ရန်ကုန်နဲ့မန္တလေးဆန္ဒပြသူတချို့ဖမ်းဆီးခံရ



Share/Bookmark
ထားဝယ်မြို့ဆန္ဒပြပွဲ မြင်ကွင်း (ဓာတ်ပုံ-တပ်ပေါင်းစု သပိတ်ကော်မတီ- ထားဝယ်)

မြန်မာနိုင်ငံမှာ စစ်အာဏာသိမ်းမှုဆန့်ကျင်ရေး ဒီနေ့ဆန္ဒပြကြတဲ့ထဲက ရန်ကုန်မြို့နဲ့ မန္တလေးမှာ ဆန္ဒပြသူတချို့ ဖမ်းဆီးခံရပါတယ်။ ရန်ကုန်မှာ ၄ ယောက် မန္တလေးမှာ ၃ ယောက် အဖမ်းခံရတာပါ။ တခါ ရန်ကုန်မြို့ တာမွေမြို့နယ်က အုပ်ချုပ်ရေးမှုးတယောက် သေနတ်နဲ့ ပစ်သတ်ခံရပါတယ်။ ခုလို အဖမ်းအဆီး အပစ်အခတ်နဲ့ နိုင်ငံတစ်ဝန်း ဆန္ဒပြပွဲတွေအကြောင်း ရန်ကုန်က လာတဲ့သတင်းကို မဆုမွန် ပြောပြပါမယ်။

ရန်ကုန်မြို့မှာ အခြေအနေပေးတိုင်း ဆန္ဒပြကြတဲ့ လူငယ်အုပ်စုတွေထဲက လှိုင်မြို့နယ် ဘုရင့်နောင် လမ်းမပေါ်မှာ ဆန္ဒပြခဲ့ကြသူတွေ ဒီနေ့ ဖြိုခွဲခံရပါတယ်။ စတင်ချီတက်ပြီး မကြာခင်မှာကို ဖြိုခွဲခံရပြီး ဆန္ဒပြလူငယ် ၄ ယောက် ဖမ်းဆီးခံရတယ်လို့ ဆန္ဒပြအဖွဲ့မှာ ပါဝင်သူ လူငယ်တယောက်က VOA ကို ပြောပြပါတယ်။

“မနက် ၈ နာရီ ၅၀ ဆိုရင် သပိတ်စမယ်ဆိုပြီးတော့ အကုန်လုံး ပုံစံပြောင်းပြီး နေနေကြတဲ့ အချိန်မှာ သူတို့က စစ်ကား ၄ စီး အရှေ့ကနေ ဖြတ်သွားတယ်။ ဖြတ်သွားတော့ ကျွန်တော်တို့ ပုံစံကို တွေ့သွားပြီးတော့ လမ်းထိပ်တိုင်းမှာ ရဲ ၃ ယောက်စီလာချသွားတယ်။ လာချသွားပြီးတော့ ကျွန်တော်တို့ သပိတ် စပြီး ထွက်လဲထွက်ကော စထွက်တာနဲ့ ခြေလှမ်းလေး ၁၀ လှမ်း ၁၅ လှမ်းပဲ လှမ်းရသေးတဲ့ အနေအထားတစ်ခုမှာ သူတို့က နောက်ကနေပြီးတော့ ပြေးလိုက်လာတာ။ ဒါကနော့ ယူနီဖောင်နဲ့ပေါ့နှော်။ ပြေးလိုက်လာတာ။ ပြေးလိုက်လာတဲ့ထဲမှာ ကျွန်တော်တို့ အဖွဲ့အကုန်လုံးလွတ်တယ်။ အဲ့ကလေး ၄ ယောက်ကကျတော့ သူတို့က မဖမ်းလောက်ပါဘူး ဆိုတဲ့အနေအထားနဲ့ သူတို့က အလွတ် ရှောင်နေတဲ့ အနေအထားမှာ အရပ်ဝတ်နဲ့ ပျူစောထီးလို့ပဲ ပြောရမှာပေါ့။ ပျူစောထီးတွေပေါ့၊ သူတို့က အဲ့ကလေး ၄ ယောက်ကို ဂုတ်ဆွဲပြီး ဖမ်းခေါ်သွားတာ။ အခု လောလောဆယ် လိုက်စုံစမ်းနေတာတော့ သူတို့ကို ရဲစခန်းမှာပဲ ထားတယ်လို့ပြောတယ်။ ညနေ ၄ နာရီဆိုရင်တော့ သူတို့ကို စစ်ကြောရေးပို့မယ်လို့ကြားတယ်။”

