ဒေါက်တာဇော်မြင့်မောင် အာမခံ မရ

 အမျိုးသားဒီမိုကရေစီ အဖွဲ့ချုပ် ဒုတိယ ဥက္ကဌ(၂) ဒေါက်တာ ဇော်မြင့်မောင်

မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်အတွက် ကျန်းမာရေး အာမခံလျှောက်ထားတာကို မေလ ၃၁ ရက်နေ့က ခရိုင်တရားရုံးကနေ ပယ်ချလိုက်တဲ့ အမိန့်ချခဲ့တယ်လို့ အမှု့ဆောင်ရွက်ပေးနေတဲ့ ရှေ့နေတွေကနေ သိရပါတယ်။

ကင်ဆာရောဂါဝေဒနာခံစားရလို့ ဝန်ကြီးချုပ်ဒေါက်တာဇော်မြင့်မောင်အတွက် ကျန်းမာရေးအာမခံရဖို့ လျှောက်ထားရာမှာ ဒီကနေ့ ခရိုင်တရားရုံးက အာမခံလျှောက်ထားတာကို ပယ်ချတဲ့ အမိန့်ချမှတ်ခဲ့တာလည်းဖြစ်ပါတယ်။

ဇွန်လ ၈ရက်နေ့မှာတော့ ဝန်ကြီးချုပ် ဒေါက်တာဇော်မြင့်မောင်အပါအဝင် မန္တလေးတိုင်းက အဖမ်းခံရတဲ့ ဒေါက်တာ ရဲလွင်၊ ဒေါက်တာ စိုးသန်း၊ ဦးဇာနည်အောင်၊ ဦးမျိုးသစ်နဲ့ တိုင်း NLD အတွင်းရေးမှူး ဦးတင်ကိုကို၊ စည်ပင်ကော်မတီဝင်တစ်ဦးဖြစ်တဲ့ ဦးကျော်ဇေယျတို့ရဲ့ တရားလိုသက်သေတွေကို စတင်စစ်ဆေးမှာဖြစ်တယ်လို့ သိရပါတယ်။

ဒေါက်တာ ဇော်မြင့်မောင်ကို နိုင်ငံတော် အကြည်ညိုပျက်စေမှု ၅၀၅(ခ)၊ သဘာဝဘေးဆိုင်ရာ စီမံခန့်ခွဲမှု ဥပဒေပုဒ်မ ၂၅ အမှုတွေနဲ့ စွဲဆိုထားပြီး အခြားဝန်ကြီးနဲ့ ဖမ်းဆီးခံရသူတွေက ၅၀၅(ခ) ဒါမှမဟုတ် သဘာဝဘေးဆိုင်ရာ စီမံခန့်ခွဲမှု ဥပဒေပုဒ်မ ၂၅ တစ်ခုစီနဲ့ တရားစွဲဆိုခံရတာဖြစ်တယ်လို့လည်း သိရပါတယ်။


BBC Burmese

https://www.bbc.com/burmese/live/burma-57242648

မင်းကင်း ရွေးကောက်ခံ လွှတ်တော်ကိုယ်စားလှယ် ဒေါ်ခင်မွှေးလွင် မုံရွာမှာ အဖမ်းခံရ

စစ်ကိုင်းတိုင်း မင်းကင်းမြို့ကနေ ပြီးခဲ့တဲ့ ၂၀၂၀ ရွေးကောက်ပွဲမှာတိုင်းဒေသကြီးလွှတ်တော်ကိုယ် စားလှယ်အဖြစ်ယှဥ်ပြိုင်အနိုင်ရခဲ့တဲ့ ဒေါ်ခင်မွှေးလွင်မုံရွာမှာ အဖမ်းခံခဲ့ရတယ်လို့ မုံရွာဒေသခံတွေက ပြောပါတယ်။

မေလ၃၀ရက်နေ့ညပိုင်းက မုံရွာချင်းတွင်းတံ တားအနောက်ဘက်ရွှေတောင်ဦးမှာ အဖမ်း ခံခဲ့ရတာဖြစ်တယ်လို့ လည်းသူ့ရဲ့ မိတ်ဆွေ တွေက ပြောပါတယ်။

ချင်းတွင်းတံတားအနီး ရွှေတောင်ဦးက အိမ်တစ်အိမ်မှာ တည်းခိုနေစဥ် အဖမ်းခံရတာဖြစ်တယ်လို့လည်း သူတို့ကပြောပါတယ်။

USDPနဲ့ NLD အကြား ပြိုင်ဆိုင်မှုပြင်းထန်ခဲ့တဲ့ မင်းကင်းမြို့မှာ ၂၀၁၅ နဲ့၂၀၂၀ ရွေးကောက်ပွဲတွေမှာ ဒေါ်ခင်မွှေးလွင်က လွတ်တော် ကိုယ်စားလှယ်အဖြစ်၀င်ရောက်ယှဥ်ပြိုင်ခဲ့ပြီး ၂၀၁၅မှာ ရုံးနိမ့်ခဲ့ပြီး ၂၀၂၀မှာ အနိုင်ရခဲ့ပါတယ်။

မင်းကင်းမှာ ၂၀၁၅ ရွှေးကောက်ပွဲတုန်းက ဒေါ်ခင်မွှေးလွင်က NLD ပါတီက ယှဥ်ပြိုင်ခဲ့ပြီး ရှုံးနိမ့်ခဲ့ကာ ၂၀၂၀ ရွေးကောက်ပွဲမှာတော့ NLD ပါတီက တိုင်းဒေသကြီးကိုယ်စားလှယ်နေရာက ဒေါ်ခင်မွှေးလွင်က ယှဥ်ပြိုင်ခဲ့ပြီး အနိုင်ရခဲ့တာလည်းဖြစ်ပါတယ်။


BBC Burmese

https://www.bbc.com/burmese/live/burma-57242648

 

ဗိုလ်ချုပ်အောင်ဆန်းတံတားကို စစ်ကောင်စီက နာမည်ပြန်ပြောင်း

မွန်ပြည်နယ်၊ ချောင်းဆုံမြို့နဲ့မော်လမြိုင်ကို ဆက်သွယ်ထားတဲ့ ဗိုလ်ချုပ်အောင်ဆန်းတံတားအမည်ကို သံလွင်တံတား-ချောင်းဆုံ အဖြစ် မနက်ဖြန် ဇွန်လ ၁ ရက်မှာ အခမ်းအနားနဲ့ ပြောင်းဖို့ စစ်ကောင်စီဘက်ကစီစဥ်နေပါတယ်။

အမျိုးသားဒီမိုကရေစီအဖွဲ့ချုပ်အစိုးရလက်ထက်က ပေးခဲ့တဲ့ တံတားအမည်ပြောင်းပွဲ အတွက် နိုင်ငံရေးပါတီတွေနဲ့ မြို့မိမြို့ဖတွေကို ပြည်နယ်စီမံအုပ်ချုပ်ရေးကောင်စီဘက်က ဖိတ်ကြားမှုတွေပြုလုပ်နေပါတယ်။

ဒီတံတားအမည်ပေးမှုနဲ့ ပတ်သက်လို့ ၂၀၁၇ ခုနှစ်က NLD နဲ့ ‌ဒေသခံတွေအကြားတင်းမာမှုတွေရှိခဲ့ပြီး ပြည်သူ့လွှတ်တော်မှာပါ မဲခွဲရတဲ့အခြေစိုက်ခဲ့တာပါ။

လွှတ်တော်မှာ မဲနိုင်ပြီး ဗိုလ်ချုပ်အောင်ဆန်းတံတား(ဘီလူးကျွန်း)လို့ အမည်ပေးနိုင်ခဲ့ပေမယ့် ဆန္ဒပြပွဲတွေနဲ့ တိုးခဲ့ပါတယ်။

ဖေဖော်ဝါရီလ ၁ ရက် အာဏာသိမ်းအပြီးမှာတော့ လပိုင်းအတွင်းမှာပဲ စစ်ကောင်စီဘက်က ဗိုလ်ချုပ်အောင်ဆန်းတံတားအစား တံတားတည်ဆောက်စဥ်က ပေးဖို့စီစဥ်ခဲ့တဲ့ သံလွင်တံတား-ချောင်းဆုံ ဆိုတဲ့ မူလအမည်ကို ပြန်ပြောင်းလာတာပါ။

''တစ်ဦးတစ်ယောက်ချင်းအမြင်အရ ပြောရရင်တော့ မူလနာမည်ပြန်ပြောင်းတာက လက်ခံရမယ့်ကိစ္စပေါ့။ ဒါပေမဲ့ ပြောင်းတဲ့အခြေအနေနဲ့ အချိန်အခါ မှားနေတယ်။ ဒီအချိန်မှာ ဒီလိုပြောင်းတာ သူတို့က မွန်ပြည်သူလူထုရဲ့အင်အားကို ပြန်ရမလားပေါ့။ အဲဒီလိုလည်းပါလိမ့်မယ်။ အခု ပြောင်းတဲ့အလုပ်ကတော့ ကြောင်ရေချိုးတယ်လို့ ကျနော်တို့က မြင်တယ်။''လို့ မွန်လူငယ်တစ်ဦးက ပြောပါတယ်။

စစ်ကောင်စီအနေနဲ့ နိုင်ငံတော်သမ္မတရုံးကို နိုင်ငံတော်စီမံအုပ်ချုပ်ရေးကောင်စီရုံးလို့ နာမည်ပြောင်းပြီး ပြည်ထောင်စုအစိုးရအဖွဲ့ရုံးကိုလည်း နိုင်ငံတော်စီမံအုပ်ချုပ်ရေးကောင်စီ အုပ်ချုပ်မှုရုံးအဖြစ် နာမည်ပြောင်းခဲ့ပါတယ်။

ဒါ့အပြင် ဒေါ်အောင်ဆန်းစုကြည်ရဲ့ မူဝါဒတွေကို အဓိကဖော်ဆောင်ပေးနေတဲ့ အတိုင်ပင်ခံရုံးဝန်ကြီးဌာနကိုလည်း ဖျက်သိမ်းထားပါတယ်။

ဒီကနေ့မှာ စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ကရင်ပြည်နယ်ကို ရောက်ရှိနေလို့ မနက်ဖြန် တံတားနာမည်ပြောင်းပွဲတက်မလားလို့ မွန်နိုင်ငံရေးအသိုင်းအဝိုင်းက စောင့်ကြည့်နေကြပါတယ်။


BBC Burmese

https://www.bbc.com/burmese/live/burma-57242648

ရန်ကုန်လမ်းမတွေပေါ် စာဖြန့်ကြဲဆန္ဒပြ

ဧပြီလ ၂၅ ရက်နေ့က ပြုလုပ်ခဲ့တဲ့ ကလေးမြို့ရဲ့ စစ်အာဏာရှင် ဆန့်ကျင်တဲ့ Paper Strike သပိတ် မြင်ကွင်း။ (ဧပြီ ၂၅၊ ၂၀၂၁)

စစ်အာဏာသိမ်းတာကို ဆန့်ကျင်တဲ့ ဆန္ဒပြပွဲတွေက နိုင်ငံတဝန်းမှာ ဆက်ရှိနေပါတယ်။ ရန်ကုန်မှာတော့ လုံခြုံရေးအခြေအနေကြောင့် ဆန္ဒပြစစ်ကြောင်းကြီးတွေ မထွက်နိုင်ကြပေမဲ့ လမ်းပေါ်မှာ စာရွက်တွေ ဖြန့်ကြဲဆန္ဒပြတဲ့ Paper Strike လှုပ်ရှားမှုအပါအဝင် ရနဲ့နည်းနဲ့ ဆန္ဒပြခဲ့ကြပါတယ်။ ရှမ်းပြည်နယ် ကျောက်မဲမြို့မှာတော့ ဒီကနေ့ ဆန္ဒပြစစ်ကြောင်းကို ရဲနဲ့ စစ်သားတွေက ကားနဲ့ တိုက်ပြီးဖမ်းဆီးဖို့ကြိုးစားကြသလို ပစ်ခတ်ဖြိုခွဲမှုတွေလည်း ဖြစ်ခဲ့ပါတယ်။ နိုင်ငံတစ်ဝန်းက ဆန္ဒပြပွဲတွေအကြောင်း ရန်ကုန်ကလာတဲ့ သတင်းကို မဆုမွန်က ပြောပြပါမယ်။

စစ်အာဏာသိမ်း ဆန့်ကျင်တဲ့ အနေနဲ့ ရန်ကုန်မြို့မှာ မြို့နယ်၊ ရပ်ကွက်အလိုက် လုပ်ကြတဲ့ ဆန္ဒပြပွဲတချို့ရှိပေမဲ့ ရန်ကုန်ရဲ့ အဓိက သပိတ်စစ်ကြောင်းကြီးတွေကတော့ ဒီကနေ့ မထွက်နိုင်ကြပါဘူး။ ဆန္ဒပြစစ်ကြောင်းတွေ မထွက်နိုင်ပေမဲ့ ရတဲ့နည်းနဲ့ ကန့်ကွက် ဆန့်ကျင်ဖို့ အသင့်ပဲလို့ ရန်ကုန်သပိတ်စစ်ကြောင်းတွေမှာ ပါဝင်သူ တစ်ဦးက ပြောပါတယ်။

“သပိတ်ကတော့ ထွက်ကြတယ်ဗျ၊ ရန်ကုန်မှာ ထွက်ကြပါတယ်။ ပြီးတော့ လမ်းပေါ်မှာစာရွက်တွေ ဖြန့်ကြဲပြီးတော့ Paper Strike တွေ လုပ်တာလည်း ရှိတယ်။ သပိတ်ကြီးတွေတော့ မထွက်ဘူး။ သပိတ်အသေးပဲ ထွက်တယ်။ ခုက အရပ်ဝတ်အင်အားက ပိုများလာတယ်၊ စစ်အင်အားကို အဲ့ဒီလောက် သုံးတာ မရှိတော့ဘူး။ အရပ်ဝတ်တွေနဲ့ပဲ ဝင်ဖမ်းတာတွေများလာတယ်။ ပြီးရင် အိမ်စီးကားတွေပဲ အသုံးများလာတယ်။ စစ်ကားတွေကို အရင်ကလို မသုံးတော့ဘူး။ အိမ်စီးကားသုံးလာတာ များတယ်။ ကျနော်တို့ ကတော့ လမ်းပေါ်ထွက်လို့ရရင် လမ်းပေါ်ထွက်မယ်။ အခွင့်အရေးရလို့ မြို့တွင်း တိုက်ပွဲတွေနဲ့ ယှဉ်ရတော့မယ်ဆိုရင်လည်း အဆင့်သင့်ပါပဲ။ ကျနော်တို့ အကုန်လုံး Ready ပါပဲ။ ရရာလက်နက် စွဲကိုင် တိုက်ဖို့ကတော့ ကျနော်တို့ ရဲ့ခံယူချက်ပဲဗျ။”

ရှမ်းပြည်နယ်တောင်ပိုင်း ကျောက်မဲမြို့မှာ ဒီကနေ့ ဆိုင်ကယ်သပိတ်ကို စစ်ကောင်စီတပ်တွေက ပစ်ခတ်ဖြိုခွင်းရုံမက ကားနဲ့ပါတိုက်ပြီး ဆန္ဒပြသူတွေကို ဖမ်းဆီးဖို့ ကြိုးစားခဲ့ပါတယ်။ မေ ၃၀ ရက် မနေ့ညက စစ်ကောင်စီက ဖမ်းဆီးသွားတဲ့ ကိုမင်းမင်းအတွက် တောင်းဆိုဆန္ဒပြဖို့ အသွားမှာ ခုလို နှိမ်နင်းခံရတာကို ကျောက်မဲဆန္ဒပြပွဲမှာ ပါဝင်သူတစ်ဦးက ပြောပါတယ်။

“အဓိကက မနေ့ညက ကျနော်တို့ မြို့က လူတစ်ယောက်ပါသွားတယ်။ ပါသွားတဲ့ အဲ့တစ်ယောက် အတွက် Speak Out လုပ်ဖို့ ရဲစခန်းကို ချီတက်တာပေါ့။ ရဲစခန်းမရောက်ခင်မှာကို ဖြိုခွင်းတယ်။ ရာဘာကျည်နဲ့ ပစ်တယ်၊ ပစ်တော့ ၃ ယောက်ထိတယ်။ ဆိုင်ကယ်သပိတ်ကို သူတို့က ကားနဲ့ပေါ့၊ ကားနဲ့ နောက်က လိုက်တိုက်တယ်။ တိုက်တော့ ဆိုင်ကယ်လဲပြီးတော့ ဖုန်းတွေကျကျန်ခဲ့တာတော့ ရှိတယ်။ လူကတော့ လွတ်အောင်ပြေးကြတယ်။ ဆိုင်ကယ်က ၂ စီးလောက်တော့ အနည်းဆုံးပါသွားတယ်။”

ကျောက်မဲမှာ ဒီကနေ့ ဖြိုခွဲမှုကြောင့် ဖမ်းဆီးခံရသူ မရှိပေမဲ့ ဖြိုခွဲချိန်မှာ ကျကျန်ခဲ့တဲ့ ဖုန်းတွေကနေတစ်ဆင့် လိုက်ပြီး ဖမ်းဆီးမှုတွေ ရှိနိုင်တာကြောင့် ဆန္ဒပြသူတွေ ရှောင်တိမ်းနေကြရတယ်လို့ ဆန္ဒပြပွဲမှာ ပါဝင်သူတဦးက ပြောပါတယ်။

ဆန္ဒပြပွဲတွေ တောက်လေ ျှာက်လို ရှိနေတဲ့ မုံရွာမြို့မှာလည်း လမ်းပေါ်ထွက် ဆန္ဒပြတာထက် စစ်အာဏာရှင်ဆန့်ကျင်တဲ့ လှုပ်ရှားမှုတွေ ရပ်မသွားအောင် ကြိုးစားနေတယ်လို့ မုံရွာ ဆန္ဒပြပွဲမှာ ပါဝင်သူတစ်ဦးက ပြောပါတယ်။

“အခု ရက်ပိုင်းအတွင်းကတော့ ကျနော်တို့ ဒီ သပိတ်အခြေအနေကတော့ လမ်းမကြီးတွေထက်ပေါ်ကို သေချာကြည့်ကြီးတော့ ပြန်ပြီးတော့ တက်နိုင်လာတဲ့ အနေအထားရှိတယ်ပေါ့နော်။ ဒါပေမဲ့ ဒီနေ့မှာတော့ လမ်းမတွေထက်မှာ စစ်ဆေးရေးတွေ ပြန်နေရာယူပြီး၊ လုံခြုံရေးတွေ ပြန်ချထားတဲ့ အခြေအနေမျိုးတော့ ကျနော်တို့ တွေ့ရတယ်ဗျ။ အရပ်ဝတ်တွေနဲ့ ကားနဲ့ လှည့်ပတ်နေတာတွေရော ကျနော်တို့ တွေ့ရတယ်ဗျ။ ကျနော်တို့ နောက်ပိုင်းကတော့ အဓိကကတော့ လမ်းမကြီးတွေပေါ်တက်ဖို့ကတော့ ကျနော်တို့ ပန်းတိုင်မဟုတ်ဘူးပေါ့နော်။ အဓိကက လမ်းမပေါ်က ကျနော်တို့ လှုပ်ရှားမှုတွေ ဆက်ရှိနေဖို့ပေါ့။ နောက်ကအသံ ထည့်ဖို့ မလိုပါဘူး။ ကျနော်တို့က အလျဉ်းသင့်သလိုပဲ လမ်းမကြီးတွေပေါ်ထွက်တာဗျ။ ဒီနေ့ကလည်း ကျနော်တို့ အစကတည်းက လမ်းကြီးတွေပေါ်တက်ဖို့ အစီအစဉ်မရှိတာဗျ။”

နေ့စဉ်ဆန္ဒထုတ်ဖော်နေတဲ့ မန္တလေး၊ ဖားကန့်၊ ထားဝယ်၊ လောင်းလုံ၊ ရေဖြူ၊ ဆားလင်းကြီး၊ မြင်းခြံမြို့တွေမှာ ပြောက်ကျားသပိတ်၊ ဆိုင်ကယ်သပိတ်တွေလု ပ်ခဲ့ကြပါတယ်။ ဒေသတချို့မှာတော့ လူမဲ့သပိတ်၊ အိမ်တွင်းသပိတ်၊ ဓားသပိတ်၊ လွန်ဆွဲသပိတ်တွေပြုလုပ်ကြပြီး စစ်အာဏာသိမ်းမှုကို ကန့်ကွက် ဆန္ဒပြခဲ့ကြပါတယ်။


မဆုမွန်/ VOA Burmese

https://burmese.voanews.com/a/yangon-myanmar-military-coup-protest-paper-strike/5910804.html

 

ဒီးမော့ဆို-ဖရူဆိုလမ်း တံတားနှစ်စင်း မိုင်းခွဲ ဖျက်ဆီးခံရ


ကယားပြည်နယ် ဒီးမော့ဆိုမြို့မှာ စစ်တပ်နဲ့ ဒေသခံ ပြည်သူ့ကာကွယ်ရေးတပ်တွေကြား ဒီနေ့ မေလ ၃၁ ရက်နေ့မှာ တိုက်ပွဲဖြစ်ခဲ့တာမှာ စစ်ကောင်စီဘက်က ရဟတ်ယာဉ် လက်နက်ကြီးနဲ့ ပစ်ခတ်နေတယ်လို့မြို့ခံတွေကပြောပါတယ်။ လွိုင်ကော်၊ ဒီးမော့ဆို စတဲ့မြို့ တွေအတွက် သွားလာရေးမှာ အရေးပါတဲ့ တံတား ၂ စင်းလည်း မိုင်းခွဲဖျက်စီးခံရပါတယ်။ စစ်တပ်နဲ့ PDF တပ်တွေကြား တိုက်ပွဲတွေဖြစ်ခဲ့ပြီးကတည်းက ကယားပြည်နယ်ထဲ မော်တော်ယာဉ် အဝင်အထွက်ကို စစ်ကောင်စီက ပိတ်ထားတဲ့ကြားမှာ ခုလို ဒီးမော့ဆိုမြို့နဲ့ ဖရူဆိုမြို့ကြားက တံတား ၂ စင်း ဖျက်စီးခံရတဲ့အတွက် ဒေသခံတွေ ကုန်စည်ပြတ်လတ်မှုနဲ့ရင်ဆိုင်နေကြရပါတယ်။ ဒီအကြောင်း ဗွီအိုအေသတင်းထောက် ကိုနိုင်ကွန်းအိန်ကနေပြောပြပေးမှာပါ။

ကယားပြည်နယ် ဒီးမော့ဆိုမြို့မှာ ဒီနေ့ မေလ ၃၁ ရက် ညနေပိုင်းမှာ စစ်ကောင်စီတပ်နဲ့ ကရင်နီပြည်သူ့ကာကွယ်ရေး အဖွဲ့တို့အကြား ပစ်ခတ်တိုက်ခိုက်မှုတွေ ဖြစ်ခဲ့ပါတယ်။ စစ်ကောင်စီတပ်ဘက်က လက်နက်ကြီးအပါဝင် ရဟတ်ယာဉ်နဲ့ပါ ပစ်ခတ်နေတယ်လို့ မြို့ခံတဦးက ပြောပါတယ်။

"ခုဏက ပစ်နေတယ်ပေါ့။ ဒီးမော့ဆိုဘက်မှာ အမြောက်နဲ့ရော၊ ဟက်စကီးနဲ့ပါပစ်နေတာပေါ့။ ဟုတ်တယ် နှစ်ဘက်တပ်ဆိုပေမဲ့ သူတို့က အပေါ်ကနေ ရဟတ်ယာဉ်အမြောက်တွေသုံးပြီးတော့ ပစ်နေတယ်ဗျ။ လွိုင်ကော်က အမြောက်တပ်ကနေ ဒီးမော့ဆိုကို လှမ်းပစ်တယ်။ ပြီးလို့ရှိရင် ဟက်စကီးနဲ့ သူတို့ ဒီးမော့ဆိုမြို့အပေါ်ဝဲပြီးတော့ပစ်နေတယ်ပေါ့အခု။"

အပြန်အလှန် ပစ်ခတ်မှုအတွင်း ထိခိုက်မှုကိုတော့ မသိရသေးပါဘူး။

မေလ ၃၀ ရက် ညကတော့ ဒီးမော့ဆိုမြို့ကနေ ဖရူဆိုမြို့သွားတဲ့ ကားလမ်းမကြီးပေါ်က တံတား ၂ စင်း မိုင်းခွဲဖျက်စီးခံရပါတယ်။

"ဒီးမော့ဆို ဖရူဆိုဘက် တံတားကြီးနှစ်စင်းပေါ့နော်။ အဲဒီလိုမျိုး အဖျက်ခံရတယ်။ ဘာကြောင့်ဖျက်တာလဲဆိုရင်တော့... ဒါတော့ ဘယ်အဖွဲ့အစည်းကနေ လုပ်တာလဲတော့ ကျနော်တို့ မသိဘူး။ ဒါပေမဲ့လို့ တံတားက ဗုံးဖောက်ခွဲ မိုင်း ဖောက်ခွဲခံရတဲ့ ပုံစံလိုမျိုးပဲ။"

ဒီးမော့ဆိုနဲ့ ဖရူဆိုမြို့အကြား ကဒါးလားကျေးရွာအနီးမှာ တံတားတွေ မိုင်းခွဲဖျက်စီးခံခဲ့ရတာပါ။ ဒီတံတားမှာ လုံခြုံရေး အစောင့်မရှိဘဲ စစ်တပ်ဘက်က ရံဖန်ရံခါ ကင်းလှည့်နေတာလို့လဲ ဒေသခံတွေကပြောပါတယ်။ ဒီတံတားတြေ ဖောက်ခွဲ ခံရတာနဲ့ ပတ်သက်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက အခုလိုပြောပါတယ်။

