"အများပြည်သူနေရာ ဖောက်ခွဲမှုမလုပ်" - NUG



Share/Bookmark
အမျိုးသားညီညွတ်ရေးအစိုးရ (NUG)

PDF ပြည်သူ့ကာကွယ်ရေးတပ်တွေအနေနဲ့ ပြည်သူလူထုအပေါ် အကြမ်းဖက်တာတွေမလုပ်ဖို့ ကျင့်ဝတ်သတ်မှတ်ထားပြီး အများပြည်သူနဲ့သက်ဆိုင်ရာ စာသင်ကျောင်း စျေး စတာတွေမှာ ဖောက်ခွဲမူတွေမလုပ်ခဲ့ဘူးလို့ ကြားကာလအမျိုးသားညီညွှတ်ရေးအစိုးရ NUG က ပြောပါတယ်။ တပ်မတော်သားတွေကိုလည်း ဒီမိုကရေစီအရေးလူပ်ရှားမူမှာ ပြည်သူတွေနဲ့ ပူးပေါင်းပါဝင်ဖို့ NUG က သဘောထား ထုတ်ပြန်ထားပြီးပြီလို့ အွန်လိုင်းကနေ ပထမဆုံးအကြိမ်အဖြစ် ဒီကနေ့လုပ်တဲ့ သတင်းစာရှင်းလင်းပွဲအတွင်း NUG တာဝန်ရှိသူတွေကပြောသွားပါတယ်။ သတင်းစာရှင်းလင်းပွဲကို ကိုယ်တိုင်တက်ခဲ့တဲ့ ကိုဝင်းမင်းက ဆက်ပြောပြပါမယ်။

မြန်မာနိုင်ငံတွင်း လက်ရှိပေါက်ကွဲမူတွေနဲပတ်သက်ပြီး အကြမ်းဖက်လို့ ပုံဖော်လိုသူတွေက စွပ်စွဲတာသာဖြစ်တယ်လို့ NUG ရဲ့ နိုင်ငံခြားရေးဌာန ဒုတိယဝန်ကြီး ဦးဇော်မိုးဦးက တုံ့ပြန်ပြောဆိုသွားပါတယ်။

“ပြည်သူ့ကာကွယ်ရေးတပ်မတော် PDF People’s Defence Forces ရဲ့အခြေခံမူဝါဒတွေ၊ စစ်သည်တော် ကျင့်ဝတ်စည်းမျဉ်းတွေ၊ နောက်တခါ စစ်သုံ့ပန်းတွေအပေါ် ပြုကျင့်ရမယ့်ကျင့်ဝတ်တွေ၊ နောက် အရပ်သားပြည်သူတွေနဲ့ဆက်ဆံရာမှာ လိုက်နာရမယ့်ကျင့်ဝတ်တွေ၊ အမျိုးသမီးနဲ့ကလေးသူငယ်တွေအပေါ်လိုက်နာရမယ့်ကျင့်ဝတ်တွေ စတဲ့ အဲလိုကျင့်ဝတ်တွေပါဝင်တဲ့ ပြည်သူ့ကာကွယ်ရေးတပ်မတော်ရဲ့ စစ်ဘက်ဆိုင်ရာကျင့်ဝတ်တွေကို ထုတ်ပြန်ကြေညာခဲ့ပါတယ်။ အဲဒီကျင့်ဝတ်တွေအရဆိုရင် ပြည်သူ့ကာကွယ်ရေးတပ်မတော်က ပြည်သူလူထုအပေါ်ကို အကြမ်းဖက်မှုတွေကို လုံးဝလက်မခံပါဘူး။ ပြည်သူလူထုအပေါ်မှာ အကြမ်းဖက်တဲ့လုပ်ရပ်တွေဟာ ပြည်သူ့ကာကွယ်ရေးတပ်မတော်နဲ့လုံးဝမပတ်သက်ပါဘူး။ ဥပမာအားဖြင့် - စာသင်ကျောင်းတွေ၊ ဆေးရုံတွေ၊ စျေးတွေ စသဖြင့် အများပြည်သူနဲ့သက်ဆိုင်တဲ့နေရာတွေမှာ အကြမ်းဖက်တဲ့ ဗုံးခွဲတဲ့ အဲဒီလုပ်ရပ်တွေဟာ အမျိုးသားညီညွတ်ရေးအစိုးရနဲ့ လုံးဝမသက်ဆိုင်ဘူးဆိုတာကို အတိအလင်းပြောလိုပါတယ်။”

