ဒေသအသီးသီးမှာ ပုံစံအမျိုးမျိုးနဲ့ ဆန္ဒပြတာတွေဆက်ရှိနေ



Share/Bookmark
ထားဝယ် ဆန္ဒပြသပိတ်စစ်ကြောင်း မြင်ကွင်း။ (ဓာတ်ပုံ - AFP PHOTO / DAWEI WATCH - ဧပြီ ၂၉၊ ၂၀၂၁)

မြန်မာနိုင်ငံမှာ စစ်အာဏာသိမ်းမှုဆန့်ကျင်ရေး လှုပ်ရှားမှုတွေကို တနေ့နဲ့တနေ့ အသွင်မတူအောင် လုပ်နေကြတာမှာ ဒီနေ့တော့ ရန်ကုန်မြို့မှာ YBS ဘတ်စ်ကားတွေပေါ်နဲ့ လူအသွားအလာများတဲ့ ဓါတ်တိုင်တွေမှာ စာတွေကပ်ပြီး လှုပ်ရှားခဲ့ကြပါတယ်။ မန္တလေးမြို့နဲ့ တခြားမြို့တွေမှာလည်း သပိတ်စစ်ကြောင်းတွေ လမ်းပေါ်ထွက်ချီတက်ကြပါတယ်။ မြန်မာနိုင်ငံမြို့အသီးသီးက ဆန္ဒပြပွဲတွေအကြောင်း ရန်ကုန်က လာတဲ့သတင်းကို မခင်ဖြူထွေးက ပြောပြထားပါတယ်။

ဆန္ဒပြသူတွေ ပစ်ခတ် ဖမ်းဆီး ဖြိုခွဲခံရပြီးတဲ့နောက် လုံခြုံရေးအခြေအနေပေါ် မူတည်ပြီး စစ်အာဏာသိမ်းမှု ဆန့်ကျင်ဆန္ဒပြပွဲတွေကို ပုံစံမျိုးစုံနဲ့ မြန်မာနိုင်ငံမှာ ဆက်လုပ်နေကြပါတယ်။ ဒီနေ့ ဧပြီ ၂၉ ရက်နေ့ ရန်ကုန်မြို့မှာ စစ်အာဏာရှင်စနစ် ဆန့်ကျင်တဲ့ စာသားတွေရေးသားထားတဲ့ စာရွက်တွေကို YBS ဘတ်စ် ကားတွေ၊ ဖြတ်သွား ဖြတ်လာများတဲ့ နေရာတွေက ဓါတ်တိုင်တွေမှာ လိုက်ကပ်ခဲ့ကြပါတယ်။ ဒီလှုပ်ရှားမှု လုပ်ခဲ့တဲ့ ဆန္ဒပြလူငယ်တယောက်က သူတို့ဒီနေ့ ဆန္ဒပြခဲ့ကြပုံကို ခုလိုပြောပါတယ်။

“တောင်ဒဂုံမှာပေါ့နော် ဒီလိုမျိုး ကျနော်တို့ အာဏာရှင်ကို တွန်းလှန်တဲ့ ပုံစံမျိုးကို ကျနော်တို့ ဒီ Paper Campaign ပေ့ါ၊ Revolution Paper Campaign ကို ကျနော် သူတို့ဆန့်ကျင်တဲ့ စာသားကို ကျနော်တို့ ထုတ်ပြီးတော့ ပြည်သူတွေ မြင်နိုင်စေတဲ့ ကျနော်တို့ YBS ပေါ်တွေမှာ ကျနော်တို့ စပြီးကြိုးစားကပ်တယ်။ အဓိကအားဖြင့် ကျနော်တို့က တချို့ ပြည်သူတွေဆိုရင် သူတို့ပေါ့နော်။ အာဏာရှင်တွေနဲ့ ကျနော်တို့ကို စာနာထောက်ထားခြင်း မရှိတဲ့အရာကို ကျနော်တို့မြင်စေချင်တဲ့ ထမင်းဝိုင်းမှာ လူမဆုံတဲ့ အကြောင်းမျိုးတွေ ပြီးတော့ ဒီစစ်တပ်ဥပဒေကို ကျနော်လက်မခံတဲ့အကြောင်းတွေပေါ့နော်။ အဲ့ဒီဥစ္စာတွေ ကျနော်တို့ကနေပြီးတော့ ရေးသားပြီးတော့ ကျနော်တို့ကြိုးစားကပ်ခဲ့တယ်။"

