မိဘမဲ့ဂေဟာကျောင်းတစ်ခုတွင် ကလေး ၆၀ ဦး ကိုဗစ်ကူးစက်ခံရပြီး တစ်ဦးသေဆုံး


July 31,2021/Kachin News Group

ဗန်းမော်မြို့ ပင်စင်ကုန်းရပ်ကွက် ရောဘတ်နှစ်ခြင်းခရစ်ယာန် မိဘမဲ့ဂေဟာ ကျောင်းတွင်ရှိသော ကလေး ၆၀ ဦးထက်နည်းတွင် ကိုဗစ်-၁၉ ရောဂါကူးစက်ခံထားရပြီး ပိုးတွေ့ရှိ လူငယ်တစ်ဦး ယနေ့ နံနက်ပိုင်းက သေဆုံးသွားကြောင်းသိရသည်။

ကလေး ၆၀ ဦးပိုးတွေ့သည့် မိဘမဲ့ဂေဟာကျောင်းကို အသွားအလာကန့်သတ်ထားသည့်အတွက် ကလေးငယ်များအတွက် အစားအသောက်နှင့် ဆေးဝါးကုသမှုများ အရေးတကြီး လိုအပ်နေကြောင်း ဂေဟာကျောင်းတာဝန်ခံတစ်ဦးက KNG သတင်းဌာနကို ယခုလိုပြောဆိုခဲ့သည်။ 

“ဂေဟာကျောင်းက စစ်ရှောင်စခန်းနဲ့အနီးမှာဆိုတော့ အားလုံးပျံ့သွာသလိုဖြစ်သွားတာပေါ့။ စစ်ရှောင်စခန်းမှာအရင်ဖြစ်တယ်။ နောက်ပိုင်း ဂေဟာက ကလေးတွေအားလုံးက ဖျားလာကြတယ်။ ဒီမနက်ပိုင်းက ကလေးတစ်ဦး ကိုဗစ်ကြောင့် ဆုံးသွားတယ်။ အဲ့ကြောင့် အခုဖျားနေတဲ့ ကလေးတွေအတွက် အစားအသောက်တွေ လိုအပ်နေတယ်။ ပြီးရင် ဆေးရုံက လူတွေနာရင်လည်း နေအိမ်မှာဘဲ ကုဖို့ပြောတယ်။ ဆေးရုံကို လက်မခံတော့ဘူး။ ကိုဗစ်ကာကွယ်ရေးပစ္စည်းတွေလည်းလိုအပ်တယ်”ဟုပြောဆိုသည်။

မိဘမဲ့ဂေဟာကျောင်းတွင် ကလေး ၇၆ ဦးရှိသည့်အနက် ၆၀ဦးတွင်ပိုးတွေ့ရှိခဲ့ပြီး ကိုဗစ်ကြောင့် သေဆုံးသွားသည့်သူမှာ ၉ တန်းကျောင်းသား တစ်ဦးဖြစ်ကြောင်းသိရသည်။


Kachin News Group 

https://www.facebook.com/theKachinNews

ကိုဗစ်ကန့်သတ်ချက်ဖြင့် ပြင်ပထွက်ကဒ်မပါဘဲ သွားလာသူများ ဒဏ်ငွေပေးဆောင်ရ



ဇူလိုင် ၃၁ ရက်၊ ၂၀၂၁ ခုနှစ်။ ကေအိုင်စီ

ဖားအံမြို့တွင် ရေကြီးသည့်ကာလအတွင်း ပြည်နယ်စစ်ကောင်စီက ထုတ်ပြန်ထားသည့် ကိုဗစ်ကန့် သတ်ချက် ကြောင့် မြို့ခံပြည်သူများမှာ စားဝတ်နေရေးနှင့် ကျန်းမာရေးအတွက် သွားလာရာတွင် ဒဏ်ကြေးငွေများ ပေးဆောင်နေရသည့် အခက်အခဲများ ကြုံတွေ့နေရကြောင်း မြို့မိမြို့ဖများ၏ ပြောပြချက်များအရ သိရှိရသည်။

လတ်တလော ဖားအံမြို့၌ နေအိမ်အပြင်ထွက် သွားလာနေသူများကို ရှောင်တခင် စစ်ဆေးမှုများရှိပြီး အပြင်ထွက်ခွင့် လက်မှတ်မပါဘဲ ပထမအကြိမ် ဖမ်းဆီးမိလျှင် ဒဏ်ငွေ ၅၀၀၀ကျပ်၊ ဒုတိယအကြိမ် ဖမ်းဆီးမိလျှင် ၁၀၀၀၀ကျပ်၊ ပေး ဆောင်ရသည့်အပြင် တတိယအကြိမ် ဖမ်းဆီးမိလျှင် ထောင်ဒဏ်ချမှတ်ခံရနိုင်သည်ဟု သိရကြောင်း ကဒ်မရရှိ၍ ကိုယ်တိုင်ဒဏ်ငွေပေးဆောင်ခဲ့ရသည့် ရေဘေးသင့်သူတစ်ဦးက ယခုလို ပြောသည်။

၎င်းက “မသိတဲ့ ပြည်သူတွေအနေနဲ့ကတော့ စားဝတ်နေရေး အဆင်မပြေတာက တစ်ကြောင်း၊ ရောဂါတွေဖြစ်ရင် ကိုယ့်ဟာကိုယ် ဂရုစိုက်နေရတယ်။ ပိုးတွေ့လူနာကြောက်ရတဲ့အချိန် အဲ့လိုတော့ မလုပ်ဆောင်သင့်ဘူး။ ကူညီရမယ့်အ ချိန် ပြည်သူတွေ ဒုက္ခရောက်တာကို ထပ်ပြီးတော့ ပေးနေသလို ဖြစ်နေတာပေါ့။ ဈေးရောင်းနေတဲ့ဆိုင်ခန်းတွေ လိုက် ပိတ်ခိုင်းနေတာ တော်တော်ကို ပြည်သူအတွက် ဒုက္ခဖြစ်နေပါပြီး။”ဟု ကေအိုင်စီသို့ ပြောသည်။

ပြည်သူများ ယခုလို ကပ်ရောဂါဘေးများနှင့် ကြုံတွေ့နေရချိန်တွင် ပြည်နယ်တာဝန်ရှိသူများက ကူညီကာကွယ်မှု လုပ် ဆောင်ရမည့်အစား ယခုကဲ့သို့ ဒဏ်ငွေရိုက်သည့်အတွက် ပြည်သူများ ပို၍ဒုက္ခရောက်ကြရသည်ဟု အဆိုပါမြို့ခံက ဆက်ပြောသည်။

ဖားအံမြို့နယ် စည်ပင်သာယာရေး၊ မော်တော်ပီကယ်၊ ရဲနှင့် ရပ်ကျေးအဖွဲ့တို့ပူးပေါင်းကာ အပြင်ထွက်သွားလာသည့် ပြည်သူများကို ဖားအံမြို့အထွက် ဇာသပြင်သွားသည့် လမ်းဆုံ၊ ဘုရားဝင်းကြီးမီးပွိုင့်၊ လှိုင်းဘွဲလမ်းခွနှင့် နိဗ္ဗိန္ဒမီးပွိုင့် စသည့်နေရာများတွင် ရှောင်တခင် စစ်ဆေးဖမ်းဆီးကာ အရေးယူဆောင်ရွက်လျက်ရှိသည်ဟု မြို့ခံများက ပြောဆိုနေ ကြသည်။

ပြီးခဲ့သည့် ဇူလိုင်လ ၂၀ရက်နေ့မှစ၍ ဖားအံမြို့ပေါ်ရှိ ရပ်ကွက်တိုင်းတွင် သက်ဆိုင်ရာ ရပ်ကွက် အုပ်ချုပ်ရေးမှူးရုံးမှ အိမ်ထောင်စုတစ်စုလျှင် အိမ်ပြင်ထွက်ခွင့်လက်မှတ် ထုတ်ပေးထားသော်လည်း ယနေ့အချိန်အထိ အဆိုပါကဒ်ကို မရရှိသေးသည့် နေအိမ်များလည်းရှိနေသေးကြောင်း သက်ဆိုင်ရာ ရပ်ကွက်နေပြည်သူများ၏ ပြောပြချက်အရ သိရသည်။

အလားတူ နယ်စပ်မြို့တစ်မြို့ဖြစ်သည့် မြဝတီမြို့တွင် ရေကြီးကာလအတွင်း ရပ်ကွက်အလိုက် ကိုဗစ်စစ်ဆေးရေးဂိတ် များ ထားရှိပြီး ရေဘေးရှောင်နှင့် အရေးပေါ်သွားလာမှုတို့ကို တားမြစ်ထားသည့် ဂိတ်အချို့မှာလည်း ဒဏ်ငွေကောက်ခံ မှုကြောင့် ပေးဆောင်ရခြင်းရှိသည်ဟုလည်း မြို့နေလူထုက ပြောဆိုသည်။

ထို့အတူ မြဝတီ၊ လှိုင်းဘွဲ၊ ကော့ကရိတ်နှင့် ကြာအင်းဆိပ်ကြီးမြို့တွင် ဇူလိုင်လ ၂၆ရက်နေ့မှစတင်ကာ မြေနိမ့်ပိုင်းနေ ရာများရှိ နေအိမ်များတွင် ရေကြီးရေလျှံမှု ဖြစ်ပွားခဲ့ပြီး လက်ရှိအချိန်တွင် ၎င်းမြို့နယ်များ၌ ရေပြန်လျော့ကျနေပြီးဖြစ်ကြောင်း သိရသည်။


Karen Information Center -KIC 

https://www.facebook.com/KICNewsPage

 

KNU ၏ သယ်ယူပို့ဆောင်ရေးဌာန အတွင်းရေးမှူး ပဒိုစောတီးတူ ကွယ်လွန်


ဇူလိုင်လ ၃၁ရက်၊ ၂၀၂၁ခုနှစ်။ ကေအိုင်စီ

ကေအဲန်ယူ-ကရင်အမျိုးသားအစည်းအရုံး၏ သယ်ယူပို့ဆောင်ရေးနှင့် လမ်းပန်းဆက်သွယ်ရေးဌာန အတွင်းရေးမှူး ပဒို စောတီးတူ ၇၂နှစ်သည် ယနေ့ (ဇူလိုင် ၃၁ရက်) နံနက် ၉း၅၂နာရီအချိန်တွင် သွေးတိုးရောဂါဖြင့် ကွယ်လွန်သွားခဲ့သည် ဟု နီးစပ်သူများက ပြောသည်။

“ဒီမနက်ပဲ ဆုံးသွားတာ။ သွေးတိုးရောဂါနဲ့ဆုံးသွားတာ။ သူက သွေးတိုးရောဂါကော၊ ဆီးချိုရောဂါကော အခံရှိတာကြာ ပြီး။ ကိုဗစ်နဲ့ဆုံးတာတော့ မဟုတ်ဘူး။”ဟု ကေအဲန်ယူ အတွင်းရေးမှူးချုပ်ရုံးမှ တာဝန်ရှိသူတစ်ဦးက ကေအိုင်စီသို့ ပြောသည်။

KNU ဗဟိုအမြဲတမ်းကော်မတီဝင်တစ်ဦးဖြစ်သူ ပဒိုစောတီးတူသည် ၁၉၆၅ခုနှစ်တွင် ကရင့်တော်လှန်ရေးထဲသို့ စတင် ဝင်ရောက်ခဲ့ပြီး ကရင်အမျိုးသားလွတ်မြောက်ရေးတပ်မတော်(ကေအဲန်အယ်လ်အေ) တွင် တပ်သားအဆင့်မှ ဗိုလ်မှူး ရာထူးအထိ အဆင့်ဆင့် တာဝန်ထမ်းဆောင်ခဲ့သည်။

သူသည် ၂၀၁၂ခုနှစ်တွင် ကေအဲန်ယူ၏ သယ်ယူပို့ဆောင်ရေးနှင့် လမ်းပန်းဆက်သွယ်ရေးဌာန အတွင်းရေးမှူးအဖြစ် ကွယ်လွန်ချိန်အထိ တာဝန်ပေးခြင်းခံရသူ ဖြစ်သည်။ ပဒိုစောတီးတူ ကွယ်လွန်ချိန်တွင် ဇနီးဖြစ်သူ နော်ဆဲဆဲ ကျန်ရစ်ခဲ့သည်။

လက်ရှိအချိန်တွင် ကိုဗစ်ကာလဖြစ်သည့်အတွက် ပဒိုစောတီးတူ၏ ဈာပနအခမ်းအနားကို အကျဉ်းချုံးသာ ပြုလုပ်သွားမည်ဟု သိရှိရသည်။


Karen Information Center -KIC 

https://www.facebook.com/KICNewsPage

တောင်ကြီးမြို့ ရပ်ကွက်တချို့ရှိ နေအိမ်များအလံဖြူ/ဝါ ထောင် အကူအညီတောင်းခံ


သျှမ်းသံတော်ဆင့်၊ ဇူလိုင် ၃၀ 

သျှမ်းပြည် တောင်ကြီးမြို့ ရပ်ကွက်တချို့ရှိ နေအိမ်များ စားဝတ်နေရေးနှင့် ဆေးဝါးအခက်အခဲမှုရှိနေသဖြင့် အလံဖြူ/ အလံဝါ ထောင်ပြပြီး အကူအညီ တောင်းနေရကြောင်း စုံစမ်းသိရသည်။

တောင်ကြီးမြို့တွင် ကိုဗစ် - ၁၉ တတိယလှိုင်း အတွင်း ပိုးတွေ့ လူနာများအဆမတန် တိုးများလာခြင်းကြောင့် Stay At Home အဖြစ် ကြေညာထားခြင်း ခံထားရပြီး အိမ်ထောင်စု မိသားစုတချို့က ရောဂါအတွက် စိုးရိမ် ပူပန် နေရသည့် အပြင် စားဝတ်နေရေးအတွက်လည်း ခက်ခဲနေကြောင်း သိရသည်။ 

“အဓိကကတော့ ချမ်းမြသာစည်ရပ်ကွက်ရယ်၊ စိန်ပန်းရပ်ကွက်ရယ်၊ ပြီးတော့ ကျောင်းကြီးစု ဖက်တို့က မိသားစုနေအိမ် တော်တော်များများ အလံထောင်ထားတာ တွေ့ရတယ်၊ လက်ရှိအနေအထားမှာဆို တစ်ရပ် ကွက် ကို ၇ အိမ် ၈ အိမ်လောက်တော့ စားဝတ်နေရေးနဲ့ ကျန်းမာရေးအတွက် အခက်အခဲတွေရှိနေကြောင်း ကို ဖော်ပြတဲ့ အလံထောင်ထားတာတွေ တွေ့နေရတယ်” ဟု တောင်ကြီးမြို့တွင်း ပရဟိတ လုပ်ဆောင်နေသူ စိုင်းမြတ်သူ က သျှမ်းသံတော်ဆင့်ကို ပြောသည်။ 

Stay at Home မကြေညာမီ တစ်ရက်အလိုက တောင်ကြီးမြို၊ ရွှေတောင်ရပ်ကွက်ဖက်မှာလည်း အလံထောင် ၍ စားဝတ်နေရေး ခက်ခဲကြောင်း ပြသသည့် အခြေအနေများရှိနေကြောင်းနှင့် Stay at Home ရက် ကြာမြင့် လာသည်နှင့် အမျှ အခြေခံ ပြည်သူများ၏ စားဝတ်နေရေးမှာ ပိုမို ကြပ်တည်းလာနိုင်သည့် အခြေအနေတွင် ရှိနေကြောင်း ၎င်းက ပြောသည်။ 

“ကျနော်တို့ စိန်ပန်းနဲ့ ရွှေတောင် ရပ်ကွက်မှာက လက်လုပ်လက်စားသမားတွေများပါတယ်၊ အဲ့အပြင် နေတဲ့ နေအိမ်ကလည်း အငှားဖြစ်နေတယ်ဆိုတော့ အိမ်ငှားခရော၊ စားဖို့သောက်ဖို့ သောက်ရေကစ ဝယ်နေရတာ ဆိုတော့ အဆင်မပြေဘူးဗျ၊ နဂိုကတည်းကမှ စစ်အာဏာ သိမ်းလိုက်လို့ ကြပ်တည်း‌နေကြရတဲ့ ဘဝတွေက အခုကိုဗစ်ကြောင့်နဲ့ ပိုပြီးဆိုးရွားလာရတယ်ပေါ့” ဟု စိုင်းမြတ်သူက ပြောသည်။ 

လက်ရှိ နိုင်ငံရေး အခြေအနေများ နှင့် ကိုဗစ် - ၁၉ ကူးစက်တွေ့ရှိမှုနှုန်း များသည်ထက် များလာခြင်းအညီ အခြေခံလူတန်းစား လူဦးရေများလည်း တစ်နေ့ထက် တစ်နေ့ များပြားလာပြီး ၎င်းတို့ များစွာ ကြုံနေရတဲ့ ပြဿနာများကြောင့် စိတ်ပိုင်းဆိုင်ရာများ ထိခိုက်ကာ အသက်ဆုံးရှုံးသွားရသည့် သူများလည်း ရှိကြောင်း သိရသည်။ 

နိုင်ငံရေးရော ကိုဗစ်ရော အခြေအနေသည် တစ်နေ့ထက် တစ်နေ့ ပိုပိုဆိုးလာပြီး အခြေခံ လူတန်းစား တွေအတွက် ကြုံလာရတဲ့ စားဝတ်နေရေး ပြဿနာတွေ၊ ဆေးကုသမှု စရိတ်ပြဿနာတွေက အဓိက စိန်ခေါ် မှုကြီး ဖြစ်လာကြောင်းသိရသည်။

“တချို့ဆို ပတ်ဝန်းကျင်ကို အကူအညီတောင်းတယ်၊ ဆိုရှယ်မီဒီယာကနေ အကူအညီ တောင်းတယ်၊ဒါပေမယ့် တချို့အတွက်ကျတော့ ဒီလိုပြဿာနာတွေကြုံရတာ များတော့ စိတ်ကျ ရောဂါနဲ့ အသက်သေသွားရတဲ့ သူတွေလည်း ရှိနေပါတယ်” ဟု ကိုစိုင်းမြတ်သူက သျှမ်းသံတော်ဆင့်ကို ပြောသည်။ 

လက်ရှိတွင် အလံထောင်ထားတဲ့ နေအိမ်များကို ပရဟိတ အဖွဲ့အစည်းများမှ ဆန်၊ ဆီ၊ ဆား ကဲ့သို့သော အခြေခံ စားသောက်ကုန်းများ ကူညီထောက်ပံ့မှုပြုလုပ်ခဲ့သော်လည်း ယခု ကူးစက်မှု၊ သေဆုံးမှု မြင့်မားမြန် ဆန်လှသည့် ကိုဗစ် - ၁၉ တတိယလှိုင်းအတွက် လုံလောက်သော ထောက်ပံ့ကူညီမှုများ မပေးနိုင်ကြောင်း လည်း ၎င်းကပြောသည်။ 

“ကျနော်တို့ ပရဟိတသမားတွေကလည်း တတ်နိုင်တဲ့ဖက်ကလည်း ကူညီတဲ့သဘောပါ၊ ကျနော်တို့ တောင်ကြီးမှာဆို အဆင်မပြေတဲ့သူများတယ် ဆိုပေမယ့် တချို့သော အဆင်ပြေတဲ့သူက နည်းနည်းချင်းစီ စုကြပြီး အဆင်မပြေတဲ့ သူတွေ ကူညီထောက်ပံ့မှုမျိုးပေးမယ်ဆို ဒီထက်ကောင်းတဲ့ ရလဒ်ကို ဖော်ဆောင် နိုင်မယ်လို့ ယုံကြည်ပါတယ်” ဟု အထက်ပါပုဂ္ဂိုလ်က ပြောသည်။ 

စစ်အာဏာသိမ်းယူပြီးနောက် တောင်ကြီးမြို့တွင် ပြည်သူများအတွက် စားဝတ်နေရေး စတင် ကြပ်တည်း လာနေရပြီး အခုကိုဗစ် - ၁၉ တတိယလှိုင်းအတွင်း Stay at Home ကြောင့်ပိုမို ဆိုးရွားလာသဖြင့် အာဏာရှိ သည့် စစ်ကောင်စီ များအနေဖြင့် ပြည်သူတို့၏ စားဝတ်နေရေးနှင့် ဆေးဝါးကုသရေးအတွက် အဖြေရှာသင့် ကြောင်း ပြည်သူများမှ တောင်းဆိုလိုက်သည်။ 


SHAN News (Burmese Version) 

https://www.facebook.com/shannewsburmese

 

ဆီးဒင်ယန် စစ်​​ကောင်စီ တပ်စခန်းကို ​ကေအိုင်​အေ ဝင်တိုက် စစ်​ကောင်စီစစ်သားနှစ်ဦး​ သေကာ စခန်းမီးရှို့ခံရ


31 July 2021 - Kachinwaves 

ကချင်ပြည်နယ် နမ္မတီးမြို့ ဆီးဒင်ယန် ကျေးရွာအနီးက စစ်ကောင်စီတပ်စခန်းကို ကေအိုင်အေ ဝင်တိုက်ခိုက်ခဲ့ကာ စစ်​ကောင်စီစစ်သားနှစ်ဦးကျပြီး စခန်းကိုလည်း မီးရှို့ဖျက်ဆီး ခံခဲ့ရ​ကြောင်း သတင်းရရှိသည်။ 

လက်နက်အချို့လည်း သိမ်းဆည်းရမိသည်ဟု ကြားရ​ကြောင်း ​ဒေသခံတစ်ဦးကဆိုသည်။ 

အဆိုပါ တပ်စခန်းကို ယ​​နေ့နံနက်ပိုင်း ​ကေအိုင်​အေ မှ သွားတိုက်ခဲ့ပြီး နံနက် ၄ နာရီက​​နေ ၆ နာရီခန့်ထိ တိုက်ပွဲဖြစ်ပွားခဲ့ခြင်းဖြစ်သည်။ 

စစ်ကောင်စီတပ်ဖွဲ့ဝင်များ ရမ်းသန်းပစ်ခတ်သည့် လက်နက်ကြီး​ထိကာ အသက် ၅၀ ကျော်အရွယ် ​ဒေသခံဖြစ်သူဦးမိုး​ကျော် သေဆုံး​ခဲ့ရ​ကြောင်းလည်း ​ဒေသခံတစ်ဦးကဆိုသည်။ 

ဇူလိုင် ၃၀ ရက် နံနက်ပိုင်းကလည်း ဝိုင်း​​​မော်မြို့၊ မိုး​ကောင်းမြို့ စသည့် အနီးဝန်းကျင်ရှိ စစ်​ကောင်စီ တပ်စခန်းနေရာများကို ​ကေအိုင်​အေ မှ ဝင်​ရောက် တိုက်ခိုက်ခဲ့သည်။


Kachinwaves 

https://www.facebook.com/kachinwavesnews

လွိုင်ကော်မြို့နယ်အရှေ့ဖက်မှာ တိုက်ပွဲဖြစ်ပွား


ကရင်နီပြည်နယ် လွိုင်ကော်မြို့နယ်အတွင်းက ဒေါမူကလားကျေးရွာအရှေ့ဖက်ခြမ်းမှာ ကရင်နီတပ်မတော်(KA)၊ ကရင်နီအမျိုးသားကာကွယ်ရေးတပ်(KNDF)ပူးပေါင်းတပ်ဖွဲ့နဲ့ စစ်ကောင်စီတပ်တို့ ဒီကနေ့ ဇူလိုင်လ ၃၁ရက်နေ့ နေ့လည် ၁၁နာရီကျော်အချိန်မှာ တိုက်ပွဲဖြစ်ပွားခဲ့တယ်လို့ သိရပါတယ်။

“သူတို့နယ်ကျော်လာလို့ပစ်တာ သူတို့အင်အား ၈၀ကျော်လောက်ရှိမယ်။ ဒီမနက် ၁၁နာရီခွဲလောက်မှာပစ်တယ် ၂၀မိနစ်လောက်ပဲရှိတယ်။ တိုက်ပွဲဖြစ်တာက ၁၁နာရီခွဲလောက်မှာဖြစ်တာ ဒါပေမယ့် ၁၂နာရီကျော် ၁နာရီထိတော့ ပစ်နေတာရှိတယ် သူတို့ ဘာပစ်နေတာလဲတော့မသိဘူး။ သူတို့ အဲ့နေရာမှာပဲ ရှိသေးတယ်လို့ ယူဆရတယ် ဒီမှာက စစ်ဘေးရှောင်တွေရှိတယ် အခုလိုဖြစ်တော့ သူတို့ ပိုပြီး ကြောက်လန့်တယ်။ ဒီဖက်မှာက စစ်ဘေးရှောင် တစ်ထောင်လောက်ရှိတယ်”လို့ ကရင်နီတပ်မတော်မှ တာဝန်ရှိသူတစ်ဦးက ကန္တာရဝတီတိုင်း(မ်)ကို ပြောပါတယ်။

