ဗိုလ်ချုပ်ကြီးယွက်စစ် PPST ဥက္ကဋ္ဌရာထူးမှ နုတ်ထွက်လိုကြောင်း စာပေးပို့

ဗိုလ်ချုပ်ကြီးယွက်စစ် PPST ဥက္ကဋ္ဌရာထူးမှ နုတ်ထွက်လိုကြောင်း စာပေးပို့ RCSS/SSA ခေါင်းဆောင် ဗိုလ်ချုပ်ကြီး ယွက်စစ်ကို တွေ့ရစဉ် / Photo: NCA-S EAO

ရှမ်းပြည်ပြန်လည်ထူထောင်ရေးကောင်စီ RCSS ခေါင်းဆောင် ဗိုလ်ချုုပ်ကြီး ယွက်စစ်ဟာ ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) ဥက္ကဋ္ဌ တာဝန်ကနေ နုတ်ထွက်လိုကြောင်း ဇွန် ၂၉ ရက် မနေ့က စာပို့ခဲ့တယ်လို့ PPST ဖွဲ့ဝင် ဗိုလ်မှူးကြီးခွန်ဥက္ကာက RFA ကို ပြောပါတယ်။

PPST ဟာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို လက်မှတ်ရေးထိုး ထားတဲ့ တိုင်းရင်းသားလက်နက်ကိုင် အဖွဲ့အစည်း ၁၀ ဖွဲ့နဲ့ စုဖွဲ့ထားတာဖြစ်ပြီး KNU ခေါင်းဆောင် ဗိုလ်ချုပ်ကြီး မူတူးစေးဖိုးနုတ်ထွက်ပြီးနောက် ဗိုလ်ချုပ်ကြီးယွက်စစ်က ယာယီဥက္ကဋ္ဌအဖြစ် တာဝန် ယူထားတာပါ။

“ နုတ်ထွက်ခွင့်ပြုဖို့ PPST တခြားခေါင်းဆောင်တွေကို မေတ္တာရပ်ခံတာပါ။ ရှမ်းပြည်ကိစ္စ၊ ရှမ်းအမျိုးသား ကိစ္စတွေ ဆောင်ရွက်ရမယ် ဒါ့ကြောင့် သူအချိန်မပေးနိုင်ဘူးလို့ အကြောင်းပြပါတယ်။ သူက နုတ်ထွက်ခွင့် ပြုဖို့ မေတ္တာရပ်ခံတော့ ကျန်တဲ့ ၉ ဖွဲ့က မထွက်ပါနဲ့ဦး တိုင်းရင်းသားညီလာခံအထိ စောင့်ပါဦးဆိုပြီး ပြန်မေတ္တာရပ်ခံလည်းရတာပေါ့။ ဘယ်လိုဖြစ်မလဲဆိုတာ အစည်းအဝေးကျတော့သိမယ်”လို့PPST အဖွဲ့ဝင် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ဦးဆောင်နာယက ဗိုလ်မှူးကြီးခွန်ဥက္ကာက ပြောပါတယ်။

PPST ရဲ့ ၂၀၂၁ ခုနှစ်အတွက် ၁၇ ကြိမ်မြောက် ပုံမှန်အစည်းအဝေးကို ဇူလိုင် ၁ ရက် နဲ့ ၂ ရက်နေ့တွေမှာ အွန်လိုင်းကတဆင့် ပြုလုပ်သွားဖို့ရှိနေပြီး အဲဒီအစည်းအဝေးမှာ ဗိုလ်ချုပ်ကြီး ယွက်စစ်ရဲ့တင်ပြချက်အပေါ် ဆွေးနွေးဆုံးဖြတ်သွားဖို့ရှိတယ်လို့ သူက ပြောပါတယ်။

ဗိုလ်ချုပ်ကြီးယွက်စစ်ဟာ ၂၀၁၉ ခုနှစ်၊ မတ်လ ၁၉ ရက်နေ့က စတင်ပြီး PPST ရဲ့ ယာယီ ဥက္ကဋ္ဌအဖြစ် တာဝန်ယူခဲ့တာကြောင့် အခုဆိုရင် နှစ်နှစ်ကျော်ပြီဖြစ်ပါတယ်။

ယာယီအဖွဲ့ခေါင်းဆောင်၏ သက်တမ်းကို စတုတ္ထအကြိမ်မြောက် NCA-S EAO Summit ကျင်းပပြီးစီးတဲ့ အချိန်အထိ သတ်မှတ်ထားပါတယ်။ ၂၀၁၉ မေလမှာ စတုတ္ထအကြိမ်မြောက် NCA-S EAO ညီလာခံ ပထမပိုင်း ကို ပြုလုပ်ခဲ့ပေမယ့် ကိုရိုနာဗိုင်းရပ်စ်ကပ်ရောဂါ အပါအဝင် နိုင်ငံရေး အကြပ်အတည်းတွေကြောင့် ညီလာခံ ဒုတိယပိုင်းကို ခုချိန်အထိ မကျင်းပနိုင်သေးတာ ဖြစ်ပါတယ်။

NCA-S EAO တွေရဲ့ ညီလာခံဒုတိယပိုင်းကို ၂၀၂၁ ခုနှစ် အောက်တိုဘာလ ဒါမှမဟုတ် နိုဝင်ဘာလလောက်မှာ ပြုလုပ်ဖို့ PPST အဖွဲ့ဝင်တွေအကြား သဘောတူညီချက် ရှိထားပါတယ်။

ဒါ့ကြောင့် ယာယီဥက္ကဋ္ဌ ဖြစ်တဲ့ ဗိုလ်ချုပ်ကြီးယွက်စစ်က နုတ်ထွက်မယ်ဆိုရင် ညီလာခံဒုတိယပိုင်း ကျင်းပ ပြီးတဲ့အထိ တာဝန်ယူပေးဖို့ ယခင်က ဥက္ကဋ္ဌဖြစ်ခဲ့တဲ့ ဗိုလ်ချုပ်ကြီးမူတူးစေးဖိုးကိုပဲ ပြန်လည်တာဝန် ပေးနိုင်ဖွယ်ရှိနေတယ်လို့ PPST အဖွဲ့ဝင်တချို့က ပြောဆိုပါတယ်။


RFA Burmese

https://www.rfa.org/burmese/news/ppst-chairman-request-to-resign-06302021064327.html

ပေါင်းတည်မြို့နယ် ကျေးရွာအုပ်ချုပ်ရေးမှူးတစ်ဦး ပစ်သတ်ခံရ

ပေါင်းတည်မြို့နယ် ကျေးရွာအုပ်ချုပ်ရေးမှူးတစ်ဦး ပစ်သတ်ခံရ ပေါင်းတည်မြို့အဝင်ကို တွေ့ရစဉ်

ပဲခူးတိုင်း၊ ပေါင်းတည်မြို့နယ်၊ ကြို့ကုန်းကျေးရွာအုပ်စု အုပ်ချုပ်ရေးမှူး ဦးအောင်ဇော်လတ် (ခ) ဇော်လတ်ကို ဒီကနေ့ မနက်ပိုင်းမှာ အမည်မသိ သေနတ်သမားတွေက သေနတ်နဲ့ ပစ်ခတ်သတ်ဖြတ်ခဲ့ကြတယ်လို့ ဒေသခံ တွေက RFAကို ပြောပါတယ်။

အသက် ၄၅ နှစ်အရွယ် ဦးအောင်ဇော်လတ်ဟာ ကြို့ကုန်းကျေးရွာကနေ ပေါင်းတည်မြို့ဘက်ကို ဗျူဟာလမ်း အတိုင်း ဆိုင်ကယ်စီးလာတုန်း ပေါင်းတည်မြို့နယ် အဂ္ဂရာပြည့်ရွာနားအရောက်မှာ ဦးခေါင်းကို သေနတ်နဲ့ နှစ်ချက် ပစ်သတ်ခံလိုက်ရတာလို့ လုံခြုံရေးအရ အမည်မဖော်လိုတဲ့ ကြို့ကုန်းကျေးရွာ ဒေသခံတစ်ဦးက ပြောပါတယ်။

"သူက အခုမှ ခန့်ထားတဲ့ အုပ်ချုပ်ရေးမှူးတော့မဟုတ်ဘူး။ အရင်ကတည်းက ခန့်ထားတာ။ ဒါပေမဲ့ အခု စစ်တပ်နဲ့ပေါင်းပြီး ရွာမှာ လက်နက်ရှာတာတွေ လူငယ်တွေကို ဖမ်းဖို့ သတင်းပေးတာတွေ လုပ်နေတာ။ သူ့အစ်ကိုကလည်း စစ်တပ်က"

အခုလို ရပ်ကျေးအုပ်ချုပ်ရေးမှူး လုပ်ကြံသတ်ဖြတ်ခံရတာဟာ ပဲခူးတိုင်း ပေါင်းတည်မြို့နယ် အတွင်းမှာ ပထမဆုံးဖြစ်တယ်လို့လည်း ဒေသခံတွေက RFA ကို ပြောပါတယ်။

RFA က ကောက်ယူထားတဲ့ အချက်အလက်တွေအရ စစ်တပ်က အရပ်သားအစိုးရကို အင်အားသုံးဖြုတ်ချပြီး အာဏာရယူခဲ့တဲ့ ဖေဖော်ဝါရီ ၁ ရက်နောက်ပိုင်း စစ်ကောင်စီ အုပ်ချုပ်ရေးယန္တရားမှာပါဝင်အမှုထမ်းနေတဲ့ ရပ်ကွက်နဲ့ ကျေးရွာအုပ်ချုပ်ရေးမှူး ၂၀ ဝန်းကျင် သတ်ဖြတ်ခံထားရပြီဖြစ်ပါတယ်။


RFA Burmese

https://www.rfa.org/burmese/news/paungde-village-admin-murder-06302021051847.html

 

ပုဇွန်တောင်၊ရေကျော်လမ်းမပေါ်က ရပ်ကွက်ရုံးနားဗုံးပေါက်၊ ထိခိုက်သူရှိ


ရန်ကုန်၊ ပုဇွန်တောင်မြို့နယ်ထဲမှာရှိတဲ့ ရေကျော်လမ်းမပေါ်က အမှတ် ၉ ရပ်ကွက်ရုံးအနီးမှာ ဒီနေ့ဇွန်လ ၃ဝရက် ညနေပိုင်းကပေါက်ကွဲမူဖြစ်ခဲ့တယ်လို့ ရပ်ကွက်အနီးနားနေထိုင်သူတွေက ပြောပါတယ်။

ပေါက်ကွဲမှု ရပ်ကွက်ရုံးအနီးဂိတ်ထိုးထားတဲ့ ဆိုက်က္ကားဆရာတစ်ဦးထိခိုက်ဒဏ်ရာရသွားတယ်လို့ ရပ်ကွက်အတွင်းနေထိုင်သူတွေကပြောပါတယ်။

"၃နာရီဝန်းကျင်လောက်ကဖြစ်တာ။ ရပ်ကွက်ရုံးနားလက်ဖက် ရည်ဆိုင်အရှေ့ဘက်ကဖြစ်တာ။ ပေါက်ကွဲသံကနှစ်ချက်ကြားတာ အိမ်ပါတုန်တယ်။ မြင်လိုက်တာတော့ ဆိုက်က္ကားဆရာကိုတော့ လူနာတင်ယာဉ်နဲ့ခေါ်သွားတယ်။ လက်ပြတ်သွားတယ်လို့တော့ပြောတယ်"လို့ ရပ်ကွက်အတွင်းနေထိုင်သူတစ်ဦးက ဘီဘီစီကိုပြောပါတယ်။

ပေါက်ကွဲမူကြောင့်ထိခိုက်ဒဏ်ရာရထားသူရဲ့နောက်ဆက်တွဲအခြေနေကိုတော့အတည်မပြုနိုင်သေးသလို စစ်ကောင်စီဘက်ကလည်း ဒီပေါက်ကွဲမူဖြစ်စဉ်နဲ့ပတ်သက်ပြီးသတင်းထုတ်ပြန်တာမရှိသေးပါဘူး။

ပေါက်ကွဲမူဖြစ်ပြီး ညနေပိုင်းကတည်း ရေကျော်လမ်းထဲက လက်ဖက်ရည်ဆိုင်တွေမှာထိုင်နေတဲ့လူငယ်တချိူ့ကိုပါ စစ်ကောင်စီတပ်ဖွဲ့ဝင်တွေကစစ်ဆေးမူတွေရှိခဲ့တယ်လို့လည်းအနီးနားနေထိုင်သူတွေကပြောပါတယ် ။


BBC Burmese

https://www.bbc.com/burmese/live/burma-57652919

မကွေးထောင်ကလွတ်သူတွေထဲ ကိုလျှံဖြိုးအောင်မပါဝင်


မကွေးအကျဉ်းထောင်ထဲက ဒီနေ့ ဇွန် ၃၀ ရက်မှာ ပြန်လည် လွတ်မြောက်သူတွေထဲ စစ်ကောင်စီတပ်တွေ ပစ်ခတ်ဖမ်းဆီလို့ မျက်လုံးနဲ့လက်တစ်ဖက် ပျက်ဆီးဆုံးရှုံးခဲ့ရတဲ့ အင်ဂျင်နီယာကျောင်းသား ကိုလျှံဖြိုးအောင်မပါဝင်ဘူးလို့ ကိုလျှံဖြိုးအောင်ရဲ့ မိသားစုဝင်တစ်ဦးက လူမှုကွန်ရက်မှာရေးသားထားပါတယ်။

ကိုလျှံဖြိုးအောင်ကို စစ်ကောင်စီက နိုင်ငံတော်အကြည်ညိုပျက်စေမှုပုဒ်မ ၅၀၅ (က)နဲ့ တရားစွဲဆိုထားပြီး ဇွန်လ ၇ ရက်နေ့က မကွေးစစ်ဆေးရုံကနေ ဆင်းလာချိန်မှာ မကွေးထောင်ထဲကို ပို့ဆောင်ခံခဲ့ရပါတယ်။ လာမယ့် ဇူလိုင် ၁ ရက်နေ့မှာ ရုံးချိန်းပြန်လည်ချိန်းဆိုထားပါတယ်။

လက်ရှိမှာ ကိုလျှံဖြိုးအောင်ဟာ ဆေးဆက်လက်ကုသခွင့်ရဖို့၊ အချုပ်လွတ်(အာမခံ)ရရှိဖို့ လျှောက်ခဲ့တယ်လို့ သိရပါတယ်။


BBC Burmese

https://www.bbc.com/burmese/live/burma-57652919

 

၂၁ မိုင်ဂိတ်အား ​ကေအိုင်​အေ တိုက်


30 June 2021 - Kachinwaves 

ကချင်ပြည်နယ် မိုးကောင်းမြို့နယ် မရမ်းကျေးရွာရှိ စစ်ကောင်စီတပ် ၂၁မိုင်ဂိတ်ကို ယနေ့နံနက် ၅နာရီခန့်တွင် ကေအိုင်အေမှ တိုက်ခိုက်ခဲ့ပြီး တိုက်ပွဲဖြစ်ပွားခဲ့ကြောင်း သိရသည်။

​ကေအိုင်​အေမှ သွား​ရောက်ပစ်ခတ်ခဲ့သည်ဟုသိရပြီး အ​သေးစိတ်ကို​​ မသိရ​သေး​ကြောင်း ​ကေအိုင်အို သတင်းနှင့်ပြန်ကြား​ရေး တာဝန်ခံ ဗိုလ်မှူးကြီး ​နော်ဘူက​ပြောသည်။

စစ်ကောင်စီတပ်များသည် ကေအိုင်အေတပ်ရှိရာ တောင်ဘက်သို့ လက်နက်ကြီးများ ပစ်ခတ်ခဲ့သည်ဟု ဒေသခံတစ်ဦးကပြောသည်။

"မိနစ်၂၀လောက်ရှိပါတယ် တပ်ကနေအမြောက်တွေပစ်ပြီး မကြာဘူး ပြန်ဆုတ်သွားတယ်ထင်တယ်။ တပ်က တောင်ဘက်တွေကို အ​မြောက်တွေနဲ့ပစ်ပါတယ်"ဟု ဒေသခံတစ်ဦးကပြောသည်။

ဂိတ်​စောင့်သည့် စစ်​ကောင်စီရဲတစ်ဦးနှင့် ၂၁ မိုင်ဂိတ်အနီးတွင်စျေး​ရောင်းသည့် ပြည်သူတစ်ဦး ​သေဆုံး​​ကြောင်း သိရသည်။ကားတစ်စီးလည်း မီး​လောင်ခဲ့​ကြောင်းလည်း သိရသည်။ 

စစ်ကောင်စီတပ်မှ အ​မြောက်ဖြင့် ပစ်ခတ်သည့်အတွက် ပြည်သူတစ်ဦး၏ အိမ်တွင်လည်း လက်နက်ကြီးကျ​ခဲ့ကြောင်း သိရသည်။ 

ခရီးသွားပြည်သူများအား  ၁၀နာရီခွဲအချိန်မှ စတင်ပြီး ဖြတ်သန်းသွားခွင့် ပြန်လည် ခွင့်ပြု​​ပေးခဲ့ပြီဖြစ်​ကြောင်း သိရသည်။



Kachinwaves 

https://www.facebook.com/kachinwavesnews

ဖမ်းဆီးခံထားရတဲ့ ရန်ကုန်က သတင်းထောက် ခုနစ်ယောက်ပြန်လွတ်

ဖမ်းဆီးခံထားရတဲ့ ရန်ကုန်က သတင်းထောက် ခုနစ်ယောက်ပြန်လွတ် ရန်ကုန်မြို့ အင်းစိန်ထောင်မှာ ဖမ်းဆီးခံထားရတဲ့ Myanmar Now သတင်းဌာနက မကေဇွန်နွေးနဲ့ Myanmar Press Photo Agency ကသတင်းထောက် ကိုရဲမျိုးခန့်တို့ ၂၀၂၁ ဇွန် ၃၀ရက်နေ့က ပြန်လည်လွတ်မြောက်လာတာကို တွေ့ရစဉ် / Photo: RFA

ရာဇသတ်ကြီး ဥပဒေပုဒ်မ ၅၀၅(က)နဲ့ ရန်ကုန် အင်းစိန်ထောင်မှာ ဖမ်းဆီးတရားစွဲခံထားရတဲ့ သတင်းထောက် ခုနစ်ယောက်ကို စစ်ကောင်စီက ဒီနေ့ ပြန်လွှတ်ပေးလိုက်ပါတယ်။

Myanmar Now သတင်းဌာနက မကေဇွန်နွေး၊ အလွတ်တန်းသတင်းထောက် ကိုဗညားဦး၊ Myanmar Press Photo Agency ကသတင်းထောက် ကိုရဲမျိုးခန့်၊ အလွတ်တန်းသတင်းထောက် ကိုစိုးရာဇာထွန်း၊ 7Day News သတင်းဌာနက ကိုအောင်ရဲ၊ Myanmar Postက အယ်ဒီတာ ကိုသော်ဇင်နဲ့ ဇီးကွက်သတင်းဌာနက သတင်းထောက် ဟိန်းပြည့်ဇော်တို့ ပြန်လွတ်လာတာပါ။

သူတို့တွေဟာ ဖေဖော်ဝါရီလ ၁ ရက်နေ့ စစ်အာဏာသိမ်းပြီးနောက် ဖြစ်ပေါ်လာတဲ့ အစောပိုင်း ဆန္ဒပြပွဲ တွေမှာ သတင်းမှတ်တမ်းရယူရင်း အကြမ်းဖက် ဖမ်းဆီးခံခဲ့ရတာပါ။

ဖမ်းဆီးခံရတဲ့ သတင်းထောက်စာရင်းတွေကို ကောက်ယူပြုစုနေတဲ့ ဖမ်းဆီးထိန်းသိမ်းခံထားရသော မြန်မာ သတင်းသမားများ Detained Journalists Information Myanmar စာမျက်နှာအရ ဖေဖော်ဝါရီ ၁၄ ကနေ ဇွန် ၂၇ ရက်အထိ အဖမ်းခံထားရတဲ့သတင်းထောက် ၈၇ ယောက်ရှိပါတယ်။

ဖမ်းဆီးခံရသူ ၂၃၄၂ ယောက်ကို ဒီနေ့ စစ်ကောင်စီက ပြန်လွှတ်ပေးခဲ့ပြီး ရန်ကုန်မြို့ အင်းစိန် အကျဉ်းထောင် ကနေ လွတ်မြောက်သူ ၇၂၁ ယောက်ရှိပါတယ်။

အင်းစိန်ထောင်က ပြန်လွတ်လာသူ အများစုဟာ နိုင်ငံတော်အကြည်ညိုပျက်စေမှုပုဒ်မ ၅၀၅(က)နဲ့ တရားစွဲဆို ခံထားရသူတွေဖြစ်ပါတယ်။

ဖမ်းဆီးခံထားသူတချို့ကို စစ်ကောင်စီက ပြန်လွှတ်ပေးတာဟာ နိုင်ငံတကာအသိုင်းအဝိုင်းရဲ့ အသိအမှတ် ပြုမှုရရှိဖို့ ကြိုးပမ်းနေတာလို့ နိုင်ငံရေးအကျဉ်းသားဟောင်းများအဖွဲ့ AAPP က ဒီနေ့ ဖမ်းဆီးခံရသူတွေ ပြန်လွတ်လာပြီး တစ်ပြိုင်တည်းမှာပဲ ထုတ်ပြန်လိုက်ပါတယ်။


RFA Burmese

https://www.rfa.org/burmese/news/seven-detained-journalists-released-06302021094507.html

တစ်နိုင်ငံလုံးကနေ အကျဉ်းသား ၂၂၉၆ ဦး ပြန်လွတ်မြောက်လာ

တစ်နိုင်ငံလုံးကနေ အကျဉ်းသား ၂၂၉၆ ဦး ပြန်လွတ်မြောက်လာ အကျဉ်းသား ၂၃၀၀ ကျော်ကို ပြန်လွှတ်ပေးမယ်လို့ သတင်းတွေ ထွက်ခဲ့တာကြောင့် ရန်ကုန် အင်းစိန်ထောင်ရှေ့မှာ စောင့်ဆိုင်းနေသူတွေကို ၂၀၂၁ ဇွန် ၃၀ ရက်နေ့က တွေ့ရစဉ် / Photo: RFA

ရန်ကုန် အင်းစိန်အကျဉ်းထောင် အပါအဝင် တစ်နိုင်ငံလုံးရှိ အကျဉ်းထောင်တွေကနေ စစ်အာဏာရှင်ဆန့်ကျင် ရေး လှုပ်ရှားမှုတွေကြောင့် ဖမ်းဆီးခံထားရသူ ၂၂၉၆ ဦးကို ဒီကနေ့ ဇွန်လ ၃၀ ရက်နေ့မှာ စစ်ကောင်စီက ပြန်လွှတ်ပေးလိုက်ပါတယ်။

ဒီကနေ့ ပြန်လွတ်လာသူတွေကတော့ နေပြည်တော်က ၂၂ ဦး၊ ကချင်ပြည်နယ်က ၁၄၅ ဦး၊ ကယားပြည်နယ် က ၁၁ ဦး၊ ကရင်ပြည်နယ်က ၄၇ ဦး၊ ချင်းပြည်နယ်က ၄၈ ဦး၊ စစ်ကိုင်းတိုင်းက ၃၃ ဦး၊ တနင်္သာရီတိုင်းက ၃၂ ဦး၊ ပဲခူးတိုင်းက ၁၁၄ ဦး၊ မကွေးတိုင်းက ၃၆ ဦး၊ မန္တလေးတိုင်းက ၇၁၁ ဦး၊ မွန်ပြည်နယ်က ၃၃ ဦး၊ ရခိုင်ပြည် နယ်က ခြောက်ဦး၊ ရန်ကုန်တိုင်းက ၇၂၁ ဦး၊ ရှမ်းပြည်နယ်က ၄၉ ဦး၊ ဧရာဝတီတိုင်းက ၂၉၆ ဦး စုစုပေါင်း အဖမ်းခံထားရသူ ၂၂၉၆ ဦးကို တစ်နိုင်ငံလုံးမှာရှိတဲ့ အကျဉ်းထောင် အသီးသီးကနေ ပြန်လွှတ်ပေးလိုက်တာ ဖြစ်ကြောင်း စစ်ကောင်စီက သတင်းထုတ်ပြန်ထားပါတယ်။

