မေ ၂၅ရက် ၂၀၂၁
သျှမ်းရှေ့တာချီလိတ်မြို့တွင် ယနေ့ ( မေ ၂၅)ရက် ည(၉)နာရီဝန်းကျင်တွင် ပေါက်ကွဲမှုများဖြစ်ပွားခဲ့ကြောင်း သတင်းရရှိသည်။
ပေါက်ကွဲသည့်နေရာများသည် စစ်ကောင်စီ အုပ်စုမှ လုံခြုံရေးယူထားသည့် ဆန်ဆိုင်း ရပ်ကွက်ရှိ အထက်တန်းကျောင်း၊ ဟောင်လိတ် ရပ်ကွက်ရှိ အထက်တန်းကျောင်း နှင့်တာလော့ ရပ်ကွက် အလယ်တန်းကျောင်း တို့ဖြစ်ကြောင်း တာချီလိတ်မြို့ ခံဒေသခံများ ပြောပြချက် အရသိရသည်။
“ ကျောင်းတွေမှာ ပေါက်ကွဲတာ။ ကျောင်းတွေမှာလည်း စစ်သားတွေ အပြည့်လုံခြုံရေး ယူထားတယ်။ လူထိခိုက်မှုတော့ မရှိဘူးပြောတာပဲ” ဟု တာချီလိတ်ဒေသခံ အမျိုးသားတဦး ကသျှမ်းသံတော်ဆင့် ကို ပြောသည်။
ယမန်နေ့ (မေ ၂၄)ရက်မှစတင်ကာ စစ်ကောင်စီ အုပ်စု က ကျောင်းအပ်ရန် အတွက် တာချီလိတ်မြို့ ပေါ်ရှိ ကျောင်းများတွင် လုံခြုံရေး တင်းကြပ်ထားကြောင်း သိရသည်။
ယမန်နေ့ ညတွင်လည်း တာချီလိတ်မြို့ ပုန်းထွန်ရပ်ကွက် တွင် ပေါက်ကွဲမှုဖြစ်ပွားခဲ့ပြီး လူထိခိုက်မှုမရှိကြောင်းသိရသည်။
“ ဒီရက်ပိုင်းက နေ့တိုင်းနီးပါး ပေါက်ကွဲမှုတွေ ဖြစ်နေတယ်။ ညဆိုရင် လူတွေ ကတော့ အပြင်မထွက်တော့ဘူး။ ကြောက်စိတ်၊ စိုးရိမ်စိတ်ကတော့ အမြဲတမ်းရှိပါတယ်” ဟု တာချီလိတ်မြို့ တွင်နေထိုင်သည့် အမျိုးသမီး တစ်ဦးက သျှမ်းသံတော်ဆင့် ကို ပြောသည်။
တာချီလိတ်မြို့နယ်အတွင်း ညပိုင်း ဗုံးပေါက်ကွဲမှု မကြာခဏ ဖြစ်ပွားနေကြောင်း သိရသည်။
SHAN News (Burmese Version)
Reviewed by THITHTOOLWIN
on
00:29
Rating:
No comments:
Post a Comment