မြန်မာနိုင်ငံ ဒီမိုကရေစီလမ်း ပြန်တည့်မတ်ရေး နိုင်ငံတကာကူညီဖို့ ဒေါ်ဇင်မာအောင်ပန်ကြား

The Wilson Center မှာ ပြုလုပ်တဲ့ မြန်မာ့အရေး အွန်လိုင်းဆွေးနွေးပွဲ

မြန်မာနိုင်ငံ ဒီမိုကရေစီလမ်းကြောင်းပေါ် ပြန်လျှောက်လှမ်းနိုင်ရေးအတွက် မြန်မာစစ်တပ်ကို လက်နက်မရအောင် ဝိုင်းဝန်းလုပ်ဆောင်ပေးကြဖို့ ကြာသပတေးနေ့က ဝါရှင်တန်ဒီစီက Wilson စင်တာမှာ ပြုလုပ်တဲ့ မြန်မာ့အရေး အွန်လိုင်းဆွေးနွေးပွဲမှာ အမျိုးသားညီညွတ်ရေးအစိုးရ NUG ရဲ့ နိုင်ငံခြားရေးဝန်ကြီး ဒေါ်ဇင်မာအောင်က ပန်ကြားလိုက်ပါတယ်။

“မြန်မာစစ်တပ်ဖြစ်တဲ့ တပ်မတော်ကို တနိုင်ငံချင်းစီကဖြစ်စေ နိုင်ငံ ပေါင်းစုံကတဆင့် ဖြစ်စေ လိုအပ်တဲ့ အရေးယူမှုတွေလုပ်ပေးဖို့ နိုင်ငံတကာ အစိုးရတွေကို တောင်းဆိုချင်ပါတယ်။ မြန်မာစစ်အုပ်ချုပ်ရေး ကောင်စီကို ထောက်ခံမှုပေးနေတဲ့ နိုင်ငံတွေ အနေနဲ့ သူတို့အတွက် လက်နက်ခဲယမ်းမီးကျောက်တွေ ဝယ်ယူခွင့် ဖြတ်တောက်ဖို့၊ အကူညီပေးတာ ဖြတ်ပစ်ဖို့နဲ့ ပြစ်မှုကင်းလွတ်ခွင့်ပေးတာကို ရပ်ပစ်ဖို့ လိုအပ်ပါတယ်။ ဒါ့အပြင် NUG အစိုးရအဖွဲ့ကို ထောက်ခံပံ့ပိုးပေးဖို့နဲ့ စစ်အာဏာပိုင်တွေကို တွန်းလှန်ရာမှာ အင်အားခိုင်မာစေဖို့ အတွက် လိုအပ်တဲ့ တိုင်းရင်းသားလက်နက်ကိုင် အဖွဲ့တွေကို ပံ့ပိုးပေးဖို့ပါ တောင်းဆိုချင်ပါတယ်။”

Wilson စင်တာ ရဲ့ အာရှရေးရာ အစီအစဉ်မှာ မြန်မာနိုင်ငံရဲ့ လက်ရှိနဲ့ အနာဂတ် ဆိုင်ရာနဲ့ ပတ်သက်ပြီး အရွေးကောက်ခံ ပြည်သူ့လွှတ်တော်ကိုယ်စားပြုကော်မတီ CRPH က အသစ်ဖွဲ့စည်းလိုက်တဲ့ NUG အစိုးရအဖွဲ့ရဲ့ အမြင်တွေကို အမေရိကန် ဝါရင့် လွှတ်တော်အမတ်တွေ အပါအဝင် ပညာရှင်တွေနဲ့ ဆွေးနွေးရာမှာ ဒေါ်ဇင်မာအောင်က ပန်ကြားလိုက်တာ ဖြစ်ပါတယ်။

ဆွေးနွေးပွဲမှာ တက်ရောက်ဆွေးနွေးသူတွေကတော့ အရင် USAID အကြီးအကဲဟောင်း Mark Green ၊ အမေရိကန်အောက် လွှတ်တော်အမတ်တွေဖြစ်တဲ့ ကယ်လီဖိုးနီးယားပြည်နယ် အမတ် Ami Bera နဲ့ Ohio ပြည်နယ်အမတ် Steve Chabot အထက်လွှတ်တော်အမတ် Ben Cardin၊ ဒီမိုကရက်တစ်ပါတီ ရဲ့ NDI အဖွဲ့ဥက္ကဌ ဖြစ်တဲ့ မြန်မာနိုင်ငံဆိုင်ရာ အမေရိကန်သံအမတ်ဟောင်း Derek Mitchell၊ ရီပါတ်ဘလစ်ကင်ပါတီရဲ့ IRI အဖွဲ့ဥက္ကဌ Dr. Daniel Twining နဲ့ NUG အဖွဲ့ရဲ့ အထူးကိုယ်စားလှယ် ဦးထင်လင်းအောင် တို့ဖြစ်ပါတယ်။