စစ်ကောင်စီဖက်က နယ်မြေကျူးကျော်ရာမှ ပစ်ခတ်မှုဖြစ်ပွားခဲ့ရပြီး  အဆိုပါ နှစ်ဖက်ပစ်ခတ်မှုက မိနစ် ၂၀သာကြာမြှင့်ခဲ့သလို စစ်ကောင်စီဖက်က လက်နက်ကြီး၊ လက်နက်ငယ်အသုံးပြုပြီး တစ်ဖက်သတ် ရမ်းသမ်းပစ်ခတ်မှုရှိခဲ့တယ်လို့ သိရပါတယ်။

“ရွာရဲ့အရှေ့မြောက်ဘက် ၃မိုင်အကွာလောက်ရှိမယ် ခုတော့ လက်နက်ကြီးသံတစ်ချက်တစ်ချက် ကြားတယ်။ စစ်ကောင်စီအင်အားက ၁၀၀လောက်ရှိမယ် ခြေလျင်နဲ့သွားတာ အရှေ့ဖက် တောင်ပေါ်ကိုတက်သွားတာပါ” လို့ ဒေသခံတစ်ဦးကလည်း ပြောပါတယ်။

စစ်ဘေးရှောင်စခန်းရှိရာသို့ ဦးတည်ပြီး နံနက် ၁၀နာရီဝန်းကျင်လောက်မှာ ခြေလျင်ဖြင့်စစ်ကောင်စီတပ်အင်အား ၁၀၀ ကျော်က လှည့်လည်သွားလာရာမှ နယ်မြေကျူးကျော်မှုကြောင့်  ပစ်ခတ်မှုဖြစ်ပွားရပြီး လက်ရှိမှာလည်း တပ်ဆုတ်မှုမရှိသေးဘဲ ပစ်ခတ်မှုတွေ လုပ်ဆောင်နေတယ်လို့ သိရပါတယ်။


Kantarawaddy Times 

https://www.facebook.com/KantarawaddyTimes

CDF တိုက်ပွဲသတင်း


CDF-Matupi, CNA ပူးပေါင်းအဖွဲ့နှင့် အကြမ်းဖက်စစ်ကောင်စီတပ်အကြား ၂၀၂၁ခုနှစ် ဇူလိုင် (၃၀) မတူပီ-မင်းတပ်လမ်းမကြီး မိုင်တိုင် (၇၃) တွင် တိုက်ပွဲဖြစ်ရာ အကြမ်းဖက်စစ်တပ်မှ တပ်ရင်းမှူး ဒုတိယဗိုလ်မှူးကြီး ဇော်ဇော်စိုး အပါအဝင် စစ်ဗိုလ် စစ်ခွေး (၁၀)သေဆုံးသည်။

မိမိ CDF-Matupi မှ ဆလိုင်း ကုန်းထန်း, ဆလိုင်း ဟာထွန်းနှင့် ဆလိုင်းထန်းချင်းဆန် (၃)တို့သည် နိုင်ငံနဲ့လူမျိုးအတွက် အသက်ပေးလှူခဲ့ကြသည်။ 

အကြမ်းဖက်စစ်တပ်မှ နယ်မြေကျူးကျော်ဝင်ရောက်လာမှုရှိနေသရွေ့ဆက်လက်တိုက်ပွဲပြင်း ထန်ဖွယ်ရှိသည်။


Chinland Defense Force

https://www.facebook.com/chinlanddefenseforce/

Covid-19 ကြောင့် အလံဖြူ၊ အလံဝါတွေနဲ့ အကူအညီတောင်းခံနေရ



ကိုရိုနာဗိုင်းရပ်စ် (ကိုဗစ်-၁၉) တတိယလှိုင်း ကူးစက်သေဆုံးနှုန်းတွေ ပြင်းထန်နေချိန်မှာ တစ်မိသားစုလုံး ရောဂါပိုးကူးစက်ခံထားရတဲ့အိမ်တွေဆိုရင် အလံဖြူ ဒါမှမဟုတ် အလံဝါ ထောင်ထားကြပြီး အစားအစာနဲ့ ဆေးဝါးအကူအညီလိုအပ်နေတာမို့ တတ်နိုင်တဲ့သူတွေနဲ့ ပရဟိတအဖွဲ့တွေက အခမဲ့ သွားရောက်လှူဒါန်း ကူညီပေးနေကြပါတယ်။

ရန်ကုန်မြို့အပါအဝင် မြို့နယ်အသီးသီးက နေအိမ်တွေထဲ မိသားစုလိုက် Covid-19 ရောဂါခံစားနေရသူတွေ အစားအစာနဲ့ ဆေးဝါးအကူအညီ လိုအပ်နေတာမို့ ကိုယ့်အိမ်မှာ အဝါရောင်အလံနဲ့ အဖြူရောင်အလံတွေ ထောင်ထားပြီး အကူအညီတောင်းခံနေကြရတာပါ။

သင်္ဃန်းကျွန်းမြို့နယ်မှာ နေထိုင်တဲ့ ကိုမျိုးကတော့ အခက်အခဲဖြစ်နေချိန် အလံထောင်ပြီး အကူအညီ တောင်းလို့ရကြောင်း လူမှုကွန်ရက်မှာ တွေ့ရှိတာကြောင့် အလံဝါထောင်ပြီး အကူအညီတောင်းခဲ့တာ အဆင်ပြေသွားတယ်လို့ RFA ကိုပြောပါတယ်။

" လိုင်းပေါ်မှာတင်ထားတာတွေ တွေ့တယ်၊ အစကတော့ ကိုယ့်ဘာသာကိုယ် ကျိတ်ပြီးတော့ လုပ်ဖို့ပဲ၊ စက်ဘီးတွေဘာတွေတောင် ပေါင်ပြီးတော့ ပြထားရတဲ့ ဆေးခန်းတွေ ဘာတွေရှိတယ်၊ ဒါပေမဲ့ ဒီစက်ဘီး ပေါင်ထားတဲ့ပိုက်ဆံ ကုန်သွားရင် ဘာဆက်လုပ်ရမလဲဆိုတာ ကျွန်တော့ဦးနှောက်ထဲမှာ မပေါ်လာဘူး၊ အဲဒီမှာအခုလိုမျိုး အကူအညီတောင်းခံလို့ရတယ်ဆိုတာ တက်လာတော့ ကျွန်တော့် မိတ်ဆွေ အိမ်နီး နားချင်းတွေနဲ့ တိုင်ပင်ပြီးတော့ တင်လိုက်တာပေါ့၊ အကူအညီရပါတယ်၊ အဆင်ပြေပါတယ်၊ အသင်းတွေ ကလည်း လာတယ်၊ ပတ်ဝန်းကျင်ကလည်း လာတယ်၊ တော်တော်များများ အဝေးကြီးကနေလည်း လာတယ်၊ မန္တလေးကနေပြီးတောင် သူ့အဆက်အသွယ်နဲ့ လူကြုံနဲ့ ပို့ခိုင်းတာတွေရှိတယ် "

အလုပ်နားထားရချိန် အသက် ၇၆ နှစ်အရွယ် မိခင်ဖြစ်သူ နာမကျန်းဖြစ်လို့ အခုလိုအကူအညီ တောင်းရတာ ဖြစ်ပြီး လာရောက်လှူဒါန်းသူတွေကိုလည်း ကျေးဇူးတင်တယ်လို့ ကိုမျိုးက ဆိုပါတယ်။

Covid-19 ကြောင့် ဈေးလည်းမရောင်းရ၊ လုပ်ငန်းတွေရပ်ထားရချိန်၊ စားဝတ်နေရေးအဆင်မပြေတော့လို့ အလံဖြူ ထောင်ခဲ့ပြီးတဲ့နောက်ပိုင်း လာရောက်လှူဒါန်းသွားတာတွေရှိခဲ့လို့ အဆင်ပြေသွားတယ်လို့ မြောက်ဒဂုံမြို့နယ်မှာ နေထိုင်တဲ့ ဒေါ်ထွေးရင်ကလည်း RFA ကို ပြောပါတယ်။

" ဒီလိုလိုင်းပေါ်မှာတင်ထားတော့ ကိုယ်ကလည်း စားဝတ်နေရေးအတွက်ပဲ အကူအညီတောင်းလိုက်တာ၊ ခေါက်ဆွဲခြောက်နဲ့ ဆီဘူးနဲ့ ဆန်နဲ့တော့ လာလှူသွားပါတယ်၊ လက်ရှိမှာတော့ စားဝတ်နေရေး အတွက်ပဲ လိုအပ်နေပါတယ်၊ လက်ရှိအချိန်ထိကတော့ ဒီလိုပဲ စားသောက်နေရတာပေါ့။ ဈေးမရောင်းရဘူး၊ လုပ်ငန်းတွေလည်း ရပ်ထားရတယ်၊ အကူအညီပေးတဲ့သူတွေကိုလည်း ကျေးဇူးတင်ပါတယ် "

လက်ရှိ အာဏာသိမ်းစစ်ကောင်စီအနေနဲ့ ကိုဗစ်တတိယလှိုင်းအတွက် လုံလောက်တဲ့ စီမံခန့်ခွဲမှုတွေ မလုပ်ပေးတာကြောင့် နေ့စဉ်ကူးစက်မှုတွေ ထောင်ချီနေသလို သေဆုံးမှုတွေကလည်း နေ့စဉ် ရာချီ သေဆုံးနေရပါတယ်။

ဒီလိုအခြေအနေမျိုးမှာ တစ်မိသားစုလုံး ကိုဗစ်ကူးစက်ခံရပြီး အပြင်ထွက်လို့မရတဲ့ မိသားစုဝင်တွေ အနေနဲ့ အစားသောက်နဲ့ ဆေးဝါးအခက်အခဲတွေ ကြုံနေရတဲ့အပေါ် ပြည်သူကနေ ပြည်သူကို ကူညီနိုင်ဖို့အတွက်ပဲ မျှော်လင့်ပြီး အကူအညီတောင်းခံနေကြရတာပါ။

အလံထောင်ပြီး အကူအညီတောင်းခံနေသူတွေကို အစားအစာနဲ့ ဆေးဝါး အကူအညီတွေ သွားပို့ပေးကာ ကူညီပေးနေတယ်လို့ ရန်ကုန်မြို့ မရမ်းကုန်းမြို့နယ်ထဲက Healthy Youth အဖွဲ့ဝင်တစ်ယောက် က RFA ကိုပြောပါတယ်။

" တချို့ ကိုဗစ်ဖြစ်တာတို့၊ နေမကောင်းတာတို့၊ တစ်အိမ်လုံး ထွက်ဝယ်လို့မရတဲ့ အိမ်တွေကျတော့ ညီမတို့အဖွဲ့က အသင်းကပေါ့ ဝယ်ပြီးတော့ ပို့ပေးတယ်။ ပိုက်ဆံမတတ်နိုင်တဲ့သူတွေကိုတော့ ညီမတို့ အတတ်နိုင်ဆုံး ရန်ပုံငွေကနေ နည်းနည်းပါးပါး ထောက်ပံ့ပေးတယ်။ တချို့ ပိုက်ဆံရှင်းနိုင်တဲ့ သူတွေကတော့ သူတို့မှာတဲ့ပမာဏအတိုင်း ပိုက်ဆံပြန်ရှင်းပေးတယ်ပေါ့နော်။ ညီမတို့အနေနဲ့ သယ်ယူခ တွေ ဘာတွေ ဘာမှမယူဘဲနဲ့ ပို့ပေးတာပေါ့၊ အဲဒါလေးတွေ လုပ်ပေးနေပါတယ်။ အဓိကကတော့ ညီမတို့ အနေနဲ့ ဆေးတော့ ဝယ်ပေးရတာ အများဆုံးဖြစ်နေတယ်ရှင့် "

လူအင်အား၊ ငွေအင်အားကြောင့် ရန်ကုန်က ရပ်ကွက်အချို့အထိသာ ကူညီနိုင်ပြီး လက်ရှိအချိန်အထိ အကူအညီတောင်းခံတဲ့ အိမ်ခြေပေါင်း ၃၀ ကျော်နီးပါးကိုတော့ ကူညီပေးထားတယ်လို့ ပြောပါတယ်။

အစားအသောက်အတွက် အကူအညီလိုအပ်နေရင် အလံဖြူထောင်ထားကြပြီး ဆေးဝါးနဲ့ အောက်ဆီဂျင် အတွက် အကူအညီလိုအပ်ရင်တော့ အလံဝါဆိုပြီး ထောင်ထားကြပေမယ့် လက်ရှိအလံထောင်ပြီး အကူအညီ တောင်းသူအများစုဟာ ဆေးဝါးလိုအပ်နေကြတာဖြစ်တယ်လို့ အကူအညီပေးနေသူတွေက ပြောပါတယ်။

စစ်အာဏာသိမ်းမှုအပြင် ကိုဗစ်တတိယလှိုင်းဒဏ်ကိုပါ ပြင်းပြင်းထန်ထန် ခံနေရတဲ့ ပြည်သူတွေအတွက် ပြည်သူအချင်းချင်း ဖေးမကူညီမှုကလွဲပြီး တခြားမရှိတော့တာကြောင့် အခုလိုကူညီပေးနေရတာလို့ ဒဂုံတက္ကသိုလ် ကျောင်းသားများသမဂ္ဂ ဥက္ကဌ ကိုမင်းဟန်ထက်က RFA ကိုပြောပါတယ်။

" ကျွန်တော်တို့ ဒီကာလအတွင်းမှာက ပြည်သူတွေက ဒုက္ခတွေက တစ်ခုမဟုတ်ဘူး၊ နှစ်ခုမဟုတ်ဘူး၊ တော်တော်များများကို ခါးစည်းပြီးခံနေကြရတာဗျ။ ကျွန်တော်တို့က စစ်အာဏာသိမ်းမှုကို ကြုံထား ရတယ်။ ဒီအောက်မှာမှ ကံဆိုးစွာနဲ့ ကိုဗစ်တတိယလှိုင်းက တော်တော်ကို ထိန်းမရ၊ သိမ်းမရနဲ့ ဖြစ်လာတယ်။ ကျွန်တော်တို့က ပြည်သူအချင်းချင်း ပြန်ပြီးတော့ စောင့်ရှောက်ရုံ၊ ပြည်သူအချင်းချင်း ပြန်ပြီးတော့ ဖေးမရုံ၊ ပြည်သူအချင်းချင်း လက်တွဲပြီးတော့ ဒီကပ်ဆိုးကို ကျော်လွှားရုံကလွဲပြီးတော့ ဘယ်သူ့ကိုမှ အားကိုးနေလို့ မရတော့ဘူးပေါ့ဗျာ။ အဲလိုမျိုး အခြေအနေမှာ အခြေခံအဆင့် လိုအပ်ချက် တွေဖြစ်တဲ့ ကိုဗစ်ဖြစ်လာပြီဆိုရင် ဒီစားစရာတွေ အဓိကကတော့ ကိုယ့်ကိုကိုယ် အဟာရပြည့်ဝအောင် နေဖို့ စသည်ဖြင့်ပေါ့လေ၊ နောက်တစ်ဆင့်ကတော့ ဆေးဝါးတွေပေါ့၊ နောက်ဆုံးအဆင့်ကျမှ ကျန်းမာရေး စောင့်ရှောက်မှုတွေပေါ့၊ အဲဒီအဆင့်တွေရဲ့ အခြေခံအဆင့်တွေဖြစ်တဲ့ စားစရာသောက်စရာတွေနဲ့ ဒီ ဆေးဝါးတွေကိုတောင်မှ ပြည်သူတွေက အကူအညီလိုနေကြတာပေါ့၊ အဲဒါကိုမှ အလံဝါ ထောင်တယ်၊ ပြည်သူအချင်းချင်း ဖေးမတယ်ဆိုတဲ့ အလေ့အထကတော့ လောလောဆယ် ကျွန်တော်တို့ ကြားထဲမှာ တွင်တွင်ကျယ်ကျယ်နဲ့ အလုပ်ဖြစ်နေတယ်၊ ကျွန်တော်တို့ကိုယ်တိုင်လည်း ဒီပေါ်မှာ ဝင်ရောက် ကူညီ လုပ်ဆောင်နေတာတွေ ရှိပါတယ် "

Covid-19 True Information Myanmar ဆိုတဲ့ ဖေ့စ်ဘွတ်စာမျက်နှာကနေလည်း အကူအညီ တောင်းခံ နိုင်ပြီး အကူအညီတောင်းခံလာသူတွေကိုလည်း မြေပြင်မှာ ချိတ်ဆက်လှူဒါန်းနေတဲ့ ပရဟိတ အဖွဲ့တွေနဲ့ ချိတ်ဆက်ပေးနေတယ်လို့ ကိုမင်းဟန်ထက်က ဆိုပါတယ်။

တစ်ဘက်မှာလည်း ဒီလိုအလံဖြူ၊ အလံဝါထောင်ထားတဲ့ အိမ်တွေကိုကူညီပေးနေတဲ့ ပရဟိတ လူငယ်တွေကို အာဏာသိမ်းစစ်ကောင်စီက ဟန့်တားဖမ်းဆီးတာတွေ ရှိခဲ့ပါတယ်။

ဇူလိုင်လ ၂၄ ရက်နေ့ကဆို စမ်းချောင်းမြို့နယ်မှာ အလံထောင်ထားတဲ့ နေအိမ်တွေအတွက် ဆေးဝါးနဲ့ အစားအသောက်တွေ ကူညီပို့ဆောင်ပေးနေတဲ့ လူငယ်ပရဟိတအဖွဲ့ဝင်တွေကို စစ်ကောင်စီ တပ်သားတွေက နားထင်ကိုသေနတ်နဲ့ထောက်ပြီး ဖမ်းသွားပြီးမှ ပြန်လွှတ်ပေးတဲ့ ဖြစ်စဉ်မျိုး ရှိခဲ့ပါတယ်။

    "သေဆုံးမှုတွေရဲ့အဓိက တရားခံကလည်း အာဏာသိမ်းစစ်ကောင်စီပဲလို့ ကျွန်တော်တို့ ပြောချင်တယ်"

ကိုဗစ်ရောဂါ ကူးစက်ခံထားရတဲ့အချိန်မှာတောင် စစ်ကောင်စီရဲ့ ဟန့်တားနှောက်ယှက်မှုတွေကြောင့် အသက်ဆုံးရှုံးသွားသူတွေအတွက်လည်း အာဏာသိမ်းစစ်ကောင်စီမှာပဲ တာဝန်ရှိတယ်လို့ ဒဂုံ တက္ကသိုလ် ကျောင်းသားများ သမဂ္ဂ ဥက္ကဌ ကိုမင်းဟန်ထက်က ပြောပါတယ်။

" လောလောဆယ်တော့ ကျွန်တော်တို့က ပြည်သူအချင်းချင်းကူညီတယ်ဆိုတဲ့ နေရာမှာတောင်မှ ဒီ စစ်ကောင်စီက ဝင်ရောက်နှောက်ယှက်တာတွေ၊ ဖမ်းဆီးတာတွေ၊ စေတနာဝန်ထမ်းတွေကို ဝင်ဖမ်းတာတွေ၊ အောက်ဆီဂျင်ကိုသိမ်းတာတွေ၊ တကယ့်ကိုဗျာ အခြေခံ လူ့ကျင့်ဝတ်တောင်မရှိတဲ့ လုပ်ရပ်တွေကို သူတို့အနေနဲ့ ပြောင်းပြောင်တင်းတင်း ကျူးလွန်နေကြတာဗျ။ လူ့အခွင့်အရေးတွေ ချိုးဖောက်နေကြတာ၊ ရာဇဝတ်မှုတွေကျူးလွန်နေကြတာတွေ ရှိတယ်။ အဲဒီလိုမျိုးဆိုတဲ့အတွက် ဒီကိုဗစ် တတိယလှိုင်းမှာ ဒီလိုသေဆုံးမှုတွေ ကိုဗစ်တတိယလှိုင်းပိုပြီး ကြီးမားလာခြင်းပေါ့ဗျာ။ ပြီးတော့ လူတွေသေဆုံးမှုပေါ့၊ အဲဒီဟာမှာ အဓိက တာဝန်အရှိဆုံးက အာဏာသိမ်းစစ်ကောင်စီပဲ။ ပြီးတော့ သေဆုံးမှုတွေရဲ့အဓိက တရားခံကလည်း အာဏာသိမ်းစစ်ကောင်စီပဲလို့ ကျွန်တော်တို့ ပြောချင်တယ် "

အလံထောင်ပြီး အစားအစာနဲ့ ဆေးဝါးအကူအညီ တောင်းကြတဲ့ ပုံစံမျိုးကို ဇူလိုင်လ တတိယပတ်လောက် ကနေစလို့ ပြုလုပ်လာကြတာတွေ့ရပြီး RFA ကပြုစုထားတဲ့စာရင်းအရ ဇူလိုင် ၂၀ ရက် နေ့ကနေ ၂၃ ရက် နေ့အထိ (၄)ရက်အတွင်းမှာတင် ရန်ကုန်မြို့မှာ အကူအညီတောင်းခံတဲ့အိမ်ပေါင်း ၈၃ အိမ်ရှိခဲ့ပေမယ့် မြေပြင်မှာ ဒီထက်ပိုများပြားနိုင်တယ်လို့ အကူအညီပေးနေတဲ့ ပရဟိတအဖွဲ့တွေက ပြောကြပါတယ်။

RFA Burmese

(ရန်ကုန်မြို့ရှိ နေအိမ်တစ်အိမ်မှာ အလံဖြူထောင်ထားတာကို တွေ့ရစဉ်၊ Photo: CJ)


အောက်ဆီဂျင်ထုတ်စက် အလုံး ၂၀၀ မြန်မာကို ပေးမယ်လို့ စင်္ကာပူ ကြေညာ


ရေကြီးရေလျှံမှုတွေ ဖြစ်လာတဲ့ အတွက် ကိုဗစ် လူနာကို နေရာရွှေ့ပေးကြစဥ်။ ဇူလိုင် ၂၆၊ မြဝတီမြို့။


ကိုဗစ်နိုင်တင်း ကပ်ရောဂါကို ရင်ဆိုင်နေရတဲ့ မြန်မာပြည်သူတွေကို အားပေးကူညီတဲ့ အနေနဲ့ ၁၀ လီတာ အောက်ဆီဂျင်ထုတ်စက် အလုံး ၂၀၀ ပေးသွားမယ်ဆိုပြီး စင်္ကာပူ အစိုးရရဲ့ နိုင်ငံခြားရေး ဝန်ကြီးဌာနက ဇူလိုင်လ ၂၈ ရက်နေ့ ရက်စွဲနဲ့ ကြေညာပါတယ်။

စင်္ကာပူ ကြက်ခြေနီ အသင်း SRC ရဲ့ လမ်းကြောင်းကနေတဆင့် အဲဒီ အောက်စီဂျင် ကွန်ဆန်ထရိတ်တာ စက်တွေကို ပေးမှာ ဖြစ်တယ်လို့ ဆိုပါတယ်။

SRC အနေနဲ့ မြန်မာ ကြက်ခြေနီ အသင်းနဲ့ အတူ လက်တွဲပြီး စင်္ကာပူက ကူညီတဲ့ အောက်ဆီဂျင် စက်တွေကို ကိုဗစ်ဒဏ် ခံနေရတဲ့ မြန်မာ လူမှု အသိုင်းအဝိုင်းတွေထဲ ဖြန့်ဝေ ပေးသွားမယ် ဆိုပြီး စင်္ကာပူ နိုင်ငံခြားရေးဌာနရဲ့ ကြေညာချက်ထဲ တွေ့ရပါတယ်။

စင်္ကာပူ အစိုးရက မြန်မာကို ကိုဗစ်ရှိမရှိ စစ်တဲ့ PCR စက်တွေ အပါအဝင် စစ်ဆေးရာမှာ လိုအပ်တဲ့ ပစ္စည်းတွေ၊ ဆေးရုံသုံး မျက်နှာအကာအကွယ်တွေ၊ လက်ကိုလိမ်းရတဲ့ ပိုးသတ်ဆေးရည်တွေနဲ့ တခြား ဆေးဘက်ဆိုင်ရာ ပစ္စည်းတွေကို ပေးအပ်ထားနှင့်ပြီး ဖြစ်တယ်လို့လည်း ဆိုပါတယ်။

ကိုဗစ် နိုင်တင်း ကပ်ရောဂါကို ရင်ဆိုင်နေကြတဲ့ မြန်မာပြည်သူတွေနဲ့ အတူ တသားတည်း ရပ်တည်တယ်လို့လည်း စင်္ကာပူ နိုင်ငံခြားရေးဌာနက ဆိုထားပါတယ်။


BBC Burmese

https://www.bbc.com/burmese/live/burma-57783160

ကိုဗစ်ကိုင်တွယ်နိုင်ဖို့ဆိုရင် စစ်ကောင်စီ လုပ်ရပ်တွေကို ထိန်းချုပ်နိုင်ဖို့ လိုတယ်လို့ ကုလအထူးသံပြော