"တံတား ၂ စင်းဖောက်ခွဲခံရတာပေါ့။ ဒီးမော့ဆိုနဲ့ ကျနော်တို့ ဟိုဘက် ဘော်လခဲတံတား ၂ စင်းကို ဒါဖျက်စီးတဲ့ဖြစ်စဉ်ရှိပါတယ်။ KNPP နဲ့ ဟိုဟာအဖွဲ့တွေ အဲဒီဘက်မှာ လုပ်နေတဲ့အကြမ်းဖက်အဖွဲ့ပဲ ထင်ပါတယ်။"

ကရင်နီအမျိုးသားတိုးတက်ရေးပါတီ KNPP နဲ့ ကရင်နီပြည်သူ့ကာကွယ်ရေး ပူးပေါင်းအဖွဲ့တွေ ဖောက်ခွဲဖျက်စီးတာလို့ စစ်ကောင်စီဘက်က စွပ်စွဲထားပါတယ်။ ဒါပေမဲ့ ကရင်နီပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ခံကနေ ငြင်းဆိုထားပါတယ်။

"ကျနော်တို့ကတော့ အများပြည်သူသွားလာနေတဲ့လမ်းပေါ့။ အဓိကကတော့ ကိုယ်တွေပြည်သူတွေ ကိုယ်တိုင် အားကိုးအားထားပြီး သွားနေရတဲ့လမ်းကိုတော့ ဘယ်လိုအကြောင်းပြချက်နဲ့မှ ဖျက်စီးမှာတော့ မဟုတ်ဘူးခင်ဗျ။ ပြီးတော့ အဲဒီတံတားဖျက်စီးရေးနဲ့ ပတ်သက်ပြီးတော့လည်း ကျနော်တို့ဘက်က ဘာလှုပ်ရှားမှုမှ မရှိပါဘူးခင်ဗျ။ သူတို့ဒီစစ်ကောင်စီဘက်ကလူတွေ ဖျက်စီးတာပဲ ဖြစ်နိုင်ခြေများတယ်ဗျ။"

အဆိုပါ ဖျက်စီးခံရတဲ့တံတားဟာ လွိုင်ကော်မြို့၊ ဒီးမောဆိုမြို့ကနေ ဖရူဆိုမြို့၊ ဘောလခဲမြို့၊ ဖားဆောင်းမြို့၊ မယ်စဲ့မြို့ဘက်ကို ဖြတ်သွားတဲ့ လမ်းမကြီးပေါ်က တံတားတွေဖြစ်ပြီးကယားပြည်နယ်ရဲ့ ကုန်စည်ပို့ဆောင်ရေးအတွက် အဓိကလမ်းကြီးဖြစ်တယ်လို့ ဒီးမော့ဆို မြို့ခံတွေကပြောပါတယ်။

"ဘယ်လောက်အထိ အရေးပါလဲဆိုရင်တော့ ကယားပြည်နယ်ရဲ့ မြို့တော် ၄ မြို့နယ်လောက်က အဲဒီဘက်ခြမ်းရှိနေတယ်။ မယ်စဲ့၊ ဘော်လခဲ၊ ဖားဆောင်း၊ ဖရူဆိုက အဲဒီဘက်လမ်းကြောင်း အဲဒီမြို့နယ်ကုန်စည်စီးဆင်းမှုတွေ ပြတ်တောက်ကုန်မယ်။ နောက်ပြီးတော့အခက်ခဲတွေကြုံလာမယ်ပေါ့။"

ဒီးမော့ဆို မြို့ဘက်မှာ ဒေသခံပြည်သူ့ကာကွယ်ရေးအဖွဲ့နဲ့ စစ်ကောင် စီတပ်တို့အကြား မေလ (၂၁) ရက်နေ့ကနေ (၃၁) ရက် နေ့ အထိ ပစ်ခတ်တိုက်ခိုက်မှုတွေ ဖြစ်ပွါးခဲ့ပါတယ်။ ကယားပြည်နယ် လွိုင်ကော် ဒီးမော့ဆိုနဲ့ ရှမ်းပြည်နယ်နဲ့ ကယားပြည်နယ် အစပ် မိုးဗြဲမြို့မှာ နှစ်ဘက် ပစ်ခတ်တိုက်ခိုက်မှုတွေ ဖြစ်ပွါးခဲ့ပြီးနောက် မေလ ၂၉ ရက်နေ့မှာ ကယားပြည်နယ်ဘက် ယာဉ်အဝင်အထွက်ကို စစ်ကောင်စီဘက်က ပိတ်ပင်ခဲ့တာပါ။

ဒီလို ယာဉ်အဝင်အထွက်ပိတ်ပင်ထားတဲ့အတွက် ကုန်စည်ပြတ်လပ်နေပြီး စျေးနှုန်းမြင့်တက်လာနေတယ်လို့ လွိုင်ကော် မြို့ခံတဦးကပြောပါတယ်။

"အခုပိတ်နေတယ်။ ကလော အောင်ပန်းလမ်းဘက်မှာလည်း ပိတ်ထားတယ်။ နောက်ပြီးတော့ပင်လောင်းဘက်မှာလည်း ပိတ်ထားတယ်... ဝင်လို့ မရဘူး။ အခုလွိုင်ကော်မှာ ဆန်တအိတ် ၇၀,၀၀၀ ဖြစ်ကုန်ပြီးလို့ ပြောတယ်။ နဂိုလ်မူလဆန်တအိတ် ၃၀,၀၀၀ ကနေ ၄၀,၀၀၀ ကြားတော့ရှိတာပေါ့။ ဆန်မှ မဟုတ်ဘူး တခြားကုန်ပစ္စည်းတွေလည်း စျေးတက်ကုန်ပြီ။"

ကယားပြည်နယ်ကို အဝင်အထွက်ပိတ်ပင်ထားတာဟာ လုံခြုံရေးအရ စစ်ဆေးနေတာဖြစ်ကြောင်း စစ်ကောင်စီ ပြောခွင့်ရ ဗိုလ်ချုပ် ဇော်မင်းထွန်းက ဗွီအိုအေကို ပြောဆိုခဲ့ပါတယ်။

ကယားပြည်နယ်ထဲက ဒေသခံပြည်သူ့ကာကွယ်ရေးအဖွဲ့နဲ့ စစ်ကောင်စီတပ်တို့အကြား ပစ်ခတ်တိုက်ခိုက်မှုတွေကြောင့် လွိုင်ကော်၊ ဒီးမော့ဆို၊ ဖရူဆို၊ မိုးမြဲ စတဲ့မြို့တွေက ဒေသခံ ၇၀,၀၀၀ လောက် စစ်ဘေးတိမ်းရှောင်နေရပါတယ်။ လမ်းတွေ ပိတ်ဆို့ထားတဲ့အတွက် စစ်ဘေးဒုက္ခသည်တွေအတွက် ကူညီရေးမှာအခက်တွေ့နေတယ်လို့ စစ်ရှောင်ကော်မီတီဝင်တဦးက ပြောပါတယ်။

"နေ့ရှည်ထပ်ပိတ်မယ်ဆိုရင်တော့ ဒုက္ခရောက်တာပဲ ရှိမယ်။ အခုနေတောင်မှ ကလေးတွေအတွက်၊ အမျိုးသမီးတွေအတွက်၊ သက်ကြီးရွယ်အိုတွေအတွက် သူတို့အတွက်ဆေးတွေကလည်း ပြတ်နေတယ်။ စစ်ရှောင်တွေအတွက်လာလှူတဲ့ ဆန်တွေ၊ ဆီတွေ၊ နောက်ဆေးဝါးပစ္စည်းတွေ လာလှူလို့ မရတော့ဘူးပေါ့။"

ကယားပြည်နယ်ထဲက အိုးအိမ်ပစ် ထွက်ပြေးနေကြရသူတွေအတွက် မြန်မာနိုင်ငံကြက်ခြေနီအသင်းကနေ အရေးပေါ် ကယ်ဆယ်ရေးပစ္စည်းတွေ ပေးပို့တယ်လို့ ထုတ်ပြန်ထားပေမဲ့ လက်ရှိဒုက္ခသည်တွေ လက်ထဲမရောက်သေးပါဘူး။ စစ်ဘေးဒုက္ခသည်တွေကို အကူအညီပေးမယ့်သူတွေအတွက် လုံခြုံရေးကလည်း စိုးရိမ်စရာဖြစ်နေတာမို့ ဒုက္ခသည်တွေ အကူအညီရနိုင်ဖို့ အတော်လေး ခက်ခဲနေကြပါတယ်။ 


ကိုနိုင်ကွန်းအိန်/ VOA Burmese

https://burmese.voanews.com/a/demoso-faru-attack/5910728.html

နမ့်ဖတ်ကာ စစ်ကောင်စီစခန်း မြောက်ပိုင်းညီနောင်သုံးဖွဲ့ ဝင်တိုက်

နမ့်ဖတ်ကာ စစ်ကောင်စီစခန်း မြောက်ပိုင်းညီနောင်သုံးဖွဲ့ ဝင်တိုက် နမ့်ဖတ်ကာရွာမှာ မြောက်ပိုင်းညီနောင်သုံးဖွဲ့က သိမ်းဆည်းရမိတဲ့ စစ်ကောင်စီတပ်ရဲ့ လက်နက်အချို့ကို တွေ့ရစဉ် / Photo: Northern Alliance (Burma)

ရှမ်းပြည်နယ်မြောက်ပိုင်း မူဆယ်-ကွတ်ခိုင်လမ်းမပေါ် နမ့်ဖတ်ကာကျေးရွာက စစ်ကောင်စီ ခလရ (၁၂၃) တပ်နဲ့ရွာထဲက ကင်းပုန်းစခန်းတွေကို မြောက်ပိုင်းညီနောင် သုံးဖွဲ့ဖြစ်တဲ့ ကိုးကန့် MNDAA၊ ရက္ခိုင့်တပ်တော် AA နဲ့ တအာင်းအမျိုးသားလွတ်မြောက်ရေးအဖွဲ့ TNLA တပ်တွေက မေ ၃၁ ရက် ဒီမနက် တစ်နာရီလောက်မှာ ဝင်ရောက် တိုက်ခိုက်ခဲ့ပါတယ်။

နမ့်ဖတ်ကာ အဝင် လျှပ်စစ်ရုံးမှာ တပ်စွဲထားတဲ့ စစ်ကောင်စီတပ်နေရာကို ဝင်ရောက်တိုက်ခိုက်ရာမှာ ဒု-တပ်ရင်းမှူး အပါအဝင် ဆယ့်တစ်ဦး ကျဆုံးခဲ့သလို မြောက်ပိုင်းမဟာမိတ်ဘက်က နှစ်ဦး ကျဆုံးခဲ့တယ်လို့ အမည်မဖော်လိုတဲ့ နမ့်ဖတ်ကာ ဒေသခံတစ်ဦးက RFA ကို ပြောပါတယ်။

နမ့်ဖတ်ကာ ပြည်ထောင်စုလမ်းမကြီး ဘေးတစ်လျှောက်မှာ ကင်းပုန်းဝပ်နေတဲ့ စစ်ကောင်စီတပ်တွေ ရှိတဲ့ နေရာကို မနက်တစ်နာရီလောက်မှာ မြောက်ပိုင်းအဖွဲ့တွေက အုပ်စုလိုက် ဝင်ရောက်တိုက်ခိုက်ခဲ့တာ ဖြစ်ပြီး မနက်လေးနာရီလောက်အထိ ဖြစ်ပွားခဲ့တယ်လို့ ဒေသခံတွေက ပြောပါတယ်။

နမ့်ဖတ်ကာရွာက အသက်ခြောက်ဆယ်အရွယ် အမျိုးသမီးတစ်ဦး ခြေထောက်မှာ ကျည်ဆန်ထိမှန်ခဲ့လို့ ကွတ်ခိုင်ဆေးရုံကို ပို့ဆောင်ခဲ့ရတယ်လို့လည်း ပြောပါတယ်။ ပစ်ခတ်မှုတွေကြောင့် နေအိမ်တစ်လုံး လက်နက်ကြီးကျည် ထိမှန်ခဲ့သလို နမ့်ဖတ်ကာရပ်ကွက် (၆)က နေအိမ်တွေအနီးမှာလည်း မပေါက်ကွဲသေးတဲ့ လက်နက်ကြီးကျည်ဆန်တွေ ကျန်နေသေးတယ်လို့ ပြောပါတယ်။

ဒီမနက်တိုက်ပွဲကြောင့် မန္တလေး-မူဆယ် ခရီးသွားကားတွေ ပိတ်မိခဲ့ပြီး စစ်ကောင်စီဘက်က မနက်ပိုင်း ကိုးနာရီမှာ တစ်ကြိမ် နေ့လယ် ဆယ့်နှစ်နာရီမှာ တစ်ကြိမ် အလှည့်ကျ လွှတ်ပေးနေတယ်လို့လည်း ပြောပါတယ်။

တိုက်ပွဲနဲ့ပတ်သက်ပြီး မြောက်ပိုင်းမဟာမိတ်အဖွဲ့တွေရဲ့ မြေပြင်သတင်းဖော်ပြမှုအရ စစ်ကောင်စီဘက်က ဆယ့်တစ်ဦး ကျဆုံးသလို လက်နက်အချို့ သိမ်းဆည်းရမိကြောင်း လူမှုကွန်ယက်စာမျက်နှာတွေမှာ ဖော်ပြနေကြပေမယ့် TNLA ပြန်ကြားရေးဌာနကတော့ မြေပြင်တပ်တွေနဲ့ အဆက်အသွယ်မရသေးလို့ အတိအကျမသိရသေးဘူးလို့ TNLA ပြန်ကြားရေးတာဝန်ခံ ဒုတိယ ဗိုလ်မှူးကြီး မိုင်းအိုက်ကျော်က ပြောပါတယ်။

အဲဒီတိုက်ပွဲနဲ့ပတ်သက်ပြီး စစ်ကောင်စီဘက်ကလည်း သတင်းထုတ်ပြန်လာတာမျိုးကို မတွေရသေးပါဘူး။

စစ်ကောင်စီဘက်တော့ တိုင်းရင်းသားလက်နက်ကိုင်တွေနဲ့ အပစ်ရပ်ကာလကို ဇွန်လကုန်အထိ သက်တမ်း ထပ်တိုးမယ်လို့ ထုတ်ပြန်ထားပေမယ့် မြောက်ပိုင်းအဖွဲ့တွေကတော့ အပစ်ရပ်ကာလ သက်တမ်း ထပ်တိုး လာတာ မရှိတော့ပါဘူး။

ရှမ်းပြည်နယ် မြောက်ပိုင်းမှာ ပြီးခဲ့တဲ့ ဧပြီလ ၁၀ ရက်နေ့က နောင်မွန် ရဲကင်းစခန်းကို မြောက်ပိုင်းအဖွဲ့တွေက ဝင်ရောက်တိုက်ခိုက်ခဲ့လို့ ရဲတပ်ဖွဲ့ဝင် ဆယ်ဦးကျော် သေဆုံးခဲ့ရပါတယ်။

ကွတ်ခိုင်နဲ့ မူဆယ် လမ်းပိုင်းတစ်လျှောက် အခုရက်ပိုင်းအတွင်း စစ်ကောင်စီနဲ့ ကချင်လွတ်မြောက်ရေးအဖွဲ့ KIA အပါအဝင် မြောက်ပိုင်းညီနောင်အဖွဲ့တွေနဲ့ တိုက်ပွဲတွေ နေ့စဉ်လိုလို ဖြစ်ပွားနေပါတယ်။


RFA Burmese

https://www.rfa.org/burmese/news/namhpatkar-camp-attack-05312021033051.html

ကလေးမြို့ သာစည်ကျေးရွာမှာ တိုက်ပွဲဖြစ်ပွား၊ စစ်ကောင်စီဘက်က သုံးဦးကျဆုံး



စစ်ကိုင်းတိုင်း ကလေးမြို့နားက သာစည်ရွာမှာ စစ်ကောင်စီတပ်ဖွဲ့ဝင်တွေက ဒီကနေ့မနက် ခြောက်နာရီ အချိန်လောက်မှာ လူငယ်ကျောင်းသားတွေနဲ့ CDM မှာပါတဲ့ဝန်ထမ်းတွေကို ဝင်ဖမ်းလို့ ကလေးပြည်သူ့ ကာကွယ်ရေးတပ်ဖွဲ့ဝင်တွေနဲ့ တိုက်ပွဲဖြစ်ပြီး စစ်တပ်ဘက်က သုံးယောက် သေဆုံးတယ်လို့ သတင်း ရရှိပါတယ်။

လူတွေဝင်ဖမ်းလို့ ကာကွယ်တဲ့အနေနဲ့ မနက် ၈ နာရီကစပြီး တိုက်ပွဲဖြစ်တာလို့ အမည်မဖော်လိုတဲ့ ကလေး PDF တပ်ဖွဲ့ဝင်တစ်ဦးက RFA ကို ပြောပါတယ်။

"CDM လုပ်တဲ့သူတွေကို လိုက်ဆွဲတယ်၊ လက်နက်ခဲယမ်းလုပ်တယ်ဆိုပြီး သတင်းရတယ်ဆိုပြီးတော့မှ လာရှာတယ်ဗျ သူတို့ဘက်က ဘာမှလည်း တွေ့မသွားဘူး၊ ရွာထဲကိုသေနတ်တွေထောင်ဖောက်ပြီး ရွာအုပ်ချုပ်ရေးမှူးရုံးမှာ စခန်းထိုင်တယ်၊ ကျွန်တော်တို့ PDF အဖွဲ့တွေက တတ်နိုင်သလောက် ခုခံပြီး ပစ်နေတယ်၊ သူတို့ကရွာထဲမှာ အကုန်မွှေနေတယ်။ အခုကျွန်တော်တို့ ကင်းပုန်းဝပ်နေတယ် သူတို့ အလာကိုစောင့်နေတယ် သူတို့က အင်အားတော်တော်လေးများတယ်။ သူတို့ဘက်က သုံးယောက်ကျတယ်၊ ကျွန်တော်တို့ဘက်ကတော့ တစ်ယောက်မှ မကျသေးဘူး’’

ပြည်သူ့ကာကွယ်ရေးတပ်ဘက်ကလည်း တစ်ယောက် ဒဏ်ရာအနည်းငယ်ရပြီး၊ သာစည်ရွာထဲက ဒေသခံ ခြောက်ဦးထက်မနည်းကိုတော့ စစ်တပ်က ဖမ်းဆီးသွားတယ်လို့ ဆိုပါတယ်။

အဖမ်းခံရသူတွေထဲမှာ CDM အာဏာဖီဆန်ရေးမှာပါဝင်တဲ့ အုပ်ချုပ်ရေးမှူး ဦးထွန်းမိုး၊ မနန္ဒာလှိုင်နဲ့ ဦးသိန်းဝင်း တို့ပါဝင်ပြီး ကျန်တဲ့သုံးယောက်အမည်ကိုတော့ အတည်မပြုနိုင်သေးဘူးလို့ ဒေသခံတွေက ပြောပါတယ်။

    "လူတွေဝင်ဖမ်းလို့ ကာကွယ်တဲ့အနေနဲ့ မနက် ၈ နာရီကစပြီး တိုက်ပွဲဖြစ်တာ"

အဲဒီရွာမှာ CDM ဝန်ထမ်းတွေ ခိုအောင်းနေကြပြီး ရွာထဲမှာ လက်နက်ခဲယမ်းတွေလုပ်နေတယ်ဆိုတဲ့ သတင်းပေးရဲ့ပြောဆိုချက်အရ လာရောက်ရှာဖွေကြတာလို့ အမည်မဖော်လိုတဲ့ ဒေသခံတစ်ဦးက RFA ကို ပြောပါတယ်။

"အင်အားတစ်ရာကျော်လောက်ရှိမယ်ထင်တယ်၊ ရွာထဲကို သုံးသုတ်လောက်ခွဲပြီးဝင်လာတယ်။ နာမည်နဲ့ တပ်ပြီးတော့ကို မေးပြီးတော့ လူတွေကိုဖမ်းတယ် လောလောဆယ် သုံးဦး ဖမ်းမိသွားပြီ။ ကျန်သူတွေ ကတော့ မသေချာဘူး အုပ်ချုပ်ရေးမှူးအိမ်ကတော့ လမ်းဘေးတင်ဆိုတော့ ထွေထွေထူးထူး ရှာစရာ မလိုဘူးပေါ့၊ အမြင်ကတ်ပုဒ်မနဲ့ ဖမ်းသွားတယ် ထင်ပါတယ်ဗျာ"

ဒီဖြစ်ရပ်နဲ့ပတ်သက်ပြီး စစ်ကောင်စီရဲ့ ပြန်ကြားရေးဒု-ဝန်ကြီး ဗိုလ်ချုပ် ဇော်မင်းထွန်းကို RFA က ဆက်သွယ် ပေမယ့် တယ်လီဖုန်းလက်ခံဖြေဆိုတာမရှိပါဘူး။

သာစည်ကျေးရွာဟာ ကလေးမြို့ကနေ သုံးမိုင်လောက်ကွာဝေးပြီး အိမ်ခြေ တစ်ထောင့်ငါးရာကျော်ရှိပါတယ်။ သာစည်ရွာအပြင် တစ်ခြားရွာတွေကိုလည်း စစ်ကောင်စီတပ်တွေက ဝင်ရောက်ပစ်ခတ်တာတွေရှိလာနိုင်တာမို့ ကလေးတစ်မြို့နယ်လုံးမှာရှိတဲ့ PDF အဖွဲ့ဝင်တွေအကုန်လုံးက ဝင်ရောက်ပူးပေါင်းပြီး တိုက်ခိုက်ပေးကြဖို့ PDF အဖွဲ့ဝင်တွေက တောင်းဆိုထားကြပါတယ်။

ကလေးမြို့နယ်မှာ ဖေဖော်ဝါရီ ၁ ရက်နေ့ စစ်တပ်ကအာဏာသိမ်းပြီးနောက်ပိုင်း ကလေးမြို့ဒေသ ခုခံ ကာကွယ်ရေးတပ်ဖွဲ့ဝင်တွေနဲ့ စစ်ကောင်စီတပ်ဖွဲ့ဝင်တို့ကြား လက်ရှိအချိန်တိုက်ပွဲပေါင်း ငါးကြိမ်ထက် မနည်းရှိပြီလို့ ဒေသခံတွေက ပြောပါတယ်။

RFA Burmese



အကြမ်းဖက်သမားတွေက CDM ဆရာမရဲ့ အိမ်ဝင်မွှေကာ ပိုက်ဆံ ၂၂ သိန်းကျော်ခိုးယူ


ကလေးမြို့အနီး သာစည်ကျေးရွာက CDM ဆရာမတစ်ဦးရဲနေအိမ်ကို ဒီနေ့(မေ ၃၁)ရက်တွင်

စစ်ကောင်စီတပ်ဖွဲ့ဝင်တွေ ဝင်ရောက်ရှာဖွေပြီးပိုက်ဆံ(၂၂)သိန်းကျော်ခိုးယူသွားခံရတယ်လို့သိရတယ်။

ဒီပိုက်ဆံဟာ ညီမ​ဖြစ်သူက အိမ်မှာခဏသိမ်းထိန်းထားခိုင်းတာကြောင့် ထိန်းသိမ်းထားတာဖြစ်တယ်လို့ဆရာမက ငိုရင်းပြောဆိုပါတယ်။

ဆရာမလည်း အိမ်မှာမနေရဲဘဲ အခုထွက်ပြေးတိမ်းရှောင်နေရတယ်။

သာစည်ရွာမှာ ဒီမနက်ကနေ ခုချိန်ထိ အကြမ်းဖက်သမားတွေနဲ့ ပြည်သူ့တပ်ဖွဲ့တွေ ပစ်ခတ်နေကြပါတယ်။


Zalen 

https://www.facebook.com/zalen.info/

ဒီမော့ဆိုတိုက်ပွဲမှာ စစ်ကောင်စီဖက်က ရဟတ်ယာဥ်သုံးပြီး ပစ်ခတ်နေ


ဓာတ်ပုံ - CJ

ဒီကနေ့ မေလ၃၁ရက်နေ့၊ ဒီမော့ဆိုမြို့မှာ ပြည်သူ့ကာကွယ်ရေးတပ်ဖွဲ့ နဲ့ စစ်ကောင်စီတပ်တို့ နေ့ခင်းကစပြီး တိုက်ပွဲဖြစ်ပွားနေပြီး ခုချိန်မှာ စစ်ကောင်စီတပ်က ရဟတ်ယာဥ်သုံးပြီး ပစ်ခတ်နေပြီလို့ သိရပါတယ်။

"ကျတော်တို့တိုက်ပွဲစနေတာက ၁နာရီခွဲကတည်းက ခုထိမပြီးသေးဘူး။ ရဟတ်ယာဥ်နဲ့လာပစ်လို့ ကျတော်တို့ဆုတ်နေပြီ။ ၂စီးလာတယ် ကုန်းသာအကျော်လယ်ကွင်းထဲမှာပစ်နေတယ်။လက်နက်ကြီးကြောင့် ကျတော်တို့ဖက်ကတော့ ထိခိုက်ဒဏ်ရာရသူရှိနေတယ်" လို့ မြေပြင်ရောက်ရှိသူတစ်ဦးကပြောပါတယ်။

"နေ့လည်ကတည်းကအပြန်အလှန်ပစ်ခတ်မှုတွေဖြစ်နေပြီး လက်နက်ကြီးတွေနဲ့ ရွာထဲအထိ အဆက်မပြတ်ပစ်ခတ်နေပြီး လက်ရှိအချိန်မှာ ရဟတ်ယာဥ် ၂စီးနဲ့စစ်ကူလာနေကြပါတယ်" KPDFအဖွဲ့ဝင်တစ်ဦး က ပြောပါတယ်။ 