သူပြောတဲ့ထဲက ပျူစောထီးဆိုတာကတော့ စစ်ကောင်စီကို လိုလားတဲ့ အဖွဲ့ကို ပြောတာဖြစ်ပါတယ်။ မန္တလေးမှာလည်း ဒီနေ့နေ့လည်ပိုင်းမှာထွက်တဲ့ အောင်ပင်လယ် ပင်မသပိတ်စစ်ကြောင်း လူစုခွဲချိန်မှာ စစ်ကောင်စီတပ်တွေက ဖြိုခွဲခဲ့တဲ့အတွက် ၃ ဦးထက်မနည်းဖမ်းဆီးခံရတယ်လို့ ဒေသခံတွေက ပြောပါတယ်။

ရန်ကုန်မြို့ တာမွေမြို့နယ် ကျောက်မြောင်း သတိပဌာန်လမ်းမှာတော့ ကျားကွက်သစ်ရပ်ကွက် အုပ်ချုပ်ရေးမှူး အမျိုသမီး ဦးခေါင်းကို သေနတ်နဲ့ ပစ်သတ်ခံရပါတယ်။ မနက် ၁၀ နာရီလောက်က အုပ်ချုပ်ရေးမှူး ဒေါ်စိုးစိုးလွင် သူ့ရဲ့ ကားထဲ ထိုင်နေစဉ်မှာ သေနတ်နဲ့ အနီးကပ် ပစ်ခံရတာဖြစ်ပါတယ်။ ဒါဟာ သူတို့လက်ချက်ဖြစ်တယ်လို့ ပြည်သူ့ကာကွယ်ရေး PDF အဖွဲ့ဝင်တယောက်က ဗီအိုအေ မြန်မာပိုင်းကို ပြောပါတယ်။ နေ့စဉ်သူ့ရဲ့သွားလာမှု ပုံစံတွေကို စောင့်ကြည့် လုပ်ကြံတယ်လို့ ဆိုပါတယ်။

ဒေါ်စိုးစိုးလွင်အပါအဝင်ဆိုရင် ရန်ကုန်မြို့မှာ ဒေသအုပ်ချုပ်ရေးမှုးတွေ အသတ်ခံရတာ လေးဦးထက်မနည်းရှိသွားပါပြီ။ သာကေတမြို့နယ်မှာ အုပ်ချုပ်ရေးမှုးတစ်ဦး ဓားထိုး အသတ်ခံရသလို၊ လှိုင်သာယာမြို့နယ်က အုပ်ချုပ်ရေးမှုးတစ်ဦးလည်း ဓားထိုးခံခဲ့ရပါတယ်။ လမ်းမတော်မြို့နယ် အမှတ် ၃ ရပ်ကွက် အုပ်ချုပ်ရေးမှုးတယောက်လည်း မေလတုန်းက ဦးခေါင်းကို သေနတ်နဲ့ ပစ်သတ်ခံရပါတယ်။ အဲဒီသတ်ဖြတ်မှုတွေကို ဘယ်လိုတွေ လုပ်သလဲဆိုတာ အတိအကျ မသိရသေးပါဘူး။

တခါရန်ကုန်မြို့မှာပဲ ပြည်လမ်း အင်းလျား ကန်ဘောင်ရှေ့ အပါအဝင် ဗုံးအသေးစား ပေါက်ကွဲမှုတချို့ရှိခဲ့ပါတယ်။