    "သူတို့ အုပ်ချုပ်ရေးမှာ အကျပ်တည်းဖြစ်လာတဲ့အခါ နိုင်ငံတကာကို မျက်စိလှည့်ချင်တဲ့အတွက်ကြောင့်မို့လို့ လွှတ်ပေးတယ်လို့ ကျနော်တို့က သုံးသပ်မိတယ်"

ပြန်လွတ်လာသူအများစုဟာ အာဏာဖီဆန်ရေး လှုပ်ရှားမှုတွေကြောင့် တပ်မတော်ကို အကြည်ညို ပျက်စေမှု ပုဒ်မ ၅၀၅ (က) နဲ့ ဖမ်းဆီးတရားစွဲခံထားရတဲ့ သတင်းထောက်တွေ၊ ဆနွ္ဒပြလူငယ်တွေနဲ့ လူမှုကယ်ဆယ်ရေး ပရဟိတ လုပ်နေသူတွေဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က လုံခြုံရေးအရ အမည်မဖော်လိုတဲ့ တာဝန်ရှိသူ တစ်ယောက်ကတော့ ဒီကနေ့ ဖမ်းထားသူတချို့ကို ပြန်လွှတ်ပေးတာကတော့ စိတ်စေတနာသန့်သန့်နဲ့ မဟုတ်ဘဲ နိုင်ငံတကာကို မျက်နှာရအောင် လုပ်ချင်တာကြောင့်ဖြစ်တယ်လို့ မှတ်ချက်ပေးပါတယ်။

“ဒီလိုလွှတ်ပေးတာက တကယ်စိတ်စေတနာသန့်သန့်နဲ့ လွှတ်ပေးတာလို့ ကျနော်တို့ မသတ်မှတ်ဘူး။ တကယ်စိတ်စေတနာ ကောင်းကောင်းနဲ့ ကျနော်တို့ နိုင်ငံ ပြည်သူ၊ ပြည်သားတွေကို ကြည့်မယ်ဆိုရင် ဒေါ်အောင်ဆန်းစုကြည် အပါအဝင် ဖမ်းဆီးထားတဲ့ နိုင်ငံရေးအကျဉ်းသားအားလုံးကို ချက်ချင်းခြွင်းချက် မရှိ လွှတ်ပေးဖို့လိုတယ်။ ဒီနေ့ လွှတ်ပေးတာက သူတို့လုပ်နေကြအတိုင်းပဲ။ သူတို့ အုပ်ချုပ်ရေးမှာ အကျပ်တည်းဖြစ်လာတဲ့အခါ နိုင်ငံတကာကို မျက်စိလှည့်ချင်တဲ့အတွက်ကြောင့်မို့လို့ လွှတ်ပေးတယ်လို့ ကျနော်တို့က သုံးသပ်မိတယ်”

လွတ်မြောက်လာသူတွေအတွက် ဝမ်းသာသလို အကျဉ်းထောင်တွေမှာ ကျန်နေခဲ့သူတွေလည်း ဒီတော်လှန် ရေးမှာ တစိတ်တဒေသ ပါဝင်နေတာကြောင့် အားတင်းထားဖို့ အားပေးချင်တဲ့အကြောင်း၊ ပြန်လွတ်မြောက် လာသူတွေဟာ အဖမ်းခံရချိန်မှာ၊ စစ်ကြောရေးကာလမှာ ရိုက်နှက်ညှဉ်းပန်းခံရတာတွေကြောင့် စိတ်ပိုင်း၊ လူပိုင်း ထိခိုက် နစ်နာတာတွေ ရှိမှာဖြစ်တဲ့အတွက် ဒါတွေကို မိသားစုဝင်တွေနဲ့ ပြည်သူတွေအချင်းချင်း ဖေးမကူညီပေးကြဖို့ကိုလည်း သူက ပြောပါတယ်။

(အကျဉ်းသား ၂၃၀၀ ကျော်ကို ပြန်လွှတ်ပေးမယ်လို့ သတင်းတွေ ထွက်ခဲ့တာကြောင့် ရန်ကုန် အင်းစိန်ထောင်ရှေ့မှာ စောင့်ဆိုင်းနေသူတွေကို ၂၀၂၁ ဇွန် ၃၀ ရက်နေ့က တွေ့ရစဉ်)

လွှတ်ပေးတဲ့အထဲမှာ နိုင်ငံ့ဝန်ထမ်း၊ ရပ်ကျေးအုပ်ချုပ်ရေးမှူးဟောင်းနဲ့ အမျိုးသား ဒီမိုကရေစီအဖွဲ့ချုပ်ပါတီ ဝင်တွေကို ချန်လှပ်ပြီး လွှတ်သင့်သူတွေကို ဇွန် ၃၀ ရက် မနက် ၉ နာရီမှာ ပြန်လွှတ်ဖို့ စစ်ကောင်စီက အကျဉ်းဦးစီးဌာနတွေကို ညွှန်ကြားထားတဲ့ လျှို့ဝှက်စာတွေလည်း ဒီကနေ့ ဖေ့စ်ဘွတ်ခ်လူမှုကွန်ရက် စာမျက်နှာတွေမှာ ပျံ့နှံ့ခဲ့ပါတယ်။

စစ်အာဏာရှင် ဆန့်ကျင်တာကြောင့် ပုဒ်မ ၅၀၅ ( က ) နဲ့ အမှုဖွင့် ဖမ်းဝရမ်းထုတ်ခံထားရတဲ့ အနုပညာရှင် တွေထဲက ၂၄ ယောက်ကိုလည်း မနေ့က ဇွန် ၂၉ ရက်မှာ အမှုရုပ်သိမ်းတယ်လို့ စစ်ကောင်စီက ကြေညာ ထားပါတယ်။

စစ်တပ်က အာဏာစသိမ်းတဲ့ ဖေဖော်ဝါရီ ၁ ရက်ကနေ ဇွန် ၂၉ ရက်အထိ စုစုပေါင်း အဖမ်းခံထားရသူ ၅၂၂၄ ယောက်ရှိပြီး အဲဒီအထဲကနေ ၂၂၂ ယောက်က ထောင်ဒဏ်တွေ ချမှတ်ခံထားရပြီးဖြစ်တယ်လို့ AAPP က ဇွန် ၂၉ ရက်မှာ ထုတ်ပြန်ထားပါတယ်။


RFA Burmese

https://www.rfa.org/burmese/news/prisoners-released-06302021084635.html

ဖမ်းထားသူတွေပြန်လွှတ်ရေး စစ်ကောင်စီကို ဂျပန် ဆက်လက်တောင်းဆိုမယ်

G20 အစည်းအဝေးမှာ တွေ့ရတဲ့ ဂျပန်နိုင်ငံခြားရေး ဝန်ကြီး မိုတေးဂိ

ဖမ်းဆီးထားသူတွေကို လွှတ်ပေးရေး အာဏာသိမ်း စစ်တပ်ကို ဂျပန်နိုင်ငံ အနေနဲ့ အပြင်းအထန် ဆက်လက် တောင်းဆိုသွားမှာ ဖြစ်တယ်လို့ ဂျပန်နိုင်ငံခြားရေး ဝန်ကြီး တိုရှိမစ်ဆု မိုတေးဂိက လောလောလတ်လတ် မှာပဲ ပြောခဲ့တယ် ဆိုပြီး ဂျပန် ပြည်တွင်း သတင်းဌာနတွေက ရေးနေပါတယ်။

စက်မှုထိပ်သီး နိုင်ငံ ၂၀ G20 ရဲ့ နိုင်ငံခြားရေး ဝန်ကြီးတွေ အီတလီနိုင်ငံ တောင်ပိုင်း၊ မတ်ထဲရာ Matera မြို့မှာ တွေ့ဆုံကြတုန်း၊ ဝန်ကြီး မိုတေးဂိဟာ အင်ဒိုနီရှား နိုင်ငံခြားရေး ဝန်ကြီး မစ္စ ရက်တနို မာဆုဒီ နဲ့ ဘရူနိူင်း ဒုနိုင်ငံခြားရေးဝန်ကြီး ဒါတို အီရဝန် ပီဟင်း ယူဆွဖ် တို့နဲ့လည်း သီးခြားဆီ တွေ့ဆုံခဲ့တယ်လို့ ဆိုပါတယ်။

အဲဒီ အာဆီယံ အဖွဲ့ဝင် နိုင်ငံတွေရဲ့ နိုင်ငံခြားရေး တာဝန်ရှိသူတွေနဲ့ တွေ့ဆုံတုန်းမှာ ဂျပန်နိုင်ငံရဲ့ မြန်မာဆိုင်ရာ သဘောထားတွေကို ဝန်ကြီး မိုတေးဂိ ထည့်သွင်း ပြောဆိုခဲ့တယ်လို့ ဆိုပါတယ်။

မြန်မာနိုင်ငံထဲထိ အာဆီယံ အထူးသံတမန် သွားရောက်ပြီး မြန်မာ့ အကျပ်အတည်း ပြဿနာတွေကို ကူညီဖြေရှင်းမယ် ဆိုတဲ့ အစီအစဥ်ကို ဂျပန်က ထောက်ခံကြောင်းလည်း ဝန်ကြီး မိုတေးဂိက ပြောခဲ့ပါတယ်။

စစ်အာဏာ အသိမ်းခံရတဲ့ နောက်ပိုင်း မြန်မာအရေးဟာ နိုင်ငံတကာ တွေ့ဆုံပွဲတွေမှာ ဦးစားပေး ထည့်သွင်းဆွေးနွေး ပြောဆိုစရာ အကြောင်းအရာ ဖြစ်နေပါတယ်။

အခု ဂျပန်နိုင်ငံခြားရေး ဝန်ကြီးတွေ့ဆုံ ခဲ့တဲ့ အာဆီယံနိုင်ငံတွေကို ကြည့်ရင်၊ ဘရူနိုင်းဟာ အာဆီယံ အလှည့်ကျ ဥက္ကဌ ဖြစ်နေသလို၊ အင်ဒိုနိုင်ငံခြားရေး ဝန်ကြီး မစ္စမာဆုဒီဟာလည်း မြန်မာအရေး အာဆီယံ အစည်းအဝေး ဖြစ်လာအောင် ကမကထလုပ် ဆော်ဩခဲ့သူ ဖြစ်ပါတယ်။

အီတလီနိုင်ငံ တောင်ပိုင်း၊ မတ်ထဲရာ Matera မြို့ EPA၊ G20 အစည်းအဝေး

BBC Burmese

https://www.bbc.com/burmese/live/burma-57652919

ကမာရွတ်မီဒီယာ အယ်ဒီတာချုပ် ကိုနေသန်မောင်ရဲ့ စစ်ကြောရေးအတွေ့ အကြုံ

စစ်ကောင်စီက အာဏာသိမ်းပြီးနောက်ပိုင်းမှာဖမ်းဆီးခံခဲ့ရတဲ့ကမာရွတ်မီဒီယာ အယ်ဒီတာချုပ်ကိုမောင်မောင်ထွေး(ခေါ်)ကိုနေသန်မောင်ဟာဇွန်လ ၁၄ရက်နေ့မှာ ပြန်လည်လွတ်မြောက်လာပြီး နောက်နေ့မှာ သူ့ကိုအမေရိကန်နိုင်ငံကို ပြန်ပို့ခံခဲ့ရပါတယ် ။

သူ့ကို ၂၀၂၁ ခုနှစ်မတ်လ ၉ ရက်နေ့က ရန်ကုန်မြို့ လှည်းတန်းမှာရှိတဲ့ ကမာရွတ်မီဒီယာ ရုံးခန်းမှာ ဖမ်းဆီးခဲ့တာ ဖြစ်ပြီး သူ့နဲ့ အတူ အယ်ဒီတာ ကိုဟန်သာငြိမ်လည်း ဖမ်းဆီးခံခဲ့ရပါတယ်။

မတ်လ ၉ရက်နေ့တုန်းက သူတို့ အဖမ်းခံခဲ့ရတဲ့ အခြေအနေကို ကိုနေသန်မောင်က ဘီဘီစီကို အခုလိုပြန် ပြောပါတယ်။

ကမာရွတ်မီဒီယာ အယ်ဒီတာချုပ် ကိုနေသန်မောင်

ဘီဘီစီ။ ။ ကမာရွတ်မီဒီယာကိုဘယ်လိုဝင်စီးခံရတာလဲ

ကိုနေသန်မောင်။ ။ကမာရွတ်မီဒီယာကို စစ်တပ်ကဝင်စီးတာက မတ်လ၉ရက်နေ့ နေ့ခင်း၁နာရီပါ။ အဲ့ဒီတုန်းက ကမာရွတ်ဒီယာရုံးမှာ ကျွန်တော်ရယ် ကိုဟန်သာငြိမ်းရယ် နှစ်ယောက်ပဲရှိတယ်။ ကျွှန်တော်တို့ သတင်းတစ်ခုကိုတည်းဖြတ်နေတဲ့အချိန် ကိုဟန်သာငြိမ်းက အောက်ကို ဆင်းသွားပြီး ပြန်ပြေးတက်လာတယ်။ ကိုနေသန် ကိုနေသန်တဲ့ ရုံးရှေ့မှာ ဟိုကောင် တွေရောက်နေပြီလို့ လာပြောတော့ အန္တရာယ်ကျပြီဆိုတာ မသိစိတ်က သိလိုက်တယ်။

အဲဒီတော့ ရဲလား ဘယ်သူတွေပါသေးလဲ ၊ရဲဆိုရင် ဆင်းတွေ့မလို့ မှန်ပြတင်းကနေ အောက်ကို လှမ်းကြည့်လိုက်တော့ စစ်သားတွေ ယူနီဖောင်းအပြည့် သေနတ်တွေနဲ့ စစ်ကား ၇စီး၊၈စီးလောက်ကိုတွေ့တော့ သတင်းခန်းထဲမှာပဲ ဆက်နေမယ်လို့ ဆုံးဖြတ်ပြီး တံခါးကို သော့ချထားလိုက်တယ်။

ကမာရွတ်မီဒီယာ ရုံးခန်းကို မတ်လ ၉ ရက်နေ့က ဝင်ရောက်စီးနင်း

အဲ့ဒီအချိန် ရုံးရှေ့က ဂိတ်တံခါးကို ရိုက်ချိုးနေတဲ့ အသံတွေကြားနေရတယ်။ အော်ဟစ်နေတဲ့ အသံတွေကြားရတယ်။ ခဏနေတော့ ခြံဝင်းထဲရောက်လာတယ်ထင်တယ်။အောက်ထပ်က ဧည့်ခန်းထဲမှာ ဝုန်းဒိုင်း ဝုန်းဒိုင်းနဲ့ ပစ္စည်းတွေ ရိုက်ချိုးဖျက်ဆီးနေတဲ့ အသံတွေကြားရတယ်။

အဲ့ဒီအသံတွေ အော်တဲ့ဟစ်တဲ့ အသံတွေအရ ဆိုရင် ကျွန်တော့်ကို ညီလေး ခဏလောက်လိုက်ခဲ့ပါလားလို့ အေးအေးဆေးဆေးနဲ့ လာခေါ်တာမျိုး မဖြစ်နိုင်တော့ဘူးဆိုတာ တွေးမိလိုက်တယ်။

နောက်ထပ် ၅မိနစ်လောက်နေတော့ အပေါ်ထပ်က ကျွန်တော်တို့ ရှိတဲ့ သတင်းခန်းထဲကို ဝုန်းဆို တံခါးဖျက်ဝင်လာပြီး သေနတ်တွေနဲ့ ချိန်တော့တာ။ ကျွန်တော်ကလည်း မပစ်ပါနဲ့ မပစ်ပါနဲ့ အသာတကြည် အဖမ်းခံပါ့မယ်လို့ အမြန်ပြောရတယ်။ သူတို့က ကျွန်တော်တို့ကို ခေါင်းငုံ့ခိုင်းပြီး အောက်ထပ်က ဧည့်ခန်းကို သွာ ခိုင်းတယ်။

ဧည့်ခန်းထဲမှာ ကျွန်တော်တို့ နှစ်ယောက်ကို ခေါင်းငုံ့ထိုင်ခိုင်း ထားပြီး ဘယ်သူက နေသန်မောင်လဲ ဘယ်သူက ဟန်သာငြိမ်းကလဲလို့ မေးတယ်။ လာဖမ်းတဲ့ အဖွဲ့ကို ဗိုလ်မှူးကြီး တစ်ယောက်ဦးဆောင်ပြီး ကျန်တဲ့စစ်သားတွေက တစ်ရုံးလုံးက ပစ္စည်းတွေကို သယ်ထုတ်သွားခဲ့ကြပါတယ်။ မှတ်ပုံတင်နံပတ်မေးတယ်။ အဖေနာမည်မေးတယ်။


ဧည့်ခန်းထဲမှာ သူတို့ ဘယ်သူ ဘယ်ဝါဆိုတာ စစ်ဆေးပြီးတော့ နောက်၄၅မိနစ်လောက်ကြာတော့ မျက်နှာကို အဝတ်နဲ့ အုပ်ပြီး ကျွန်တော့်ကို ကားတစ်စီးပေါ်ကို တင်လိုက်တယ်။ ကိုဟန်သာငြိမ်း ကိုလည်း ကားတစ်စီးပေါ်ကို တင်လိုက်တယ်။ ပြီးတော့ ကျွန်တော်တို့ကို ၈ မိုင် ကုန်းမြင့်သာ စစ်ဌာနချုပ်ကို ခေါ်သွားတယ်။ စစ်ဌာနချုပ်ရောက်တော့ ကျနော်တို့ကားကို ရေကန်စပ်နားမှာ ပါကင်ထိုးလိုက်ပြီးတော့ အဲဒီမှာ နာရီဝက်လောက်စောင့်ရတယ်။ နောက်တော့ကားက ပြည်လမ်းအတိုင်းမောင်းလာတယ်၊ ဝါယာလက်ကျော်လာပြီဆိုပြီး သူတို့ အချင်းချင်းပြောတဲ့ အသံတွေကြားရတော့ လှည်းကူးရဲမွန်ဘက်လို့ထင်နေတာ နောက် ၁၅ မိနစ်လောက်နေတော့ ရေကြည်အိုင်ရောက်သွားတယ်။ ရောက်တော့ ညနေ ၄ နာရီခွဲလောက်ရှိပြီ။မျက်နှာကိုတော့ အဝတ်နဲ့ အုပ်ထားတယ်။ အဲ့ဒီနောက် ကျော် ကျော် ခွခွ ငုံ့ငုံဆိုပြီး မျိုးစုံအော်ဟစ်ပြီးလူကို အခန်းတစ်ခန်းထဲကို တရွှတ်တိုက်ခေါ်သွားပြီးတယ်။ စစ်ကြောရေးအခန်းပေါ့နော် သံတိုင်တွေနဲ့ အဲ့ဒီ အခန်းမှာ ကိုဟန်သာက ‌ရောက်နေပြီးသား ညာဘက်အခြမ်းလောက်မှာ ဒူးထောက်ထိုင်ခိုင်းထားတယ်။ သူ့ကို လက်ထိတ်ခတ်ထားပြီးတော့ ကန်လိုက် အော်လိုက်လုပ်နေတယ်။ ကိုဟန်သာက ကျွန်တော် သတင်းထောက်ပါခင်ဗျာ။ သတင်းမီဒီယာသမားပါ။ ကျွန်တော် ဆန္ဒပြတဲ့သူ မဟုတ်ပါဘူးလို့ ပြောတယ်။ သူက သေချာပြောတာပဲ။ အဲဒါ အော်ရကောင်းလားဆိုပြီးတော့ ထပ်ရိုက်တယ်၊ဆဲတယ်၊ ကန်တယ်။ ပြီးတော့ ကျွန်တော်ကို နာမည် မေးတယ်။ အဖေ နာမည်မေးတယ်။ အသက်မေးတယ်။ ကျွန်တော်ကို လက်ထိတ်နောက်ပြန်ခတ် ပြီးတော့ အဲဒီအခန်းထဲက ဆွဲထုတ်သွားတယ်။ အဲ့ဒီကစပြီးကိုဟံသာနဲ့ မတွေ့‌တော့ပါဘူး။ အဲ့ဒီ့ ခြံဝင်းထဲက လုံခြင်းအိမ်ကလေးမှာ ဧည့်ခန်းထဲမှာ စားပွဲခုံတွေမှာထိုင်ပြီးတောက်လျှောက်စစ်တယ်။

ကျွန်တော့်ကို ဖမ်းသွားတဲ့ အင်္ဂါနေ့ ညကတည်းမအိပ်မနေ စစ်ခံလိုက်ရတာ ၃ရက်ကြာတယ်။ အဲ့ဒီ၃ရက်လုံးက အဖမ်းခံရကတည်းက လက်နောက်ပြန် လက်ထိပ်ခတ် မျက်နှာအဝတ်နဲ့ စည်းခံရတဲ့ ပုံစံအတိုင်းပဲ။ သူတို့မေးသမျှဖြေရတာ။ သူတို့မေးတာဖြေရင်း ပြောရင်းနဲ့ ရိုက်တာ။

ဘယ်နှစ်ခုနှစ်ကဘယ်မှာမွေးတယ်၊ မူလတန်းကနေ ဘယ်ကျောင်းတွေတက်တယ်။ ကိုယ်ရေးရာဇဝင် အသေးစိတ်ကို မေးပြီး ကိုဟန်သာဆီကရတာနဲ့ တိုက်မတိုက် တူမတူ စစ်တာ။ စစ်ပြီး သူတို့မသိတာတွေများလာရင် ရိုက်ကော။ အမှန်ပဲဖြေ‌ဖြေ မမှန်တာပဲ ဖြေဖြေရိုက်ခံရတာ။

ရေကြည်အိုင် စစ်ကြောရေး စခန်းတည်ရှိရာ

အဓိကက ကျွန်တော့်နားအုံကို နောက်က ပိတ်ပြီး နားစည်ကို ထိအောင်ရိုက်တာ။ အဲ့ဒီခံရတဲ့ဝေဒနာက တော်တော်ဆိုးတယ်။ တစ်ခါတစ်လေ မျက်နှာ ပါးစောင် ကို လက်သီးနဲ့ထိုးတယ်။ ပုခုံးကိုထိုး တယ်။လူကိုပိတ်ကန်တယ်။ မေးရင်းဖြေရင်း အသက်၂၀ လောက်မှာ ဒုက္ခသည်အဖြစ်နဲ့ထိုင်းနိုင်ငံရောက်တာ ရောက်သွားတယ်။နောက် အမေရိကန်မှာ ကျောင်းတွေပြီးပြီးတော့ မြန်မာပြည်ပြန်ရောက်လာတာကို အမေရိကန်အစိုးရကပဲ သက်သက်စေခိုင်းလို့ ရောက်လာတဲ့ပုံစံမျိုးပြောနေတာကို မဟုတ်ဘူးလို့ ရှင်းပြရတယ်။ ကိုယ်ပိုက်ဆံနဲ့ ကိုယ်ပြန်လာတာလို့ ပြောရ တယ်။နောက်တော့မှ ပတ်စပို့တွေ့သွားပြီး မင်းက အမေရိကန်နိုင်ငံသားခံထားတာ ဘာလို့ မပြောလဲဆိုပြီး မျက်နှာကိုလက်သီးနဲ့ထိုးတယ်။ ကျွန်တော် ဖုံးထားတာမဟုတ်ဘူးလို့ ပြောလို့ ပြန်ပြောရကောင်းလာဆိုပြီး ထပ်ထိုးတယ်။ နောက်ဆုံးတော့ ကျွန်တော့်ကို ပတ်စ်ပို့နံပါတ် မေးတယ် ။ ကျွန်တော်မမှတ်မိဘူးလေ။မြန်မာ မှတ်ပုံတင်နံပါတ်တော့မှတ်မိတယ် ပတ်စ်ပို့နံပါတ် မမှတ်မိကောင်းလာဆိုပြီး ထပ်နှိပ်စက်တယ်။အဲ့ဒီနောက်ပိုင်း ၃ရက်ကျော် ၄ ရက်လောက်ရောက်တော့ နှိပ်စက်တာတွေရပ်သွားတယ်။