အောက်ဆီဂျင် စက်ရုံရှေ့ မြင်ကွင်း။ ဇူလိုင် လလယ်၊ ရန်ကုန်

 “ကိုဗစ်ဆိုင်ရာ အပစ်အခတ်ရပ်စဲမှု လုပ်ဖို့ လိုနေပြီ” လို့ တွမ်အင်ဒရူးစ် သတိပေး

    “မြန်မာပြည်မှာ မသေသင့်ပဲ လူတွေ အများကြီး သေခဲ့ရပြီးပြီ။ ကုလသမဂ္ဂဘက်က အရေးယူ ဆောင်ရွက်မှု မလုပ်ဘူးဆိုရင် နောက်ထပ်လည်း အသက်တွေ ဆုံးရှုံး ရလိမ့်မယ်” from တွမ်အင်ဒရူးစ် လူ့အခွင့်အရေးဆိုင်ရာ ကုလအထူးသံ

    “မြန်မာပြည်မှာ မသေသင့်ပဲ လူတွေ အများကြီး သေခဲ့ရပြီးပြီ။ ကုလသမဂ္ဂဘက်က အရေးယူ ဆောင်ရွက်မှု မလုပ်ဘူးဆိုရင် နောက်ထပ်လည်း အသက်တွေ ဆုံးရှုံး ရလိမ့်မယ်”

    တွမ်အင်ဒရူးစ်လူ့အခွင့်အရေးဆိုင်ရာ ကုလအထူးသံ

မြန်မာပြည်မှာ ကိုဗစ်ကူးစက်နှုန်း၊ သေဆုံးနှုန်း အဆမတန်များနေတာကို ထိန်းချုပ်နိုင်ဖို့ ဆိုရင် “ကိုဗစ်ဆိုင်ရာ ပစ်ခတ်မှုရပ်စဲရေး”လုပ်ဖို့ လိုနေပြီလို့ မြန်မာနိုင်ငံ လူ့အခွင့်အရေး အခြေအနေတွေကို အစီရင်ခံရတဲ့ ကုလသမဂ္ဂ အထူး ကိုယ်စားလှယ် တွမ်အင်ဒရူးစ်က ပြောပါတယ်။

ကျန်းမာရေး ဆိုင်ရာ လူပုဂ္ဂိုလ်နဲ့ နေရာထိုင်ခင်းတွေကို စစ်ကောင်စီက ပစ်မှတ်ထား တိုက်ခိုက်တာတွေ ရပ်ဖို့ ကုလ အထူးသံတမန် မစ္စတာ အင်ဒရူးစ်က ပြောတာ ဖြစ်ပါတယ်။

ကျန်းမာရေး ဆိုင်ရာ လူပုဂ္ဂိုလ်နဲ့ နေရာထိုင်ခင်းတွေ အတိုက်အခိုက် ခံရတဲ့ ဖြစ်ရပ် အနည်းဆုံး အကြိမ် ၂၆၀ ရှိခဲ့တယ်လို့ ကုလ အထူးသံက ဆိုပါတယ်။ အဲဒီ တိုက်ခိုက်မှုတွေကြောင့် အနည်းဆုံး ၁၈ ယောက် သေဆုံးခဲ့ရတယ် လို့လည်း ဆိုပါတယ်။

ကျန်းမာရေး စောင့်ရှောက်မှု ဆိုင်ရာ လူပုဂ္ဂိုလ် အယောက် ၆၀၀ ကျော်ကို စစ်ကောင်စီက ဖမ်းဝရမ်း ထုတ်ထားပြီး၊ လက်ရှိ ဖမ်းခံထားရသူ အနည်းဆုံး ၆၇ ယောက် ရှိနေတယ်လို့ တွမ်အင်ဒရူးစ်က ထုတ်ပြန်ပါတယ်။

စစ်ကောင်စီက ကျူးလွန်နေတာတွေ အားလုံး ရပ်တန့်နိုင်ဖို့ လုံခြုံရေးကောင်စီ အပါအဝင် အဖွဲ့ဝင် နိုင်ငံတွေ အားလုံး အနေနဲ့ ၊အသုံးချလို့ ရနိုင်သမျှ ကုလသမဂ္ဂ ဆိုင်ရာ နည်းလမ်းတွေ အားလုံး သုံးကြပါ ဆိုပြီးတော့ မစ္စတာ အင်ဒရူးစ်က တိုက်တွန်း နေပါတယ်။

“မြန်မာပြည်မှာ မသေသင့်ပဲ လူတွေ အများကြီး သေခဲ့ရပြီးပြီ။ ကုလသမဂ္ဂဘက်က အရေးယူ ဆောင်ရွက်မှု မလုပ်ဘူးဆိုရင် နောက်ထပ်လည်း အသက်တွေ ဆုံးရှုံး ရလိမ့်မယ်”လို့ တွမ်အင်ဒရူးစ်က ပြောပါတယ်။

“မြန်မာပြည်မှာ စစ်ကောင်စီက ကိုဗစ်ပျံ့နေတာကို ဘေးချိတ်ပြီး ကျန်းမာရေး ဆိုင်ရာ ပုဂ္ဂိုလ်တွေ အပေါ် အညှာအတာမဲ့ တိုက်ခိုက်နေချိန်မှာ ကုလအဖွဲ့ဝင် နိုင်ငံတွေက ဘေးကနေ အားရနေတဲ့ ပုံစံမျိုး နေပြလို့ မဖြစ်ဘူး။ ဒီအကြမ်းဖက်မှုတွေ အဆုံးသတ်အောင် ဝိုင်းလုပ်ရမယ်။ ဒါမှ ဆရာဝန်တွေ၊ သူနာပြုတွေဟာ လူ့အသက်ကယ်တဲ့ အလုပ်တွေ လုပ်ဆောင်နိုင်မှာ ဖြစ်တယ်။ နိုင်ငံတကာ အဖွဲ့တွေကလည်း အဲဒီ အခြေအနေရှိမှပဲ ကာကွယ်ဆေးတွေ ပို့ပေးတာမျိုး အပါအဝင် ကျန်းမာရေး စောင့်ရှောက်မှု လုပ်ငန်တွေမှာ ဝင်ကူတာမျိုးတွေ လုပ်နိုင်ကြလိမ့်မယ်” လို့ မစ္စတာ အင်ဒရူးစ်က ပြောပါတယ်။

လုံခြုံရေးကောင်စီကနေ ပြီးခဲ့တဲ့ ဖေဖေါ်ဝါရီလ ကတည်းက ချမှတ်ထားတဲ့ ဆုံးဖြတ်ချက်ထဲ ကိုဗစ် ကာကွယ်ဆေးတွေ ထိုးပေးနိုင်ရေး၊ လိုအပ်တဲ့ အကူအညီ အထောက်အပံ့တွေ ပေးနိုင်ရေး အတွက် လက်နက်ကိုင် ပဋိပက္ခတွေ ရှိနေတဲ့ နေရာတိုင်းမှာ အပစ်ရပ်ကြရမယ် ဆိုတဲ့ အချက် ပါဝင်ပါတယ်။

“အဲဒီ လုံခြုံရေးကောင်စီ ဆုံးဖြတ်ချက်ဟာ အထိန်းအချုပ်မရှိ အကြမ်းဖက်မှုတွေ တွေ့ကြုံနေရတဲ့ တိုင်းပြည်မျိုးမှာ ကိုဗစ် ကိုင်တွယ် ထိန်းချုပ်နိုင်ရေး အလို့ငှာ အခြေခံမူ အဖြစ် ကိုင်စွဲကြဖို့ ချမှတ်ထားတာ ဖြစ်ပါတယ်။ အခု မြန်မာနိုင်ငံထဲက အခြေအနေဟာ ပိုဆိုးရွားလာတာကြောင့် လုံခြုံရေးကောင်စီရဲ့ ဆုံးဖြတ်ချက်ကို ပိုပြီး အာရုံစိုက် အကောင်အထည် ဖော်ဖို့ လိုအပ်နေပါတယ်။ ဒါမှပဲ လူ့အသက်တွေ အများအပြား ကယ်နိုင်လိမ့်မယ်” လို့ မစ္စတာ အင်ဒရူးစ်က ပြောပါတယ်။

“အာဏာသိမ်း စစ်ကောင်စီ ဆင်းသွားပြီး တရားဝင် အစိုးရ ဦးဆောင်မှုနဲ့ ကိုဗစ် ပြဿနာကို ကိုင်တွယ်နိုင်ရင် အကောင်းဆုံးပေါ့။ ဒါပေမယ့် အဲဒီ အခြေအနေကို မရောက်ခင် လတ်တလော အနေအထားမှာ၊ စစ်ကောင်စီရဲ့ အဆင်ခြင်မဲ့ တိုက်ခိုက်တာတွေ၊ ဖမ်းဆီးတာတွေကို ရပ်တန့်နိုင်ဖို့ လိုတယ်။ အဲဒီလို ရပ်ပစ်နိုင်ဖို့ ဆိုတာက ကုလသမဂ္ဂ အဖွဲ့ကြီးနဲ့ အဖွဲ့ဝင် နိုင်ငံတွေဘက်က မူဝါဒ သဘောထား ခိုင်မာပြီး ရပ်တည်ပေးဖို့ မြန်မာပြည်သူတွေ လိုအပ်နေပါတယ်” ဆိုပြီး လူ့အခွင့်အရေး ဆိုင်ရာ အထူး ကိုယ်စားလှယ်က ပန်ကြားနေပါတယ်။


BBC Burmese

https://www.bbc.com/burmese/live/burma-57783160

မကွေးနဲ့စစ်ကိုင်းနယ်ထဲ တိုက်ပွဲများရှိနေ

မြန်မာစစ်တပ်လုံခြုံရေးအဖွဲ့ဝင်များ။

မကွေးတိုင်၊း ဂန့်ဂေါနဲ့ ထီးလင်းလမ်းမှာ စစ်ကောင်စီယာဉ်တန်းကို မိုင်းဆွဲတိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၂၀ ဦးခန့် ကျဆုံးခဲ့တယ်လို့ ယောဒေသ ကာကွယ်ရေး အဖွဲ့ကပြောပေမယ့်၊ ဒီဖြစ်စဉ်မရှိခဲ့ဘူးလို့ စစ်ကောင်စီဘက်ကတော့ ငြင်းဆိုထားပါတယ်။ ဒါ့အပြင် စစ်ကိုင်းတိုင်း၊ ကနီနယ်နဲ့ ယင်းမာပင်ကြားက ကျေးရွာတွေမှာ စစ်ကောင်စီတပ်တွေက ဝင်ရောက်ရှာဖွေ ဖမ်းဆီးတာတွေ လုပ်နေတယ်လို့ ဒေသခံတွေက ပြောပါတယ်။ ဒီအကြောင်း ရန်ကုန်ကလာတဲ့သတင်း ကိုသားညွန့်ဦး ပြောပြပါမယ်။

ဒီကနေ့ ဇူလိုင် ၂၈ ရက် မနက်အစောပိုင်း ဂန့်ဂေါ-ထီးလင်းလမ်းမှာ စစ်ကောင်စီယာဉ်တန်းကို ယောဒေသ ကာကွယ်ရေးအဖွဲ့က မိုင်းဆွဲတိုက်ခိုက်ခဲ့တာပါ။ အခုလို တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင်တွေဘက်မှာ အကျအဆုံးရှိခဲ့တယ်လို့ ယောဒေသ ကာကွယ်ရေးအဖွဲ့က အခုလို ပြောပါတယ်။

"မနက် ၇ နာရီခွဲလောက်ကခင်ဗျ သူတို့စစ်ကား ၄ စီး ဂန့်ဂေါကနေ ထီးလင်းဘက်ကိုသွားတာ သိရလို့ ကျွန်တော်တို့ လမ်းကနေပြီး မိုင်းခွဲ တိုက်ခိုက်တာပါ။ အတည်ပြုလို့ရတာက ကျွန်တော်တို့က ခြုံခိုတိုက်တော့ ကိုယ်တိုင်မြင်ရတယ်၊ သိရတယ်။ သိရတဲ့ အတွက်ကြောင့်မို့လို့ သေဆုံးက အယောက် ၂၀ အတည်ပြုထားပါတယ်။"

ဒီဖြစ်စဉ်နဲ့ ပတ်သက်လို့ စစ်ကောင်စီ ပြန်ကြားရေး ဒုဝန်ကြီး ဗိုလ်ချုပ်ဇော်မင်းထွန်းကို VOA ကမေးမြန်းရာမှာတော့ အခုလို ဖြစ်စဉ်မရှိဘူးလို့ ငြင်းဆိုပါတယ်။

"ယောဘက်မှာတော့ မရှိပါဘူးခင်ဗျ။ မရှိပါဘူးခင်ဗျ။"

မိုင်းဆွဲတိုက်ခိုက်ခံရတာကြောင့် သေဆုံးတာအပြင် ထိခိုက်ဒဏ်ရာရတဲ့ စစ်ကောင်စီတပ်ဖွဲ့ဝင်တွေလည်း ရှိခဲ့တယ်လို့ ယောဒေသကာကွယ်ရေးအဖွဲ့က ပြောပါတယ်။

တချိန်တည်းမှာပဲ စစ်ကိုင်းတိုင်း၊ ကနီနယ်နဲ့ ယင်းမာပင်နယ်ကြားက ကျေးရွာတွေမှာ စစ်ကောင်စီတပ်တွေက ကျေးရွာတွေမှာ ဝင်ရောက်ရှာဖွေတာတွေ ပြုလုပ်ပြီး ရွာသားတွေကို ဖမ်းဆီးတာတွေ ရှိနေပါတယ်။ ရွာသား ၂ ဦးကိုလည်း သေနတ်နဲ့ ပစ်သတ်ခဲ့တယ်လို့ ဒေသခံတဦးက အခုလိုပြောပါတယ်။

"ရွာသားတွေ ထွက်ပြေးတဲ့ အတိုင်းအတာက သူတို့ဝင်တယ်ဆိုတော့ ကြောက်လန့်ပြီးထွက်ပြေးတာပေါ့နော်။ သူတို့စစ်ကြောင်းထိုးတဲ့ ရွာမှန်သမျှတော့ ရွာတိုင်းထိုးတာဆိုတော့ ရွာတိုင်းထွက်ပြေးတာပေါ့။ အခု ချင်းပုန်းရွာမှာ သူတို့က တပ်ချပြီးတော့ ဟိုဘက်တွေကို စစ်ကြောင်းထပ်ထိုးတယ်။ သမင်စပ် ရှေ့ပြေး အဲ့ဒီကနေ သစ်ယာပင်ရောက်သွားတယ်ပေါ့။ သစ်ယာပင်ကနေ ၃၁ မိုင်ရွာကို ရောက်သွားတယ်။ သူတို့မသင်္ကာတဲ့သူတွေကို သစ်ယာပင်ကတယောက် မိုင် ၃၀ က ၅ ယောက်ဖမ်းသွားတယ်။ အဲ့ကျတော့ ကနီနဲ့ ယင်းမာပင် အစပ်ရောက်သွားတာ။ CRPH ခေါင်းဆောင်တွေရှိတယ် ရွာခေါင်းဆောင်တွေရှိတယ်။ နာမည်ကြီးတယ်ဆိုပြီး ဝင်ပြီးမေးကြတာပေါ့။ သူတို့က ဖမ်းဖို့ စီးဖို့လာတာနေမှာ။ ပစ်တာဆိုရင် သူတို့ဘက်က အကုန်ပစ်ခတ်ပြီးတော့ ဝင်တာ ကနီနဲ့ ယင်းမာပင်အစပ်မှာ ၃၁ မိုင်ရွာကို ဝင်ပစ်တာ ဝင်ပစ်ပြီး ၅ ယောက်ဖမ်းတယ်။ ဖမ်းတာကို သိပ်စိတ်မနှံ့တဲ့သူတယောက်ပါတယ်။ ဖမ်းပြီး ၂ ယောက်ကို ပစ်သတ်သွားတယ်။ အဲ့ဒါ ၃၁ မိုင်ရွာမှာ။"

ဇူလိုင် ၂၆ ရက်ကလည်း စစ်ကောင်စီတပ်တွေနဲ့ ဒေသခံ ကာကွယ်ရေးအဖွဲ့တွေ ကနီနယ်ထဲက ဇီးပင်ကွင်းရွာနဲ့ညောင်ပင်သာရွာနားမှာ တိုက်ပွဲဖြစ်ပွားပြီး ဒေသခံ ကာကွယ်ရေးအဖွဲ့ဝင်တွေ အများအပြား ဖမ်းဆီးခံခဲ့ရပါတယ်။ ဖမ်းဆီးခံရသူတွေကို စစ်ကောင်စီတပ်တွေက ပစ်သတ်သွားပြီး အလောင်းတွေကို မြေမြှုတ်ထားခဲ့တယ်လို့လည်း ဒေသခံကာကွယ်ရေးအဖွဲ့တွေက ပြောပါတယ်။


သားၫြန္႔ဦး/ VOA Burmese

https://burmese.voanews.com/a/sac-pdf-fighting-yaw-magway/5982003.html

အောက်မြန်မာပြည်တလွှား မိုးသည်းပြီးရေကြီးရေလျှံ

မိုးများရေကြီးပြီး နေအိမ်တွေ ရေနစ်မြုပ် (ဇူလိုင် ၂၀၂၁)

မြန်မာနိုင်ငံမှာ အခုရက်ပိုင်းတွေအတွင်း တိုင်းနဲ့ပြည်နယ်တချို့မှာ မိုးသည်းထန်စွာ ရွာသွန်းပြီး ရေကြီး ရေလျှံမှုတွေဖြစ်ပေါ်ခဲ့တာကြောင့် ရေဘေးသင့် ပြည်သူတွေ ထောင်နဲ့ချီရှိတယ်လို့ ပရဟိတအကူအညီပေးတွေက ပြောပါတယ်။ ကျိုက်မရောမြို့နယ်၊ ဦးလေးကျေးရွာမှာ ဒီကနေ့အထိ ရွာလုံးကျွတ်နီးပါး ရေနစ်မြှုပ်နေပါတယ်။ ကရင်ပြည်နယ်၊ ကြာအင်းဆိပ်ကြီးမြို့မှာလည်း နေအိမ်မှာ ပိတ်မိနေသူတွေကိုဆက်လက် ကယ်ထုတ်နေရပါတယ်။ မြန်မာနိုင်ငံတဝှမ်းရေကြီးနေတဲ့ ရန်ကုန်ကလာတဲ့ သတင်းကို မဆုမွန်ပြောပြပါမယ်။

မွန်၊ ကရင်နဲ့ ရခိုင်ပြည်နယ်၊ တနင်္သာရီ၊ ပဲခူးနဲ့ ဧရာဝတီတိုင်းဒေသတို့က နေရာတချို့မှာ ဇူလှိုင် ၂၂ ရက်နေ့ကစတင်ပြီး ကနေ့အထိမိုးသည်း ရေးကြီးပြီး ရေနစ်မြှုပ်လို့ ပြည်သူတွေ ထောင်နဲ့ချီ ဘေးလွတ်ရာကို အရေးပေါ်ပြောင်းရွှေ့ထားရပါတယ်။

မွန်ပြည်နယ်၊ ကျိုက်မရောမြို့နယ် အတ္တရံ မြစ်ရေမြင့်တက်နေလို့ ဦးလေးရွာ၊ ငါးပြေမရွာ၊ မဲကသန်ရွာ စတဲ့ မြစ်ကမ်းတစ်လျှာက်မှာရှိတဲ့ ကျေးရွာတွေ ရေနစ်မြှုပ်ကုန်တယ်လို့ ကျေးရွာအုပ်ရေးမှူးတွေ ပြောပါတယ်။

ဦးလေးကျေးရွာဟာ ရွာလုံးကျွတ်နီးပါး ရေနစ်မြှုပ်နေတယ်လို့ အုပ်ချုပ်ရေမှူး ဦးအောင်သိန်းမြင့်က ပြောပါတယ်။ ဇူလှိုင် ၂၂ ရက်နေ့ကတည်းက စတင်မိုးကြီးခဲ့ပြီး အတ္တရံမြစ်ရေ မြင့်တက်လာတာပါ။ ဇူလှိုင် ၂၆ ရက်နေ့က ရေစမြှုပ်ခဲ့ပြီး ရေက မကျသေးဘဲ ဆက်လက်မြင့်လာနေဆဲဖြစ်လို့ အခုအချိန်ထိ အခြေအနေဆိုးသွားတယ်လို့ပြောပါတယ်။

လက်ရှိမှာ တချို့အိမ်တွေ အိမ်ခေါင်းမိုးထိမြှုပ်နေပြီး နီစပ်ရာ စာသင်ကျောင်း၊ ဘုန်းကြီးကျောင်း၊ ဆွေမျိုးအိမ်တွေမှာ ပြောင်းရွှေ့ နေထိုင်နေရပြီး သွားလာလို့မရတာကြောင့် စားသောက်ရေး အခက်အခဲဖြစ်နေတယ်လို့ အုပ်ချုပ်ရေးမှူး ဦးအောင်သိန်းမြင့်က ဆိုပါတယ်။

“၅ ရက်၊ ၆ ရက်ရှိပြီ။ တချို့က အောက်ထပ်တွေမြှုပ်တယ်၊ တချို့က တစ်အိမ်လုံးမြှုပ်တယ်။ အနိမ့်ပိုင်းတွေ အကုန်လုံးမြှုပ်သွားတယ်ပေါ့။ တချို့က နှစ်ထပ် တက်တယ်၊ တချို့က တစ်ထပ်အိမ်တွေ အကုန်လုံးမြှုပ်တယ်။ ဒီဘက်ကို ပြောင်းရွှေ့တော့ ပြောင်းရွှေ့ထားတယ်ပေါ့၊ မြင့်တဲ့ဘက်ကို ပြောင်းရွှေ့တယ်၊ အိမ်ထောင်စုက အခု ၃၀၀ ကျော်။ ၃၃၆ အိမ်ရှိတယ်။ မြှုပ်နေတာ အကုန်လုံးပေါ့။ လူဦးရေက အခု ကျနော်တို့ ဒီမှာတွက်နေတာတော့ ၁,၂၂၀ နဲ့ ၂၀ရှိတယ်။ အကူအညီတော့ နည်းနည်းစားသောက်ဖို့ပဲပေါ့။

ဒီလောက်ပဲပေါ့၊ ဝယ်ရပြုရတာ သွားလာဖို့ ခက်တယ်ပေါ့လေ။”

မွန်ပြည်နယ် ပေါင်၊ မုဒုံ၊ ကျိုက်မရော၊ ရေး၊ ချောင်းဆုံမြို့နယ်တွေဟာ မြို့နယ်အလိုက် တစ်ပတ်ကျော်ကြာ ရေကြီးမှုဒဏ်ရင်ဆိုင်နေရပါတယ်။ အလားတူကရင်ပြည်နယ် မြဝတီ၊ ဘားအံ၊ ကော့ကရိတ်၊ လှိုင်းဘွဲ့၊ ကြာအင်းဆိပ်ကြီးမြို့တွေမှာလည်း ရေနစ်မြှုပ်တာ ၇ ရက်ပြည့်ပြီလို့ပရဟိတအကူအညီပေးသူတွေက ပြောပါတယ်။

ကြာအင်းဆိပ်ကြီးမြို့မှာ ရေကြီးလို့ ဇူလှိုင် ၂၅ ရက် ညနေပိုင်းက ရေမြှုပ်တဲ့ အိမ်တွေကို စပြီးပြောင်းရွှေ့ပေးခဲ့ပြီး နောက်ရက်တွေမှာလည်း ဇမိမြစ်ရေ ဆက်လက်မြင့်တက်လာလို့ ရေနစ်မြှုပ်တဲ့ ရပ်ကွက်တွေ ထပ်မံပြောင်းရွှေ့ထားပါတယ်။ ဒီနေ့အထိ ရေဘေးသင့်တဲ့ အိမ်ထောင်စု ၁၄၀၊ လူဦးရေ ၆၀၀ ကျော်လောက်ဘေးလွတ်ရာကို ပြောင်းရွှေ့ထားရတယ်လို့ ကြာအင်းဆိပ်ကြီးမြို့နယ် မီးသတ်တပ်ဦးစီးဌာနက ဒုတိယဦးစီးမှူး လှမင်းထွန်းက ပြောပါတယ်။

ရေမြှုပ်လို့ နေအိမ်မှာ ပိတ်မိနေတဲ့ ပြည်သူတွေကို ထပ်မံ ခေါ်ထုတ်နေတယ်လို့ ပရဟိတအကူအညီသူ ကိုဟိန်းမိုးဦးက ပြောပါတယ်။

