27 April 2021 - Shwe Gu
ရွှေကူမြို့နယ်က CDM လုပ်နေတဲ့ ပညာရေးဝန်ထမ်းတွေကို မြို့နယ်ပညာရေးမှူး ဦးအောင်ဆွေက ဖမ်းဝရမ်းထုတ် ဖမ်းဆီးမယ်လို့ လိုက်လံဖိအားပေးနေကြောင်း သိရပါတယ်။
"ကျနော်တို့ရွှေကူမြို့နယ် ပညာရေးမှူး ဦးအောင်ဆွ၊ သူက ရွှေကူမြို့နယ် ထွေအုပ်ကိုတင်ထားတာက ရွှေကူမြို့နယ် ပညာရေးဘက်မှာ CDM ဝန်ထမ်းက ကိုးဆယ်ဝန်းကျင်ပဲရှိတယ်ဆိုပြီးမှ တင်ထားတယ်။ အခုဒီလ ၂၅နဲ့၂၆ရက်မှာပေါ့နော် CDM မလုပ်ကြောင်း ရုံးမှာလက်မှတ် လာထိုးဖို့ ပြောတယ်။ လက်မှတ်လာ မထိုးရင် သူကိုယ်တိုင် ဖမ်းဝရမ်းကိုင်ပြီးမှ တစ်အိမ်တက်တစ်အိမ်ဆင်း ရဲတွေနဲ့ လာဖမ်းမယ်လို့ ခြိမ်းခြောက်တယ်"လို့ CDM လှုပ်ရှားမှုနဲ့ နီးစပ်သူက ဆိုပါတယ်။
ရွှေကူမြို့တွင် CDM လုပ်တဲ့ ဆရာ ဆရာမတွေ အယောက်လေးရာကျော်ပေမဲ့ ဖိအားတွေကြောင့် တစ်ရာကျော်သာ ကျန်တော့တယ်လို့ ဆိုပါတယ်။
အလားတူ ဝန်ထမ်းဦးရေ ၁၅ဦးရှိတဲ့ မိုးကောင်းမြို့ မီးရထားဝန်ထမ်းတွေထဲက ၁၂ဦး CDM ထဲပါဝင်ခဲ့ပေမဲ့ အခုချိန်တွင် ၂ဦးသာကျန်တော့ပြီး တာဝန်မှရပ်စဲခံထားရတယ်လို့ ကာယကံရှင်ဖြစ်သူ တစ်ဦးက ပြောပါတယ်။
ရွှေကူမြို့က ဆရာဆရာမတွေကတော့ စစ်ကောင်စီကနေ ဝန်ထမ်းအဖြစ်မှ ထုတ်ပစ်တာကို ဂရုမစိုက်ပေမဲ့ ဖမ်းဆီးပြီးထောင်ထဲထည့်မယ်လို့ ခြိမ်းခြောက်ခံနေရတဲ့အတွက် ကြောက်ကြလို့ ဆက်မလုပ်သူတွေရှိလာတယ်လို့ ဆိုပါတယ်။
"CDM လုပ်လို့ အလုပ်ပြုတ်ရင်လည်း ပြုတ်ပါစေပေါ့။ ဒါပေမဲ့ အခုလိုမျိုး ဖမ်းဝရမ်းထုတ်ပြီးမှ ထောင်ထဲဝင်ရမယ့်ဟာမျိုးတော့ သူတို့မလိုချင်ကြဘူး"လို့ ဆိုပါတယ်။
မိုးကောင်းမြို့ မီးရထားဝန်ထမ်းကတော့ ပြည့်သူ့အစိုးရတက်မှ အလုပ်ပြန်လုပ်မယ်လို့ အခိုင်အမာဆုံးဖြတ်ထားပြီး စစ်ကောင်စီလက်အောက်မှာ အလုပ်မလုပ်ချင်ဘူးလို့ ဆိုပါတယ်။
"ကျနော်တို့ကတော့ ပြည်သူ့အစိုးရတက်မှပဲ ဖမ်းဆီးထားတဲ့ ခေါင်းဆောင်တွေ လွတ်မှပဲ အလုပ်ပြန်လုပ်မယ်"လို့ မိုးကောင်းမြို့ မြန်မာ့မီးရထားဝန်ထမ်း တစ်ဦးက ပြောပါတယ်။
စစ်ကောင်စီက အစိုးရယန္တရားတွေ ပုံမှန်လည်ပတ်ဟန်ရှိဖို့ ကြိုးစားအားထုတ်နေပြီး CDM ထဲပါဝင်တဲ့ ဝန်ထမ်းတွေကို လျှော့တစ်ခါ ခြောက်တစ်လှည့် ကြိုးစားနေချိန်လည်း ဖြစ်ပါတယ်။
Kachinwaves
Reviewed by THITHTOOLWIN
on
20:35
Rating:
No comments:
Post a Comment