ဒေါ်အောင်ဆန်းစုကြည် ရန်ကုန်အမှု ပြည်ထောင်စုတရားလွှတ်တော်ချုပ် လွှဲယူ



Share/Bookmark
ထိုင်းနိုင်ငံ ဘန်ကောက်မြို့ရှိ ထိုင်းရောက် မြန်မာနိုင်ငံသားတွေ စစ်အာဏာရှင် ဆန္ဒပြပွဲအတွင်း ကိုင်ဆောင်ထားတဲ့ ဒေါ်အောင်ဆန်းစုကြည်ရဲ့ ဓာတ်ပုံ။ (ဖေဖော်ဝါရီ ၂၂၊ ၂၀၂၁)

နိုင်ငံတော်လျှို့ဝှက်ချက် ဥပဒေ ပုဒ်မ ၃ (၁) (ဂ) နဲ့ ရန်ကုန်မြို့မှာ တရားစွဲဆိုခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ အမှုကို ပြည်ထောင်စုတရား လွှတ်တော်ချုပ်က တောင်းယူသွားတာကြောင့် ဒီကနေ့ရုံးချိန်းမှာ အမှု မကြားနာနိုင်ခဲ့ပါဘူး။ နေပြည်တော်မှာ တရားခွင်ကို ဒေါ်အောင်ဆန်းစုကြည် လူကိုယ်တိုင်လာရမယ့် ကြားနာပွဲကိုလည်း တနင်္လာနေ့ မေလ ၂၄ ရက်နေ့မှာ စတင်တော့မှာဖြစ်ပေမဲ့ ခုချိန်ထိ ရှေ့နေတွေနဲ့ တွေ့ဆုံ တိုင်ပင်ခွင့် မရသေးပါဘူး။ ဒီအခြေအနေတွေနဲ့ ပတ်သက်လို့ ရန်ကုန်ကလာတဲ့ သတင်းကို မခင်ဖြူထွေးက တင်ပြပါမယ်။

ရန်ကုန်မြို့မှာ နိုင်ငံတော်လျှို့ဝှက်ချက် အက်ဥပဒေပုဒ်မ ၃ (၁) (ဂ) နဲ့ ဒေါ်အောင်ဆန်းစုကြည်ကို တရားစွဲထားတဲ့အမှုအတွက် ဒီနေ့ ရန်ကုန်အရှေ့ပိုင်းခရိုင် တရားရုံးမှာ ရုံးချိန်းရှိပေမဲ့ ဒီအမှုကို ပြည်ထောင်စု တရားလွှတ်တော်ချုပ်က တောင်းယူသွားတာကြောင့် အရှေ့ပိုင်းခရိုင် တရားရုံးမှာ အမှုမရှိတော့တဲ့အတွက် မကြားနာနိုင်ခဲ့ပါဘူး။ ပြည်ထောင်စု တရားလွှတ်တော်ချုပ်က အမှုကို ယူသွားတယ်ဆိုတာ ဘာအဓိပ္ပါယ်လဲဆိုတာ အသေအချာ မပြောနိုင်ဘူးလို့ ရန်ကုန်က ဒေါ်အောင်ဆန်းစုကြည် အမှုကို လိုက်ပါဆောင်ရွက်နေတဲ့ ရှေ့နေအဖွဲ့ထဲက ဒေါ်စန်းမာလာညွန့်က ပြောပါတယ်။

"ဒီနေ့ ရုံးချိန်းကလေ အရှေ့ပိုင်းခရိုင်ကအမှုကို ပြည်ထောင်စုတရားလွှတ်တော်က ယူသွားတယ်ဆိုတော့ အမတို့ရုံးချိန်းမှာ ဘာမှ မရှိဘူး။ အခု ဒီရုံးမှာ အမတို့ ရုံးချိန်းပဲ ပြန်ချိန်းပေးပါတယ်။ အန်တီ့ကိုတော့ video conferencing နဲ့ အရှေ့ပိုင်းခရိုင်တရားသူကြီး... သူတို့နှစ်ယောက် ပြောတဲ့ video conferencing ကို အဲဒီဆရာက laptop ကနေ အမတို့ကို ဖွင့်ပြတယ်။ အန်တီ့ရဲ့ ကျန်းမာရေးအခြေအနေကောင်းပါတယ်။ ပြီးတော့မှ အန်တီ နောက်ဆုံးဘာပြောချင်သေးလဲလို့ သူက ဒေါ်အောင်ဆန်းစုကြည်ကို မေးတဲ့အခါကျတော့မှ အန်တီက ရှေ့နေ ၅ ယောက်လုံးနဲ့ သူတွေ့ချင်ပါတယ်လို့ ပြောတယ်။ ဘယ်လိုပုံစံဖြစ်မလဲဆိုတာတော့ အမလည်း အဲဒါတော့ မပြောတတ်ဘူး။ ၃ ရက်နေ့ကျရင်တော့ တခုခုတော့ ဖြစ်မှာပေါ့။ ဒီကြားထဲမှာ သူတို့ ဘယ်လို စီစဉ်မယ်ဆိုတာတော့ အမတို့ မသိဘူး။ ၃ ရက်နေ့ရုံးချိန်းကတော့ အမ အရှေ့ပိုင်းခရိုင်ရုံးချိန်းကိုပဲ သွားရမယ်။ ဒါပေမဲ့ သူ့ရုံးမှာတော့ အမှုတွဲမရှိတဲ့အတွက် သူကတော့ စီစဉ်မယ့် ကိစ္စတော့ အမတို့ကို ပြောမယ်လို့ ထင်ပါတယ်။"