ဒေသခံတစ်ဦးကလည်း "ရဟတ်ယာဥ် နှစ်စင်း တောင်ငူဘက်ကနေ ဒီးမော့ဆိုဘက်ကို တက်လာတာတွေ့တယ်။တစ်စီးက ဒမဆ ဘက်ကိုသွားပြီးတော့ လှည့်မောင်းနေတာ ရဟတ်ယာဥ် ပေါ်က ပစ်တာထင်တယ် အသံတွေ ဆက်တိုက်ကြားနေရတယ်" လို့ မြင်တွေ့ရတဲ့အခြေနေကိုပြောပါတယ်။

စစ်ကောင်စီတပ်ကနေ လွိုင်ကော်မြို့ကနေ

လက်နက်ကြီး အမြောက်တွေနဲ့ အချက်၂၀ ကျော် ပစ်ခတ်နေပြီလို့ သိရပါတယ်။ 

ပြည်သူ့ကာကွယ်ရေးတပ်ဖွဲ့က လက်နက်ကြီး၊ အမြောက်တွေနဲ့ ပစ်ခတ်မှုကြောင့် ထိခိုက်ဒဏ်ရာရသူရှိနေပြီး မြေပြင်အခြေနေ အသေးစိတ်ကိုတော့ အတည်မပြုနိုင်သေးပါဘူး။


Kantarawaddy Times 

https://www.facebook.com/KantarawaddyTimes

စစ်​ကောင်စီ ဂျက်လေယာဉ်နှစ်စင်းမှ ပစ်ချသည့် ​လေယာဥ်ဗုံးများ ​ရွှေကူနှင့် ကသာမြို့နယ်ရှိ ကျေးရွာများအနီးကျ​ရောက်​ပေါက်ကွဲ​


31 May 2021 - Kachinwaves

စစ်​ကောင်စီ၏ ဂျက်လေယာဉ်နှစ်စင်းမှ ပစ်ချသည့် ​လေယာဥ်ဗုံးများ ကျေးရွာများအနီးကျ​ရောက်​ပေါက်ကွဲ​ခဲ့ကြောင်း သတင်းရရှိသည်။

ယ​နေ့ ည​နေ ၅နာရီခန့်အချိန်၌ စစ်​ကောင်စီ၏ ဂျက်​လေယာဥ်နှစ်စင်း​ပေါ်မှ ပစ်ချ​ခဲ့သော ဗုံးများသည် ​​ရွှေကူမြို့နယ်ရှိ ​ဧရာဝတီမြစ်အနီး မင်းကျောင်းကုန်းနှင့် သာယာကုန်း​ကျေးရွာကြားတွင် တစ်လုံး၊ ​ကျောက်ကြီးရွာအနီးတစ်လုံးနှင့် ကသာမြို့နယ် မိုးတားရွာအနီး၌ ၂လုံး၊ ​ရွှေပြည်သစ်​ကျေးရွာရှိ သရက်သီးခြံတစ်ခြံ၌ ၂လုံး ပစ်ချခဲ့​ကြောင်း ​ဒေသခံများထံမှ သိရသည်။

ပစ်ချခဲ့​သော ​လေယာဥ်ဗုံးများမှ ​ကျောက်ကြီးရွာအနီးကျသည့် ဗုံးတစ်လုံးသည် ​ပေါက်ကွဲခြင်း မရှိခဲ့​ကြောင်း သိရသည်။ ယ​နေ့ ပစ်ချခဲ့သည့် ​လေယာဥ်ဗုံးများကြောင့် ထိခိုက်မှု ရှိမရှိသတင်းများကို မသိရ​သေးပါ။

စစ်ကိုင်းတိုင်း ကသာမြို့နယ် ​ရွှေပြည်သစ်​ကျေးရွာဘက်တွင် ​ဒေသ PDF တပ်ဖွဲ့နှင့် စစ်​ကောင်စီတပ်တို့ ယမန်​နေ့ တိုက်ပွဲ ဖြစ်ခဲ့ရာ စစ်​ကောင်စီဘက်​သေဆုံးသူနှင့် ဒဏ်ရာရသူများရှိခဲ့သည်။ ယမန်​နေ့ တိုက်ပွဲတွင် KIA မှ ကသာ PDF ဘက်မှ ဝင်တိုက်ကူခဲ့သည်ဟုလည်း သတင်းများတွင် ဖော်ပြထားသည်။


Kachinwaves 

https://www.facebook.com/kachinwavesnews

ကျောက်မဲမြို့နယ်အုပ်ချုပ်ရေးမှူးအသစ်ရောက်လာပြီး၊ ဖမ်းဆီးမှုကြမ်းလာ


မေ ၃၁ရက် ၂၀၂၁

သျှမ်းပြည် မြောက်ပိုင်း ကျောက်မဲမြို့တွင် မြို့နယ်အုပ်ချုပ်ရေးမှူး အသစ်ရောက်ရှိလာပြီးနောက် ဖမ်းဆီးမှုများ၊ ပစ်ခတ်မှုများ ရှိလာကြောင်း စုံစမ်းသိရသည်။

ကျောက်မဲမြို့တွင် မေ (၂၁ )ရက်မှ စပြီး အုပ်ချုပ်ရေးမှုအသစ်ပြောင်းရွှေ့လာပြီးနောက်ပိုင်းတွင် ညတိုင်းနီးပါး ပစ်ခတ်မှုရှိလာပြီး၊ ဖမ်းဆီးမှုများရှိလာခဲ့ကြောင်း  ကျောက်မဲမြို့ ဒေသခံတစ်ဦးက သျှမ်းသံတော်ဆင့်ကိုပြောသည်။  

“ သူပြောင်းလာပြီး ကျောက်မဲမြို့က အရင်နဲ့မတူတော့ဘူး။ ၂၄ ရက်နေ့နောက်ပိုင်းမှာဆိုရင် သေနတ်တွေ ညတိုင်းဖောက်တယ်။ ဖမ်းတာတွေလည်း ပိုလုပ်လာတယ်။ ပိုပြီး ကြမ်းလာတယ်။ ညဆိုရင် အပြင်သိပ်မထွက်တော့ဘူး” ဟု ကျောက်မဲမြို့‌ဒေသခံတစ်ဦး ကသျှမ်းသံတော်ဆင့်ကိုပြောသည်။ 

ကျောက်မဲမြို့  မြို့နယ်အုပ်ချုပ်ရေးမှု အသစ်အုပ်ချုပ်လာသည့် ၁၀ အတွင်းတွင် ပြည်သူ ၂ ဦး သေနတ်ကျည်း ထိမှန်းခဲ့ကြောင်း၊ ဖမ်းဆီးမှုများလည်းရှိနေကြောင်း သိရသည်။ 

“ သူရောက်လာတော့ ၂ ယောက်လောက်ရှိတယ်သေနတ်မှန်တာ။ တစ်ယောက်က လူငယ် ညထွက်လို့ဆိုပြီးပစ်တာ လက်မောင်းဘဲ ရှပ်ထိသွားတာ။ ကျန်တစ်ယောက်က ဈေးထဲမှာဈေးရောင်းနေရင်နဲ့ ထိတာ။ သူလည်း ရှပ်ပြီးထိသွားတာ။ ခုတလော ဖမ်းဆီးတာတွေလည်း ရှိနေတယ်” ဟု ဒေသခံတစ်ဦးကပြောသည်။ 

အလားတူ ယမန့်နေ့ မေ (၃၀)  တွင် ဓာတ်ပုံဝါသနာရှင် ကိုမင်းမင်းကို နေအိမ်တွင် မွန်းလွှဲပိုင်း (၃ )နာရီကျော်တွင် ရဲတပ်ဖွဲ့ဝင်များကို သေနတ်ထောက်ပြီး ဖမ်းဆီးသွားကြောင်း သိရသည်။ 

ကိုမင်းမင်းသည် ဆန္ဒပြရာတွင် ဓာတ်ပုံများကိုရိုက်ပြီး ၎င်း၏ လူမှုကွန်ယက်စာမျက်နှာပေါ်တွင် တင်လေ့ရှိသောကြောင့် စစ်ဆေးရန်ဟု ပြောဆိုပြီး ခေါ်ဆောင်သွားခဲ့ကြောင်း မျက်မြင်တွေ့ရှိသည့် လူငယ်တစ်ဦး က သျှမ်းသံတော်ဆင့်ကို ပြောပြသည်။

“ သူကဆန္ဒပြတဲ့ချိန်မှာ ဓာတ်ပုံရိုက်ပြီးတော့ သူဖေ့ဘွတ်ပေါ်မှာတင်တယ်။ သူကိုစစ်ဆေးဖို့ဆိုပြီးတော့ ခေါ်သွားတာ။ ဘယ်နေရာခေါ်သွားလဲတော့မသိဘူး။ သေနတ်ထောက်ပြီးတော့ခေါ်သွားတာ။ နေအိမ်ထိလာဖမ်းတာ” ဟု မျက်မြင်တွေ့ရှိသည့် လူငယ်က ဆိုသည်။

ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း ပြည်သူများကို နေအိမ်ထိလိုက်လံ ဖမ်းဆီးမှုများ ပြုလုပ်နေ သဖြင့် ကျောက်မဲဒေသခံလုံခြုံးရေးအတွက် လွန်စွာ စိတ်ပူနေရသည်။ 

ကျောက်မဲမြို့တွင် စစ်ကောင်စီမှ ဖမ်းဆီးသွားသူ စုစုပေါင်း ၁၀ ဦးရှိပြီးဖြစ်ကြောင်း သိရသည်။


SHAN News (Burmese Version) 

https://www.facebook.com/shannewsburmese

ညီနောင်မဟာမိတ်နှင့် စစ်ကောင်စီ တိုက်ပွဲဖြစ်၊ စစ်ကောင်စီဘက် အသေအပျောက်များရှိ

မေ ၃၁ရက် ၂၀၂၁

သျှမ်းပြည်မြောက်ပိုင်း ကွက်ခိုင်မြို့နယ် နမ့်ဖက်ကာရှိ စစ်ကောင်စီ တပ်စခန်းများသည် ယနေ့ (မေ ၃၁)ရက် မနက်(၁)နာရီ တွင်  တိုက်ခိုက်ခံရပြီး ဒုတပ်ရင်မှူး အပါအဝင် တပ်သား ( ၁၁)ဦး သေဆုံးခဲ့ပြီး၊ လက်နက်များ သိမ်းဆည်းရမိကြောင်း စုံစမ်းသိရသည်။

ယနေ့ မနက် (၁)နာရီ မှ မနက် (၄)နာရီအထိ စစ်ကောင်စီ အုပ်စု နှင့် ညီနောင်မဟာမိတ် တပ်ဖွဲ့ ဖြစ်သည့် တအာင်း (ပလောင်) လွတ်မြောက်ရေး တပ်မတော် (TNLA)၊ကိုးကန့်  (MNDAA) နှင့် ရခိုင်တပ်မတော် (AA) တို့ ပူးပေါင်း တိုက်ခိုက်မှုခဲ့ကြောင်း သိရသည်။

ထို့ကြောင့် စစ်ကောင်စီ ဘက်မှ ဒုတပ်ရင်းမှူး တစ်ဦးအပါအဝင် (၁၁) ဦး သေဆုံးကာ၊ (၁၅)ဦးပျောက်ဆုံးနေကြောင်း ၊ စစ်ကောင်စီဘက်မှ လက်နက်ခဲယမ်းများစွာ သိမ်းဆည်းရမိကြောင်း မြေပြင် သတင်း အရသိရသည်။

“လက်နက်ကြီးတွေ ပစ်ကြတယ်။ ကျမတို့တော့ ဗုံးခိုကျင်းထဲ ပုန်းနေရတယ်။ လက်နက်ကြီး ၂ လုံး ကျတယ်။ တစ်လုံးတော့ ပေါက်သွားတယ်။ အိမ်တစ်အိမ်ထိသွားတယ်။ပြီးတော့ ပြည်သူ တစ်ဦး ထိခိုက်ဒဏ်ရာရတယ်။ သူ တံခါးသွားပိတ်တော့ ရှထိသွားတာ။ ဆေးခန်းသွားပြပြီး ခုအိမ်ပြန်ရောက်ပါပြီ။” ဟု နမ့်ဖတ်ကာ ဒေသခံ တစ်ဦး က သျှမ်းသံတော်ဆင့် ကိုပြောသည်။

ယနေ့မနက်ပိုင်း ညီနောင်မဟာမိတ်နှင့် စစ်ကောင်စီ အုပ်စု ဖြစ်ပွားသည့် တိုက်ပွဲ အကြောင်းကို TNLA မှ ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော် က “ အောက်ခြေ သတင်းအချက်အလက် ကို ကျနော်မသိရသေးဘူး။ ကျနော်လည်း သတင်းပဲကြားရသေးတယ်။ အသေးစိတ်ကို မသိရသေးဘူး” ဟု သျှမ်းသံတော်ဆင့်ကို ပြောသည်။

ယနေ့တိုက်ပွဲဖြစ်ပွားသည့်နေရာသည် ညီနောင်မဟာမိတ် တပ်ဖွဲ့ နှင့် စစ်ကောင်စီ တို့ လှုပ်ရှားသည့်နေရာသာဖြစ်ကြောင်း လည်း ဗိုလ်မှူး မိုင်းအိုက်ကျော် က ထပ်လောင်းပြောသည်။

ကွက်ခိုင်မြို့နယ်တွင် မေ (၃၀)ရက် တွင်လည်း မြောက်ပိုင်းမဟာမိတ် တပ်ဖွဲ့ နှင့် စစ်ကောင်စီ အုပ်စုတို့တိုက်ပွဲ ဖြစ်ပွား ခဲ့ကြောင်း သိရသည်။

 မေ(၁၈) ရက်တွင် ကွက်ခိုင်မြို့နယ် နမ့်ပါချီး ကျေးရွာအနီးရှိ ပြည်ထောင်စု လမ်းမပေါ်တွင် စစ်ကောင်စီအုပ်စု၏ စက်သုံးဆီ ကားတစ်စီးကို KIA မှ လက်နက်ကြီး ပစ်ခတ်ခဲ့ကြောင်း သိရသည်။


SHAN News (Burmese Version) 

https://www.facebook.com/shannewsburmese

တောင်ကြီး ၂၁၂ တပ်ထဲ ကတုတ်ကျင်းတူးရာ တပ်သားအချင်းချင်း ပစ်ခတ်မှုဖြစ်ပွား


သျှမ်းသံတော်ဆင့်၊ မေ ၃၁

တောင်ကြီးမြို့တွင် ယမန်နေ့( မေ ၃၀) ရက် မနက်ပိုင်းတွင် ၂၁၂ ဆက်သွယ်ရေးတပ် တပ်ထဲ၌  စစ်သားများ အချင်းချင်း အငြင်းပွား စကားများကြပြီး ပစ်ခတ်မှုရှိခဲ့ကြောင်း စုံစမ်းသိရသည်။

တောင်ကြီးမြို့ အနောက်မြို့ပတ်လမ်းဘက်တွင်ရှိသော ၂၁၂ တပ်အတွင်း စစ်သားနှစ်ဦးသည် အချင်းချင်း စကားများကြပြီး တစ်ဦးက အနီးရှိ ဓါးဖြင့် ခုတ်မှု ပြုလုပ်ပြီး၊ တခြား စစ်သားက သေနတ်ဖြင့် ပြန်လည်ပစ်ခတ်မှု ပြုလုပ်ခဲ့ကြောင်း အမည်မဖော်လိုသည့် ၂၁၂ ဈေးအနီး တွင် နေထိုင်သူ ဒေသခံတစ်ဦးက သျှမ်းသံတော်ဆင့် ကို ပြောသည်။

 "ပြည်သူကဝင်လုပ်တယ်ဆိုတာက သတင်းအမှားပါ၊ သူတို့ တပ်ထဲ ကတုတ်ကျင်းတူးနေကြရင်း နဲ့ အချင်းချင်း စကားများရာကနေ တစ်ယောက်က ဓါးနဲ့ ခုတ်လိုက်တာ။ အခုတ်ခံရတဲ့သူက ဘယ်ဖက် လက်မောင်းမှာ ဒဏ်ရာရသွားပြီးတော့ ဓါးနဲ့ ခုတ်သူကို သေနတ်နဲ့ ပြန်ပစ်ကြတာ”  ဟု ၎င်း က ပြန်ပြောပြသည်။

ယခုရက်ပိုင်း တောင်ကြီးမြို့ ပေါ်တွင် ဗုံးပေါက်ကွဲမှု မကြာခဏဖြစ်ပွားပြီး၊ ၂၁၂ တပ်အနီးတဝှိက်တွင်လည်း ဗုံးပေါက်ကွဲမှုဖြစ်ပွားသဖြင့် တပ်ထဲတွင် ကတုတ်ကျင်းများ တူးရာ စစ်သားအချင်းချင်း စကားများ သေနတ်ပစ်ဖောက်သည့် အထိ ဖြစ်ပွားခဲ့သည်။

လွန်ခဲ့သည့် မေလ ၂၇ ရက်တွင်လည်း ဆက်သွယ်ရေးတပ် (၂၁၂)အရှေ့တွင် ဗုံးပေါက်ကွဲမှု ဖြစ်ခဲ့ပြီး စစ်သားတစ်ဦး သေဆုံးခဲ့ကြောင်း သိရသည်။

 ဆက်သွယ်ရေး ၂၁၂ တပ်ရှေ့တွင် ဖြတ်သန်းသွားသည့် ပြည်သူများ ကို စစ်ကောင်စီ အုပ်စုက စစ်ဆေးမှု ပြုလုပ်ပြီး၊ ပြည်သူများပါလာသည့် ဖုန်းများကိုလည်း စစ်ဆေးကာ ဖမ်းဆီးမှု ပြုလုပ်နေကြောင်း သိရသည်။


SHAN News (Burmese Version) 

https://www.facebook.com/shannewsburmese

မင်းတပ် ကန်ပက်လက်နားတွင် စစ်ကောင်စီမှ ထိုးစစ်ဆင်လာ၍ တိုက်ပွဲများ ဖြစ်ပွားခဲ့ဟုသိရ


ချင်းပြည်နယ် မင်းတပ်မြို့နှင့် ကန်ပက်လက်နယ်စပ် ခွဲလုံတွင် မေလ ၃၀ ရက်နေ့ ယမန်နေ့တွင် စစ်ကောင်စီတပ်ဖွဲ့မှထိုးစစ်ဆင် တိုက်ပွဲဖြစ်ပွားခဲ့ပြီး Mindat - CDF တပ်ဖွဲ့များ စစ်ကူပို့ခဲ့ရကြောင်း မင်းတပ်ပြည်သူ့ အုပ်ချုပ်ရေး သတင်းအဖွဲ့ ထုတ်ပြန်ချက်အရသိရသည်။

ယမန်နေ့ (30.5.21) နေ့က စစ်​ကောင်စီတပ်များ မင်းတပ်-ကန်ပက်လက်နယ်စပ် ခွဲလုံသာ၊ မကြား စသည့်ရွာများတွင် ထိုးစစ်ဆင်လာရာ ကြာလေလှိုင်း၊ မဒပ်၊ မနပ်ထိုင်း စသည့် နေရာတွင်ရှိသော Mindat-CDF တပ်ဖွဲ့ဝင်များက အဓိကသွားရောက် စစ်ကူပို့ပေးခဲ့ရပြီး တိုက်ပွဲများဖြစ်ခဲ့သည်ဟု မင်းတပ်ပြည်သူ အုပ်ချုပ်ရေး သတင်းအဖွဲ့က ထုတ်ပြန်ထားပါည်။

စစ်ကောင်စီတပ်များသည် မင်းတပ်မြို့နယ်၊ ဧစခန်းရွာကို ထိုးစစ်ဆင်လာရာတွင် ဧစခန်းရွာတွင်ရှိသော အလံဖြူထောင်ထားသည့် စစ်ရှောင်စခန်းကို  လက်နက်ကြီးများဖြင့် ပစ်ခတ်တိုက်ခိုက်သည့်အတွက် စစ်ဘေးရှောင်ပြည်သူများ နီးစပ်ရာ ရွာများသို့ မိုးထဲလေထဲတွင် ထွက်ပြေးတိမ်းရှောင်နေရသည် ဟုလည်း ထုတ်ပြန်ချက်တွင် ဖော်ပြထားသည်။


Chin World 

https://www.facebook.com/Chin-World-167011980026853

ကလေးမြို့နယ်သာစည်ရွာတွင် ကလေးပြည်သူ့ကာကွယ်ရေးတပ်နှင့် စစ်ကောင်စီတပ်ဖွဲ့ တိုက်ပွဲဖြစ်ပွားနေ


စစ်ကိုင်းတိုင်း ကလေးမြို့နယ် သာစည်ကျေးရွာတွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့ kalay-PDF တပ်ဖွဲ့များကြား တိုက်ပွဲ ဖြစ်ပွားလျက်ရှိကြောင်းသိရပါသည်။

ဒေသခံတစ်ဦးက `မနက် ၈ ခွဲလောက်ကစပြီး ရွာထဲမှာ ပစ်ခတ်တာတွေ စဖြစ်တယ် အခုထိဘဲ ပစ်ကြတယ် စစ်ကောင်စီဖက်က လက်နတ်ကြီးတွေ အသုံးပြုပြီး ပစ်ခတ်တာတွေရှိတယ် ရွာက လူတွေလည်း ထွက်ပြေးတိန်းရှောင်ကြတယ် ထိခိုက်ဒဏ်ရာရရှိသူ ဘယ်နှဦးရှိတယ်လို့တော့ မသိရသေးဘူး"ဟုပြောသည်။

တိုက်ပွဲဖြစ်ပွားလျက်ရှိသည့် သာစည်ကျေးရွာနေ ပြည်သူအချို့ ထွတ်ပြေးတိမ်းရှောင်နေရကြောင်းလည်း ဒေသခံများထံမှ သိရသည်။

လက်ရှိသာစည်ကျေးရွာတွင် စစ်ကောင်စီတပ်ဖွဲ့ဝင် အင်အား ၆၀ ကျော်ခန့် နေရာယူထားပြီး တိုက်ပွဲများပိုမိုပြင်းထန်လာနိုင်ကြောင်း သိရှိရပါသည်။

ကလေးမြို့ပြည်သူ့ကာကွယ်ရေးတပ်ဖွဲ့ Kalay - PDF နှင့် စစ်ကောင်စီတပ်ဖွဲ့ အကြား တိုက်ပွဲအပြင်းထန် ဖြစ်ပွားလျက်ရှိပြီး စစ်ကောင်စီတပ်ဖွဲ့မှ ထိခိုက်သေဆုံးမှုများ ရှိကြောင်းလည်း သိရှိရပါသည်။

တော်လှန်ရေးစတင်ခဲ့သည့် ကလေးမြို့တွင် စစ်ကောင်စီတပ်ဖွဲ့ လက်ချက်ဖြင့် သေဆုံးရသူ ၃၀ ကျော်သေဆုံးခဲ့ရပြီး ဖမ်းဆီးခံရသူ ၁၀၀ နီးပါးရှိခဲ့ကြောင်း သိရသည်။


Chin World 

https://www.facebook.com/Chin-World-167011980026853

စစ်ကောင်စီတပ်ဖွဲ့ဝင်များအတွက် ထိုင်းစစ်တပ်က ရိက္ခာကူညီပို့ဆောင်ပေးဟု KNU ထုတ်ပြန်


မေလ ၃၁ ရက်၊ ၂၀၂၁ ခုနှစ်။ ကေအိုင်စီ

KNU -ကရင်အမျိုးသားအစည်းအရုံး တပ်မဟာ (၅) နယ်မြေအတွင်း ရိက္ခာဖြတ်တောက်ခံထားရသည့် စစ်ကောင်စီ တပ်ဖွဲ့ဝင်များအတွက် ထိုင်းစစ်တပ်မှ ရိက္ခာကူညီပို့ဆောင်ပေးမှု ပြုလုပ်ပေးခဲ့သည်ဟု KNU ၏ ပြန်ကြားရေး သူးလေသတင်းစဉ်၌ ယမန်နေ့ မေလ ၃၀ရက်နေ့ ညတွင် ဖော်ပြထားသည်။

ယခုလ ၂၄ ရက်မှ ၂၈ ရက်နေ့အထိ ထိုင်းစစ်တပ်မှ ၎င်းတို့ နယ်ခြားစစ်သုံး စက်လှေ ၄ စီး နှင့် အရပ်သား သုံး Honda စက်တပ်ရေယာဉ် ၁ စီးကိုအသုံးပြု၍ စစ်ကောင်စီ၏ ရီးကြာထာစခန်းမှ မူတြော်(ဖာပွန်)ခရိုင်၊ လူသောမြို့နယ်၊ ကော်လူဒဲ ကျေးရွာအုပ်စုရှိ လယ်စေး(စောထော)အထိ စစ်ကောင်စီ စခန်းများသို့ ရိက္ခာ ကူညီပို့ဆောင်ခဲ့သည်ဟု KNU က ဆိုသည်။

KNU တပ်မဟာ(၅) ပြောခွင့်ရ ဒုဗိုလ်မှူးကြီး စောကလယ်ဒို့က “အောက်က ပို့လာတဲ့ သတင်းအရ စစ်ကောင် စီတပ်က ပို့လာတဲ့ ရိက္ခာတွေကို ထိုင်းနယ်ခြားတပ်က ကူပို့ပေးတယ်လို့ပြောတယ်။ စစ်လှေအမဲ ၄စီးနဲ့က ၉ ခေါက်လောက်ပို့ပြီးတော့ Honda စက်တပ်လှေ တစ်စီးနဲ့ကျတော့ ၈ ခေါက်လောက်ပို့ပေးတယ်။ ရီးကြာထာမှာ တစ်နေရာနဲ့ လယ်စေးမှာရှိတဲ့ စစ်ကောင်စီစခန်းမှာတစ်နေရာပို့ ပေးတယ်။ သူတို့ရဲ့ နှစ်နိုင်ငံ ဆက်ဆံရေးအရ ပို့ပေးတဲ့ သဘောလား ဘာလားတော့ မသိဘူး။” ဟု ကေအိုင်စီ သို့ အတည်ပြုပြောဆိုသည်။

