လုံခြုံရေးတင်းကြပ်မှုကြားက ဆန္ဒပြပွဲများ၊ ထားဝယ် ၅ ဦး ဖမ်းခံရ

မကွေးတိုင်း ဂန့်ဂေါမြို့နယ် နှမ်းခါးရွာ စစ်အာဏာရှင်ဆန့်ကျင်သပိတ် စစ်ကြောင်း။ (မေ ၁၇၊ ၂၀၂၁)

မြန်မာနိုင်ငံမှာ စစ်အာဏာသိမ်းမှု ဆန့်ကျင်တဲ့ ဆန္ဒပြပွဲတွေကို လုံခြုံရေးတင်းကြပ်တဲ့ အခြေအနေကြားကပဲ မြို့တော်တော်များများမှာ ဆက်လုပ်နေကြပါတယ်။ ထားဝယ်မြို့က ဆန္ဒပြပွဲတွေကို စစ်တပ်က ဖြိုခွဲမှုအတွင်း ၅ ယောက်ထက်မနည်း အဖမ်းခံရပါတယ်။ ရန်ကုန်မှာတော့ အဖမ်းအဆီး အစစ်အဆေးများနေတဲ့အတွက် ဆန္ဒပြပွဲတချို့ကို နားထားကြပါတယ်။ ခုလို နိုင်ငံအနှံ့က ဆန္ဒပြပွဲအခြေအနေ ရန်ကုန်က လာတဲ့သတင်းကို မဆုမွန်ကတင်ပြပါမယ်။

အခုရက်ပိုင်း ဆန္ဒပြမှုတွေ တဖြည်းဖြည်း နည်းသွားတဲ့ ရန်ကုန်မြို့မှာ ဆန္ဒပြပွဲ ဦးဆောင်သူတွေကို ရှာဖွေဖမ်းဆီးတာ၊ ဆန္ဒပြပွဲ လူစုခွဲချိန်မှာ လိုက်လံဖမ်းဆီးတာတွေ ရှိနေတာကြောင့် လမ်းပေါ်ထွက် ချီတက်ဆန္ဒပြနိုင်ဖို့ ခက်ခဲလာတယ်လို့ တောင်ဒဂုံသပိတ်စစ်ကြောင်းဦးဆောင်သူက ပြောပါတယ်။ ဒါပေမဲ့ သူတို့အနေနဲ့ တခြားနည်းလမ်းတွေနဲ့ စစ်အာဏာရှင်စနစ်ဆန့်ကျင်မှုတွေ လုပ်သွားမယ်လို့ ပြောပါတယ်။

“ရန်ကုန်မှာတော့ ကျနော်တို့ ဒီဘက်ပေါ့နော်။ တောင်ဒဂုံအနေနဲ့ ဆန္ဒပြပွဲတွေတော့ ရပ်လိုက်ရတယ်ဗျ။ တစ်နေ့က တော်လှန်သွေးမကုန် တောင်ဒဂုံစျေးသပိတ်လုပ်တယ်လေ။ စျေးသပိတ်လုပ်တော့ အဲ့ဒီမှာတင် ကျနော်တို့ကို စစ်ကောင်စီဘက် နှစ်ဘက်ပိတ်ပြီး ဖမ်းတာမျိုးတွေရှိခဲ့တော့ ကျနော်တို့ ဒီရက်ပိုင်းအတွင်းမှာ ဆန္ဒပြဖို့အတွက်ပေါ့နော်။ နားလိုက်ရတယ်ဗျ။ ပြီးတော့ တခြားမြို့နယ်တွေ လုပ်တာလည်း ကျနော်တို့ကို Join တာ မရှိသေးဘူးဗျ။ ဒီနေ့ သပိတ်ကော်မတီရော၊ မထွက်တဲ့ အဖွဲ့တွေ များလာတယ်။ ဘာလို့လည်းဆိုတော့ ကျနော်တို့က ဒီသပိတ်တွေထက် တခြားလမ်းကြောင်းဘက်ကို ဦးတည်နေတယ်ပေါ့နော်။”

ဖြိုခွဲဖမ်းဆီးမှုတွေ ရှိနေတဲ့ကြားမှာပဲ မြန်မာနိုင်ငံတောင်ပိုင်း ထားဝယ်မြို့က ဆန္ဒပြသူတွေကတော့ ဒီနေ့လည်း ဆက်ပြီး ဆန္ဒပြကြပါတယ်။ တပ်ပေါင်းစု သပိတ်စစ်ကြောင်းက မနက်အစောပိုင်းက ထိုင်သပိတ်လုပ်ပြီး လူစုခွဲနိုင်ခဲ့ပေမဲ့ နေ့လယ်ပိုင်းလုပ်တဲ့ ထားဝယ်ပင်မသပိတ်စစ်ကြောင်းကိုတော့ စစ်ကောင်စီတပ်တွေက ရဲကားနဲ့ သပိတ်ကြောင်းကို ဝင်တိုက်ပြီး ဖမ်းဆီးခဲ့တဲ့အတွက် ၅ ယောက် အနည်းဆုံး ဖမ်းဆီးခံခဲ့ရတယ်လို့ ဆန္ဒပြပွဲမှာ ပါဝင်သူတစ်ဦးက ဗွီအိုအေကို ပြောပါတယ်။

