ကျိုက်ကော်ဆန္ဒပြသူတွေကို ဖြိုခွဲမယ့် စစ်ကောင်စီတပ် KNU တိုက်ခိုက်

ကရင်လက်နက်ကိုင် KNU တပ်ဖွဲ့

မွန်ပြည်နယ် သထုံမြို့နယ်ဘက်မှာ အမျိုးသားညီညွတ်ရေးအစိုးရ NUG ကိုထောက်ခံကြောင်း ချီတက်ဆန္ဒပြကြသူတွေကို ဖြိုခွဲဖို့လာတယ်လို့ ယူဆရတဲ့ တပ်တွေနဲ့ KNU ရဲ့ သထုံခရိုင်တပ်ဖွဲ့တွေနဲ့ ဒီမနက်မှာ အပြန်အလှန်ပစ်ခတ်လို့ စစ်တပ်ဘက်က ၃ ယောက်သေဆုံးတယ်လို့ ဒေသခံတွေကပြောပါတယ်။ ဒီတိုက်ပွဲကြောင့် ဘီးလင်းမြို့နဲ့ သထုံမြို့ကြား မော်လမြိုင်-ရန်ကုန် အဝေးပြေးလမ်းမှာ အသွားအလာ ယာယီ ရပ်သွားခဲ့ပါတယ်။ ဒီအကြောင်းဗွီအိုအေသတင်းထောက်နိုင်ကွန်းအိန်က သတင်းပေးပို့ထားပါတယ်။

မွန်ပြည်နယ် သထုံမြို့နယ် သုဝဏ္ဏဝတီမြို့လို့ခေါ်တဲ့ ကျိုက်ကော်အဝင်မှာ အမျိုးသားညီညွတ်ရေးအစိုးရ NUG ထောက်ခံပွဲ ချီတက်လာတဲ့သပိတ်ကို စစ်ကောင်စီတပ်တွေက ဖြိုခွဲဖို့လာစဉ်မှာ သထုံခရိုင်ထဲမှာရှိတဲ့ ကရင်လက်နက်ကိုင် KNU တပ်ဖွဲ့က တားဆီးပစ်ခတ်ခဲ့ရာက အပြန်အလှန် တိုက်ပွဲဖြစ်ပွားခဲ့ပါတယ်။ ပစ်ခတ်မှုတွေအတွင်း စစ်တပ်ဖက်က ၃ ယောက်သေဆုံးတယ်လို့ ဒေသခံ တယောက်က ပြောပြပါတယ်။

"အဲဒီ ပန်းတိမ်ရိုးဘက်မှာ ဒီမနက် အဲဒီ NUG ထောက်ခံပွဲရှိတော့ အဲဒီသတင်းကြားတော့ သထုံက စစ်ကား သုံးစီး ဆင်းလာတယ်တဲ့။ လာတော့ အကောင်းကြိုက်ရှေ့မှာ KNU ဘက်ကကော်ဖီသောက်နေတယ်။ သောက်နေရင်း သေနတ်တချက် ဖောက်လိုက်တယ်။ ဟိုကလဲမဆင်းဘူးပေါ့။ သူတို့ဆက်သွားတော့ အတွဲလိုက်အဖြုတ်လိုက် အဲဒီမှာပဲ ပွဲချင်းပြီး သုံးယောက်သေတယ်။ စစ်တပ်ဘက်ကပြန်ပစ်တာလားမသိဘူး။ ရွာသားတယောက်ပဲ ဆိုင်ကယ်မောင်းတဲ့ကောင်လေး ပစ်လိုက်တယ် ပေါင်ထိသွားတယ်ဆိုလား။"

ဒီမနက် တိုက်ပွဲဖြစ်ပွါးတဲ့အခြေအနေနဲ့ပက်သက်လို့ KNU သထုံခရိုင်အတွင်းရေးမှူး ပဒိုစောစိုးမြင့်က အခုလိုပြောပါတယ်။

"ဒေသခံပြည်သူတွေက NUG ရဲ့ထောက်ခံပွဲလုပ်တယ်လေ။ အင်အား ၁,၀၀၀ လောက်တော့ရှိမှာပေါ့နော်။ အဲဒီမှာ ကျနော်တို့ပြောတော့ ပြည်သူလူထုဆန္ဒပြလို့ရှိရင် သွားမနှောင့်ယှက်နဲ့ပေါ့နော်။ သူတို့တနာရီလောက်ပဲ အချိန်ယူပြီး သူတို့လုပ်မှာပေါ့နော်။ တကယ်လို့နှောင့်ယှက်လာလို့ရှိရင်တော့ ကျနော်တို့အဖွဲ့အနေနဲ့လည်း ပြည်သူဘက်က ရပ်တည် ပေးရတာပေါ့နော်။ တိုက်ပွဲဖြစ်တာတော့ ဒီ နောင်ဘိုနဲ့ကျိုက်ကော်ကြားမှာလို့ ကျနော်ကြားတယ်။ အကောင်းကြိုက်ထမင်းဆိုင်တဆိုင်ရှိတယ် အဲဒီမှာ။ အဲဒီအနားဝန်းကျင်မှာ တိုက်ပွဲဖြစ်တယ်လို့ကျနော်ကြားရတယ်။"