ထို့အပြင် လက်ရှိ စစ်ကောင်စီ တပ်များကို ရိက္ခာဖြတ်တောက်ထားခြင်းမှာလည်း ဒေသခံ ပြည်သူလူထုများ အပေါ် စစ်ကောင်စီတပ်၏ ဖိနှိပ်အနိုင်ကျင့်မှုကို ဟန့်တားရန်အတွက်ဖြစ်ကာ ထိုင်းစစ်တပ်အနေဖြင့်လည်း အရပ်သား ပြည်သူလူထုများ၏ ထိခိုက်နစ်နာမှုများအပေါ် စာနာ ထောက်ထားရန် လိုအပ်ပြီး စစ်ကောင်စီတပ် ဖွဲ့ဝင်များ၏ အကြမ်းဖက်လုပ်ရပ်များအပေါ် အားပေးအားမြောက်မှုများ မပြုလုပ်သင့်ကြောင်းလည်း ဒုဗိုလ်မှူးကြီး စောကလယ်ဒို့က ဆက်ပြောသည်။

ထိုင်းစစ်တပ်မှ ၅ ရက်တာအတွင်း အဆိုပါ စစ်သုံး စက်လေ ၄ စီးဖြင့် ၉ ခေါက် နှင့် စက်တပ်ရေယာဉ် ၁ စီးဖြင့် ၈ ခေါက် စုစုပေါင်း ၁၇ ခေါက် ပို့ဆောင်ပေးခဲ့သော်လည်း လတ်တလော စစ်ဘေးရှောင်နေရသည့် ဒေသခံ အရပ် သားပြည်သူများအတွက် လူသားချင်းစာနာထောက်ထားမှု အကူအညီများကိုမူ ဒေသတွင်း ထိုင်းအာဏာပိုင်များက ကန့်သတ် ပိတ်ပင်မှုများပြုခဲ့သေးသည်။

အလားတူ စစ်ကောင်စီတပ်မှ ပြီးခဲ့သည့် မတ်လအတွင်း လေယာဉ်ဖြင့် ဗုံးကြဲတိုက်ခိုက်မှုများကြောင့် ထိုင်းနိုင် ငံ ဘက်ခြမ်းသို့ ထွက်ပြေးတိမ်းရှောင်လာသည့် ကရင်စစ်ဘေးရှောင်များကို ထိုင်းလုံခြုံရေး တပ်ဖွဲ့ဝင်များမှ ပြန်လည် မောင်းထုတ်ခဲ့ခြင်းမျိုးလည်း ပြုလုပ်ခဲ့သေးပြီး လိုအပ်သည့် လူသားချင်းစာနာမှု အကူအညီများလည်း ပေးအပ်ခဲ့ခြင်းမျိုးမပြုခဲ့ကြောင်း စစ်ဘေးရှောင်များကို ကူညီစောင့်ရှောက်မှုပေးနေသည့် အရပ်ဖက် အဖွဲ့အစည်း များက ဆိုခဲ့ဖူးသည်။

ပြီးခဲ့သည့် မေလ ၂၉ ရက်နေ့တွင်လည်း အကြမ်းဖက်စစ်ကောင်စီတပ်ဖွဲ့ဝင်များမှ ခေးပူဒေသဘက်သို့ ရိက္ခာတင်ပို့ မှုများပြုလုပ်ရာတွင် တမေထာဒေသ အထိရောက်ရှိလာသောကြောင့် နံနက် ၈နာရီ မိနစ်၄၀ခန့် အချိန်တွင် ကရင်အမျိုးသားလွတ်မြောက်ရေးတပ်မတော်-KNLA တပ်ရင်း (၁ )နှင့် ထိတွေ့ ပစ်ခတ်မှု ဖြစ်ပွားခဲ့သည်ဟု ကေအဲန်ယူရဲ့ ထုတ်ပြန်ချက်အရ သိရသည်။

တစ်ချိန်တည်းတွင်ပင် ကြော့ခယ်ကြိုး တပ်စခန်းမှ အကြမ်းဖက်စစ်ကောင်စီတပ်သည် ကြော့ခယ်ကြိုးကျေး ရွာအတွင်းသို့ လက်နက်ကြီး ၂ လုံးနှင့် မောကို ၊ ကော်ထယ်ဒဲ ကျေးရွာဘက်သို့ လက်နက်ကြီး ၂ လုံး ပစ်ချခဲ့ သေးကြောင်း KNU၏ သူးလေသတင်းစဉ်က ထုတ်ပြန်ထားသည်။


Karen Information Center -KIC 

https://www.facebook.com/KICNewsPage

မြ၀တီခရိုင် ဝေါလေမြိုင်မြို့ နယ်မြေရဲစခန်းမှူးအပါအဝင် ရဲ (၃) ဦးနှင့် မီးသတ်(၁) ဦးကို ခွဲထွက် DKBA အဖွဲ့မှ ဖမ်းဆီးထား




မေလ  ၃၁ရက်၊ ၂၀၂၁ခုနှစ်။ ကေအိုင်စီ

ကရင်ပြည်နယ် မြဝတီမြို့ တောင်ဘက်ခြမ်း မြဝတီခရိုင် ဝေါလေမြိုင်မြို့ရှိ နယ်မြေရဲစခန်းမှူးအပါအဝင် ရဲတပ်ဖွဲ့ဝင် ၃ ဦးနှင့် မီးသတ်တပ်ဖွဲ့ဝင် (၁) ဦးတို့အား ခွဲထွက် DKBA အဖွဲ့မှ ဖမ်းဆီး ခေါ်ဆောင်သွားကြောင်း သိရသည်။

ဝေါလေမြိုင်မြို့ ရဲစခန်းမှူးအပါအဝင် ရဲတပ်ဖွဲ့၀င် (၃) ဦး နှင့် မီးသတ်တပ်ဖွဲ့၀င် (၁) ဦးတို့သည် ယနေ့ မေလ ၃၁ ရက် နေ့လည်ပိုင်းက ဝေါလေမြို့မှ  မြဝတီမြို့သို့သွားရာ လမ်းရှိ  သုံးထပ်ကွေ့အနီးတွင် ခွဲထွက် DKBA အဖွဲ့မှ ဖမ်းဆီးခေါ်ဆောင် သွားခြင်းဖြစ်ကြောင်း နယ်မြေသတင်း နှံ့စပ်သည့် ဒေသခံတစ်ဦးက ပြောသည်။

အဆိုပါ ရဲတပ်ဖွဲ့ဝင် ၃ ဦးနှင့် မီးသတ်တပ်ဖွဲ့ဝင်တစ်ဦး ဖမ်းဆီးခံရခြင်းနှင့်ပတ်သက်၍ စစ်ကောင်စီတပ်မှအင်အားဖြန့်ကျက်၍ အပူတပြင်းစုံစမ်း ရှာဖွေလျက် ရှိနေသည်။ 

သို့ဖြစ်၍ ၎င်းဖြစ်စဉ်နေရာအနီးရှိ ကျေးရွာများဖြစ်သော ကျောက်ခတ်၊ ဖလူး နှင့် အင်ကြင်းမြိုင် စသည့်ကျေးရွာများမှ ပြည်သူများမှာ တိုက်ပွဲဖြစ်ပွားမည်ကို စိုးရိမ်၍ ကြိုတင်ရှောင်ရှားမှုများ ရှိနေသည် ဟု ယင်းဒေသခံပြည်သူတစ်ဦးက ဖြည့်စွက်ပြောသည်။

ဗိုလ်ချုပ်ကျော်သက် ဦးဆောင်သော ခွဲထွက် DKBA အဖွဲ့သည် ပြီးခဲ့သည့် ၂၀၁၅ ခုနှစ် နှောင်းပိုင်းမှစ၍ မိခင် ဒီမိုကရေစီအကျိုးပြုကရင့်တပ်မတော် (DKBA) အဖွဲ့မှခွဲထွက်ကာ   မြဝတီ-ကော့ကရိတ် အာရှလမ်း တိုက်ပွဲအပါအဝင် စစ်ကောင်စီတပ်နှင့် တိုက်ပွဲပေါင်းများစွာ ဖြစ်ပွားခဲ့သော ကရင့်လက်နက်ကိုင်တပ်ဖွဲ့တစ်ခုအဖြစ် သီးသန့်ရပ်တည်လျက်ရှိကြောင်း သိရသည်။


Karen Information Center -KIC 

https://www.facebook.com/KICNewsPage

မနကျေးရွာ အုပ်ချုပ်ရေးမှူး ဦးတင်စိုး သေနတ်ဖြင့် ပစ်သတ်ခံရ။


ဖားကန့်မြို့၊ ရှရော်ခကျေးရွာနှင့်တစ်ဆက်တည်းရှိသော မနကျေးရွာ လက်ရှိအုပ်ချုပ်ရေးမှူး ဦးတင်စိုး(အိုက်ပီး) သေနတ်ဖြင့် ပစ်သတ်ခံရကြောင်းသိရသည်။

မေလ ၃၁ရက်နေ့ ယနေ့ နေ့လည် ၁နာရီဝန်းကျင်ခန့်တွင် သေနတ်ဖြင့် ၇ကြိမ်ထက်မနည်း ပစ်သတ်ခံခဲ့ရကြောင်းဒေသခံတစ်ဦး ပြောဆိုချက်မှသိရသည်။

ဦးတင်စိုး ပစ်ခတ်ခံရသည့် ကစ္စနှင့် ပစ်သက်ပြီး အသေးစိတ်မသိရသေးသလို ဆက်လက်စုံစမ်းနေဆဲဖြစ်သည်။a


Kachin News Group 

https://www.facebook.com/theKachinNews

ဟိုကပ်အုပ်ချုပ်ရေးမှူးနှင့် ဇနီးအပါအဝင် သာပဒေါင်း အုပ်ချုပ်ရေးမှူးဟောင်း စုစုပေါင်း ၃ ဦး ပစ်သတ်ခံရ


May 31, 2021/ Kachin News Group

မြစ်ကြီးနားမြို့နယ် ဟိုကပ်ကျေးရွာ လက်ရှိအုပ်ချူပ်ရေးမှူး ဇနီးမောင်နှံ ၂ ဦးနှင့် သာပဒေါင်း အုပ်ချူပ်ရေးမှူးဟောင်း ၁ ဦး စုစုပေါင်း ၃ ဦး ယမန်နေ့ညက ပစ်သတ်ခံခဲ့ရကြောင်း ဒေသခံများထံမှ သိရသည်။

ဟိုကပ်ကျေးရွာ အုပ်ချူပ်ရေးမှူးဖြစ်သူ ဦးဂျော်လီဆွေနှင့် ဇနီးဖြစ်သူ တို့ နှစ်ဦးကို မေလ ၃၀ ရက်ည ၁၀ နာရီခန့် နေအိမ်တွင် လာရောက်ပစ်သတ်ခဲ့ခြင်းဖြစ်ပြီး ၎င်းတို့နှင့်အတူရှိနေသော အခြားတစ်ဦးတွင်လည်း ဒဏ်ရာ ရရှိခဲ့ကြောင်း သိရသည်။

ထိုနေ့ညမှာပင် ဟိုကပ်ကျေးရွာအုပ်စု သာပဒေါင်း အုပ်ချုပ်ရေးမှူးဟောင်းတစ်ဦးလည်း ပစ်သတ်ခံခဲ့ရကြောင်း သိရသည်။

၎င်းတို့ကို ပစ်သတ်သွားသူမှာ မည်သူမည်ဝါဖြစ်ကြောင်းကို မသိရှိသေးပါ။


Kachin News Group 

https://www.facebook.com/theKachinNews

မင်းတပ်မှာကိုယ့်အိမ်ကိုယ်ပြန်နေရင်စာရင်းပေးရမယ်လို့ဆို

တိုက်ပွဲတွေဖြစ်အပြီး မြို့ခံတွေ နီးစပ်ရာရွာတွေကို ပြေးခဲ့ကြလို့ ပိတ်ထားခဲ့ရတဲ့ မင်းတပ်မြို့မဈေး

ရှင်းလင်းနေတဲ့ မင်းတပ်မြို့ရဲ့ ပြီးခဲ့တဲ့ရက်ပိုင်းအခြေအနေ

ဒေသခံ ပြည်သူ့ကာကွယ်ရေးတပ်(PDF)နဲ့စစ်ကောင်စီတပ်တွေကြား တိုက်ပွဲတွေ ဖြစ်ခဲ့တဲ့ ချင်းပြည်နယ်တောင်ပိုင်းက မင်းတပ်မြို့မှာ စစ်ရှောင်စခန်းတွေဖွင့်ထားပြီး စစ်ရှောင်စခန်းတွေမှာ ဝင်ရောက်နေထိုင်နိုင်ကြောင်းနဲ့ မိမိအိမ်ပြန်ပြီးနေထိုင်မယ့်သူတွေ စာရင်းပေးရမယ်လို့ စစ်တပ်က မေလ ၂၉ ရက်နေ့က စပြီး အသိပေးထားတယ်လို့ မင်းတပ်ဒေသခံတစ်ဦးကပြောပါတယ်။

မြို့ပေါ်ရပ်ကွက်တွေမှာ စစ်ဘေးရှောင်စခန်း ၈ ခုခန့် ဖွင့်ထားပြီးတော့ စစ်ဘေးရှောင်သူတွေဟာစခန်းတွေမှာ စာရင်းပေးပြီးနေကြဖို့ စစ်တပ်ကထုတ်ပြန်ထားပါတယ်။

မင်းတပ်မှာတော့ တိုက်ပွဲဖြစ်ပြီးနောက်ပိုင်း ရွာတွေဘက်ကို စစ်ဘေးရှောင်နေသူတွေများပြီး မြို့ထဲမှာလည်းအသွားအလာမရှိသလောက်ဖြစ်နေပါတယ်။

ဒါ့ပြင် မင်းတပ်နဲ့ကန်ပလက်ကြားမှာလည်း ပြီးခဲ့တဲ့ရက်ပိုင်းက တိုက်ပွဲတွေရှိခဲ့ပါတယ်။

မင်းတပ်မြို့ဟာ လူဦးရေ ၅ သောင်းနီးပါးရှိပြီးတော့ တိုက်ပွဲတွေဖြစ်ပွါးပြီးမှာ မြို့ထဲကနေ လူအများအပြားထွက်ခွါသွားခဲ့ကြပါတယ်။


BBC Burmese

https://www.bbc.com/burmese/live/burma-57242648

ရွှေပြည်သာ ၆ ရပ်ကွက် အုပ်ချုပ်ရေးမှူးရုံးရှေ့ဗုံးပေါက်၊ နှစ်ဦးဒဏ်ရာရ

ရန်ကုန်တိုင်း ရွှေပြည်သာမြို့နယ်၊ အမှတ် ၆ ရပ်ကွက် အုပ်ချုပ်ရေးမှူးရုံးရှေ့မှာ ဒီကနေ့ နေ့လယ် ၁၂ နာရီ​ကျော်က ဗုံးပေါက်ခဲ့ပြီး အနီးရှိအမှိုက်ကောက်နေသူ သားအဖနှစ်ဦးဒဏ်ရာရသွားတယ်လို့ ရွှေပြည်သာဒေသခံတစ်ဦးက ဘီဘီစီကို ပြောပါတယ်။

ဒဏ်ရာရရှိသူ နှစ်ဦးကို လူနာတင်ယာဥ်​နဲ့ တင်ပြီးခေါ်သွားတာတွေ့ရကြောင်းလည်း သူ က ပြောပါတယ်။

ဒီကနေ့ မေလ ၃၀ ရက်နေ့ နံနက် ၆ နာရီခန့်ကလည်း အဆိုပါအုပ်ချုပ်ရေးမှူးရုံးအနီး မဲခေါင်လမ်း၊ ပညာရေးမှုးရုံးမှာလည်း ပေါက်ကွဲမှု ဖြစ်ပွားခဲ့ပါတယ်။

ရွှေပြည်သာမြို့နယ်ဟာ စစ်အုပ်ချုပ်‌ရေး ထုတ်ပြန်ကြေညာထားတဲ့ မြို့နယ်ဖြစ်ပြီး ဆိုင်ကယ် စီးနင်းသွားလာတာတွေကို လည်း ကန့်သတ်ထားခဲ့ပါတယ်။


BBC Burmese

https://www.bbc.com/burmese/live/burma-57242648

ကန်ပက်လက်တိုက်ပွဲမှာ စစ်ကောင်စီ ခြောက်ယောက်သေဆုံး

ကန်ပက်လက်တိုက်ပွဲမှာ စစ်ကောင်စီ ခြောက်ယောက်သေဆုံး ၂၀၂၁၊ ဖေဖော်ဝါရီ ၂၈ ရက်နေ့က ရန်ကုန်မြို့၊ ဗားဂရာလမ်းမှာ စစ်ကောင်စီတပ်ဖွဲ့ဝင်တွေကို တွေ့ရစဉ် / Photo: RFA

ချင်းပြည်နယ်၊ ကန်ပက်လက်မြို့၊ မကြားရွာနားမှာ စစ်ကောင်စီတပ်တွေနဲ့ ချင်းပြည်သူ့ကာကွယ်ရေးတပ် (CDF) တို့ရဲ့တိုက်ပွဲမှာ စစ်ကောင်စီဘက်က ခြောက်ယောက် သေဆုံးပြီး ဒဏ်ရာရတာတွေရှိတယ်လို့ အဲဒီတိုက်ပွဲမှာ ပါဝင်တိုက်ခိုက်နေတဲ့ CDF တပ်ဖွဲ့ဝင်တစ်ယောက်က ပြောပါတယ်။

အဲဒီနေရာမှာ မေလ ၂၈ ရက်နေ့ကတည်းက တိုက်ပွဲဖြစ်နေတာဖြစ်ပြီး ဒီနေ့မနက်မှာလည်း ပစ်ခတ်တာတွေ ရှိနေသလို CDF ဘက်က ထိခိုက်ကျဆုံးတာ ရှိ၊ မရှိကို မသိရသေးပါဘူး။

စစ်ကောင်စီဘက်က လက်နက်ကြီးတွေနဲ့ ပစ်ခတ်နေတဲ့အပြင် ကန်ပက်လက်၊ မကွေးတိုင်း ကျောက်ထု၊ ဂန့်ဂေါမြို့တွေကနေ စစ်ကောင်စီတပ်ကူတွေလည်း ရောက်နိုင်တဲ့အတွက် အတတ်နိုင်ဆုံး ခုခံသွားကြမယ်လို့ CDF တပ်ဖွဲ့ဝင်တစ်ယောက်က ပြောပါတယ်။

စစ်ကောင်စီဘက်က အဲဒီတပ်ကူတွေရောက်လာရင် အင်အားမမျှဖြစ်နိုင်တဲ့အတွက် တခြားမြို့တွေက ဒေသကာကွယ်ရေးတပ်အင်အား အကူအညီတွေလိုတယ်လို့လည်း ပြောပါတယ်။

စစ်ကောင်စီတပ်တွေဟာ မနေ့က မင်းတပ်မြို့ကနေ ကန်ပက်လက်မြို့ထဲကို ဝင်လာတာကြောင့် မင်းတပ်နဲ့ ကန်ပက်လက်အစပ် မကြားကျေးရွာအနားမှာ ဒေသကာကွယ်ရေးတပ်တွေက အဝင်မခံဘဲ ပြန်ခုခံနေတာ ဖြစ်ပါတယ်။


RFA Burmese

https://www.rfa.org/burmese/news/six-military-soldiers-death-kanpetlet-battle-05302021025348.html

မြန်မာနိုင်ငံတွင်း ကိုဗစ်ကူးစက်မှု စိုးရိမ်ဖွယ်တိုးလာ

ရန်ကုန်မြို့ ဧရာဝတီ ကိုဗစ်စင်တာမှာ ကိုဗစ်ကာကွယ်ဆေးထိုးဖို့ ပြင်ဆင်နေတဲ့ ကျန်းမာရေးဝန်ထမ်းများ။ (ဇန်နဝါရီ ၂၇၊ ၂၀၂၁)

မြန်မာနိုင်ငံမှာ လွန်ခဲ့တဲ့ ရက်အနည်းငယ်အတွင်း COVID-19 ရောဂါ ကူးစက်သူ အရေအတွက် သိသိသာသာ ထပ်တိုးလာနေတဲ့အတွက် ပြည်သူတွေအပါအဝင် ကျန်းမာရေးဝန်ထမ်းတွေအကြား စိုးရိမ်မှုတွေ ကြီးထွားလာနေပါတယ်။

ကျန်းမာရေးဌာနက မေလ ၂၉ ရက်နေ့မှာ နောက်ဆုံးထုတ်ပြန်တဲ့ စာရင်းတွေအရ မေလ ၂၈ ရက်နဲ့ ၂၉ ရက်အတွင်း ဓာတ်ခွဲနမူနာပေါင်း ၁,၀၃၄ ခုကို စမ်းသပ်ခဲ့တာမှာ COVID-19 အတည်ပြုလူနာ ၄၀ ဦး ထပ်မံတွေ့ရှိခဲ့ကြောင်း ဖော်ပြထားပါတယ်။

မြန်မာနိုင်ငံမှာ ပြီးခဲ့တဲ့သီတင်းပတ် မတိုင်ခင်အထိ ကိုဗစ်ကူးစက်မှုနှုန်း ခန့်မှန်းခြေအားဖြင့် ၃ ရာခိုင်နှုန်းလောက် ရှိနေခဲ့ရာက ပြီးခဲ့တဲ့ သီတင်းပတ်ထဲမှာ ၂ ဆတိုးပြီး ၆ ရာခိုင်နှုန်းအထိ ရှိလာနေတာပါ။ လက်ရှိ ကူးစက်နေတဲ့ COVID-19 အမျိုးအစားဟာ အိန္ဒိယကလာတဲ့ ကူးစက်မြန် ရောဂါပိုးတမျိုး ဖြစ်တယ်လို့ ကျန်းမာရေးဝန်ကြီးဌာန သတင်းပြန်ကြားရေးအဖွဲ့ဝင် ဒေါက်တာခင်ခင်ကြီးက ဗွီအိုအေကို ပြောထားပါတယ်။

ချင်းပြည်နယ်၊ တွန်းဇံခရိုင်အတွင်းက ကျီခါးမြို့မှာဆိုရင်လည်း COVID-19 ကူးစက်ခံထားရသူတွေ အသက်ဆက်ရှင်နိုင်ရေးအတွက် အောက်ဆီဂျင် လုံလောက်မှုမရှိတဲ့ ပြဿနာနဲ့ ရင်ဆိုင်နေရတဲ့ဖြစ်ရပ်က မြန်မာနိုင်ငံမှာ စစ်တပ်က ဖေဖော်ဝါရီလ ၁ ရက်နေ့မှာ အာဏာသိမ်းလိုက်ပြီးတဲ့နောက်ပိုင်း ကျန်းမာရေးစနစ် ယိုယွင်း ပျက်စီးလာနေတာကို မီးမောင်းထိုးပြရာရောက်ကြောင်း ရိုက်တာသတင်းမှာ ဖော်ပြထားပါတယ်။

ကျီခါးဆေးရုံမှာရောက်နေတဲ့ COVID-19 လူနာတွေကို နေ့ရောညပါ ကုသပေးဖို့အတွက် နာ့စ်မတဦး၊ ဓာတ်ခွဲခန်းဝန်ထမ်းတဦးနဲ့ ဆေးအရောင်းဝန်ထမ်း တဦးတို့သာ ရှိတယ်လို့ ဆိုပါတယ်။ သူတို့အနေနဲ့ လူနာတွေကို ကုသဖို့အတွက် ပါရာစီတမော အကိုက်အခဲပျောက်ဆေးတမျိုးသာ ရှိတာကြောင့် များသောအားဖြင့် လူနာတွေကို အားပေးစကားပြောတာလောက်သာ လုပ်နိုင်တယ်လို့ ဆိုပါတယ်။

အခုနောက်ပိုင်း ကူးစက်မှုတွေ အဖြစ်များလာနေတဲ့ အိန္ဒိယနယ်စပ် ချင်းပြည်နယ်က တွန်းဇံနဲ့ စစ်ကိုင်းတိုင်းက တမူးမြို့တွေမှာ Stay at Home အိမ်ထဲမှာနေကြဖို့ အသွားအလာ ကန့်သတ်ထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-covid-19/5909791.html

ကယားပြည်နယ်တွင်း ပစ်ခတ်ဖမ်းဆီးမှုတွေ ဆက်ဖြစ်နေ


စစ်ကောင်စီတပ်နဲ့ ကရင်နီ ပြည်သူ့ကာကွယ်ရေးတပ်တို့အကြား စစ်ရေးတင်းမာနေတဲ့ ကယားပြည်နယ်မှာ ဒီကနေ့မှာလည်း ဒီးမော့ဆိုမြို့မှာ ပစ်ခတ်မှု ရှိနေတယ်လို့ ဒေသခံတွေကပြောသလို ကရင်နီ ပြည်သူ့ကာကွယ်ရေးတပ် ရှိတယ်လို့ ထင်တဲ့နေရာကို စစ်တပ်ဘက်က ရမ်းပစ်တာလို့ PDF ပြန်ကြားရေးဘက်က ပြောပါတယ်။ ဒါ့အပြင် ဘော်လခဲမြို့မှာလည်း စစ်အာဏာရှင်ကို ဆန့်ကျင်တဲ့ လူငယ်နှစ်ဦးလည်း ဒီကနေ့မှာ ဖမ်းဆီးခံရပါတယ်။ ကယားပြည်နယ်ဘက်က ပစ်ခတ်ဖမ်းဆီးမှု အခြေအနေကို နိုင်ကွန်းအိန် တင်ပြပေးထားပါတယ်။