“၁၁ နာရီမှာ ထွက်တာဗျ။ ထွက်ပြီး မကြာခင်ပဲ စုရပ်ကို ပြန်ဝင်ကြတဲ့ အချိန်ပေါ့။ ရဲကားနဲ့ သူတို့ ဝင်လာပြီး ထိပ်တိုက်တွေ့ဆုံမှု ရှိခဲ့ပါတယ်။ သူတို့က ရဲကားနဲ့ တိုက်ရိုက်လာပြီးတော့ ဆန္ဒပြစစ်ကြောင်းကို ဝင်တိုက်တာဗျ။ တိုက်ပြီးတော့ ဖမ်းတာတွေရှိတယ်။ သေနတ်ပစ်ခတ်မှုတွေလည်း ရှိခဲ့ပါတယ်ဗျ။ ဖမ်းဆီးခံရတာက လောလောဆယ်တော့ ၅ ယောက်လို့တော့ အတည်ပြုလို့ရထားပါတယ်။ ဒါပေမဲ့ အတည်ပြုလို့ မရသေးတဲ့ သူတွေလည်း ရှိမယ်လို့တော့ ထင်ပါတယ်။ ၅ ယောက်ထက်မနည်း ဖမ်းခံရတယ်လို့တော့ ပြောလို့ရပါတယ်ဗျ။ ဖမ်းသွားတဲ့ထဲမှာ ရာဘာကျည်ထိပြီးတော့ ထိခိုက်ဒဏ်ရာရသွားတဲ့သူ တစ်ယောက်ပါတယ်ဗျ။ ကားနဲ့ တိုက်တာက ၂ ယောက်တော့ ထိခိုက်ဒဏ်ရာရတာ ရှိပါတယ်ဗျ။ အဲ့ဒီနှစ်ယောက်က ကားနဲ့ ဝင်တိုက်တဲ့ နေရာမှာ တိုက်မိသွားတာပေါ့နော်။ တိုက်မိပြီး သူတို့လည်း ဖမ်းခံရပါတယ်ဗျ။”

မကွေးတိုင်း မြိုင်မြို့နယ် တောင်ပိုင်းဇုန်မှာ ကျောင်းသူ၊ ကျောင်းသား၊ ဆရာ၊ ဆရာမနဲ့ ပြည်သူလူထုအပါအဝင် အင်အား ၄၀၀ လောက်က လက်ရှိ ဖြစ်ပေါ်နေတဲ့ နိုင်ငံရေးအခြေအနေကို အပြန်အလှန် ဆွေးနွေးဟောပြောတဲ့ ထိုင်သပိတ်ပြုလုပ်ပြီး ဆန္ဒပြခဲ့ကြပါတယ်။ လုံခြုံရေးတွေ ရောက်မလာခင်မှာပဲ စောစောလူစုခွဲခဲ့ကြတယ်လို့ ဆန္ဒပြပွဲမှာ ပါဝင်သူ တစ်ဦးက ပြောပါတယ်။

“ဒီကနေ့ကျ ပဒိုင်တောရွာကို သွားပြီးတော့ ထိုင်သပိတ်ပေါ့။ ကလေးတွေနဲ့ စည်းစည်းကားကားလေးနဲ့ အားလုံးက ဒေသခံပြည်သူတွေရဲ့ နားလည်သဘောပေါက်မှု လက်ရှိဖြစ်ပေါ်နေတဲ့ နိုင်ငံရေးအနေအထားလေးတွေကို အများပြည်သူလူထုသိအောင် အပြန်အလှန်လေးတွေ ပြောကြဆွေးနွေးကြတာပေ့ါ။ အဲ့ဒီလိုလေးလုပ်ကြတာ အမြဲတမ်းပါ။ လူကတော့ ၂၀၀ ကျော်၊ ၃၀၀ လောက် ပတ်ဝန်းကျင်က လာတယ်ဗျ။ ရွာထဲက ၁၀၀ လောက်ဆိုရင်တော့ ၄၀၀ လောက်ဖြစ်မှာပေါ့။ များသောအားဖြင့် ကျနော်တို့က အတုန်းကတော့ ဆိုင်ကယ်နဲ့ပေါ့... အနည်းဆုံး ၅ ရွာလောက် တစ်နေ့ကို ရောက်အောင် ဆန္ဒပြမှုလေးကို ဆောင်ရွက်ကြတာဗျ။ ကင်းထောက်ကလေးတွေ ထားတာပေ့ါ အဲ့ဒီလိုထားပြီးကာမှ အခြေအနေပေါ်မူတည်ပြီးတော့ အေးအေးဆေးဆေး ထိုင်သင့်တဲ့ နေ့ဆိုရင် အေးအေးဆေးဆေးပေ့ါ။ ဒီကနေ့ဆိုရင်တော့ အချိန်မီ ရှင်းလင်းလိုက်ရတာပေ့ါ ကိုယ့်ကလေးတွေကို။”

