မြန်မာစစ်ကောင်စီကို အကြမ်းဖက်အဖွဲ့ အဖြစ်ကြေညာဖို့ လိုလား (အစာငတ်ခံ မြန်မာကျောင်းသား-လန်ဒန်)

လန်ဒန်မြို့ Westminster တံတားပေါ်မှာ (၇၂)နာရီကြာ အစာငတ်ခံ ဆန္ဒပြနေသူများ၊

မြန်မာနိုင်ငံမှာ အာဏာသိမ်းစစ်ကောင်စီရဲ့ ပစ်ခတ်နှိမ်နင်းမှုနဲ့ဖမ်းဆီးပြီးနောက် သေဆုံးသွားရတဲ့ လုပ်ရပ်တွေဟာ ဗြိတိန်နိုင်ငံမှာ ပြဌာန်းထားတဲ့ ဥပဒေသတ်မှတ်ချက်နဲ့ ငြိစွန်းနေတာကြောင့်မြန်မာစစ်ကောင်စီကို အကြမ်းဖက်အဖွဲ့အဖြစ် သတ်မှတ်ကြေညာပြီး ပြင်းထန်တဲ့ ဒဏ်ခတ်ပိတ်ဆို့မှုတွေလုပ်ပေးဖို့ ဗြိတိန်နဲ့ အိုင်ယာလန်မှာ ပညာသင်ကြားနေကြတဲ့ မြန်မာကျောင်းသားများသမဂ္ဂက တောင်းဆိုထားပါတယ်။ လန်ဒန်မြို့ Westminster တံတားပေါ်မှာ (၇၂)နာရီကြာ အစာငတ်ခံ ဆန္ဒပြတောင်းဆိုနေတဲ့ မြန်မာကျောင်းသားများသမဂ္ဂအဖွဲ့ဝင် (၃)ဦးထဲက သမဂ္ဂဥက္ကဌဖြစ်သူ ကိုကျော်မင်းဟန်ကို ကိုဉာဏ်ဝင်းအောင်က ဆက်သွယ်မေးမြန်းရာမှာ သူက ခုလို စတင်ဖြေကြားပါတယ်။

ကိုကျော်မင်းဟန် ။ ။အဓိကတော့မြန်မာစစ်ကောင်စီကို ဗြိတိန်ရဲ့ Terrorism Act 2000 အရ အကြမ်းဖက်အဖွဲ့အစည်းအဖြစ် ဗြိတိန်အစိုးရက ကြေညာပေးဖို့နဲ့ ကျနော်တို့ တောင်းဆိုနေတာ ဖြစ်ပါတယ်။ အဲဒီအချက်အပြင် ထပ်တိုး တောင်းဆိုချက်အနေနဲ့ ယူကေ(UK)မှာ ရောက်နေပြီး အကြောင်းအမျိုးမျိုးကြောင့် မပြန်နိုင် ဖြစ်နေသူတွေကိုပေါ့နော် အကာအကွယ်ပေးရေး Protection Visa ထုတ်ပေးဖို့ တောင်းဆိုနေတာ ဖြစ်ပါတယ်။

ကိုဉာဏ်ဝင်းအောင် ။ ။ဟုတ်ကဲ့ ၊ ဗြိတိန်အစိုးရက ချမှတ်ထားတဲ့ Terrorism Actပြဌာန်းချက်ထဲမှာ မြန်မာစစ်ကောင်စီက ဘယ်လိုအချက်တွေနဲ့ ညိနေတာမို့လို့ ဒါမျိုး တောင်းဆိုနေရ တာပါလဲ။

