ဒေါ်အောင်ဆန်းစုကြည် အပေါ် စစ်ကောင်စီ စွပ်စွဲချက် NLD ပယ်ချ



Share/Bookmark
NLD ဗဟိုအလုပ်အမှုဆောင် ဦးအောင်ကြည်ညွန့် (ဓာတ်ပုံ - courtesy)

မနေ့က စစ်ကောင်စီ သတင်းစာရှင်းလင်းပွဲမှာ သတင်းထုတ်ပြန်ရေးခေါင်းဆောင် ဗိုလ်ချုပ်ဇော်မင်းထွန်းက တရုတ်နဲ့အာဆီယံတို့အနေနဲ့ကြားဝင်စေ့စပ်ပေးလိုတာသိပေမယ့် ချမှတ်ပြီးသား လမ်းပြမြေပုံအတိုင်းပဲ ဆက်သွားမယ်လို့ပြောခဲ့တဲ့အပေါ် NLD အမျိူးသားဒီမိုကရေစီအဖွဲ့ချုပ်ပါတီ ဗဟိုအလုပ်အမှုဆောင်အဖွဲ့ဝင် ဦးအောင်ကြည်ညွန့်က အခုလိုပြောပါတယ်။

“ ဒီလောက်တောင် မြန်မာနိုင်ငံတနိုင်ငံလုံးမှာရှိတဲ့ ပြည်သူတရပ်လုံးက မိမိတို့ရဲ့ ဆန္ဒကို ထုတ်ဖေါ်ပြောနေပါရက်နဲ့ပြည်သူအားလုံးရဲ့ဆန္ဒကို လိုချင်ပြီးတော့ ငါတကောကောမယ်လို့လုပ်နေတဲ့ အနေအထားမျိူးဟာ အောင်မြင်နိုင်လိမ့်မယ် မဟုတ်ဘူးလို့ပဲ ကျနော်ကတော့ သတိပေးချင်တာပဲဗျ”

ဒီအပေါ် NLD ဗဟို သုတေသန အတွင်းရေးမှုး ကိုကျော်ဝဏ္ဏကလည်း “ နိုင်ငံတကာကလည်း အာဆီယံအပါအဝင် သူတို့ကို dialogue ပေးတယ်ဆိုတော့ သူတို့ကို တကယ်တော့ exit ထွက်ပေါက်ပေးနေတာပါ။ ဒါတောင်မှာ သူတို့ကလက်မခံပဲ သူတို့ Road Map အတိုင်းပဲ ဆက်သွားမယ်ဆိုလို့ရှိရင်လည်းပဲ နိုင်ငံတကာက ရှင်းရှင်းလင်းလင်းမြင်ပြီးတော့ သူတို့ဒါ နိုင်ငံတကာက ဘာဆက်လုပ်ရမလဲဆိုတာ နိုင်ငံတကာကို စိန်ခေါ်တဲ့ သဘောပေါ့။ အခု UNSC က statement တွေထွက်တယ်။ အဲဒီတော့ နိုင်ငံတကာက ဆုံးဖြတ်ချက်တခုကျတိုင်း ဒီဘက်က တုံ့ပြန်မှဟာ ဆန့်ကျင်ဘက်ပေါ့နော်။ ပိုပြီးကြမ်းတမ်းတဲ့ ပစ်ခတ်မှုတွေ။ မြိုင်မှာဆို ရက်ရက်စက်စက်ကို တော်တော် အသေအပျောက်များတဲ့နေ့ပါ။”

အခု နေပြည်တော်မှာလုပ်ခဲ့တဲ့ သတင်းစာရှင်းလင်းပွဲမှာပဲ အရင်ပြည်ထောင်စုရွေးကောက်ပွဲကော်မရှင်ဟာ မဲစာရင်းအမှားတွေနဲ့သမ္မတ ဦးဝင်းမြင့်သြဇာခံခဲ့တယ်လို့ ဒီရွေးကောက်ပွဲကော်မရှင်အဖွဲ့ဝင်တဦးက ဗွီဒီယိုကနေ ဝန်ခံတာကိုလည်း ပြခဲ့ကာ ဒီကော်မရှင်မလွတ်လပ်တဲ့သဘောစွတ်စွဲ ခဲ့တာကိုလည်း ဦးအောင်ကြည်ညွန့်က အခုလိုပြောပါတယ်။

“ အဲဒါက အစထဲက အခြေအမြစ်မှ မရှိတာ။ မဲမသမာမှုဆိုပြီးတော့ ပြောနေတဲ့ ဥစ္စာဟာ သူတို့က ရွေးကောက်ပွဲ မဲစာရင်းအမှားအယွင်းရှိနိုင်တယ်။ အဲဒီအမှားအယွင်းဟာ မဲမသမာမှုဖြစ်နိုင်တယ်လို့ပဲပြောတာ။ မဲမသမာဘူးဆိုတဲ့ အထောက်အထားဘာမှ မရှိဘူး။ တပြည်လုံးမှာရှိတဲ့ မဲရုံတွေအကုန်လုံးကို မဲမသမာဘူးလို့သူတို့စွတ်စွဲတဲ့ အကြောင်း ရှိကို မရှိဘူး။ မဲမသမာမှုရှိတာ ဘယ်မဲရုံမှာရှိလဲ။ အဲဒါဆို အဲဒီ ဥပဒေမှာ ပြဌာန်းထားတဲ့အတိုင်းပဲ မဲမသမာမှုရှိပါတယ်လို့ ရင်ဆိုင်ကြုံတွေ့ရ တဲ့ သက်ဆိုင်ရာ မဲဆန္ဒရှင်ကိုယ်တိုင်ကသော်လည်းကောင်း၊ ဝင်ရောက်ယှဉ်ပြိုင်တဲ့ ကိုယ်စားလှယ်ကသော်လည်းကောင်း၊ ဆောင်ရွက်လို့ရတဲ့ကိစ္စရပ်ကို အခု အာဏာသိမ်းတဲ့အတွက် ခုတုံးလုပ်နေတာ အဓိပ္ပါယ်မှ မရှိတာ။ နောက်ပြီးတော့ သူတို့လုပ်ထားခဲ့တဲ့ ဖွဲ့စည်းပုံအခြေခံဥပဒေ ပုဒ်မ ၄၀၂ အရ ရွေးကောက်ပွဲ ကော်မရှင်ရဲ့ ဆောင်ရွက်ချက်ဟာ အပြီးသပ်ဖြစ်စေရမည်လို့ ပြောထားပြီးမှ အာဏာသိမ်းချင်လို့အခုကျမှ မပြီးနိုင်၊ မစီးနိုင်လုပ်နေတဲ့ သဘော အားလုံးသိသာနေတာပဲ”။