ကယားပြည်နယ် ဒီးမော့ဆိုမြို့မှာ ဒီနေ့မှာလည်း စစ်ကောင်စီတပ်နဲ့ ကရင်နီ ပြည်သူ့ကာကွယ်ရေးတပ်တို့အကြား တိုက်ပွဲဖြစ်ပွားနေတယ်လို့ ဒေသခံတဦးက ပြောပါတယ်။

“ဒီနေ့ကတော့ ပစ်ခတ်မှုတွေ ရှိနေသေးတယ်ပေါ့နော်။ ၁၁ နာရီ ၄၀ မှာ ပစ်ခတ်မှုတွေ ရှိနေသေးတယ်ပေါ့နော်။ နေ့တိုင်း မနေ့ညကလည်း ပစ်ခတ်တာတွေ ရှိသေးတယ်။”

ကရင်နီ ပြည်သူ့ကာကွယ်ရေးအဖွဲ့ ပြန်ကြားရေး တာဝန်ရှိသူ တဦးကတော့ ဒီကနေ့ ဒီးမော့ဆို ပစ်ခတ်မှုမှာ စစ်ကောင်စီတပ်ဖွဲ့တွေကနေ KPDF အဖွဲ့တွေ ရှိနိုင်တဲ့နေရာကို လာရောက်ပစ်ခတ်တာလို့ ပြောပါတယ်။

“အပြန်အလှန် ပစ်ခတ်မှုတော့ မဖြစ်ပွားဘူးခင်ဗျ။ ဒီနေ့တော့ ငွေတောင်ဆည်ကနေ တောင်ငူခွဲသွားတဲ့ လမ်းပေါ့နော်။ အဲဒီလမ်းကနေပြီးတော့ စစ်အင်အား အနည်းငယ်လောက်နဲ့ လမ်းပေါ်ကနေပြီးတော့ ဒီလိုပဲ ရမ်းသန်းပစ်ပြီးတော့ ပြန်သွားတာ။ အင်အားလာစမ်းတဲ့ သဘောမျိုး ဖြစ်မယ်ဗျ။”

ကယားပြည်နယ် လွိုင်ကော်၊ ဒီးမော့ဆိုနဲ့ ရှမ်းပြည်နယ်နဲ့ ကယားပြည်နယ်အစပ် မိုးဗြဲမြို့မှာ စစ်ကောင်စီတပ်နဲ့ ကရင်နီ ပြည်သူ့ကာကွယ်ရေးတပ်တို့အကြား ပစ်ခတ်တိုက်ခိုက်မှုတွေ ရှိခဲ့သလို စစ်ကောင်စီတပ်ဘက်ကလည်း စစ်အင်အား တိုးချဲ့မှုတွေ လုပ်ဆောင်လာပါတယ်။

ဒါပေမယ့် ကရင်နီ ပြည်သူ့ကာကွယ်ရေးတပ်ဖွဲ့ အနေနဲ့ ဆက်လက် တိုက်ပွဲဝင်သွားမယ်လို့ ပြန်ကြားရေးတာဝန်ခံက ဆက်ပြောပါတယ်။

“သူတို့ဘက်က အင်အားတွေမြှင့်တယ် ဆိုတာတော့ PDF အဖွဲ့အစည်းတွေက ရှိနေတယ်။ သူ့မြို့နယ်အလိုက် ကရင်နီပြည်နယ် တခုလုံးပေါ့နော်။ ကျနော်တို့အောက်မှာ ဝင်လာတဲ့ PDF အဖွဲ့အစည်းတွေ ရှိသေးတယ်။ ပြီးလို့ရှိရင် ရွာသားတွေ အားလုံးကလည်း အနည်းဆုံးတော့ လက်လုပ်သေနတ်လေးတွေ ရှိနေကြလို့ လူတိုင်းကလည်း ကာကွယ်ရေးတပ်ဖွဲ့ဝင်တွေ ဖြစ်လာနိိုင်တယ်ပေါ့။ ပြီးတော့ တိုင်းရင်းသား လက်နက်ကိုင်တွေကလည်း များတော့ အဲဒီဘက်ကို သူတို့ဘက်က သတိကြီးကြီး ထားပြီးတော့ ကြိုတင်ပြင်ဆင်ထားတဲ့ ပုံပါပဲဗျ။ ရှေ့ဆက် ဘာဖြစ်မယ်ဆိုတာ မသိဘူးလေနော်။”

ကယားပြည်နယ်ဘက်မှာ စစ်ကောင်စီတပ်ဖွဲ့တွေကို ခုခံတော်လှန်မှုတွေ ရှိနေသလို စစ်တပ်ဘက်ကလည်း ဖမ်းဆီးမှုတွေ ဆက်လက်ရှိနေတာပါ။

ဒီနေ့မနက်မှာ ဘော်လခဲမြို့က လူငယ်နှစ်ယောက်ကို စစ်ကောင်စီတပ်ဘက်က ဖမ်းဆီးသွားတယ်လို့ မြို့ခံ အမျိုးသမီးတဦးက ပြောပါတယ်။

“ဒီမနက် ဖမ်းသွားတာ ကလေး ၂ ယောက်။ တယောက်က ရှမ်းပိုင်းဘက်က ဌေးနိုင်လွင်၊ တယောက်က တောင်ပိုင်းဘက်က မဇင်မာဌေး။ သူတို့ ဘာကြောင့်ဖမ်းတယ် ဆိုတာကတော့ ကလေးတွေက ဖုန်းနဲ့ အဆက်အသွယ် ရှိကြတယ်တဲ့။ ဘာနဲ့အဆက်အသွယ်ရှိတယ်တော့ မသိဘူး။ ဖုန်းစစ်ဆေးပြီးမှ ခေါ်သွားတယ်၊ ဖမ်းသွားတယ်၊ အဲဒီလိုတော့ ပြောတာပဲ။ စစ်တပ်က ဖမ်းသွားတာ။ သူတို့ အခုလောလောဆယ်တော့ ဗျူဟာထဲမှာပဲလို့ ပြောတယ်။”

အဖမ်းခံရသူတွေကတော့ ဘောလခဲမြို့ ရှမ်းပိုင်းရပ်ကွက်နေထိုင်သူ ဌေးနိုင်လွင် (ခ) အိုက်သား ၁၉ နှစ်နဲ့ တောင်ပိုင်းရပ်ကွက် EPC နဲ့ ထွေအုပ်ဆက်စပ်လမ်းထိပ် နေထိုင်တဲ့ မဇင်မာဌေးတို့ ဖြစ်ကြပါတယ်။

အလားတူ မေလ ၂၉ ရက်နေ့မှာ လွိုင်ကော်မြို့ရှိ နာနတ်တောရပ်ကွက်မှာ ပြည်သူတဦးကို စစ်ကောင်စီတပ်ကနေ အကြောင်းမဲ့ ပစ်ခတ်ခဲ့တာကြောင့် သေဆုံးခဲ့တယ်လို့ ဒေသခံတဦးက ပြောပါတယ်။

“လွိုင်ကော်မြို့ ဘိုးဘွားရိပ်သာမှာ ပစ်သတ်ခံရတယ် ဆိုတာကတော့ ဘိုးဘွားရိပ်သာကျောင်းထဲ သူတို့ ဝင်လာတာပေါ့။ ဝင်လာပြီးတော့ ထမင်းမချက်ပေးတဲ့ ဦးလေးကို ပစ်သတ်လိုက်တယ်။ ဘာအကြောင်းပြချက်ကို မရှိတာ။ အကြောင်းပြချက် မရှိဘဲနဲ့ကို ပစ်တာ။”

ကယားပြည်နယ်မှာ ဖြစ်ပွားလာတဲ့ စစ်အာဏာရှင်ဆန့်ကျင်ရေး ခုခံတော်လှန်မှု တိုက်ပွဲတွေကြောင့် ဒီးမော့ဆို၊ လွိုင်ကော်မြို့နယ်က စစ်ရှောင် ၇၀,၀၀၀ ခန့် စစ်ဘေးတိမ်းရှောင်နေရသလို အမိုးအကာနဲ့ ဆေးဝါးအကူအညီ လိုအပ်နေပါတယ်။

မနေ့ စနေနေ့ကစပြီး ကယားပြည်နယ် ယာဉ်အဝင်အထွက် ပိတ်ပင်လိုက်တာကြောင့် ဒေသခံတွေနဲ့ စစ်ရှောင်တွေအတွက် စားနပ်ရိက္ခာ ကျန်းမာရေးကိစ္စတွေအတွက် ပိုမိုခက်ခဲလာမယ့် အခြေအနေမှာ ရှိလာနေပါတယ်။


နိုင်ကွန်းအိန်/ VOA Burmese

https://burmese.voanews.com/a/myanmar-army-kayah-pdf-fighting/5909814.html

အထိန်းသိမ်းခံထားရတဲ့ အမေရိကန်သတင်းထောက်ကို ကောင်စစ်ဝန်အရာရှိတွေ တွေ့ခွင့်မရ

မြန်မာနိုင်ငံမှာ ဖမ်းဆီး ထိန်းသိမ်းခံထားရတဲ့ အမေရိကန်နိုင်ငံသား သတင်းထောက် ဒန်နီ ဖန်စတာ အတွက် အထူးစိုးရိမ်နေတယ်လို့ အမေရိကန်အစိုးရက ထုတ်ဖော်ပြောလိုက်ပါတယ်။

ရန်ကုန်မြို့ အခြေစိုက် Frontier Myanmar သတင်းဌာနရဲ့ သတင်းခန်း အုပ်ချုပ်မှုအယ်ဒီတာ ဒန်နီ ဖန်စတာ ကို ပြီးခဲ့တဲ့ တနင်္လာနေ့က ကွာလာလမ်ပူမြို့ကို ထွက်ခွာမယ့် လေယာဉ်ပေါ် မတက်ခင် ရန်ကုန်လေဆိပ်မှာ ဖမ်းဆီး ခေါ်ဆောင်သွားတာ ဖြစ်ပါတယ်။

Frontier Myanmar ရဲ့ ထုတ်ပြန်ချက်မှာတော့ မစ္စတာ ဒန်နီ ဖန်စတာကို အင်းစိန်ထောင်မှာ ထိန်းသိမ်းထားပြီး ဘာ့ကြောင့် အခုလို ဖမ်းဆီး ထိန်းသိမ်းခဲ့တာလဲ ဆိုတာ မသိရကြောင်း ဖော်ပြထားပါတယ်။

မစ္စတာ ဒန်နီ ဖန်စတာဟာ မိသားစုနဲ့တွေ့ဖို့ နဲ့ ကိုဗစ်ဆေး ထိုးဖို့အတွက် အမေရိကန်နိုင်ငံကို အားလပ်ရက် ခေတ္တ ပြန်ဖို့ လုပ်စဉ်မှာ အခုလို ဖမ်းဆီး ထိန်းသိမ်းခံခဲ့ရတာလို့ သိရပါတယ်။

မစ္စတာ ဒန်နီ ဖန်စတာကို ဖမ်းဆီး ထိန်းသိမ်းခဲ့တာဟာ လွတ်လပ်စွာ ထုတ်ဖော်ပြောဆိုခွင့်ကို လွန်လွန်ကျူးကျူး တိုက်ခိုက်လိုက်တာ ဖြစ်တယ်လို့ အမေရိကန်နိုင်ငံခြားရေးဌာနက ပြောပါတယ်။

ရန်ကုန်မြို့ အမေရိကန်သံရုံးက ကောင်စစ်ဝန်အရာရှိတွေကိုလည်း မစ္စတာ ဒန်နီ ဖန်စတာနဲ့ တွေ့ခွင့် မပြုဘူးလို့ အမေရိကန်နိုင်ငံခြားရေးဌာန ပြောခွင့်ရသူတစ်ဦးက ပြောပါတယ်။

ကောင်စစ်ဝန်အချင်းချင်း ဆက်ဆံရေး ဆိုင်ရာ ဗီယန်နာ သဘောတူချက်အရ သူ့ကို အမေရိကန် ကောင်စစ်ဝန်အရာရှိနဲ့ တွေ့ခွင့်ပြုဖို့နဲ့ သူ့ကို ထိန်းသိမ်းထားစဉ်မှာ ကောင်းကောင်းမွန်မွန် ဆက်ဆံထားရှိဖို့ အာဏာသိမ်းစစ်ကောင်စီကို တိုက်တွန်းလိုက်တယ်လို့လည်း ဆိုပါတယ်။

"မစ္စတာ ဒန်နီ ဖန်စတာကို အမြန်ဆုံး ပြန်လွှတ်ပေးဖို့ မြန်မာ စစ်ကောင်စီကို အမေရိကန်အစိုးရက ဖိအားပေး တိုက်တွန်းပြောထားပြီး သူ့မိသားစုဆီ ဘေးကင်းလုံခြုံစွာ ပြန်သွားခွင့် မပြုမချင်း ဆက်လက် ဖိအားပေး ပြောသွားမှာပါ"

ဒီအတောအတွင်းမှာပဲ အမေရိကန် နိုင်ငံခြားရေးဌာန လက်ထောက်အတွင်းဝန် ဝဲန်ဒီ ရှာမန်ဟာ လာမယ့် သီတင်းပတ်ကျရင် အရှေ့တောင်အာရှဒေသဆီ သွားရောက်ဖို့ စီစဉ်ထားပြီး အဲဒီကို ရောက်ရင် မစ္စတာ ဒန်နီ ဖန်စတာ ထိန်းသိမ်းခံထားရတဲ့ ကိစ္စကိုရော၊ မြန်မာနိုင်ငံရဲ့ လက်ရှိအခြေအနေအကြောင်းကိုပါ ဆွေးနွေးပြောဆိုဖို့ ရှိတယ်လို့ သိရပါတယ်။


BBC Burmese

https://www.bbc.com/burmese/live/burma-57242648

ပုဂံမြို့သစ်က ဒေသခံတစ်ဦးနေအိမ် အတွင်းသေနတ်နဲ့ ပစ်ခံရပြီး သေဆုံး

 ပုဂံမှာ မေလ ၃ ရက်နေ့ မနက်ပိုင်းက အကြမ်းဖက်စစ်ကောင်စီ ကျဆုံးရေး ဒေသခံပြည်သူ ၁၀၀ ကျော် စုပေါင်းပြီး ဆန္ဒပြ

မေလ ၃၀ ရက့် မနက်ပိုင်းက ပုဂံမြို့သစ်က ဒေသခံတစ်ဦးကို စစ်ကောင်စီတပ်တွေဝင်ရောက် ဖမ်းဆီးရာမှာ ဒေသခံ ကိုမိုးမြင့်အောင် သေနတ်ပစ်ခံရပြီး သေဆုံးခဲ့ပါတယ်။

ကိုမိုးမြင့်အောင်ဟာ သတင်းမှားပေးခံရတာဖြစ်ပြီး ကိုယ်ဝန် ၃ လနဲ့ ဇနီးသည်ကျန်ခဲ့တဲ့အကြောင်း မိသားစုဝင်တစ်ဦးက ဘီဘီစီကို ပြောပါတယ်။

သတင်းရလို့ သူတို့လာရှာတော့ အိမ်ခန်းတံခါးပိတ်လိုက်တာကို တံခါးဖွင့်ပြီးပစ်လိုက်တာဖြစ်ပြီးတော့ ပစ်ပီးကားပေါ်ကို တင်သွားကြောင်းနဲ့ လူငယ် လေးဦးဖမ်းဆီးထိန်းသိမ်းခံရကြောင်းလည်း ဒေသခံတွေက ပြောပါတယ်။


BBC Burmese

https://www.bbc.com/burmese/live/burma-57242648

စစ်တပ်စခန်းတွေနဲ့ စစ်ကောင်စီလက်အောက်ခံ ပြည်သူ့စစ်စခန်းတွေကို KIA တိုက်ခိုက်



ကချင်ပြည်နယ်၊ အင်းတော်ကြီးဒေသရှိ နန့်မွန်းမြို့က စစ်ကောင်စီ လက်အောက်ခံ ရှမ်းနီပြည်သူ့စစ် စခန်းနဲ့ နန့်မွန်းတောင်ပေါ်က စစ်ကောင်စီရဲ့ ရှေ့တန်းတပ်စခန်းတွေကို ကချင်လွတ်မြောက်ရေး တပ်မတော် KIA က မေလ ၂၉ ရက်နေ့ မနေ့ညသန်းခေါင်ယံမှာ ဝင်ရောက်စီးနင်း ပစ်ခတ်ခဲ့တယ်လို့ နန့်မွန်းမြို့ ဒေသခံတွေက ပြောပါတယ်။

စစ်ကောင်စီလက်အောက်ခံ ပြည်သူ့စစ်အဖွဲ့ကို KIA အဖွဲ့က သတိပေးတဲ့သဘော ဝင်တိုက်ခဲ့တာဖြစ်နိုင်ပြီး အပျက်အစီးတွေရှိခဲ့တယ်လို့ လုံခြုံရေးအရ အမည်မဖော်လိုတဲ့ နန်းမွန်းဒေသခံတစ်ဦးက ဆိုပါတယ်။

"အဲဒါကတော့ သူတို့ ဒီပြည်သူ့စစ်စခန်းကို ဆောက်ထားတဲ့ အဆောက်အဦတွေ အမိုးတွေကတော့ ပျက်စီးသွားတယ်လို့ ကျွန်တော်ကြားတယ်ဗျ။ အခုပစ်တာကလည်း ကျွန်တော်ထင်တာကလေ ပြည်သူ့စစ်စခန်းဆိုတာကလည်း ဒီနားက တပ်ကပဲလေ။ တပ်ကနေပဲဆိုတော့ သူတို့က ဒီမှာကျတော့ အတူတူပဲနေကြတယ်ဆိုတော့ သူတို့က ဟိုဘက်ဒီဘက် ကွဲသွားလို့သာ နည်းနည်းလေး သတိပေးတဲ့ သဘောအနေနဲ့သာ ပစ်တာလားလို့လေ။ အဲလိုမျိုးလည်း ပြောနေကြလို့။ အဲဒီအိမ်နားကတော့ အိမ် တစ်အိမ်ကတော့ နည်းနည်းလေး ထိသွားတယ်လို့ ပြောတယ်။ ကျွန်တော် ကြားရသလောက်ကတော့ အရမ်းကြီးအပျက်စီး အဆုံးအရှုံးတွေတော့ မရှိပါဘူးဗျ"

    "ပြည်သူ့စစ်စခန်းကို ဆောက်ထားတဲ့ အဆောက်အဦတွေ အမိုးတွေကတော့ ပျက်စီးသွားတယ်လို့ ကျွန်တော်ကြားတယ်ဗျ"

စစ်တပ်က အာဏာသိမ်းပြီးနောက်ပိုင်းမှာ အင်းတော်ကြီးဒေသမှာရှိတဲ့ နန့်မွန်းမြို့၊ ဟိုပင်မြို့ အနီးနားတွေမှာ စစ်ကောင်စီနဲ့ အခုလိုဖြစ်တဲ့ တိုက်ပွဲတွေဟာ ပထမဆုံးအကြိမ်ဖြစ်ပြီး တိုက်ပွဲတွေဆက်ပြီး ရှိလာနိုင်တယ် လို့လည်း ဒေသခံတွေက ဆိုပါတယ်။

မနေ့ညက ဖြစ်ပွားခဲ့တဲ့ နှစ်ဘက်ပစ်ခက်မှုတွေကြောင့် စစ်ကောင်စီလက်အောက်ခံ ရှမ်းနီပြည်သူ့စစ် အဖွဲ့က စစ်သား နှစ်ဦး ဒဏ်ရာ ပြင်းပြင်းထန်ထန်ရရှိခဲ့ပြီး KIA ဘက်မှာတော့ အထိခိုက်နဲ့ အကျဆုံး မရှိဘူးလို့ ဒေသခံတွေက ပြောပါတယ်။

ရှမ်းနီပြည်သူ့စစ်အဖွဲ့က စစ်သား နှစ်ဦး ကျဆုံးတယ်ဆိုတာကို RFA က သီးခြားအတည်ပြုလို့ မရသေးပါဘူး။

ပြီးခဲ့တဲ့ မေလ ၂၇ ရက်နေ့ကလည်း ဖားကန့်မြို့နယ်၊ ရှဒူးဇွပ်ကျေးရွာက ရှမ်းနီပြည်သူ့စစ် ခေါင်းဆောင် ဦးမင်းဇင်သန့် နေအိမ်ကို KIA စစ်သား လေးယောက်က ဝင်ရောက်စီးနင်းခဲ့ရာမှာ အိမ်မှာအသင့်စောင့် ဆိုင်းနေတဲ့ စစ်ကောင်စီတပ်တွေက ပစ်ခတ်ခဲ့တာကြောင့် KIA စစ်သား လေးဦးလုံး သေဆုံးခဲ့ပါတယ်။

မေလ ၂၈ ရက်နေ့မှာတော့ ဖားကန့်မြို့နယ်၊ နောင်းမီကျေးရွာက ရှမ်းနီပြည်သူ့စစ်ခေါင်းဆောင် ဦးဖိုးကျော်ကို နေအိမ်ထဲကနေခေါ်ထုတ်ပြီး KIA က သေနတ်နဲ့ပစ်သတ်ခဲ့တဲ့ ဖြစ်စဉ်တွေရှိခဲ့ပါတယ်။

ဒါကြောင့် KIA ဘက်က စစ်ကောင်စီတပ်တွေကို တိုက်ခိုက်နေရင်းကနေ စစ်ကောင်စီလက်အောက်ခံ ရှမ်းနီပြည်သူ့စစ်စခန်းကိုလည်း အခုလို ဝင်ပြီးတိုက်ခိုက်တာဖြစ်နိုင်တယ်လို့ ဒေသခံတွေက သုံးသပ်ကြ ပါတယ်။

အဲဒီဖြစ်စဉ်တွေနဲ့ ပတ်သက်ပြီး RFA က သီးခြားအတည်ပြုနိုင်ခြင်း မရှိသေးပါဘူး။

အလားတူပဲ ပူတာအိုနဲ့ မြစ်ကြီးနားမြို့ကို ဆက်သွယ်ထားတဲ့ ပြည်ထောင်စုလမ်းမကြီးပေါ်က လုံရှာရန် ကျေးရွာ၊ ဖက်မာကျေး၊ မဆွတ်ရန်ကျေးရွာ အနီးနားတွေမှာ စစ်ကောင်စီရဲ့ ယာဉ်တန်းအချို့ကို KIA တပ်မဟာ (၁) က မေလ ၂၉ ရက် မနေ့က ကြားဖြတ်ချုံခိုပြီး တိုက်ခိုက်ခဲ့ပါတယ်။

စစ်ကောင်စီ တပ်ရင်း (၁၃၇) က စစ်သား ၅၀ လောက်ဟာ ကား ၂ စီးနဲ့ သွားရင်းကနေ လမ်းခုလတ်မှာ KIA က အခုလို တိုက်ခိုက်ခဲ့လို့ လုံခြုံရေးအရ အမည်မဖော်လိုတဲ့ မျက်မြင်တွေ့ရှိသူ ယာဉ်မောင်းတစ်ဦးက RFA ကို ပြောပါတယ်။

"လုံရှာရန် တာဝါတိုင် မရောက်ခင်လေးပေါ့နော် ပစ်တာ။ လုံရှာရန်နားကနေ ပစ်တာ။ သူတို့ ကြိုစောင့်ထားတာထင်တယ်။ ဒီဘက်ကလည်းနည်းနည်း သူတို့ မြင်တာနည်းနည်းဦးသွားတော့ အဲမှာ ပစ်တာလည်း ဟိုဘက်က လက်ပစ်ဗုံးထင်တယ်။ ကားကို ပစ်လာတာ ဒါပေမဲ့ ကားတော့ မမှန်သေးဘူး။ လမ်းပေါ်မှာပဲ ကျလာတယ်လေ။ ကျွန်တော့် ကားနောက်မှာရှိနေတဲ့ သူတွေထဲက တစ်ယောက်တော့ ဟုတ်တယ်။ လည်ပင်းမှာ ထိသွားလို့ အဲဒီတစ်ယောက်တော့ ဆုံးသွားတယ်"

စစ်ကောင်စီရဲ့ တပ်သားတွေဟာ KIA ရဲ့ တိုက်ခိုက်မှုကို ခံခဲ့ရပြီးတဲ့နောက် ပူတာအိုမြို့ရှိရာဘက်ကို တပ်ဆုတ်ထွက်ပြေးခဲ့ကြတယ်လို့ ဆိုပါတယ်။

စစ်ကောင်စီတပ်သားတွေ ဆုတ်ခွာရာလမ်းတလျှောက် လုံရှာရန်ကျေးရွာအုပ်စုထဲက မဆွမ်ရန် ရွာထဲကို ဝင်ရောက်ပစ်ခတ်ခဲ့ပြီး ကျေးရွာနေအိမ်က ခြံစည်းရိုးတွေ လဲကျပျက်စီးခဲ့တဲ့အထိ သေနတ်နဲ့ ပစ်ခတ်ခဲ့ တယ်လို့ ဒေသခံကျေးရွာသားတစ်ဦး ပြောပါတယ်။

"မဆွတ်ရန်ရွာမှာ သူတို့ ဝင်တာနဲ့ အဲလို လမ်းတောက်လျှောက် အဲလို လမ်းနံဘေးက လမ်းတွေကို အဲလို ခြံစည်းရိုးတွေကို လဲကျသွားအောင် လဲတဲ့အထိ အဲလို ပစ်ပေးတယ်လို့ ပြောတယ်"

ပူတာအိုဒေသမှာ စစ်ကောင်စီနဲ့ KIA တို့အကြား ဧပြီလကတည်းကနေ အခုချိန်ထိ ထိတွေ့တိုက်ပွဲ ဖြစ်ပွားမှုဟာ ၇ ကြိမ်ထက်မနည်းရှိနေပြီး စစ်ကောင်စီဘက်က အထိအခိုက်အကျဆုံး ၂၀ ထက် မနည်းရှိနေပြီဖြစ်တယ်လို့ ကချင်စစ်ရေးလေ့လာသုံးသပ်သူတွေက ဆိုပါတယ်။

