ကန်လွှတ်တော်ကြားနာပွဲ သံအမတ်ကြီးဦးကျော်မိုးထွန်း မြန်မာ့အရေးတင်ပြဖို့ ရှိ

ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်း။ (မတ် ၁၁၊ ၂၀၁၉)

ကြားကာလ အမျိုးသားညီညွတ်ရေးအစိုးရ (NUG) ကို မြန်မာနိုင်ငံရဲ့ တရားဝင်အစိုးရအဖြစ် အသိအမှတ်ပြုဖို့နဲ့ အမေရိကန်က ထိန်းချုပ်ထားတဲ့ မြန်မာနိုင်ငံပိုင် ရန်ပုံငွေတွေကို အရေးပေါ် အကူအညီလိုအပ်နေတဲ့ မြန်မာလူထုအတွက် လူသားစာနာမှု အကူအညီပေးဖို့၊ သူတို့အသက်ရှင်သန်ရေး အထောက်အကူပြုနိုင်ဖို့ NUG ကို သုံးစွဲခွင့်ပြုရေး ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက ဒီကနေ့ အမေရိကန်အောက်လွှတ်တော်၊ နိုင်ငံခြားရေးရာကော်မတီမှာ တိုက်တွန်းပြောဆိုဖို့ရှိပါတယ်။

မြန်မာစံတော်ချိန် အင်္ဂါည ၁၁ နာရီခွဲ၊ အမေရိကန်အရှေ့ပိုင်းဒေသစံတော်ချိန် အင်္ဂါ နေ့လယ် ၁ နာရီမှာ အမေရိကန်အောက်လွှတ်တော်၊ နိုင်ငံခြားရေးရာကော်မတီမှာ လုပ်ဖို့ရှိတဲ့ မြန်မာ့အရေးကြားနာပွဲအတွင်း သံအမတ်ကြီး ဦးကျော်မိုးထွန်းက အဲဒီလို တိုက်တွန်းပြောဆိုဖို့ စီစဉ်ထားတာပါ။

"မြန်မာ့အကျပ်အတည်းကို ဖွင့်ချခြင်း" လို့ဆိုရမယ့် "The Unfolding Crisis in Burma" ဆိုတဲ့ခေါင်းစဉ်နဲ့ ကြားနာပွဲ လုပ်မှာပါ။

သံအမတ်ကြီး ဦးကျော်မိုးထွန်းက မြန်မာလူထုနဲ့ ကြားကာလ အမျိုးသားညီညွတ်ရေးအစိုးရ (NUG) တို့ရဲ့ သဘောထားတွေကို အခုကြားနာပွဲအတွင်း တင်ပြပြောဆိုသွားဖို့ ရှိတယ်ဆိုတာ ကြားနာပွဲမတိုင်ခင် အောက်လွှတ်တော်၊ နိုင်ငံခြားရေးရာကော်မတီက ကြိုတင်ဖြန့်ဝေထားတဲ့ မူကြမ်းထဲမှာ တွေ့ရပါတယ်။

၂၀၂၀ ပြည့်နှစ်၊ နိုဝင်ဘာလ ၈ ရက်နေ့က ကျင်းပခဲ့တဲ့ ရွေးကောက်ပွဲနဲ့ပတ်သက်တာ၊ နိုင်ငံတဝန်း ငြိမ်းချမ်းတဲ့ ဆန္ဒပြပွဲတွေနဲ့ စစ်ကောင်စီက အကြမ်းဖက် ပစ်ခတ် ဖြိုခွဲမှုတွေအကြောင်း၊ CDM လို့ခေါ်တဲ့ အကြမ်းမဖက် အာဏာဖီဆန်ရေး လှုပ်ရှားမှုအကြောင်း၊ ပြည်ထောင်စုလွှတ်တော်ကိုယ်စားပြုကော်မတီ (CRPH) နဲ့ပတ်သက်တာ၊ CRPH ကထုတ်ပြန်ထားတဲ့ ဖက်ဒရယ် ဒီမိုကရေစီ ပဋိညာဉ်စာတမ်းအကြောင်း၊ ကြားကာလ အမျိုးသားညီညွတ်ရေးအစိုးရ (NUG) ကို ဖွဲ့စည်းခဲ့တာ၊ အင်ဒိုနီးရှားနိုင်ငံ၊ ဂျကာတာမြို့တော်မှာ ကျင်းပခဲ့တဲ့ အရှေ့တောင်အာရှနိုင်ငံများအဖွဲ့ (ASEAN) အစည်းအဝေးနဲ့ ပတ်သက်တာ၊ CDM မှာပါဝင်တဲ့ မြန်မာသံတမန်တွေအပေါ် စစ်ကောင်စီရဲ့ အရေးယူမှုတွေအကြောင်း စသည်အားဖြင့် သံအမတ်ကြီး ဦးကျော်မိုးထွန်း တင်ပြပြောဆိုမယ့် မူကြမ်းထဲမှာ တွေ့ရပါတယ်။

အဲဒီကြားနာပွဲမှာ မြန်မာသံအမတ်ကြီး ဦးကျော်မိုးထွန်းနဲ့အတူ Progressive Voice အဖွဲ့ တည်ထောင်သူနဲ့ အကြံပေးဘုတ်အဖွဲ့ဥက္ကဋ္ဌ ဒေါ်ခင်ဥမ္မာ၊ နိုင်ငံတကာ အမျိုးသမီးရေးရာကိစ္စရပ်များဆိုင်ရာ ဂုဏ်ထူးဆောင် အမေရိကန်သံအမတ်ကြီးဟောင်း Kelley E. Currie တို့ပါဝင်ပါတယ်။

ဖေဖော်ဝါရီလ ၁ ရက်နေ့မှာ စစ်တပ်က အာဏာသိမ်းခဲ့ပြီးတဲ့နောက် အခုကြားနာပွဲဟာ အမေရိကန်အောက်လွှတ်တော်မှာ ပထမဆုံးအကြိမ်လုပ်တဲ့ ကြားနာပွဲဖြစ်တဲ့အပြင် အမေရိကန်လွှတ်တော် ကြားနာပွဲတခုမှာ မြန်မာသံအမတ်ကြီးတဦးကိုယ်တိုင် တက်ရောက်ပြီး တင်ပြပြောဆိုတာဟာလည်း ပထမဆုံးအကြိမ်ပဲဖြစ်ပါတယ်။


 ဗွီအိုအေ (မြန်မာပိုင်း)

https://burmese.voanews.com/a/us-myanmar-house-hearing-ukyawmoetun/5877442.html

ကန်လွှတ်တော်ကြားနာပွဲ သံအမတ်ကြီးဦးကျော်မိုးထွန်း မြန်မာ့အရေးတင်ပြဖို့ ရှိ ကန်လွှတ်တော်ကြားနာပွဲ သံအမတ်ကြီးဦးကျော်မိုးထွန်း မြန်မာ့အရေးတင်ပြဖို့ ရှိ Reviewed by THITHTOOLWIN on 21:01 Rating: 5

No comments:

Powered by Blogger.