လုံခြုံရေးတင်းကျပ်တဲ့ ရန်ကုန်မြို့က မြောက်ဥက္ကလာပ၊ တာမွေမြို့နယ်တွေအပြင် စစ်အုပ်ချုပ်ရေးကြေညာထားတဲ့ လှိုင်သာယာမြို့မှာလည်း ပျောက်ကြားသပိတ်တွေ လုပ်ခဲ့ကြပါတယ်။ ရွှေပြည်သာ၊ ကမာရွတ်၊ လှိုင်၊ သန်လျင်မြို့နယ်တွေမှာလည်း လူမဲ့သပိတ်၊ ဘူးသပိတ်လှုပ်ရှားမှုတွေ ဆက်ရှိနေပါတယ်။ အင်းစိန်မြို့နယ်ဘက်မှာတော့ အင်းစိန်နှင့် ကြည့်မြင်တိုင်က ကျောင်းသား လူငယ်တွေ စုပေါင်းပြီး အင်အား ၂၀၀ လောက်နဲ့ ချီတက် ဆန္ဒပြခဲ့ကြတယ်လို့ အဲ့ဒီသပိတ်စစ်ကြောင်းမှာ ပါဝင်သူတစ်ဦးက ဗွီအိုအေကို ပြောပါတယ်။

“ဒီနေ့ အင်းစိန်က ကျောင်းသားလူငယ်လေးတွေနဲ့ ကြည့်မြင်တိုင်က ကျောင်းသားလူငယ်လေးတွေ ပေါင်းပြီးတော့ အင်းစိန် ဘိုကုန်းဘက်မှာ လမ်းမကြီးပေါ်ထွက်ဖြစ်ခဲ့တယ်။ ရန်ကုန်ရဲ့ အင်းစိန် သပိတ်စစ်ကြောင်းခေါင်းစဉ်နဲ့ ထွက်ဖြစ်တယ်ဗျ။ လူအင်အားကတော့ ၁၀၀ ကျော်၊ ၂၀၀ ဝန်းကျင်လောက်တော့ ရှိမယ်ဗျ။ ၄၅ မိနစ်လောက်တော့ ကြာမယ်ထင်တယ်ဗျ၊ ကြာချိန်ကလေ။”

မန္တလေးမြို့မှာလည်း ပညာရေးမိသားစုတွေ၊ တက္ကသိုလ်ကျောင်းသားများသမဂ္ဂတွေ၊ တက္ကသိုလ်ဆရာ ဆရာမတွေ၊ အစိုးရဝန်ထမ်းတွေစတဲ့ ဆန္ဒပြသပိတ်စစ်ကြောင်း တော်တော်များများ ချီတက်ဆန္ဒပြခဲ့ကြပါတယ်။ ဆန္ဒပြရာမှာ ပါဝင်သူ ကိုသိန်းအောင်မြင့်ပြောတာက -

“လှုပ်ရှားမှုကတော့ မန္တလေးမှာတော့ နေ့စဉ်ပုံစံအမျိုးမျိုးနဲ့တော့ ထွက်နေကြတာပဲ အာဏာပိုင်ကတော့ ဒါလည်း သိတဲ့အတိုင်းပဲ မနက်မိုးလင်းကနေ မိုးချုပ်ထိသူတို့က တခါတည်း စောင့်ဖမ်းတာရော၊ လိုက်ဖမ်းတာရော ပစ်ခတ်ဖြိုခွင်းတဲ့ ပုံစံအမျိုးမျိုးနဲ့ သူတို့ကလည်း ဒါ အန္တရာယ်ပြုဖို့ ဆောင်ရွက်နေတာ ဆောင်ရွက်နေကြပေမဲ့လည်း ဒီမှာရှိတဲ့ မန္တလေးမှာရှိတဲ့ မြို့သူ၊ မြို့သားအားလုံး ကျောင်းသားလူငယ်အားလုံးကလည်း နွေဦးတော်လှန်ရေးရဲ့ ပြန်ပြောရင် စစ်အာဏာရှင်ပြုတ်ချရေးအတွက် ပုံစံအမျိုးမျိုးနဲ့ပေါ့ အန္တရာယ်ကင်းအောင်ဆက်လက်ပြီးတော့ ချီတက်ဆန္̔ဒပြနေကြတာပါ။”

ခုလိုချီတက်ဆန္ဒပြပွဲတွေကို သတင်းပေး တိုင်ကြားသူတွေ၊ လက်နက်ကိုင် လုံခြုံရေးတွေရောက်လာနိုင်တဲ့ အန္တရာယ်ကြားက ဆန္ဒပြပွဲတွေလုပ်နေရတယ်လို့ ဆန္ဒပြပွဲမှာ အမြဲပါဝင်သူ ကိုသိန်းအောင်မြင့်က ပြောပါတယ်။