မြိုင်မြို့နယ် တောင်ပိုင်းဇုန် ထိုင်သပိတ် ဘေးကင်းကင်းနဲ့ လူစုခွဲနိုင်ခဲ့ပေမဲ့ မြိုင်မြို့နယ်ထဲက တခြားကျေးရွာ တချို့မှာတာ့ စစ်ကောင်စီတပ်တွေက ဂြိုလ်တု စလောင်းတွေကို ရိုက်ချိုး ဖြုတ်သိမ်းတာတွေ လုပ်ခဲ့ပြီး သပိတ်ဦးဆောင်သူလို့ သံသယဖြစ်တဲ့ အိမ်တွေကို ရှာဖွေစစ်ဆေးတာတွေ လုပ်ခဲ့တယ်လို့ ဒေသခံတွေက ပြောပါတယ်။

စစ်ကိုင်းတိုင်း ဆားလင်းကြီးမြို့နယ်နဲ့ ယင်းမာပင်မြို့နယ်က ကျေးရွာတချို့ စုပေါင်းပြီး လူရာချီနဲ့ ထိုင်သပိတ် လမ်းလျှောက်သပိတ်ဆင်နွှဲခဲ့ကြပါတယ်။ ဒီပဲရင်းမြို့နယ်မှာလည်း NUG ထောက်ခံတဲ့ စာတမ်းကိုင်ဆောင်ပြီး စစ်အာဏာရှင်ပြုတ်ကျရေးအတွက် ဆရာ၊ ဆရာမအပါအဝင် လူထုရာနဲ့ချီ လမ်းပေါ်ထွက်ချီတက်ဆန္ဒပြနေကြပါတယ်။ မန္တလေးမြို့မှာ အရင်နေ့တွေကထက် လုံခြုံရေးတွေ ပိုချထားတဲ့ကြားကပဲ သံဃာ့သမဂ္ဂသပိတ်၊ အင်ဂျင်နီယာသပိတ် နဲ့ တကသသပိတ်စစ်ကြောင်းတွေ လမ်းပေါ်ထွက်ဆန္ဒပြကြပါတယ်။

ဖားကန့်မြို့မှာလည်း မှော်ပေါင်းစုံသပိတ်အပြင် ဆိုင်ကယ်သပိတ်နဲ့ စစ်ကျွန်ပညာရေးအလိုမရှိကြောင်း ပြသတဲ့ ရွာတွင်းသပိတ်တွေ ပြုလုပ်ကြပါတယ်။ လောင်းလုံ၊ ပခုက္ကူ၊ တန့်ဆည်၊ ဒီပဲယင်း၊ ကျောက်မဲ၊ မိုးကောင်း၊ ဆားလင်းကြီးမြို့တွေမှာ လမ်းလျှောက်သပိတ်၊ ဆိုင်ကယ်သပိတ်တွေ ဆင်နွှဲကြပြီး မြင်းခြံ၊ပဲခူး၊ မြိုင်၊ သီပေါ၊ အမရပူရမြို့နယ်တွေမှာ ပျောက်ကြားသပိတ်၊ လူမဲ့သပိတ်တွေ ပုံစံမျိုးစုံ ပြုလုပ်ကြပြီး စစ်အာဏာရှင်စနစ်ဆန့်ကျင်ကြောင်း ဆန္ဒပြခဲ့ကြပါတယ်။ 


မဆုမွန်/ VOA Burmese

https://burmese.voanews.com/a/myanmar-military-coup-protest/5893365.html

လုံခြုံရေးတင်းကြပ်မှုကြားက ဆန္ဒပြပွဲများ၊ ထားဝယ် ၅ ဦး ဖမ်းခံရ လုံခြုံရေးတင်းကြပ်မှုကြားက ဆန္ဒပြပွဲများ၊ ထားဝယ် ၅ ဦး ဖမ်းခံရ Reviewed by THITHTOOLWIN on 21:36 Rating: 5

No comments:

Powered by Blogger.