လူသတ်မိုင်း တားဆီးရေး ပါဝင်လက်မှတ်ထိုးကြဖို့ မြန်မာအပါအဝင်နိုင်ငံတချို့ကို ကုလတိုက်တွန်း

(ဓါတ္ပံု- Karen News)

မိုင်းအသုံးပြုမှု တားဆီးရေး နိုင်ငံတကာ သဘောတူညီချက်ကို လက်မှတ်မထိုးရသေးတဲ့ နိုင်ငံတွေအားလုံး လက်မှတ်ရေးထိုး လိုက်နာကြဖို့ ကုလသမဂ္ဂ အတွင်းရေးမှူးချုပ်က တိုက်တွန်းလိုက်ပါတယ်။

“မိုင်းအသုံးပြုမှု တားဆီးရေး နိုင်ငံတကာ သဘောတူညီချက်ကို နိုင်ငံပေါင်း ၁၆၀ ကျော် လက်မှတ်ရေးထိုးထားပြီး၊ ကျန်ရှိနေသေးတဲ့ နိုင်ငံတွေ အားလုံး အနေနဲ့လည်း အချိန်မဆိုင်းပဲ အမြန်ဆုံးလက်မှတ်ထိုး လိုက်နာကြဖို့ တိုက်တွန်းပါတယ်။” လို့ ကုလသမဂ္ဂ အတွင်းရေးမှူးချုပ် António Guterres က ကြာသပတေးနေ့ လုံခြုံရေးကောင်စီ အစည်းအဝေးမှာ တိုက်တွန်းလိုက်တာပါ။

လူသတ်မိုင်း ထုတ်လုပ်မှု၊ ဝယ်ယူစုဆောင်းမှုနဲ့ အသုံးပြုမှုတွေကို တားမြစ်ထားတဲ့ နိုင်ငံတကာ သဘောတူညီချက်မှာ လက်မှတ်မထိုးရသေးတဲ့ နိုင်ငံတွေထဲမှာတော့ အမေရိကန်၊ တရုတ်၊ ရုရှား၊ အိန္ဒိယ၊ အီရန်၊ အစ္စရေးလ်၊ မြောက်ကိုရီးယား၊ ဗီယက်နမ်နဲ့ မြန်မာနိုင်ငံတို့လည်း ပါဝင်ပါတယ်။

မိုင်းအသုံးပြုမှု တားဆီးရေး သဘောတူညီချက်မှာ လက်မှတ်ရေးထိုးတဲ့ နိုင်ငံတွေ အနေနဲ့ မိုင်းထုတ်လုပ်မှုတွေကို ရပ်ဆိုင်းပြီး၊ စုဆောင်းထားတဲ့ မိုင်းတွေကိုလည်း ဖျက်ဆီးပစ်ရမှာ ဖြစ်သလို၊ မြေမြှုပ်မိုင်းရှင်းလင်းရေးကိုလည်း ၁၀ နှစ်အတွင်း အပြီးသတ်ဆောင်ရွက်ဖို့ သတ်မှတ်ထားပေမဲ့ လိုအပ်ရင်တော့ အချိန်ထပ်တိုးခွင့် ပြုထားပါတယ်။

မိုင်းအသုံးပြုမှု တားဆီးရေးအတွက် ကုလသမဂ္ဂ လုံခြုံရေးကောင်စီ အနေနဲ့ ဆုံးဖြတ်ချက်ချမှတ်တာတွေ၊ အစီရင်ခံတင်ပြတာတွေ လိုအပ်ရင် ဒဏ်ခတ်အရေးယူမှုတွေနဲ့ ပိုမိုအားစိုက် ဆောင်ရွက်ဖို့လည်း အတွင်းရေးမှူးချုပ်က တိုက်တွန်းခဲ့တာပါ။ ကြာသပတေးနေ့က ဆွေးနွေးပွဲ အပြီးမှာတော့ လုံခြံုရေးကောင်စီက မိုင်းအသုံးပြုမှုအပေါ် အလွန်အမင်းစိုးရိမ်ကြောင်း ကြေညာချက်ထုတ်ပြန်ခဲ့ပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-land-mine-un-to-sign-the-treaty-/5846597.html