 |
| KNU နယ်မြေအတွင်း စစ်ရေး လေ့ကျင့်မှုတွေ |
ကရင်အမျိုးသားအစည်းအရုံး KNU တဒူးပလာယာခရိုင် (တပ်မဟာ ၆) အုပ်ချုပ်ရေးဆိုင်ရာ ဥက္ကဋ္ဌ ပဒို စောရွှေမောင်းက ဖက်ဒရယ်ပြည်ထောင်စုတည်ဆောက်ရေးအတွက် ညှိနှိုင်းဆွေးနွေးအဖြေရှာကြခြင်းကသာ နိုင်ငံသားတွေ အတွက်ကောင်းကျိုးဖြစ်ပြီး ငြိမ်းချမ်းသာယာသော ပြည်ထောင်စုကိုဖြစ်တည်စေမယ်လို့ ဆိုကာ သဘောထားထုတ်ပြန်ပါတယ်။
ပြီးခဲ့တဲ့ရက်ပိုင်းက ထုတ်ပြန်ခဲ့တဲ့ KNUဥက္ကဌ စောမူတူးစေးဖိုးရဲ့ သဘောထားကို သူထောက်ခံတဲ့အကြောင်း ထုတ်ဖော်ခဲ့တာလည်း ဖြစ်ပါတယ်။
အဖွဲ့အစည်းရဲ့ စည်းတံဆိပ်မပါဘဲ ထုတ်ပြန်ခဲ့တဲ့ ဒီစာကို တစ်ဦးချင်းသဘောထားသာ ဖြစ်တယ်လို့ မှတ်ချက်ပေးနေကြသလို ကရင်အမျိုးသားအစည်းအရုံးရဲ့ နိုင်ငံခြားရေးပြောခွင့်ရပုဂ္ဂိုလ် ပဒိုစောတောနီကလည်း “ဒီသဘောထားက ပုဂ္ဂိုလ်တစ်ဦးချင်း သဘောထားပါ၊ KNU အဖွဲ့အစည်းရဲ့ သဘောထားမဟုတ်ပါဘူး”လို့ ဘီဘီစီကို ပြောပါတယ်။
အခုလို KNUအတွင်းမှာ တွေ့ဆုံဆွေးနွေးရေးနဲ့ပတ်သက်ပြီး သဘောထားတွေကွဲနေကြတာလားဆိုတဲ့ အမေးကိုတော့ သူက “သဘောထားတွေဆိုတာကတော့ အဖွဲ့အစည်းတစ်ခုအတွင်းမှာ တစ်ယောက်နဲ့ တစ်ယောက်မတူကြဘူးလေ၊ ဒါတွေက အခုမှ မဟုတ်ပါဘူး၊ အရင်ကတည်းက ရှိပါတယ်၊ ဒါပေမဲ့ ကျွန်တော်ပြောနိုင်တာကတော့ ဒါက အဖွဲ့အစည်းသဘောထားမဟုတ်ဘူးဆိုတာပါ”လို့ ဖြေပါတယ်။
၂၀၁၀ ခုနှစ် မတိုင်ခင် စစ်အစိုးရလက်ထက်မှာ တိုင်းရင်းသားလက်နက်ကိုင်အဖွဲ့အစည်းတွေကို ကိုယ့်လက်နက်ကိုယ်ကိုင်ထား၊ ကိုယ့်နယ်မြေဖွံ့ဖြိုးရေးကို လုပ်ကြပါဆိုတဲ့ ပြောဆိုကတိတွေနဲ့အတူ အပစ်အခတ်ရပ်စဲတာ လုပ်ရေးဆိုတဲ့ လမ်းကြောင်းကို KNUအနေနဲ့ နိုင်ငံရေးမူမဲ့တဲ့အတွက် ဆက်လက် လက်နက်ကိုင်ကာ တွန်းလှန်ခုခံခဲ့ကြပါတယ်။
ဗိုလ်ချုပ်ကြီးဘဝကနေ အရပ်သားအဖြစ်ပြောင်းလာတဲ့ ဦးသိန်းစိန်ရဲ့ အစိုးရလက်ထက်မှာ ကမ်းလှမ်းလာတဲ့ ငြိမ်းချမ်းရေးဆွေးနွေးပွဲတွေကို KNUက တက်ရောက်ခဲ့ပြီး အပစ်အခတ်ရပ်စဲရေးစာချုပ် NCA ကို ၂၀၁၅ ခုနှစ်မှာ လက်မှတ်ရေးထိုးနိုင်ခဲ့ပါတယ်။