မေးခွန်းတွေဖြေရတယ်။နှစ်နာရီတစ်ခါ လူချိန်းချိန်းပြီး လာမေးတယ်။လုံးဝ အိပ်လို့မရဘူး။ ၃ယောက်ကအော်ကြီးဟစ်ကျယ်နဲ့ အရက်နံ့တစ်ထောင်းထောင်းနဲ့စစ်တယ်။သူတို့ နှစ်နာရီပြီးသွားရင် နောက်နှစ်နာရီမှာ နောက်နှစ်ယောက်က လေသံချိုချိုလေးနဲ့ ‌အေးအေးဆေးဆေးပြောပြီး တရားဟောတယ်။

အဲ့လိုနည်းနဲ့ သုံးရက်ဆက်တိုက်ပေါ့နော်။ နှစ်ရက်လုံးလုံးက ရေမတိုက်ဘူး။ဘယ်လောက်တောင်းတောင်း မတိုက်ဘူး။ သုံးရက်မြောက်တဲ့ မနက်မှ ရေစတိုက်တယ်။ လေးရက်မြောက်တဲ့ နေ့မှ ထမင်းနည်းနည်း စကျွေးတယ်။ ထမင်းကျွေးပြီးနောက်ပိုင်းတော့ ကိုယ့်ကို မသတ်တော့ဘူးဆိုတာ သိလိုက်ရပြီ။ ရေတိုက်ပြီ ထမင်းကျွေးပြီဆိုရင်တော့ အသက်ရှင်နိုင်ပြီပေါ့ ။အဲ့ဒီ စိတ်နဲ့ အားတင်းပြီး ၁၅ရက်လုံးလုံးကို ကျော်ဖြတ်ခဲ့ရတာပါ။

ကိုဟန်သာငြိမ်း

ဘီဘီစီ။ ။ မေးနေ စစ်နေတုန်း နှိပ်စက်ခံနေရတဲ့ပုံစံမျိုး ၁၅ ရက် လုံးလုံး ဖြတ်သန်းရတာလား

ကိုနေသန်မောင်။ ။ မေးတဲ့ စစ်တဲ့နေရာတွေကတော့ အမြဲတမ်းပြောင်းတယ်။ ပထမ၃ရက်ခွဲလောက် အဲ့ဒီနေရာမှာထားပြီးတော့ ကိုဟန်သာ နေခဲ့တဲ့ အခန်းကို ကျွန်တော့်ကိုရွှေ့လိုက်တယ်။ ကိုဟန်သာကို အခြားအခန်းကိုပို့လိုက်တယ်။ အဲ့ဒီမှာ ကိုဟန်သာ ဖြေနေတဲ့ အသံစစ်နေတဲ့ အသံသဲ့သဲ့လေး ကြားရတယ်။ခြေသုံးချောင်းမညီတဲ့ ထိုင်ခုံတစ်လုံးပေါ်မှာ တစ်ညလုံးထိုင်ခိုင်းထားတယ်။ အဲ့ဒီမှာလုံးဝမစစ်ဘူး။ ထမင်းလာကြွေးတဲ့အချိန် မျက်နှာချွတ်ပေးတော့ စီစီတီဗီတပ်ထားတာကို တွေ့ရတယ်။ အဲ့ဒီမှာ တစ်ရက်ခွဲ ထိုင်ခုံပေါ်မှာ တစ်ညလုံးနေရပြီးတော့ နောက်ထပ် အခန်းတစ်ခုကိုရွေ့တယ်။ အဲ့ဒီအခန်းကနေ ကိုဟံသာထပ်နေတဲ့ အခန်းကို ထပ်‌ရွှေ့တယ်။ အဲ့ဒီမှာ ကိုဟန်သာကို အိမ်ကိုလားမသိဘူး ရွှေ့သွားတယ်။

သူတို့က ၂ရက် ၃ရက် တစ်ခါနေရာရွှေ့တယ်။ တတိယမြောက်ရွှေ့ရတဲ့ နေရာရောက်ပြီး ၈ရက်ကြာသွားတဲ့အချိန်မှာတော့ မျက်နှာကိုချွတ်ပေးတယ်။ကိုယ်ဖြေထားတဲ့ဟာတွေ အားလုံးကို စာရွက်နဲ့ လာဖတ်ပြတယ်။ ၈ရက်ကြာတော့ စစ်တဲ့ကိစ္စတွေအားလုံးပြီးသွားတယ်။

၈ရက်ကြာ စစ်ပြီးသွားတဲ့ အချိန် ထောင်ဘယ်တော့ ပို့မှာလဲလို့ မေးတော့ ကိုနေသန်တို့ ကိုဟန်သာငြိမ်းတို့က ဘာမှအပြစ်မရှိလို့ ထောင်လည်း ပို့စရာမရှိဘူး ဒီမှာခဏလောက်ထားပြီး ပြန်လွှတ်ပေးမှာပါလို့ ဖြေတယ်။

ကျွန်တော်တို့ ရုံးကိုဝင်ဖမ်း ရည်ရွယ်ချက်ရှိရှိနဲ့ တစ်ရုံးလိုဖျက်ဆီးခဲ့တာ ၈ ရက် လောက်စစ်ပြီးတာနဲ့ ဘယ်လို ပြန်လွှတ်ပါ့မလဲ။ ကျွန်တော်သိတာပေါ့။

၉ ရက်မြောက်တဲ့နေ့မှာ လုံးချင်းအိမ်လေးကိုရွေ့လိုက်ပြီး လူတစ်ယောက်နဲ့ ထားတယ်။ အဲ့ဒီမှာ ၄ ရက်လောက် ထပ်နေခဲ့ရပြီး ကိုဟန်သာကလည်း ဘေးကလုံးချင်း အိမ်လေးမှာရောက်နေပြီ။ ကိုယ်တို့နှစ်ယောက်ကို စစ်တဲ့ကိစ္စကလည်း ပြီးသွားပြီဆို‌တော့ မျက်နှာကို စည်းတာတွေလည်း မလုပ်တော့ဘူး။ အပေါ့အပါးသွားတဲ့သွားတဲ့ အချိန်လောက်ပဲ မျက်နှာစည်းရပြီး လက်ထိတ်ကတော့ အဲ့ဒီကထွက်တဲ့ အချိန်ထိခတ်ထားတယ်။


ဘီဘီစီ။ ။ ကိုဟန်သာနဲ့ ကိုနေသန်က ထောင်ကိုပို့တဲ့ အချိန်မှပြန်တွေ့ရတာလား။ စစ်ကြောရေးကနေ ထောင်ကို ဘယ်နှစ်ရက်မြောက်မှာ သွားရတာလဲ။

ကိုနေသန်မောင်။ ။ စစ်ကြောရေးမှာ စုစုပေါင်း ၁၅ ရက် ကြာသွားတယ်။ အဲ့ဒီမှာ ၅နေရာလောက် ရွှေ့ရပြီး မတ်လ၂၃ရက်နေ့ ညနေ ၆နာရီလောက်မှာ ကျွန်တော့်ကိုမျက်နှာအုပ် အပြင်ထုတ်သွားပြီး ကားတစ်စီးပေါ်ရောက်သွားတဲ့ အချိန်မှာ ဘေးမှာ ကိုဟန်သာရောက်နေတယ်ဆိုတာ သိလိုက်တယ်။ အဲ့ဒီကနေ ၈မိုင်က အောင်သပြေ စစ်ကြောရေးကို ရောက်သွားပြီး မျက်နှာအုပ်ထားတာတွေ ချွတ်ပေးလိုက်တော့ ကိုဟန်သာကိုတွေ့ပြီး စနူတ်ဆက်ကြတယ်။ နောက်တော့ ကမာရွတ်ရဲစခန်းက ရဲတွေရောက်လာပြီး ဓာတ်ပုံတွေရိုက် မှတ်တမ်းတွေယူပြီး လက်ထိပ်ခတ်ပြီး အချုပ်ကားနဲ့ အင်းစိန် သီးသန့်ထောင်ကို ပို့လိုက်တယ်။ ထောင်ရောက်တော့ ည၁၀နာရီခွဲလောက်ရှိနေပြီ။

ဘီဘီစီ။ ။ စစ်ကြောရေးမှာ အခြားဘယ်သူတွေနဲ့ ဆုံခဲ့ရသေးလဲ။ သူတို့ အခြေနေကော ဘယ်လိုကြားရလဲ။

ကိုနေသန်မောင်။ ။ ကျွန်တော်နဲ့ တူတူနေခဲ့ရတဲ့ ကိုရဲလှိုင် ဆိုတာရှိတယ်။ ရှမ်းပြည်နယ်တောင်ပိုင်း ပင်လုံက NLD ခရိုင်ပါတီဝင်၊ စည်ပင်မှာလည်း ခရိုင် ဥက္ကဋ္ဌလို့ သိရတယ်။ ရှမ်းပြည် စီမံဘဏ္ဍာဝန်ကြီး ဦးစိုးညွှန့်လွင်နဲ့ တူတူဖမ်းခံရတာ။ သူတို့နှစ်ယောက်ကို မတ်လ ၆ ရက်နေ့ကဖမ်းပြီး ရက်ရက်စက်စက် နှိပ်စက်တာ။ ကျွန်တော့်ကို စစ်နေတဲ့အချိန် ‌အော်ကြီးဟစ်ကျယ် ငိုသံတွေ အော်သံတွေကြားရတယ်။ ကိုဟန်သာငြိမ်း ခံနေရတယ်ထင်ပြီး အရမ်းစိုးရိမ်သွားသေးတယ်။ သူနဲ့ ပြန်မေးကြည့်မှာ ကိုရဲလှိုင်ကို စစ်နေတယ်ဆိုတာ သိရတယ်။ သူ့ကို လက်ထိတ်ခတ်ထားပြီး လက်ကိုစားပွဲတင်ခိုင်း တုတ်နဲ့ရိုက်တာ လက်ထိပ်နဲ့ လက်လယ် ဟက်တက်ကွဲပြီး ပဲ့ထွက်သွားတယ်။ သူ့ တစ်ကိုယ်လုံးဖူးယောင်နေတယ်။ လူ သုံးယောက်က ချုပ်ပြီး ပိတ်ပိတ်ထိုးတော့ နံတွေဘာတွေ ဖူးရောင်ကုန်တာ။ကျွန်တော်နဲ့တွေ့တဲ့အချိန် သူ စစ်ကြောရေးပြီးတဲ့ တစ်ပတ်ကျော် နှစ်ပတ်လောက်ရှိတာတောင် တစ်ကိုယ်လုံးဖူးရောင်နေတယ်။ မျက်နှာမှာလည်း ရောင်ကိုင်းနေတာ။ သူ့ကို စောင့်စောင့်ပြီး ပိတ်ကန်ကြတာ ခွေခွေလဲသွားတယ်တဲ့ ။ လူက ဗလတောင့်တောင့် ထောင်ထောင်မောင်းမောင်း။ သူ့ကို မျိုးစုံနှိပ်စက်တာ။ သူ့ကို ဘာကြောင့် ဒီလောက် နှိပ်စက်တာလဲဆို နားမလည်ဘူးလို့ ကျွန်တော့်ကို ပြောတယ်။ ဆရာဦးစိုးညွှန့်လွင်ကို လည်း ရက်ရက်စက်စက်နှိပ်စက်ပြီး ဖင်ဘူးတောင်းထောင်လောက်အောင် ရိုက်ကြတာ။ အကိုတို့ကို CRPH အဖွဲ့ဝင်တွေလို့ ထင်ပြီးနှိပ်စက်တာဖြစ်နိုင်တယ်လို့ ကျွန်တော်ကပြောလိုက်တော့ ဟုတ်နိုင်တယ်လို့ သူကပြန်ပြောပါတယ်။ ကိုဟန်သာနဲ့ကျွန်တော်တို့ စစ်ကြောရေးက မထွက်ခင် သူတို့ကို ထောင်အရင်ပို့လိုက်တာ။ ကျွန်တော့်တို့ ထောင်ကိုရောက်တော့ သူတို့ နှစ်ယောက်ကို ရှမ်းပြည်မှာ ရမန်ယူဖို့ရှိတယ်ဆိုပြီး တောင်ကြီးထောင်ကိုပို့ လိုက်တယ်။ထောင်မှာတော့ ပြန်မဆုံတော့ဘူး။သူတို့နှစ်ယောက်က ကျွန်တော်နဲ့ကိုဟန်သာတို့ ခံရတာထက် ရက်ရက်စက်စက် ပိုခံရတယ်လို့ နားလည်ပါတယ်။


ဘီဘီစီ။ ။ စစ်မေးတဲ့အခါမှာ သတင်းမီဒီယာနဲ့ပတ်သက်ပြီးမေးတာလား။ စီအာပီအိတ်ချ်နဲ့ ပတ်သက်တာတွေမေးတာလား။

ကိုနေသန်မောင်။ ။ အများစုကတော့ ကျွန်တော် တို့ကုမ္ပဏီ လည်ပတ်ပုံ အကြောင်းကိုမေးတယ်။ အာဏာသိမ်းပြီး နောက်ပိုင်း ကမာရွတ်မီဒီယာမှာ တင်ဆက်တဲ့ သူတို့မကြိုက်တဲ့ သတင်းတွေကို စကရင်ရှော့ ရိုက်ထားတာတွေရှိတယ်။ ကံကောင်းတာလား ကံဆိုးတာလားတော့ ကျွန်တော့်ကို ဖမ်းပြီးပြီးချင်းမှာ ကျွန်တော်တို့ ဖေ့စ်ဘုခ်ပေ့ကြီးက အလုပ်မလုပ်တော့ဘူး ပျောက်သွားတယ်။ ပျောက်သွားတော့ အဲ့ဒီထဲက ဟာတွေကို တစ်ပုဒ်ချင်းမေးပြီး အရိုက်မခံရတော့ဘူး။ အဲ့ဒါလေးကံကောင်းသွားတယ်။

ကျွန်တော်တို့ မဖမ်းခင်က သူတို့ စကရင်ရှော့လုပ်ထားတဲ့ သတင်း ၄ ၊ ၅ ပုဒ်ကို ပြပြီး ဒီသတင်းဘာကြောင့်ရေးလဲ သတင်းဘယ်က ရလဲဆိုပြီးတော့ပဲ အမေးခံရတယ်။ ဒီသတင်းက ရိုက်တာက သတင်း အေပီက သတင်းလို့ ပြန်ဖြေရတယ်။ အမေရိကမှာ ပိတ်မိနေတဲ့ ဒေါ်လာတစ်ဘီလီယံကို ဗဟိုဘဏ်ကထုတ်တာကို အမေရိကန်အစိုးရကို ပိတ်ထားတဲ့ ရိုက်တာကရေးတဲ့ သတင်းကို မြန်မာလို့ပြန်တာလို့ ပြောတာကို သူတို့က ရိုက်တာလည်း မသိဘူး။ အေပီဆိုတာလည်း မသိဘူး။ သူတို့က ကျွန်တော်တို့ သတင်းသမားတွေ လုပ်ငန်းကို နားမလည်တော့ နိုင်ငံခြားသတင်းထောက်တွေနဲ့ လက်ဝါးချင်းရိုက်ပြီး သတင်းရောင်းစားတယ် တိုင်းပြည် အန္တရာယ်ဖြစ်စေမယ့် သတင်းတွေဖန်တီးတယ်လို့ သူတို့ကနားလည်တာ။ တစ်ကမ္ဘာလုံးသတင်း မီဒီယာတွေက ကွန်ရက်လိုချိတ်ဆက်ပြီး သတင်းအချက်အလက်ကို ဒီလိုဖလှယ်ကြတာ။ ဝယ်သုံးမယ်ဆိုရင်လည်း subscribe လုပ်ပြီးဝယ်ရတယ်ဆိုတာ သူတို့နားမလည်ဘူး။ ကိုဟန်သာကိုလည်း နိုင်ငံခြားကို သတင်းရောင်းစားတယ်ဆိုပြီး စွပ်စွဲတာ။ ဒီလိုသတင်း မီဒီယာ အကြောင်း နကန်းတစ်လုံးမှ နားမလည်တဲ့သူတွေ စစ်မေးတာ ရိုက်နှက်တာခံရတော့ ကျွန်တော်တို့ ဘယ်လောက် ဖြေရှင်းပြပြ သူတို့မှနားမလည်တာ။ တော်တော်ပြောရခက်တယ် နိုင်ငံတကာလုပ်နေတဲ့လုပ်ငန်းတွေ၊ သတင်းခန်းလည်ပတ်တာတွေ အဲ့ဒါတွေလည်း သူတို့မသိတော့ ကမာရွတ်က ဝင်ငွေဘယ်ကရလဲ။ဘယ်သူက ထောက်ပံ့လဲ။ ဝန်ထမ်းတွေ ဘယ်နှစ်ယောက်ကို ပိုက်ဆံဘယ်လောက်ပေးလဲ။နောက်ဆုံး အနှစ်ချုပ်လိုက်တော့ ကမာရွတ်မီဒီယာ ဘယ်က ဝင်ငွေရလဲဆိုတာက အဓိကဖြစ်သွားတယ်။ ကျွန်တော့်ကို အဓိက အဲ့ဒါမေးတာ။

ကိုဟန်သာဖြေတာ ကျွန်တော်ဖြေတာနဲ့တိုက်ကြည့်ပြီး နောက်ဆုံး ၈ ရက်ကျမှ ကျွန်တော်တို့ရတဲ့ လစဥ်အလိုက် နှစ်စဥ်အလိုက်ဝင်ငွေတွေက အကြမ်းဖျင်းအားဖြင့် စာရင်းကိုက်သွားတယ်။ အဲ့ဒီကျမှ သူတို့ငြိမ်သွားတာဗျ။နောက်ဆုံး ကျွန်တော်တို့ငွေဘယ်ကရလဲ သဲကြီးမဲကြီး လိုက်စစ်ပြီး စစ်ကြောရေးကာလ နိဂုံးချုပ်သွားတာ။ကံကောင်းတာက ကျွန်တော့် ဖုန်းကို စစ်ကြောရေး မရောက်ခင်မှာ သူတို့ဘာလုပ်လိုက်လဲမသိဘူး ပျက်သွားတော့ လက်ဗွေနဲ့ သူတို့ဖွင့်တာဖွင့်လို့မရဘူး။ ဖုန်းပွင့်သွားရင် အများကြီး ရိုက်ခံရဦးမှာ။

ကိုဟန်သာက သူ့ဖုန်းပက်စ်ဝက်ကို မပေးဘူး။ သူ့ဖုန်းထဲမှာ အရေးကြီးတဲ့ အချက်အလက်တွေ ရှိတာသိတော့ ဆယ်ကြိမ်လောက်မှားပြောရင် ဖုန်းလော့ကျသွားမှာ သိတော့ မှားမှားပြီး ပြောတယ်။အဲ့ဒီအချိန်မှာ သူ့အင်္ကျီကို ချွတ်ပြီး စီးကရက်မီးနဲ့တို့တယ်။ လက်သီးတွေနဲ့ ထိုးတယ်၊ရေခဲတုံးပေါ်မှာ ခြေထောက်တင်ခိုင်းပြီး သုံးလေး နာရီလောက် အကြာကြီးထားတယ်။ အဲ့ဒီအ ချိန်မှာ ဖုန်းပက်စ်ဝပ်ကို ၅ကြိမ်လောက်မှားပေးပြီးသွားပြီ။ ဟိုလူတွေက နည်းမျိုးစုံနဲ့နှိပ်စက်တယ်။ နောက်ဆုံးတော့ ဘောင်းဘီချွတ် မုဒိန်းဝိုင်းကျင့်မယ်လို့ ခြိမ်းခြောက်ခံရတော့မှာ မလုပ်ပါနဲ့ တောင်းပန်ပါတယ်လို့ ပြောပြီး ကိုဟန်သာ ပက်စ်ဝက် ပေးလိုက်ရတယ်။

ဖုန်းထဲမှာ ဒေါ်အောင်ဆန်းစုကြည်နဲ့ တွဲရိုက်ထားတဲ့ဓာတ်ပုံ၊ ကိုမင်းကိုနိုင်တဲ့တွဲရိုက်ထားတဲ့ ဓာတ်ပုံတွေ သမ္မတကြီးဦးထင်ကျော်ပုံတွေတွေ့ပြီး သူ့ကို ပြပြပြီးတော့ရိုက်တာ။ ကျွန်တော် တော်တော် စိတ်မကောင်းဘူး။ ကျွန်တော်နဲ့ ပြန်တွေ့တဲ့အချိန် ကိုဟန်သာပြောပြတာကို နားထောင်ပြီး ဒီလောက် လူမဆန်တာ ရက်ရက်စက်စက်လုပ်သလားပေါ့။ ဒေါ်အောင်ဆန်းစုကြည်နဲ့ ဓာတ်ပုံတွဲရိုက်တာ နိုင်ငံရေးသမားတွေနဲ့ ကျွန်တော်တို့ သတင်းသမားတွေ လုပ်ငန်းအရ ဆက်ဆံတဲ့ကိစ္စ တယ်လီဖုန်းဆက်ပြီး စကားပြောတဲ့ကိစ္စက ရာဇဝတ်မှုလား။ သတင်းစာပညာနဲ့ အသက်မွေးဝမ်းကြောင်းပြုနေတဲ့ သူတွေက ရာဇဝတ်မှုကျုးလွန်နေတာမှ မဟုတ်တာ။

သူပြောတာ ကြားကြားချင်း တော်တော်စိတ်မကောင်းဘူး အခုချိန်အထိလည်းဝမ်းနည်းတယ်။ ကိုဟန်သာလည်း စိတ်ဒဏ်ရာတော်တော်ရသွားမှာ။ ကျွန်တော်တို့ နှစ်ယောက်ကံကောင်းတာက ဝိပဿနာတရားနေ့တိုင်းအားထုတ်တာကနေ စိတ်ဓာတ်ခွန်အားရပြီး ဒီငရဲခန်းကို ဖြတ်သန်းနိုင်ခဲ့တယ်လို့ ပြောရမှာပေါ့ဗျာ။

အင်းစိန်အကျဉ်းထောင်ထဲမှာ အချုပ်ကျနေသူ ၇၀၀ ကျော် ပြန်လွတ်ဖို့ရှိနေတာကြောင့် မိသားစုဝင်တွေ ထောင်ရှေ့မှာ ဇွန်လ ၃၀ ရက်မှာ လာစောင့်နေကြတာဖြစ်ပါတယ်။

အင်းစိန်အကျဉ်းထောင်ထဲမှာ အချုပ်ကျနေသူ ၇၀၀ ကျော် ပြန်လွတ်ဖို့ရှိနေတာကြောင့် မိသားစုဝင်တွေ ထောင်ရှေ့မှာ ဇွန်လ ၃၀ ရက်မှာ လာစောင့်နေကြတာဖြစ်ပါတယ်။

ဘီဘီစီ။ ။ ကိုဟန်သာက ပုံမှန်အခြေအနေမှာဆို တက်တက်ကြွကြွနဲ့ အလုပ်လုပ်တတ်တဲ့သူဆိုတော့ အင်းစိန်ထောင်ရောက်တော့ကော သူ့ ရဲ့ စိတ်ပိုင်းအခြေ အနေကဘယ်လိုရှိလဲ။ အဆင်ပြေရဲ့လား။

