ပုလဲ NLD ရုံးကို စစ်ကောင်စီတပ်တွေ ဝင်ဖျက်ဆီး



Share/Bookmark
ရန်ကုန်မြို့မှာ စစ်အာဏာသိမ်းမှု ဆန့်ကျင် ဆန္ဒပြသူတွေကို ဖမ်းဆီးနေတဲ့ မြင်ကွင်း။ (မတ် ၂၊ ၂၀၂၁)

စစ်ကိုင်းတိုင်း ပုလဲမြို့နယ်က အမျိုးသားဒီမိုကရေစီအဖွဲ့ချုပ် (NLD) ရုံးကို စစ်ကောင်စီတပ်ဖွဲ့ဝင်တွေ ဒီနေ့မှာ သေနတ်တွေနဲ့ ပစ်ခတ်ပြီး ဝင်ရောက် ဖျက်ဆီးသွားခဲ့တယ်လို့ ဒေသခံတွေက ပြောပါတယ်။ အခုလို တိုက်ခိုက်မှုကြောင့် ရုံးအတွင်း ထိခိုက်ပျက်စီးမှုတွေ ရှိခဲ့ပေမယ့် လူတွေ ဖမ်းဆီးခံရတာ၊ ထိခိုက်ဒဏ်ရာ ရတာတွေတော့ မရှိဘူးလို့ ပြောပါတယ်။ ပုလဲမြို့က NLD ရုံး တိုက်ခိုက်ခံရတာ အပါအဝင် နိုင်ငံတဝန်းက ဆန္ဒပြပွဲ နောက်ဆုံးအခြေအနေတွေကို ကိုရန်နိုင် တင်ပြပေးထားပါတယ်။

နိုင်ငံတဝန်းမှာ စစ်တပ်အာဏာသိမ်းမှုကို ဆန့်ကျင်တဲ့ ဆန္ဒပြပွဲတွေ၊ လူထုလှုပ်ရှားမှုတွေကို စစ်ကောင်စီတပ်တွေဘက်က အပြင်းအထန် ဖိနှိပ်တာတွေ ဖမ်းဆီးတာတွေ လုပ်နေချိန်မှာပဲ လူထုလှုပ်ရှားမှုတွေ အားကောင်းတဲ့ စစ်ကိုင်းတိုင်းက ပုလဲမြို့နယ် အမျိုးသားဒီမိုကရေစီအဖွဲ့ချုပ် (NLD) ပါတီရုံးကို စစ်ကောင်စီတပ်ဖွဲ့တွေက ဒီနေ့မှာ ဝင်ရောက်ဖျက်ဆီးခဲ့ပါတယ်။ ချင်းပြည်နယ် ဂန့်ဂေါမြို့နယ်ဘက်ကနေ ပြန်လာတဲ့ စစ်ကောင်စီတပ်တွေက ပုလဲမြို့ NLD ပါတီရုံးကို ဝင်ရောက်ဖျက်ဆီးပြီး ပစ်ခတ်တာတွေ လုပ်သွားခဲ့တာဖြစ်တယ်လို့ ပုလဲမြို့ခံတဦးက ဗွီအိုအေကို ပြောပါတယ်။

“သူတို့ ပုလဲရုံးထဲကို ဝင်ပြီး ရုံးကို သေနတ်နဲ့ ပစ်တယ်ပေါ့ဗျာ။ ပြီးတော့ ရုံးတံခါးမှာ တပ်ဆင်ထားတဲ့ မှန်တွေကို ရိုက်ခွဲတယ်။ ရုံးအတွင်းထဲက ပစ္စည်းတွေ အကုန်ဖျက်ဆီးတယ်၊ အဲဒါတွေလုပ်သွားတယ်။ ဒီနေ့ ညနေပိုင်း ၂ နာရီခွဲလောက်က စပြီး ဖျက်ဆီးတာပေါ့။ ချင်းပြည်နယ်ဘက်က ပြန်လာတဲ့ စစ်ကားတွေ သူတို့ ရုံးအရှေ့မှာ ရပ်ပြီးတော့ ဝင်ဖျက်ဆီးသွားတာ။ ပစ်တာကတော့ ရုံးထဲမှာ ကျည်အခွံ ၃ တောင့်တော့ရှိတယ်။”

စစ်ကောင်စီဘက်က တပ်ဖွဲ့ဝင်အင်အား ဘယ်လောက်ပါဝင်တယ်ဆိုတာ မသိရပေမယ့် စစ်ကားအစီးရေ ၂၂ စီးလောက်ရှိတယ်လို့ ခန့်မှန်းကြောင်း မြို့ခံတွေက ပြောပါတယ်။ အဲဒီလို တိုက်ခိုက်ဖျက်ဆီးခဲ့တဲ့အချိန်မှာ ရုံးအတွင်းမှာ ဘယ်သူမှမရှိတာကြောင့် ထိခိုက်ဒဏ်ရာရတာ၊ ဖမ်းဆီးခံရတာတွေ မရှိပေမယ့် ရုံးတွင်းက ပစ္စည်းတွေ အတော်များများ ဖျက်ဆီးခံလိုက်ရတယ်လို့ အဆိုပါမြို့ခံက ပြောပါတယ်။