ဒေါ်အောင်ဆန်းစုကြည်ရဲ့ စီးပွားရေးအကြံပေး Australia နိုင်ငံသား မစ္စတာရှောင်တာနယ်ဆီမှာ တွေ့ရှိတဲ့ စာရွက်စာတမ်းတွေနဲ့ ပတ်သက်ပြီး ဒေါ်အောင်ဆန်းစုကြည်ကို နိုင်ငံတော်လျှို့ဝှက်ချက် အက်ဥပဒေပုဒ်မ ၃ (၁) (ဂ)နဲ့ ရန်ကုန်မှာ တရားစွဲထားတာဖြစ်ပါတယ်။

ရန်ကုန်က အမှုကို ပြည်ထောင်စုတရားလွှတ်တော်ချုပ်က လုပ်ပိုင်ခွင့်နဲ့ တောင်းယူသွားတာကြောင့် နောက်ရုံးချိန်းတွေကို မူလစွဲဆိုထားတဲ့ ရန်ကုန်အရှေ့ပိုင်းခရိုင် တရားရုံးမှာ စစ်ဖြစ် မစစ်ဖြစ်ဆိုတာကို ရှင်းရှင်းလင်းလင်း မသိရသေးပါဘူး။ စစ်တပ်က အာဏာသိမ်းတဲ့ ဖေဖော်ဝါရီလ ၁ ရက်နေ့ထဲက ဒေါ်အောင်ဆန်းစုကြည်ကို ဖမ်းဆီးပြီး နေပြည်တော်နဲ့ ရန်ကုန်မှာ စုစုပေါင်း အမှုပေါင်း ၇ ခုနဲ့ တရားစွဲထားတာပါ။ နေပြည်တော်မှာ ပုဒ်မ ၅ ခုနဲ့ အမှု ၆ မှု၊ ရန်ကုန်မြို့မှာ ပုဒ်မ ၁ ခုနဲ့ အမှု ၁ ခု စုစုပေါင်း အမှု ၇ ခုနဲ့ ရင်ဆိုင်နေရတဲ့ ဒေါ်အောင်ဆန်းစုကြည်ဟာ ခုချိန်ထိ သူ့ရဲ့ ရှေ့နေတွေနဲ့ တွေ့ဆုံ ဆွေးနွေးခွင့် မရသေးပါဘူး။ နေပြည်တော်က အမှုတခုက သမ္မတဦးဝင်းမြင့်၊ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင်တို့နဲ့ အမှုတွဲ ၁ ခုထဲဖြစ်ပါတယ်။ သူတို့အားလုံး အကျိုးဆောင် ရှေ့နေတွေနဲ့ တွေ့ဆုံခွင့် မရကြသေးပါဘူး။ နေပြည်တော်က ဒေါ်အောင်ဆန်းစုကြည်ကို အကျယ်ချုပ်ချထားတဲ့ သူ့နေအိမ်နားမှာ အထူးတရားရုံး တခုလုပ်ပြီး မေလ ၂၄ ရက်နေ့ ရုံးချိန်းကျရင် အွန်လိုင်းကမဟုတ်ဘဲ လူကိုယ်တိုင်လာရောက် ကြားနာဖို့ တရားသူကြီးက ညွှန်ကြားထားပါတယ်။

တနင်္လာနေ့ ရုံးချိန်းကို ရှေ့နေ တဖွဲ့လုံး တက်ဖို့ စီစဉ်ထားတာနဲ့ ပတ်သက်လို့ မရသေးတာနဲ့ပတ်သက်လို့ ရှေ့နေအဖွဲ့ထဲပါတဲ့ ဒေါ်မင်းမင်းစိုးက ခုလိုပြောပါတယ်။