“ရေကတော့ မကျသေးဘူး၊ ကျနော်တို့ လက်ရှိကတော့ ရေတိုင်းနေတာပေါ့။ လက်ရှိမှာကျနော်တို့ အိမ်ခြေ ၁၀၀ ကျော်လောက်ပြောင်းထားတယ်။ ကျနော်တို့မှာက ဆိုင်ကလုံးစင်တာဆိုတာရှိတယ်လေ။ အဲ့ဒီဆိုင်ကလုံးစင်တာကို ကျနော်တို့ ဘေးလွတ်ရာရွှေ့ထားတယ်။ ပြီးတော့ ရေထဲမှာလည်း တချို့ မပြောင်းရွှေ့တဲ့ အိမ်တွေလည်း ရှိတယ်။ ကျန်တဲ့တွေလည်း ရှိတယ်။ နောက် ရေထပ်တိုးပြီး အထဲမှာ ပိတ်မိတာတွေလည်း ကျနော်တို့ အခုလက်ရှိမှာ မီးသတ်နဲ့ ကျနော်တို့ ပရဟိတနဲ့ Volunteer တွေ ပေါင်းပြီး ကယ်ဆယ်ရေးလုပ်နေတာလည်းရှိတယ်။ မနေ့က တစ်ရက်၊ ဒီနေ့တစ်ရက်ကလည်း ပုံမှန်ရေအတိုင်းပဲ။ ခါတိုင်း ဟို တက်လာတဲ့ရေအတိုင်းပဲ ငြိမ်နေတယ်ပေါ့နော်။ တက်လည်းမတက်ဘူး ကျလည်း မကျဘူး။”

ဒီရက်ပိုင်း မိုသည်း ရေကြီးနေတဲ့ ရခိုင်ပြည်နယ်၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်း၊ ပဲခူးတိုင်း၊ ဧရာဝတီတိုင်းဒေသကြီးတို့မှာနောက်တစ်ရက်လောက်နေရင် မိုးရွာတဲ့နှုန်း လျော့ကျလာပြီး ရေပြန်ကျလာမှာ ဖြစ်ပေမယ့် ယခုကာလဟာ မိုးများတဲ့ကာလဖြစ်တာကြောင့် မြစ်ချောင်းဘေးမှာ နေထိုင်တဲ့ ပြည်သူတွေ အထူးသတိပြုဖို့ လိုအပ်ကြောင်း မိုးလေဝသနဲ့ ဇလဗေဒညွန်ကြားမှုဦးစီးဌာန ညွှန်ကြားရေးမှူးချုပ် ဒေါက်တာကျော်မိုးဦးက သတိပေးပါတယ်။

“ဒီဒေသမှာရှိတဲ့ မြစ်တွေ၊ ချောင်းငယ်လေးတွေပေါ့နော်၊ ဒီဒေသလေးတွေက စိုးရိမ်ရေမှတ်ကို ကျော်လွန်ပြီးတော့မှ ရေကြီးရေလျှံမှုတွေ ဖြစ်နေတဲ့ အနေအထားမှာရှိပါတယ်ခင်ဗျ။ ဒီမိုးကောင်းတဲ့ ဥစ္စာတွေက နောက်တစ်ရက်လောက်ဆိုရင်တော့ ဒါမိုးပြန်ပြီးတော့

မိုးအားနည်းနည်း ပြန်ကျလာမယ့်အနေအထားမျိုး ရှိတယ်ပေါ့နော်။ ခန့်မှန်ချက်အရဆိုရင်တော့ ကျနော်တို့ မိုးအားနည်းနည်း ပြန်ကျလာမယ်ဆိုရင်တော့ လက်ရှိကြီးနေတဲ့ရေက ပြန်ကျသွားမယ့်အနေအထားမျိုးရှိပါတယ်။ ဒီကာလက ကျနော်တို့ မိုးလယ်ကာလဖြစ်တယ်၊ နှစ်စဉ် ကျနော်တို့ မြန်မာနိုင်ငံမှာ ရေကြီးရေလျှံမှုတွေ ဖြစ်နေကျ ဖြစ်တဲ့ကာလဖြစ်တယ်ပေါ့နော်။ ဇူလိုင်လ၊ သြဂုတ်လတွေမှာ အဲ့အတွက်ကြောင့် မြစ်ချောင်းဘေးနားမှာ ရှိတဲ့ ပြည်သူတွေအနေနဲ့ ဒီလိုအရပ်ဒေသတွေမှာ မိုးကြီးမယ်ဆိုတဲ့ ခန့်မှန်းချက်တွေ၊ ဒီဟာမျိုးတွေရှိလာပြီးဆိုရင်တော့ အထူးသတိပြုဖို့ လိုပါတယ်။ မြစ်ရေရုတ်တရက်မြင့်တက်လာတာတို့ ဒီဟာမျိုးတွေ ဖြစ်နိုင်ပါတယ်။”

ယခုရက်ပိုင်း တိုင်းနဲ့ ပြည်နယ်တချို့မှာ မိုးသည်း ရေကြီးလို့ ရေဘေးသင့် ပြည်သူတွေ ထောင်နဲ့ချီ ဘေးလွတ်ရာပြောင်းရွှေ့နေထိုင်ရပြီးနေထိုင်စားသောက်ရေး အခက်အခဲနဲ့ ကြုံတွေ့နေရပါတယ်။ ဒါနဲ့ပတ်သတ်ပြီး ဘေးအန္တရာယ်ဆိုင်ရာ စီမံခန့်ခွဲမူဦးစီးဌာနက တာဝန်ရှိသူတွေကို ဗွီအိုအေက တယ်လီဖုန်း အကြိမ်ကြိမ်ဆက်သွယ်ခဲ့ပေမယ့် လက်ခံဖြေကြားခြင်း မရှိပါဘူး။


ဆုမွန်/ VOA Burmese

https://burmese.voanews.com/a/flooding-Myanmar-/5981966.html

ဓနုဖြူမှာ မီးသင်္ဂြိုဟ်စက်ပျက်နေတာကြောင့် ယာယီမြေမြှုပ်သင်္ဂြိုဟ်နေရ

ဓနုဖြူမှာ မီးသင်္ဂြိုဟ်စက်ပျက်နေတာကြောင့် ယာယီမြေမြှုပ်သင်္ဂြိုဟ်နေရ ဓနုဖြူမြို့က ဖိုးမြဲသုသာန်မှာ မြေမြှုပ်သင်္ဂြိုဟ်နေရတဲ့ ရုပ်အလောင်းတွေကို တွေ့ရစဉ် / Photo: CJ

ဧရာဝတီတိုင်း ဓနုဖြူမြို့က ဖိုးမြဲသုသာန်မှာ မီးသင်္ဂြိုဟ်စက်ပျက်နေလို့ အခုရက်ပိုင်းအတွင်း သေဆုံးသူတွေရဲ့ ရုပ်အလောင်းတွေကို ယာယီမြေမြှုပ်သင်္ဂြိုဟ်နေရတယ်လို့ ဓနုဖြူမြို့နယ်က ပရဟိတအဖွဲ့ဝင် တစ်ယောက်က RFA ကို ပြောပါတယ်။

ရုပ်အလောင်းတွေကို ဖိုးမြဲသုသာန် မီးသင်္ဂြိုဟ်စက်ရဲ့ ရှေ့အနီးနားမှာ ကျင်းတူးပြီး မြှုပ်နှံနေရတာဖြစ်ပြီး မကြာခင်ရက်ပိုင်းအတွင်း မီးသဂြိုဟ်စက်လည်း ပြင်လို့ပြီးတော့မှာလို့ ဆိုပါတယ်။

ဓနုဖြူမြို့မှာဆိုရင် ဖိုးမြဲသုသာန်နဲ့ ရွှေရောင်ပြသုသာန်ဆိုပြီး နှစ်ခုရှိနေပြီး အဓိကအသုံးပြုနေတဲ့ ဖိုးမြဲ သုသာန်က မီးသင်္ဂြိုဟ်စက်ဟာ ဇူလိုင် ၂၆ ရက်နေ့က အပူလွန်ကဲပြီး ပျက်စီးခဲ့တာပါ။

ဇူလိုင် ၂၆ ရက်နေ့ကစလို့ အဲဒီမီးသင်္ဂြိုဟ်စက်ကို ၄ ရက်ခန့် ရပ်နားထားပြီး ပြင်ဆင်နေကြတာ ဖြစ်ပါတယ်။ ဖိုးမြဲသုသာန်မှာ ဇူလိုင် ၂၇ ရက်နေ့က Covid 19 ကြောင့် သေဆုံးသူတွေ အပါအဝင် ရုပ်အလောင်း ၂၀ ယောက်ရှိခဲ့တယ်လို့ သိရပါတယ်။

စစ်ကောင်စီလက်အောက်ခံ ကျန်းမာရေးဝန်ကြီးဌာနရဲ့ ထုတ်ပြန်ချက်အရတော့ ဇူလိုင် ၂၅ ရက်ကနေ ၂၆ ရက်နေ့အထိ တစ်ရက်တာအတွင်း ဧရာဝတီတိုင်း၊ ဓနုဖြူမြို့မှာ ကိုဗစ်ပိုးတွေ့ရှိသူ ၁၉ ယောက်၊ ကိုဗစ်ကြောင့် သေဆုံးသူ ၁ ယောက် ရှိနေတယ်လို့ ဖော်ပြထားပါတယ်။


RFA Burmese

https://www.rfa.org/burmese/news/covid-19-in-danubyu-07282021061647.html

ကနီမှာ အနည်းဆုံး လူ ၁၀ ယောက် အစုအပြုံလိုက် အသတ်ခံထားရ



စစ်ကိုင်းတိုင်း ကနီမြို့နယ် ဇီးပင်တွင်းရွာအနီးမှာ အခုလ ၂၆ ရက်နေ့က စစ်ကောင်စီတပ်နဲ့ ဒေသခံ ပြည်သူ့ ကာကွယ်ရေးတပ်ဖွဲ့တို့ တိုက်ပွဲဖြစ်ခဲ့ပြီးနောက် ဇူလိုင် ၂၇ ရက် မနေ့က ရွာအနီးက တောထဲမှာ တစ်ချိန်တည်းတစ်ပြိုင်တည်း အသတ်ခံထားရတယ်လို့ ယူဆရတဲ့ ရုပ်အလောင်း ဆယ်ခုကျော် တွေ့ရတယ်လို့ လုံခြုံရေးအရ အမည်မဖော်လိုတဲ့ ကနီဒေသခံတွေက ပြောပါတယ်။

ဇူလိုင် ၂၄ ရက်နေ့က ကနီနယ် စစ်ဘေးရှောင်ရွာတွေမှာ နေထိုင်နေတဲ့ အမျိုးသား ၁၀ ယောက်ထက်မနည်း စစ်သားတွေက ဖမ်းဆီးသွားတာရှိပါတယ်။ ဒါပေမဲ့ အခုသေဆုံးသူတွေဟာ ဘယ်သူ၊ ဘယ်ဝါတွေဖြစ်တယ် ဆိုတာ အခုအချိန်အထိတော့ အတည်ပြုလို့မရသေးဘူးလို့ လုံခြုံရေးအရ အမည်မဖော်လိုတဲ့ ကနီမြို့က ဒေသခံတစ်ယောက်က ပြောပါတယ်။

“၂၇ ရက်နေ့မှာက သေဆုံးနေတဲ့ ခန္ဓာကိုယ်တွေ တွေ့တယ်။ တစ်ချို့ခန္ဓာကိုယ်ဆို ဇီးပင်မှာ လည်ပင်းကို ကြိုးနဲ့ချိတ်ပြီး သတ်ထားတယ်။ အဲဒီလို သတ်ခံရသူက အသက် ၆၀ ကျော်အရွယ်။ တစ်ချို့ခန္ဓာကိုယ် တွေက ကျင်းတွေထဲမှာ ဖော်လိုက်တော့ လေးလောင်း တွေ့ရတယ်။ တစ်ခြားကျင်းတွေက မဖော်ရသေး တာရှိတယ်။ မဖော်ရသေးတာက မိုင်းကြောက်လို့ မဖော်ရသေးပဲ၊ အခက်အခဲဖြစ်နေတယ်”

မနေ့က ဇီးပင်မှာ ကြိုးကွင်းစွပ် သေဆုံးနေတဲ့ ရုပ်အလောင်းတစ်ခုနဲ့ မြေကျင်းထဲက တူးဖော်ရရှိတဲ့ ရုပ် အလောင်း လေးခု၊ စုစုပေါင်း ငါးခုအပြင် မဖော်ရသေးတဲ့ မြေကျင်းသုံးခုထဲက ရုပ်အလောင်းတွေကိုပါ ပေါင်းလိုက်ရင် စုစုပေါင်းသေဆုံးသူ အနည်းဆုံး ၁၀ ယောက်ကျော် ရှိမယ်လို့လည်း သူက ခန့်မှန်းပြော ဆိုပါတယ်။

အခုလို အစုအပြုံလိုက် သေဆုံးနေသူတွေဟာ ဘယ်သူတွေလဲ၊ ဘာ့ကြောင့် အသတ်ခံထားရသလဲ ဆိုတာတွေကို အတိအကျသိနိုင်ဖို့ RFA က စုံစမ်းနေဆဲ ဖြစ်ပါတယ်။

ဇူလိုင်လ ၂၆ ရက်နေ့က စစ်ကိုင်းတိုင်း၊ ကနီနဲ့ ယင်းမာပင်မြို့နယ်အတွင်းမှာ တိုက်ပွဲ သုံးကြိမ်လောက်ဖြစ်ခဲ့ တာကြောင့် မုံရွာပြည်သူ့ကာကွယ်ရေးတပ်ဖွဲ့က သွားရောက်ကူညီခဲ့ရာမှာ စစ်ကောင်စီရဲ့ သတ်ကွင်းထဲ ရောက်သလိုဖြစ်ပြီး သူတို့တပ်ဖွဲ့ဝင် ငါးယောက်သေဆုံးခဲ့တယ်လို့ မုံရွာမြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ်ပြန်ထားပါတယ်။

    "တစ်ချို့ခန္ဓာကိုယ်ဆို ဇီးပင်မှာ လည်ပင်းကို ကြိုးနဲ့ချိတ်ပြီး သတ်ထားတယ်"

လုံခြုံရေးအရ အမည်မဖော်လိုတဲ့ မုံရွာမြို့နယ် ပြည်သူ့ကာကွယ်ရေးတပ်ဖွဲ့နဲ့ နီးစပ်သူတစ်ယောက်ကတော့ ကနီမြို့နယ် ဇီးပင်တွင်းရွာအနီးက တောထဲမှာ ရုပ်အလောင်း ၃၀ လောက်တွေ့ရပြီး အဲဒီထဲမှာ မုံရွာ PDF တပ်ဖွဲ့ဝင် ငါးယောက် ပါဝင်တယ်လို့ RFA ကို ပြောပါတယ်။

“ရွာသားက ခေါ်သွားလို့ PDF တွေက သွားကူတာ။ တိုက်ဖို့ပေါ့၊ လိုက်သွားတော့ သူ့တို့သတ်ကွင်းထဲ ရောက်သွားသလို ဖြစ်သွားတာ။ လက်နက်ကြီးတွေနဲ့ ရှယ်ထုတာ၊ သေနတ်တွေနဲ့ပါ ပစ်တယ်။ အလောင်း ကိုးလောင်းပုံထားလို့ သွားဆွဲတဲ့သူတွေကိုတောင် သေနတ်နဲ့ပစ်တယ်။ ၂၆ ရက်နေ့ညကတည်းက သိလိုက် တယ်။ ဒါပေမဲ့ မသေချာဘူးပေါ့၊ တောထဲ မျက်စိလည်နေတာလား၊ လမ်းမှားလာတာပေါ့၊ မနေ့ကမှ ရွာသားတွေနဲ့ဖော်ရင်းနဲ့မှ တွေ့တာ၊ သုံးဆယ်လောက်ရှိတယ် ပြောတယ်”

ဇူလိုင် ၂၆ ရက်နေ့က သေဆုံးခဲ့တဲ့ မုံရွာပြည်သူ့ကာကွယ်ရေးတပ်ဖွဲ့ဝင် ငါးယောက်ကတော့ ကိုချမ်းမြေ့စိုး၊ ကိုကောင်းဆက်၊ ကိုထက်နိုင်ဦး၊ ကိုကျော်လွှမ်းထက်နဲ့ ကိုနိုင်ရဲခန့် တို့ဖြစ်တယ်ဆိုတာကို PDF တပ်ဖွဲ့က အမည်အတိကျ သိထားပြီးပြီလို့လည်း သူက ဆိုပါတယ်။

ဒီလိုအစုအပြုံလိုက် သေဆုံးမှုတွေနဲ့ပတ်သက်လို့ အသေးစိတ်သိနိုင်ဖို့အတွက် စစ်ကောင်စီ ပြန်ကြားရေး ဒုဝန်ကြီး ဗိုလ်ချုပ် ဇော်မင်းထွန်းကို RFA က ဖုန်းဆက်သွယ်ခဲ့ပေမယ့် ဆက်သွယ်လို့ မရပါဘူး။

စစ်ကိုင်းတိုင်းထဲက ယင်းမာပင်နဲ့ ကနီမြို့နယ် PDF တပ်ဖွဲ့တွေဟာ ချင်းပြည်နယ်က ကာကွယ်ရေး တပ်တွေလိုပဲ အာဏာသိမ်းစစ်တပ်ကို ပထမဆုံး ခုခံတိုက်ခိုက်ခဲ့တဲ့ တပ်ဖွဲ့တွေဖြစ်ပါတယ်။

ဒါ့ကြောင့် ရဲနဲ့စစ်တပ်က အခုရက်ပိုင်းမှာ ယင်းမာပင်နဲ့ ကနီနယ်ထဲက တွင်းရွာ၊ ဇီးပင်တွင်းရွာ၊ ချောင်းမ၊ ချောင်းဆုံ စတဲ့ကျေးရွာတွေထဲကို မကြာခဏ ဝင်ရောက်တပ်စွဲတာ၊ ရှာဖွေတာ၊ သံသယနဲ့ ဖမ်ဆီးတာတွေ လုပ်လေ့ရှိတယ်လို့ ဒေသခံတွေက ပြောပါတယ်။

ဒီကနေ့ ဇူလိုင် ၂၈ ရက် မနက်ပိုင်းမှာလည်း ရာနဲ့ချီတဲ့ စစ်ကောင်စီတပ်တွေ စစ်ကြောင်းသုံးကြောင်းခွဲပြီး ဇီးပင်တွင်းရွာကို ဝင်ရောက်ပစ်ခတ်ခဲ့တာကြောင့် ရွာသားတွေ ဘေးလွတ်ရာကို ထွက်ပြေးတိမ်းရှောင်နေ ရတယ်လို့ လုံခြုံရေးအရ အမည်မဖော်လိုတဲ့ ဒေသခံတစ်ယောက်က RFA ကို ပြောပါတယ်။

“ပြန်ခုခံမယ်ဆိုရင်လည်း သုံးဘက်သုံးတန်နဲ့ ညှပ်ထားတော့ ခုခံလို့ မရဘူး၊ အခုဆို မိုးရွာကြီးထဲမှာ ပြေးနေရတယ်။ ရှေ့ကလည်း လာတယ်။ ကားလမ်း မိန်းလမ်းကနေလည်း လာတယ်။ တောင်ဘက်ခြမ်း ဟိုတစ်နေ့က ဖြစ်တဲ့နေရာကနေလည်း လာတယ်။ ပြည်သူတွေပဲ အကုန်ထွက်ပြေးရတော့တယ်။ ဟိုတစ်နေ့ကဖြစ်တဲ့ တိုက်ပွဲဆို တောထဲထွက်ပြေးနေတဲ့ ပြည်သူတွေကို အာပီဂျီနဲ့ လေးချက်ပစ်တယ်။ တောထဲမှာပုန်းနေတယ်မလား တွေ့ရင်လည်း သတ်တယ်။ အိမ်ထဲမှာနေလည်း သတ်တယ်ဆိုတော့ အိမ်ထဲမှာလည်း မနေရဲတော့ဘူး။ သူတို့နဲ့ မတွေ့အောင် ပြေးရတော့တာပေါ့”

ဇူလိုင်၂၇ ရက် မနေ့ကတော့ ယင်းမာပင်မြို့နယ် ချောင်းဆုံရွာအနီး တိုက်ပွဲကနေ စစ်ကောင်စီဘက်က ပစ်ခတ်လိုက်တဲ့ မပေါက်ကွဲသေးတဲ့ လက်နက်ကြီးကျည်ဆံကို ရွာသားတွေက ရွာထဲကိုသယ်ယူလာရာမှာ ပေါက်ကွဲခဲ့တဲ့အတွက် ချောင်းဆုံရွာက ကိုမင်းမင်းဦး သေဆုံးခဲ့ပြီး၊ နောက်ထပ် ရွာသားနှစ်ယောက် ဒဏ်ရာရခဲ့တယ်လို့ ဒေသခံတွေက ပြောပါတယ်။
kani-pdf.jpg
(မုံရွာပြည်သူ့ကာကွယ်ရေးတပ်ဖွဲ့ဝင်တစ်ချို့ကို တွေ့ရစဉ် - Photo: CJ)

အခုလ ၁၀ ရက်နေ့ကလည်း ကနီမြို့နယ်အတွင်းက ယင်းရွာနဲ့ ကုန်းသာရွာက စစ်ဘေးရှောင်ပြည်သူ ၁၆ ယောက်ထက်မနည်းကို စစ်ကောင်စီက အစုအပြုံလိုက်သတ်ဖြတ်ခဲ့ပါတယ်။

အခုရက်ပိုင်း ဆက်တိုက်ဆိုသလို ဖြစ်ပွားနေတဲ့ တိုက်ပွဲတွေကြောင့် ကနီမြို့နယ် ကျေးရွာပေါင်း ၂၀ ကျော်က ဒေသခံ တစ်သောင်းကျော်ဟာ ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံတွေက ပြောပါ တယ်။

RFA Burmese



ပြည်ထောင်စုလွှတ်တော်ကိုယ်စားပြုကော်မတီ (CRPH) က ကြေညာချက်အမှတ် (၃၅/၂၀၂၁) ကို ၂၀၂၁ ခုနှစ် ဇူလိုင် ၂၇ ရက်စွဲနဲ့ ထုတ်ပြန်လိုက်ပြီး ၂၀၂၀ ရွေးကောက်ပွဲရလဒ်ကို တရားမဝင်သော အဖွဲ့အစည်းတစ်ခုက ပယ်ဖျက်၍ မရနိုင်ကြောင်း ကြေညာလိုက်တဲ့သတင်း


ပြည်ထောင်စုလွှတ်တော်ကိုယ်စားပြုကော်မတီ (CRPH) က ကြေညာချက်အမှတ် (၃၅/၂၀၂၁) ကို ၂၀၂၁ ခုနှစ် ဇူလိုင် ၂၇ ရက်စွဲနဲ့ ထုတ်ပြန်လိုက်ပြီး ၂၀၂၀ ရွေးကောက်ပွဲရလဒ်ကို တရားမဝင်သော အဖွဲ့အစည်းတစ်ခုက ပယ်ဖျက်၍ မရနိုင်ကြောင်း ကြေညာလိုက်တဲ့သတင်း

အရေးပေါ် “ကိုဗစ်ကာလ အပစ်အခတ်ရပ်စဲရေး” လုပ်ဆောင်ဖို့ မြန်မာနိုင်ငံဆိုင်ရာ ကုလအထူးကိုယ်စားလှယ် တွန် အမ်ဒရူးက ဇူလိုင်လ ၂၇ရက်နေ့က တောင်းဆိုတဲ့သတင်း

အမေရိကန်ကာကွယ်ရေးဝန်ကြီး Lloyd Austin က အာဏာသိမ်းမြန်မာစစ်ခေါင်းဆောင်တွေရဲ့ လုပ်ရပ်ကို ရှုတ်ချပြောဆိုလိုက်ပြီး မြန်မာပြည်တွင်းပဋိပက္ခတွေ အဆုံးသတ်ရေး ဆက်ပြီးဖိအားပေးတောင်းဆိုဖို့ မြန်မာအဖွဲ့ဝင်အဖြစ် ပါဝင်တဲ့ အာဆီယံကို တိုက်တွန်းလိုက်တဲ့သတင်း

အာဏာသိမ်းစစ်ကောင်စီရဲ့ ရာဇဝတ်ကျူးလွန်မှုတွေကို နိုင်ငံတကာက အရေးယူဖို့ ပျက်ကွက်နေတာနဲ့ ပတ်သတ်တဲ့ အစီရင်ခံစာ မိတ်ဆက်ပွဲနဲ့ သတင်းစာရှင်းလင်းပွဲကို အမျိုးသားညီညွတ်ရေးအစိုးရ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဒေါက်တာဆာဆာ တက်ရောက်မယ့် သတင်း တွေကို နားဆင်ကြရမှာဖြစ်ပါတယ်။

National Unity Government of Myanmar 



သောင်ရင်းမြစ်ရေလျှံလို့ မြဝတီမြို့က လူလေးထောင်ကျော် အိုးအိမ်စွန့်ခွာရ


ထိုင်း-မြန်မာနယ်စပ် ကရင်ပြည်နယ် သောင်ရင်းမြစ်အနီးမှာရှိတဲ့ မြဝတီမြို့ပေါ်ရပ်ကွက်တွေထဲကို ဇူလိုင် ၂၆ ရက် ညပိုင်းကစပြီး သောင်ရင်းမြစ်ရေတွေ အလုံးအရင်းဝင်ရောက်လာပြီး လူနေအိမ်တော်တော်များများ နစ်မြုပ်ကုန်တာကြောင့် အရပ်သား ၄၀၀၀ ကျော်ဟာ အိုးအိမ်တွေကို စွန့်ခွာလိုက်ရတယ်လို့ ကူညီကယ်ဆယ် ရေးအဖွဲ့တွေက RFA ကို ပြောပါတယ်။