ဒါပေမဲ့ KNU က ရည်ရွယ်တိုက်ပွဲဝင်ခဲ့တဲ့ ဖက်ဒရယ်ပြည်ထောင်စုတည်ဆောက်ရေး ပန်းတိုင်ကိုရောက်ဖို့ NCA လမ်းကြောင်းနဲ့ သွားလို့မရနိုင်ဘူးဆိုတဲ့ ဝေဖန်မှုတွေကလည်း အဖွဲ့အစည်းအတွင်းမှာ ထွက်ပေါ်လာနေတာပါ။
၂၀၂၁ ခုနှစ် ဖေဖော်ဝါရီလ ၁ ရက် စစ်အာဏာသိမ်းပြီးနောက်မှာတော့ KNU အပါအဝင် NCA အပစ်အခတ်ရပ်စဲရေး စာချုပ်လက်မှတ်ထိုးထားတဲ့ လက်နက်ကိုင်တပ်ဖွဲ့ ၁၀ ဖွဲ့က ငြိမ်းချမ်းရေးဆွေးနွေးပြောဆိုမှုတွေကို ရပ်ဆိုင်းထားမယ်ဆိုတဲ့ သဘောထားကို ထုတ်ပြန်ခဲ့ပါတယ်။
စစ်အာဏာသိမ်းတာကို ဆန့်ကျင်ဆန္ဒပြသူတွေအပေါ် စစ်ကောင်စီတပ်တွေရဲ့ ကြမ်းကြုတ်ရက်စက်တဲ့ ဖိနှိပ်သတ်ဖြတ်မှုတွေကို မြေပြန့်က ပြည်သူတွေကြုံရတဲ့အခါ၊ ဒီလိုအဖြစ်တွေ ဗမာမဟုတ်တဲ့ တိုင်းရင်းသားတွေရဲ့ တောင်တန်းနယ်မြေတွေမှာ ဖြစ်နေတာနှစ်ပေါင်းများစွာကြာနေပြီဆိုတာကို ပိုလို့ ယုံကြည်လာကြပြီး တိုင်းရင်းသားလက်နက်ကိုင်တွေ တော်လှန်နေမှုတွေက မှန်ကန်တယ်ဆိုတဲ့ အမြင်တွေတိုးပွားလာနေပါတယ်။ သူတို့ကိုယ်တိုင်လည်း လက်နက်ကိုင်တိုက်ဖို့ ကြိုးစားနေကြတာတွေ့ရသလိုအရင်က တိုက်ပွဲတွေမဖြစ်ခဲ့တဲ့ နေရာဒေသတွေမှာလက်နက်ကိုင် ဆန့်ကျင်တာတွေ ဖြစ်ပေါ်နေပါတယ်။
ပြီးခဲ့တဲ့ ရက်ပိုင်းက KNU ခေါင်းဆောင်ရဲ့ တစ်ဦးချင်း သဘောထားထုတ်ပြန်ချက်ဟာ လက်နက်နဲ့ ဖိနှိပ်အုပ်ချုပ်နေတဲ့ စစ်ကောင်စီကို ပြတ်ပြတ်သားသား ဆန့်ကျင်လိုတဲ့ပြည်သူအများရဲ့ စိတ်ဓာတ်ကို ချိုးဖျက်တယ်ဆိုတဲ့ ဝေဖန်သံတွေထွက်လာပြီးတဲ့နောက် အခု KNU အုပ်ချုပ်ရေးနယ်မြေ တစ်ခုက ခေါင်းဆောင် တစ်ယောက်ရဲ့ သဘောထား ထွက်လာခဲ့တာလည်း ဖြစ်ပါတယ်။
KNUမှာ တပ်မဟာ ၇ ခု ရှိပြီး “တပ်မဟာ ၁၊ ၂၊ ၃ နဲ့ ၅ က ခေါင်းဆောင်တွေ တပ်မှူးတွေက စစ်ကောင်စီတပ်တွေကို ခုခံ တိုက်ခိုက်သွားမယ့် သဘောထားရှိကြသလို၊ တပ်မဟာ ၄၊ ၆၊ ၇ က ခေါင်းဆောင်တချို့ကလွဲလို့ ခေါင်းဆောင်တွေ၊ တပ်မှူးတွေ အများအပြားကလည်း အလားတူပဲ ခုခံတော်လှန်စစ် ဆင်နွှဲဖို့ ဆန္ဒရှိနေကြတာ” လို့ အမည်မဖော်လိုတဲ့ KNU ခေါင်းဆောင် တစ်ယောက်က ဘီဘီစီကို ပြောပါတယ်။
BBC Burmese
Reviewed by THITHTOOLWIN
on
20:38
Rating:
No comments:
Post a Comment