ဒီသတင်းစာရှင်းပွဲမှာ ကာကွယ်ရေးကိစ္စ ဦးဆောင်ဖြေကြားခဲ့တဲ့ ကာကွယ်ရေး ဒုဝန်ကြီး ဒေါ်ခင်မမမျိုးကလည်း NUG အနေနဲ့ စစ်သင်တန်းတွေလုပ်ဆောင်နေပေမဲ့ ပြည်သူအပေါ်အကြမ်းဖက်နေတဲ့ စစ်အုပ်စုကို ပြည်သူနဲ့အတူကာကွယ်သွားဖို့သာဖြစ်တယ်၊ စစ်ရေးရည်မှန်းချက်နဲ့ပဲလုပ်သွားပြီး အရပ်သားပြည်တွေနဲ့ပိုင်ဆိုင်မူတွေကို မထိခိုက်စေရဘူးလို့ ကတိပြုလိုက်ပါတယ်။

“စစ်သည်တော်ကျင့်ဝတ်တွေကို ကျမတို့ တခါတည်းဖော်ပြထားပါတယ်။ စစ်ရေးရည်မှန်းချက်များအဖြစ်သာ တိုက်ပွဲဖော်ဆောင်ရမယ်။ စစ်ဆင်ရေးဆင်နွဲရာမှာ လိုအပ်တဲ့ အင်အားကိုအသုံးပြုပြီး ထိခိုက်ပျက်စီးမှုအနည်းဆုံးဖြစ်စေရန်ဆောင်ရွက်ရမယ်ဆိုတဲ့ အပိုင်းတွေ ပါပါတယ်။ နောက်တခါ- အရပ်သားပြည်သူများအား ကာကွယ်စောင့်ရှောက်ရမည်၊ အရပ်သားပြည်သူပိုင် ဥစ္စာပစ္စည်းများကို ထိပါးခြင်းမပြုရဆိုတဲ့ အနေအထားတွေ ပါပါတယ်။”

ဒီနေရာမှာ စစ်ကောင်စီ ခေါင်းဆောင် ဗိုလ်ချုပ်မှူးကြီးမင်းအောင်လှိုင်က မကြာခင်က တရုတ်သတင်းဌာနတစ်ခုနဲ့ အင်တာဗျူးလုပ်ရာမှာ ပြည်တွင်းစစ်က သိပ်မရှိတော့ဘူးလို့ ပြောခဲ့တဲ့အပေါ် ဘယ်လိုတုံ့ပြန်ချင်ပါလဲလို့ မေးရာမှာ ဒေါ်ခင်မမမျိုးကပဲ စစ်တပ်ကြောင့်သာ ပြည်တွင်းစစ်ဖြစ်ရတာပါလို့ ပြန်ပြောခဲ့ပါတယ်။

“မြန်မာနိုင်ငံမှာရှိနေတဲ့ အကြမ်းဖက်စစ်အုပ်စုမှာ ပါဝင်ကြသူတွေအားလုံးအနေနဲ့ ကျမတို့ တရားဝင်ပြည်သူ့အစိုးရနဲ့ ပူးပေါင်းပြီးတော့ စစ်ကောင်စီရဲ့ အာဏာသိမ်းမှုကို ရပ်ဆိုင်းလိုက်တာနဲ့ မြန်မာနိုင်ငံရဲ့ပြည်တွင်းစစ် ဖြစ်ပွါးလာနိုင်သောအခြေအနေတွေ၊စစ်ရေးနဲ့ပတ်သက်ပြီးတော့ ထိတွေ့လာနိုင်သောအခြေအနေတွေ… ဒါတွေအားလုံးဟာ ရပ်ဆိုင်းသွားမှာဖြစ်ပါတယ်။”

ဒါ့အပြင် ဒီမိုကရေစီရေးလူပ်ရှားမူထဲမှာ တပ်မတော်သားတွေအနေနဲ့ ပြည်သူတွေနဲ့ ပူးပေါင်းပါဝင်ဖို့ သဘောထား ထုတ်ပြန်ပြီးပြီလို့လည်း ဦးမိုးဇော်ဦးကဆိုပါတယ်။