ရေကြီးမှုကနေ တိမ်းရှောင်နိုင်ခြင်းမရှိသေးဘဲ နေအိမ်တွေထဲပိတ်မိနေတဲ့ လူအများအပြားရှိနေတုန်းပဲဖြစ်ပြီး လာကယ်ဆယ်မယ့်သူတွေကို စောင့်မျှော်နေကြတယ်လို့ မြဝတီမြို့ အမှတ် ၃ ရပ်ကွက် ငလုံးလဖယ်လမ်း နေအိမ်အပေါ်ထပ်မှာ ပိတ်မိနေတဲ့ မဇွန်ပွင့်အောင် က ပြောပါတယ်။

"မိသားစုတော်တော်များများကတော့ ဒုက္ခရောက်နေကြတယ်၊ မြဝတီမှာ အခြေခံလူတန်းစားက ပိုများတဲ့ အတွက် ပိုပြီးဒုက္ခရောက်တယ်။ အိမ်တွေက အကုန်လုံးအောက်ထပ်တွေမြုပ်နေတယ်၊ အပေါ်ထပ်တွေမှာ ညီမတို့နေနေရတယ်။ တော်တော်များများက စာသင်ကျောင်းတွေပေါ်မှာ တက်နေရတယ်။ ထမင်းစားဖို့ လာဝေတဲ့သူက ဝေတာပေါ့။ တချို့နေရာတွေကို မဝေနိုင်လို့ အခက်အခဲတွေရှိတယ်။ အိမ်မှာက မိသား စုဝင် ခုနစ်ယောက်ရှိတယ်။ ခုနစ်ယောက်လုံး အိမ်ပေါ်ထပ်မှာပဲ။ ပြီးတော့ အခြားမိသားစုတွေကလည်း သူတို့အိမ်အပေါ်ထပ်တွေမှာရှိနေတယ်။ လှေလာတာကိုစောင့်ပြီး ပြောင်းကြဖို့ လုပ်နေတယ်"

မြဝတီမြို့ရပ်ကွက် (၁) ၊ (၂)၊ (၃) နဲ့ အမှတ်(၅) ရပ်ကွက်တွေမှာ ရေကြီး နစ်မြှုပ်မှုတွေကြုံတွေ့နေတဲ့ နေအိမ် အတွင်း ပိတ်မိနေသူတွေကို ကယ်ဆယ်ပြီး ကုန်းမြင့်ပိုင်းကနေရာအချို့မှာ ယာယီခိုလှုံနိုင်ဖို့ စီစဉ်ထားပါတယ်။ လက်ရှိအချိန်အထိ နေအိမ်တွေထဲ ပိတ်မိနေတဲ့လူတွေကို ကယ်ထုတ်နေရဆဲဖြစ်ပြီး၊ ရေဘေးဒုက္ခကြောင့် အိုးအိမ်စွန့်ခွာရသူ အနည်းဆုံး ၄၀၀၀ ကျော်ရှိမယ်လို့ မြဝတီမြို့ Z-RESCUE အရေးပေါ် ကယ်ဆယ်ရေးအဖွဲ့ ဥက္ကဋ္ဌ ကိုဇော်ဇော် က ပြောပါတယ်။

"ရပ်ကွက်တွေမှာရှိတဲ့ ဘုန်းကြီးကျောင်းတွေ စာသင်ကျောင်းတွေကို ကယ်ဆယ်ရေးစခန်း ယာယီလုပ် လိုက်ရတာပေါ့။ ဒီနေ့မနက်မှာ ထပ်ပြောင်းနေတယ်။ အခုထိပြောင်းနေတုန်းပဲ။ သူတို့က ညတုန်းက လှေအခက်အခဲရှိလို့ ကျန်ခဲ့တာပေါ့။ ဒီမနက်ကျတော့ လှေတွေနဲ့ ပြန်ကယ်ထုတ်နေရတာ တော်တော် တေ့ာများလာပြီ။ ၄၀၀၀၊ ၅၀၀၀ လောက်တော့ ရှိမယ်ထင်တယ်"

ကိုဗစ်ကပ်ရောဂါကို တိုက်ဖျက်ဖို့ လူတစ်ဦးနဲ့တစ်ဦး ခပ်ခွာခွာနေဖို့ အရေးတကြီးလိုအပ်နေတဲ့ အခုလို အချိန်မှာ ရေကြီးနစ်မြုပ်မှုတွေကြောင့် ပြည်သူတွေ ဘေးလွတ်ရာကို တိမ်းရှောင်ရင်း အစုလိုက်အပြုံလိုက် နေထိုင်နေရတာကြောင့် နောက်ဆက်တွဲရင်ဆိုင်ရမယ့် ကပ်ရောဂါအခြေအနေဟာ ပိုပြီးဆိုးဝါးလာဖွယ် ရှိတယ်လို့ ကယ်ဆယ်ရေးအဖွဲ့တွေက ခန့်မှန်းပါတယ်။

မွန်ပြည်နယ် မော်လမြိုင်မြို့မှာလည်း ဇူလိုင် စတုတ္ထပတ်ကစလို့ မိုးအဆက်မပြတ်ရွာသွန်းတာကြောင့် ဇူလိုင် ၂၇ ရက်နေ့အထိ အိမ်ထောင်စု ၂၀၀၀ ကျော် ရေဘေးဒုက္ခကြုံတွေ့နေရတယ်လို့ မော်လမြိုင် လူမှုကယ်ဆယ် ရေးအသင်း ဥက္ကဋ္ဌ ကိုမိုးဇော် က ပြောပါတယ်။

"မြှုပ်တာက သီရီမြိုင်တို့၊ ဇေယာမြိုင်တို့၊လှိုင်တို့၊ ရွှေပြည်အေးတို့၊ သာယာအေးတို့၊ ဇေယျာသစ်တို့ ဘက်ခြမ်းဆိုတော့ တော်တော်တော့များတယ်။ သီရိမြိုင်မှာတင် အိမ်ထောင်စု ၁၀၀၀ လောက်ရှိမယ်။ ကျွန်တော် ထမင်းထုတ် ၁၀၀၀ ဝေတာတောင် မလောက်ဘူးဖြစ်နေတယ်။ လောလောဆယ် ကျွန်တော် ခန့်မှန်းတာက မော်လမြိုင်တစ်မြို့လုံး မြုပ်တဲ့အနေအထားဆိုတော့ အိမ်ထောင်စု ၂၀၀၀ လောက်တော့ ရှိမယ်"

ရခိုင်ပြည်နယ် သံတွဲမြို့မှာလည်း ဒီကနေ့ဇူလိုင် ၂၇ ရက်မနက်ပိုင်းကစပြီး ရေကြီးခဲ့တာကြောင့် သံတွဲမြို့ အမှတ်(၁)၊ (၂)၊ (၃)၊ (၅)၊ (၆) နဲ့ အမှတ်(၇) ရပ်ကွက်တွေက လူနေအိမ်တွေ ရေနစ်မြုပ်ကုန်တယ်လို့ ဒေသခံတွေက RFA ကိုပြောပါတယ်။

အဲဒီရေနစ်မြှုပ်မှုကြောင့် အိမ်ထောင်စု ၂၀၀ ကျော်ကို ကုန်းမြင့်ပိုင်းမှာရှိတဲ့ ဘုန်းကြီးကျောင်းတွေနဲ့ နီးစပ်ရာနေရာတွေကို ရွှေ့ပြောင်းနေပေးနေတယ်လို့ ကူညီကယ်ဆယ်ပေးနေသူတွေက ပြောပါတယ်။

ရေကြီးနစ်မြုပ်မှုတွေဖြစ်ပေါ်နေတဲ့ မြန်မာပြည်အောက်ပိုင်းက မွန်ပြည်နယ်၊ ကရင်ပြည်နယ်၊ ရခိုင်ပြည်နယ်နဲ့ တနင်္သာရီတိုင်းဒေသတွေအတွင်း ဇူလိုင်လ ၂၅ ရက်ကနေ ၂၇ ရက်နေ့အထိ ၃ ရက်အတွင်း ရေဘေးဒုက္ခ ခံစားရသူ တစ်သောင်းကျော်ရှိလာပြီလို့ ဒေသအသီးသီးက ကူညီကယ်ဆယ်ရေးအဖွဲ့တွေက RFA ကို ပြောပါတယ်။

RFA Burmese

(ရေကြီးနေတဲ့ မော်လမြိုင်မြို့ကို ဇူလိုင် ၂၆ ရက်နေ့က တွေ့ရစဥ်) Photo CJ


မြန်မာနိုင်ငံဟာ သတင်းသမားတွေအတွက် အန္တရာယ်ကြီးတဲ့ နေရာတစ်ခုဖြစ်လာ

မြန်မာနိုင်ငံဟာ သတင်းသမားတွေအတွက် အန္တရာယ်ကြီးတဲ့ နေရာတစ်ခုဖြစ်လာ စစ်အာဏာရှင်ဆန့်ကျင်ရေးသပိတ်ကို သတင်းဓာတ်ပုံရယူနေတဲ့ ရန်ကုန်မြို့က သတင်းသမားတစ်ဦးကို ၂၀၂၁၊ ဖေဖော်ဝါရီ ၁၂ ရက်နေ့က တွေ့ရစဉ် / Photo: RFA

သတင်းသမားတွေကို ဖမ်းဆီးအရေးယူတာတွေနဲ့ လွတ်လပ်တဲ့ သတင်းလုပ်ငန်းတွေအပေါ်  ဖိနှိပ်စော်ကား တာတွေ စစ်ကောင်စီက ရပ်တန့်သင့်ပြီလို့ Human Rights Watch လူ့အခွင့်အရေးစောင့်ကြည့်မှုအဖွဲ့က ဒီကနေ့ပဲ ကြေညာပါတယ်။

မှားယွင်းပြီး ဖမ်းဆီးအရေးယူခံထားရတဲ့ သတင်းသမားတွေကို ပြန်လွှတ်ပေးဖို့လည်း Human Rights Watch အဖွဲ့က တောင်းဆိုလိုက်ပါတယ်။ စစ်တပ်က အာဏာသိမ်းပြီးနောက်ပိုင်း အဖမ်းခံခဲ့ရတဲ့ သတင်းသမား ၉၈ ယောက်ရှိပြီး အဲဒီအထဲက သတင်း သမား ၄၆ ယောက် လောလောဆယ် အဖမ်းခံထားရတုန်းပဲလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း AAPPရဲ့ စာရင်းကိုကိုးကားပြီး Human Rights Watch အဖွဲ့ က ဖော်ပြထားပါတယ်။

နိုင်ငံတော် အကြည်ညိုပျက်စေမှု ပုဒ်မ ၅၀၅ (က) နဲ့ အဖမ်းခံထားရတဲ့ သတင်းသမားတွေလည်း ဖော်ပြထား ပါတယ်။ ဒီမိုကရေစီနည်းကျ ရွေးချယ်ထားတဲ့ အစိုးရဆီက အာဏာသိမ်းတဲ့အခါမှာ သတင်းမီဒီယာကိုလည်း အဓိကထားပြီး စစ်ကောင်စီကထိန်းချုပ်တဲ့အနေနဲ့ သတင်းသမားတွေ အများအပြားကို ဖမ်းဆီးခဲ့တယ်၊ အာရှ ဒေသတွင်းမှာ မြန်မာနိုင်ငံဟာ သတင်းသမားတွေအတွက် အန္တရာယ်အရှိဆုံး နေရတစ်ခုဖြစ်လာခဲ့ပြီလို့ Human Rights Watch အဖွဲ့ရဲ့ အာရှဆိုင်ရာ လက်ထောက်ညွှန်ကြားရေးမှူး Phil Robertson က ပြောပါတယ်။

အာဏာသိမ်း စစ်ကောင်စီကို ခေါ်ဝေါ်သုံးစွဲတာကအစ သတင်းသမားတွေကို သတိပေးခြိမ်းခြောက်တာတွေ လုပ်ထားတယ်လို့ Human Rights Watch လူ့အခွင့်အရေးစောင့်ကြည့်မှုအဖွဲ့ရဲ့ ဒီကနေ့ ထုတ်ပြန်ချက်မှာ ဖော်ပြထားပါတယ်။


RFA Burmese

https://www.rfa.org/burmese/news/human-rights-watch-statement-07272021072245.html

UWSA ထိန်းချုပ်ရာ ဝ ဒေသက ၁၈နှစ်အထက် လူဦးရေအားလုံးနီးပါးကာကွယ်ဆေးထိုးပြီးလို့ဆို

UWSACopyright: UWSA

UWSA ထိန်းချုပ်ရာ ဝ အထူးဒေသက အသက်၁၈နှစ်အထက် လူဦးရေ ၃ သိန်းနီးပါးလုံး ကာကွယ်ဆေး ၂​ကြိမ်ထိုးပြီးသွားပြီလို့ ဝ ဒေသပြောခွင့်ရ ဦးညီရန်းက ဘီဘီစီကို ပြောပါတယ်။

ကာကွယ်ဆေးအားလုံးကို တရုတ်နိုင်ငံက အခမဲ့ ထောက်ပံ့ခဲ့တာလို့ သိရပါတယ်။

" အခုချိန်ထိတော့ ကိုဗစ်ကြောင့် သေဆုံးသူတော့ မရှိဘူး။ ပေါ့စတစ်လူနာကတော့ ၃၀၀ နီးပါး တွေ့ခဲ့ပြီး ဆေးရုံက ဆင်းသွားခဲ့ပြီ ဖြစ်တယ်။ ပေါ့စတစ်တွေကတော့ ပြင်ပကလာတဲ့သူတွေ များပါတယ်။ ကာကွယ်ဆေးက ဒေသခံရော ပြင်ပလူရောအားလုံးကို အခမဲ့ ထိုးပေးပါတယ်။ ၂ လပိုင်းကတည်းက စထိုးပေးတာပါ"လို့ သူက ပြောပါတယ်။

UWSA ထိန်းချုပ်ရာ ဝ အထူးဒေသအတွင်းက မြို့နယ်တွေမှာ တစ်မြို့နဲ့တစ်မြို့ ကူးလူးသွားလာခွင့်ကို နှစ်ပတ်တစ်ကြိမ် ဆေးစစ်ပြီးသွားလာခွင့်လက်မှတ်ရမှသာ သွားခွင့်ပြုတယ်လို့လည်း သိရပါတယ်။



BBC Burmese

https://www.bbc.com/burmese/live/burma-57783160

ကနီကျေးရွာတွေမှာ စစ်ကောင်စီဘက်က ခြောက်လှန့်ပစ်ခတ်တာ၊ ဖမ်းဆီးစစ်ဆေးတာတွေလုပ်နေဆဲလို့ ဒေသခံတွေပြော

CJCopyright: CJ


စစ်ကိုင်းတိုင်းဒေသကြီး၊ကနီမြို့နယ်ထဲကကျေးရွာတွေမှာ စစ်ကောင်စီတပ်တွေ လှည့်လှည်တပ်စွဲနေပြီး ရွာတွေထဲ အင်အားသုံးပြီးလှည့်လှည်ခြောက်လှန့်ပစ်ခတ်တာတွေ၊ ဖမ်းဆီးစစ်ဆေးတာတွေလုပ်နေတယ်လို့ဒေသခံတွေက ပြောပါတယ်။

ပြီးခဲ့တဲ့ ဇူလိုင်လ ၉ ရက်နေ့မှာ စစ်ကောင်စီနဲ့ ကနီဒေသခံပြည်သူ့ကာကွယ်ရေးတပ်ဖွဲ့တွေကြား လူသေဆုံးတဲ့အထိ တိုက်ပွဲပြင်းထန်ခဲ့ပါတယ်။

ဒီတိုက်ပွဲအပြီးမှာ စစ်ကောင်စီဘက်က ကနီမြို့နယ်အတွင်းကကျေးရွာတွေမှာ လှည့်လှည်တပ်စွဲပြီး ပစ်ခတ်ခြောက်လှန့်တာတွေ၊ပြည်သူ့ကာကွယ်ရေးတပ်ဖွဲ့လို့ယူဆတဲ့လူငယ်တွေကိုဖမ်းဆီးတာတွေဆက်လိုက်လုပ်နေတယ်လို့ ဒေသခံတွေကပြောဆိုလာတာပါ။

"ရက်ပိုင်းအတွင်းပဲ သေနတ်သံတွေပြန်ကြားနေရတယ် ရွာထဲကအိမ်တွေကိုထိတာတွေလည်းရှိတယ်။ပြီးခဲ့တဲ့ရက်ပိုင်းက ရွာထဲက ကိုယ်ဝန်ဆောင်တယောက် ပေါင်ကိုကျည်ထိသေးတယ်။ ဖမ်းလိုက်၊ စစ်လိုက်၊ ပြန်လွှတ်လိုက်လုပ်နေတော့ပြေးတဲ့ရွာတွေလည်း ကြိုပြေးပြီ။ အထူးသဖြင့် လူငယ်ဆိုရင်ကိုရွာထဲမနေရဲဘူး " လို့ ကနီနယ်ခံက ဘီဘီစီကိုပြောပါတယ်။

အခုလိုပစ်ခတ်ဖမ်းဆီးတာတွေရှိပေမယ့် လက်ရှိအချိန်မှာ ပြည်သူ့ကာကွယ်ရေးတပ်ဖွဲ့နဲ့စစ်ကောင်စီအပြန်လှန်ပစ်ခတ်နေတာမျိုးမရှိဘူးလို့လည်း ဒေသခံပြည်သူ့ကာကွယ်ရေးတပ်ဖွဲ့တွေဘက်က ပြောပါတယ်။

"ရွာထဲကိုပစ်လိုက် ရွာသားတွေကိုဖမ်းလိုက်နဲ့စစ်ကိုမြူ နေတဲ့သဘောဖြစ်နေတယ်။ လက်ရှိကတော့နှစ်ဖက်တင်းမာနေတာပဲရှိပါတယ်။ အပြန်လှန်ပစ်ခတ်တာမျိုးမရှိပါဘူး"လို့ ကနီဒေသခံပြည်သူ့ကာကွယ်ရေးအဖွဲ့ဝင်တဦးက ဘီဘီစီကိုပြောပါတယ်။

အခုလိုစစ်ကောင်စီဘက်က လှည့်လှည်တပ်စွဲဖမ်းဆီးမူတွေကြောင့် ပြီးခဲ့တဲ့တိုက်ပွဲတွေတုန်းက တိမ်းရှောင်ရတဲ့ရွာတွေအပြင် ရွာပေါင်း ၄ရွာလောက်ထပ်ပြီး ရှောင်ပြေးရတာကြောင့် ကနီဒေသထဲမှာ ၂၄ ရွာလောက်စစ်ဘေးတိမ်းရှောင်နေရတယ်လို့ ဒေသခံလူမူအကူညီပေးနေသူတွေကဆိုပါတယ်။

ကနီမှာ ဇွန်လ ၉ ရက်ကနေ ၁ဝ ရက်အတွင်း ဖြစ်ခဲ့တဲ့တိုက်ပွဲတွေမှာ ဒေသခံပြည်သူ့ကာကွယ်ရေးတပ်ဖွဲ့တွေ အပါဝင်ပြည်သူ ၁၁ ဦးသေဆုံးခဲ့တယ်လို့ ကနီပြည်သူ့ကာကွယ်ရေးတပ်ဖွဲ့ကထုတ်ပြန်ခဲ့ပြီး စစ်ရှောင်တွေနေတဲ့နေရာတွေထိ စစ်ကောင်စီဘက်ကလိုက်ခံပစ်ခတ်တာကိုလည်း ထည့်သွင်းပြောဆိုထားပါတယ်။

စစ်ကောင်စီရဲ့သတင်းထုတ်ပြန်ရေးအဖွဲ့ကတော့ စစ်ကောင်စီအနေနဲ့ ဒေသခံစစ်ရှောင်တွေရှိတဲ့တောတွေထဲ လိုက်လံပစ်ခတ်တာမရှိဘူးလို့ငြင်းဆိုထားသလို လက်ရှိကနီဒေသထဲက ပစ်ခတ်ဖမ်းဆီးမူတွေနဲ့ပတ်သက်လို့လည်း ဘီဘီစီက ဆက်သွယ်မေးမြန်းဖို့ကြိုးစားနေပါတယ်။


BBC Burmese

https://www.bbc.com/burmese/live/burma-57783160

ရေဘေးကြောင့် ကပ်ရောဂါကူညီရေးအဖွဲ့တွေ အခက်ကြုံ

flood in lower Myanmar

ကရင်ပြည်နယ် မြဝတီမြို့ ကိုဗစ်စင်တာမှာ ရေကြီးလို့ အောက်ဆီဂျင်ပေးနေရတဲ့ လူနာအပါအဝင် လူနာ ၁၀၀ ကျော်ကို အရေးပေါ်ပြောင်းရွှေ့ထားရပါတယ်။ မော်လမြိုင်မှာလည်း ရေကြီးပြီး ရပ်ကွက်လမ်း၊ သချိုင်္င်းသွားလမ်းတွေ ရေမြှုပ်လို့ နေအိမ်မှာ သေဆုံးသွားသူ ၉ ဦးကို မိုးထဲရေထဲ ခက်ခက်ခဲခဲ သယ်ယူမီးသင်္ဂြုလ်ခဲ့ရပါတယ်။ မြန်မာပြည်တောင်ပိုင်းတခွင် ရေကြီးရေလျှံလို့ ကပ်ရောဂါအကူအညီပေးရေးကိစ္စတွေမှာ အဟန့်အတားဖြစ်နေတဲ့အခြေအနေ ရန်ကုန်ကပေးပို့တဲ့သတင်းကို အလိမ္မာပြောပြပါမယ်။

ကရင်ပြည်နယ် မြဝတီမြို့ က မိုးရွာသွန်းမှုကြောင့် ဇူလိုင် ၂၆ ရက် မနေ့ညနေကကိုဗစ်ကွာရန်တင်း စင်တာမှာ ရေကြီးရေလျှံဖြစ်နေလို့၊ အောက်ဆီဂျင်ရှူနေရတဲ့ လူနာအပါအဝင် ကိုဗစ်လူနာ ၁၀၀ ကျော်ကို အရေးပေါ်ပြောင်းရွှေ့ထားရတယ်လို့ ကိုယ်တိုင် အပြောင်းအရွှေ့ကူညီပေးခဲ့တဲ့ မြဝတီမြို့ ကျွန်းတစ်ပင်လူမူကယ်ဆယ်ရေးအသင်း တာဝန်ခံ ကိုမောင်ငယ်က ဗွီအိုအေကို ပြောပါတယ်။

“ပြောင်းရွှေ့ရတာပေါ့ ရေတွေ တအားဝင်လာလို့ ကွာရန်တင်းစင်တာထဲမှာ ရေက လူတွေနဲ့ကျတော့ အဆင်မပြေဘူး၊ volunteer အဖွဲ့ရယ် ကျနော်တို့လူမူကယ်ဆယ်ရေးအဖွဲ့ရယ် သွားပြီးတော့ အဲ့ဒီကုတင်တွေရွှေ့ပေးတယ်၊ လူနာတွေကို ဟိုဘက်အပေါ်အမြင့်တဲ့နေရာကို ရွှေ့တယ် ပြောင်းတယ်။ လူနာ လက်ရှိက အခုအဲ့ဒီမှာ လူနာ ၁၀၀ ကျော်လောက်ပဲရှိတော့တယ် ၁၀၀ ကျော်လုံး ပြောင်းရွှေ့ထားတယ်၊ ကွာရန်တင်းစင်တာမှာ ပထမ ကျနော်တို့ သွားရွှေ့တဲ့အချိန်မှာတော့ ရေ တစ်ပေလောက်ပဲတက်တယ်၊ ကျနော်တို့ရွှေ့လို့ပြီးသွားတဲ့အခါကျတော့ အဲ့မှာခါးလောက်အထိတောင် ရောက်လာတယ်။”

မြဝတီမြို့ အမှတ်(၄) ရွှေမြဝတီ ကွာရန်တင်းစင်တာမှာ မနေ့ညနေ ၃ နာရီလောက်က ရေစကြီးလာလို့ အရေးပေါ်ပြောင်းရွှေ့လိုက်ရတာပါ။ လက်ရှိအချိန်ထိ ရေမကျသေးဘူးလို့ ပြောပါတယ်။