အခုလို ရွေးကောက်ပွဲကော်မရှင်မလွတ်လပ်ကြောင်း စွတ်စွဲခဲ့တဲ့အပေါ် ကိုကျော်ဝဏ္ဏကလည်း အခုလို ပြောပါတယ်။

“သူတို့ဖာသာ သူတို့စွတ်စွဲပြီးတော့ သူတို့ဘာသူတို့ဇာတ်လမ်းဆင်ပြီးတော့ ပြောတာပဲရှိတယ်။ တကယ်တမ်း မဲရုံအသီးသီးမှာ တာဝန်ကျနေတဲ့ ဆရာဆရာမတွေ၊ အခြားဝန်ထမ်းတွေရှိတယ်။ ဘယ်မဲရုံမှာမှ အဲလို တိုင်ကြားချက်မရှိခဲ့ပါဘူး။”

ဒါ့အပြင် ဖေဖော်ဝါရီ ၁ ရက်နေ့မှာ စစ်အာဏာသိမ်းပြီး ဒုတိယအကြိမ်လုပ်တဲ့ ဒီ သတင်းစာရှင်းလင်းပွဲမှာ ပစ်မှုတွေကို တဖြည်းဖြည်းထပ်တိုးခဲ့ရာမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ရွှေ နဲ့ဒေါ်လာငွေသားတွေ ပေးခဲ့တယ်လို့ထပ်စွတ်စွဲခဲ့တဲ့အပေါ်မှာလည်း ဦးအောင်ကြည်ညွန့်က အခုလို ပြောပါတယ်။

“ဒါတွေ ဒါတွေပေးတယ်။ ဒါတွေ ဘာတွေလုပ်တယ်ဆိုပြီးတော့။ လူတွေကို ဖမ်းချုပ်ထားပြီးတော့ ဘယ်သူနဲ့မှလည်း အဆက်အသွယ်မရပဲနဲ့ ဘယ်လို တွေဖိနှိပ် ညှင်းပမ်းနှိပ်စက်နေသလဲ၊ ဘယ်လိုတွေ ထွက်ချက်ရအောင်ယူနေသလဲ ဆိုတာမသိပဲနဲ့တဘက်သတ် သူတို့ပြောတဲ့ စကားအပေါ်မှာ ကျနော်က အယုံအကြည်မရှိဘူး။ တကမ္ဘာလုံးသိတယ် ။ ဒေါ်အောင်ဆန်းစုကြည်ရဲ့ ဂုဏ်သိက္ခာနဲ့သမာဓိ။ တိုင်းပြည်အတွက် သူဘယ်လောက်ထိ အနစ်နာခံပြီးဆောင်ရွက်နေလဲဆိုတာ အဲဒီပြောနေတဲ့သူတွေနဲ့ က ဒီလောက်ခြားနားနေတာများ ထည့်ကို မစဉ်းစားဘူးဗျ။ ဟုတ်တာကလွဲတာကို အကုန်လုပ်ပြီးတော့၊ မှန်တာကလွဲတာကို အကုန်ပြောနေတဲ့ သူတို့သတင်းစာရှင်းလင်းပွဲက သိသာနေတာပဲ။”

အခုလို ဒေါ်အောင်ဆန်းစုကြည်ကိုယ်တိုင် လာဒ်စားနိုင်ကြောင်းစွတ်စွဲတဲ့အပေါ် ကိုကျော်ဝဏ္ဏကလည်း

“ ကျနော်တို့က လုံးဝမဟုတ်ပါဘူးဆိုတာကို ရဲရဲဝံ့ဝံ့ပြောရဲပါတယ်။ သိတဲ့အတိုင်းပဲ ဒေါ်အောင်ဆန်းစုကြည်လို လူမျိူးက ဒါမျိူးလည်းတသက်လုံးမလုပ်ဘူး။ ရခဲ့တဲ့ ဆုငွေကြေးတောင်မှ တပြားတချပ်မှမထိပဲနဲ့ တိုင်းပြည်အတွက်ပဲ လှူခဲ့တဲ့လူ။”

တကယ်တော့ လက်ရှိစစ်အာဏာသိမ်းထားမှုအပေါ် နိုင်ငံတဝှမ်းမှာ ဆန့်ကျင်ဆန္ဒပြနေတာကဖြင့် နိုင်ငံတကာဘက်ကလည်း ရှေ့ဆက်မတိုးဖို့ဝိုင်းဖိအားပေးပြောနေတဲ့ ကြားကမှ စစ်ကောင်စီကတော့ တဖြေးဖြေးရှေ့ကို ဆက်တိုးဖို့ခြေလှမ်းပြင်နေပြီလို့သုံးသပ်သူတွေက ဆိုနေပါတယ် ခင်ဗျာ။ 


ကိုