မြန်မာ့ဒီမိုကရေစီပြန်လည်ထူထောင်ရေး ကန်နဲ့ အိန္ဒိယနိုင်ငံခြားရေးဝန်ကြီး နှစ်ဦးဆွေးနွေး



Share/Bookmark
အမေရိကန်နိုင်ငံခြားရေးဝန်ကြီး Antony Blinken နဲ့ အိန္ဒိယပြည်ပရေးရာဝန်ကြီး ဒေါက်တာ S Jaishankar။ (မှတ်တမ်းဓာတ်ပုံ - AFP Comb)

မြန်မာနိုင်ငံမှာ ဒီမိုကရေစီ ပြန်လည်ထူထောင်ရေးအတွက် အမေရိကန်နဲ့ အိန္ဒိယ နှစ်နိုင်ငံစလုံးက ထောက်ခံကြတဲ့အကြောင်း နှစ်နိုင်ငံ နိုင်ငံခြားရေးဝန်ကြီးတွေ တယ်လီဖုန်းဆက်သွယ် ဆွေးနွေးချိန်အတွင်း ပြောဆိုခဲ့ကြတယ်လို့ အမေရိကန်နိုင်ငံခြားရေးဌာနရဲ့ တနင်္လာနေ့ထုတ်ပြန်ချက်မှာ ဖော်ပြထားပါတယ်။

ဒီမိုကရေစီ တန်ဖိုးတွေပေါ် ဘုံတူညီတဲ့သန္နိဋ္ဌာန် အခိုင်အမာရှိကြောင်းလည်း အမေရိကန်နိုင်ငံခြားရေးဝန်ကြီး Antony Blinken နဲ့ အိန္ဒိယပြည်ပရေးရာဝန်ကြီး ဒေါက်တာ S Jaishankar တို့က ထပ်လောင်း အာမခံခဲ့ကြပါတယ်။

မြန်မာနိုင်ငံမှာ စစ်တပ်ကအာဏာသိမ်းပြီးနောက်ပိုင်း ဖြစ်ပေါ်နေတဲ့ အကြပ်အတည်းနဲ့ပတ်သက်လို့ လာမယ့် စနေနေ့ကျရင် အရှေ့တောင်အာရှနိုင်ငံများအဖွဲ့ (ASEAN) မှာ ဆွေးနွေးဖို့ရှိနေချိန်မှာပဲ အမေရိကန်နဲ့ အိန္ဒိယ နိုင်ငံခြားရေးဝန်ကြီးတွေရဲ့ပြောဆိုချက် ထွက်လာတာပါ။

အင်ဒိုနီးရှားနိုင်ငံ၊ ဂျကာတာမြို့တော်က အာဆီယံဌာနချုပ်မှာ ကိုဗစ်ကပ်ရောဂါဆိုင်ရာ ကန့်သတ်ချက်တွေနဲ့အညီ ကျင်းပမယ်လို့ သတင်းထွက်ထားတဲ့ ဒီထိပ်သီးအစည်းအဝေးကို စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင် လူကိုယ်တိုင်တက်ရောက်မယ်လို့ ထိုင်းအစိုးရ တာဝန်ရှိသူတဦးက စနေနေ့မှာ ပြောခဲ့ပေမဲ့ စစ်ကောင်စီဘက်က ဒါနဲ့ပတ်သက်ပြီး ဘာမှမပြောသေးပါဘူး။

ဒါပေမဲ့လည်း အာဆီယံထိပ်သီးအစည်းအဝေး ကျင်းပမှာနဲ့ ပတ်သက်လို့ လက်ရှိအလှည့်ကျဥက္ကဋ္ဌဖြစ်တဲ့ ဘရူနိုင်းနိုင်ငံဘက် အတည်ပြုချက်ကို ခုချိန်ထိမရသေးဘူးလို့ အင်ဒိုနီးရှားနိုင်ငံခြားရေးဌာနပြောခွင့်ရ Teuku Faizasyah က ဗွီအိုအေကို တနင်္လာနေ့ကပြောပါတယ်။

"အာဆီယံထိပ်သီးအစည်းအဝေး ကျင်းပမှာဖြစ်ပေမယ့် ကျင်းပမယ့်ရက်နဲ့ တခြားကိစ္စတွေက အာဆီယံဥက္ကဋ္ဌ ဘရူနိုင်းနိုင်ငံပေါ်မှာ မူတည်ပါတယ်၊ အစီအစဉ်အတိုင်း အလုပ်ဖြစ်စေဖို့ တခြားအဖွဲ့ဝင်နိုင်ငံတွေနဲ့လည်း ညှိနှိုင်းနေပါတယ်၊ ဒါကို ကျနော်တို့လုပ်နေပါတယ်။" လို့ ပြောခွင့်ရ Faizasyah ကပြောပါတယ်။

ဒီအစည်းအဝေးကိုတက်ဖို့ ပြည်ထောင်စုလွှတ်တော်ကိုယ်စားပြုကော်မတီ (CRPH) ကဖွဲ့စည်းထားတဲ့ အမျိုးသားညီညွတ်ရေးအစိုးရ (NUG) ကိုလည်းဖိတ်ဖို့ တိုက်တွန်းတောင်းဆိုနေကြတဲ့ထဲမှာ အာဆီယံဒေသတွင်းက လွှတ်တော်အမတ်တွေလည်း ပါဝင်ပါတယ်။

အမျိုးသားညီညွတ်ရေးအစိုးရဘက်က ပြောတာကို နားမထောင်ဘဲနဲ့ မြန်မာနိုင်ငံအခြေအနေကို အာဆီယံအနေနဲ့ ကောင်းကောင်းဆွေးနွေးနိုင်မှာ မဟုတ်ဘူးလို့ လူ့အခွင့်အရေးဆိုင်ရာ အာဆီယံ လွှတ်တော်အမတ်များအဖွဲ့ (APHR) ရဲ့ ဥက္ကဋ္ဌ၊ မလေးရှားလွှတ်တော်အမတ် Charles Santiago က APHR ရဲ့ ဒီကနေ့ထုတ်ပြန်ချက်ထဲမှာ ပြောထားပါတယ်။

ဆိုးရွားတဲ့ စစ်အစိုးရကို လုံးဝလက်မခံတဲ့ မြန်မာလူထုကိုကိုယ်စားပြုပြီး ဗိုလ်ချုပ်မှူးကြီးမင်းအောင်လှိုင် ဒီအစည်းအဝေးကို တက်ရောက်တာ မဟုတ်ဘူးဆိုတာကို အာဆီယံအနေနဲ့ လုံးဝရှင်းရှင်းလင်းလင်း ပြရလိမ့်မယ်လို့လည်း မစ္စတာ Santiago ကပြောပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-military-coup-blinken-call-with-india-jaishankar/5859905.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