ထိုင်း-မြန်မာနယ်စပ် မြဝတီမြို့မှာ ကိုဗစ်အတည်ပြုလူနာတွေကို ကုသပေးနေတဲ့ စင်တာ အပါအဝင် ကိုဗစ်စင်တာ ၇ခုရှိပြီး လက်ရှိမှာလူနာ ၇၀၀ လောက်ရှိပါတယ်။ အောက်ဆီဂျင် မလုံလောက်တဲ့ပြသနာက ကြီးမားနေဆဲဖြစ်ပါတယ်။ တဖက်ကမ်းဖြစ်တဲ့ ထိုင်းနိုင်ငံ မဲဆောက်မြို့မှာ အောက်ဆီဂျင်သွားဖြည့်နေရပါတယ်။ ဟိုဘက်ကမ်းမှာလည်း လမ်းကြောင်းအခြေအနေနဲ့ အောက်ဆီဂျင်မရတဲ့အခက်အခဲတွေလည်း ရှိနေပါတယ်လို့ ကိုမောင်ငယ်က ဆက်ပြောပါတယ်။

“အောက်ဆီဂျင် လေဖြည့်ရတဲ့နေရာ အရင်တုန်းကဆိုလို့ရှိရင် သုံးခုလောက်ရှိတယ် ကြီးကြီးမားမား(ဖြည့်ပေးနိုင်တဲ့နေရာ)၊ အခုချိန်မှာ သူတို့ဆီတောင်မှ အချိန်နဲ့တပြေညီဖြည့်လို့မရတဲ့အတွက်ကြောင့် အဆင်မပြေဘူးဖြစ်နေတယ်၊ ဟိုဖက်ကမ်းမှာသွားသွားဖြည့်နေရတယ်၊ ထိုင်းနိုင်ငံ မဲဆောက် ဟုတ်ကဲ့ပါ။ ဟိုဘက်ကမ်းမှာ ဖြည့်တော့လည်း ကိုယ် ဒီနေ့သွားလည်းသွားချင်တိုင်း မရဘူး၊ သူတို့ဆီက ဖြည့်ပေးမှရတဲ့ဖြစ်တဲ့အတွက်ကြောင့် အချိန်မမှန်ဘူး ကျနော်တို့မှာ။”

မွန်ပြည်နယ်မှာလည်း ကိုဗစ်အတည်ပြုလူနာ နေ့စဉ် ရာနဲ့ချီရှိပြီး သေဆုံးသူက ၂၀ ထက်မနည်းရှိနေပါတယ်။ မော်လမြိုင်ဆေးရုံမှာ သေဆုံးတဲ့ လူနာတွေအပြင် နေအိမ်တွေမှာ ကုသရင်း သေဆုံးသွားတဲ့ လူနာတွေပါ ပရဟိသအသင်းတွေက ကူညီမီးသဂြိုလ်နေပါတယ်။

မွန်ပြည်နယ်မှာလည်း ကိုဗစ်တတိယလှိုင်နဲ့ ရေဘေးဒဏ် တပြိုင်ထဲရင်ဆိုင်နေရတာပါ။

မနေ့ကဆိုရင် ရေကြီးရေလျှံလို့ သချိုင်္င်းသွားတဲ့လမ်း၊ ရပ်ကွက်လမ်းတွေ ရေမြှုပ်လို့ လူနာတွေ သယ်ယူဖို့ အခက်ခဲဖြစ်နေရသလို မနေ့က နေအိမ်မှာ

သေဆုံးတဲ့ ကိုဗစ်သံသယလူနာ ၉ ဦးကိုလည်း မိုးရေထဲမှာ ခက်ခက်ခဲခဲ သယ်ယူမီးသင်္ဂြုလ်ခဲ့ရတဲ့အကြောင်း မော်လမြိုင် RESCUE လူမှုကယ်ဆယ်ရေးအဖွဲ့တာဝန်ရှိသူ တစ်ဦးက အခုလို ပြောပါတယ်။

“မနေ့ကဆိုရင် လမ်းတွေ ရေမြှုပ်၊ ဟိုသချိုင်္င်းသွားတဲ့လမ်းတွေလည်း ရေမြှုပ်ပြီးတော့ အကုန်လုံးတကယ်ကို ခက်ခက်ခဲခဲမိုးထဲရေထဲမှာ လိုက်ပြီးတော့ ကူညီပေးရတယ်ပေါ့နော်။ ဆေးရုံမှာနေ့စဉ်သေဆုံးတဲ့လူနာတွေလည်း ကျနော်တို့ သွားပြီး ရင်ကွဲရုံတွေ ထုတ်ပြီး သင်္ဂြုလ်ပေးတာပေါ့၊ အဲ့ဒါအပြင် ကျနော်တို့ အခုရပ်ကွက်တွေထဲမှာ နေ့စဉ်သေတဲ့လူနာတွေရှိတယ် မနေ့ဆိုရင် ကျနော်တို့ ၉

အလောင်းလောက်ရှိတာပေါ့နော်၊ မနေ့ကဆိုလို့ရှိရင် တကယ့်ကို မိုးထဲရေထဲမှာ သူတို့ကလည်း အကူအညီတောင်းလာတယ် ဒီမှာ Dead body တွေနဲ့ အိမ်မှာလည်းမိုးထဲရေထဲမှာ ရေကလည်း မြှုပ်နေတော့ အိမ်တွေမှာ တော်တော်ခက်ခက်ခဲခဲဖြစ်တာပေ့ါနော်၊ သေတဲ့လူနာတွေကို တကယ့်ကိုခက်ခက်ခဲခဲလိုက်ပြီးတော့ သယ်ချပေးရပါတယ်၊ ရေထဲကနေပြီးတော့ သယ်ချသယ်ချပြီးတော့ ကျနော်တို့ဒီသချိုင်္င်းကို ပို့ပြီးတော့ သေသေချာချာလည်းလုပ်ပေးပါတယ်။”

လက်ရှိ မွန်ပြည်နယ်မှာ ကိုဗစ်ကူးစက်နှုန်းနဲ့ သေဆုံးနှုန်းက မြင့်တက်နေသလို အောက်ဆီဂျင်လိုအပ်ချက်လည်း ကြီးမားနေပါတယ်။ မော်လမြိုင် RESCUEလူမှုကယ်ဆယ်ရေးအဖွဲ့ကတော့ သေဆုံးရုပ်အလောင်းတွေ မီးသင်္ဂြုလ်ပေးတဲ့အပြင် အောက်ဆီဂျင်အိုးတွေလည်း ကူညီပေးနေတာပါ။ အခုတဖန် မော်လမြိုင်မှာ ရေကြီးလို့ ရေဘေးသင့်ပြည်သူတွေကိုပါ ထပ်မံကူညီပေးနေရပါတယ်။ ဒါပေမယ့်လည်း ကိုဗစ်ထိန်းချုပ်ရေးရော ရေဘေးကူညီမှုပါ တပြိုင်တည်းလုပ်နေရလို့ ပရဟိတအဖွဲ့တွေအတွက် အခက်အခဲတွေရှိနေတယ်လို့သိရပါတယ်။

ရန်ကုန်မှာလည်း ကိုဗစ်သံသယလူနာတွေများပြားနေပါတယ်။ အခက်အခဲဖြစ်လို့ ဆေးဝါးနဲ့ အစားအသောက်အကူအညီလိုအပ်တဲ့ အိမ်တွေကို အိမ်ရှေ့မှာ အလံထောင် အမှတ်အသားပြုပြီး အကူအညီတောင်းခံကြဖို့ ပရဟိတအကူအညီပေးသူတွေက အသိပေးထားပါတယ်။

အကူအညီလိုအပ်နေတဲ့ နေအိမ်တွေဆီ အစားအသောက်ကို အဓိကထားပြီး အရှင့်ကျေးကျွန်များအဖွဲ့ က ကူညီဆောင်ရွက်ပေးနေပါတယ်။

အကူအညီတောင်းခံတဲ့ အိမ်တွေ ပိုမိုများပြားလာလို့ မနိုင်မနင်ဖြစ်နေသလို အဖွဲ့သားထဲက ဖျားနာနေကြလို့ ခဏတာအနားယူထားတယ်လို့ အရှင့်ကျေးကျွန်များအဖွဲ့ က ပြောပါတယ်။

“ပိုပိုပြီးတော့ များလာတယ်၊ ကျနော်တို့လည်းအမျိုးသမီးလေးယောက်ပဲရှိတော့ မနိုင်ကြတော့ဘူး၊ အလံထောင်တဲ့ အိမ်က သင်္ဃန်းကျွန်းဆို သင်္ဃန်းကျွန်း တစ်ပုံကြီး၊ တောင်ဥက္ကလာဆိုလည်း တောင်ဥက္ကလာပေါ့နော်၊ ကိုယ်ကဒီလေးယောက်နဲ့ အလုပ်လုပ်တော့ ဖျားတဲ့ လူလည်းဖျားကုန်ပြီး ဘယ်လိုပဲ ကာကွယ်ကာကွယ် ဖျားတဲ့ လူက ဖျားတော့ လေးယောက်ကနေ သုံးယောက်၊ နောက် နှစ်ယောက် ကနေ တစ်ယောက် အခုခဏတောင်မှ နားထားတယ်သုံးလေးရက်ရှိပြီး။”

အဖွဲ့သားတွေ ဖျားနာကြလို့ ခဏအနားယူထားပေမယ့် လက်ရှိမှာအကူအညီတောင်းထားတဲ့ အိမ် ၅၀ လောက်ရှိနေလို့ ကြိုးစားပို့ဆောင်ပေးသွားမယ်လို့လည်း ပြောပါတယ်။


အလိမၼာ/ VOA Burmese

https://burmese.voanews.com/a/myanmar-flood/5980811.html

ကနီတိုက်ပွဲ ဖမ်းခံရတဲ့ PDF တွေ အလောင်းပဲပြန်ရ

တိုင်းရင်းသားနယ်ြမေထဲမှာ လှုပ်ရှားနေတဲ့ မြန်မာစစ်တပ် (ဓာတ်ပုံ - AP)

စစ်ကိုင်းဒေသကြီး ကနီနယ်မှာ စစ်ကောင်စီတပ်တွေနဲ့ ဒေသခံ PDFတို့ကြား တိုက်ပွဲဖြစ်ပွားခဲ့ပြီးနောက် ဒဏ်ရာရပြီး ဖမ်းဆီးခံရတဲ့ PDF တပ်ဖွဲ့ဝင်တွေကို အလောင်းပဲ ပြန်ရခဲ့တယ်လို့ ဒေသခံ PDFတွေဘက်က ပြောပါတယ်။ ဒါ့အပြင် ရွှေကူအနီးမှာ စစ်ကောင်စီတပ်တွေရဲ့ ရေယာဉ်တွေကို KIA တပ်ဖွဲ့က ကြားဖြတ် တိုက်ခိုက်တာတွေ ပြုလုပ်ခဲ့တာတွေ ရှိပါတယ်။ ဒီအကြောင်း အပြည့်အစုံ ရန်ကုန်က လာတဲ့သတင်း ကိုသားညွန့်ဦးပြောပြပါမယ်။

မနေ့ ဇူလိုင် ၂၆ ရက်နေ့ ညနေပိုင်းမှာ စစ်ကောင်စီတပ်တွေနဲ့ ဒေသခံ PDF တို့ ကနီနယ်ထဲက ဇီပင်ကွင်းနဲ့ ညောင်ပင်သာ ကျေးရွာအနီးမှာ တိုက်ပွဲဖြစ်ပွားခဲ့ပြီး စစ်ကောင်စီတပ်တွေက လက်နက်ကြီးတွေနဲ့ ပစ်ခတ်တာကြောင့် ဒေသခံ PDF တွေဘက်က နောက်ဆုတ်ပေးခဲ့ပြီး PDF တွေဘက်က ဒဏ်ရာရ ဖမ်းဆီးခံရတာတွေ ရှိခဲ့တာပါ။

တိုက်ပွဲကြောင့် ဒဏ်ရာရရဖမ်းဆီးခံရသူတွေကို ဒီကနေ့ ဇူလိုင် ၂၇ ရက်နေ့မှာ သွားရောက် ရှာဖွေရာမှာတော့ စစ်ကောင်စီတွေဘက်က သတ်ပြီး ကျင်းတူးပြီး မြှုပ်နှံထားတဲ့ အလောင်း ၉ လောင်းနဲ့အတူ မမြုပ်နှံထားတဲ့ အလောင်း ၃ လောင်း စုစုပေါင်း ၁၂ လောင်းကို တွေ့ရှိခဲ့တယ်လို့ PDF တွေဘက်က ပြောပါတယ်။

ဒီအခြေအနေနဲ့ ပတ်သက်လို့ ဒေသခံ PDF တဦးကအခုလိုပြောပါတယ်။

"ဇီးပင်ကွင်းနဲ့ညောင်ပင်သာကြားမှာ အင်းတိုင်းပြန့်ပေါ်မှာစဖြစ်တာ တောလေးပေါ့။ တောပြန့်လေး။ တိုက်ပွဲက ပြင်းထန်တယ်။ ကျွန်တော်တို့က ဒီတိုင်း တတန်းကြီး သွားနေချိန်မှာ သူတို့က RPG နဲ့ထုတယ်။ လူထုက RPG ဆိုတာလည်း သိပ်တော့မမြင်ဖူးတော့ ၇ လုံး ၈ လုံးလောက် ဆက်တိုက် ပစ်တော့ ကြောက်လန့်ပြီး ပြေးတဲ့အချိန်မှာ ပစ်ခံရတာ။ ဆုတ်တဲ့သူက ဆုတ်တယ် မလွတ်တဲ့သူတွေက သူတို့ပစ်ကွင်းထဲ အကုန်ဝင်ကြတာလေ။ မှန်တဲ့သူတွေထိတဲ့သူတွေ မထိတဲ့သူတွေကော အရှင်တွေ မိကုန်တာ။ ပြေးမလွတ်တာတွေကော။ သွားကြည့်တဲ့အချိန်ကြတော့ အလောင်းတွေကို တကျင်းကို ၃ ယောက်နှုန်းနဲ့ မြှုပ်ထားတယ်။ တချို့က ပေါင်တွေကျည်ဆံမှန်ထားတယ်။ ပြီးတော့မှမသေလို့ ခေါင်းတွေ ပစ်သတ်ထားတယ်။ တချို့ကျတော့ ကျည်ဆံမမှန်ဘဲ ဒီတိုင်းအရှင်ဖမ်းခံရတာကို ရိုက်သတ်ထားတာ တွေ့တယ်။ ဒဏ်ရာ ဒဏ်ချက်တွေက ညိုမဲနေတာ။ အရှင်ဖမ်းမိတာများတယ်။ သူတို့လက်ထဲမှာ သတ်ပစ်တာ။ တချို့ဆို သေနတ်ဒဏ်ရာတောင်မပါဘူး ဒီတိုင်းဖမ်းခံထားရတာ ရိုက်သတ်ထားတာ တွေ့တယ်။ စုစုပေါင်း မြှုပ်ထားတာက ၉ လောင်း အဖိုးကြီး ၂ ယောက်ရယ် တယောက်က ဒီတိုင်း ပစ်သတ်ထားတာ ၁၂ ယောက်သေတယ်။"

ဒီတိုက်ပွဲဖြစ်စဉ်နဲ့ ပတ်သက်လို့ စစ်ကောင်စီဘက်က တရားဝင် သတင်းထုတ်ပြန်တာတော့မရှိသေးပါဘူး။

ပြီးခဲ့တဲ့ ဇူလိုင် ၉ ရက်နဲ့ ၁၀ ရက်မှာလည်း ကနီမြို့နယ် ယင်းရွာ အနီး တောထဲက စစ်ဘေးဒုက္ခသည်တွေကို ဖမ်းဆီး အမျိုးသမီးတွေကို ပြန်လွှတ်ပြီးတော့ အမျိုးသား ၁၅ ယောက်ကို စစ်ကောင်စီတပ်တွေက အစုလိုက်အပြုံလိုက် သတ်ဖြတ်ခဲ့တယ်လို့ ဒေသခံတွေကပြောပါတယ်။

တချိန်တည်းမှာပဲ တိုက်ပွဲတွေဖြစ်ပွားနေတဲ့ ကချင်ပြည်နယ်ကို ဗန်းမော်ဘက်ကို စစ်ကူပေးဖို့ ရွှေကူမြို့ကို ရောက်ရှိနေတဲ့ စစ်ကောင်စီ စစ်သင်္ဘောတစီးကို KIA ဘက်က ကြားဖြတ်တိုက်ခိုက်ခဲ့တာတွေ ပြုလုပ်ခဲ့ပါသေးတယ်။ ဒါနဲ့ပတ်သက်လို့ KIA ပြန်ကြားရေး တာဝန်ခံ ဗိုလ်မှူးကြီး နော်ဘူက အခုလိုပြောပါတယ်။

"အဲ့ဒါက တိုက်ပွဲတော့မဟုတ်ဘူး။ ကျွန်တော်တို့ ကြားဖြတ်ပြီး ပစ်တာပေါ့။ တပ်ပိုင်းဆိုင်ရာ သင်္ဘောတွေ တက်လာတာကို ကျွန်တော်တို့ ကြားကနေ ဖြတ်ပြီးတော့မှ ပစ်တာပေါ့။ ပစ်လိုက်တော့ သင်္ဘောဘက်ကလည်း ပြန်ပြီး ခုခံ တုန့်ပြန်တဲ့အနေနဲ့ ပြန်ပစ်တယ်ဆိုတော့ တိုက်ပွဲပုံစံ ဖြစ်သွားတာပေါ့။"

ရွှေကူမြို့မှာတော့ စစ်ကောင်စီကို စစ်ကူလာပေးတဲ့ သင်္ဘောတွေ မကြာခဏဆိုသလို တိုက်ခိုက်ခံရပြီး ကသာမြို့မှာဆိုရင်လည်းး စစ်ကောင်စီတပ်တွေကို ကချင်လွတ်မြောက်ရေး တပ် KIA နဲ့ ကသာ PDF တို့ ပူးပေါင်းပြီး တိုက်ခိုက်နေတာတွေလည်း ရှိပါတယ်။ ကချင်ပြည်နယ်နဲ့စစ်ကိုင်းတိုင်းနယ်စပ်တွေမှာ ဒေသခံ PDF တွေနဲ့ စစ်ကောင်စီတပ်တွေအကြား တိုက်ပွဲတွေ အခုရက်ပိုင်း ပိုစိပ်လာနေပါတယ်။


သားၫြန္႔ဦး/ VOA Burmese

https://burmese.voanews.com/a/myanmar-military-troops-attacks-and-catch-pdf-forces-in-upper-myanmar/5980659.html

နေပြည်တော်က ဆန္ဒပြကျောင်းသားခေါင်းဆောင်တစ်ဦးကို စစ်ကောင်စီ ရိုက်နှက်ဖမ်းဆီး

နေပြည်တော်က ဆန္ဒပြကျောင်းသားခေါင်းဆောင်တစ်ဦးကို စစ်ကောင်စီ ရိုက်နှက်ဖမ်းဆီး ဖမ်းဆီးခံရတဲ့ ရမည်းသင်း နည်းပညာတက္ကသိုလ် ဒုတိယနှစ်ကျောင်းသား ကိုကျော်ဘိုဘိုခန့် ကို တွေ့ရစဥ် / Photo CJ

နေပြည်တော်က ဆန္ဒပြပွဲတချို့မှာ ဦးဆောင်ပါဝင်ခဲ့တဲ့ အသက် ၂၀ အရွယ် ရမည်းသင်း နည်းပညာတက္ကသိုလ် ဒုတိယနှစ်ကျောင်းသား ကိုကျော်ဘိုဘိုခန့် ကို ဇူလိုင်လ ၂၇ ရက် ဒီနေ့ နေ့လယ်ပိုင်းက စစ်ကောင်စီတပ်တွေ က ရိုက်နှက်ဖမ်းဆီးသွားတယ်လို့ နေပြည်တော်ကျောင်းသားများသမဂ္ဂက RFA ကို ပြောပါတယ်။

ပျဉ်းမနားမြို့က ကိုကျော်ဘိုဘိုခန့် နေထိုင်ရာ ဘုန်းကြီးကျောင်းကို စစ်ကောင်စီတပ်သားတွေက လက်နက် အပြည့်အစုံနဲ့ ဝင်ရောက်စီးနင်းပြီး သူ့ကိုတွေ့ချိန်မှာ ရိုက်နှက်ဖမ်းသွားတယ်လို့ အမည်မဖော်လိုတဲ့ ကျောင်းသားသမဂ္ဂ အဖွဲ့ဝင်တစ်ဦးက ပြောပါတယ်။ 

“သူဖမ်းခံရတဲ့အချိန်က နေမကောင်းဖြစ်နေတာ ဒါကိုတောင် ရိုက်နှက်ပြီး ခေါ်သွားတယ်ဆိုတော့ ကျနော်တို့ အရမ်းစိုးရိမ်တယ်၊ ဘယ်ကိုခေါ်သွားမှန်းလည်း မသိသေးဘူး”

သူ့ကိုဖမ်းစဉ်မှာ စစ်ကားလေးစီးနဲ့ အနည်းဆုံး အင်အား ၄၀ လောက်ပါဝင်ပြီး သတင်းအတိကျရတဲ့အတွက် လာဖမ်းတာလို့လည်း ဆိုပါတယ်။

ကိုကျော်ဘိုဘိုခန့်ကို ဖမ်းနေတဲ့တစ်ချိန်ထဲမှာပဲ ပျဉ်းမနားက တခြားကျောင်းသားတွေရဲ့ အိမ်တွေကိုလည်း စစ်ကောင်စီက သွားရောက်ရှာဖွေတာတွေလုပ်ခဲ့ပေမယ့် ဖမ်းမိခဲ့တာတော့မရှိဘူးလို့ ဆိုပါတယ်။


RFA Burmese

https://www.rfa.org/burmese/news/student-leader-arrested-in-naypyitaw-07272021055753.html

မြတောင်သပိတ်စစ်ကြောင်း ပစ်ခတ်ဖြိုခွင်းခံလိုက်ရ၊ သေဆုံးသူတွေ ရှိနိုင်

မြတောင်သပိတ်စစ်ကြောင်း ပစ်ခတ်ဖြိုခွင်းခံလိုက်ရ၊ သေဆုံးသူတွေ ရှိနိုင် ၂၀၂၁၊ ဇူလိုင် ၁၉ ရက်နေ့ စစ်အာဏာရှင်ဆန့်ကျင်ဆန္ဒပြတဲ့ မြတောင်သပိတ်စစ်ကြောင်းကို တွေ့ရစဉ် / Photo: Simulation

မန္တလေးမြို့မှာ နေ့တိုင်းနီးပါး ဆန္ဒပြနေကြတဲ့ မြတောင်သပိတ်စစ်ကြောင်းဟာ ဒီကနေ့ ဇူလိုင် ၂၇ ရက် မနက်ပိုင်းက စစ်ကောင်စီတပ်ဖွဲ့ဝင်တွေက သေနတ်နဲ့ ပစ်ခတ်ဖြိုခွဲခံလိုက်ရလို့ သေဆုံးသူတွေရှိနိုင်တယ်လို့ ဒေသခံတစ်ချို့က ပြောပါတယ်။

မဟာမုနိဘုရားကြီး အရှေ့ဘက်မုခ်အနီး (၈၁) လမ်းမှာ ပြောက်ကျားသပိတ်အနေနဲ့ ဆန္ဒပြနေကြစဉ် အရပ်ဝတ်တွေက သေနတ်တွေနဲ့ အချက်ပေါင်းများစွာ ပစ်ခတ်ဖြိုခွင်းခဲ့လို့ တချို့သေဆုံးတာတွေ ရှိနိုင်ပြီး ဖမ်းဆီးခံရသူတွေ၊ ဒဏ်ရာရသူတွေ ရှိခဲ့တယ်လို့ သပိတ်စစ်ကြောင်းမှာ ပါဝင်သူတစ်ဦးက RFA ကို ပြောပါတယ်။

" အရပ်ဝတ်တွေနဲ့ရောက်လာပြီး ပစ်လိုက်တော့ ဆိုင်းဘုတ်ကိုင်ထားတဲ့ မိန်းကလေး လဲကျသွားတယ်။ သေမလား၊ အသက်ရှင်မလားတော့ မသိဘူး။ သုံးယောက်ထက်မနည်း ကျည်ထိပြီး ဖမ်းခံလိုက်ရတယ်၊ ကားပေါ်တင်သွားတယ် ပြောတယ်။ ကျန်တဲ့သူတွေက ထွက်ပြေးကြတော့ ဆိုင်ကယ်တွေ လဲကျတယ်။ အခုထိတော့ လူစစ်နေတုံးမို့ ဖမ်းဆီးခံရတာ၊ ထိခိုက်တာတွေ သေချာမပြောနိုင်သေးဘူး။ ဘာလက်နက်မှ မပါတဲ့ ငြိမ်းချမ်းစွာဆန္ဒပြတဲ့သူတွေကို တွေ့တာနဲ့ အခုလိုပစ်ခတ်တာက မဖြစ်သင့်ဘူး "

ဆန္ဒပြသူတွေထဲက ဘယ်နှစ်ယောက် ထိခိုက်ဒဏ်ရာရတယ်၊ အဖမ်းခံထားရတယ်၊ သေဆုံးခဲ့သူတွေရှိတယ် ဆိုတာတွေကို RFA က သီးခြားအတည်ပြုလို့မရသေးပါဘူး။