အလားတူပဲ မေလ ၃၀ ရက် ဒီနေ့ မနက်ပိုင်း ၅ နာရီလောက်ကလည်း ကချင်ပြည်နယ်တွင်းဖြစ်တဲ့ ဖားကန့် မြို့အဝင်၊ လယ်ပြင်ပူးပေါင်းစစ်ဆေးရေးဂိတ်အနားမှာ စစ်ကောင်စီတပ်တွေနဲ့ KIA တို့ အပြန်အလှန် ပစ်ခတ် မှုတချို့ရှိခဲ့ပြီး အဲဒီအနီးနားက စစ်ကောင်စီရဲ့ ယမ်းချက်စက်ရုံနားမှာ လက်နက်ကြီး ပစ်ခတ်သံတွေ၊ ပေါက်ကွဲ သံတွေကို ကြားနေရတယ်လို့ လယ်ပြင်ကျေးရွာ ဒေသခံတစ်ဦးက ပြောပါတယ်။

ဒါ့အပြင် ကချင်ပြည်နယ်၊ မိုးမောက်မြို့နယ်၊ ဆီးဟပ် ကုန်းလော့၊ မြို့သစ်တဝိုက်က တာဝါတိုင် ကုန်းမှာလည်း မေလ ၂၉ ရက် မနေ့ည ၁၁ နာရီလောက်ကနေ မနက်ခင်းပိုင်းအထိ စစ်ကောင်စီ တပ်တွေနဲ့ KIA တို့အကြား တိုက်ပွဲတွေ ပြန်လည်ပြင်းထန်လာခဲ့ပြီး စစ်ကောင်စီရဲ့ တိုက်ခိုက်ရေး စစ်ဘက်သုံး တိုက်လေယာဉ်တစ်စီး လာရောက်ဝဲပျံခဲ့တာကို တွေ့မြင်ခဲ့တယ်လို့ မျက်မြင်တွေ့ရှိသူ မန်နောင်ကျေးရွာက ဒေသခံတစ်ဦးက ပြောပါတယ်။

လက်ရှိ ကချင်ပြည်နယ်ထဲ ဖြစ်ပွားနေတဲ့ တိုက်ပွဲတွေ၊ ပစ်ခတ်မှုတွေနဲ့ပတ်သက်လို့ စစ်ရေးအခြေအနေကို သိနိုင်ဖို့ ကချင်လွတ်မြောက်ရေး တပ်မတော် KIA ရဲ့ သတင်းနဲ့ပြန်ကြားရေး တာဝန်ခံ ဗိုလ်မှူးကြီး နော်ဘူကို RFA က ဆက်သွယ်မေးမြန်းနိုင်ဖို့ ကြိုးစားခဲ့ပေမယ့် အကြောင်းပြန်ကြားခြင်း မရှိသေးပါဘူး။

အလားတူ စစ်ကောင်စီ ပြောခွင့်ရ ဗိုလ်ချုပ် ဇော်မင်းထွန်းကို ကချင်ပြည်နယ်ဘက်က တိုက်ပွဲတွေနဲ့ ပတ်သက်ပြီး ဆက်သွယ်မေးမြန်းဖို့ ကြိုးစားပေမယ့် ဖုန်းဆက်သွယ်လို့ မရပါဘူး။

ကချင်ပြည်နယ်ထဲမှာ စစ်တပ်က အာဏာသိမ်းပြီးနောက်ပိုင်း စစ်ကောင်စီတပ်တွေ၊ စစ်ကောင်စီရဲ့ လက်အောက်ခံ ပြည်သူ့စစ်အဖွဲ့တွေနဲ့ KIA တို့ကြား မကြာခဏဆိုသလို တိုက်ပွဲတွေဖြစ်ပွားလျက်ရှိပြီး ကချင်စစ်ရေးလေ့လာသုံးသပ်သူတွေရဲ့ ခန့်မှန်းသုံးသပ်ချက်အရ ကချင်ပြည်နယ်တွင်းမှာ ရက်ပေါင်း ၁၂၀ အတွင်း တိုက်ပွဲပေါင်း ၂၀၀ ကျော် ဖြစ်ပွားခဲ့တယ်လို့ ဆိုပါတယ်။

RFA Burmese



စစ်ကောင်စီက ကားလမ်းတွေပိတ်ထားလို့ ကယားဒုက္ခသည်တွေ စားနပ်ရိက္ခာခက်ခဲနေ

ကယားပြည်နယ်ထဲမှာ ကရင်နီပြည်သူ့ကာကွယ်ရေးတပ် KPDF နဲ့ စစ်ကောင်စီတပ်ဖွဲ့ဝင်တွေအကြား တိုက်ပွဲတွေကြောင့် ထွက်ပြေးတိမ်းရှောင်ရတဲ့ စစ်ဘေးဒုက္ခသည် ပြည်သူ ငါးသောင်းကျော်ရှိတယ်လို့ အကူအညီ ပေးသူတွေက ပြောပါတယ်။

လတ်တလောမှာ စစ်ကောင်စီက ကားလမ်းတွေ ပိတ်ဆို့ထားတာကြောင့် ဒုက္ခသည်တွေအတွက် စားနပ်ရိက္ခာ သယ်ပို့နိုင်ရေး ခက်ခဲနေတယ်လို့ ဆိုပါတယ်။

ပြီးခဲ့တဲ့ မေ ၂၂ ကစပြီး လွိုင်ကော်၊ ဒီးမော့ဆိုနဲ့ ရှမ်းပြည်နယ် မိုးဗြဲမြို့တွေမှာ ကရင်နီပြည်သူ့ကာကွယ်ရေး တပ်နဲ့ စစ်ကောင်စီတပ်တွေအကြား တိုက်ပွဲတွေဖြစ်ပွားခဲ့ပြီး စစ်ကောင်စီကနေ အင်တာနက်၊ တယ်လီဖုန်း စတဲ့ ဆက်သွယ်ရေးလမ်းကြောင်းတွေ ပိတ်လိုက်တဲ့အပြင် အဝေးပြေးလိုင်းကားတွေကိုပါ မနေ့ကစပြီး ဖြတ်သန်းခွင့် မပေးတော့ပါဘူး။

ဒါ့အပြင် မေ ၂၃ ရက်နေ့ကစပြီး လွိုင်ကော်မြို့ကိုလည်း စစ်အုပ်ချုပ်ရေးနယ်မြေအဖြစ် ကြေညာထားလိုက် ပါတယ်။

ထွက်ပြေးနေရတဲ့ စစ်ဘေးဒုက္ခသည်အများစုဟာ တောတွေထဲမှာ ပုန်းနေကြရတာကြောင့် စားသောက်ဖို့ ခက်ခဲတာ၊ မိုးရွာတဲ့အခါ အမိုးအကာ မလုံလောက်တာတွေကြောင့် ကျန်းမာရေး ထိခိုက်လာကြတယ်လို့ စစ်ဘေးဒုက္ခသည်တွေကို ကူညီပေးနေသူ လုံခြုံရေးအရ နာမည်မဖော်လိုတဲ့ ဒီးမော့ဆိုဒေသခံ အမျိုးသမီး တစ်ယောက်က ပြောပါတယ်။

"စားစရာတွေကလည်း မရှိတော့ဘူး။ အချို့နေရာတွေမှာ တကယ့် တောထဲတွေကျ စားလို့အဆင်မပြေဘူး။ ကလေးတွေဆိုရင် ဒီအတိုင်း သစ်ဥ၊ သစ်ဖုလေးတွေ ရှာပြီး စားနေရတယ်လို့လည်း သတင်းကြားတယ်။ ကလေးတွေလည်း ဖျားတယ်။ ချောင်းဆိုးတယ်၊ နှာစေးတယ်ပေါ့နော်။ အခုလောလောဆယ် လသား ကလေး ဆုံးသွားတယ်လို့ ကြားရလို့ စိတ်မကောင်းဘူး။ မိုးကလည်း ပြီးခဲ့တဲ့ တစ်ရက်၊ နှစ်ရက်က တော်တော် ရွာတယ်။ မိုးကာတွေကလည်း အများကြီးမပါတော့ မလုံခြုံဘူး"

တိုက်ပွဲတွေကြား လက်နက်ကြီးတွေနဲ့ ပစ်ခတ်နေလို့ အိမ်တွေမှာ မနေရဲတော့တဲ့ လွိုင်ကော်မြို့ ဒေသခံတွေ ကလည်း ထွက်ပြေးတိမ်းရှောင်လာတာတွေ ရှိနေပါတယ်။

စစ်ဘေးဒုက္ခသည်တွေထားတဲ့ ကျောင်းတွေ၊ ဓမ္မာရုံတွေမှာလည်း လူတွေပြည့်ကျပ်နေလို့ မဆံ့တော့တဲ့ အတွက် တောင်စောင်းတွေမှာ တဲထိုးပြီး နေကြရတဲ့သူတွေ ပိုများလာပါတယ်။ ဒီကြားထဲ မိုးရွာလာပြန်တော့ နေရာကို မကြာခဏ ရွှေ့ပြောင်းနေကြရပါတယ်။

    "သက်ကြီးရွယ်အိုနဲ့ ကလေးတွေ ကျန်းမာရေးလည်း မကောင်းကြဘူး။ လက်ရှိအနေအထားနဲ့ဆိုရင် အငတ်ဘေးနဲ့ ရင်ဆိုင်ရမယ့် လက္ခဏာတွေ ပေါ်နေတယ်"

အခုဆိုရင် စားသောက်ဖို့ ရိက္ခာနည်းနေပြီမို့ အငတ်ဘေး ကျရောက်နိုင်တဲ့ လက္ခဏာတွေ တွေ့နေရပြီလို့ စစ်ဘေးဒုက္ခသည်တွေကို ကူညီပေးနေတဲ့ ဒီးမော့ဆိုမြို့နယ်က ဦးပလန်က ပြောပါတယ်။

"ကျွန်တော်တို့ပြည်နယ်ကို ၈၈ က ဖြစ်ခဲ့သလို ဖြတ်လေးဖြတ်နဲ့ သူတို့လုပ်နေတယ်။ အဓိက စိုးရိမ်တာက ဒုက္ခသည်တွေအတွက်ပဲ။ အခုမိုးကျနေတယ်။ လုံခြုံမှုအတွက် သူတို့မှာ အမိုးတွေ၊ အကာတွေ လိုအပ်တယ်။ ဆေးဝါးတွေ လိုအပ်တယ်။ မိုးကာတွေ၊ ခြင်ထောင်တွေ လိုအပ်တယ်။ အစားအသောက် အတွက် တောတွင်းမှာတော့ တစ်ပတ်စာလောက်တော့ လုံလောက်နိုင်သေးတယ်။ သက်ကြီးရွယ်အိုနဲ့ ကလေးတွေ ကျန်းမာရေးလည်း မကောင်းကြဘူး။ လက်ရှိအနေအထားနဲ့ဆိုရင် အငတ်ဘေးနဲ့ ရင်ဆိုင် ရမယ့် လက္ခဏာတွေ ပေါ်နေတယ်။"

စစ်ကောင်စီတပ်တွေက ကယားပြည်နယ်ကနေ တခြားဒေသဘက်အထွက်ကိုသာ လက်ခံပြီး အဝင်ကို လက်မခံတော့ဘဲ လမ်းပန်းဆက်သွယ်ရေးတွေကို ဖြတ်တောက်ထားပါတယ်။

စစ်ဘေးဒုက္ခသည်တွေကို ကူညီပေးဖို့ တခြားနီးစပ်တဲ့ မြို့နယ်တွေကနေ လာတဲ့အလှူရှင်တချို့လည်း လမ်းတစ်ဝက်မှာ ကယားပြည်နယ်ထဲ ဝင်လို့မရ ဖြစ်နေတယ်လို့လည်း ဒေသခံတွေက ပြောပါတယ်။

စစ်ကောင်စီတပ်တွေကို ပြန်ခုခံနေတဲ့ ကယားပြည်နယ်၊ လွိုင်ကော်နဲ့ ဒီးမော့ဆိုမြို့က စစ်ဘေးဒုက္ခသည်တွေ ထဲက သက်ကြီးရွယ်အိုနဲ့ ကလေးတွေမှာ ဝမ်းပျက်ဝမ်းလျော၊ နှာစေးချောင်းဆိုး၊ ယားနာနဲ့ ဒဏ်ရာရထားတဲ့သူ တချို့ ရှိနေကြပါတယ်။

စားနပ်ရိက္ခာတွေ လိုအပ်နေတာအပြင် ဆေးဝါးကုသဖို့ လိုအပ်နေတဲ့အတွက် သွားရောက်ကူညီပေးဖို့ ကြိုးစား နေပေမယ့် ကယားပြည်နယ်ထဲကို ဝင်ခွင့်ပိတ်ထားတာကြောင့် သွားမရဖြစ်နေတယ်လို့ ဆေးအကူညီပေးဖို့ စီစဉ်နေတဲ့သူတစ်ယောက်က RFA ကို ပြောပါတယ်။

"ဆေးအကူအဖွဲ့ပါတယ်။ ရိက္ခာရယ်၊ ဆေးပစ္စည်းရယ်၊ ဆေးကုမယ့် အဖွဲ့ရယ်၊ နောက်ပြီး Volunteer လုပ်ပေးမယ့် ယောက်ျားလေးတွေ ပါမယ်။ ကျနော်တို့ သွားဖို့စီစဉ်နေတာ အခုထိတော့ သွားလို့ မရသေး ဘူး။ အစောပိုင်းတုန်းက လိုင်းကားတွေ ထွက်တယ်၊ အခု ဒီ တစ်ရက်၊ နှစ်ရက်အတွင်းမှာတင်ပဲ လိုင်းကား တွေ ပိတ်သွားပြီး ကားတွေမထွက်လို့ သွားလို့မရသေးဘူး"

ပြီးခဲ့တဲ့ မေ ၂၇ ရက်က ဒီးမော့ဆိုမြို့က စစ်ဘေးဒုက္ခသည် ပြည်သူတွေအတွက် ရိက္ခာပြန်သယ်တဲ့ လူငယ် နှစ်ဦးကို စစ်ကောင်စီဘက်က လမ်းမှာ ပစ်သတ်လိုက်တယ်လို့ ဒုက္ခသည်အရေး ကူညီပေးနေသူတွေက ပြောပါတယ်။

ကယားပြည်နယ်ကို လမ်းပန်းဆက်သွယ်ရေး ဘာကြောင့်ပိတ်ဆို့ထားလဲဆိုတာ စစ်ကောင်စီပြောခွင့်ရ ဗိုလ်ချုပ် ဇော်မင်းထွန်းကို RFA က ဖုန်းဆက်သွယ်မေးမြန်းဖို့ ကြိုးစားပေမယ့် ဖုန်းဆက်သွယ်လို့ မရသေးပါဘူး။

ပြီးခဲ့တဲ့ နှစ်ရက်အတွင်းမှာ စစ်ကောင်စီနဲ့ KPDF တို့ အပြင်းအထန် တိုက်ပွဲဖြစ်တာမျိုးမရှိပေမယ့် စစ်ကောင်စီ ဘက်က ပစ်ခတ်နေတယ်လို့လည်း ဒေသခံတွေက ပြောပါတယ်။

ကယားနဲ့ ရှမ်းပြည်နယ်အစပ် ပီကင်းကောခူကျေးရွာ ဒေသခံတစ်ယောက်က စစ်ကောင်စီဘက်က ဆက်လက် ပစ်ခတ်နေတာကြောင့် ရွာတွေမှာ မလုံခြုံတဲ့အတွက် ရွာမပြန်ရဲကြတော့ဘူးလို့ ပြောပါတယ်။

"အခုရွာကို မပြန်ရဲဘူး။ ရွာမှာတော့ လူငယ်တွေ နည်းနည်းလောက်ပဲ ကင်းချထားတယ်။ ရွာမှာ လုံခြုံ စိတ်ချရတဲ့ အနေအထား မရှိသေးတဲ့အတွက် ကင်းချထားရတယ်။ မနေ့ညကလည်း ရွာပတ်ဝန်းကျင် နားမှာ လက်နက်ကြီးတွေနဲ့ ပစ်တယ်။"

ပြီးခဲ့တဲ့ မေ ၂၄ ရက်က စပြီး ကယားပြည်နယ် လွိုင်ကော်၊ ဒီးမော့ဆို၊ ဒေါငံခါး၊ ၆ မိုင်၊ ဖရူဆို၊ ဘောလခဲ၊ ငွေတောင်ဆည်၊ ငွေတောင်ရွာ၊ ကယန်းသာယာ၊ ဝါရီခေါခူ၊ ကုန်းသာနဲ့ ပန်းကန်တွေမှာ တိုက်ပွဲတွေ ဖြစ်ခဲ့ပြီး ကယားနဲ့ ရှမ်းပြည်နယ်အစပ် ပီကင်းကောခူ၊ မိုးဗြဲ၊ ဖယ်ခုံနဲ့ တောင်ပို့ကွဲရွာတွေမှာ စစ်ကောင်စီတပ်တွေ ဝင်လာတဲ့အတွက် တိုက်ပွဲတွေ ဖြစ်ခဲ့တဲ့အကြောင်း၊ မေ ၂၃ ရက် တိုက်ပွဲမှာ ရဲ ၁၅ ယောက် သေဆုံးခဲ့ပြီး KPDF ဘက်မှ တစ်ယောက် ကျဆုံးတယ်လို့ အမျိုးသားညီညွတ်ရေးအစိုးရ NUG က မေ ၂၄ ရက်မှာ သူ့ရဲ့ လူမှုကွန်ယက် စာမျက်နှာမှာ ထုတ်ပြန်ထားပါတယ်။

ထွက်ပြေးတိမ်းရှောင်နေရသူတွေထဲမှာ မွေးကင်းစအရွယ်ကနေ အသက် ၉၀ ကျော် သက်ကြီးရွယ်အိုတွေ ပါဝင်ပြီး ဆေးဝါး၊ ရေ၊ နေရာထိုင်ခင်းနဲ့ အစားအစာ အထူးလိုအပ်နေတဲ့အကြောင်း၊ ကယားပြည်နယ်နဲ့ ရှမ်းပြည်နယ်အစပ် မြို့နယ်တွေမှာ နိုင်ငံရေးနဲ့ဆက်စပ်ပြီး ဖမ်းဆီးခံရသူ ၁၃၅ ယောက်၊ သေဆုံးသူ ၇ ယောက် ၊ ရှမ်းပြည်နယ် တောင်ပိုင်း ဖယ်ခုံမှာတော့ အဖမ်းခံထားရတာ အယောက် ၂၀ ဝန်းကျင်ရှိတယ်လို့ NUG ရဲ့ လူ့အခွင့်အရေး ဝန်ကြီးက ပြောပါတယ်။

စစ်တပ်နဲ့ တိုင်းရင်းသားလက်နက်ကိုင် တပ်ဖွဲ့တွေအကြား ဖြစ်ပွားတဲ့ ပဋိပက္ခတွေကြောင့် နေအိမ် စွန့်ခွာ ထွက်ပြေးရသူ တစ်သိန်းနှစ်သောင်းကျော်အထိ ရှိသွားပြီလို့ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး UNHCR က သောကြာနေ့က သတင်းထုတ်ပြန်ထားပါတယ်။

ဖေဖော်ရီလ ၁ ရက်နေ့က စစ်တပ်က အာဏာသိမ်းပြီးနောက်ပိုင်း ကချင်၊ ကရင်၊ ချင်း၊ ကယားနဲ့ ရှမ်းပြည်နယ် မြောက်ပိုင်းတွေမှာ စစ်ရေးပဋိပက္ခတွေ တိုးလာနေပြီး၊ မြန်မာနိုင်ငံ အရှေ့တောင်ပိုင်း၊ ထိုင်းနိုင်ငံနယ်စပ် တစ်လျှောက်မှာ စစ်ပြေးဒုက္ခသည် ၈၅၉၀၀၊ ရှမ်းပြည်နယ် မြောက်ပိုင်းမှာ ၁၅၀၀၀ နဲ့ ကချင်နဲ့ ချင်းပြည်နယ် တွေမှာ နှစ်သောင်းကျော်စီရှိတယ်လို့လည်း UNHCR အဖွဲ့ရဲ့ အဲဒီအစီရင်ခံစာမှာ ဖော်ပြထားပါတယ်။


RFA Burmese

https://www.rfa.org/burmese/news/kayah-refugees-food-shortage-05302021053645.html


(အာဏာသိမ်းစစ်ကောင်စီတပ်တွေ လက်နက်ကြီးနဲ့ ပစ်ခတ်လို့ ဒဏ်ရာရရှိသွားတဲ့ ကယားပြည်နယ်၊ လွိုင်ကော်မြို့နယ်က ကလေးငယ်တစ်ဦးကို တွေ့ရစဉ်၊ Photo: CJ)


အမရပူရမြို့ ကွမ်းသီးတန်းလမ်း အမရသူ ပိုးထည်တိုက်ရှေ့မှာ လူငယ် (၂) ဦးကို အကြမ်းဖက်စစ်သားတွေက (ညနေ (၆) နာရီကျော်ဝန်းကျင်က )ပစ်သတ်ရာ တစ်ဦးသေပြီး ကျန်တစ်ယောက် ဒဏ်ရာရ



Photo CJ

အမရပူရမြို့ ကွမ်းသီးတန်းလမ်း အမရသူ ပိုးထည်တိုက်ရှေ့မှာ လူငယ် (၂) ဦးကို အကြမ်းဖက်စစ်သားတွေက (ညနေ (၆) နာရီကျော်ဝန်းကျင်က )ပစ်သတ်ရာ တစ်ဦးသေပြီး ကျန်တစ်ယောက် ဒဏ်ရာရသည်ဟု ကနဦးသတင်းများအရသိရသည်။


Burma News Network

https://www.facebook.com/burmanewsnetwork

မူလာရှီးဒီကြိုးတံတား စစ်ဆေးရေးဂိတ်တွင် စစ်ကောင်စီတပ်များက ဒေသခံများထံမှ ဂိတ်​ကြေးအတင်းကောက်ခံနေ။


ပူတာအိုမြို့နယ်၊ မူလာရှီးဒီကြိုးတံတားပေါ်ရှိ စစ်ဆေးရေးဂိတ်တွင် အကြမ်းဖက်စစ်ကောင်စီတပ်နှင့် ရဲတို့ပူပေါင်းပြီး ဖြတ်သန်းသွားလာနေသည့် ဒေသခံ ပြည်သူများထံမှ အတင်းငွေကြေးကောက်ခံနေသည်ဟု ဒေသခံများ သတင်းပေးပို့ လာချက်မှသိရသည်။

မူလာရှီးဒီးကြိုးတံတားပေါ် စစ်ဆေးရေးဂိတ်တွင် ငွေကြေးကောက်ခံနေသည်မှာ ၂ပတ်ခန့်ရှိလာပြီး ယခင်က ပူတာအိုမြို့နယ်အတွင်းရှိ ဒေသခံပြည်သူများကို ကောက်ခံခြင်းမရှိဘဲ ခရီးသည်များကားများကိုသာကောက်ခံခဲ့ခြင်းဖြစ်သည်ဟု ကြုံတွေ့ခဲ့သည့် မူလာရှီးဒီတွင် နေထိုင်သူ ဒေသခံတစ်ဦးက KNG သတင်းဌာနကိုပြောဆိုခဲ့သည်။

"အခုနောက်ပိုင်း သူတို့က ဒေသခံတွေကိုပါ ဂိတ်ကျော်ခ ဆိုပြီးလိုက်တောင်းနေတယ်။ ဘာနဲ့ဖြတ်ဖြတ် အကုန်လိုက်တောင်းနေသလိုဖြစ်နေပြီ။ တောင်းပြီးမှ မပေးရင် ထောက်ခံစာတွေအမျိုးမျိုးတောင်းလာတယ်။ မပြနိုင်ရင်မဖြတ်ခိုင်းဘူး။ အရင်းတုန်းကလည်းကောက်ပါတယ်။ ဒါပေမယ့် ဒေသခံတွေကိုမကောက်ဘူး။  မြစ်ကြီးနားလို အဝေးကလာတဲ့ ကုန်သည်ကားတွေကိုတောင်းတယ်"ဟုပြောဆိုသည်။

ထိုစစ်ဆေးရေးဂိတ်တွင် ဂိတ်ကျော်ဖြတ်ခအဖြစ် တစ်ထောင်မှ ငါးထောင်အထိ ကောက်ခံနေပြီး  လုံခြုံရေးအရ ခေါင်းစဉ်ဖြင့် ထောက်ခံစာများပြခိုင်းကာ ငွေဖိတောင်းခံနေသည့် ပုံစံဖြစ်သည်ဟု သူကဆက်ဆိုသည်။

အဆိုပါ မူလာရှီးဒီစစ်ဆေးဂိတ်တွင် စစ်တပ်က အာဏာမသိမ်းခင် စုပေါင်းဂိတ်အဖြစ် အစိုးရဌာနဆိုင်ရာအသီးသီးမှတာဝန်ထမ်းဆောင်ခဲ့သော်လည်း  အာဏာသိမ်းပြီးနောက်ပိုင်း လက်ရှိတွင် စစ်တပ်နှင့်ရဲတို့သာ ဂိတ်တွင်ရှိကြောင်းသိရသည်။

ပူတာအိုမြို့နယ်အတွင်း တိုက်ပွဲပြန်လည်ပြင်းထန် လာသည့်အတွက် အဆိုပါစစ်ဆေးရေးဂိတ်တွင် မေလ ၂၉ရက်နေ့မှစကာ နေ့သာအချိန်မှသာ စောင့်ကြည့်မည်ဖြစ်ပြီး ညအိပ်စွန့်ခွာသွားခဲ့ကြောင်း ဒေသခံများပြောဆိုသည်။


