ထိုင်းနိုင်ငံခြားရေးဝန်ကြီးဌာန ပြောခွင့်ရ Tanee Sangrat။ (Reuters) |
မြန်မာနိုင်ငံ နေရာအတော်များများ အကြမ်းဖက် တိုက်ခိုက်မှုတွေ ဖြစ်ပေါ်နေတဲ့အပေါ် ထိုင်းနိုင်ငံအနေနဲ့ စိုးရိမ်ပူပန်ကြောင်းနဲ့ မြန်မာစစ်ခေါင်းဆောင်တွေ အနေနဲ့ အာဆီယံနဲ့ ရရှိထားတဲ့ အချက် ၅ ချက်ပါ သဘောတူညီချက် အကောင်အထည်ဖော်ရေးကို လိုလားကြောင်း ထိုင်းနိုင်ငံက ဒီကနေ့ ပြောကြားလိုက်ပါတယ်။
အင်ဒိုနီးရှားနိုင်ငံ၊ ဂျကာတာမြို့မှာ ဧပြီလ ၂၄ ရက်နေ့က ကျင်းပခဲ့တဲ့ မြန်မာ့အရေး အာဆီယံ အရေးပေါ်စည်းဝေးပွဲအတွင်း ရရှိခဲ့တဲ့ အကြမ်းဖက်မှုတွေ အဆုံးသတ်ရေး၊ နိုင်ငံရေးဆွေးနွေးမှုတွေ လုပ်ဆောင်ရေးနဲ့ မြန်မာနိုင်ငံဆိုင်ရာ အာဆီယံ အထူးကိုယ်စားလှယ် ရွေးချယ်ခန့်အပ်ရေး စတဲ့အချက်တွေပါဝင်တဲ့ အဲဒီ သဘောတူညီချက် ၅ ခုကို မြန်မာဘက်က အကောင်အထည် ဖော်လိုတဲ့ဆန္ဒ ရှိတယ်ဆိုတာ မတွေ့ရကြောင်း ထိုင်းနိုင်ငံခြားရေးဌာန ပြောခွင့်ရ Tanee Sangrat ရဲ့ ဒီကနေ့ထုတ်ပြန်တဲ့ ကြေညာချက်မှာ ဖော်ပြထားပါတယ်။ မြန်မာစစ်တပ်အနေနဲ့ အာဆီယံ သဘောတူညီချက်တွေကို အမြန်ဆုံး အကောင်အထည်ဖော်ဖို့လည်း သူက တောင်းဆိုထားပါတယ်။
ထိုင်းနိုင်ငံအနေနဲ့ မြန်မာနိုင်ငံအတွင်း ဖြစ်ပေါ်နေတဲ့ အခြေအနေတွေကို ဖေဖော်ဝါရီလ ၁ ရက်နေ့ကစလို့ အနီးကပ် စောင့်ကြည့်နေခဲ့ကြောင်း၊ မြန်မာ့အရေးနဲ့ ပတ်သက်လို့ နိုင်ငံတကာ အသိုင်းအဝိုင်းက ထိုင်းနိုင်ငံအပေါ် မျှော်လင့်ချက်ထားကြတယ်ဆိုတာ သူတို့အနေနဲ့ သဘောပေါက်ကြောင်း Tanee Sangrat က ပြောပါတယ်။
အိမ်နီးချင်းနိုင်ငံတွေနဲ့ ညှိနှိုင်းတိုင်ပင်ပြီး မြန်မာနိုင်ငံကိစ္စကို သံတမန်ရေး နည်းလမ်းအရ တိတ်တဆိတ် ဆောင်ရွက်တဲ့နည်းလမ်းက ပိုပြီး ထိရောက်မယ်လို့ ယုံကြည်တဲ့အတွက် အဲဒီနည်းလမ်းအတိုင်း ဆောင်ရွက်လျက်ရှိကြောင်းလည်း ထိုင်းနိုင်ငံခြားရေးဌာန ပြောခွင့်ရ Tanee Sangrat ရဲ့ ကြေညာချက်မှာ ဖော်ပြထားပါတယ်။
အာဆီယံ နိုင်ငံခြားရေးဝန်ကြီးတွေနဲ့ တရုတ်နိုင်ငံတို့ လာမယ့်ရက်ပိုင်းအတွင်း တရုတ်နိုင်ငံမှာ တွေ့ဆုံဖို့ရှိနေတဲ့အချိန်မှာ မြန်မာ့အရေးနဲ့ ပတ်သက်လို့ ထိုင်းနိုင်ငံခြားရေးဌာနက သူတို့ရဲ့သဘောထားကို အခုလို ထုတ်ဖော် ပြောဆိုလိုက်တာလည်း ဖြစ်ပါတယ်။
ဗွီအိုအေ (မြန်မာပိုင်း)
https://burmese.voanews.com/a/myanmar-thai-quite-diolomacy/5918407.html
No comments:
Post a Comment