထိ လွတ်လာနိုင်တဲ့ အခြေအနေရှိတယ်။ ဒါပေမဲ့ အဲလိုမျိုး ပေါ်ပေါက်လာတာမရှိဘူး။ နောက်တခါ ကြည့်မြင့်တိုင်တို့ ဘာတို့ဆိုရင် တယောက်ပဲ လွတ်တာရှိတယ်၊ ကျန်တာတွေ မလွတ်ဘူး။ ဒီလိုအခြေအနေလေးတွေက နှိုင်းယှဉ် သုံးသပ်စရာရှိတယ်။”
ဒါပေမဲ့ အမှုတည်ဆောက်ဆဲကာလမှာ တရားရုံးကိုပို့ဖို့မလိုဘဲ ထောင်ကနေတိုက်ရိုက် လွတ်ပေးတာမျိုးလည်း ရှိနိုင်တဲ့အတွက် စစ်ကောင်စီဘက်က ထုတ်ပြန်တဲ့အရေအတွက်ဟာ မှားတယ်လို့လည်း မဆိုနိုင်ကြောင်း သူကပြောပါတယ်။
“ နှစ်ဘက်လုံးမှာတော့ ဖြစ်တန်ရာ အခြေအနေတွေရှိတယ်။ ၇၂၁ ယောက် လွတ်ပြီးပါပြီဆိုတဲ့ အကျဉ်းထောင်ကနေ ထုတ်ပြန်ကြေညာတာသည်လည်း အထူးတရားရုံးတွေမှာ တရားစွဲတင်ထားတဲ့သူတွေ ပါသလို မတင်ရသေးတဲ့ ထိန်းသိမ်းထားတဲ့လူတွေကျတော့ တရားရုံးက အသိပေးစရာမလိုဘဲ ထောင်အနေနဲ့ လွှတ်လိုက်နိုင်တာ ရှိတဲ့အတွက် ဒါလည်းဖြစ်တန်ရာ အခြေအနေရှိတယ်။”
တရားလွှတ်တော်ရှေ့နေ ဒေါ်ဇာလီအေးကတော့ သူတို့လိုက်ပါကူညီပေးနေတဲ့ အမှုတွေထဲက လူတချို့တဝက်ပဲ လွတ်မြောက်လာခဲ့ကြောင်း ပြောပါတယ်။
“ ကျမက ၇၂၁ ယောက် ပြည့်တယ်မပြည့်ဘူးဆိုတာကတော့ ဒါကတော့ ထောင်ကပဲဖြေမယ်ထင်တယ်။ ဘာလို့ဆို ကျမတို့အပြင်လူတွေဆီမှာ ဘယ်သူကမှ စာရင်းမသိဘူးလေ။ ကျမတို့က ကျမတို့စာရင်းနဲ့ တိုက်တဲ့အခါမှာကျတော့ ၂၀၀ စွန်းစွန်းလေးပဲ ကျမတို့လူတွေကလွတ်တာ။ အတိအကျတော့ ကျမလည်း မသိဘူး။”
ဆန္ဒပြမှုနဲ့ဆက်စပ်ပြီး ပုဒ်မ ၅၀၅(က)နဲ့ စွဲဆိုခံရသူအများစုက ပြန်လွတ်လာတယ်ဆိုပေမဲ့ ပြန်မလွတ်လာသူတွေလည်း အများအပြားရှိနေတာပါ။ အဲဒီနေ့က အင်းစိန်ထောင်ရှေ့မှာ သားဖြစ်သူကို သွားရောက်စောင့်ဆိုင်းခဲ့တဲ့ ဖခင်ဖြစ်သူ ဦးမင်းနိုင်က သားဖြစ်သူမပါလာဘူးလို့ ဗွီအိုအေကို အခုလိုပြောပါတယ်။
“ အများဆုံးလွှတ်မှ ၅၀၀ တောင်မရှိဘူး။ ဦးမြင်မိတာဆို ရှစ်စီး၊ ကိုးစီးလောက်က လူပါတယ်။ အပြည့်အကြပ်တွေလည်း မဟုတ်ပါဘူး။ ကျန်တဲ့ ၂ စီးကတော့ ခါလီထွက်သွားတာတွေ့တယ်။ နှစ်ရက်၊ သုံးရက်ဆက်တိုက် လွှတ်မယ်တို့ဘာတို့ဆိုတဲ့ သို့လော သို့လောကြားလို့ ဦးတို့ကသွားစောင့်တာပဲ၊ မနေ့ကလည်း သွားစောင့်တယ်၊ ဘာမှမထူးဘူး။ သတင်းတွေကနေ တက်နေတာတော့ ကြားပြန်ပြီ သူရဲ့မွေးနေ့ ၃ ရက်နေ့ကနေပြီးတော့ တကြိမ်လွတ်မယ်လို့ အသံကြားပြန်ပြီ။”
လာမယ့်ဇူလိုင် ၃ ရက်နဲ့ ၅ ရက်မှာလည်း အကျဉ်းသားတွေကို နောက်ထပ်လွတ်ပေးဖို့ရှိတယ်လို့ သတင်းထွက်ပေါ်နေတယ်လို့ ရှေ့နေတချို့က ဗွီအိုအေကို ပြောပါတယ်။ ထောင်ရှေ့မှာ လူစုလူဝေးမဖြစ်ဖို့နဲ့ လွတ်မြောက်လာသူတွေကို သက်ဆိုင်ရာ မြို့နယ်ရဲစခန်းတွေမှာပဲ စောင့်ဆိုင်းကြဖို့ ရှေ့နေတွေက အကြုံပြုထားပါတယ်။
ဦးသိန်းထိုက်ဦး/ VOA Burmese
Reviewed by THITHTOOLWIN
on
19:31
Rating:
No comments:
Post a Comment