Kachin News Group 

https://www.facebook.com/theKachinNews

ကသာမြို့နယ် PDF တပ်ဖွဲ့နှင့် စစ်​ကောင်စီ တိုက်ပွဲဖြစ်ပြီး စစ်​ကောင်စီမှ ၄ဦး​သေ၊ ၄ဦး ဒဏ်ရာရသည်ဟုဆို


30 May 2021 - Kachinwaves

စစ်ကိုင်းတိုင်း ကသာမြို့နယ် ရွှေပြည်သစ်နှင့် ဟဲနားကျေးရွာကြား ရွှေငှက်ချောင်းအနီးတွင် စစ်​ကောင်စီတပ်နှင့် PDF တပ်ဖွဲ့တို့ ယ​နေ့ တိုက်ပွဲဖြစ်ခဲ့ရာ စစ်​ကောင်စီတပ်မှ ၄ဦး​သေပြီး ၄ဦးဒဏ်ရာရ​ကြောင်း ​ဒေသခံများက ​ပြောသည်။

ဒဏ်ရာရသည့်သူများတွင် စစ်​ကောင်စီရဲနှစ်ဦးပါဝင်သည်ဟု ​ပြောသည်။ 

ကသာ PDF တပ်ဖွဲ့မှ ၅ဦး ဒဏ်ရာရခဲ့သည်ဟုလည်း ​ဒေသခံတစ်ဦးက ​ပြောသည်။


Kachinwaves 

https://www.facebook.com/kachinwavesnews

ဖာပွန်တွင် တိုက်ပွဲဖြစ် အာဏာသိမ်းအကြမ်ဖက်စစ်အုပ်စုကား မီးလောင်၊ ကျဆုံးသူများပါရှိ

Photo-ဖာပွန်တွင် ပြီးခဲ့သည့်ရက်က အတိုက်ခိုက်ခံခဲ့ရသည့် အာဏာသိမ်းအကြမ်းဖက်စစ်အုပ်စုကား

မေလ ၂၉၊၂၀၂၁၊ သူးလေသတင်းစဥ်

ကရင်ပြည်နယ် မူတြော်ခရိုင် (ဖာပွန်)မှာ  ကရင်အမျိုးသားလွတ်မြောက်ရေး တပ်မတော် (KNLA) နဲ့ အာဏာသိမ်းအကြမ်းဖက်စစ်အုပ်စုတို့ကြား တိုက်ပွဲဖြစ်ပွားခဲ့ပြီး စစ်အုပ်စုဘက်က စစ်ကားတစ်စီး မီးလောင်ပျက်စီးသွားခဲ့ပါတယ်။

ဒီကနေ့ မနက်ပိုင်းက မူတြော်ခရိုင် (ဖာပွန်) ကူးဆိပ်ကျေးရွာနဲ့ မထောကျေးရွာလမ်းကြားမှာ ဖာပွန်ကနေ ပြန်ဆင်းလာတဲ့ အကြမ်းဖက်စစ်အုပ်စုကားတန်းတွေကို KNLA တပ်မဟာ ၅ က တိုက်ခိုက်ခဲ့တာပါ။

တိုက်ပွဲနှစ်ကြိမ်ဖြစ်ပွားခဲ့ကာ အာဏာသိမ်းအကြမ်းဖက်စစ်အုပ်စုဘက်က ထိခိုက်ကျဆုံးမှုတွေရှိပြီး အတိအကျတော့မသိရသေးပါဘူး။

အဆိုပါစစ်ကားတန်းတွေဟာ မနေ့ညက ဖာပွန်ကို လူနဲ့ရိက္ခာပို့ဆောင်လာတာဖြစ်ပြီး ပြန်အဆင်းမှာ အခုလိုတိုက်ခိုက်ခံရတာ ဖြစ်ပါတယ်။

မနေ့ကလည်း ဖာပွန်မြို့နယ် မဲဝိုင်ကျေးရွာမှာ သွားလာနေတဲ့ ဒေသခံရွာသားတွေကို အာဏာသိမ်းအကြမ်းဖက်စစ်အုပ်စုဘက်က အကြောင်းမဲ့ပစ်ခတ်ခဲ့လို့ ရွာသားတစ်ဦး ထိခိုက်ဒဏ်ရာရရှိမှုတွေ ရှိနေတယ်လို့လည်း ကြားသိရပါသေးတယ်။


Thoolei News - KNU -Department Of Information

https://www.facebook.com/KNUDOIHQ/

မဲဝိုင်အကြမ်းဖက်စစ်အုပ်စုတပ်စခန်းမှ အကြမ်း ဖက်စစ်သားများ ပြည်သူကို သေနတ်ဖြင့်ပစ်


၂၉ရက် မေလ ၂၀၂၁ခုနစ်။ သူးလေသတင်းစဥ်

၂၀၂၁ခုနှစ် မေလ ၂၈ ရက်နေ့ မွန်းလွဲ ၂း၀၀ နာရီအချိန်တွင် မဲဝိုင်အကြမ်းဖက်စစ်အုပ်စုတပ်စခန်းမှ ( ခလရ - ၉၇ ) အကြမ်းဖက်အဖွဲ့၏ တပ်သားများသည် ၎င်းတို့၏စခန်းရှေ့၌ ဖြတ်သွားသော စောညီညီ ဆိုသူအား သေနတ်ဖြင့်ပစ်ခတ်ခဲ့ကြရာ တွင် စောညီညီ၏ လက်နှစ်ဖက်လုံးကို ကျည် ထိမှန်ခဲ့သည်။ ထိုသို့ ကျည်ထိမှန်ခဲ့သော စောညီညီ လက်တစ်မှာမူ ကြိုးသွားခဲ့ပါသည်။

ထို့အပြင် ဤ မဲဝိုင်စခန်း၌ နေထိုင်ကြသောအကြမ်းဖက်စစ်အုပ်စုအဖွဲ့သည် ပြည်သူလူထုများ၏ စားနပ်ရိက္ခာ နှင့် စည်းစိမ်ဥစ္စာများကို ခိုးယူခြင်း၊ အတင်းအဓ္ဓမလုယူခြင်း နှင့် ကျေးရွာနှင့်လုပ်ငန်းခွင်ထဲသို့ လက်နက်ကြီးများ ပစ်ချခြင်း စသည့် လူ့အခွင့်အရေးချိုးဖောက်မှုများကို အမြဲတမ်းပြုလုပ်ခဲ့ပါသည်။

ဤသို့ အကြမ်းဖက်စစ်အုပ်စုအဖွဲ့မှ လူ့အခွင့်အရေးချိုးဖောက်သည့် လှုပ်ရှားမှုများကို ကေအဲန်ယူ - မူတြော်ခရိုင် တပ်မဟာ ( ၅ )ထိန်းချုပ်နယ်မြေအတွင်း၌ အစဥ်တစိုက်ပြုလုပ်နေကြသောကြောင့် ဒေသခံပြည်သူလူထုများ ကောင်းမွန်စွာ သွားလာပြီး လုပ်ငန်းကိုင်ငန်းများကိုလုပ်ဆောင်နိုင်ရန်အတွက် အခက်အခဲ များစွာကို ဖြစ်ပေါ်စေခဲ့ပါသည်။


Thoolei News - KNU -Department Of Information

https://www.facebook.com/KNUDOIHQ/

အကြမ်းဖက်စစ်အုပ်စု၏ ကားများ ကူးဆိပ်နှင့်မထောကြား၌ ပစ်ခတ်ခံရ



၃၀ရက် မေလ ၂၀၂၁ခုနှစ်။ သူးလေသတင်းစဥ်

၂၀၂၁ ခုနှစ် မေလ ၂၉ ရက်နေ့တွင် ဖာပွန်သို့ ရိက္ခာ နှင့် ဆေးဝါးအမျိုးမျိုးကို ပို့ဆောင်သော အကြမ်းဖက်စစ်အုပ်စု၏ ကား ၁၁ စီး ပြန်ဆင်းလာသောအခါ ကူးဆိပ် နှင့် မထောကြား၌ ကရင်အမျိုးသားလွတ်မြေက်ရေးတပ်မတော် နှင့် ထိတွေ့ကာ ပစ်ခတ်မှု ( ၂ ) ကြိမ် ဖြစ်ပွားခဲ့ပါသည်။

အကြမ်းဖက်စစ်အုပ်စုမှ လက်ကြီးနှင့်လက်နက်ငယ်များ မြောက်များစွာ ရမ်းသမ်းပစ်ခတ်ခဲ့ကြသည်ဟုလည်း ဒေသခံများက ပြောကြားခဲ့ပါသည်။

ပထမအကွိမျ ပစျခတျမှုသညျ နံနကျ ၇း၂၅ မိနစျအခြိနျ၌ဖွစျပှားခဲ့ပွီး ဒုတိယအကွိမျ ပစျခတျမှုသညျ မှနျးလှဲပိုငျးအခြိနျ၌ ဖွစျပှားခဲ့ပါသညျ။

ထိုပစ်ခတ်မှု ( ၂ ) ကြိမ် လုံးတွင် အကြမ်းဖက်စစ်အုပ်စု၏ တပ်သား ၄ ယောက်သေဆုံးပြီး ထိခိုက်ဒဏ်ရာရရှိမှုများလည်းရှိခဲ့ပါသည်။

ထို့ပြင် အကြမ်းဖက်စစ်အုပ်စု၏ ကား ၂ စီးသည် လုံးလုံးပျက်စီးခဲ့ပြီး အခြားကားများသည်လဲ ထိခိုက် ချွတ်ယွင်းမှု အများအပြားလည်းရှိခဲ့ပါသည်။

ကရင်အမျိုးသားလွတ်မြောက်ရေးတပ်မတော်ဘက်တွင် ထိခိုက်ကျဆုံးမှုမရှိပေ။

ဤကဲ့သို့သော ပစ်ခတ်တိုက်ခိုက်မှုမျိုးသည် ကေအဲန်ယူ - မူတြော်ခရိုင် တပ်မဟာ ၅ တစ်ခုတည်း အတွင်းမှာသာ ဖြစ်ပွားခဲ့သည်မဟုတ်ဘဲ ကေအဲန်ယူ၏ အခြားသော ခရိုင် နှင့် တပ်မဟာ များမှာလည်း မကြာခဏ ဖြစ်ပွားမှုရှိခဲ့ပါသည်။


Thoolei News - KNU -Department Of Information

https://www.facebook.com/KNUDOIHQ/

အာဏာရှင်ဆန့်ကျင်ရေးနဲ့ ဖက်ဒရယ်ဒီမိုကရေစီအတွက် NUGနဲ့ CNF တို့ သဘောတူညီချက်ရ

အာဏာရှင်ဆန့်ကျင်ရေးနဲ့ ဖက်ဒရယ်ဒီမိုကရေစီအတွက် NUGနဲ့ CNF တို့ သဘောတူညီချက်ရ

အာဏာရှင်စနစ်ဆန့်ကျင်တော်လှန်ရေးနဲ့ ဖက်ဒရယ်ဒီမိုကရေစီစနစ်ဖော်ဆောင်ကျင့်သုံးရေးတို့အတွက် အမျိုးသားညီညွတ်ရေးအစိုးရ(NUG)နဲ့ ချင်းအမျိုးသားတပ်ဦး(CNF)တို့ကြား သဘောတူညီချက်ရပြီလို့ NUG ဘက်က ဒီနေ့ မေလ ၂၉ ရက်မှာ ကြေညာလာပါတယ်။

တန်းတူရေးအခြေခံပြီး အပြန်အလှန်အသိအမှတ်ပြုမှု၊ လေးစားမှုတွေနဲ့ လက်တွဲဆောင်ရွက်သွားဖို့အပြင် တခြားအရေးကြီးတဲ့ ပူးပေါင်းဆောင်ရွက်မှုကိစ္စတွေအတွက်လည်း ပါဝင်တယ်လို့လည်း ဆိုပါတယ်။

နှစ်ဖက်သဘောတူညီချက်ကို အမျိုးသားညီညွတ်ရေးအစိုးရ (NUG) ဘက်မှ နိုင်ငံတော် ဒုတိယ သမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်း၊ နိုင်ငံခြားရေး၊ ပြည်ထဲရေးနဲ့ကာကွယ်ရေးဝန်ကြီးတို့၊ ချင်းအမျိုးသားတပ်ဦး (CNF)ဘက်က ဥက္ကဋ္ဌ ပူးဇင်ကျုံး၊ ဒု-ဥက္ကဌတွေနဲ့ အထွေထွေအတွင်းရေးမှူးတို့ ပါဝင်လက်မှတ်ထိုးခဲ့တယ်လို့ ဆိုပါတယ်။

NUG အစိုးရလက်အောက်က ပြည်သူ့ကာကွယ်ရေးတပ် သင်တန်းဆင်းပြီးနောက်တစ်နေ့မှာ အခုလိုသတင်းထုတ်ပြန်လာတာလည်းဖြစ်ပါတယ်။

CNF ရဲ့ခေါင်းဆောင်တစ်ဦးဖြစ်တဲ့ ဒေါက်တာ လျန်မှုန်းဆာခေါင်းဟာ NUG အစိုးရရဲ့ ဖက်ဒရယ်ရေးရာ ပြည်ထောင်စုဝန်ကြီးတာဝန်ယူထားသူဖြစ်ပါတယ်။


BBC Burmese

https://www.bbc.com/burmese/live/burma-57242648

ခြံနံပါတ် (၁) တရားခွင် သို့မဟုတ် ကမ္ဘာကျော်ခဲ့တဲ့ ရုံးချိန်း

ဒေါ်အောင်ဆန်းစုကြည်ကို စွဲထားတဲ့ အမှု ၆ ခုမှာ တစ်မှုဟာ ဖေဖော်ဝါရီ ၁ ရက်အာဏာသိမ်းပြီးနေအိမ်အကျယ်ချုပ်ထိန်းသိမ်းခံထားရချိန်မှာ စွဲဆိုခံရတာပါ။

ဒေါ်အောင်ဆန်းစုကြည် နဲ့ ဦးဝင်းမြင့် တို့ကို ရုံးထုတ်ကာနီး နာရီပိုင်းအလိုအထိ တရားရုံးဟာ နေပြည်တော်က မြနန်းဘုံသာလမ်းထဲမှာ လို့ပဲ ရှေ့နေတွေက သိခဲ့ကြပါတယ်။

တရားရုံးရဲ့တည်နေရာအတိအကျကို မသိခဲ့ကြပါဘူး။

မေလ ၂၄ ရက် မနက် ၈ နာရီအရောက် ဇဗ္ဗူသီရိ အမှတ်(၁) ရဲစခန်း ကိုလာဖို့အချိန်းအချက်တစ်ခုပဲ ရှိခဲ့တာပါ။

ချိန်းဆိုထားတဲ့ ရဲစခန်းအရောက် ပထမဆုံးတောင်းဆိုမှုက ရှေ့နေတွေရဲ့ဖုန်းတွေကို စခန်းမှာထားခဲ့ရမယ်ဆိုတာပါ။ ရှေ့နေတွေက ဖုန်းပိတ်ပြီး ကားထဲထားခဲ့မယ်လို့ တောင်းဆိုခဲ့တာတာင် မရပါဘူး။

အဲ့ဒီနောက် ရှေ့နေတွေကို ရဲယာဉ်တန်းနဲ့ နေပြည်တော်ကောင်စီရုံးဝင်းထဲ ခေါ်သွားပါတယ်။

ကောင်စီဝင်းထဲမှာတော့ ယူနီဖောင်းဝတ်ထားတဲ့ ရဲတွေရော၊အရပ်ဝတ်တွေအများအပြားပါ လုံခြုံရေးချထားပါတယ်။

မြနန်းဘုံသာ မဟုတ်တော့ပြီ

အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့နဲ့ ပထမဆုံးအကြိမ် လူချင်းတွေ့ခွင့်ရမယ့် သူတို့ရဲ့ရှေ့နေအဖွဲ့ကို ခြံနံပါတ်(၅) ထဲက အဆောက်အဦတစ်လုံးထဲ ခဏထည့်ထားလိုက်ပါတယ်။

တရားခွင်ဟာ မြနန်းဘုံသာလမ်းမှာမဟုတ်တော့ကြောင်း သိလိုက်ပါပြီ။ ဒါပေမဲ့ ဒီအဆောက်အဦဟာလည်း တရားခွင်မဖြစ်နိုင်ဘူးလို့ ရှေ့နေတွေက ခန့်မှန်းကြပါတယ်။

အဆောက်အဦဟာ လူမနေတာကြာပြီဖြစ်ပြီး မကြာသေးခင်ကမှ သန့်ရှင်းရေးလုပ်ပြီးမွမ်းမံထားတဲ့ နေရာမှန်းသိသာလှပါတယ်။

ခဏအကြာမှာတော့ လူ ခြောက်ဦးပါတဲ့ ရှေ့နေအဖွဲ့ကို ဘတ်ဂီယာဉ်နဲ့နှစ်သုတ်ခွဲပြီး ခြံနံပါတ် (၁) ဆိုတာကို ထပ်ခေါ်သွားပါတယ်။

လမ်းတစ်လျှောက်လုံခြုံရေးတွေအများအပြားချထားပါတယ်။

ရှေ့နေအဖွဲ့ဟာ ခြံနံပါတ်(၁) ထဲဝင်ဖို့ ထပ်အစစ်ဆေးခံရပြီး X-Ray စက်ကိုပါဖြတ်ရပါတယ်။ လေဆိပ်က လုံခြုံရေးနဲ့ အလားသဏ္ဍန်တူပါတယ်။

ခြံနံပါတ်(၁) အလယ်မှာရှိတဲ့ အဆောက်အဦထဲက အခန်းထဲမှာ ရှေ့နေအဖွဲ့ဟာ ခဏထိုင်စောင့်ရပြန်ပါတယ်။

အခန်းထဲမှာ CCTV နှစ်လုံးထက်မနည်း တပ်ထားပြီး လေအေးပေးစက်လည်းဖွင့်ထားပါတယ်။

အခန်းကိုလိုက်ကာတွေပတ်ပတ်လယ်ကာထားပြီး လေးထောင့်ပုံသဏ္ဍာန်စားပွဲတစ်လုံးနဲ့ ကုလားထိုင်ကလွဲလို့ တခြားဘာပရိဘောဂပစ္စည်းမှမရှိပါဘူး။

ဒါဟာ အာဏာသိမ်းပြီးနောက်ပိုင်းတရားစွဲခံထားရတဲ့ ဒေါ်အောင်ဆန်းစုကြည် နဲ့ ရှေ့နေတွေ ပထမဆုံးလူချင်းတွေ့ဆုံရမယ့် သီးသန့်ခန်းဖြစ်ပါတယ်။

ဒီအခန်းဘေးမှာတော့ တရားခွင်ရှိနေပါတယ်။

ကမ္ဘာကျော်တဲ့ ရုံးချိန်း

မြန်မာ့တရားစီရင်ရေးမှာ အွန်လိုင်း(Video Conferencing) ကနေ ကြားနာတဲ့စနစ်ဟာ ၂၀၂၀ စက်တင်ဘာ လကမှ စတင်ခဲ့တာပါ။

ဒီလို အွန်လိုင်းနဲ့စစ်ဆေးတဲ့အထဲ နိုင်ငံရေးအမှုမှာဆို ကယားဝန်ကြီးချုပ်ဟောင်း ဦးအယ်လ်ဖောင်းရှို ကို ပြည်နယ်လွှတ်တော်က စွပ်စွဲပြစ်တင်မှုကို ဖွဲ့စည်းပုံအခြေခံဥပဒေဆိုင်ရာခုံရုံးက ကြားနာတဲ့အမှုဟာ ထင်ရှားတဲ့အမှုတစ်ခုဖြစ်ခဲ့ပါတယ်။

ဖေဖော်ဝါရီ ၁ ရက် အာဏာသိမ်းပြီးတဲ့နောက် နိုင်ငံ့ခေါင်းဆောင် နှစ်ဦးကို ဖမ်းဆီးအမှုဖွင့်ပြီး အွန်လိုင်းကနေ ရုံးထုတ်တဲ့အခါမှာတော့ ဒါဟာ မြန်မာပြည်မှာသာမက ကမ္ဘာမှာပါ အကျော်ကြားဆုံး အွန်လိုင်းကနေ ရုံးထုတ်မှုဖြစ်လာခဲ့တာပါ။

မေ ၂၄ ရက်တရားခွင်ဟာ သမ္မတနဲ့ ဒေါ်အောင်ဆန်းစုကြည်တို့ဟာ အာဏာသိမ်းပြီး ရက်တစ်ရာကျော်မှာ ပထမဆုံးလူချင်းပြန်ဆုံရတာဖြစ်ပါတယ်။

ဒေါ်အောင်ဆန်းစုကြည်ကို အွန်လိုင်းကနေ ပထမဆုံးအကြိမ် အဖြစ် ဖေဖော်ဝါရီလ ၁၆ ရက် မှာ ဇဗ္ဗူသီရိတရားရုံးမှာ ရုံးထုတ်ပါတယ်။

မတ်လ ၃၁ ရက်မှာမှ Video Conferencing ကနေ တစ်ဆင့် ရှေ့နေနဲ့ စကားပြောခွင့်ရခဲ့တာပါ။ ဒေါ်အောင်ဆန်းစုကြည်နဲ့ ရှေ့နေ ဒေါ်မင်းမင်းစိုးတို့ ဟာ နှစ်ဘက်စလုံးမှာ ရဲတွေ စောင့်ကြည့်နေတဲ့ကြားက စကားပြောခဲ့ကြရတာပါ။ ဒေါ်အောင်ဆန်းစုကြည် က ဒီအခြေအနေကိုစောဒက တက်ပါတယ်။

ဒါဟာ ဥပဒေနဲ့ ညီရဲ့လားလို့ ဒေါ်အောင်ဆန်းစုကြည် ကမေးခွန်းထုတ်ခဲ့ပြီး ရှေ့နေတွေနဲ့ လူချင်း တွေ့ဆုံခွင့်ရဖို့ တောင်းဆိုခဲ့တဲ့နောက် အခုလို လူချင်းတွေ့ရဖို့ဖြစ်လာတာပါ။

ဒီအခြေအနေရောက်ဖို့ ၂ လနီးပါး စောင့်ခဲ့ရပါတယ်။

ဒေါ်အောင်ဆန်းစုကြည်ရဲ့ တရားရုံးတင်မယ့်အကြောင်း အာဏာသိမ်းစစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က တရုတ်မီဒီယာ Phoenix ရုပ်သံဌာနကို ရုံးမထုတ်ခင်ရက်ပိုင်းကပြောခဲ့ပါတယ်။

ဒေါ်အောင်ဆန်းစုကြည် အပြင်နဲ့အဆက်အသွယ်ပြတ်နေသလား

မကြာခင်မှာပဲ နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် သီးသန့်အခန်းထဲဝင်လာပြီး ရှေ့နေတွေကို 'မင်္ဂလာပါ' လို့ ပြုံးပြီး နှုတ်ဆက်လိုက်ပါတယ်။

ခိုပြာရောင် ရင်ဖုံးအင်္ကျီနဲ့ ဇင်းမယ်ရောင် လုံခြည်ဝတ်ထားပြီး တရားခွင်လာတဲ့ ဒေါ်အောင်ဆန်းစုကြည်ဟာ အရင်က နိုင်ငံတော်အဆင့်အခမ်းအနားတွေ တက်တဲ့ ခြေလှမ်းနဲ့ဟန်ပန် အတိုင်းပဲလို့ ရှေ့နေ ဒေါ်မင်းမင်းစိုးက ဘီဘီစီကိုပြောပါတယ်။ ဒါပေမဲ့ ပန်းတော့ပန်မထားပါဘူး။

ထိန်းသိမ်းခံရပြီးနောက် နှစ်လကျော်ကြာမှရှေ့နေအဖွဲ့နဲ့ ဒေါ်အောင်ဆန်းစုကြည် လူချင်းတွေ့ခွင့် နာရီဝက်ကြာရခဲ့တာပါ။

' စမတ်ကျကျနဲ့ဝင်လာတာ။ ယုံကြည်မှုအပြည့်ပဲ။ ကိုယ်တွေတောင် အမေ့ကြည့်ပြီး ခွန်အားရတယ်' လို့ ဒေါ်မင်းမင်းစိုးက ပြောပါတယ်။

ဒါ့အပြင် တရားခွင်ဟာ မြနန်းဘုံသာလမ်းမှာ လုပ်မယ်လို့ အရင်က သိထားသလိုမဟုတ်ဘဲ 'ဘာကြောင့် ဒီနေရာမှာ ဖြစ်ရလဲ' ၊ 'အဲ့ဒီလိုလုပ်လို့ရလား' လို့ ဒေါ်အောင်ဆန်းစုကြည်က ရှေ့နေတွေကိုပြန်မေးပါတယ်။

ဒေါ်အောင်ဆန်းစုကြည်ဟာ သူဘယ်နေရာမှာ ထိန်းသိမ်းခံထားရသလဲဆိုတာကိုတောင်မသိတဲ့အကြောင်း ရှေ့နေတွေကို ပြောပြပါတယ်။ ဒါပေမဲ့ ဒေါ်အောင်ဆန်းစုကြည်ဟာ ပြင်ပလောကအခြေအနေတွေကို လုံးဝမသိတဲ့အခြေအနေတော့မဟုတ်ဘူးလို့ ဒေါ်မင်းမင်းစိုးက ပြောပါတယ်။

ဘီဘီစီက စုံစမ်းသိရှိရတဲ့ အချက်အလက်တွေအရ ဒေါ်အောင်ဆန်းစုကြည်ကို ဗိုလ်ချုပ်တစ်ဦးက ပြင်ပအခြေအနေတွေကို တစ်ပတ်တစ်ခါ အစီရင်ခံတယ်လို့သိရပါတယ်။ ဒါပေမဲ့ ဒါဟာ တပ်မတော်ကပေးသိချင်တဲ့ အကန့်အသတ်လောက်ပဲသိရတဲ့သဘောပါ။