ကိုနေသန်မောင်။ ။အကြမ်းအားဖြင့်တော့ အဆင်ပြေပါတယ်။ စစ်ကြောရေးမှာသာ စကားမပြောရဘဲ ၂၄နာရီလုံးလုံး ထိုင်နေရတာဆိုတော့ အဲဒီမှာသာ ကျွန်တော်တို့ စိတ်ပိုင်းဆိုင်ရာတွေ တော်တော်ထိခိုက်ခဲ့တာပါ။

သီးသန့်ထောင်ရောက်တော့ အခြားဖမ်းဆီးခံထားရတဲ့လူ နှစ်ထောင်လောက်နဲ့တွေ့ရတယ်။ စကား‌ပြောရတယ်။ အဲ့ဒီမှာ စိတ်ပိုင်းဆိုင်ရာတွေ နည်းနည်းလေး သက်သာတယ်။ ဟိုရောက်တော့ လူငယ်တွေအများကြီးတွေ့ရတယ်။ ဂျန်ဇီတွေတွေ့ရတယ်။ ဆန္ဒပြမှုနဲ့ အဖမ်းခံရတဲ့ သူတွေတွေ့ ရတယ်။ နိုင်ငံရေးသမားတွေ တွေ့ရတယ်။သူတို့ကို ကျွန်တော်တို့ရဲ့ ငရဲခန်း အတွေ့အကြုံ တွေပြောပြတော့ တအံ့တသြတွေဖြစ်ကြတယ်။

ထောင်ရောက်တော့ ကျွန်တော်တို့ ပုံမှန်တရားထိုင်တယ်။ လူတွေနဲ့ပုံမှန် ထိတွေ့ခွင့် ရတော့ အဲ့ဒီမှာ နည်းနည်းလေး သက်သာလာတယ်။

ဘီဘီစီ။ ။ အင်းစိန်ထောင်ရောက်တော့ကော ‌ရွှေပြည်သာစစ်ကြောရေးကို ဖြတ်ခဲ့တဲ့သူတွေဆီက ဆိုးရွားတဲ့ အတွေ့အကြုံတွေကြားခဲ့သေးလား

ကိုနေသန်မောင်။ ။ တရားရုံးထုတ်လို့ မြို့နယ်တူရင် သီးသန့်ထောင်ဘက်က လူတွေအများကြီးပါလာတယ်။ဒဏ်ရာဒဏ်ချက် ရတဲ့သူတွေလည်းပါလာတော့ သူတို့နဲ့စကားပြောတဲ့အခါ သူတို့က ‌များသောအားဖြင့် ရွှေပြည်သာစစ်ကြောရေးမှာ တစ်ည နှစ်ညလောက်နေခဲ့ရတယ်။ ဟိုရောက်ရင် သူတို့ကို ဒဏ်ရာရတဲ့သူနဲ့ မရတဲ့သူ လူခွဲတယ်တဲ့။ ဒဏ်ရာမရတဲ့သူတွေကို မရသေးလို့ဆိုပြီး ဒဏ်ရာရအောင် ထပ်ရိုက်တယ်။ ထပ်ရိုက်ပြီးတော့မှ ထောင်ကိုပို့တာ။ ထောင်ထဲကို ငါးဆယ် တစ်ရာ သီးသန့်ဘက်မှာပုံမှန်ဝင်လာကြတယ်။ ကျွန်တော် သီးသန့်ထောင်မှာ ၁၃ ရက် ရှိနေတဲ့အချိန် နေ့တိုင်း ဝင်လာတဲ့သူတွေထဲမှာ ပန်းဆိုးတန်းမှာ ဆန္ဒပြတဲ့ ကဗျာဆရာတွေ၊ ဗကသကျောင်းသားတွေဆို ရာဘာကျည်ပစ်ခံထားရလို့ ဒဏ်ရာ ၇ ချက် လောက်ရှိတယ်။တစ်ချို့ဆို နဖူးတည့်တည့်မှာရှိတယ်။ အဲ့ဒီအချိန်မှာ ရွှေပြည်သာတို့ လှိုင်သာယာတို့မှာ စစ်အုပ်ချုပ်‌‌ရေးကြေညာတယ်ဆိုတာ အဲ့ဒီကျမှသိတာ။ သတင်းစာလည်း မဖတ်ရတော့ မသိဘူး။ စစ်အုပ်ချုပ်ရေးကြေညာပြီးနောက်ပိုင်း ရက်ရက်စက်စက်ရိုက်နှက်ခံရတဲ့ သူတွေ အများကြီးကို တွေ့ရတယ်။

ဘီဘီစီ။ ။ အင်းစိန်ထောင်ရောက်တဲ့အချိန် လူတွေနဲထိတွေ့ခွင့်ပိုရလာတယ်။ အနုပညာရှင်တွေထဲကကောဘယ်သူတွေနဲ့ တွေ့ခဲ့ရလဲ

ကိုနေသန်မောင်။ ။အနှပညာရှင်တွေထဲကတော့ ကိုလူမင်း၊ကိုမင်းထင်ကိုကိုကြီးတို့အပြင် အဆိုတော်စောဖိုးခွားတို့ကိုလည်းတွေ့ခဲ့ရပါတယ်။သူတို့ ကျန်းကျန်းမာမာ ရှိကြပါတယ်။

ဘီဘီစီ။ ။ တရားသေ လွှတ်ပေးမယ်ဆိုတာ ဘယ်လိုသိရလဲ။ အဲ့ဒီအချိန်မှာ ကိုဟန်သာရဲ့အခြေအနေကကော ဘယ်လိုရှိလဲ။ အဲ့ဒါလေးပြောပြပေးပါဦး။

ကိုနေသန်မောင်။ ။သံရုံးနဲ့ ကျွန်တော်က နှစ်ပတ် တစ်ခါလောက် ဖုန်းပြောခွင့်ရပါတယ်။ အမေရိကန်ဘက် အစိုးရဘက်က ကျွန်တော်လွတ်မြောက်ရေးအတွက် ကြိုးစားနေတဲ့ အကြောင်း အမြဲတမ်းပြောပါတယ်။ ကျွန်တော်နဲ့တူတူ ကိုဟန်သာ လွတ်မြောက်ရေးပါ ကြိုးစားပေးပါ ကျွန်တော်တို့ တူတူ လွတ်ချင်ပါတယ်လို့ ကျွန်တော်ကလည်း သံရုံးကိုပြောပါတယ်။ သံရုံးကလည်း သူတို့အတတ်နိုင်ဆုံး ကြိုးစားပါမယ်လို့ ပြန်ပြောပါတယ်။

ကျွန်တော့်ကို လွှတ်မယ်ဆိုတဲ သတင်းကတော့ မေလကုန်မှာကတည်းက ပြန့်နေပြီ။ ကျွန်တော်ကတော့ မမျှော်လင့်ပေမဲ့ တစ်ချိန်ချိန်ကျရင် လွတ်မယ်ဆိုတာ သိနေတယ်။

ဒါပေမယ့် ကျွန်တော်ဘယ်အချိန်မှာလွတ်ချင်လဲဆိုရင် ကိုဟန်သာနဲ့ ကျန်တဲ့သူအားလုံးနဲ့ တူတူ တော်လှန်ရေး အောင်သွားတဲ့ အချိန်မှာ လွတ်ချင်တယ်။ ဒါမှမဟုတ် နိုင်ငံတကာဖိအားကြောင့် လွှတ်ပေးတဲ့ အချိန်မှာ လွတ်ချင်တယ်။ တစ်ယောက်တည်း လွတ်မသွားချင်ဘူး။ အဲ့လိုလွတ်သွားရင် မျှတမှုမရှိဘူးလို့ ကျွန်တော့်ကိုယ် ကျွန်တော် ခံစားရတယ်။ နောက်ဆုံးတော့ ကျွန်တော် မရှောင်နိုင်တဲ့နေ့ကို ရောက်လာတာပါပဲ။ ကျွန်တော့်ကို မလွှတ်ခင် ၅ရက်လောက်မှာ မြို့နယ်မှူး ထောင်ထဲရောက်လာပြီးတော့ လာတွေ့ပါတယ်။ တွေ့ပြီး လေယာဉ်လက်မှတ်စီစဥ်ဖို့ ကိစ္စ ပြောပါတယ်။ အဲ့ဒါကြောင့် သိလိုက်ပြီ ကျွန်တော့်ကို လွှတ်တော့မယ်ဆိုတာ။ ကျွန်တော့်ကို ဆွဲထားတဲ့ အမှုတွေအားလုံးက ကိုဟန်သာနဲ့တူတူ စွဲထားတာဆိုတော့ ကျွန်တော့်ကိုတော့ အမှုကပလပ်ပြီး ကိုဟန်သာကိုကောလို့ မေးတော့ ကိုဟန်သာနဲ့ပတ်သက်ပြီး ဘာမှညွှန်ကြားထားတာမရှိပါဘူးတဲ့။

ဥပဒေအရတော့ ဒီအမှုကို ပလပ်ရင် ဒီအမှုနဲ့ပတ်သက်တဲ့ နှစ်ယောက်လုံးကို လွှတ်ရမှာ။ မလွှတ်ပဲနဲ့လည်း ချန်ထားနိုင်လို့ စိတ်ပိုင်းဆိုင်ရာ ပြင်ဆင်ထားပါလို့ ကိုဟန်သာကို ပြောရတယ်။ ကျွန်တော်တို့ နှစ်ယောက်က ဒီအခြေအနေကြီး ကိုရှောင်လွှဲနိုင်မှာ မဟုတ်ဘူး။ ကျွန်တော်တို့ တစ်ယောက်ကို တစ်ယောက် အားပေးပါတယ်။ အားပေးပြီးတော့ အတတ်နိုင်ဆုံး အမြန်ဆုံးလွတ်မြောက်အောင်ကြိုးစားမယ်လို့ သူ့ကိုသေသေချာချာမှာခဲ့ပါတယ်။ သူလည်း အခြေအနေကို ကောင်းကောင်းနားလည်ပါတယ်။ ကျွန်တော်တို့ နှစ်ယောက်ကို လက်ထိတ်သီးခြားခတ်ပြီး ရုံးထုတ်တော့ ကျွန်တော့်ကိုပဲ လွှတ်တော့မယ် ကိုဟန်သာကို မလွှတ်တော့ဘူးဆိုတာ သိလိုက်ပြီ။

ကျွန်တော့်ကို အမှုပလပ်ပြီးပြီဆိုတာနဲ့ ကိုဟန်သာကို တွေ့ခွင့်တောင်းပြီး ကျွန်တော်တို့နှစ်ယောက် အမြန်ဆုံးပြန်တွေ့ကြမယ်လို့၊ ရဲက ကျွန်တော့်ကို တရားရုံးက ထုတ်သွားတဲ့အချိန်မှာ ကိုဟန်သာ တစ်ယောက်တည်း တရားရုံးမှာကျန်ခဲ့တယ်။ ကျွန်တော့် ရဲဘော်လွတ်စေချင်တာပေါ့ဗျာ။

ဘီဘီစီ။ ။ အမှုတွေစိစစ်နေတယ်ဆိုတဲ့သတင်းတွေထွက်နေတော့ အမြန်ဆုံးပြန်လွှတ်မယ်လို့ ယူဆ မျှော်မှန်းရပါတယ်။ မြန်မာပြည်ကနေ အမေရိကန်ကိုပြန်တဲ့ ခရီး လေယာဥ်စီးတဲ့ အချိန်မှာ ဘယ်လိုခံစားရလဲ။

ကိုနေသန်မောင်။ ။ လေယာဥ်ပေါ်တက်ပြီး ထွက်လာတဲ့အချိန်ဟာ ကျွန်တော့်ရင်ထဲမှာ ဟာလာဟင်းကြီးပါ ။ ပျော်ရွှင်မှုဆိုတာ လုံးဝမရှိဘူး။ကျွန်တော့်လွတ်မြောက်မှုအတွက် တစ်ရက်မှ စိတ်မချမ်းသာဘူး။ တတ်နိုင်ရင် ထောင်ထဲ ပြန်သွားချင်တယ် ။ ကိုဟန်သာနဲ့ အတူ အခြားမလွတ်မြောက်သေးတဲ့ သူတွေနဲ့ ထောင်ထဲမှာ နေချင်တာပေါ့ဗျာ။ ဒါပေမယ့် ကျွန်တော့်မှာ ‌ရွေးချယ်ခွင့်မှမရှိတာ။ လေယာဥ်စီးတဲ့အချိန် တတ်နိုင်သလောက် မြန်မာပြည်အကြောင်း မစဥ်းစားဖို့ကြိုးစားတယ်။ ဆယ်နှစ်ကျော်ကျော်လောက် ကျွန်တော်ပြန်နေခဲ့တဲ့ နိုင်ငံ ကျွန်တော်မွေးခဲ့တဲ့ နိုင်ငံ။ ကျွန်တော်အသက်၂၂နှစ်တုန်းကလည်း တိုင်းပြည်က ထွက်ခဲ့ရပြီးပြီ။ အခုအသက်၄၄နှစ်မှာလည်း တိုင်းပြည်ကနေ ပြည်နှင်ဒဏ်ခံရပြန်ပြီပေါ့။ဘယ်တော့ပြန်ရောက်မယ်မှန်းလည်း မသိဘူး။ ကျွန်တော့်အတွက်တော့ ဝမ်းမနည်းပါဘူး ကျွန်တော့်တိုင်းပြည်အတွက် ကျွန်တော့် ပြည်သူတွေအတွက်တော့ ဝမ်းနည်းပါ တယ်။နွေဦးတော်လှန်ရေးက ကျွန်တော်တို့ ရှုံးလို့မဖြစ်ဘူး နိုင်မှဖြစ်မယ်။ အဲ့ဒီ အောင်စိတ်လေးနဲ့ ကျွန်တော်ဖြေပါတယ်။ တစ်ချိန်ကျရင် ကျွန်တော်တို့လူတွေ ပြန်ဆုံကြမယ်။ ကျွန်တော်တို့ တိုင်းပြည်ကို ဒီမိုကရေစီနိုင်ငံဖြစ်ဖြစ် ဖက်ဒရယ်နိုင်ငံတော်စစ်စစ်ဖြစ်အောင် ကျွန်တော်တို့လက်နဲ့ပြန်တည်ဆောက်မယ်။ အဲ့ဒီအောင်စိတ်လေးနဲ့ အားတင်းပြီး ကျွန်တော်တို့ အသက်ရှင် နေကြပါတယ်။


BBC Burmese

https://www.bbc.com/burmese/burma-57658060

စစ်ကောင်စီတပ်ရဲ့ရက်စက်မှုများ လွတ်ငြိမ်းခွင့်မပေးဖို့အရေးကြီး” မြန်မာအထူးအကြံပေးကောင်စီ

အပြည်ပြည်ဆိုင်ရာ ရာဇဝတ်မှုခုံရုံး အဝင်ဝ ဆိုင်းဘုတ် (ဓာတ်ပုံ - Courtesy)

နိုင်ငံတကာဥပဒေတွေကိုအကြီးအကျယ်ချိုးဖောက်နေတဲ့ မြန်မာစစ်ကောင်စီတပ်ရဲ့ ကြမ်းကြုတ်ရက်စက်မှုတွေတိုးလာနေတာနဲ့အမ ျှ သူတို့ကို ပြစ်ဒဏ်ကကင်းလွတ်ခွင့်မရအောင်လုပ်ဖို့ သိပ်ကိုအရေးကြီးနေပြီလို့ မြန်မာနိုင်ငံဆိုင်ရာအကြံပေးကောင်စီ SAC-M ကဒီကနေ့ကြေငြာချက်ထုတ်ပြန်ပါတယ်။

မင်းတပ်၊ ဒီမောဆိုနဲ့ ကင်းမရွာနဲ့ မန္တလေးမြို့အပါအဝင် မြန်မာစစ်တပ်က နယ်မြေရှင်းလင်းတဲ့စစ်ဆင်ရေးတွေမှာ အရင်ကလုပ်ရပ်တွေဖြစ်တဲ့ လူသားထုအပေါ်ကျူးလွန်တဲ့ရာဇဝတ်မှုမှာ ထပ်ပြီးအကျူံးဝင်လာနိုင်တယ်လို့ ထောက်ပြထားပါတယ်။ ဒါ့အပြင်စစ်ရေးမတည်မငြိမ်ဖြစ်နေတဲ့ ဒေသတေေွက မြန်မာစစ်တပ်ရဲ့လုပ်ရပ်ကတော့ စစ်ရာဇဝတ်မှုမြောက်နိုင်တယ်လို့လည်း ဇွန်လ ၃၀ ရက်နေ့စွဲနဲ့ ထုတ်ပြန်ချက်မှာဖော်ပြပါတယ်။ ဖေဖော်ဝါရီလ ၁ ရက်နောက်ပိုင်း အာဏာကိုဆုပ်ကိုင်ထိန်းချုပ်ထားနိုင်အောင် နိုင်ငံတဝှမ်းလုံးက ဒီမိုကရေစီရေးလှုပ်ရှားမှုတွေကို စစ်ကောင်စီက အကြမ်းဖက်ပြီးတရားလက်လွတ် နှိမ်နှင်းလာတယ်လို့ လည်းကြေငြာချက်မှာပြောထားပါတယ်။

ဥပဒေမဲ့သတ်ဖြတ်တာတွေ၊ အကြီးအကျယ်နှိပ်စက်ညှဉ်းပန်းတာတွေ၊ မဆင်မခြင်ဖမ်းဆီးတာတွေ၊ မုဒိန်းမှုကျူးလွန်တာတွေနဲ့ လူမြင်ကွင်းမှာ ရိုက်နှက်တာမျိုးလို ရာဇဝတ်မှုမြောက်တဲ့ ရမ်းကားတဲ့လုပ်ရပ်တွေကိုနေ့စဉ်ကျူးလွန်နေတဲ့ခိုင်လုံတဲ့သတင်းတွေရထားတယ်လို့လည်း ကြေငြာချက်မှာ ပြောထားပါတယ်။

ပြီးခဲ့တဲ့သီတင်း ၆ ပတ်အတွင်း ကိုယ့်ဒေသကို ကာကွယ်ကြတဲ့ အရပ်သားပြည်သူတွေအပေါ် စစ်ကောင်စီဖက်က လက်နက်ကြီးတွေသုံးပြီး ပစ်ခတ်တိုက်ခိုက်တာ၊ လေကြောင်းကပါထိုးစစ်ဆင်တိုက်ခိုက်လာတယ်လို့လည်းပြောထားပါတယ်။ ဒီလုပ်ရပ်တွေဟာ နိုင်ငံတဝှမ်းစစ်ဆင်ရေးတွေမှာ စစ်တပ်က ဆယ်စုနှစ်နဲ့ချီ လုပ်နေကျပုံစံတွေဖြစ်တယ်လို့လည်းဖော်ပြထားပါတယ်။ မြန်မာနိုင်ငံရဲ့အခြေအနေအရပ်ရပ်ကို အပြည်ပြည်ဆိုင်ရာရာဇဝတ်မှုခုံရုံးဆီတင်ပြဖို့လည်း ကုလသမဂ္ဂလုံခြုံရေးကောင်စီကိုတိုက်တွန်းထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/violence-in-Myanmar-military-junta-committed-crimes-icc-/5948087.html

စစ်ကောင်စီလက်ချက် သေဆုံးသူ လက်နက်မဲ့ အရပ်သား ၉၀၀ နီးပါးရှိပြီ (ကုလပြောခွင့်ရ)

မြန်မာနိုင်ငံမှာ စစ်အာဏာသိမ်းပြီးနောက်ပိုင်း လုံခြုံရေးတပ်ဖွဲ့တွေ လက်ချက်နဲ့ သေဆုံးသူ ရာနဲ့ချီ ရှိနေပြီး၊ ဒီအထဲမှာ ဖမ်းဆီးထားစဉ် သေဆုံးမှုတွေ ရှိနေကြောင်းလည်း ကုလသမဂ္ဂက ပြောလိုက်ပါတယ်။ လုံခြံုရေးတပ်ဖွဲ့တွေ လက်ချက်နဲ့ သေဆုံးသူ လက်နက်မဲ့ အရပ်သား ၈၈၃ ယောက်ထက်မနည်း ရှိမယ်လို့ ခန့်မှန်းထားပြီး၊ ဒီအထဲက အနည်းဆုံး ၄၀ လောက်ဟာ ဖမ်းဆီးထားစဉ် သေဆုံးခဲ့တာလို့လည်း မြန်မာနိုင်ငံ အခြေစိုက် ကုလသမဂ္ဂ တာဝန်ရှိသူတွေက ပြောတဲ့အကြောင်း ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရ Stéphane Dujarric က အင်္ဂါနေ့ နယူးယောက် ကုလသမဂ္ဂ ရုံးချုပ်က သတင်းစာရှင်းလင်းပွဲမှာ ပြောဆိုလိုက်တာပါ။


မြန်မာနိုင်ငံမှာ ဖေဖော်ဝါရီလ ၁ ရက် စစ်တပ်က အာဏာသိမ်းလိုက်ပြီးနောက်ပိုင်း သေဆုံးသူကလေး ၆၀ လောက် ရှိနေပြီလို့လည်း ပြောပါတယ်။ ဆေးရုံတွေနဲ့ ကျန်းမာရေး ဝန်ထမ်းတွေအပေါ် တိုက်ခိုက်မှုပေါင်း ၅၉ ကြိမ်ထက်မနည်း ရှိခဲ့ပြီး၊ စာသင်ကျောင်းတွေ ကျောင်းဆရာ၊ ဆရာမတွေ တိုက်ခိုက်ခံရမှု အနည်းဆုံး ၁၆၃ ကြိမ် ရှိခဲ့ကြောင်းလည်း ကုလသမဂ္ဂ ပြောခွင့်ရက ပြောဆိုခဲ့တာပါ။


လူ့အခွင့်အရေး ချိုးဖောက်မှုတွေနဲ့ ထိခိုက်သေကျေ လောက်တဲ့အထိ အင်အားသုံး နှိမ်နင်းမှုတွေအပေါ် မြန်မာနိုင်ငံ အခြေစိုက် ကုလသမဂ္ဂ တာဝန်ရှိသူတွေက အပြင်းအထန် ရှုတ်ချကြောင်းလည်း ပြောပါတယ်။ မြန်မာနိုင်ငံမှာ စစ်အာဏာသိမ်းခဲ့တာ ၅ လနီးပါး ရှိလာချိန်မှာပဲ ဆန့်ကျင်လှုပ်ရှားမှုတွေ၊ လက်နက်ကိုင် ခုခံတိုက်ခိုက်မှုတွေနဲ့အတူ ထိခိုက်သေဆုံးမှု သတင်းတွေလည်း ဆက်လက်ထွက်ပေါ်နေတာပါ။


ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရပုဂ္ဂိုလ်ကတော့ မြန်မာလုံခြုံရေး တပ်ဖွဲ့တွေအနေနဲ့ ကျည်ဆံအစစ်တွေ အပါအဝင် အင်အား အလွန်အကျွံသုံး နှိမ်နင်းမှုတွေ ချက်ခြင်းရပ်ဖို့နဲ့ အရပ်သားတွေအပေါ် လက်နက်ကြီးတွေပါ အသုံးပြု တိုက်ခိုက်တဲ့ သတင်းတွေနဲ့ ပတ်သက်လို့ စိုးရိမ်ကြောင်းလည်း မြန်မာနိုင်ငံ အခြေစိုက် ကုလသမဂ္ဂ တာဝန်ရှိသူတွေရဲ့ ပြောကြားချက်ကို ကိုးကားပြီး ပြောဆိုခဲ့ပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-military-coup-death-toll-un/5947340.html

သံတွဲက ဆရာမပိုးတွေ့တဲ့ကျောင်းကို ယာယီပိတ်ထား၊ ကျန်ကျောင်းတွေကိုပိတ်ဖို့အစီအစဉ်မရှိ