ကိုကျော်မင်းဟန် ။ ။Terrorism Act 2000 ရဲ့ အဓိပ္ပါယ် ဖွင့်ဆိုချက်နဲ့ကို ညိ နေတာ ဖြစ်ပါတယ်။ အဲဒီ ဥပဒေမှာ အကြမ်းဖက်အဖွဲ့အစည်းဆိုတာကို သူက ဘယ်လို ဖွင့်ဆိုထားသလဲ ဆိုတော့ - လူအများကို ပြင်းထန်စွာ ထိခိုက်နာကျင်စေသော အကြမ်းဖက်မှု၊ ဒါမှမဟုတ် ပစ္စည်းဥစ္စာ ပိုင်ဆိုင်မှုကို အကြီးအကျယ် ပျက်စီးစေခြင်း ၊ ဒါမှမဟုတ် လူတဦးတယောက်၏ အသက်ကို အန္တရာယ်ပြုခြင်း ၊ ပြည်သူလူထု၏ ကျန်းမာရေး သို့မဟုတ် လုံခြုံစိတ်ချရမှုအတွက် ကြီးလေးသောအန္တရာယ် ဖြစ်ပေါ်စေခြင်း ၊ သေနတ် သို့မဟုတ် ပေါက်ကွဲစက်များကို အသုံးပြုခြင်း ... အဲဒါတွေကို လုပ်ဆောင်ခဲ့သော် Terrorism Act ရဲ့ ဥပဒေအောက်တွင် ကျရောက်သည်လို့ သူက ရေးထားတယ်။ ဒါ့အပြင် ဤဥပဒေအောက်တွင် ယူကေနိုင်ငံအတွင်းရှိ အကြမ်းဖက် အဖွဲ့အစည်းများသာမက အခြားနိုင်ငံတွေမှာရှိတဲ့ အဖွဲ့အစည်းများကိုပါ ကြေညာပိုင်ခွင့် ရှိသည်လို့ သူက ပြဌာန်းထားပါတယ်ခင်ဗျ။ အဲဒီအတွက် စစ်ကောင်စီရဲ့ လုပ်ရပ်တွေဟာ Terrorism Act ရဲ့ ဥပဒေအောက်မှာ ကျရောက်နေတာ ဖြစ်ပါတယ်။ အားလုံးလည်း သိကြပါတယ် ကျနော်တို့ ဒီနေ့ရရှိတဲ့ သတင်းအရဆိုရင် အာဏာသိမ်းပြီးချိန်ကနေ ဒီကနေ့ထိ လူပေါင်း (၇၅၁)ယောက်က အကြောင်းမဲ့ အသတ်ခံထားရပါတယ်။ ပြီးတော့ လူပေါင်း (၄၄၀၀)ကျော်က အဖမ်းခံခဲ့ရပါတယ်။ ပြီးတော့ အကြောင်းမဲ့ သေဒဏ်ပေးထားသူတွေလည်း ရှိနေပါတယ်။ ၈ နှစ်အရွယ် ကလေးငယ်လေးတွေတောင်မှ အပစ်သတ် ခံနေရပါတယ်။ အဲဒီဟာတွေက လုံးဝကို လူမဆန်တဲ့ လုပ်ရပ်တွေပါ ။ ဒီအကြောင်းပြချက်တွေ အကုန်လုံးနဲ့ ညိ နေပါတယ်။

ကိုဉာဏ်ဝင်းအောင် ။ ။ အခုလို အစာငတ်ခံ တောင်းဆိုချက်တွေကို စဉ်းစား လိုက်လျောပေးလာမယ်ဆိုရင် Terrorism Act အရပေါ့ .. မြန်မာစစ်ကောင်စီအပေါ် ဘယ်လိုမျိုး အရေးယူမှုတွေ ကျရောက်လာမှာပါလဲ ခင်ဗျ။

ကိုကျော်မင်းဟန် ။ ။အဓိက ကတော့ စစ်တပ်ရဲ့ ပိုက်ဆံတွေပေါ့နော်၊ ဘဏ်စာရင်းနဲ့ ဝင်ငွေလမ်းကြောင်း access တွေကို ထိန်းချုပ်နိုင်ဖို့ ကျနော်တို့က လိုလားနေတာပါ။ အဲဒီလိုဖြစ်ဖို့ဆိုရင် Terrorism Access Freezing Act 2010 ဆိုတာ ထပ်ရှိပါတယ်။ အဲဒီဟာကို အသက်ဝင်ဖို့ဆိုရင် Terrorism Act 2000 အရ အရင်ဆုံး အကြမ်းဖက်အဖွဲ့အစည်း ဖြစ်ကြောင်း သတ်မှတ်ကြေညာပေးရပါတယ်။ အဲဒီလို Declare လုပ်ပြီးမှ Access Freezing Act က နောက်က လိုက်လာပါတယ်။ အဲဒီလို နောက်က လိုက်လာပြီးတဲ့အခါကျမှ 'ယူကေ'မှာရှိတဲ့ သူနဲ့ဆက်နွှယ်တဲ့ ကုမ္ပဏီတခုခုကသော် လည်းကောင်း ၊ ပုဂ္ဂိုလ် တဦးဦးကသော်လည်းကောင်း ဆက်နွှယ်မှုရှိခဲ့သော် .. သူနဲ့ ပတ်သက်တာ မှန်သမျှ တကမ႓ာလုံးမှာရှိတဲ့ သူ့ရဲ့ ငွေဝင်လမ်းတွေ Access တွေအကုန်လုံးကို ပိတ်သိမ်းနိုင်မှာ ဖြစ်ပါတယ်။ Freeze လုပ်နိုင်တာ ဖြစ်ပါတယ်။အဲဒီအတွက်ကြောင့်မို့လို့ ကျနော်တို့ တောင်းဆိုနေခြင်း ဖြစ်ပါတယ်။