ဖုန်းတွေ၊အင်တာနက်တွေလည်း ပေးမသုံးပါဘူး။

ထိန်းသိမ်းခံထားရချိန်မှာ ဒေါ်အောင်ဆန်းစုကြည်အတွက် တပ်မတော်နဲ့ အရပ်ဖက်က ပါရဂူတစ်ဦးစီ၊ နောက် တပ်နဲ့ အရပ်ဘက်က ဆရာဝန်တစ်ဦးစီ စုစုပေါင်း ဆရာဝန်လေးဦး စီစဉ်ထားရှိပေးထားပြီး သူနာပြုတွေကတော့ တပ်မတော်က သူနာပြုတွေထားပေးထားပါတယ်။ သူတို့အားလုံးဟာလည်း အပြင်ထွက်ခွင့်မရပါဘူး။

ရှေ့နေတွေနဲ့တွေ့ခွင့်ရချိန်မှာ ဒေါ်အောင်ဆန်းစုကြည်ရဲ့ကျန်းမာရေးကလည်း ကောင်းမွန်နေပါတယ်။

ရှေ့နေတွေနဲ့တွေ့ချိန် နာရီဝက်ပဲပေးတော့ အမှုတစ်မှုကို ငါး မိနစ်လောက်ပဲ အချိန်ရတဲ့အတွက် အချိန်မလုံလောက်ဘူးလို့ ဒေါ်အောင်ဆန်းစုကြည် ကပြောပါတယ်။ ဒေါ်အောင်ဆန်းစုကြည်ကို နေပြည်တော်နဲ့ ရန်ကုန်မှာ ပုဒ်မ ၅ ခုနဲ့ စုစုပေါင်းအမှုက ၆ မှု တရားစွဲဆိုထားတာဖြစ်ပါတယ်။

ဒါကြောင့် အချိန်ပိုရဖို့ သူလည်းတောင်းဆိုမှာဖြစ်သလို ရှေ့နေတွေလည်း တောင်းဆိုပါလို့ ဒေါ်အောင်ဆန်းစုကြည် ကမှာကြားပါတယ်။

' အလုအယက်ပြောရသလိုဖြစ်တာပေါ့' လို့ ရှေ့နေဒေါ်မင်းမင်းစိုး ကပြောပါတယ်။

'အရင်ကတော့ သူ့ခြံနဲ့သူတဲ့။ အခုကျတော့ ဘယ်မှာရှိလို့ရှိမှန်းမသိဘူးတဲ့။ အခုရောက်နေတဲ့နေရာတောင် ဘယ်နေရာမှန်းမသိဘူးလို့ပြောပါတယ်' လို့ ဒေါ်မင်းမင်းစိုးက ဒေါ်အောင်ဆန်းစုကြည်ရဲ့ အခြေအနေကိုပြောပြပါတယ်။

ပြည်သူရှိသရွေ့ ပါတီရှိမယ်လို့ ဒေါ်အောင်ဆန်းစုကြည်က သတင်းစကားပါး

ရတဲ့ အချိန် နာရီဝက်လေးအတွင်းမှာ အမှုအကြောင်းတွေအချိန်လုပြောရတဲ့အထဲ ဒေါ်အောင်ဆန်းစုကြည်ဟာ ပြည်သူတွေ ကျန်းမာစေဖို့ ဆုတောင်းပေးခဲ့ပြီး ပြည်သူတွေရှိနေသရွေ့ NLD ပါတီဆက်ရှိနေမယ်လို့' တစ်တိုင်းပြည်လုံးကို သတင်းစကားပါးခဲ့ပါတယ်။

ဒါဟာ မကြာခင်ရက်ပိုင်းက စစ်ကောင်စီရဲ့အသစ်ပြန်ဖွဲ့ထားတဲ့ ရွေးကောက်ပွဲကောင်မရှင် ဥက္ကဋ္ဌ ဦးသိန်းစိုးက NLD ပါတီကို ဖျက်သိမ်းဖို့စီစဉ်နေကြောင်း ပြောခဲ့တဲ့အပေါ် တုံ့ပြန်ချက်လည်းဖြစ်ပါတယ်။

နာရီဝက်ပြည့်သွားချိန်မှာ စေ့ထားတဲ့အခန်းတံခါးကို ရဲတွေလာခေါက်ပါတော့တယ်။

ဒေါ်အောင်ဆန်းစုကြည်ထွက်သွားပြီးတဲ့နောက် သမ္မတဦးဝင်းမြင့် ဝင်လာပါတယ်။

ဒါပေမဲ့ သမ္မတ ဦးဝင်းမြင့်ကတော့ အာဏာသိမ်းပြီးချိန် အဖမ်းခံရပြီးကတည်းက အပြင်လောကနဲ့ လုံးဝအဆက်အသွယ်မရှိတော့တဲ့အကြောင်း ရှေ့နေတွေကိုပြောပါတယ်။

အရင်က ရှေ့နေမခေါ်ဘဲလျှောက်လဲမယ်လို့ပြောခဲ့တာက သူ့ဘက်ကရှေ့နေလိုက်ပေးမယ့်သူရှိမယ်မထင်ခဲ့လို့လို့ သမ္မတက ပြောခဲ့ပါတယ်။ ဥပဒေအတိုင်းပဲဆက်လုပ်ကြဖို့ သမ္မတက ရှေ့နေအဖွဲ့ကို မှာကြားပါတယ်။

ဒီ့နောက်မှာ ဒေါက်တာမျိုးအောင် ဝင်လာပါတယ်။ ထွေထွေထူးထူးအများကြီးမပြောပေမဲ့ သူ့ရှေ့နေ ဦးသိန်းလှိုင်ထွန်းနဲ့ ရင်းရင်းနှီးနှီးစကားပြောပါတယ်။

ရှေ့နေအဖွဲ့ဟာ အခန်းထဲမှာပဲနေနေရပြီး ဒေါ်အောင်ဆန်းစုကြည်နဲ့ ဦးဝင်းမြင့်ကို ဘယ်ကနေခေါ်လာပြီး ဘယ်ကိုပြန်ပို့လဲ ဆိုတာ မသိခဲ့ကြရပါဘူး။

ရာထူးအမြင့်ဆုံးသော တရားခွင်

၁၉၆၂ ခုနှစ် ဗိုလ်ချုပ်ကြီးနေဝင်း အာဏာသိမ်းစဉ်က သမ္မတ မန်းဝင်းမောင်နဲ့ ဝန်ကြီးချုပ်ဦးနုတို့ ထိန်းသိမ်းခံခဲ့ရပေမယ့် အခုလို တရားခွင်မျိုးမတွေ့ခဲ့ရပါဘူး။

ဒါဟာ ခေတ်သစ်မြန်မာ့သမိုင်းမှာ သမ္မတ နဲ့ အတိုင်ပင်ခံပုဂ္ဂိုလ်လို နိုင်ငံရေးရာထူးအမြင့်ဆုံးသူတွေကို စစ်ဆေးတဲ့ တရားခွင်လည်းဖြစ်ပြီး အငြင်းပွားဖွယ်ရာတွေလည်းပြည့်နှက်နေပါတယ်။

ခြံနံပါတ် (၁) တရားခွင်ဟာ အိမ်တစ်လုံးထဲက အခန်းတစ်ခန်းကို တရားခွင်ပုံစံ အားချင်းပြင်ဆင်ထားမှန်း သိသာလှပါတယ်။

စစ်ကောင်စီဘက်ကတော့ အထူးတရားရုံးလို့ အမည်တပ်ပါတယ်။

ဒေါ်အောင်ဆန်းစုကြည်၊ ဦးဝင်းမြင့် နဲ့ ဒေါက်တာမျိုးအောင်တို့ ဘေးချင်းယှဉ်ထိုင်နေစေခဲ့ပြီး သူတို့အနောက်မှာ ရဲမေတစ်ဦးနဲ့ ရဲတစ်ဦး ရပ်နေပါတယ်။

ခဏအကြာမှာတော့ နိုင်ငံပိုင်မီဒီယာက ဓာတ်ပုံဆရာတစ်ယောက် အရပ်ဝတ်နဲ့ပဲ တရားခွင်ကိုဓာတ်ပုံလာရိုက်ပါတယ်။

ရှေ့နေအဖွဲ့ဟာ စိတ်လှုပ်ရှားနေကြတာကတစ်ကြောင်း၊ အချိန်ကလည်း ခဏတာကြာမြင့်တာကတစ်ကြောင့်မို့ တရားခွင်မှာ CCTV တပ်ထားလားသတိမထားမိခဲ့ကြပါဘူး။ (တရားခွင်မတိုင်မီ သီးသန့်တွေ့ဆုံခန်းထဲမှာတော့ CCTV တပ်ထားပါတယ်။)

တရားခွင်ထဲမှာ ဇဗ္ဗူသီရိ မြို့နယ်တရားသူကြီး ဦးမောင်မောင်လွင်၊ ဥပဒေအရာရှိ ၃ ဦး၊ ရှေ့ဖတ်စာရေး နှစ်ဦးနဲ့ ရှေ့နေ ၆ ဦးရှိနေခဲ့တာပါ။

ရှေ့နေတွေကတော့ ဦးခင်မောင်ဇော်၊ ဦးကြည်ဝင်း၊ ဒေါ်မင်းမင်းစိုး၊ ဦးသဲမောင်မောင်၊ ဒေါ်စန်းမာလာညွန့်နဲ့ ဦးသိန်းလှိုင်ထွန်းတို့ဖြစ်ပါတယ်။

တရားခွင်မှာ မြို့နယ်တရားသူကြီးဟာ အတိုင်ပင်ခံပုဂ္ဂိုလ်ကို အန်တီ ဒေါ်အောင်ဆန်းစုကြည်လို့ သုံးနှုန်းပြီး နောက်ပိုင်းပြောစကားတွေမှာ အန်တီလို့ပဲ သုံးနှုန်းပါတယ်။

တရားသူကြီးဟာ နောက်ရုံးချိန်းကို ဇွန် ၇ ရက် ကိုပေးပြီး ဆယ်မိနစ်လောက်နဲ့ပဲ တရားခွင်ကို မြန်မြန်ဆန်ဆန်ပဲ အဆုံးသတ်ခဲ့ပါတယ်။

တရားခွင်ပြီးပြီးချင်းမှာတော့ ဒေါ်အောင်ဆန်းစုကြည်၊ ဦးဝင်းမြင့် နဲ့ ဒေါက်တာမျိုးအောင်တို့ အချင်းချင်း သာကြောင်းမာကြောင်း ရတဲ့အချိန်ခဏလေးမှာ နှုတ်ဆက်ကြပါတယ်။

ခုဆို သမ္မတနဲ့ ဒေါ်အောင်ဆန်းစုကြည် ထိန်းသိမ်းခံထားရတာ ၃ လကျော်လေးလနီးပါး ရှိလာနေပါပြီ။

ဒါဟာ အာဏာသိမ်းပြီးတဲ့နောက် ရက်ပေါင်းတစ်ရာကျော်အတွင်း ပထမဆုံးအကြိမ် လူချင်းတွေ့ပြီးနှုတ်ဆက်ခွင့်ရကြတာလည်းဖြစ်ပါတယ်။

အဲ့ဒီနောက်မှာတော့ သူတို့ ၃ ဦးကို ရဲတွေကပြန်ခေါ်သွားခဲ့ကြပါတယ်။ ရှေ့နေအဖွဲ့ကတော့ တရားခွင်ထဲမှာပဲကျန်ခဲ့ပြီး အပြင်ကအဖြစ်ပျက်တွေကို မသိရှိကြတော့ပါဘူး။

သမ္မတဦးဝင်းမြင့်နဲ့ အတိုင်ပင်ခံဒေါ်အောင်ဆန်းစုကြည်တို့ကို စက်တင်ဘာ ၉ ရက်နေ့က NLD ပါတီရဲ့ လူ ၇၀၀ ကျော်ပါဝင်တဲ့ မဲဆွယ် ယာဉ်တန်းကို ကြိုဆိုနှုတ်ဆက်ခဲ့တာကြောင့် သဘာဝဘေးစီမံခန့်ခွဲမှုဥပဒေ ပုဒ်မ ၂၅ နဲ့ အရေးယူထားတာဖြစ်တယ်လို့ စစ်ကောင်စီကကြေညာပါတယ်။

ဒါ့အပြင် ဒေါ်အောင်ဆန်းစုကြည်ကိုတော့ ရွှေကြာပင်ရပ်ကွက်မှာ တ စ်အိမ်တက်ဆင်း မဲဆွယ်စည်းရုံးတာကြောင့်လည်း အဲဒီပုဒ်မနဲ့ ထပ်စွဲထားတယ်လို့ ဖော်ပြထားပါတယ်။

အာဏာသိမ်းတဲ့ ဖေဖော်ဝါရီ ၁ ရက်က အတိုင်ပင်ခံနေအိမ်မှာ တရားမဝင် ရေဒီယိုစကားပြောစက် ၁၀ လုံးနဲ့ ဂျန်မာ တစ်လုံးတို့ကိုလည်း သိမ်းဆည်းရမိတာကြောင့် ပို့ကုန်သွင်းကုန်ဥပဒေ ပုဒ်မ ၈၊ ဆက်သွယ်ရေးဥပဒေပုဒ်မ ၆၇ တို့နဲ့လည်း တရားစွဲထားတယ်လို့ ဆိုပါတယ်။

ဒါ့အပြင် အာဏာသိမ်းပြီးနောက် ဖေဖော်ဝါရီ ၇ ရက်နေ့မှာ NLD ပါတီ ဗဟိုအလုပ်အမှုဆောင်တွေက နိုင်ငံတကာသံရုံးတွေ၊ ဥရောပသမဂ္ဂနဲ့ နိုင်ငံတကာအဖွဲ့အစည်းတွေထံ အာဏာသိမ်းစစ်တပ်နဲ့ ပူးပေါင်းဆောင်ရွက်ခြင်းမပြုဖို့နဲ့ သမ္မတ ဦးဝင်းမြင့်သာ တရားဝင်သမ္မတဖြစ်ကြောင်း စာပေးပို့ခဲ့တာကြောင့်နဲ့ NLDပါတီက ထုတ်ပြန်တဲ့ ကြေညာချက် ၆/၂၀၂၁ ကြောင့် နိုင်ငံတော်ငြိမ်ဝပ်ပိပြားရေးကိုထိခိုက်စေတယ်ဆိုပြီး သမ္မတ၊ အတိုင်ပင်ခံနဲ့ ဒေါက်တာမျိုးအောင်တို့ကို ပုဒ်မ ၅၀၅ (ခ) နဲ့ တရားစွဲထားတယ်လို့ ဖော်ပြထားပါတယ်။

ရှေ့နေလိုက်ရင်း အဖမ်းခံရခြင်း

အပြန်ခရီးမှာတော့ ရှေ့နေအဖွဲ့ကို အလာတုန်းကလောက် အစစ်အဆေးမများတော့ပါဘူး။ ဒါပေမဲ့ မထင်မှတ်ထားတဲ့ ဖြစ်ရပ်တစ်ခုဖြစ်ပွားခဲ့ပါတယ်။ ဒေါက်တာမျိုးအောင်ရဲ့ရှေ့နေ ဦးသိန်းလှိုင်ထွန်းကို ရဲကလက်ထိပ်ခတ်လိုက်ပါတယ်။

တရားခွင်ကအပြန်မှာ နေပြည်တော်ကောင်စီဥက္ကဋ္ဌ ဒေါက်တာမျိုးအောင်ရဲ့ရှေ့နေကို ပုဒ်မ ၅၀၅ က နဲ့ရဲက ဖမ်းဆီးသွားခဲ့ပါတယ်။

သူ့ကို ရန်ကုန်တိုင်း၊ ဒဂုံဆိပ်ကမ်းမြို့နယ်မှာဖွင့်ထားတဲ့ ပုဒ်မ ၅၀၅(က) အတွက် ဖမ်းဆီးလိုက်တာဖြစ်တယ်လို့ ရဲကပြောပါတယ်။

ရှေ့နေအဖွဲ့က အံ့အားသင့်ခဲ့ကြပေမယ့်လို့ ဦးသိန်းလှိုင်ထွန်းကတော့ သူ့ကိုအမှုဖွင့်ထားတာ သိပုံပေါ်ပါတယ်။

ဦးသိန်းလှိုင်ထွန်းက ရှေ့နေဝတ်စုံချွတ်ဖို့ လက်ထိပ်ဖြုတ်ပေးဖို့တောင်းဆိုပေမယ့်လို့ ရဲက

'လက်ထိပ်ပဲပါတယ် သော့မပါဘူး" လို့ပြန်ပြောပါတယ်။

ဦးသိန်းလှိုင်ထွန်းဟာ လက်ထိပ်တန်းလန်းနဲ့ပဲ သူ့ရဲ့ရှေ့နေလိုင်စင်ကို ရှေ့နေအဖွဲ့ဆီပေးလိုက်ပါတယ်။

ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ အမှုတွေအတွက်လိုက်ပါဆောင်ရွက်ခွင့်ရတဲ့ရှေ့နေ ၅ ဦးဖြစ်ပြီး ဦးသိန်းလှိုင်ထွန်းက ဒေါက်တာမျိုးအောင်တစ်ဦးတည်းအတွက် အမှုလိုက်ဖို့ ထပ်တိုးရှေ့နေဖြစ်ပါတယ်။

''ဒီအမှုနဲ့ပတ်သက်ပြီး လူလျော့သွားတာပေါ့ဗျာ။ အမှုနဲ့တိုက်ရိုက်ပတ်သက်တာတော့ မဟုတ်ဘူး။ ဒဂုံဆိပ်ကမ်းမှာ ၅၀၅(က)လို့ပြောတယ်။ ဒါကလည်း သူ့အပြောပါ။ ရဲကပြောတာကို သူက ကျွန်တော်တို့ကို တယ်လီဖုန်းနံပါတ်ပေးပြီးတော့ သူ့ အိမ်ကို ပြန်ပြောပေးပါဦးဆိုပြီး သူပြောပြလို့။ ဒါပဲသိရတာပါ'' လို့ ရှေ့နေအဖွဲ့ထဲက ရှေ့နေ ဦးခင်မောင်ဇော်က ပြောပါတယ်။

ဘာကြောင့် ဒီပုဒ်မနဲ့ ဦးသိန်းလှိုင်ထွန်းတရားစွဲခံရတယ်ဆိုတာတော့ မသိရသေးပါဘူး။

အမေရိကန်တစ်ယောက် ငိုကြွေးတဲ့ တရားခွင်

ဒေါ်အောင်ဆန်းစုကြည် ကို စွဲတဲ့အမှု ၆ ခုမှာ တစ်မှုက ဖေဖော်ဝါရီ ၁ အာဏာသိမ်းပြီးနောက်ပိုင်း နေအိမ်မှာထိန်းသိမ်းခံထား ရချိန်မှာ အစွဲခံရတာပါ။ ဖေဖော်ဝါရီ ၇ ရက်က ထုတ်ပြန်တဲ့ NLD ဗဟိုအလုပ်အမှုဆောင်အဖွဲ့ရဲ့ ကြေညာချက်မှာ ဒေါ်အောင်ဆန်းစုကြည် တာဝန်ရှိတယ်ဆိုပြီး တရားစွဲတာလည်းဖြစ်ပါတယ်။ နေအိမ်မှာ ထိန်းသိမ်းခံထားရသူကို ပုဒ်မထပ်တိုးလို့ အများကအံ့သြရပါတယ်။

ဒါပေမဲ့ ဒါဟာ ဒေါ်အောင်ဆန်းစုကြည်အတွက် အသစ်အဆန်းတော့မဟုတ်တော့ပါဘူး။

၁၉၉၀ ရွေးကောက်ပွဲ အနိုင်ရခဲ့ပေမယ့် အစိုးရဖွဲ့ခွင့်မရဘဲ နေအိမ်အကျယ်ချုပ်ကျခံခဲ့ရပါတယ်။

၂၀၀၉ ခုနှစ်က ခြံနံပါတ် (၅၄) မှာ နေအိမ်အကျယ်ချုပ်ကျခံနေရချိန် လွတ်ကာနီး အချိန်မှာမှ ရေကူးပြီး အိမ်ထဲဝင်လာတဲ့ အမေရိကန်နိုင်ငံသား မစ္စတာ ဂျွန်ယက်တောကြောင့် ထောင် ၃ နှစ် ကျခံခဲ့ရပါတယ်။

'တရားခွင်မှာ ဂျွန်ယက်တော ငိုကြွေးခဲ့တယ်' လို့ ဒေါ်အောင်ဆန်းစုကြည်နဲ့ နေအိမ်အကျယ်ချုပ်မှာ အတူရှိခဲ့တဲ့ ဒေါ်ခင်ခင်ဝင်းက သူ့ရဲ့ 'ရေဆန်လမ်းမှ အိမ်အပြန်' စာအုပ်မှာ ထည့်ရေးပါတယ်။

ရှေ့နေတွေနဲ့ အမေရိကန်သံရုံးအရာရှိတွေက ဘာကြောင့်ငိုရသလဲမေးတဲ့အခါ

'သူတို့ သုံးယောက် (ဒေါ်အောင်ဆန်းစုကြည်နှင့်အတူနေ နှစ်ဦး) အခုလောက် ဒုက္ခများမယ်မှန်း မသိလို့ ဝင်မိတာ' လို့ပြောပြီး ဆက်ငိုတယ်လို့ ဒေါ်ခင်ခင်ဝင်းက သူ့စာအုပ်မှာထည့်ရေးပါတယ်။

အင်းလျားကန်ကို ရေဖြတ်ကူးလာတာကြောင့် ကြွက်တက်နေလို့ ဒေါ်အောင်ဆန်းစုကြည်က လက်ခံလိုက်တာလို့ က သူ့စာအုပ်မှာရေးပါတယ်။

ဒေါ်အောင်ဆန်းစုကြည်ကို ထိုစဉ်က စစ်အစိုးရက ထောင်သုံးနှစ်ထဲက တစ်ဝက်သာကျခံစေဖို့နဲ့ ကျန်ထောင်ဒဏ်ကိုလည်း နေအိမ်မှာသာ နေအိမ်အကျယ်ချုပ် အဖြစ် ပြောင်းလဲချထားလိုက်ပြီး ၂၀၁၀ ရွေးကောက်ပွဲပြီးလို့ အနိုင်ရသူတွေကြေညာနေချိန်မှ ပြန်လွှတ်ပေးခဲ့ပါတယ်။

ဒေါ်အောင်ဆန်းစုကြည်နဲ့ NLD ပါတီဟာ အဆိုးကျော့သံသရာ တစ်ပတ်ကြုံရ

ဒေါ်အောင်ဆန်းစုကြည်လွတ်လာပြီး လအနည်းငယ်အကြာမှပဲ သူ့ကိုနေအိမ်အကျယ်ချုပ်ချခဲ့သူ ဗိုလ်ချုပ်မှူးကြီးသန်းရွှေဟာ ရာထူးကနေအနားယူခဲ့ပါတယ်။

ဒေါ်အောင်ဆန်းစုကြည်နဲ့ NLD ဟာ ၂၀၀၈ အခြေခံဥပဒေကစားပွဲထဲဝင်ပြီး ဗိုလ်ချုပ်မှူးကြီးသန်းရွှေ တပည့်တွေနဲ့ ဆက်ရင်ဆိုင်ပြီး ရွေးကောက်ပွဲနိုင်ငံရေးကို ဝင်နွှဲပါတယ်။

ပြည်သူလူထုရဲ့ ထောက်ခံအားပေးမှုကြောင့် ၂၀၁၂ ကြားဖြတ်ရွေးကောက်ပွဲ၊ ၂၀၁၅ အထွေထွေရွေးကောက်ပွဲနဲ့ ၂၀၂၀ အထွေထွေရွေးကောက်ပွဲ မှာ ဆက်တိုက်အနိုင်ရပါတယ်။

၂၀၁၅ ရွေးကောက်ပွဲနိုင်လို့ အစိုးရအကြီးအကဲဖြစ်လာတဲ့ ဒေါ်အောင်ဆန်းစုကြည်ဟာ သူနဲ့သူ့ပါတီဝင်တွေကို ထောင်ချခဲ့တဲ့ စစ်ဗိုလ်ချုပ်တွေနဲ့ ပြန်လည်သင့်မြတ်ဖို့ ကြိုးစားခဲ့ပါတယ်။ ဒါပေမဲ့ ၅ နှစ်အတွင်း အရပ်ဘက်-စစ်ဘက်ဆက်ဆံရေးဟာ ထင်သလောက်ခရီးမပေါက်ခဲ့ပါဘူး။

၂၀၂၀ ရွေးကောက်ပွဲနိုင်ပြီးချိန်မှာတော့ လွှတ်တော်ခေါ်ခွင့်မပြုဘဲ တပ်ကအာဏာသိမ်းပါတယ်။

အချိန်၊နေရာနဲ့ လူတွေပြောင်းသွားပေမယ့်လို့ ဒေါ်အောင်ဆန်းစုကြည်နဲ့ NLD ပါတီဟာ အဆိုးကျော့သံသရာ တစ်ပတ်ကြုံရတာလည်း ဖြစ်ပါတယ်။

အခုတော့ ဒေါ်အောင်ဆန်းစုကြည်ဟာ နေအိမ်အကျယ်ချုပ်ကနောက်ဆုံးအကြိမ် လွတ်မြောက်အပြီး ဆယ်စုနှစ်တစ်ခုကျော်အကြာမှာ တရားခွင် ထဲကို ပြန်ရောက်နေရတာလည်းဖြစ်ပါတယ်။


BBC Burmese

https://www.bbc.com/burmese/burma-57285819

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