ရခိုင်ပြည်နယ် တောင်ပိုင်းဒေသ သံတွဲမြို့နယ် ငပလီမြို့က ကိုဗစ် ၁၉ ပိုးကူးစက်ခံထားရကြောင်း စစ်ဆေးတွေ့ရှိခဲ့တဲ့ ဆရာမတာဝန်ကျနေတဲ့ ကျောင်းကို ယာယီပိတ်ထားတယ်လို့ ရခိုင်ပြည်နယ်စီမံအုပ်ချုပ်ရေးကောင်စီ ပြောခွင့်ရ ပြည်နယ်ဥပဒေချုပ် ဦးလှသိန်းက ပြောပါတယ်။

အဲ့ဒီဆရာမဟာ ငပလီမြို့ လင်းသာရပ်ကွက်မှာနေထိုင်သူဖြစ်ပြီး ဂျိတ်တောရပ်ကွက်က ကျွဲသောက်ကုန်းစာသင်ကျောင်းမှာ တာဝန်ကျနေသူပါ။ ပြီးခဲ့တဲ့ ၂၄ ရက်နေ့က ပိုးကူးစက်ခံထားရကြောင်း စစ်ဆေးတွေ့ရှိခဲ့တာလည်းဖြစ်ပါတယ်။

ဆရာမဆီမှာ ကိုဗစ် ၁၉ ပိုးကူးစက်ခံထားရကြောင်း စစ်ဆေးတွေ့ရှိခဲ့ပြီးနောက်ပိုင်းမှာမှာ ထိတွေ့ခဲ့သူတွေကို ထပ်မံစစ်ဆေးရာမှာ ကူးစက်ခံထားရသူတွေ အများအပြားတွေ့ရှိခဲ့ပြီးနောက် ကလေးတွေကို ကူးစက်မှု စိုးရိမ်လို့ ပိတ်ခဲ့တာလို့ ဦးလှသိန်းက ပြောပါတယ်။

"အဲ့ဒီဆရာမတက်ခဲ့တဲ့ကျောင်းကို ပိတ်ထားပါတယ်။ တစ်ပတ်ဆယ်ရက် ပိတ်မယ်။ ကျောင်းကိုသန့်ရှင်းရေးလုပ်မယ်။ အဲ့ဒီဆရာမလည်း ကိုဗစ်ပိုမတွေ့တော့တဲ့အခါမှ ပြန်ဖွင့်မယ်။ တက်လို့ရပြီတက်ပါဆိုတဲ့အခါမှ တက်မှာဖြစ်ပါတယ်။"လို့ ဦးလှသိန်းက ပြောပါတယ်။

ဒါ့အပြင် မောင်တောမြို့နယ်အတွင်းမှာလည်း မြန်မာ့စီးပွားရေးဘဏ်ဝန်ထမ်းတစ်ဦးမှာ ပိုးကူးစက်ခံထားရကြောင်း စစ်ဆေးတွေ့ရှိထားတာဖြစ်ပါတယ်။

စစ်တွေမြို့မှာ ဇွန်လ ၁ ရက် ကျောင်းတွေ ပြန်ဖွင့်ခဲ့စဥ်

ဆရာမတစ်ဦးမှာ ပိုးတွေ့လို့ကျောင်းကိုပိတ်ထားပေမယ့် ဘဏ်ဝန်ထမ်းတစ်ဦးမှာပိုးတွေ့တယ်ဆိုပြီး ဘဏ်ကိုပိတ်ဖို့အတွက် အစီအစဉ်မရှိလို ပြည်သူတွေအတွက် ငွေရေးကြေးရေးအကျပ်အတည်းမဖြစ်စေဖို့အတွက်ကိုလည်း ထည့်သွင်းစဉ်းစားပြီးမှ အခုလိုဆုံးဖြတ်ရတာဖြစ်တယ်လို့ဆိုပါတယ်။

ပိုးတွေ့တဲ့ ဘဏ်ဝန်ထမ်းအနေနဲ့လည်း ရုံးတက်ခွင့်မရှိသလို ဆက်စပ်သူတွေကိုလည်း စစ်ဆေးတာတွေပြုလုပ်ထားပြီး ဘဏ်ကိုလာရောက်ကြတဲ့ ပြည်သူတွေကိုလည်း ထပ်မံကူးစက်မှုတွေမဖြစ်စေဖို့အတွက် စနစ်တကျ ဆောင်ရွက်ထားပြီး သားဖြစ်မယ်လို့ ပြောပါတယ်။

ဒေသခံတွေဘက်ကလည်း အခုလိုကျောင်းတွေမှာ ကိုဗစ်ပိုးတွေ့လာရတဲ့အတွက် စိုးရိမ်မှုတွေရှိနေကြပြီး ကျောင်းတွေကို ပိတ်ထားဖို့ပြောဆိုနေကြတာတွေလည်းရှိနေတာဖြစ်ပါတယ်။

သို့သော်လည်း ကျေးရွာတစ်ရွာကကျောင်းတစ်ကျောင်းမှာ ပိုးတွေ့ရုံနဲ့ တစ်မြို့နယ်လုံးကကျောင်းတွေကို ပိတ်ထားမယ်ဆိုတာလည်းလက်တွေ့မကျသလို တစ်ယောက်ဖြစ်တာမှာ အများနစ်နာရမယ့်အခြေအနေကိုလည်း မရောက်စေချင်ဘူးလို့ ပြည်နယ်ကောင်စီက ပြောပါတယ်။

ကောင်စီအနေနဲ့လည်း ဒေသတွင်းကိုဗစ် ရောဂါကူးစက်ခံရမှုတွေဖြစ်ပွားနေတာနဲ့ပတ်သက်လို့ အခြေအနေအရပ်ရပ်ကို နေ့တိုင်း သုံးသပ်လျက်ရှိနေပြီး ပိုမိုကောင်းမွန်တဲ့လုပ်ငန်းစဉ်တွေကို ချမှတ်လျက်ရှိနေတယ်လို့ ဦးလှသိန်းက ဆိုပါတယ်။

ရခိုင်ပြည်နယ်အတွင်း ကိုဗစ် ၁၉ ပိုးကူးစက်ခံရမှုကို ပြီးခဲ့တဲ့ ဧပြီလအတွင်းကစတင်တွေ့ရှိခဲ့တာဖြစ်ပြီး သုံးလကျော်ကာလ အတွင်း မြို့နယ်သုံးခုမှာ ပိုးကူးစက်ခံရသူပေါင်း ၁၂၆ ဦးရှိပြီဖြစ်ကာ ဇွန်လ ၂၈ ရက် မနေ့ကပိုးတွေ့ရှိမှုအခြေအနေဟာ အများဆုံးတွေ့ရှိခဲ့တာဖြစ်ပါတယ်။

"မနေ့ကအထိတော့ ၁၂၆ ယောက်၊ မနေ့က ၁၂ ယောက်တွေ့တယ်။ သံတွဲ၊ စစ်တွေ၊ မောင်တော တစ်မြို့နယ်မှာ လေးယောက်စီတွေ့တာပါ။ သံတွဲမှာတွေ့တာကတော့ ဆရာမနဲ့ဆက်စပ်သူတွေဖြစ်တယ်။ စုစုပေါင်း ၂၇ ယောက်ရှိပါပြီ။"လို့ ပြည်နယ်ပြည်သူ့ကျန်းမာရေးဌာနက လက်ထောက်ညွှန်ကြားရေးမှူး ဒေါက်တာစိုးဝင်းပိုင်က ပြောပါတယ်။

လက်ရှိမှာ ကိုဗစ် ၁၉ ဒေသတွင်းကူးစက်မှုတွေမြင့်တက်လာနေသလို သေဆုံးသူတွေလည်းရှိလာနေပြီဖြစ်ပေမယ့် ဒေသခံတွေအကြား အကာအကွယ်ပစ္စည်းတွေကိုအသုံးပြုမှုနည်းပါးနေသလို ကျောင်းတွေမှာလည်း သတ်မှတ်ထားတဲ့စည်းကမ်းချက်တွေကို လိုက်နာမှုနည်းပါးနေတာကိုတွေ့နေရပါတယ်။

ရခိုင်ပြည်နယ်အတွင်း ပိုးကူးစက်ခံထားရသူ ၁၂၆ ဦးအနက် စစ်တွေမြို့နယ်က ၇၅ ဦး၊ မောင်တောမြို့နယ်က နှစ်ဦးတို့မှာ ဘင်္ဂလားဒေ့ရှ်နိုင်ငံက ဝင်လာသူတွေဖြစ်ကြပြီး ကျန်တဲ့ပိုးကူးစက်ခံရသူတွေကတော့ ဒေသတွင်းကူးစက်မှုတွေဖြစ်ကြကာ လက်ရှိမှာ သံတွဲမြို့နယ်အတွင်း ကူးစက်ခံရသူ အများဆုံးအခြေအနေကိုရောက်ရှိနေတာဖြစ်ပါတယ်။

မြန်မာနိုင်ငံမှာ ကူးစက်သူ ရာဂဏန်းချီတွေတဲ့ ရက်တွေ ဆက်တိုက်ဖြစ်ခဲ့ရာက မနေ့က အများဆုံးအဖြစ် တစ်ရက်တည်း တစ်နိုင်ငံလုံး ကူးစက်သူ အသစ် ၁၂၂၅ ဦး အထိ တွေ့ရှိခဲ့ပါတယ်။


BBC Burmese

https://www.bbc.com/burmese/burma-57652922

ငါန်းဇွန်မြို့နယ်ထဲ ကုလရွာကို စစ်ကောင်စီတပ်တွေဝင်လို့ ရွာသားတွေ ကြောက်လန့်ထွက်ပြေးနေ

မန္တလေးတိုင်ဒေသကြီး၊ မြင်းခြံခရိုင်ထဲပါတဲ့ ငါန်းဇွန်မြို့နယ်ထဲက ကုလကျေးရွာမှာ မနေ့ ဇွန်လ ၂၈ ညပိုင်းက ပစ်ခတ်မှုတွေအပြီး ဒီနေ့မှာ စစ်ကောင်စီတပ်တွေရောက်လာလို့ ရွာသူရွာသားတွေ ဘေးလွတ်ရာတိမ်းရှောင်နေရတယ်လို့ ဒေသခံတွေ ဆီကနေ သိရပါတယ်။

''မနေ့ညပိုင်း ၇ နာရီလောက်မှာ စစ်ကောင်စီခန့်ထားတဲ့အုပ်ချုပ်ရေးမှူးရဲ့အပေါင်းအပါတသိုက်က ပြဿနာရှာလို့ ငါန်းဇွန်ကနေ ဈေးသိမ်းပြီးပြန်လာတဲ့ ကျွန်တော်တို့ရွာသားတချို့နဲ့ ပြဿနာဖြစ်ကြတယ်။ ဓားထိုးမှုဖြစ်တယ်ပေါ့။ အဲဒါဖြစ်အပြီး ည ၁၀ နာရီလောက်မှာ သူတို့ ရောက်ချလာတယ်။ သူတို့ကားပေါ်မှာ အုပ်ချုပ်ရေးမှူးလည်း လိုက်လာတယ်။ မနေ့ည ၂ နာရီခွဲဝန်းကျင်မှာပြန်သွားပြီး ဒီနေ့မနက်ပိုင်းမှာ စစ်ကား ၁၀ စီးကျော်နဲ့ပြန်ရောက်လာကြတာ။ သေနတ်တွေနဲ့လည်း ပစ်ထားတာဆိုတော့ ရွာသားတွေက ကြောက်လန့်ပြီး ပုန်းကြတာပေါ့။''လို့ ရွာခံတစ်ဦးက ဘီဘီစီကို ပြောပါတယ်။

မနေ့ညပိုင်းက ဓားထိုးမှုမှာ အသက် ၃၀ အရွယ် အမျိုးသားတစ်ယောက် ဓားထိုးခံရပြီး ဆေးရုံတင်လိုက်ရသလို အဲဒီနောက်ပိုင်း စစ်ကောင်စီတပ်တွေ ဝင်လာလို့ သေနတ်ပစ်ခတ်ချိန် အမျိုးသားတစ်ယောက်လည်း မျက်စိကို ကျည်မှန်လို့ ငါန်းဇွန်ဆေးရုံမှာ ဆေးကုသမှု ခံယူနေရတယ်လို့ သိရပါတယ်။

မနေ့ညပိုင်းက ပစ်ခတ်ချိန် ရွာသား ၄ ဦးထက်မနည်းဖမ်းဆီးခံခဲ့ရတယ်လို့လည်းသိရပါတယ်။

စစ်အာဏာသိမ်းပြီးနောက်ပိုင်း စစ်အာဏာရှင်ဆန့်ကျင်ရေး ညပိတ်တွေ၊ ဆုတောင်းမေတ္တာပို့ပွဲတွေ ကုလရွာမှာ ပြုလုပ်ခဲ့ပေမဲ့ စစ်ကောင်စီတပ်တွေ အခုလို ရွာထဲအထိ လာရောက် ပစ်ခတ်တာ အခုတစ်ကြိမ်က ပထမဆုံးလို့ သိရပါတယ်။


BBC Burmese

https://www.bbc.com/burmese/live/burma-57652919

တာမွေ မေတ္တာညွန့်က စီးပွားရေးဘဏ်မှာ ရဲတစ်ဦး သေနတ်ပစ်ခံရလို့ သေဆုံး

တာမွေ မေတ္တာညွန့်က စီးပွားရေးဘဏ်မှာ ရဲတစ်ဦး သေနတ်ပစ်ခံရလို့ သေဆုံး ရန်ကုန်တိုင်း တာမွေမြို့နယ် မြန်မာ့စီးပွားရေးဘဏ်မှာ ရဲတစ်ဦး ပစ်သတ်ခံရအပြီး ၂၀၂၁ ဇွန် ၂၉ ရက်နေ့က စစ်ကောင်စီတပ်ဖွဲ့ဝင်တွေ ရှာဖွေစစ်ဆေးနေစဉ် / Photo: CJ

ရန်ကုန်တိုင်း တာမွေမြို့နယ် မေတ္တာညွန့်ရပ်ကွက် အဝေရာလမ်းအနီး မြန်မာ့စီးပွားရေးဘဏ်မှာ တပ်စွဲထားတဲ့ စစ်ကောင်စီတပ်ဖွဲ့ဝင်တစ်ဦး ဇွန်လ ၂၉ ရက်၊ ဒီနေ့မနက် ၁၁ နာရီခန့်က သေနတ်နဲ့ ပစ်သတ်ခံလိုက်ရ ပါတယ်။

သေနတ်နဲ့ပစ်သတ်ခဲ့ရပြီးနောက် စစ်ကောင်စီတပ်တွေဟာ ရပ်ကွက်တွေထဲအထိ သေနတ်တွေနဲ့ ပြန်ပြီး လိုက်လံပစ်ခတ်ကာ လမ်းတွေကိုလည်း ပိတ်ဆို့တားဆီးကာ စစ်ဆေးနေတယ်လို့ အမည်မဖော်လိုတဲ့ ရပ်ကွက်နေသူတစ်ဦးက ပြောပါတယ်။

“ဒီဘက် အဝေရာထိပ်နားက စီးပွားရေးရုံးအရှေ့မှာ ရဲတစ်ယောက် အသတ်ခံရတယ် ကြားတယ်။ အဲလိုကြားပြီးနောက်မှာ သေနတ်ပစ်သံအချို့ကြားတယ်။ အဲဒါပြီးတော့ ဒီဘက်မှာ လမ်းပိတ်တာတွေ လုပ်တယ်။ တာမွေက အရှေ့မြင်းပြိုင်ကွင်းလမ်းရယ်၊ တောင်မြင်းပြိုင်ကွင်းလမ်းရယ်။ အဝေရာထိပ် စခန်းနားမှာလည်း လမ်းတွေပိတ်ထားတယ်လို့ ပြောတယ်“

တာမွေ ၁၆၄ လမ်းအနီးမှာ လမ်းသွားလမ်းလာတွေကို စစ်ဆေးနေပြီး ကားတွေကိုလည်း ရပ်တန့်စစ်ဆေးနေ တယ်လို့ ဆိုပါတယ်။ ရပ်မပေးတဲ့ ကားတွေကို သေနတ်နဲ့ ပစ်ခတ်တာတွေလုပ်ပြီး ထိခိုက်ဒဏ်ရာရတာတွေ ရှိတယ်လို့ ဆိုပါတယ်။ ထိခိုက်သေဆုံးမှုတွေနဲ့ ပတ်သက်ပြီး အသေးစိတ်သိနိုင်ဖို့ RFA က ဆက်ပြီးစုံစမ်းနေ ပါတယ်။

ပြီးခဲ့တဲ့ ဇွန်လ ၂၇ ရက်နေ့ကလည်း မရမ်းကုန်းမြို့နယ် သမိုင်း ၁ ရပ်ကွက် စစ်ကောင်စီတပ်ဖွဲ့ဝင်တွေ တပ်စွဲထားတဲ့ လဝက ရုံးအနီးမှာ ပေါက်ကွဲမှုဖြစ်ပြီးနောက် စစ်ကောင်စီတပ်ဖွဲဝင်တွေက ရပ်ကွက်ထဲကို သေနတ်တွေနဲ့ လိုက်လံပစ်ခတ်ခဲ့ပါတယ်။

ဒီရက်ပိုင်းအတွင်း ရန်ကုန်မှာပေါက်ကွဲမှုတွေ မကြာခဏဆိုသလို ဖြစ်လာနေတာကြောင့် စစ်ကောင်စီ တပ်တွေကလည်း နေရာအနှံ့မှာ လမ်းပိတ်စစ်ဆေးမှုတွေ ပိုလုပ်လာနေတယ်လို့ ဒေသခံတွေက ပြောကြပါတယ်။


RFA Burmese

https://www.rfa.org/burmese/news/police-shot-dead-in-tamwe-06292021043220.html 

သင်္ဃန်းကျွန်း ဂဖူးကွေ့ဈေးမှာ စစ်တပ်သတင်းပေးအဖြစ် စွပ်စွဲခံရသူတစ်ဦး အသတ်ခံရ

သင်္ဃန်းကျွန်း ဂဖူးကွေ့ဈေးမှာ စစ်တပ်သတင်းပေးအဖြစ် စွပ်စွဲခံရသူတစ်ဦး အသတ်ခံရ သင်္ဃန်းကျွန်းမြို့နယ် ဂဖူးကွေးဈေးထဲက ငါးစိမ်းရောင်းတဲ့ ကျားကြီး(ခ) ကိုစိန်လှိုင်ဝင်း အသတ်ခံရတဲ့ နေရာကို ၂၀၂၁ ဇွန် ၁၉ ရက်နေ့က တွေ့ရစဉ် / Photo: CJ

သင်္ဃန်းကျွန်းမြို့နယ် သွားဘက်ဆိုင်ရာ ဆေးတက္ကသိုလ်အနားက ဂဖူးကွေ့ဈေးမှာ ဇွန်လ ၂၉ ရက် ဒီနေ့ မနက် ၈ နာရီလောက်က အာဏာသိမ်းစစ်ကောင်စီကို သတင်းပေးတယ်လို့ နာမည်ကြီးနေတဲ့ ကျားကြီး(ခ) ကိုစိန်လှိုင်ဝင်း ဆိုသူ သေနတ်နဲ့အပစ်ခံရပြီး သေဆုံးသွားပါတယ်။

ပစ်ခတ်မှုဖြစ်ပြီးချိန်မှာ စစ်ကောင်စီလက်အောက်ခံ စစ်သားနဲ့ ရဲတွေရောက်လာပြီး အလောင်းကို သယ်ယူ သွားကြသလို သွားဆေးတက္ကသိုလ်တဝိုက်နဲ့ ပစ်ခတ်မှုဖြစ်တဲ့ ဂဖူးကွေ့ဈေးအနားမှာ စစ်ဆေးမှုတွေပြုလုပ် ခဲ့တယ်လို့ လုံခြုံရေးအရ အမည်မဖော်လိုတဲ့ ဒေသခံတွေက RFA ကို ပြောပါတယ်။

ကျားကြီး ခေါ် ကိုစိန်လှိုင်ဝင်း အပစ်ခံရပြီးချိန်မှာ အနီးအနားက ဈေးသည်တွေ ကြောက်လန့်ပြီး ဆိုင်တွေ ပိတ်သွားကြတာကို ပစ်ခတ်မှုဖြစ်ပြီးချိန် ရိုက်ထားတဲ့ CJ တစ်ယောက်ရဲ့ ဗီဒီယိုဖိုင်မှာ မြင်တွေ့ရသလို စစ်ကောင်စီတပ်တွေကလည်း ဈေးထဲရောက်လာပြီး မပိတ်သေးတဲ့ ဈေးဆိုင်အချို့ကို ပိတ်ခိုင်းတာတွေ လုပ်ခဲ့တယ်လို့ လုံခြုံရေးအရ အမည်မဖော်လိုတဲ့ ဈေးသည်အချို့က ပြောပါတယ်။

သေဆုံးသွားတဲ့ ကျားကြီး(ခ)ကိုစိန်လှိုင်ဝင်းဆိုသူဟာ အသက် ၃၅ နှစ်ဝန်းကျင်ရှိပြီး ဂဖူးကွေးဈေးထဲမှာ ငါးစိမ်းရောင်းတဲ့ အလုပ် လုပ်ကိုင်နေရင်း စစ်ကောင်စီကို သတင်းပေးတဲ့အလုပ်ကိုပါ လုပ်ကိုင်နေတာလို့ ရပ်ကွက်နေပြည်သူအချို့က ဒေသခံ သတင်းမီဒီယာတွေကို ဖြေဆိုထားပါတယ်။


RFA Burmese

https://www.rfa.org/burmese/news/seinghlaingwin-killed-in-thingangyun-fish-market-06292021034814.html

ကျောက်စိမ်းထုတ်လုပ်ရေးလုပ်ငန်း မြန်မာစစ်တပ်ကိုထောက်ပံ့ပေး - Global Witness

ကချင် ပြည်နယ် ထွက် မြန်မာ့ကျောက်စိမ်း (ဓာတ်ပုံ - Wired)

မြန်မာနိုင်ငံ ကျောက်စိမ်း ထုတ်လုပ်ရောင်းဝယ်မှုက ရတဲ့ အကျိုးစီးပွားအားလုံးကို စစ်တပ်ထိပ်တန်းခေါင်းဆောင်တွေနဲ့ နီးစပ်သူ အားလုံးက ရယူနေပြီး ဒီလုပ်ငန်းဟာ အာဏာသိမ်းစစ်တပ် ရေရှည်ရပ်တည်ဖို့ ဝင်ငွေရစေတဲ့ အရေးကြီးတဲ့ စီးပွားရေးလုပ်ငန်း တခုဖြစ်တဲအ့ကြောင်း Globla Witness အဖွဲ့ကြီးက အစီရင်ခံစာ ထုတ်ပြန်ပါတယ်။ မြန်မာနိုင်ငံအတွင်းက ထွက်တဲ့ ကျောက်စိမ်းတွေရဲ့ ၉၀ ရာခိုင်နှုန်း ပြည်ပကို တရားမဝင်ခိုးထုတ်ရောင်းချနေပြီး အားလုံး နီးပါး တရုတ်နိုင်ငံက ဝယ်ယူနေတာလို့လည်း Global Witness က အစီရင်ခံစာ မှာ ဖေါ်ပြပါတယ်။