မြတောင်သပိတ်စစ်ကြောင်းဟာ စစ်တပ်က အာဏာသိမ်းပြီးနောက် မန္တလေးမြို့မှာ နေ့စဉ်နီးပါး ဆန္ဒပြခဲ့ ကြပြီး ၁၀ ကြိမ်ထက်မနည်း ဖြိုခွင်းခံခဲ့ရဖူးတယ်လို့ သပိတ်စစ်ကြောင်းမှာ ပါဝင်သူတွေက ပြောပါတယ်။


RFA Burmese

https://www.rfa.org/burmese/news/myataung-protest-attack-07272021052906.html

၂၀၂၀ ရွေးကောက်ပွဲရလဒ် စစ်ကောင်စီခန့်ကော်မရှင်ဖျက်သိမ်း

Myanmar Elections

မြန်မာနိုင်ငံမှာ ၂၀၂၀ ခုနှစ်၊ နိုဝင်ဘာ ၈ ရက်နေ့က ကျင်းပခဲ့တဲ့ ရွေးကောက်ပွဲ ရလဒ်တွေကို ပယ်ဖျက်လိုက်ကြောင်း အာဏာသိမ်းစစ်ကောင်စီ ခန့်အပ်တဲ့ ရွေးကောက်ပွဲကော်မရှင်က ဒီကနေ့ ဇူလိုင်လ ၂၆ ရက်နေ့ ရက်စွဲနဲ့ ထုတ်ပြန်လိုက်ပါတယ်။

တည်ဆဲ ရွေးကောက်ပွဲကော်မရှင် ဥပဒေပုဒ်မတွေနဲ့အညီ မြို့နယ်ပေါင်း ၃၁၅ မြို့နယ်မှာ ကျင်းပခဲ့တဲ့ မဲစာရင်းတွေကို စစ်ဆေးခဲ့တာမှာ မဲမသမာမှု ၁၁ သန်းကျော် တွေ့ရှိခဲ့ရသလို၊ အရင် ရွေးကောက်ပွဲ ကော်မရှင်ဟာလည်း တရားဝင်အပ်နှံထားတဲ့ လုပ်ပိုင်ခွင့်တွေကို အလွဲသုံးစားပြုပြီး ဥပဒေ၊ နည်းဥပဒေတွေကို ကျော်လွန် ဖောက်ဖျက် ဆောင်ရွက်ခဲ့တာကို တွေ့ရှိရတဲ့အတွက် ရွေးကောက်ပွဲရလဒ်ကို ပယ်ဖျက်လိုက်ကြောင်း စစ်ကောင်စီက ခန့်ထားတဲ့ ရွေးကောက်ပွဲကော်မရှင်ဥက္ကဌ ဦးသိန်းစိုးက လက်မှတ်ထိုးပြီး ထုတ်ပြန်လိုက်တာ ဖြစ်ပါတယ်။

ပြီးခဲ့တဲ့ ရွေးကောက်ပွဲအတွင်း မဲမသမာမှုတွေ ရှိခဲ့တယ်ဆိုတဲ့ အကြောင်းပြချက်နဲ့ စစ်ကောင်စီက ဖေဖော်ဝါရီလ ၁ ရက်နေ့မှာ အာဏာသိမ်းခဲ့ပြီးတဲ့နောက် နောက်ပိုင်း ကျင်းပတဲ့ စစ်ကောင်စီ သတင်းစာရှင်းလင်းပွဲတိုင်းမှာလည်း မဲမသမာရှိခဲ့တဲ့ ကိစ္စရပ်တွေကို စုံစမ်း စစ်ဆေးနေတဲ့အကြောင်းအရာတွေကို ထည့်သွင်း ပြောဆိုနေခဲ့တာပါ။

ဒါပေမယ့် ပြည်တွင်း ရွေးကောက်ပွဲ လေ့လာစောင့်ကြည့်သူတွေနဲ့ နိုင်ငံတကာက လေ့လာသူအားလုံးနီးပါးက ၂၀၂၀ နိုဝင်ဘာ ရွေးကောက်ပွဲဟာ တရားမျှတမှုရှိကြောင်း အကြိမ်ကြိမ် ပြောဆိုထားကြပြီး ဖြစ်ပါတယ်။ ရွေးကောက်ပွဲမသာမာမှုကိုအကြောင်းပြပြီး မြန်မာစစ်တပ်က နိုင်ငံတော်အာဏာသိမ်းယူခဲ့ပြီး၊ တနှစ်အတွင်း နောက်တကြိမ်ရွေးကောက်ပွဲကျင်းပပေးမယ်လို့ ကြေညာထားပါတယ်။ ဒါပေမယ့် နောက်ပိုင်းမှာတော့ နိုင်ငံရေးမတည်ငြိမ်မှုတွေကြောင့် နောက်တကြိမ်ရွေးကောက်ပွဲတွေကျင်းပနိုင်ဖို့ နှစ်နှစ်အထိ ကြာသွားနိုင်တယ်လို့ ပြောလာပါတယ်။


VOA (မြန်မာပိုင်း)

https://burmese.voanews.com/a/myanmar-election-2020/5979372.html

မြန်မာနိုင်ငံတိုင်းနဲ့ပြည်နယ်တချို့မှာ ရေကြီးရေလျှံလို့ ပျက်စီးမှုရှိ

ရေကြီးနေသော ရေး-ထားဝယ် လမ်းပိုင်း ( ဓာတ်ပုံ - Courtesy)

ကိုဗစ်တတိယလှိုင်သက်ရောက်မှုကြီးမားနေတဲ့ မြန်မာနိုင်ငံမှာ တိုင်းဒေသကြီးနဲ့ ပြည်နယ်တချို့က မိုးအဆက်မပြတ်ရွာသွန်းလို့ ရေကြီးရေလျှံမှုတွေဖြစ်နေပါတယ်။ ကရင်ပြည်နယ် ကြာအင်းဆိပ်ကြီးမြို့မှာ မြစ်ရေမြင့်တက်လာပြီး နေအိမ်တွေမြှုပ်လို့ လူဦး ၅၀၀ ကျော်လောက် ဘေးလွတ်ရာကို ပြောင်းရွှေ့နေရပါတယ်။ ဒါအပြင် မွန်ပြည်နယ်မှာလည်း ရေကြီးနေသလို လောင်းလုံးမြို့နယ်မှာ မြေပြိုလို့ နေအိမ်ပျက်စီး လူထိခိုက်ဒဏ်ရာတွေ ရှိနေပါတယ်။ ရန်ကုန်ကလာတဲ့ ဒီသတင်းအပြည့်အစုံ အလိမ္မာပြောပြပါမယ်။

မြန်မာနိုင်ငံမှာ တကျော့ပြန်ရင်ဆိုင်နေရတဲ့ ကိုဗစ်တတိယလှိုင်းနဲ့ လူသေဆုံးမှု၊ ကူးစက်နှုန်းမြင့်မားနေချိန်မှာပဲ တချို့နေရာမှာ ရေကြီး ရေနစ်မြှုပ်တဲ့ ဒဏ်ပါ ရင်ဆိုင်နေရပါတယ်။

ကရင်ပြည်နယ် မြဝတီမြို့၊ ကြာအင်းဆိပ်ကြီးမြို့မှာ မိုးအဆက်မပြတ်ရွာလို့ လူနေအိမ်ထဲ ရေဝင်တာ ရေကြီးရေလျှံမှုတွေ ဖြစ်ပေါ်နေပါတယ်။

ကြာအင်းဆိပ်ကြီးမြို့မှာ မိုးအဆက်မပြတ်ရွာသွန်းပြီး အမှတ်(၆) အမှတ်(၄) စတဲ့ မြေနိမ့်ပိုင်းရပ်ကွက်တွေ ရေကြီးပြီး နေအိမ်တွေ နစ်မြှပ်လို့ အိမ်ထောင်စု ၈၈ စုထက်မနည်း လူဦးရေ ၅၀၀ ကျော်လောက်ဘေးလွတ်ရာကို ပြောင်းရွှေ့ထားရတယ်လို့ ကြာအင်းဆိပ်ကြီးမြို့နယ် မီးသတ်တပ်ဦးစီးဌာနက ဒုတိယဦးစီးမှူးလမင်းထွန်းက ဗွီအိုအေကို ပြောပါတယ်။

“အခုလောလောဆယ်ကတော့ ရွှေ့ပြောင်းနေတာတွေရှိတယ်၊ ပရဟိတအဖွဲ့တွေနဲ့ စုပေါင်းပြီးတော့ ရွှေ့ပြောင်းတာတွေလုပ်နေပါတယ်၊ အများဆုံးက အမှတ်(၆) ရပ်ကွက်ပါ၊ မြုပ်တဲ့ အိမ်တွေက မနေ့ကထိတော့ အိမ်ထောင်စု ၈၈ စုလောက် ပြောင်းရွှေ့ထားတယ်၊ ဒီမနက်ထပ်ပြီးတော့အပြောင် းအရွှေ့တွေ ထပ်လုပ်တယ်ဗျ။

အိမ်ထောင်စုစု ၈၈ ဆိုရင်တော့ (လူဦးရေ) ၅၀၀ ကျော်ရှိတယ်၊ လောလောဆယ်တော့ ဟိုဟာ ကွာရန်တင်းစင်တာနဲ့ ဘိုသဲကုန်းမှာ သူတို့နေရာချပေးထားတယ်၊ အခုကတော့ ရေကတော့ ဆက်ပြီးတက်နေတုန်းပဲဗျ၊ တက်နေတယ်ဆိုတော့ နည်းနည်း ဟိုအပေါ်တပ်တွေပေါ့ အပေါ်ထပ်တွေ ရေနည်းနည်းမလွတ်တဲ့လူတွေက အခုမနက်ပိုင်းထပ်ရွှေ့ပြောင်းနေကြတယ်။”

ဒီကနေ့ မွန်လွဲ ၁ နာရီခွဲအချိန် ဇမိမြစ်ရေ ပေ ၃၀ လောက်ရောက်နေပြီး ဆက်လက်မြင့်တက်နေဆဲ ဖြစ်တယ်လို့ ပြောပါတယ်။ လက်ရှိအချိန်မှာ ရေမလွတ်တဲ့ နေအိမ်တွေကို ထပ်ပြီး အပြောင်းအရွှေ့လုပ်နေတယ်လို့ ပြောပါတယ်။

ရေနစ်မြုပ်လို့ နေအိမ် သုံး၊ လေးအိမ်လောက် ရေထဲမြောပါသွားပြီး ကျန်တဲ့အိမ်လည်း ပျက်စီးဆုံးရှုံးမှုရှိခဲ့ပါတယ်။ ပျက်စီးဆုံးရှုံးမှုအသေးစိတ် အတိအကျမသိရသေးဘူးလို့တော့ ဒုတိယဦးစီးမှူးလမင်းထွန်းက ပြောပါတယ်။

အလားတူ မွန်ပြည်နယ် ကျိုက်မရော၊ ပေါင်၊ မော်လမြိုင်၊ မုဒုံနဲ့ ရေးမြို့နယ်တွေမှာလည်း ရေကြီးနေပါတယ်။

မိုးအဆက်မပြတ်ရွာပြီး ကျိုက်မရောမြို့နယ် ဦးလေးကျေးရွာမှာ မြစ်ရေတက်လာလို့ နေအိမ်အောက်ထပ်မှာ ရေမြှုပ်နေပြီး ရေဘေးသင့်တဲ့ အိမ် စုစုပေါင်း ၃၁၀ အိမ် လောက်ရှိနေပြီးလို့ ကျေးရွာအုပ်ချုပ်ရေးမှူး ဦးအောင်သိန်းမြင့်က ပြောပါတယ်။

 “ရွာမပိုင်းကတော့ အကုန်လုံးရေဝင်ရောက်ကုန်ပြီးလေး၊ ရေဝင်ရောက်တာ အကုန်လုံး (အိမ်) ၃၁၀ လောက်၊ နေ့တိုင်းရေကတိုးနေတော့ အိမ်ကိုရေဝင်ရောက်နေတယ်ပေါ့၊ အဲ့လိုအောက်ထပ်ရေဝင်ရောက်သွားကုန်တာပေါ့၊ ဒီအပေါ်ထပ်သမားတွေကို မြင့်တဲ့ အိမ်ဆွေမျိုးအိမ်တွေကို ပြောင်းတက်တဲ့ပြောင်းတက်တယ်ပေါ့၊ မိုးက နေ့ရော ညရောဆက်တိုက်ရွာ ရေက တအား တအားတက်နေတယ်။”

မော်လမြိုင်မြို့နယ်မှာလည်း ဇူလိုင် ၂၂ ရက်နေ့ ညနေပိုင်းကတည်းက မိုးဆက်တိုက်သွန်းပြီးနောက် မြေနိမ့်ပိုင်းရပ်ကွက်တွေ ရေကြီးရေလျှံမှုတွေဖြစ်ခဲ့ပါတယ်။ ဒီနေ့အထိ မြေနိမ့်ပိုင်းရပ်ကွက်တွေမှာအိမ်ထဲရေဝင်ကုန်ပြီလို့ ဒိုင်းဝန်းကွင်းရပ်ကွက် ဒေါ်ရီရီမြင့် ကပြောပါတယ်။

“အခုထက်ထိတော့ ဝင်နေတုန်းပဲ အိမ်ထဲဝင်တယ် အိမ်ထဲ အိမ်အောက်တော့ မြှုပ်တယ်၊ အခုလည်း မိုးတွေတအားကြီးနေတယ်၊ ဒိုင်းဝန်းကွင်းရယ် ကျိုက်ဖနဲရယ် အကုန်လုံး တစ်လမ်းလုံးပြည့်နေတယ်။ (တခြားနေရာလည်း) ကြီးတယ် လမုတန်တို့ ရွှေမြိုင်သီရိတို့၊ ဇေယျာ(၁)တို့တာ အကုန်လုံးမြှုပ်ကုန်ပြီး ဒါတောင် အန်တီတို့က နည်းနည်းမြင့်နေတယ်။”

ဇူလိုင် ၂၅ ရက် မနေ့က တနင်္သာရီတိုင်း၊ လောင်းလုံးမြို့နယ် ကျောက်မော်နီကျေးရွာအုပ်စု အင်းနီးတွင်းရွာမှာ တောင်ကမ်းပါးပြိုကျလို့ လူနှစ်ဦးထိခိုက်ဒဏ်ရာရပြီး နေအိမ် ၆ လုံး မြေမိပြိုကျသွားတယ်လို့ လောင်းလုံးမြို့နယ် အထွေထွေအုပ်ချုပ်ရေးမှူး ဦးအောင်ထိုက်က ဗွီအိုအေကို ပြောပါတယ်။

“မနေ့က မိုးအရမ်းရွာပြီးတော့ မိုးများပြီးတော့ တောင်ပေါ်မြေသားမိပြီးတော့ပြိုကျတာပဲဗျ၊ အိမ်ကတော့ ကျနော်တို့ ၆ လုံး၊ ၆ လုံးဆိုတာက ဓနိမိုးက ၃လုံး၊ သွပ်မိုးက ၃ လုံး၊ အဲ့ဒါတာ မြေမိသွားတာပေါ့၊ ထိခိုက်ဒဏ်ရာကတော့ နှစ်ယောက် ကျနော်တို့ ဟိုနေ့က ခြေထောင်ထိသွားတယ်၊ အဲ့ဒါကတော့ ကျနော်တို့ ထားဝယ်ဆေးရုံပို့ထားတယ်။”

မိုးဇလရဲ့ ဒီကနေ့ ညနေ ၄ နာရီထုတ်ပြန်ချက်အရ တနင်္သာရီတိုင်း၊ရခိုင်ပြည်နယ်၊ ကရင်ပြည်နယ်၊ မွန်ပြည်နယ်တို့ဟာ ဒေသအလိုက်နဲ့ ရန်ကုန်တိုင်း၊ ဧရာဝတီတိုင်း၊ ကချင်ပြည်နယ်နဲ့ ချင်းပြည်နယ်တို့မှာ နေရာကွက်ပြီး ဇူလိုင် ၂၇ ရက်အထိ မိုးဆက်ကြီးနိုင်ကြောင်း ထုတ်ပြန်ထားပါတယ်။


ငြိမ်းချမ်း/ VOA Burmese

https://burmese.voanews.com/a/flood-lower-Myanmar-evacuated-people-from-home-/5979276.html

မြန်မာ့အလုပ်အကိုင် တစ်သန်းလောက်ဆုံးရှုံးပြီး ဆင်းရဲနှုန်း နှစ်ဆတိုးလာမယ်လို့ ကမ္ဘာ့ဘဏ်ထုတ်ပြန်

မြန်မာ့အလုပ်အကိုင် တစ်သန်းလောက်ဆုံးရှုံးပြီး ဆင်းရဲနှုန်း နှစ်ဆတိုးလာမယ်လို့ ကမ္ဘာ့ဘဏ်ထုတ်ပြန် ဆင်ရဲနွမ်းပါးတဲ့ ပြည်သူများကို တွေ့ရစဉ် / Photo - AFP

စစ်အာဏာသိမ်းမှုနဲ့ ကိုဗစ်ကပ်ရောဂါရဲ့ ဒဏ်ကြောင့် မြန်မာနိုင်ငံမှာ ဆင်းရဲနွမ်းပါးမှုနှုန်း နှစ်ဆ မြင့်တက် သွားနိုင်တယ်လို့ ကမ္ဘာ့ဘဏ်က အစီရင်ခံစာတစ်စောင် ဇူလိုင်လ ၂၅ ရက်နေ့မှာ ထုတ်ပြန်လိုက်ပါတယ်။

မြန်မာပြည်သူတွေအတွက် အလုပ်အကိုင် တစ်သန်းလောက် ဆုံးရှုံးနိုင်တယ်လို့လည်း ကမ္ဘာ့ဘဏ်ရဲ့ မြန်မာ စီးပွားရေး စောင့်ကြည့်မှု အစီရင်ခံစာမှာ ဖော်ပြထားပါတယ်။ စီးပွားရေးအခြေအနေဟာလည်း လာမယ့်နှစ်မှာ ၁၈ ရာခိုင်နှုန်းလောက်ထိ ကျုံသွားနိုင်ပြီး ဒီပမာဏာဟာ အာဏာမသိမ်းခင်နဲ့ ကိုဗစ်ရောဂါမဖြစ်ခင် အခြေအနေက ရှိခဲ့တဲ့ စီးပွားရေး ပမာဏထက် ၃၀ ရာခိုင်နှုန်း ပိုသေးငယ်သွားမယ်ကို ဆိုလိုတာဖြစ်ပါတယ်။

ပြီးခဲ့တဲ့ NLD အစိုးရ လက်ထက် ၂၀၂၀ ခုနှစ်အတွင်း ကိုဗစ်ဒဏ်ကြောင့် ထိခိုက်ခဲ့ရတဲ့ မြန်မာ့စီးပွားရေးဟာ လာမယ့် ၂၀၂၁ ခုနှစ်မှာ ပြန်နလန်ထူလာနိုင်တယ်လို့ ကမ္ဘာ့ဘဏ်က အရင်က ခန့်မှန်းပြောဆိုခဲ့ဖူးတာ ဖြစ်ပါတယ်။

ဒါပေမဲ့ မြန်မာနိုင်ငံမှာ ဖေဖော်ဝါရီလ ၁ ရက်နေ့က စစ်အာဏာသိမ်းမှုဖြစ်ခဲ့ပြီးနောက် ကိုဗစ်ရောဂါတွေလည်း မထိန်းချုပ်နိုင်တော့ဘဲ ပြန်လည်ဆိုးလာတာကြောင့် မြန်မာ့စီးပွားရေးဟာ ပိုပိုဆိုးလာတဲ့ အခြေအနေကို ဦးတည်လာနေကြောင်း ကမ္ဘာ့ဘဏ်ရဲ့ အစီရင်ခံစာမှာ တွေ့ရပါတယ်။

အလုပ်လက်မဲ့ဖြစ်ပြီး ဝင်ငွေ ဆုံးရှုံးတဲ့ဒဏ်၊ ကျန်းမာရေးနဲ့ အစားအသောက် မလုံလောက်တဲ့ ဒဏ်တွေကို ချို့တဲ့သူတွေ၊ အဆင်းရဲဆုံး ပြည်သူတွေ ပိုခံရမယ်လို့ ကမ္ဘာ့ဘဏ်ကိုယ်စားလှယ်က အစီရင်ခံစာမှာ ပြောထား ပါတယ်။ ပြည်တွင်းက ဆန္ဒပြမှုတွေ၊ အလုပ်သမားပြတ်တောက်မှုတွေ၊ ဆက်သွယ်ရေး ဝန်ဆောင်မှုတွေနဲ့ ကျန်းမာရေး ပညာရေး ယိုယွင်း ပျက်စီးမှုတွေကြောင့် စီးပွားရေး အဓိက ထိခိုက်နေရတယ်လို့ ကမ္ဘာ့ဘဏ်က ပြောပါတယ်။

ဘဏ်လုပ်ငန်းတွေ ပြန်ဖွင့်နေနိုင်ပြီဆိုပေမယ့် ငွေကြေးဝန်ဆောင်မှုမှာ လိုအပ်ချက်တွေ ဆက်ရှိနေဆဲလို့ ဆိုပါတယ်။ လယ်ယာစိုက် တောင်သူတွေလည်း ထွက်ကုန်ရောင်းရငွေ စျေးနှုန်းကျဆင်းတာ စိုက်ပျိုးချေးငွေ မရတဲ့ဒဏ်တွေကို ခံစားနေရတယ်လို့ ပြောထားပါတယ်။

လတ်တလော မြန်မာပြည်ရဲ့ အခြေအနေတွေဟာ ပြီးခဲ့တဲ့ ၁၀ စုနှစ်အတွင်းရခဲ့တဲ့ တိုးတက်ပြောင်းလဲမှုတွေကို ခြိမ်းခြောက်နေတယ်လို့လည်း ကမ္ဘာ့ဘဏ်က ပြောဆိုထားပါတယ်။


RFA Burmese

https://www.rfa.org/burmese/news/myanamar-business-decline-07262021061910.html

မင်းတပ်က စစ်ကောင်စီတပ်သားအယောက် ၂၀ CDF နဲ့ ပူးပေါင်း

မင်းတပ်က စစ်ကောင်စီတပ်သားအယောက် ၂၀ CDF နဲ့ ပူးပေါင်း မင်းတပ်မြို့နယ်ရှိ မကွီးအိမ်နူးမြို့က လက်နက်ချခဲ့တဲ့ စစ်ကောင်စီတပ်သားတွေရဲ့ လက်နက်တွေကို တွေ့ရစဥ် / Photo CJ

ချင်းပြည်နယ် မင်းတပ်မြို့နယ်ရှိ မကွီးအိမ်နူးမြို့က စစ်ကောင်စီနဲ့ ရဲတပ်ဖွဲ့ဝင်တွေရဲ့ ပူးပေါင်းကင်းစခန်း တစ်ခုက စစ်ကောင်စီတပ်ဖွဲ့ဝင် အယောက် ၂၀ တို့ဟာ ဇူလိုင် ၂၄ ရက်နေ့က လက်နက်ခဲယမ်းတွေနဲ့အတူ မင်းတပ်ဒေသ ကာကွယ်ရေး CDF အဖွဲ့ နဲ့ ပူးပေါင်းလိုက်ကြပါတယ်။

အဲဒီစခန်းကို မင်းတပ် CDF အဖွဲ့က လက်နက်ချဖို့နဲ့ လက်နက်မချရင် တိုက်ခိုက်ရလိမ့်မယ်လို့ ပြောခဲ့ချိန်မှာ စခန်းက ဗိုလ်ကြီးအဆင့်နဲ့ တာဝန်ရှိသူက လက်နက်ချဖို့ သဘောတူညီခဲ့ပြီး လက်နက်တွေနဲ့အတူ ပူးပေါင်း ခဲ့တယ်လို့ CDF တပ်ဖွဲ့ဝင်တစ်ဦးက RFA ကို ပြောပါတယ်။

အဲဒီကင်းစခန်းမှာရှိတဲ့ ခမ၇ ၂၇၄ ဗိုလ်ကြီးသိန်းထိုက် အပါအဝင် စစ်သား ၁၀ ယောက် နဲ့ ရဲဝန်ထမ်း ၁၀ ယောက် စုစုပေါင်း အယောက် ၂၀ တို့က CDM အာဏာဖီဆန်ရေးလုပ်ကာ မင်းတပ် CDF အဖွဲ့နဲ့ ပူးပေါင်း ခဲ့ကြပြီး CDM မှာ မပါဝင်ချင်တဲ့ ငါးဦးကိုတော့ ပြန်လွှတ်ပေးခဲ့တယ်လို့လည်းဆိုပါတယ်။

မင်းတပ်မြို့ရှိ မကွီးအိမ်ကင်းစခန်းကို စစ်ကောင်စီတပ်က ရိက္ခာလစာ မထောက်ပံ့တာ နှစ်လအထိ ရှိနေပြီလို့လည်း သိရပါတယ်။