ရိုဟင်ဂျာတွေအနေနဲ့ နိုင်ငံသားဖြစ်ခွင့်ရှိပြီး လိုအပ်တဲ့ ဥပဒေတွေ ပြင်ဆင်သွားဖို့ ရည်မှန်းထားတယ်လို့ ဦးမိုးဇော်ဦးက ဆက်ပြောခဲ့ပါတယ်။

လူ့အခွင့်အရေးဆိုင်ရာဝန်ကြီး ဦးအောင်မျိုးမင်းကလည်း ရိုဟင်ဂျာဆိုင်ရာ မူဝါထုတ်ပြန်ခဲ့အပြီး လက်တွေ့ ပြင်နိုင်တဲ့ တိုင်းရင်းသားဖြစ်မှုကို အခြေမခံတဲ့ နိုင်ငံသားဖြစ်ရေး ဥပဒေကိုလည်း ရှင်းပြခဲ့ပါတယ်။

“တိုင်းပြည်မှာမွေးဖွားတဲ့သူကို အသိအမှတ်ပြုမယ်၊ ကာကွယ်မယ်။ နောက် သူတို့သတ်မှတ်ထားတဲ့ တိုင်းရင်းသားလူမျိုးဖြစ်ရမယ်ဆိုတဲ့ ….တွေကိုပဲ ရည်ရွယ်ပြီးတော့ သတ်မှတ်ထားတော့ ဘာဖြစ်လဲဆိုတော့ ….၁၃၅ မျိုးလို့ပြောတဲ့ လူမျိုးစုတွေမှာ မပါဝင်တဲ့သူတွေက နိုင်ငံသားဖြစ်ခွင့် မရှိနိုင်တဲ့ အနေအထားမျိုးဖြစ်တယ်။ ပြောမယ်ဆိုရင် နိုင်ငံသားဖြစ်မှုက တိုင်းရင်းသားဖြစ်မှုဆိုတဲ့အကြောင်းအရာနဲ့လုပ်ဆောင်တယ်။ အဲဒီတော့ ဒီအချက်က ဒီလိုမျိုးသတ်မှတ်ခြင်းမခံရတဲ့သူတွေအတွက် အများကြီးပြဿနာဖြစ်တယ်ဆိုတဲ့အချက်၊ အဲဒါကို ကျနော် သုံးသပ်မိတယ်။ အဲဒီတော့ ကျနော်တို့အနေနဲ့ ၁၉ ၈၂ ဥပဒေကိုဖျက်သိမ်းပြီးတော့ ပြန်လည်ပြင်ဆင်တဲ့နေရာမျိုးမှာ အခုနကလိုမျိုး ခွဲခြားမှုကိုဖြစ်စေတဲ့ လူမျိုးဖြစ်မှုကိုဦးတည်ပြီးတော့ သတ်မှတ်တဲ့ နိုင်ငံသားဖြစ်မှုပုံစံကို ကျနော်တို့ မလိုလားအပ်ပါဘူး။”

ရိုဟင်ဂျာဆိုတဲ့အသုံးအနှုန်းကို လက်ရှိစစ်ကောင်စီက တရားဝင်လက်ခံမထားပါဘူး။

ပညာရေး၊ ကျန်းမာရေးနဲ့ အားကစားဝန်ကြီး ဒေါက်တာ ဇော်ဝေစိုးကလည်း၊ စစ်အာဏာသိမ်း တာ ကြောင့် ကိုဗစ်ကာကွယ်ရေးလုပ်ငန်းတွေထိခိုက်သွားရတယ်၊ အာဏာသာမသိမ်းခဲ့ရင် အရင်စီစဉ် ထားတဲ့အတိုင်း လူဦးရေ ၄၀% ဆေးထိုးပြီးသားဖြစ်ခဲ့ရမှာ၊ အခု စစ်ကောင်စီထိုးနေပုံနဲ့ Immunity တနိုင်ငံလုံးရောဂါခံနိုင်ရည် မရနိုင်တော့ဘူးလို့ ဆိုလိုက်ပါတယ် ခင်ဗျာ။


ကိုဝင်းမင်း/ VOA Burmese

https://burmese.voanews.com/a/nug-crph-presser-pdf-mylitary-coup-voa-burmese-/5916752.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