"အစီရင်ခံစာထဲမှာ ရေးသားထားသလို မတည်ငြိမ်မှုတွေ၊ အလွဲသုံးစားမှုတွေက ဖားကန့်နဲ့ ကျောက်စိမ်း တူးဖေါ်နေတဲ့ဒေသတခုထဲမှာတင် ကွက်ပြီးတော့ ဖြစ်နေတာ မဟုတ်ပါဘူး။ ဒီလုပ်ငန်းနဲ့ ဆက်နွယ်တဲ့ မတည်ငြိမ်မှုတွေ တခုပြီးတခု မီးခိုးကြွက်လျှောက်ပေါ်လာနေတာကို တရုတ်အစိုးရက နားလည်သင့်ပါတယ်" လို့ Global Witness အဖွဲ့ကြီးက Keel Dietz က AP သတင်းဌာနကို ပြောဆိုသွားပါတယ်။ ကျောက်စိမ်းတူးဖေါ်နေတဲ့ နယ်စပ် ဒေသ၊ ကချင်တိုင်းရင်းသား လက်နက်ကိုင်အဖွဲ့တွေနဲ့ မြန်မာစစ်တပ်အကြား တိုက်ပွဲတွေ တိုးလာတဲ့ အခြေအနေကို ထောက်ပြပြီး၊ မြန်မာနိုင်ငံရဲ့ ကြောက်မက်ဖွယ်ရာ အကျင့်ပျက်မှုကြီးထဲမှာ တရုတ်နိုင်ငံ တာဝန်သိသိ ရပ်တည်ဖို့လည်း Global Witness အဖွဲ့ကြီးက တောင်းဆိုပါတယ်။

ကမ္ဘာပေါ်က ကျောက်စိမ်းအားလုံးရဲ့ ၇၀ ရာခိုင်နှုန်း မြန်မာနိုင်ငံက ထွက်ပြီး ဒီလုပ်ငန်းကနေ ဒေါ်လာ ဘီလျံနဲ့ချီ ဝင်ငွေ ရနေပါတယ်။ ကျောက်စိမ်းလုပ်ငန်းက ရတဲ့ အကျိုးအမြတ်တွေဟာ စစ်ကောင်စီအကြီးအကဲ ဗိုလ်ချုပ်မှူးကြီး မင်းအောင်လှိုင်ရဲ့မိသားစုအပါအဝင် စစ်တပ်ထိပ်တန်းခေါင်းဆောင်တွေနဲ့ ဆက်နွယ် နေတယ်လို့ Globla Witness အဖွဲ့ကြီးက ရေးသားထားပါတယ်။ စစ်တပ် ရေရှည် အာဏာချုပ်ကိုင်ဖို့ ပင်မစီးပွားရေးလုပ်ငန်း ဖြစ်နေတဲ့အတွက် ကျောက်စိမ်းဝယ်ယူတာတွေ ပိတ်ပင် အရေးယူဖို့ နိုင်ငံတကာကို Global Witness အဖွဲ့ကြီးက တောင်းဆိုထားပါတယ်။ ကျောက်စိမ်းဟာ တိုင်းပြည်အတွက် အဖိုးတန် ရတနာ ဖြစ်ရမယ့်အစား စစ်တပ်နဲ့ တခြားလက်နက်ကိုင် အဖွဲ့တွေအကြား အာဏာပဋိပက္ခ လွန်ဆွဲပွဲနဲ့ အကျင့်ပျက်ချစားမှုတွေပေါ်လာဖို့ အခရာကျတဲ့ တွင်းထွက်ပစ္စည်းတခု ဖြစ်လာတယ်လို့လည်း အစီရင်ခံစာမှာ ရေးသားထားပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/myanmar-jade-military-controlled-billion-dollars-global-witnesses-/5946600.html

စစ်အာဏာသိမ်းပြီးနောက် အလုပ်ပြုတ် စက်ရုံလုပ်သား ၁ သန်းကျော်ရှိပြီ

ထည်ချုပ် စက်ရုံ တခုရဲ့ မြင်ကွင်း။ (ဓာတ်ပုံ - European Union Myanmar Facebook - ဇူလိုင် ၀၄၊ ၂၀၂၀)

စစ်တပ်က အာဏာသိမ်းပြီးတဲ့နောက် မြန်မာတနိုင်ငံလုံးက စက်မှုဇုံတွေအပါအဝင်၊ တခြားကဏ္ဍပေါင်းစုံက ပေါ်ထွက်လာတဲ့ အလုပ်လက်မဲ့နှုန်းဟာ ၁၀ သိန်းကျော်ရှိသွားပြီလို့ အလုပ်သမား သမဂ္ဂတွေက ပြောလိုက်ပါတယ်။ မြန်မာပြည်တွင်းက စက်ရုံတွေပိတ်နေတဲ့ အခြေအနေနဲ့ အလုပ်လျှော့ချခံရမှု အခြေအနေနဲ့ ပတ်သက်ပြီး ရန်ကုန်ကပေးပို့တဲ့သတင်းကို ကိုရဲမွန်က ပြောပြပေးမှာပါ။

မြန်မာနိုင်ငံမှာ စစ်တပ်အာဏာသိမ်းခဲ့ပြီးနောက် နိုင်ငံရေး၊ စီးပွားရေး၊ လုံခြုံရေး မတည်ငြိမ်မှုတွေဖြစ်နေတာကြောင့် စက်ရုံ အလုပ်ရုံ လုပ်ငန်းကြီးတွေ တခုပြီး တခု ပိတ်နေကြပါတယ်။ ပြီးခဲ့တဲ့ရက်ကပဲ အလုပ်သမား ထောင်ချီရှိတဲ့ ရန်ကုန်တိုင်း၊ လှိုင်သာယာစက်မှုဇုံက ဟန်မောက်အထည်ချုပ် ပိတ်တယ်လို့ ကြေညာခဲ့သလို အလုပ်သမားရာချီရှိတဲ့ စက်ရုံ ၂ ခုလည်း ထပ်ပိတ်ဖို့ ပြင်ဆင်နေပါတယ်။ ခုလို စက်ရုံတွေပိတ်နေတာကြောင့် အဲဒီစက်ရုံတွေမှာ အလုပ်လုပ်နေကြသူတွေ အလုပ်လက်မဲ့ပြဿနာတွေ ရှိလာနေတယ်လို့ အလုပ်သမားသမဂ္ဂတွေက ထောက်ပြနေပါတယ်။

“ ဆိုတော့ ရှေ့ဆက်ပြီးတော့မှ နိုင်ငံရေးမတည်ငြိမ်မှုတွေရဲ့ ဆိုးကျိုးကတော့ အလုပ်လက်မဲ့တွေ ဆက်ပြီးတော့မှဖြစ်မယ်၊ နောက် စက်ရုံကြီးတွေလည်း ဆက်လက်ထွက်ခွာနိုင်တယ်လို့ ကျမတို့ သုံးသပ်မိပါတယ်။ အထည်ချုပ်ကဏ္ဍကတော့ တော်တော်လေးကို ပျက်စီးသွားနိုင်တယ်ရှင့်။ နောက်ဆုံး တောင့်ခံထားနိုင်တာကတော့ ထုံးစံအတိုင်းပေါ့လေ စစ်ကောင်စီနဲ့ နီးကပ်တဲ့ တရုတ်နိုင်ငံသားပိုင် စက်ရုံအများစုနဲ့ တခြားနိုင်ငံသားလေးတွေပေါ့ ကိုရီးယားပိုင် စက်ရုံအချို့လေးတွေပဲ ကျန်ခဲ့နိုင်တယ်လို့ ကျမတို့ ခန့်မှန်းထားပါတယ်။”

အလုပ်သမားသမဂ္ဂတခုရဲ့ ပြောရေးဆိုခွင့်ရှိသူဖြစ်ပါတယ်။ စစ်ကောင်စီအာဏာသိမ်းပြီးနောက်ပိုင်း ရပ်ဆိုင်းသွားတဲ့ အထည်ချုပ်စက်ရုံပေါင်း မြန်မာနိုင်ငံတဝန်း ၂၀၀ ကျော်သွားပြီလို့ အလုပ်သမားသမဂ္ဂတချို့က ပြောပါတယ်။ ဝန်ထမ်းလစာမပေးနိုင်တာ၊ ကုန်ကြမ်းသွင်းဖို့ ခက်ခဲလာတာ၊ ကုန်ချောပို့လို့မရတော့တာ ဒီလိုအကျပ်အတည်းတွေကြောင့် စက်ရုံပိတ်သိမ်းတာတွေက အနေးနဲ့အမြန် ဖြစ်လာနိုင်တယ်ဆိုပြီး ခန့်မှန်းထားကြပါတယ်။

“ ကျမတို့ အလုပ်သမားအရေး ဆောင်ရွက်တဲ့သူတွေအနေနဲ့ ကြိုးစားပြီးတော့ စာရင်းပြုစုထားတာကတော့ ဒီဖေဖော်ဝါရီလဆန်းကနေ အခုဇွန်လအထိဆိုရင် ၁,၀၀၀,၀၀၀ ( ဆယ်သိန်း) ဝန်းကျင်လောက် အလုပ်လက်မဲ့ဖြစ်သွားပြီလို့ ကျမတို့ ခန့်မှန်းရပါတယ်ရှင့်။ အထူးသဖြင့် အမျိုးသမီးလုပ်သားတွေ အလုပ်လက်မဲ့ဖြစ်ကုန်ပါတယ်။ အဲဒီအတွက် ဆိုးကျိုးတွေကတော့ နောက်ဆက်တွဲ မိသားစုစားဝတ်နေရေး၊ ကျန်းမာရေး အဲဒါတွေကို ပြင်းပြင်းထန်ထန် ထိခိုက်သွားတယ်။ အဲဒီတော့ ကျမတို့အခုခန့်မှန်းတဲ့ ဆယ်သိန်းဝန်းကျင်ထက် ပိုနိုင်ပါတယ်။”

ရန်ကုန်စက်မှုဇုံတွေက အထည်ချုပ်လုပ်ငန်း တခုတည်းမှာတင် လုပ်ကိုင်နေတဲ့ လုပ်သားက ၇၀၀,၀၀၀ လောက်ရှိပါတယ်။ မန္တလေးတိုင်း၊ ပဲခူးတိုင်း၊ ဧရာဝတီတိုင်း ဒီနေရာတွေမှာလည်း စက်မှုဇုံအထည်ချုပ်လုပ်ငန်းတွေ ရှိပါတယ်။ တချို့စက်ရုံတွေက လုပ်ငန်းကောင်းကောင်း မလည်ပိတ်နိုင်တော့လို့ ဝန်ထမ်းလစာကို အပြည့်အဝ မပေးနိုင်ကြပါဘူး။ အလုပ်သမားခံစားခွင့်ငွေကို ထည့်မတွက်တော့ဘဲ အနည်းဆုံးလုပ်ခလစာနဲ့ တွက်ချက်ပြီးပေးတဲ့ စက်ရုံတွေလည်းရှိပါတယ်။ သွေးစည်းညီညွတ်သောသမဂ္ဂက မနန်းဝေက အခုလိုပြောပါတယ်။

“ အခုအခြေအနေက ဘယ်လိုဖြစ်သွားလဲဆိုတော့ ဘဏ်တွေကငွေထုတ်ရတာ ကျပ်တည်းသွားတယ်လေ၊ အလုပ်ရှင်တွေကလည်း အလုပ်သမားတွေကို လစာအပြည့်မပေးနိုင်တော့ဘူး အဲလိုမျိုး ဆက်တိုက်ကြားနေရတယ်။ နောက်ပိုင်းမှာ နိုင်ငံရေးအခြေအနေ ပိုဆိုးရွားလာနိုင်တယ်လို့ သတင်းတွေ ထွက်နေတာ အများကြီးရှိတာကိုး အဲဒါတွေနဲ့ပတ်သက်ပြီး လုပ်ငန်းရှင်တွေက စိုးရိမ်ပူပန်မှုတွေရှိနေလို့၊ တော်တော်များများကြားထားတာ စက်ရုံ ၂၀ လောက် ( ထပ်ပြီး) ပိတ်မယ်လို့ကြားထားတာ။”

နိုင်ငံရေး၊ စီးပွားရေး မတည်ငြိမ်တဲ့အခြေအနေမှာ အလုပ်ရှင်တွေက အလုပ်သမားအခွင့်အရေးကို ပိုပြီးချိုးဖောက်နေကြတယ်လို့ အလုပ်သမားတွေက ပြောပါတယ်။ ဒါကိုဖြေရှင်းနိုင်မယ့် အလုပ်ရှင်၊ အလုပ်သမား၊ အစိုးရ သုံးပွင့်ဆိုင်ယန္တရားကလည်း ရပ်ဆိုင်းသွားပါတယ်။ ဆန္ဒပြပွဲတွေ အတော်လေး အားကောင်းခဲ့တဲ့ မေလထဲမှာ စက်ရုံလုပ်သားတွေ ပါဝင်ခဲ့ကြသလို စစ်ကောင်စီရဲ့ ယန္တရားရပ်တန့်ဖို့ ရည်ရွယ်ပြီး အကြမ်းအဖက်ဘဲ အာဏာဖီဆန်တဲ့ CDM လှုပ်ရှားမှုတွေကိုလည်း လုပ်ခဲ့ကြပါတယ်။ စစ်ကောင်စီကလည်း အလုပ်သမားအဖွဲ့အစည်း ၁၆ ခုကို တရားမဝင်အဖွဲ့အစည်းတွေအဖြစ် သတ်မှတ်ခဲ့ပါတယ်။ နိုင်ငံရေး၊ လုံခြုံရေး မတည်မငြိမ်ဖြစ်နေချိန်မှာ ကိုဗစ်ကပ်ရောဂါ အန္တရာယ် ပြန်ရှိလာနေတဲ့အတွက် အလုပ်အကိုင်တွေ ထိခိုက်ပြီး ဝင်ငွေ ရပ်သွားမှာကို အလုပ်သမားတချို့ကလည်း စိုးရိမ်နေကြပါတယ်။ 


ရဲ မွန်/ VOA Burmese

https://burmese.voanews.com/a/5945908.html

မြဝတီမြို့အထက-(၁)ကျောင်းတွင် ဆရာမ ၁ ဦးနှင့် ကျောင်းသား ၂ ဦး၌ ကိုဗစ်ပိုးတွေ့ရှိ။


ဇွန် ၂၉ ရက်၊ ၂၀၂၁ခုနှစ်။ကေအိုင်စီ

ကရင်ပြည်နယ် မြဝတီမြို့ အမှတ် ၄ ရပ်ကွက် ဘုရင့်လမ်းမကြီး အထက(၁)ကျောင်းမှ အလယ်တန်းပြ ဆရာမတစ်ဦး၊သတ္တမတန်း နှင့် Gread. 1 မှ ကျောင်းသား ၂ ဦးထံ Covid. 19 ရောဂါပိုးတွေ့ရှိရကြောင်း သိရသည်၊

ယင်း အလယ်တန်းပြ ဆရာမနှင့် ကျောင်းသား ၂ ဦးသည် မနေ့ကဇွန် ၂၈ ရက်နေ့၌ မြဝတီခရိုင်ဆေးရုံ၏ ဆေးစစ်ချက်အရ Covit-19 ရောဂါပိုး တွေ့ရှိခဲ့တာပါ။

"ကိုဗစ် ပိုး တွေ့ရှိတဲ့ အလယ်တန်းပြ ဆရာမက ပြီးခဲ့တဲ့ တပတ်ခန့်လောက် ကတည်းက နေမကောင်းဖြစ်လို့ ခွင့်ယူနေတာပါ။ ဇွန်လ ၂၈ ရက်နေ့ မြဝတီခရိုင်ဆေးရုံ၏ ကျန်းမာရေး စစ်ဆေးမှုအရ Covid. 19 ရောဂါပိုး တွေ့ရှိရတာပါ။  သတ္တမတန်း နှင့် Gread. 1 ကျောင်းသား ၂ ဦး မှာ ကိုဗစ်ပိုးတွေ့ရှိခဲ့တယ်လို့  အထက(၁)ကျောင်းအုပ်ဆရာမကြီးက ပြောသည်။

ကျောင်းမှာ ကိုဗစ်ပိုးတွေ့ လူနာရှိပေမယ့် လက်ရှိမှာတော့ ကျောင်းပိတ်ထားခြင်းတော့ မရှိသေးပါဘူး။ လူနာတွေနဲ့ အနီးကပ်ထိတွေ့နိုင်တဲ့သူတွေကိုတော့ ကျန်းမာရေး စောင့်ကြည့်မှုသာ ပြုလုပ်လျက်ရှိတယ်လို့ သိရပါတယ်။

ထိုသို့ မြဝတီမြို့ အထက (၁) ကျောင်းတွင် ကိုဗစ်ရောဂါပိုးတွေ့ရှိမှု နှင့် ပတ်သက်၍  "ဒီလောက် ကိုဗစ် ဖြစ်နေတာတောင် သတင်း အမှောင်ချပြီး ကျောင်းက ဖွင့်တုန်းဘဲ။ ပညာရေးကအရေးကြီးတယ် ဆိုပေမယ့်လဲ ကိုယ့်ရဲ့ သားသမီး ကျန်းမာရေးအတွက် စိတ်မချရတဲ့ အခြေအနေမို့ ခလေးတွေကို လတ်တလောမှာ ကျောင်းပေး မသွားတော့ဘူး ဟု ကျောင်းသားမိဘ တစ်ဦးက ပြောသည်။

ကရင်ပြည်နယ် မြဝတီမြို့တွင် လက်ရှိ Covid. 19 အတည်ပြုလူနာ ၅၀ ဝန်းကျင်ခန့် ရှိကြောင်း သိရသည်။


Karen Information Center -KIC 

https://www.facebook.com/KICNewsPage

မြန်မာ့ရုပ်မြင်သံကြားနှင့်မြ၀တီရုပ်သံအတွက်သတင်းရိုက်ကူးရေးလုပ်ဆောင်စဥ်စျေး၀ယ်ပြည်သူတချို့ထိတ်လန့်ပြီးပြေး


မင်းတပ်မြို့ မြို့မစျေးကိုစျေးတာ၀န်ရှိသူများကယနေ့ဇွန်လ ၂၉ ရက်နံနက်ပိုင်းတွင်ပြန်လည်ဖွင့်လှစ်ပေးခဲ့ပြီးစျေးရောင်းစျေး၀ယ်များဖြင့်စည်ကားနေစဥ်နေ့လည်ပိုင်းတွင် MRTV နှင့် မြ၀တီရုပ်သံတွင်ထုတ်လွှင့်ပြသရန်စစ်ကောင်စီတပ်များရောက်ရှိလာပြီး ဓာတ်ပုံမှတ်တမ်းရိုက်ကူးရေးလုပ်နေချိန်တွင် စျေး၀ယ်နေသည့် ပြည်သူတချို့ ထိတ်လန့်ပြီးပြန်ပြေးသွားကြောင်းမင်းတပ်ဒေသခံများကလူမှုကွန်ရက်တွင်ရေးသားထားသည်။

စစ်ကောင်စီ တပ်များပြန်သွားပြီးနောက် ပြည်သူများစျေး အရောင်း အဝယ် ပြန်လုပ်ကြကာ ညနေ ၃ နာရီ၀န်းကျင်တွင်စျေးပိတ်ခဲ့ကြောင်းသိရသည်။

စစ်အုပ်ချုပ်ရေးကြေညာခံထားရသည့်မင်းတပ်မြို့နယ်တွင်ဧပြီလမှစပြီးစစ်ကောင်စီတပ်ဖွဲ့နှင့်ဒေသခံChinland Defense Force(CDF)အဖွဲ့အကြားတိုက်ပွဲဖြစ်ပွားခြင်းကြောင့်မင်းတပ်မြို့မစျေးကိုပိတ်ထားသည်မှာကြာမြင့်ပြီဖြစ်ပြီးယနေ့ဇွန်လ ၂၉ ရက် ၁ ရက်ကိုသာပြန်လည်ဖွင့်လှစ်ခွင့်ပြုခဲ့ခြင်းဖြစ်သည်။


Chin World 

https://www.facebook.com/chinworldmedia/

စစ်တပ် သတင်းပေး သိန္နီမြို့နယ်ပညာရေးမှူးကို KIA နှင့် MNDAA တို့က စာပို့


သျှမ်းသံတော်ဆင့်၊ ဇွန် ၂၉

သျှမ်းပြည် မြောက်ပိုင်း၊ သိန္နီမြို့မှ Non -CDM ပြုလုပ်ထားသည့် မြို့နယ်ပညာရေးမှူး၏ လက်ကိုင်ဖုန်းထံ တိုင်းရင်းသားလက်နက်ကိုင် တပ်ဖွဲ့(၂)ဖွဲ့က  ခြိမ်းခြောက်စာပို့လာကြောင်း စုံစမ်းသိရသည်။

Non-CDM ပြုလုပ်ထားသည့် မြို့နယ်ပညာရေးမှူးဖြစ်သည့် ဒေါ်သူဇာအေး၏ လက်ကိုင်ဖုန်းသို့ ဇွန် (၂၅)ရက်တွင် ကချင်လွတ်မြောက်ရေးတပ်မတော် (KIA)နှင့် ကိုးကန့်တပ်မတော် (MNDAA)တို့က ခြိမ်းခြောက်စာပို့‌လာကြောင်း သိရသည်။

 ခြိမ်းခြောက်ခံရသူ သိန္နီမြို့နယ် ဒေါ်သူဇာအေးက ခြိမ်းခြောက်ခံရသည့် ပတ်သက်၍ အထက်ဌာနသို့ ဇွန်လ(၂၆)ရက်နေ့ ညနေ(၄)နာရီ (၄၄)မိနစ်အချိန်က အထူးကြေးနန်းရေးသား ပေးပို့ထားသည့် ကြေးနန်း တစ်စောင် ပေးပို့ကြောင်း သိန္နီမြို့နယ်နေ ပြည်သူတစ်ဦးက သျှမ်းသံတော်ဆင့်ကို ပြောသည်။

“သူက စစ်တပ်သတင်းပေးဒလန်ပါ။ သူ့ကို ဇွန်လ ၂၅ ရက်နေ့က KIA၊ MNDAA တို့က ခြိမ်းခြောက်စာပို့လာတယ် ကြားတယ်၊ ဇွန်လ ၂၆ ရက်နေ့မှာတော့ သူက အဲ့အကြောင်းကို သူ့အထက်ဌာနနဲ့ စစ်ကောင်စီ အချို့ကို အထူးကြေးနန်းနဲ့ တိုင်ကြားတယ် ဆိုတဲ့ သတင်းက အပြင်ကို ပေါက်ကြားလာတယ်” ဟု သိန္နီမြို့နေ ပြည်သူတစ်ဦး က သျှမ်းသံတော်ဆင့်ကို ပြောသည်။

 အဆိုပါ ကြေးနန်းတွင် ၎င်း၏ လက်ကိုင်ဖုန်းနံပါတ်သို့ (KIA/MNDAA)တို့ ပေးပို့လာသည့် ခြိမ်းခြောက် စာမှာ “ကျောင်းပိတ်ပြီး ဆရာ/ဆရာမ ဝန်ထမ်းတွေကို အမြန်ရုပ်သိမ်းပေးလိုက်ပါ၊ သူတို့အတွက် အာမ မခံနိုင်ဘူး၊ လိုက်နာမှုမရှိရင်တော့ ရှိတာ အကုန်သွားတော့မယ်" ဟုသိရသည်။

သိန္နီမြို့နယ်ပညာရေးမှူး ဒေါ်သူဇာအေးသည် ယခင်က ကြံ့ခိုင်ရေးပါတီ၏ အလုပ်အမှုဆောင် အတွင်းရေးမှူးတစ်ဦးဖြစ်သည့် အပြင် CDM လုပ်ဆောင်သည့် သိန္နီမြို့နယ်အတွင်းမှ ဆရာ/မများ၏ နာမည် စာရင်းနှင့် ကိုယ်ရေးရာဇဝင်များကို စစ်ဘက်ဆိုင်ရာ လုံခြုံရေးတပ်ဖွဲ့ နှင့် စစ်ဆင်မှု ကွပ်ကဲရေး ဌာနချုပ်သို့ သို့ သတင်းပေးပို့သူဖြစ်ကြောင်းလည်းသိရသည်။

ထို့အပြင် ဒေါ်သူဇာအေးသည် CDM ပညာရေးဝန်ထမ်းများအပေါ် ဖိအားပေးခြိမ်းခြောက်သူဖြစ်သည့် အတွက် သိန္နီမြို့နေ ပြည်သူများက ၎င်းအား Social Punishment လုပ်ဆောင်ထားကြသည်ကိုလည်း သိရသည်။