စစ်အာဏာသိမ်းမှု ဆန့်ကျင်ဆန္ဒပြမှုတွေကတော့ တခြားနယ်မြို့တွေမှာလည်း ဒီနေ့ရှိပါတယ်။ ဒီနေ့ ထားဝယ်မြို့ ဆန္ဒပြသူတွေက ဈေးတွေထဲ လှည့်လည်ဟောပြောပွဲတွေ လုပ်ခဲ့ကြပါတယ်။ ထားဝယ်မြို့က ရပ်ကွက်၂ ခုမှာလည်း လုံးဝအုပ်ချုပ်ခွင့်မရစေရဆိုတဲ့ စာတန်းတွေ ချိတ်ဆွဲ ဆန္ဒပြခဲ့ကြတယ်လို့ ဆန္ဒပြပွဲမှာ ပါဝင်သူတစ်ဦးက ပြောပါတယ်။

“စစ်ကြောင်းချီတက်တဲ့ ပုံစံတွေကတော့ ဒီနေ့ ဈေးလေးတွေမှာ ဟောပြောမှုတွေလုပ်တယ်။ ပြီးတော့ လုံးဝအုပ်ချုပ်ခွင့်မရစေရဆိုတဲ့ စာတန်း ဆိုင်းဘုတ် ကိုင်ဆောင်ပြီးတော့ ဆန္ဒဖော်ထုတ်မှုတွေ လုပ်တယ်။ ထားဝယ်မြို့ပေါ်မှာ ဘုမ္မော်ရပ်ကွက်နဲ့ ကြက်စားပြင်ရပ်ကွက်ကို စစ်ကောင်စီက ရပ်ကွက်အဝင်အထွက် လမ်းတွေကို သံဆူးကြိုးတွေနဲ့ကာပြီးတော့ ပိတ်ထားတဲ့ ဟာတွေ ရှိတယ်လေ။ တံတားတွေ ဝင်ပေါက်ထွက်ပေါက် တံတားတွေအကုန်လုံးကိုသူတို့က သံဆူးကြိုးတွေနဲ့ ပိတ်ထားတာရှိတယ်။ အဲ့ဒါကို သူတို့က ဒီနေ့ လုံးဝ အုပ်ချုပ်ခွင့်မရစေရဆိုတဲ့ စာတန်း ဆိုင်းဘုတ်ချိတ်တာ၊ ပြီးတော့ ဆေးနီတွေနဲ့ ပက်ဖြန်းတာ အဲ့ဒါမျိုးတွေ လုပ်တယ် ဒီနေ့။”

ထားဝယ်မြို့နယ်ရဲ့ ရပ်ကွက်တစ်ချို့မှာ စစ်ကောင်စီတပ်တွေ လာရောက်တပ်စွဲနေပြီး ညဖက် သေနတ်ပစ်ဖောက်မှုတွေ လုပ်တာကြောင့် အဲ့ဒီအနီးအနားမှာ ရှိနေသူတစ်ချို့ ရှောင်တိမ်းနေကြရတယ်လို့ ဒေသခံတွေက ပြောပါတယ်။ ဆန္ဒပြပွဲတွေကို ရတဲ့ပုံစံနဲ့ ဆက်လုပ်နေကြတဲ့ ဖားကန့်၊ ကလေး၊ ယင်းမာပင် လောင်းလုံမြို့တွေအပြင် ညောင်ဦး၊ မုံရွာ၊ လက်ပံတောင်းတောင်ဒေသတွေမှာလည်း စစ်အာဏာရှင်ဆန့်ကျင်ရေး သပိတ်မှောက်လှုပ်ရှားမှုတွေ ဒီနေ့ ဆက်လုပ်ခဲ့ကြပါတယ်။ 


Su Mon Aye/ VOA Burmese

https://burmese.voanews.com/a/anti-coup-protests-continue-Yangon-Mandalay-Hartwell-around-myanmar-/5920787.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