မေရီလန်းပြည်နယ် အထက်လွှတ်တော်အမတ် Ben Cardin၊ က မြန်မာနိုင်ငံ ဒီမိုကရေစီလမ်းကြောင်း ပေါ်ပြန်လျှောက်လာစေဖို့ အကူညီပေးရမှာ ဖြစ်ကြောင်း ပြောပါတယ်။

“မြန်မာနိုင်ငံမှာ ဒီမိုကရေစီပြန်လည်ထူထောင်နိုင်အောင် အကူအညီပေးနိုင်ဖို့ အတွက် အမျိုးသားညီညွတ်ရေး အစိုးရကို ကျနော်တို့ ပံ့ပိုးထောက်ခံမှု ပေးချင်ပါတယ်။ ဒါပေမယ့် တချိန်ထည်းမှာပဲ စစ်တပ်နဲ့ သူ့ရဲ့ တရားမဝင် လုပ်ရပ်တွေကို ဆန့်ကျင်ကြောင်းး ပြသဖို့တော့ သင့်တော်တဲ့ အရေးယူမှုတွေ လုပ်ဖို့ လို ပါတယ်။ ဒါဟာ မြန်မာနိုင်ငံသားတွေကို အပြစ်ပေးဖို့ မဟုတ်ပါဘူး အားလုံး ငြိမ်းငြိမ်းချမ်းချမ်းနဲ့ စစ်မှန်တဲ့ဒီမိုကရေစီရရေးအတွက် မြန်မာပြည်သူတွေနဲ့ အတူရပ်တည်ဖို့ပါ။”

စစ်တပ်အာဏာသိမ်းမှုကို ပြည်သူအများစုကလက်မခံကြပဲ ရက်ပေါင်း တရာကျော်လာသည့်တိုင် ဆန့်ကျင် ဆန္ဒပြနေဆဲ ဖြစ်ပြီး ဒီအာဏာသိမ်းမှုကြောင့် ပြည်တွင်းမှာ စီးပွါးရေး၊ ပညာရေး၊ လူမှုရေး အစစ ဆုတ်ယုတ်တဲ့ အပြင် အိမ်နီးချင်းနဲ့ အင်ဒိုပစိဖိတ်ဒေသတွင်းမှာပါ မတည်ငြိမ်မှုတွေ ဖြစ်လာစေကြောင်း ဒေါ်ဇင်မာအောင်က ပြောကြားခဲ့တာပါ။

ဒါ့အပြင် အမေရိကန်နဲ့ အနောက်နိုင်ငံတွေက မြန်မာစစ်တပ်အပေါ် ပစ်မှတ်ထား အရေးယူတာတွေ လုပ်တာကို ကြိုဆိုပေမယ့် အမေရိကန်စိုးရရော တခြားနိုင်ငံအစိုးရတွေကပါ စစ်ကောင်စီက ခန့်အပ်တဲ့ သံတမန်တွေကို အသိမှတ်မပြုဖို့ပါ ဆွေးနွေးပွဲမှာ ပန်ကြားခဲ့ပါတယ်။ 


ဗွီအိုအေ (မြန်မာပိုင်း)

https://burmese.voanews.com/a/myanmar-nug-wilson-center-/5898952.html

မြန်မာနိုင်ငံ ဒီမိုကရေစီလမ်း ပြန်တည့်မတ်ရေး နိုင်ငံတကာကူညီဖို့ ဒေါ်ဇင်မာအောင်ပန်ကြား မြန်မာနိုင်ငံ ဒီမိုကရေစီလမ်း ပြန်တည့်မတ်ရေး နိုင်ငံတကာကူညီဖို့ ဒေါ်ဇင်မာအောင်ပန်ကြား Reviewed by THITHTOOLWIN on 21:59 Rating: 5

No comments:

Powered by Blogger.