တိုက်ပွဲဖြစ်ပွါးအပြီး KNU တပ်မဟာ (၁) ဗ ျူဟာကုန်းရှိတဲ့ ဘီးလင်းမြို့နယ်အစပ် ရွေရောင်ပြကျေးရွာဘက်ကို စစ်တပ်ဘက်က လက်နက်ကြီးတွေနဲ့ ပစ်ခတ်လို့ အနီးနားရွာသားတချို့သေဆုံးဒဏ်ရာရရှိခဲ့တယ်လိုလည်း သထုံခရိုင်အတွင်းရေးမှူး ပဒိုစောစိုးမြင့် ကပြောပါတယ်။

"သူတို့လက်နက်ကြီးတွေနဲ့ပစ်တာရှိတယ်။ အခုပိန္နဲတောစခန်းကနေ လက်နက်ကြီးတွေပစ်တယ်။ အဲဒီကျနော်တို့ ကျောက်တောင်ရွာသစ်မှာ တလုံးကျတယ်။ အင်းရွာမှာ နှစ်လုံးကျတယ်။ အဲဒီမရမ်းကုန်းရွာဘက်က လက်နက်ကြီး ကျတယ် တယောက်သေတယ် တယောက်ဒဏ်ရာရတယ်။"

KNU တပ်ဖွဲ့တွေရှိရာဘက်ကို မြန်မာစစ်တပ်ကနေ ညနေပိုင်းအထိ ပစ်ခတ်နေတယ်လို့ သထုံမြို့ခံတဦးက ပြောပြပါတယ်။

"နောက်ပိုင်းမှာ လုံခြုံရေးတွေ ဆက်ချပေးပြီးတော့ ရွာတွေထဲကိုဝင်မွှေတယ်။ ပြီးရင်တော့လက်နက်ကြီးတွေနဲ့ တောင် ပစ်မြောက်ပစ် ပစ်တယ်။ KNU တပ်မဟာ (၁ ) ဗျူဟာကုန်းကို ရည်ရွယ်ပြီးလှမ်းပစ်တယ်။ ရွာတွေထဲကိုကျတယ်။ သုံး လေးလုံးကျတယ်။ ဘီးလင်းဘက်ကနေပစ်လာတာ။"

ကေအန်ယူနဲ့ တိုက်ပွဲဖြစ်ပွားတဲ့အတွက် စစ်ကောင်စီတပ်တွေ အင်အားဖြည့်ဖို့ သထုံမြို့ဘက်ကနေ လာကြတဲ့အတွက် ရွာတွေအတွင်း ဝင်ရောက်လာမှာကိုလည်း ဒေသခံ တွေ စိုးရိမ်နေကြပါတယ်။ မြန်မာ စစ်တပ်နဲ့ KNU ထိတွေ့တိုက်ပွဲဖြစ်ပွားနေတဲ့အခြေအနေကိုသိရှိဖို့ စစ်ကောင်စီပြန်ကြားရေး တာဝန်ရှိသူကို ဗွီအိုအေက ဆက်သွယ်ခဲ့ပေမဲ့ မရခဲ့ပါဘူး။

ဒီနေ့ ဧပြီလ ၂၃ ရက်နေ့ မနက်ပိုင်းကတည်းက စစ်တပ်နဲ့ KNU တပ်တွေ သထုံမြို့နယ်ထဲမှာ တိုက်ပွဲဖြစ်ခဲ့ပြီးတဲ့နောက် ရန်ကုန် မော်လမြိုင် အဝေးပြေးလမ်းမကြီးပေါ်က သထုံနဲ့ ဘီလင်းကြား ကားလမ်းပေါ်မှာ အသွားအလာ ရပ်တံ့သွားတယ်လို့ သုဝဏ္ဏဝတီမြို့ခံတဦး က ပြောပါတယ်။ "

"ကားတွေ မနက်ကဖြစ်ဖြစ်ချင်းတော့ ပိတ်ထားတယ်။ ပိတ်တော့အခုပြန်သွားပြီ။ ခုနတချက်က ပန်းတိမ်ရိုးမှာ အသံကြားလို့ ကားတန်းပြန်ပိတ်တယ်။ ပန်းတိမ်ရိုးနဲ့နောင်ဘိုကြားမှာ လမ်းပိတ်ထားတယ်။"

ညနေပိုင်းအထိတော့ ပစ်သံကြားနေဆဲအခြေအနေမို့က ားလမ်းမပွင့်သေးဘူးလို့သထုံမြို့ခံတွေကပြောပါတယ်။ လက်ရှိ ကရင်အမျိုးသားအစည်းအရုံး KNU လက်အောက်ခံတပ်တွေထဲက ဖာပွန်ခရိုင်မှာရှိတဲ့ တပ်မဟာ (၅) နဲ့ စစ်တပ်ကြား တိုက်ပွဲတွေ ဆက်တိုက်ဆိုသလို ဖြစ်ပွါးနေသလို သထုံခရိုင်ထဲမှာရှိတဲ့ တပ်မဟာ (၁)၊ ထားဝယ်ခရိုင်ထဲမှာရှိတဲ့ တပ်မဟာ (၄)၊ ဒူပလာယားခရိုင် တပ်မဟာ (၆) တို့နဲ့ ရံဖန်ရံခါတိုက်ပွဲဖြစ်ပွါးနေပါတယ်။

နိုင်ကွန်းအိန်/ VOA Burmese

https://burmese.voanews.com/a/fighting-between-knu-and-sac-forces/5864242.html