ကိုဉာဏ်ဝင်းအောင် ။ ။ အဲဒီတော့ Westminster တံတားပေါ်မှာ ခုလို အစာငတ်ခံ ဆန္ဒပြနေတဲ့ ကိုကျော်မင်းဟန်တို့ဆီကို ဗြိတိန်နိုင်ငံခြားရေး ဝန်ကြီးဌာနက အရာရှိတဦးဦးပဲ ဖြစ်ဖြစ်ပေါ့ လာရောက်ပြီးတော့ မေးမြန်းစုံစမ်းတာတွေရော ရှိပါပြီလားခင်ဗျ။

ကိုကျော်မင်းဟန် ။ ။အခုထက်ထိတော့ မရှိသေးပါဘူးခင်ဗျာ။ အဲဒီအတွက် ကျနော်တို့ ဆက်လက်ပြီးတော့ တောင်းဆိုနေတာ ဖြစ်ပါတယ်။ ပြီးတော့ ဧပြီလ(၈)ရက်နေ့မှာ မြန်မာကျောင်းသားများ သမဂ္ဂအနေနဲ့ စာပို့ခဲ့ပါတယ်။ အဲဒီစာထဲမှာလည်း ၃ ရက်အတွင်း အကြောင်းမပြန်ပါက အစာငတ်ခံ ဆန္ဒပြမယ်လို့ ပြောထားပြီးသား ဖြစ်ပါတယ်။ ဒါပေမယ့် ဗြိတိန်နန်းတော်မှာ မင်းသားကြီး ဖိလစ် ကွယ်လွန်သွားတဲ့အတွက် အင်္ဂလန်နိုင်ငံရဲ့ ပူဆွေးဝမ်းနည်းတဲ့ကာလကို လေးစားလိုက်နာတဲ့အနေနဲ့ ကျနော်တို့ (၂၀)ရက်နေ့အထိ ထပ်စောင့်ခဲ့ပါတယ်။ အဲလိုနဲ့ အကြောင်းတစုံတရာ ပြန်ကြားခြင်း မရှိတဲ့အတွက် ဧပြီ(၂၄) မနက်(၉)နာရီကစပြီး ကျနော်တို့ ဒီတံတားပေါ်မှာ အစာငတ်ခံ ဆန္ဒပြနေခြင်း ဖြစ်ပါတယ်ခင်ဗျ။

ကိုဉာဏ်ဝင်းအောင် ။ ။ အခုလို အစာငတ်ခံ ဆန္ဒပြနေတာကို ဗြိတိန်နိုင်ငံသားတွေက ဘယ်လိုမျိုး တုန့်ပြန်တာတွေ တွေ့ရပါသလဲဗျ။

ကိုကျော်မင်းဟန် ။ ။ဟုတ်ကဲ့ လာရောက်ပြီး အားပေးကြပါတယ်။ သူတို့ ဘာတွေကူညီနိုင်မလဲလို့ မေးကြပါတယ်။ ကျနော်တို့မှာလည်း petition link ( အစိုးရကို မေတ္တာရပ်ခံ ပန်ကြားလွှာ )တွေ အများကြီးရှိပါတယ်။ petition ကတော့ ဒီယူကေ အစိုးရကို အွန်လိုင်းကနေ တရားဝင်တောင်းဆိုတာပေါ့ ။ အဲဒီ petition မှာ လူအယောက် (၁ သောင်း)လက်မှတ်ပြည့်သွားရင် သူတို့ဥပဒေသတ်မှတ်ချက်အရ ဒီတောင်းဆိုချက်ကို ပါလီမန်မှာ စတင်ဆွေးနွေးပေးရပါတယ်။


ကိုဉာဏ်ဝင်းအောင်/ VOA Burmese

https://burmese.voanews.com/a/hunger-strike-in-london/5868114.html

မြန်မာစစ်ကောင်စီကို အကြမ်းဖက်အဖွဲ့ အဖြစ်ကြေညာဖို့ လိုလား (အစာငတ်ခံ မြန်မာကျောင်းသား-လန်ဒန်) မြန်မာစစ်ကောင်စီကို အကြမ်းဖက်အဖွဲ့ အဖြစ်ကြေညာဖို့ လိုလား (အစာငတ်ခံ မြန်မာကျောင်းသား-လန်ဒန်) Reviewed by THITHTOOLWIN on 07:25 Rating: 5

No comments:

Powered by Blogger.