သိန္နီမြို့နယ် ပညာရေးမှူး ဒေါ်သူဇာအေးကို ခြိမ်းခြောက်စာပေးပို့သည့် ကိစ္စနှင့် ပက်သက်ပြီး KIA မှ ပြောရေးဆိုခွင့်ရှိသူ ဗိုလ်မှူးကြီး နော်ဘူကို သျှမ်းသံတော်ဆင့် က   အကြိမ်ကြိမ်ဆက်သွယ်ခဲ့သော်လည်း ဖုန်းလက်ခံ ဖြေကြားခြင်းမရှိပါ။

 သျှမ်းမြောက် လားရှိုးမြို့နယ် အတွင်းရှိ ကျေးရွာအုပ်စုများမှ အုပ်ချုပ်ရေးမှူးများအားလုံး CDMဝင်ရန် ဇွန် (၆)ရက် တွင် KIA မှ စာထုတ်ညွှန်ကြားခဲ့ကြောင်းသိရသည်။ 


SHAN News (Burmese Version) 

https://www.facebook.com/shannewsburmese

စကခ(၈) ပိန်နဲတောစခန်းရှေ့တွင် စနိုက်ဘာဖြင့် ပစ်ခတ်ခံရ၍ အကြမ်းဖက် စစ်အုပ်စုမှ တစ်ဦးကျဆုံး


ဇွန် ၂၉ ရက်၊ ၂၀၂၁ခုနစ်၊ သထုံခရိုင်။ သူးလေသတင်းစဥ် 

ကေအဲန်ယူ- သထုံခရိုင်၊ သထုံမြို့နယ်၊ ပိန်နဲတောကျေးရွာ အတွင်း တပ်စွဲထားသော အကြမ်းဖက်စစ်အုပ်စု လက်အောက်ခံ စကခ(၈) ရှေ့တန်းတပ်မဌာနချုပ် စခန်းအရှေ့  ဇွန်လ (၂၇) ရက်နေ့က K.N.L.A (စနိုက်ဘာ)လက်ဖြောင့်တပ်သားမှ သေနတ်ဖြင့် သွားရောက်ပစ်ခတ်၍ အကြမ်းဖက် စစ်အုပ်စုဖက်မှ တစ်ဦးကျဆုံးခဲ့ကြောင်း သိရှိရသည်။

ထိုစကခ(၈)တပ်စခန်းသည် ကျိုက်ကော်-လေးကေ အဝေးပြေးလမ်းမဘေး တွင်ရှိပြီး ပစ်ခတ်မှုအပြီးတွင် ဒေသခံပြည်သူများ၊ ကား၊ ဆိုင်ကယ် များအား ဖြတ်သန်းသွားလာခွင့် ပိတ်ပင်ထားကြောင်း သိရှိရသည်။


Thoolei News - KNU -Department Of Information

https://www.facebook.com/KNUDOIHQ/

ကရင်နီလူမျိုးအားလုံး နေရပ်ပြန်နေရဖို့ ပူးပေါင်းကြိုးစားကြရန် ဒုက္ခသည်စခန်းမှ လူငယ်တွေတောင်းဆို

Photo - CJ

ထိုင်း-ကရင်နီနယ်စပ် ကရင်နီဒုက္ခသည်စခန်းမှ ကရင်နီလူမျိုးအားလုံး ပြည်နယ်အတွင်း ပြန်နေရဖို့ အားလုံးအတူတကွ ပူးပေါင်းကြိုးစားကြပြီး အားတင်းကြဖို့ ကရင်နီဒုက္ခသည်စခန်းအမှတ်(၁)မှ ကရင်နီလူငယ်တွေက တောင်းဆိုထားကြပါတယ်။ 

“ကျမတို့ ပြန်နိုင်ဖို့ လွတ်လွတ်လပ်လပ် ပြည်နယ်ထဲ ပြန်နေရဖို့ ကျမတို့ အားလုံးအတူတကွ ပူးပေါင်းကြိုးစားကြရမယ် အတူတကွ အားတင်းထားရမယ် ကျမတို့တိုင်းပြည်ထဲ အလုပ်ကောင်းကောင်းမွန်မွန် ပြန်လုပ်နိုင်ဖို့ ပြည်တွင်းထဲက လျှပ်စစ်မီးတွေလည်း ကိုယ်တိုင် ပြန်လည်ကိုင်တွယ်နိုင်ရဖို့ ရေအားလျှပ်စစ်တို့ ဘာညာ ကျမတို့ အဆင်ပြေပြေ ပြန်ကိုင်တွယ်နိုင်မဲ့ဟာတွေပေါ့ အဲဒီဟာတွေ အကုန်ပြန်ရမယ်ဆိုရင် ကျမတို့ အေးဆေးလေးနဲ့ အလုပ်နိုင်တာပေါ့။ ဥပမာ လောပိတရေတံခွန်တို့ဘာတို့ပေါ့နော် အဲဒါတွေ ပြန်ကိုင်တွယ်နိုင်ရမယ်ဆိုရင် ကျမတို့ ဒီကရင်နီလူထုအားလုံး ပိုအေးအေးဆေးဆေးနေနိုင်မယ် ရှေ့ဆက်ပြီး ကျမတို့ အတူတကွ ကြိုးစားကြမယ် နိုင်ငံရေးဖက်မှာပေါ့နော်။ ကျမတို့ ကရင်နီတွေက နိုင်ငံရေးနဲ့ဘဲ နေတယ် ကျမတို့အားလုံး ကိုယ့်ကိုယ်ကို ကရင်နီလူမျိုးဘဲလို့ သတ်မှတ်ရင် ကျမတို့ တိုင်းပြည်အတွက် အတူတကွ ကြိုးစားကြရမယ်” လို့ ဒုက္ခသည်စခန်းမှလူငယ်တစ်ဦးဖြစ်တဲ့ မော်နိုမယ်က ပြောပါတယ်။

လက်ရှိနိုင်ငံရေး၊ စစ်ရေးကြောင့် ပြည်တွင်းကို ပြန်ခွင့်မရေသေးပေမယ့် ကရင်နီဒုက္ခသည်စခန်းထဲက ကရင်နီလူမျိုးအားလုံးကတော့ လွတ်လွတ်လပ်လပ် လုပ်ကိုင်စားသောက်ခွင့်၊ ပညာသင်ခွင့်၊ ကျန်းမာရေးဝန်ဆောင်မှု၊ နေရာထိုင်ခင်း၊ နိုင်ငံသားအသိအမှတ်ပြုမှတ်ပုံတင် ရရှိပြီး ပြည်နယ်အတွင်းမှာပဲ အေးဆေးတည်ငြိမ်တဲ့အချိန်မှ ပြန်လည်အခြေချနေထိုင်ခွင့်ရဖို့ မျှော်လင့်နေကြပါတယ်။ 

“အခက်ခဲဒုက္ခတွေ ခံစားရတဲ့သူတွေဆို ကျမတခုစိုးရိမ်တာပေါ့နော် သူတို့အကုန်ထွက်ပြေးတယ် သူတို့တိုင်းပြည်နဲ့ အဝေးထွက်ပြေးတယ်ဆိုရင် နောက်ကျရင် ကျမတို့ တိုင်းပြည်ဟာ ကရင်နီပြည်မဟုတ်တော့ဘူး ဗမာစစ်တပ်တွေ ကျမတို့ နယ်မြေကို အကုန်လာလုယူသွားမှာကို စိုးရိမ်တယ်။ ကျမတို့ ဘာတွေဘဲ ကျန်ခဲ့ကျန်ခဲ့ ဗမာစစ်တပ်တွေက သူတို့ယူသွားမယ်။ မကြောက်နဲ့ စည်းလုံးကြ အဲဒါဘဲ ပြောချင်တယ်။” လို့ လူငယ်တစ်ဦးဖြစ်တဲ့ မော်ကီးမယ်က

ကရင်နီလူမျိုးတွေ မည်သည့်နေရာကိုပဲရောက်ရောက် လက်ရှိအခြေအနေကို အားမလျော့ဘဲ စည်းလုံးကြဖို့လည်း အားပေးပြောဆိုထားပါတယ်။

 ကရင်နီပြည်နယ်အတွင်းမှာ စစ်တပ်က အာဏာသိမ်းပြီးနောက် မေလအတွင်းမှာ ဒီမော့ဆိုမြို့နယ်အတွင်းနဲ့ ကရင်နီ-ရှမ်း နယ်စပ် မိုးဗြဲမြို့မှာ ပြည်သူ့ကာကွယ်တပ်နဲ့ စစ်ကောင်စီတပ်တို့ တိုက်ပွဲစတင်ဖြစ်ပွားခဲ့ပြီး ကရင်နီပြည်တွင်း၊ မိုးဗြဲမြို့နဲ့ နယ်စပ်တွေမှာ တိုက်ပွဲကြောင့် နေရပ်စွန့်ခွာထွက်ပြေးတိမ်းရှောင်ရတဲ့ ပြည်သူ တစ်သိန်းကျော် ရှိနေပြီလို့ သိရပါတယ်။ 

“ကျတော်တို့အနာဂတ်မှာက အတတ်နိုင်ဆုံး စစ်မဖြစ်ရင်တော့ပိုကောင်းတာပေါ့ ငြိမ်းချမ်းရေးဆိုပြီးတော့ တကယ်ငြိမ်းချမ်းရေးလမ်းမှာ တကယ်သွားနိုင်တဲ့ တကယ်လိုလားတဲ့ ခေါင်းဆောင်တွေလည်းထွက်ပေါ်လာဖို့လိုလိမ့်မယ်။” လို့ လူငယ်တစ်ဦးဖြစ်တဲ့ ကိုသန်းမောင်ကလည်း ပြောပါတယ်။

 ၁၉၉၅-၉၆ ဝန်းကျင်မှာ ကရင်နီပြည်နယ်က ဖြတ်လေးဖြတ်ဒဏ်အပြင် စစ်တပ်ရဲ့ အကြမ်းဖက်နှိပ်စက်ဒဏ်ကို လွတ်မြောက်ဖို့အတွက် ကရင်နီပြည်နယ်အရှေ့ဖက် သံလွင်မြစ် တစ်ဖက်ကမ်း ထိုင်းနယ်စပ်ကို ထွက်ပြေးတိမ်းရှောင်ခဲ့ရပြီး လက်ရှိမှာ ကရင်နီဒုက္ခသည်စခန်း တည်ရှိတာ နှစ်ပေါင်း ၂၀ ကျော်ရှိနေပါပြီ။

ကရင်နီဒုက္ခသည်စခန်းအမှတ်(၁)မှာ နေထိုင်တဲ့ ကရင်နီလူမျိုး ၈ထောင်ကျော်ရှိပြီး လက်ရှိမှာ စခန်းအတွင်း ဝန်ဆောင်မှုပေးတာလျော့ချလာသလို ထိုင်းနိုင်ငံမှာခိုလှုံနေရတာဖြစ်ပြီး အာဏာပိုင်တွေရဲ့ ထိန်းချုပ်မှုအောက်မှာပဲနေရတာဖြစ်တဲ့အတွက် အဆင်ပြေမှု မရှိဘူးလို့ ပြောဆိုကြပါတယ်။


Kantarawaddy Times

https://www.facebook.com/KantarawaddyTimes

စစ်ကောင်စီမှ အကြောင်းမဲ့ပစ်ခတ်မှုကြောင့် မိုးဗြဲလူငယ်တစ်ဦးသေဆုံး


ကရင်နီ-ရှမ်း နယ်စပ်ရှိ မိုးဗြဲမြို့နယ်အတွင်းမှာ ဆိုင်ကယ်စီးလာတဲ့ လူငယ်နှစ်ဦးကို အကြမ်းဖက်စစ်ကောင်စီမှ အကြောင်းမဲ့ ပစ်ခတ်မှုကြောင့် တစ်ဦး သေဆုံးသွားတယ်လို့ ဒေသခံပြောကြားချက်အရ သိရပါတယ်။

ယနေ့ ဇွန်လ ၂၈ရက်နေ့ ညနေပိုင်းမှာ မိုးဗြဲမြို့ကနေ ဖယ်ခုံမြို့ကိုသွားတဲ့ လမ်းမကြီးတစ်လျှောက်က ရေကာတာရွာနဲ့ ပင်သာရွာကြားမှာ ဆိုင်ကယ်စီးလာတဲ့ လူငယ်နှစ်ဦးကို ပစ်ခတ်မှုကြောင့် တစ်ဦးမှာ ပွဲချင်းပြီးသေဆုံးသွားပြီး ကျန်တစ်ဦးမှာ လွတ်မြောက်ခဲ့တယ်လို့ သိရပါတယ်။

ဒေသခံတစ်ဦးက “ ဆိုင်ကယ်စီးလာတဲ့ ပြည်သူနှစ်ဦးကိုအကြောင်းမဲ့ပစ်သတ်တာ တစ်ယောက်တော့ လွတ်မြောက်သွားတယ်ပြောတယ်” လို့ ပြောပါတယ်။

သေဆုံးသွားတဲ့လူငယ်တစ်ဦးမှာ အသက် ၁၈နှစ်ဝန်းကျင်သာရှိသေးတယ်လို့ သိရပါတယ်။

မိုးဗြဲမြို့နယ်မှာ ဇွန်လ ဒုတိယပတ်မှာစပြီး  အဖွဲ့အစည်းအချို့က ကြားဝင်ညှိနှိုင်းပေးမှုကြောင့် ပြည်သူ့ကာကွယ်ရေးတပ်နဲ့ အကြမ်းဖက်စစ်ကောင်စီတပ်တို့ တိုက်ပွဲမဖြစ်ပွားတော့ပေမယ့် ရက် ၂၀ကျော်အကြာမှာ ပထမဆုံး အရပ်သားကို ပစ်ခတ်မှုပြန်လည် ဖြစ်ပွားတာ ဖြစ်ပါတယ်။

ဇွန်လ ဒုတိယပတ်မှစပြီး ယာယီအပစ်ခတ်ရပ်ဆိုင်းထားပြီးတဲ့နောက်မှာ စစ်ဘေးရှောင်ပြည်သူအချို့ မိမိနေရပ်ကိုပြန်လာတဲ့အချိန်မှာ မပေါက်ကွဲသေးတဲ့ မိုင်းတွေလည်း တွေ့ရှိခဲ့တယ်လို့ ဒေသခံတွေက ပြောပါတယ်။

မိုးဗြဲမြို့နယ်အတွင်းမှာ အကြမ်းဖက်စစ်ကောင်စီတပ်က လက်နက်ကြီးနဲ့ပစ်ခတ်မှုကြောင့် အရပ်သားပြည်သူအချို့ရဲ့ နေအိမ်ပျက်ဆီးခံရသလို နေအိမ်နဲ့ကုန်ဆုံဆိုင်အချို့လည်း မွှေနှောက်ရှာဖွေမှုကြောင့် ပျက်စီးမှုအများအပြားရှိခဲ့ပါတယ်။


Kantarawaddy Times 

https://www.facebook.com/KantarawaddyTimes

လက်နက်ကိုင်တော်လှန်မှုတွေ အနှံ့အပြား ရှိလာနေတာကြောင့် စိုးရိမ်စရာ ဖြစ်လာနေကြောင်းICG သတိပေး


စစ်အာဏာသိမ်းတဲ့ ဖေဖော်ဝါရီလ ၁ ရက်နေ့ကတည်းကစလို့ မြန်မာနိုင်ငံအနှံ့အပြားမှာ ပဋိပက္ခတွေ ပျံ့နှံ့လာခဲ့ရာမှာ အခုအခါ ကျေးလက်မှာရော၊ မြို့ပြမှာပါ ပြည်သူတွေ လက်နက်ကိုင်စွဲ တော်လှန်တိုက်ခိုက်လာနေကြပြီး ထိန်းမနိုင်သိမ်းမရ မင်းမဲ့အခြေအနေမျိုး တဖြည်းဖြည်း ရောက်လာနေပြီလို့ နိုင်ငံတကာ ပဋိပက္ခဖြေရှင်းရေးအဖွဲ့ International Crisis Group (ICG) က ထုတ်ပြန်တဲ့ အစီရင်ခံစာသစ်မှာ ဖော်ပြထားပါတယ်။

တချို့က တူမီးသေနတ်တွေ၊ အိမ်လုပ်လက်နက်တွေနဲ့ တိုက်ခိုက်နေကြတာ ဖြစ်ပေမဲ့ တချို့ကတော့ အခုအခါ ပိုကောင်းမွန်တဲ့ လက်နက်တွေနဲ့ တိုက်ခိုက်လာနေကြပြီမို့ အာဏာသိမ်း စစ်ကောင်စီတပ်ဖွဲ့တွေဘက်မှာ ထိခိုက်သေဆုံးမှုတွေ ပိုကြီးမားလာစေခဲ့တာပါ။

အာဏာသိမ်းစစ်ကောင်စီတပ်ဖွဲ့တွေဘက်က ဘယ်သူဘယ်ဝါ မရွေးဘဲ လူနေထိုင်တဲ့ဒေသတွေကို အမြောက်တွေနဲ့ လှမ်းပစ်တာ၊ လေကြောင်းကနေ ဗုံးကြဲတာ၊ ရဟတ်ယာဉ်နဲ့ ပစ်ခတ်တာတွေမျိုးတွေနဲ့ တုံ့ပြန်တိုက်ခိုက်နေတာ ဖြစ်ပါတယ်။

"Taking Aim At The Tatmadaw: The New Armed Resistance To Myanmar's Coup""တပ်မတော်ကို ပစ်မှတ်ထားရင်း-စစ်အာဏာသိမ်းမှု ဆန့်ကျင်တဲ့ လက်နက်ကိုင်တော်လှန်မှုသစ်" လို့်အဓိပ္ပာယ်ရတဲ့ ICG ရဲ့ အဲဒီအစီရင်ခံစာထဲမှာ အဏာသိမ်း စစ်ကောင်စီရဲ့ တွေ့ရမရှောင် ပြင်းထန်တဲ့ တုံ့ပြန်တိုက်ခိုက်မှုတွေကြောင့် အမျိုးသမီး၊ အမျိုးသား ကလေးငယ် သိန်းနဲ့ချီ နေအိမ်စွန့်ခွာ ထွက်ပြေးခဲ့ကြရတယ်လို့ ဖော်ပြထားပါတယ်။

လုံခြုံရေးအခြေအနေအရရော၊ စစ်တပ်ရဲ့ ဖမ်းဆီးခံရမှု၊ ကယ်ဆယ်ရေး အထောက်အပံ့တွေ သိမ်းဆည်းခံရမှု၊ အထောက်အပံ့ ပို့ပေးဖို့ ကြိုးစားသူတွေ သတ်ဖြတ်ခံရမှု အပါအဝင် အဲဒီနေရာဒေသတွေကို သွားရောက်ခွင့် ပိတ်ပင်ခံထားရမှုမျိုးလို ကန့်သတ်ချက်တွေကြောင့် ဒေသန္တရ ကွန်ရက်အဖွဲ့တွေ၊ ကယ်ဆယ်ရေး အေဂျင်စီတွေအနေနဲ့ အဲဒီဒုက္ခသည်တွေကို လုံလောက်တဲ့ အကူအညီတွေ မပေးနိုင်ဘူး လို့ ဆိုပါတယ်။

ဒေသခံတွေနဲ့ ကြုံသလို ဖွဲ့ထားတဲ့ အရပ်သားအဖွဲ့လို အဖွဲ့မျိုးတွေကနေ အခုအခါ ပိုစနစ်တကျနဲ့ ပိုကောင်းတဲ့ လက်နက်တွေ ကိုင်ဆောင်ထားပြီး အထောက်အပံ့တွေကောင်းကောင်း ရှိနေတဲ့ လက်နက်ကိုင် ပြည်သူ့ကာကွယ်ရေး အဖွဲ့တွေ အလျင်အမြန် ပေါ်ထွန်းလာခဲ့တာဟာ ဆယ်စုနှစ်ပေါင်းများစွာကြာမြင့်နေတဲ့ မြန်မာနိုင်ငံရဲ့ ပြည်တွင်းစစ်မှာ အဆင့်သစ်တစ်ရပ် တက်လှမ်းလာတဲ့ လက္ခဏာဖြစ်တယ်လို့ အဲဒီအစီရင်ခံစာမှာ သတိပေးထားပါတယ်။

တပ်မတော်အနေနဲ့ အင်အားအလွန်အကျွံ မသုံးဖို့၊ တိုက်ခိုက်ရေးသမားတွေနဲ့ အရပ်သားတွေကို ခွဲခြားသိရှိဖို့နဲ့ စစ်ဘေးရှောင်တွေအတွက် ကယ်ဆယ်ရေးအထောက်အပံ့တွေကို အတားအဆီး အကန့်အသတ်မရှိ သွားရောက် ထောက်ပံ့ခွင့် ပြုဖို့ ဆိုတဲ့ နိုင်ငံတကာစည်းမျဉ်းတွေကို လိုက်နာသင့်တယ်လို့လည်း ICG အစီရင်ခံစာမှာ တိုက်တွန်းထားပါတယ်။

အာဏာသိမ်းစစ်ကောင်စီကို တန်ပြန် အကျိုးတွေနဲ့ ရင်ဆိုင်ရအောင် အရေးယူဆောင်ရွက်ဖို့ ကုလသမဂ္ဂ အပါအဝင် ပြည်ပက ကမ္ဘာ့နိုင်ငံတွေမှာ တာဝန်ရှိတယ်လို့လည်း ဆိုပါတယ်။

တခါ အခုအသစ်ဖွဲ့စည်းလိုက်တဲ့ အရပ်သား လက်နက်ကိုင်တပ်ဖွဲ့တွေဘက်ကလည်း ဖမ်းဆီး ထိန်းသိမ်းထားသူတွေကို ညှင်းပန်း နှိပ်စက်တာမျိုး၊ အထူးသဖြင့် သတ်ဖြတ်တာမျိုးတွေကို ရှောင်ကြဉ်ဖို့ လိုတယ်လို့လည်း နိုင်ငံတကာ ပဋိပက္ခဖြေရှင်းရေးအဖွဲ့ ICG ရဲ့ အစီရင်ခံစာမှာ တိုက်တွန်း ဖော်ပြထားပါတယ်။


BBC Burmese

https://www.bbc.com/burmese/live/burma-57497528

ရေးမှာ ကျေးရွာအုပ်ချုပ်ရေးမှူး သေနတ်နဲ့ ပစ်သတ်ခံရ


မွန်ပြည်နယ် ရေးမြို့နယ် နှင်းစုံကျေးရွာ အုပ်ချုပ်ရေးမှူးဟာ ဇွန်လ ၂၈ ရက်နေ့မနက်ပိုင်းက သေနတ်နဲ့ ပစ်သတ်ခံရတယ်လို့ ဒေသခံတို့ထံမှ သိရကြောင်း Dawei Watch က ရေးပါတယ်။

နှင်းစုံကျေးရွာ အုပ်ချုပ်ရေးမှူးကို ဇွန်လ ၂၈ ရက် ဒီကနေ့ မနက်ပိုင်းက အမည်မသိလူနှစ်ယောက်က လာရောက်ခေါ်ဆောင်သွားပြီးနောက် ရေး-မော်လမြိုင်လမ်းမကြီးဘေး ဆေးတောင်လမ်းဝအနီးမှာ ရုပ်အလောင်း ပြန်လည်တွေ့ရှိခဲ့တာ ဖြစ်တယ်လို့လည် းသိရပါတယ်။

“ဦးခေါင်းမှာ သေနတ်ဒဏ်ရာနဲ့ သေဆုံးနေတာဆိုတော့ ပစ်သတ်သွားတယ်လို့ပဲ ယူဆရတာပေါ့” လို့ ဒေသခံတစ်ဦးက ပြောပါတယ်။