"ပုံမှန်ဆိုရင်တော့ ပါဝါတင်ထားတဲ့ ရှေ့နေတွေ အကုန်လုံးက ဝင်လို့ရပါပြီရှင့်။ လောလောဆယ်တော့ သွားကြမှာကတော့ ကျမရယ်၊ ဆရာ ဦးခင်မောင်ဇော်ရယ်၊ ရန်ကုန်ရှေ့နေဖြစ်တဲ့ ဆရာ ဦးကြည်ဝင်းနဲ့ ဆရာမ ဒေါ်စန်းမာလာညွန့်အပြင်ကို ကျမတို့ နေပြည်တော်မှာ ရှိတဲ့ ဦးသန်းမောင်မောင်ဆိုတဲ့ ရှေ့နေ ကျမတို့ ၅ ဦးကတော့ သွားမှာပါရှင့်။ တခြားအမှုတွေနဲ့ မတူဘူးပေါ့နော်။ အခုအနေအထားမှာဆိုရင် ဘယ်လို စိန်ခေါ်မှုတွေ့ရလဲဆိုရင် ကျမတို့ ဒီအမှုလိုင်း ဆွဲတဲ့အခါမှာ ဘယ်လို ခုခံမလဲဆိုတဲ့ ခုခံချေပရေးလမ်းကြောင်းဆွဲတဲ့နေရာမှာ ကျမတို့ အခက်အခဲရှိတာပါရှင့်။ ဒါပေမဲ့ တွေ့ရပြီဆိုရင်တော့ တမျိုးပြောင်းသွားမှာပေါ့နော်။ အခုလောလောဆယ်တော့ ကျမတို့ လမ်းကြောင်းဆွဲဖို့က တော်တော်လေးအခက်အခဲရှိပါတယ်ရှင့်။"

ဒေါ်အောင်ဆန်းစုကြည်ကို စုစုပေါင်း အမှု ၇ ခု စွဲဆိုထားပေမဲ့ အမှုတွေကို စတင်စစ်ဆေးခြင်း မရှိသေးတဲ့အပေါ် ဒေါ်အောင်ဆန်းစုကြည်က မေးခွန်းထုတ်ထားပါတယ်။ တနင်္လာနေ့ ရုံးချိန်းကျရင် အမှုတွေကို စတင် စစ်ဆေးမှာလားဆိုတာကို မပြောနိုင်သေးဘူးလို့ အမှုလိုက် ရှေ့နေတွေက ပြောပါတယ်။ ဒေါ်အောင်ဆန်းစုကြည်ဟာ ပို့ကုန်သွင်းကုန်ဥပဒေပုဒ်မ ၈၊ ဆက်သွယ်ရေးဥပဒေ ပုဒ်မ ၆၇၊ အများပြည်သူ တည်ငြိမ်အေးချမ်းမှု ပျက်ပြားအောင် လှုံ့ဆော်မှု လုပ်ဆောင်မှုဆိုင်ရာ ဥပဒေပုဒ်မ ၅၀၅ (ခ)၊ နိုင်ငံတော်အကြည်ညိုပျက်အောင် လှုံ့ဆော်မှုဥပဒေ ပုဒ်မ ၁၂၄ (က) တို့အပြင် သဘာဝဘေးအန္တရာယ် ထိန်းသိမ်းကာကွယ်ရေး အက်ဥပဒေ ပုဒ်မ ၂၅ နဲ့ အမှု ၂ ခု၊ စုစုပေါင်း နေပြည်တော်မှာ အမှု ၆ မှုနဲ့ ဒေါ်အောင်ဆန်းစုကြည် တရားရင်ဆိုင်နေရပါတယ်။ နိုင်ငံတော် အကြည်အညိုပျက်အောင်လုပ်မှု ဥပဒေ ပုဒ်မ ၁၂၄ (က) နဲ့ အမှုမှာ ဒေါ်ဆောင်ဆန်းစုကြည်၊ သမ္မတဦးဝင်းမြင့်နဲ့ နေပြည်တော် ကောင်စီဥက္ကဋ္ဌ ဒေါက်တာမျိုးအောင်တို့က အမှုတွဲ ၁ ခုထဲ ဖြစ်ပါတယ်။


မခင်ဖြူထွေး/ VOA Burmese

https://burmese.voanews.com/a/dassk-hearing/5897814.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