“ဖမ်းမသွားဘူးဗျ။ ဒီနေ့က စနေနေ့ဆိုတော့ ရုံးမှာနေတဲ့ အဖွဲ့တွေကလည်း မရှိဘူးလေ။ နေ့တိုင်းကတော့ ရုံးမှာ ၂ ယောက် ၃ ယောက် ပုံမှန်ရှိတယ်။ စနေ၊ တနင်္ဂနွေကတော့ ရုံးကို ပိတ်ထားတာဆိုတော့ လူက မရှိကြတာပေါ့။ ဘယ်လောက်လောက် ထိခိုက်ပျက်စီးသွားသလဲဆိုတော့ ရုံးမှာထားတဲ့ ဘီဒိုတွေအကုန်လုံး တွန်းလှဲသွားတယ်။ အိပ်စင်တွေအကုန်လုံး ရုံးအပြင်ဘက်ထုတ် ရိုက်ချိုးသွားတယ်။ စာအုပ်စင်တွေ လှဲသွားတယ်၊ ထိုင်ခုံတွေ ရိုက်ချိုးသွားတယ်။ လျှပ်စစ်ပစ္စည်းတွေ မီးဖိုတွေကိုလည်း လွှင့်ပစ်သွားတယ်၊ ရိုက်ခွဲသွားတယ်။”

တချိန်တည်းမှာပဲ အာဏာသိမ်းစစ်ကောင်စီကို ဆန့်ကျင်တဲ့ ဆန္ဒပြပွဲတွေလည်း နိုင်ငံတဝန်းက မြို့တွေမှာ ဆက်လက်ဖြစ်ပွားနေပါတယ်။

ရန်ကုန်မှာဆိုရင်လည်း ပန်းဘဲတန်းမြို့နယ် အနော်ရထာလမ်းမပေါ်နဲ့ ဒဂုံမြို့သစ် အရှေ့ပိုင်းမြို့နယ်တွေမှာ လူငယ်တွေ ရာနဲ့ချီပြီး ပြောက်ကျားသပိတ်တွေ ဆင်နွှဲခဲ့ကြပြီး ဖမ်းဆီးခံရတာတချို့ ရှိတယ်လို့လည်း သိရပါတယ်။ ဒါ့အပြင် မန္တလေးမြို့မှာဆိုရင်လည်း သက်ဆိုင်ရာ သပိတ်စစ်ကြောင်းအလိုက် ချီတက်ဆန္ဒပြခဲ့ကြတယ်လို့ မြတောင်သပိတ်စစ်ကြောင်းမှာ ပါဝင်သူတဦးက ဗွီအိုအေကို ပြောပါတယ်။

“ကျနော်တို့က အဓိကထွက်တာက မြတောင်စစ်ကြောင်းပေါ့၊ မြတောင်စစ်ကြောင်းရယ် သံဃသမဂ္ဂ စစ်ကြောင်းပေါ့။ ဗလတရယ်၊ ကျောင်းသားလူငယ်ရယ် ၂ ခုတော့ ပါတာပေါ့။ ကျန်တာကတော့ သံဃာများတာပေါ့။ မန္တလေးမှာတော့ သပိတ်စစ်ကြောင်းကတော့ ကျနော်တို့က တကသတို့၊ ချမ်းမြသာစည် သပိတ်စစ်ကြောင်းတို့၊ တပ်ပေါင်းစုသပိတ်၊ တမ္ပဝတီသပိတ်၊ ဘုရားကြီးစစ်ကြောင်းတို့၊ စိန်ပန်းစစ်ကြောင်းနဲ့ ကျနော်တို့ သံဃသမဂ္ဂ စစ်ကြောင်းတို့ပေါ့။”

ဒါ့အပြင် မုံရွာ၊ ဆားလင်းကြီး၊ လက်ပံတောင်း၊ ကလေး၊ မြင်းခြံ၊ ပေါင်၊ ဘုရားသုံးဆူ၊ ထားဝယ်၊ သရက်ချောင်း စတဲ့မြို့နယ်တွေမှာလည်း စစ်အာဏာရှင်ပြုတ်ကျရေး ဆန္ဒပြလှုပ်ရှားမှုတွေ ရှိခဲ့ပါတယ်။

ဒီနေ့မှာဆိုရင် တချိန်က တပါတီအာဏာရှင်စနစ်ကို တော်လှန်ခဲ့တာကြောင့် ကြိုးပေးကွပ်မျက်ခံခဲ့ရတဲ့ တက္ကသိုလ်ကျောင်းသားခေါင်းဆောင် ဆလိုင်းတင်မောင်ဦး ကွယ်လွန်တဲ့ ၄၅ နှစ်ပြည့် အထိမ်းအမှတ် ဖြစ်တာကြောင့် နိုင်ငံတဝန်း ဆန္ဒပြတဲ့သူတွေက သူ့ကို ဂုဏ်ပြုတဲ့အနေနဲ့ သူ့ကို ကြိုးမပေးခင် နောက်ဆုံး သူပြောခဲ့တဲ့ “မင်းတို့စစ်ဖိနပ်အောက်မှာ ငါ ဘယ်တော့မှ ဒူးမထောက်ဆိုတဲ့” စကားကို စာတန်းတွေ၊ ပိုစတာတွေလုပ်ပြီး ချီတက် ဆန္ဒပြခဲ့ကြပါတယ်။


ရန်နိုင်/ VOA Burmese

https://burmese.voanews.com/a/myanmar-army-pale-nld-office/5943739.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