RFA Burmese

https://www.rfa.org/burmese/news/20-soldiers-surrender-to-cdf-07262021062004.html

ကိုဗစ်စင်တာအတွင်း ရေကြီးရေလျှံ မှုကြောင့် အောက်ဆီဂျင်ပေးနေရသည့် လူနာများ ရေလွတ်ရာသို့ အရေးပေါ် ပြောင်းရွှေ့ခဲ့ရ


ဇူလိုင် ၂၆ ရက် ၂၀၂၁ ခုနှစ်။ ကေအိုင်စီ

ကရင်ပြည်နယ် မြဝတီမြို့  အမှတ် ၄ ရပ်ကွက်ရှိ ရွှေမြဝတီ ကိုဗစ်စင်တာအတွင်း ရေကြီးရေလျှံမှု ဖြစ်ပွားခဲ့၍ အောက်ဆီဂျင်ပေးရှူနေရသည့် လူနာများ ရေလွတ်ရာသို့ အရေးပေါ် ပြောင်းရွှေ့နေရသည်။

ယနေ့ ဇူလိုင်လ ၂၆ ရက်နေ့က မိုးအဆက်မပြတ်ရွာသွန်းခဲ့မှုကြောင့် ရွှေမြဝတီ ကိုဗစ်စင်တာအတွင်း ရေကြီးရေလျှံမှုဖြစ်ပွားခဲ့၍ မွန်းလွဲ ၃ နာရီခန့်က အောက်ဆီ ဂျင် ပေးရှူနေရသည့် လူနာ ၁၀၀ ဝန်းကျင်ခန့်ထားရှိရာ လူနာဆောင်မှာ ရေဝင် ရောက်မှုကြောင့် လူနာများအား တဖက်ရေလွတ်ရာ အဆောင်သို့ အရေးပေါ် ပြောင်းရွှေ့ခဲ့ရသည်။

ထို့အပြင် ထိုင်း-မြန်မာ နယ်ခြား သောင်ရင်းမြစ်ရေမှာ ယနေ့တွင် စိုးရိမ်ရေ အမှတ်ထက် ကျော်လွန်ပြီး မြစ်ရေလျှံမှုကြောင်း မြစ်ကမ်းအနီး အနိမ့်ပိုင်းရပ် ကွက်များရှိ လူနေအိမ်ခြေ ၅၀၀ ကျော် ရေဘေးဒုက္ခခံနေရပြီး ဘေးလွတ်ရာသို့ တိမ်းရှောင်နေရသည်။

ယနေ့ ညပိုင်း ဆက်လက်၍ မိုးသည်းထန်စွာရွာသွန်းမည်ဆိုပါက ရွှေမြဝတီ ကိုဗစ်တာတွင် လူနာများ ဆက်လက်နေထိုင်၍ အခက်အခဲ ရှိနိုင်ပြီး ရေ ဘေးလွတ်ရာတွင် ကိုဗစ်စင်တာအသစ်အရေးပေါ် ထပ်မံဖွင့်လှစ်ထားရန် လိုအပ်ကြောင်း လူနာရှင်တစ်ဦးက ပြောသည်။

"အခု ပြောင်းထားပေးတဲ့နေရာ ရေထပ်ရောက်လာဖို့က  ၁ ပေခန့်ပဲ လိုတာပါ။ ဒီည မိုးထပ်ပြီးများရင် ဒီ စင်တာမှာ ဆက်လက်နေထိုင်၍ မရနိုင်တော့ဘူး။ တာဝန်ရှိသူတွေအနေနဲ့ ရေလွတ်ရာ နေရာသစ်မှာ ကိုဗစ်စင်တာ ထပ်ဖွင့်ဖို့ ကြိုတင်စီစဉ်ထားဖို့ လိုပါတယ်" ဟု ၎င်း လူနာရှင်က ဆိုသည်။ 

မြဝတီမြို့တွင် ကိုဗစ်စင်တာ သုံးခု ရှိပြီး ကိုဗစ်အတည်ပြုလူနာ ၆၀၀ ဝန်းကျင်ခန့်ကို စောင့်ကြည့် ကုသပေးလျက်ရှိရာ အရေးပေါ် လူနာများကိုမူ မြဝတီခရိုင်ပြည်သူ့ ဆေးရုံနှင့် သင်္ကန်းညီနောင်တိုက်နယ် ဆေးရုံတွင် ကုသပေးလျက်ရှိသည်။

လက်ရှိ ကိုဗစ်စင်တာများတွင် အောက်ဆီဂျင် မလုံလောက်မှုကြောင့် မကြာခဏ  အခက်ကြုံရမှုများ ရှိနေသလို စင်တာတွင်လူနာထားရန် နေရာမရှိတော့၍ ပြင်ပလူမှုကယ်ဆယ် ရေးအဖွဲ့အစည်းများနှင့် နေအိမ်တွင် အောက်ဆီဂျင်ပေး ရှူနေရသည့် လူနာများမှာ အောင်ဆီဂျင် ရရှိရေးအတွက် နေ့စဉ် လုံးပန်းနေရကြောင်း သိရသည်။


Karen Information Center -KIC

https://www.facebook.com/KICNewsPage

သဲကုန်းမြို့နယ်ထဲမှာ ပေါက်ကွဲမှုဖြစ်၊ လူငယ် နှစ်ဦး‌သေဆုံး

ကိုရှိုင်းကိုကို သေဆုံးတဲ့ အပေါ် သာယာဝတီစိုက်ပျိုးသိပ္ပံကျောင်းသားများသမဂ္ဂမှအလေးနီပြုကြောင်း ထုတ်ပြန်

ပေါက်ကွဲမှုကြောင့် အနားက ကိုရှိုင်းကိုကို အကိုဖြစ်သူပါ ထိခိုက် သေဆုံးသွားတယ်လို့ ဒေသခံတွေက ပြော

သာယာ၀တီ စိုက်ပျိုးရေး သိပ္ပံ ကျောင်းဆင်း တစ်ယောက် ဖြစ်တဲ့ ကိုရှိုင်းကိုကို နဲ့ အကိုဖြစ်သူတို့ ဇူလိုင်လ ၂၄ရက်နေ့ ည ၁၀နာရီ ခွဲမှာ ပေါက်ကွဲမှုကြောင့် သေဆုံးသွားတယ်လို့ စိုက်ပျိုးရေးသိပ္ပံ သာယာ၀တီ ကျောင်းသားများ သမဂ္ဂ ပြင်ပဆက်သွယ်ရေးတာဝန်ခံက ဘီဘီစီကို အတည်ပြုပါတယ်။

ကိုရှိုင်းကိုကို ဟာ ၂၀၁၉ ခုနှစ်တုန်းက စိုက်ပျိုးရေး သိပ္ပံ သာယာ၀တီ ကနေ ဘွဲ့ရခဲ့သူ တယောက် ဖြစ်တယ်လို့ သာယာ၀တီ ကျောင်းသားများ သမဂ္ဂ ပြင်ပဆက်သွယ်ရေးတာဝန်ခံက ဆိုပါတယ်။

မနေ့ည ဇူလိုင် ၂၄ ရက်နေ့ညကတော့ လက်လုပ်မိုင်းတစ်ခု စမ်းသပ်ရင်း ပေါက်ကွဲမှု ဖြစ်ခဲ့ပြီး အနီးက သူ့အကို ဖြစ်သူပါ ထိမှန် သေဆုံးသွားတယ်လို့ ဒေသခံတွေဆီကတစ်ဆင့် သိရကြောင်း ကျောင်းသားများ သမဂ္ဂ ပြင်ပဆက်သွယ်ရေးတာ၀န်ခံက ပြောပါတယ်။

သူတို့ သေဆုံးမှုနဲ့ ပတ်သက်လို့ ဒေသတွင်း လူမှုကူညီရေး အသင်းတစ်ခုကလည်း မနေ့ညက အလောင်း၂လောင်း သွားကောက်ခဲ့ရကြောင်း အတည်ပြု ပြောဆိုထားပါတယ်။

ဒါပေမဲ့ သူတို့ဟာ လက်လုပ်ဗုံး စမ်းရင်း သေဆုံးမှု ဟုတ်ရဲ့လား ဆိုတာကိုတော့ ဘီဘီစီ အနေနဲ့ သီးခြား အတည်ပြုချက် ရယူနေဲ ဖြစ်ပါတယ်။

လတ်တလော ပြည်နဲ့ လက်ပံတန်းက ကျောင်းသား သမဂ္ဂ အဖွဲ့၀င် ကျောင်းသားတွေ ပြီးခဲ့တဲ့ တစ်ပတ်အတွင်း အဖမ်းခံရတာ ၁၀ယောက် အထိ ရှိလာပြီ ဖြစ်ပါတယ်။

ကိုရှိုင်းကိုကိုဟာ မြန်မာနိုင်ငံမှာ စစ်အာဏာသိမ်းမှု ဖြစ်ပွားခဲ့ပြီးနောက် လွန်ခဲ့တဲ့ လပိုင်းတွေအတွင်း စစ်သင်တန်း တက်ရောက်ပြီး ပြန်ရောက်လာသူ တစ်ယောက် ဖြစ်တယ်လို့လည်း သူနဲ့ အတူ ကျောင်းတက်ခဲ့သူတစ်ဦးက ပြောပါတယ်။


BBC Burmese

https://www.bbc.com/burmese/live/burma-57783160

စစ်ကောင်စီ ထုတ်ပြန်တဲ့ ကိုဗစ် ရောဂါသေဆုံးသူ အရေအတွက် ထပ်တိုး

ဇူလိုင်လ ၁၉ ရက် ရန်ကုန် ရေဝေးသုသာန်မှာ တန်းစီစောင့်နေတဲ့ နာရေးကားများ

မန္တလေးမြို့ရှိ ကိုဗစ်ကြောင့်သေဆုံးခဲ့သူတွေ နာရေးအတွက်ကူညီပေးနေတဲ့ပရဟိတအဖွဲ့များ

စစ်ကောင်စီက ထုတ်ပြန်တဲ့ ကိုဗစ်ရောဂါနဲ့ သေဆုံးသူအရေအတွက် ဟာ ဒီကနေ့ ဇူလိုင် ၂၅ ရက်‌နေ့မှာ ၃၅၅ ဦးလို့ ထုတ်ပြန်ခဲ့ပြီး မနေ့ကထက် တိုးလာတာကို တွေ့ရပါတယ်။

ဇူလိုင်လ ၂၅ ရက်နေ့အထိ မြန်မာတစ်နိုင်ငံလုံး ကိုဗစ်ရောဂါ ကူးစက်မှုကြောင့် သေဆုံးသူ စုစုပေါင်း ၇၁၁၁ ဦး အထိရှိလာပြီဖြစ်ပါတယ်။

နေ့အလိုက် စစ်ကောင်စီ ထုတ်ပြန်တဲ့ သေဆုံးသူအရေအတွက်မှာ ဇူလိုင်၂၄ ရက်ထုတ်ပြန်ချက်က ၂၉၇ ဦးရှိပြီး ဇူလိုင် ၂၅ ရက်‌နေ့မှာ ၃၅၅ ဦး အထိရောက်လာပြီး နေ့အလိုက် တိုးလာခဲ့တာလည်းဖြစ်ပါတယ်။

စစ်ကောင်စီက ထုတ်ပြန်တဲ့သေဆုံးသူ အရေအတွက်နဲ့ အပြင်မှာ သေဆုံးတဲ့ အရေအတွက်ဟာ ကွာခြားမှုတွေရှိနေပြီး ကျန်းမာရေးဝန်ကြီးဌာနက တာဝန်ရှိသူတစ်ဦးကတော့ စစ်ကောင်စီထုတ်ပြန်တဲ့ သေဆုံးသူအရေအတွက်ဟာ ဆေးရုံတွေမှာ သေဆုံးတဲ့ သူတွေအရေအတွက်ဖြစ်တယ်လို့ သူရဲ့ လူမှုကွန်ရက်စာမျက်နှာမှာ ရေးသားခဲ့ပါတယ်။

ဇူလိုင် ၂၅ ရက်နေ့ စစ်ဆေးသူ ၁၂၄၇၄ ဦး အနက်ရောဂါပိုးတွေ့သူ၄၉၉၈ ဦး ဖြစ်ပြီး ပိုးတွေ့ရာနှုန်း ၄၀ ရာခိုင်နှူန်း အထိရှိလာကာမြန်မာနိုင်ငံမှာ ကိုဗစ် ပိုးတွေ့သူ စုစုပေါင်း ၂၆၉၅၂၅ ဦး ရှိပြီလို့ လည်း စစ်ကောင်စီက ထုတ်ပြန်သွားခဲ့ပါတယ်။


BBC Burmese

https://www.bbc.com/burmese/live/burma-57783160

နာရေးရော ရှင်ရေးအတွက်ပါ လူမှုကူညီရေးအဖွဲ့တွေအခက်ကြုံ

Volunteers wearing personal protective suits prepare to bury a body of a person who died from the coronavirus disease (COVID-19), at a cemetery in Yangon, Myanmar, October 17, 2020. REUTERS/Shwe Paw Mya Tin

ကိုဗစ် ၁၉ ရောဂါကူးစက်မှုတွေနဲ့ သေဆုံးမှုတွေများလာနေတဲ့အတွက် နာရေးမီးသင်္ဂြိုဟ်တဲ့နေရာနဲ့ လူနာတွေအတွက် အောက်ဆီဂျင်ရရှိနိုင်ဖို့ အခက်အခဲတွေကို အကြီးအကျယ်ရင်ဆိုင်နေရတယ်လို့ နိုင်ငံတဝန်းက လူမှုကူညီရေးအသင်းအဖွဲ့တွေက ပြောပါတယ်။ ဒီအကြောင်း ဆက်သွယ်စုံစမ်းထားတဲ့ ကိုရန်နိုင်က တင်ပြပေးထားပါတယ်။

မြန်မာနိုင်ငံမှာဖြစ်နေတဲ့ ကိုဗစ် ၁၉တတိယလှိုင်းအတွင်း ရောဂါကူးစက်မှုတွေနဲ့ သေဆုံးမှုတွေများလာနေတာနဲ့အမျှ လူမှုကူညီရေး ပရဟိတအဖွဲ့တွေ အတော်များများလည်း အရင်ကထက် အခက်အခဲတွေရှိလာနေပါတယ်။ ရန်ကုန်မှာဆိုရင် ဗိုင်းရပ်စ်နဲ့ ပတ်သက်ပြီး ရောဂါကူးစက်ခံရသူတွေအတွက် ဆေးရုံတက်ခွင့်ရဖို့၊ အောက်ဆီဂျင်ရဖို့ အခက်အခဲတွေ အကြီးအကျယ်ရှိနေသလို တဘက်မှာလည်း ဗိုင်းရပ်စ်ကူးစက်မှုတွေကြောင့် သေဆုံးသွားတဲ့သူတွေကို သဂြိုဟ်ဖို့ နာရေးအကူအညီပေးတဲ့နေရာမှာလည်း အခက်အခဲတွေ ဖြစ်လာနေတာပါ။ ဗိုင်းရပ်စ်ကြောင့် သေဆုံးမှုတွေက များလာနေတဲ့အတွက် သုဿန်တွေမှာလည်း သေဆုံးတဲ့ရုပ်အလောင်းတွေကို ပို့ဆောင်တဲ့ကားတွေ အရင်ကထက် ပိုများလာတာကြောင့် ပို့ဆောင်တဲ့နေရာမှာ ကြန့်ကြာမှုတွေရှိလာနေတယ်လို့ လှိုင်သာယာမြို့နယ်က မေတ္တာအလင်းရောင် ပရဟိတအသင်းရဲ့ ဥက္ကဋ္ဌ ကိုကျော်ဦးမောင်က ပြောပါတယ်။

“တခါတလေ ထိန်ပင် (သုဿန်) မှာ အချိန်နည်းနည်း ကြန့်ကြာပြီး တန်းစီပြီး စောင့်ရတာတွေရှိပါတယ်။ အဲဒါမျိုးဆိုရင် ကျနော်တို့ ဒီဘက်က အလောင်းသယ်တဲ့နေရာမှာ နည်းနည်းလေးကြန့်ကြတာတွေရှိပါတယ်ဗျ။ အဲဒီတော့ ကာယကံရှင်တွေကို ပြန်ပြောရပါတယ်။ ဒီနေ့ မသယ်နိုင်တဲ့အတွက် နောက်နေ့မှာ သယ်ပေးပါ့မယ်ဆိုပြီး ဒါမျိုးလေးတွေပေါ့။ အရင်တုန်းကဆိုရင် မနက်ပိုင်းတင် ၄၊ ၅၊ ၁၀ ခေါက်လောက် အကူအညီတောင်းသမျှကို အကူအညီပေးနိုင်တယ်။ အခုဒီကိုဗစ်လှိုင်းမလာခင်ကပေါ့။ အခုကျတော့ အဲဒီလိုမဟုတ်ဘဲနဲ့ ဒီကနေသယ်သွားတယ်။ ဟိုရောက်တော့ နည်းနည်းလေးတန်းစီရတဲ့အခါကျတော့ အချိန်က နာရီဝက်၊ တနာရီ ကြာသွားတယ်။ အဲဒီလိုကြာသွားတဲ့အခါကျတော့ ၃-၄ ခေါက်ရမယ့် နေရာက ၁ ခေါက်ပဲ ရတယ်။ ၂ ခေါက်ပဲရတယ်။ ဒီလောက်ပါခင်ဗျ။”

ရန်ကုန်တိုင်း လှိုင်သာယာမြို့နယ်က ကိုဗစ်-၁၉အရေးပေါ်တုံံ့ပြန်မှုအဖွဲ့ကတော့ ဗိုင်းရပ်စ်ကူးစက်ခံရတဲ့ ရောဂါဝေဒနာရှင်တွေအတွက် ဗိုင်းရပ်စ်ကူးစက်ခံရခြင်းရှိ မရှိ စစ်ဆေးတာ၊ ဆေးရုံပို့ဆောင်ပေးတာ၊ အောက်ဆီဂျင်တွေ ဖြည့်ပြီး လိုအပ်နေတဲ့သူတွေကို ပေးနေတာဖြစ်ပါတယ်။ လူနာတွေကို ဆေးရုံပို့တဲ့အခါမှာ ဆေးရုံက လက်မခံနိုင်လို့ စောင့်ဆိုင်းရတာတွေအပြင် အဓိကရင်ဆိုင်နေရတဲ့ အခက်အခဲကတော့ အောက်ဆီဂျင်ရဖို့အခက်အခဲဖြစ်တယ်လို့ အဲဒီအသင်းတာဝန်ရှိသူတဦးကပြောပါတယ်။

“အကူအညီပေးတာကတော့ ကျနော်တို့ လှိုင်သယာလူဦးရေအနေအထားနဲ့ဆိုရင် နိုင်တာလည်း မတွေ့ရဘူး။ ကျနော်တို့ ကူညီပေးတာက အရင်တုန်းကဆိုလိုရှိရင် စက်ရုံတွေမှာ ညလုံးပေါက်တွေ သွားတိုးတယ်။ ညလုံးပေါက်တိုးပေးပြီး ရလာတဲ့ အောက်ဆီဂျင်တွေကို ကျနော်တို့ကနေ လူတဦးလျှင် ၁၀ လီတာ သို့မဟုတ် ၁၅ လီတာအထိ တအိုး၊ တအိုးဆီ ကျနော်တို့ ဖြည့်ပေးပါတယ်။ အဓိကအခက်အခဲကတော့ စက်ရုံတွေမှာ တချို့လူပုဂ္ဂိုလ်တွေက မိမိရဲ့မလိုအပ်ဘဲနဲ့ ဆောင်ထားတဲ့ အတိုင်းအတာတွေရှိပါတယ်။ နောက်တခါ စျေးကွက်မှာဆိုလို့ရှိရင်လည်း မလိုအပ်ဘဲ လူတွေက အတင်းဝယ်တဲ့ဟာလေးတွေလည်း တွေ့ရပါတယ်။ တချို့ဆောင်ထားတာပေါ့နော်။ ကြိုတင်ဆောင်ထားတဲ့ ပုံစံလေးတွေလည်း တွေ့ရတယ်။ ကျနော်တို့ထင်ထားတာကတော့ မပေးနိုင်တာလည်း မပေးနိုင်တာတကြောင်း၊ အဲဒီလိုလေးတွေလည်း ဆောင်ထားတာလေးတွေ တွေ့ရတဲ့အတွက် လိုအပ်နေတဲ့ ညီအစ်ကို မောင်နှမတွေ၊ မိသားစုတွေမှာ အခက်အခဲပိုရှိလာတယ်လို့ ကျနော်တို့ထင်ပါတယ်။”

အခုအခါမှာ ရောဂါကူးစက်မှုတွေအပြင် ပြည်သူတွေဘက်မှာလည်း စီးပွားရေးအခက်အခဲတွေနဲ့ အထွေထွေအကြပ်အတည်းတွေကြောင့် PPE ဝတ်စုံအပါအဝင် ရောဂါကာကွယ်ရေးပစ္စည်းတွေ၊ လူနာတင်ယာဉ်အတွက် ဓါတ်ဆီ စတာတွေအတွက် ရံပုံငွေ အခက်အခဲတွေလည်း အနည်းငယ်ရှိလာနေတယ်လို့ သူကဆက်ပြောပါတယ်။

ရောဂါကူးစက်မှုတွေများနေတဲ့ မွန်ပြည်နယ် မော်လမြိုင်မြို့မှာလည်း ကိုဗစ် ၁၉နဲ့ ပတ်သက်ပြီး အကူအညီပေးနေတဲ့ ပရဟိတအသင်းတွေ အဓိကရင်ဆိုင်နေရတာကတော့ ရောဂါကူးစက်ခံနေရတဲ့ လူနာတွေအတွက် အောက်ဆီဂျင်ရရှိဖို့ အခက်အခဲဖြစ်နေတာပါ။ မော်လမြိုင်ဆေးရုံအပြင် မြို့မှာ နောက်ထပ် အောက်ဆီဂျင်ထုတ်ယူနိုင်တဲ့ နေရာ ၂ နေရာပဲရှိတာကြောင့် လူနာတွေအတွက် အောက်ဆီဂျင်အလုံအလောက်ရဖို့ အခက်အခဲရှိတယ်လို့ မော်လမြိုင်လူမှုကယ်ဆယ်ရေးအသင်းက ကိုကျော်စွာဟိန်းက ပြောပါတယ်။

“အခုဟာက- အောက်ဆီဂျင်လေး ဒီထက်နည်းနည်းပို လွယ်လွယ်ကူကူရလို့ရှိလျှင် ပိုအဆင်ပြေတယ်ဗျ။ သူများကို ဖြန့်ဖြူးတာဖြစ်တဲ့အတွက် ကျနော်တို့လည်း တန်းသွားစီရတာ။ များသောအားဖြင့် ကျနော်တို့ရွာကကလေးတွေက ညနေ ၄ နာရီလောက်က တန်းစီလိုက်ရင် မနက် ၄ နာရီခွဲ ၅ နာရီလောက်မှ ပြန်ရောက်တယ်ဗျ။ အောက်ဆီဂျင်တခါရဖို့အတွက်ပေါ့။ ကျနော်တို့ကို အပြင်မှာပေးတာက အတ္တရံ တံတားကိုကူးပြီးသွားတဲ့ စက်မှုဇုန်အဟောင်းမှာ ဖြည့်တဲ့စက်ရုံနဲ့ ဒီဘက်စက်မှုဇုန်ဘက်မှာ အသစ် သံလွင်ဆိုတဲ့ ၂ ရုံရှိပါတယ်ခင်ဗျာ။ ကျနော်တို့အဲဒီမှာ တလှည့်စီတန်းစီရပါတယ်ဗျ။”

စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကတော့ တိုင်းပြည်တွင်းမှာ လူနာတွေကိုပေးဖို့အတွက် အောက်ဆီဂျင်တွေ အလုံအလောက်ရှိတယ်လို့ ပြီးခဲ့တဲ့ သီတင်းပတ်တွေအတွင်း ပြောထားပါတယ်။ NLD အစိုးရလက်ထက် ကိုဗစ် ပထမလှိုင်းနဲ့ ဒုတိယလှိုင်းမှာ ရောဂါကူးစက်မှုတွေကို အတိုင်းအတာတခုအထိ အတော်လေး ထိန်းချုပ်နိုင်ခဲ့ပေမယ့် အခုတကြိမ် ကိုဗစ် တတိယလှိုင်းမှာတော့ ကူးစက်မှုတွေနဲ့ သေဆုံးမှုတွေအလွန်များလာနေပြီး မနေ့စနေနေ့ကအထိ ဗိုင်းရပ်စ်ကူးစက်သူ ၂ သိန်း ၆ သောင်းကျော်နဲ့ သေဆုံးသူ ၆,၇၀၀ ကျော်ရှိသွားပြီဖြစ်တယ်လို့ စစ်ကောင်စီရဲ့ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။


ရန်နိုင်/ VOA Burmese

https://burmese.voanews.com/a/myanmar-yangon-covid-oxygen-voaburmese-yannaing/5978419.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