“လမ်းတိုင်း၊ အရပ်တိုင်း၊ မြို့နယ်တိုင်း မြို့နယ်တိုင်းမှာ သူတို့ရဲ့ပေါ့ သတင်းပေးတွေ ဒါ ရှိနေတဲ့ သဘောကတော့ ဒါသေချာတယ်ခင်ဗျ။ ဘာလို့လဲဆိုတော့ ဒီနေ့ ပြန်ပြောရင် အောင်မြင်စွာဆောင်ရွက်သွားပေမဲ့လည်း ပြီးသွားတဲ့အချိန်မှာ သူတို့ဘက်ကနေ ပြန်ပြောရင်မိနစ်အပိုင်းပဲ ၂ မိနစ်၊ ၃ မိနစ်မှာ သူတို့ရောက်လာနိုင်တယ် ဒါဟာ ပြန်ပြောရင် သူတို့ဒီမှာ ထောက်လှမ်းနေတယ်ပေါ့နော် သပိတ်တွေကို အန္တရာယ်ပြုမယ့်သူပါ ပြန်ဖြိုခွင်းမယ့်သူရှိနေတယ်ဆိုတာတော့ ဒါပေါ်လွင်တယ်။ ဟိုတုန်းကလို အချိန်ကာလလို မဟုတ်ဘူး။ ပိုပြီး အရမ်းခက်ခဲလာတာ အဲ့ဒီခက်ခဲနေတဲ့ကြား၊ အန္တရာယ်အရမ်းများနေတဲ့ကြားကနေပဲ ပြန်လည် ကြိုးစားပြီး မနည်းရှောင်ခွင်ပြီးတော့ ဆောင်ရွက်နေကြတာပါ။ ချစ်ဖို့ကောင်းတာကပြန်ပြောရင် မြို့သူမြို့သားတွေရဲ့ စစ်အာဏာရှင်ပေါ့နော်.. အလိုမရှိနော် မုန်းနေတဲ့ စိတ်ကတော့ အားလုံးတစ်သားတည်းရှိနေတာတော့ ပြန်ပြောရင် ဒါ ဒီအရေးတော်ပုံကို ကျနော်တို့ လုံးဝအောင်မြင်မယ်လို့ ကျနော်တို့က ယုံကြည်ပါတယ်ခင်ဗျ။”

ဒီနေ့ တိုက်ကြီး၊ ဖားကန့်၊ ထားဝယ်၊ ကျောက်မဲ၊ ကလေး၊ ပုဂံ၊ ညောင်ဦးမြို့တွေမှာ လူရာချီဆန္ဒပြကြပါတယ်။ ရွှေဘို၊ မိုးကောင်း၊ ကွတ်ခိုင်၊ မုံရွာမြို့တွေမှာ ပျောက်ကြားသပိတ်၊ လူမဲ့သပိတ်တွေ ရှိခဲ့ပါတယ်။

စစ်တပ်က ရွာတွေထဲ ဝင်ရောက်စခန်းချနေတဲ့ ကနီမြို့နယ် ချောင်းဝကျေးရွာမှာတော့ ဧပြီလ ၂၇ ရက်နေ့က ဒေသခံ ၂ ယောက်အဖမ်းခံခဲ့ရပြီး တယောက်ရဲ့ အလောင်းကို မနေ့က ပြန်လာယူခိုင်းတယ်လို့ မိသားစုဝင်တယောက်က ပြောပါတယ်။

ဒီနေ့အတွက် သီးခြားဖြစ်ရပ်တခုကတော့ မွန်ပြည်နယ် မော်လမြိုင်မြို့က Ocean ကုန်တိုက်မှာရှိတဲ့ KBZ Bank မှာ ငွေထုတ်ဖို့ ဒီနေ့အစောပိုင်းကတည်းက တန်းစီနေသူတွေ များတဲ့အတွက် စစ်သားတွေက သေနတ်ပစ်ဖေါက်ပြီး သတိပေးခဲ့တယ်လို့ မော်လမြိုင်မြို့သားတယောက်က ပြောပါတယ်။

“KBZ မှာ တန်းစီတဲ့သူများတော့ မနိုင်ဘူး ထင်ပြီးတော့တဲ့ သေနတ်ဖောက်ပြီးတော့ မိုးပေါ်ထောင် သေနတ်ဖောက်ပြီး တန်းစီခိုင်းတာတဲ့ ညီအောင်ဆိုပြီးတော့ ညီညီစီဖို့ပြောတာတဲ့ နောက်ပြီးတော့ ဒီနေ့လူများတယ်ကွာအရမ်း လခထုတ်တဲ့နေ့ဖြစ်တော့ လူအရမ်းများတယ်။ အဲ့ဒါလည်း ပါလိမ့်မယ်လိုထင်တယ်။ ကောလဟလတွေက ထွက်နေတယ်မလား စစ်ဖြစ်တော့မယ်၊ ဘာညာဆိုတော့ပြေးထုတ်ကြတာလို့ ထင်တာပဲ။"

အစကတည်းကိုက ထိတ်လန့်စိုးရိမ်နေရတဲ့ လူထုကြားမှာ တန်းညီအောင်စီဖို့ဆိုတာအတွက်နဲ့ သေနတ်ပစ်ဖောက်တာမျိုးကတော့ မလုပ်သင့်ဘူးလို့ မြို့ခံတွေကပြောနေကြပါတယ်။


မခင်ဖြူထွေး/ VOA Burmese

https://burmese.voanews.com/a/myanmar-military-coup-protest/5871210.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