ရေးမြိုနယ်မှာ အခုလို ပစ်သတ်ခံရတဲ့ ဖြစ်စဉ် ဆက်တိုက်ဖြစ်ပွားနေပြီး ပြီးခဲ့တဲ့ဇွန်လ ၂၄ ရက်နေ့က ရေးမြို့နယ် ဟံဂံကျေးရွာအနီး လူတစ်ဦး ပစ်သတ်ခံခဲ့ရပါတယ်။

ဒါ့အပြင် ဇွန်လ ၁၄ ရက်နေ့ကလည်း ရေးမြို့ အောင်မေတ္တာရပ်ကွက်ရှိ အလက (၂) ကျောင်းရှေ့မှာ ရပ်မိရပ်ဖတစ်ဦး ပစ်သတ်ခံခဲ့ရပါတယ်။

စစ်တပ် အာဏာသိမ်းပြီးနောက်ပိုင်း ရေးမြို့နယ်အတွင်းမှာ သေနတ်နဲ့ ပစ်သတ်ခံရတဲ့ ဖြစ်စဉ်တွေ ဆက်တိုက် ဖြစ်ပွားနေတဲ့အပြင် စာသင်ကျောင်းတွေမှာ ဗုံးတွေ့ရှိမှုတွေ ဗုံးပေါက်ကွဲမှုဖြစ်စဉ်များလည်း ဆက်တိုက်ဖြစ်ပေါ်နေတယ်လို့ ဒေသခံတွေက ပြောပါတယ်။


BBC Burmese

https://www.bbc.com/burmese/live/burma-57497528

မန္တလေးမှာ စစ်တပ်က ပစ်ခတ်လို့ အရပ်သား နှစ်ဦးဒဏ်ရာရ

မန္တလေးမှာ စစ်တပ်က ပစ်ခတ်လို့ အရပ်သား နှစ်ဦးဒဏ်ရာရ မန္တလေးတိုင်း၊ ပြည်ကြီးတံခွန်မြို့နယ်မှာ ဇွန် ၂၈ ရက် မနက်ပိုင်းက စစ်တပ်က ပစ်ခတ်လိုက်တဲ့အတွက် ကျည်ထိမှန်ဒဏ်ရာရရှိခဲ့သူ နှစ်ဦး။  Photo: Citizen Journalist

မန္တလေးတိုင်း၊ ပြည်ကြီးတံခွန်မြို့နယ်မှာ ဇွန် ၂၈ ရက် မနက်ပိုင်းက စစ်တပ်က ရမ်းသမ်း ပစ်ခတ်လိုက်တဲ့အတွက် လမ်းသွားလမ်းလာ အရပ်သား နှစ်ဦး ကျည်ထိမှန်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။

မန္တလေးမြို့သစ်၊ ( ဋ )ရပ်ကွက်၊ မန်လွယ်လမ်း နဲ့ ရွှေမန်းလမ်းအကြား ၄၉ လမ်း ညာဘက်ခြမ်းမှာ ရှိတဲ့ မြေကွက်တစ်ခုအပေါ် ပိုင်ဆိုင်မှု အငြင်းပွားရာကနေ အဲ့ဒီထဲကတစ်ဦးက စစ်တပ်ကို ခေါ်လိုက်တာကြောင့် ရဲနဲ့စစ်တပ် ရောက်လာပြီး ခြောက်လှန့်ပစ်ခတ်တာကနေ အပြစ်မဲ့အရပ်သားနှစ်ဦး ကျည်ထိမှန်ခဲ့တာလို့ ဒေသခံတစ်ဦးက ပြောပါတယ်။

"မြေအငြင်းပွားတာပေါ့။ အဲ့ဒီနေရာက ကျူးကျော်တွေ များတယ်။အရပ်စာချုပ်တွေနဲ့ ရောင်းဝယ်မှုတွေလုပ်တာ။ အခုလည်း မြေကွက်ပိုင်ဆိုင်မှုကိုအငြင်းပွားရင်းက တစ်ယောက်(အငြင်းပွားသူ)က စစ်တပ်ကို အကြောင်းကြားလိုက်တော့ လာပြီး ရမ်းပစ်တာ" လို့ အမည်မဖော်လိုတဲ့ ရပ်ကွက်နေပြည်သူတစ်ဦးက ပြောပါတယ်။

ရပ်ကွက်နေပြည်သူတချို့ကတော့ ဖြစ်စဉ်မှာ သေနတ်ထိမှန်ခဲ့တဲ့ အရပ်သားတွေကို စစ်တပ်က ခေါ်သွားတယ်လို့ ဆိုပါတယ်။

အမျိုးသမီးတစ်ဦးသေဆုံးပြီး အမျိုးသားတစ်ဦးဒဏ်ရာရရှိတယ်လို့ ဒေသခံတွေက ပြောနေပေမယ့် သေဆုံးမှုရှိမရှိ နဲ့ ပစ်ခတ်ခံလိုက်ရတဲ့သူတွေဟာ ဘယ်သူတွေဖြစ်တယ်ဆိုတာကိုတော့ RFA က အတည်ပြုနိုင်ခြင်း မရှိသေးပါဘူး။

ဒီဖြစ်စဉ်နဲ့ ပတ်သက်လို့ မေးမြန်းနိုင်ဖို့ စစ်ကောင်စီသတင်းပြန်ကြားရေးအဖွဲ့ဘက်ကို RFA က ဆက်သွယ်မေးမြန်းဖို့ ကြိုးစားဆဲဖြစ်ပါတယ်။


RFA Burmese

https://www.rfa.org/burmese/news/civilian-got-injuried-mdy-military-06282021122047.html

ဒေါ်အောင်ဆန်းစုကြည်အမှု ခန့်မှန်းတာထက် ပိုကြာနိုင်

ဒေါ်အောင်ဆန်းစုကြည်အမှု ခန့်မှန်းတာထက် ပိုကြာနိုင် ၂ဝ၂၁ ဧပြီလ ၁ ရက်နေ့က မုံရွာမှာ စစ်အာဏာရှင်ဆန့်ကျင်ရေး ဆန္ဒကြနေကြသည့် ဒေသခံပြည်သူများ။ File Photo/ AFP

အဖမ်းဆီးခံနေရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ရဲ့ အမှုမှာ မျက်မြင်သက်သေ နှစ်ဒါဇင် နီးပါးကို ခေါ်ယူဖို့ရှိနေတာကြောင့် အမှုစစ်ဆေးမှုဟာ စီစဉ်ထားတာထက် အချိန်ပိုကြာလိမ့်မယ်လို့ ဒေါ်အောင်ဆန်းစုကြည်ရဲ့ရှေ့နေ ဦးခင်မောင်ဇော်က တနင်္လာနေ့က ပြောတဲ့အကြာင်း AFP သတင်းမှာ မနေ့က ဖော်ပြထားပါတယ်။

ဇူလိုင်လကုန်ပိုင်းမှာ အမှုစစ်ဆေးမှုတွေ အဆုံးသတ်နိုင်မယ်လို့ ဒေါ်အောင်ဆန်းစုကြည်အတွက် ဥပဒေရေးရာ ဆောင်ရွက်နေကြတဲ့အဖွဲ့က ခန့်မှန်းထားပေမယ့် မျက်မြင်သက်သေ ၂၃ယောက်ကို ခေါ်ယူ စစ်ဆေးဖို့ ရှိနေသေးတာကြောင့် ဇူလိုင်လကုန်ပိုင်းမှာ မဖြစ်နိုင်ဘူးလို့ ရှေ့နေဦးခင်မောင်ဇော်က ပြောပါတယ်။

မနေ့တုန်းက နေပြည်တော်က သီးသန့်တရားရုံးမှာ တတိယအကြိမ်မြောက် ရုံးချိန်းအဖြစ် ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ကို ရုံးထုတ် စစ်ဆေးခဲ့ပါတယ်။ ဒေါ်အောင်ဆန်းစုကြည်ကို စွဲဆိုထားတဲ့ အထဲက သဘာဝဘေးအန္တရာယ် စီမံခန့်ခွဲမှု ဥပဒေ ပုဒ်မ (၂၅) ၊ ဆက်သွယ်ရေး ပုဒ်မ (၆၇) ၊ ပို့ကုန်သွင်းကုန် ဥပဒေပုဒ်မ (၈) တို့အတွက် တရားလိုပြသက်သေတွေကို မနေ့က စစ်ဆေးခဲ့တယ်လို့ ဒေါ်အောင်ဆန်းစုကြည်ရဲ့ ရှေ့နေနောက်တဦးဖြစ်တဲ့ ဒေါ်မင်းမင်းစိုးက သတင်းထောက်တွေကို ပြောပါတယ်။ ဒီနေ့လည်းနောက်တကြိမ် ရုံးချိန်းရှိပါသေးတယ်။

ဒေါ်အောင်ဆန်းစုကြည်၊ သမ္မတ ဦးဝင်းမြင့်နဲ့ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင် တို့ကို နိုင်ငံတော်ငြိမ်ဝပ်ပိပြားမှုကို ပျက်ပြားအောင် လှုံ့ဆော်မှု ပုဒ်မ ၅၀၅ (ခ) အတွက် စစ်ကောင်စီဘက်က တင်သွင်းတဲ့ စာရွက်စာတမ်းနဲ့ ဓာတ်ပုံသက်သေကို တင်သင့်၊ မတင်သင့်ကို ကြားဖြတ်အမိန့် ဒီနေ့ချမှတ်ဖို့ ရှိပါတယ်။ ဒေါ်အောင်ဆန်းစုကြည်ဟာ အမှု ခုနစ်ခုနဲ့ စွဲချက်တင်ခံထားရပြီး အမှုအားလုံးကို အမြင့်ဆုံး ပြစ်ဒဏ်ပေးခဲ့ရင် ထောင်ဒဏ်တစ်သက်တစ်ကျွန်းအထိ ချမှတ်ခံရနိုင်ပါတယ်။


RFA Burmese

https://www.rfa.org/burmese/news/daw-aung-san-suu-kyi-military-coup-06282021141316.html

၂၄နာရီအတွင်း ပိုးစစ်သူ၆ထောင်ကျော်ထဲ တထောင်ကျော်မှာ ကိုဗစ်ပိုးတွေ့

ကိုဗစ်သားကောင်ဖြစ်ခဲ့ရသူတဦးအား ရေခဲတိုက်သို့ပို့စဉ် (ဓာတ်ပုံ - Maulamyine Rescue Organization)

မြန်မာနိုင်ငံမှာ ဒီကနေ့ ကိုဗစ်ရောဂါပိုးတွေ့သူ ၁၂၂၅ ဦးရှိကြောင်း ကျန်းမာရေးနဲ့အားကစားဝန်ကြီးဌာနရဲ့ဇွန်လ ၂၈ရက်၊ ည၈နာရီထုတ်ပြန်ချက်မှာဖော်ပြထားပါတယ်။ ဒါဟာ စစ်အာဏာသိမ်းပြီးနောက်ပိုင်း တရက်ထဲ ပိုးတွေ့သူအရေအတွက် အများဆုံးလည်းဖြစ်ပါတယ်။ တိုင်းနဲ့ပြည်နယ်အသီးသီးက ဓာတ်ခွဲနမူနာပေါင်း ၆ထောင်၅ ရာကျော်ထဲက လူ ၁၂၀၀ ကျော်မှာ ရောဂါပိုးကူးစက်နေတာဖြစ်ပြီး သေဆုံးသူက ၁၂ ဦးရှိတယ်လို့လည်း ကျန်းမာရေးဌာနက ထုတ်ပြန်ထားပါတယ်။

စစ်အာဏာသိမ်းပြီးနောက်ပိုင်း ကပ်ရောဂါကူးစက်မှုမြင့်တက်လာတာကြောင့် မလိုအပ်ပဲ အိမ်ပြင်မထွက်ရ Stay-at-home အမိန့်ထုတ်ပြန်ထားတဲ့ မြို့နယ်ပေါင်း ၁၁ ခုထက်မနည်းရှိပါတယ်။ ခုလို ကိုဗစ်ရောဂါပိုးကူးစက်မှုမြင့်တက်လာတဲ့အတွက် ကပ်ရောဂါထိန်းချုပ်နိုင်ဖို့ ရန်ကုန်၊ ပဲခူး၊ မန္တလေးနဲ့ ပုသိမ်က ပိတ်ထားရတဲ့ စက်ရုံအလုပ်ရုံပေါင်းကလည်း ၂ ရာကျော်ရှိပါတယ်။ လက်ရှိချိန်ထိ ပိုးစစ်ဆေးမှုပေါင်း ၂၇ သိန်းကျော်ထဲမှာပိုးတွေ့သူ ၁သိန်းခွဲကျော်ရှိတယ်လို့လည်း ကြေငြာချက်မှာဖော်ပြထားပါတယ်။ သေဆုံးသူစုစုပေါင်းကတော့ ၃ ထောင့် ၃ ရာကျော်ရှိပါတယ်။

မြန်မာနိုင်ငံတွင်း အခုနှစ်ဆန်း ဖေဖော်ဝါရီလ ၁ရက်နေ့ စစ်တပ်ကအာဏာသိမ်းပြီးနောက်ပိုင်း ဆန္ဒပြမှုတွေအတူ ကျန်းမာရေးဝန်ထမ်းတွေရဲ့ CDM အကြမ်းမဖက်အာဏာဖီဆန်ရေးတွေလုပ်နေတာကြောင့် ရောဂါပိုးစစ်ဆေးနိုင်မှု အားနည်းနေသလို၊ ကျန်းမာရေးစောင့်ရှောက်မှုစနစ်ကလည်း လုံးဝ ပြိုလဲသလိုဖြစ်နေပါတယ်။ ဒါကြောာင့် အခုလို ရောဂါကူးစက်မှုတွေ တိုးလာချိန်မှာ၊ အာဏာပိုင်တွေဖက်က ရောဂါထိန်းချုပ်ရေးကို ထိထိရောက်ရောက်လုပ်နိုင်ပါမလား သံသယတွေရှိနေကြပါတယ်။

မြန်မာနိုင်ငံ အားကစားနဲ့ ကျန်းမာရေးဝန်ကြီးဌာနက ဇွန်လ ၂၈ ရက်နေ့ ည ၈ နာရီ ထုတ်ပြန်ချက်အရ ဓာတ်ခွဲနမူနာ စုစုပေါင်း (၆,၅၈၆) ခုကို စစ်ဆေးခဲ့တာမှာ COVID-19 ရောဂါ ဓာတ်ခွဲအတည်ပြု လူနာ သစ် (၁,၂၂၅) ဦး တွေ့ရှိခဲ့တယ်လို့ ဆိုပါတယ်။ ဒါ့အပြင် ဒီကနေ့မှာဘဲ COVID-19 ရောဂါနဲ့ ထပ်မံသေဆုံးသူ (၁၂) ဦး ရှိတာကြောင့် အခုချိန်ထိ သေဆုံးသူ စုစုပေါင်း (၃,၃၀၉) ဦး ရှိသွားပြီ ဖြစ်ပါတယ်။

အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ကိုဗစ်ကပ်ရောဂါအတွက် ပြည်သူတွေ အထူး သတိပြုကြဖို့ ဒီကနေ့ ပြုလုပ်တဲ့ အမှုရုံးချိန်းအတွင်း ရှေ့နေတွေကတဆင့် သတင်းစကား ပါးခဲ့ပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/more-covid-cases-are-tested-in-myanmar-after-military-coup-/5945524.html

ရှမ်းပြည် လောက်ကိုင်မြို့နယ် မလိုအပ်ပဲအိမ်ပြင်မထွက်ရကန့်သတ်

ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသ လောက်ကိုင်မြို့နယ်ကို ဒီနေ့ ဇွန် ၂၈ ရက်ကစပြီး မလိုအပ်ရင် အိမ်ပြင်မထွက်ရ Stay at Home သတ်မှတ်လိုက်ပါတယ်။ ၁၀ ရက်အတွင်း ကိုဗစ်အတည်ပြုလူနာ ၁၀၀ ကျော်ရှိတဲ့အတွက် ကျန်းမာရေးဝန်ကြီးဌာနက ခုလိုသတ်မှတ်ခဲ့တာဖြစ်ပါတယ်။ ကျောင်းတွေပါ ပိတ်ထားရအောင် စိုးရိမ်စရာဖြစ်နေတဲ့ လောက်ကိုင်မြို့နယ်ဘက်က အခြေအနေ ရန်ကုန်သတင်းပေးပို့ချက်ကို မမြသဇင်အောင် ပြောပြမှာပါ။

ရှမ်းပြည်မြောက်ပိုင်း၊ လောက်ကိုင်မြို့မှာ ဇွန်လ ၁၆ ရက်ကနေ ၂၇ရက်နေ့အထိ ၁၂ရက်တာကာလအတွင်း ကိုဗစ်အတည်ပြုလူနာပေါင်း ၁၂၉ ဉီး ရှိခဲ့ပါတယ်။ ဒီလို ပိုးတွေ့သူ ဉီးရေတိုးလာနေတဲ့ လောက်ကိုင်မြို့ကို ဒီကနေ့ကစပြီး မလိုအပ်ဘဲအပြင်မထွက်ဖို့ Stay at Home သတ်မှတ်လိုက်ပါတယ်။ ဒါ့အပြင် စျေးတွေထဲလည်း တချို့နေရာတွေမှာ အသွားအလာကန့်သတ်ထားပြီး စာသင်ကျောင်းတွေကိုလည်း ပိတ်ထားတယ်လို့ လောက်ကိုင်မှာနေတဲ့ ဒေသခံတ ဉီးက ဗွီအိုအေကိုပြောပါတယ်။

"အပြင်ထွက်ရင်တော့ Mask တပ်ရတာပေါ့။ သွားရလာရတာ စျေးတွေကတော့ ဖြတ်လမ်းကနေသွားရတာပေါ့။ သူတို့ပိတ်ထားတဲ့ သတ်မှတ်ထားတဲ့နေရာတွေကတော့ သွားလို့မရဘူးပေါ့။ ပိတ်တဲ့နေရာတွေရှိတယ်ဗျ။ စျေးတွေကတော့ ကြိုးတော့တားထားတာပေါ့၊ အပြင်ဘက်ကနေ ဝယ်ရတယ်၊ သူတို့သတ်မှတ်ထားတဲ့အတိုင်း ဝယ်ရတယ်၊ ပုံမှန်အတိုင်းတော့ မဟုတ်ဘူးပေါ့။ ကျောင်းတွေကတော့ အခုလောလောဆယ် ပိတ်ထားတယ်။ ကလေးတွေကတော့ အခုကျောင်းမတက်ရတော့ဘူးပေါ့။ ရောဂါတွေက အရမ်းဆိုးနေတယ်။"

ကိုဗစ်အတည်ပြုလူနာ တနေ့တခြားပိုများနေတဲ့ မြန်မာနိုင်ငံမှာ လောက်ကိုင်မြို့နယ်အပါအဝင် Stay at Home သတ်မှတ်ထားတဲ့မြို့နယ် စုစုပေါင်း ၁၁ မြို့နယ်ရှိသွားပါပြီ။ အတည်ပြုလူနာအများဆုံးရှိရာ ချင်းပြည်နယ်၊ စစ်ကိုင်းတိုင်း၊ ပဲခူးတိုင်းနဲ့ ရှမ်းပြည်နယ်မြောက်ပိုင်းက မြို့နယ် ၁၁ မြို့နယ်ဖြစ်ပါတယ်။

စစ်တပ်ကအာဏာသိမ်းခဲ့ပြီးနောက် ဖေဖော်ဝါရီလ နှောင်းပိုင်းကစပြီး လောက်ကိုင်မြို့မှာရှိတဲ့ တရုတ်လူမျိုးပိုင် အလုပ်ရုံတွေလည်း တခုပြီးတခု ပိတ်ခဲ့ပါတယ်။ နိုင်ငံရေးအခြေအနေ မတည်ငြိမ်တာကြောင့် အလုပ်ရှင်တော်တော်များများ အလုပ်တွေရပ်ပြီး နေရပ်ပြန်သွားကြ မြန်မာလုပ်သားတွေ အခက်တွေ့နေကြပါတယ်။ အခုတခါလည်း ကိုဗစ်ကပ်ရောဂါ ကူးစက်သူတွေ ပြန်တွေ့လာနေလို့ အသွားအလာတွေကိုပါ ကန့်သတ်လိုက်တာကြောင့် ဒုက္ခတွေပိုရောက်ရတယ်လို့ မြန်မာလုပ်သားတ ဉီးက ပြောပါတယ်။

"ဒီမှာ အလုပ်အကိုင်တွေက ပိတ်နေတဲ့အခါကျတော့ ဒေသခံတွေမှာက စားဝတ်နေရေးအကြပ်အတည်းတွေ ဖြစ်နေတာပေါ့။ တရုတ်တွေကလည်း သူတို့နိုင်ငံကိုပြန်သွားတော့ အလုပ်မရှိတော့ဘဲ မြန်မာလူမျိုးတွေ အခက်အခဲတြွေဖစ်ကြတယ်။ စားဖို့ထက် နေဖို့က အဓိကဖြစ်နေတော့ မြန်မာပြည်ပြန်မယ်ဆိုရင်လည်း ဒီနိုင်ငံရေးအခြေအနေ မကောင်းတဲ့အခါကျ လမ်းတွေကလည်းပိတ်နေတော့ ဆင်းလို့လည်းမရဘူး။ ကိုဗစ်ကြောင့် အခက်အခဲတွေ အများကြီးဖြစ်နေကြတယ်။"

ကပ်ရောဂါထိန်းချုပ်ရေးနဲ့ ပတ်သက်လို့ လောက်ကိုင်မြို့မှာ ကိုဗစ်လူနာတွေနဲ့ ထိတွေ့ဆက်စပ်သူတွေကို ဘယ်လိုကုသမှုပေးနေလဲဆိုတာကို တာဝန်ရှိသူတွေကို ဆက်သွယ်မေးမြန်းခဲ့ပေမဲ့ ပြန်လည်ဖြေကြားတာ မရှိခဲ့ပါဘူး။ ဇွန်လ ၂၇ရက်၊ မနေ့ကစပြီး ရောဂါအတည်ပြုလူနာတွေနဲ့ ထိတွေ့ဆက်စပ်သူတွေကို အခမဲ့ကုသပေးသွားမှာဖြစ်ပေမဲ့ စားသောက်စရိတ်အတွက် တ ဉီးကို တရုတ်ငွေ ယွမ် ၁၀၀ နေ့စဉ်ပေးသွင်းရမယ်လို့ ကိုးကန့်ကိုယ်ပိုင်အုပ်ချုပ်ခွင့်ရဒေသ၊ ကိုဗစ်ရောဂါ ထိန်းချုပ်ရေးနဲ့ အရေးပေါ်တုံ့ပြန်ရေးကော်မတီက စာထုတ်ထားပါတယ်။

မြန်မာနိုင်ငံမှာ ကိုဗစ်ကပ်ရောဂါ ဖြစ်ပွားသူအရေအတွက် ပြန်လည်မြင့်တက်နေတာမှာ ကျန်းမာရေးနဲ့ အားကစားဝန်ကြီးဌာနရဲ့ ဇွန်လ ၂၇ရက်၊ ည ၈နာရီ ထုတ်ပြန်ထားတဲ့စာရင်းအရ ပြည်တွင်းမှာ အတည်ပြုလူနာသစ် ၈၀၄ ဉီးနဲ့ သေဆုံးသူ ၇ ဉီး ရှိခဲ့ပါတယ်။ စစ်အာဏာသိမ်းပြီးနောက်ပိုင်း ကပ်ရောဂါကူးစက်သူတွေ ပြန်များလာနေပေမဲ့ ကျန်းမာရေးဝန်ကြီးဌာနကတော့ မြန်မာနိုင်ငံမှာဖြစ်နေတဲ့ ကိုဗစ်ကူးစက်မှုကို တတိယလှိုင်းလို့ သတ်မှတ်ပြောဆိုခြင်း မရှိသေးပါဘူး။ 


မြသဇင်အောင်/ VOA Burmese

https://burmese.voanews.com/a/lauk-kaing-kokant-region-northern-shan-state-civids-cases-/5945469.html

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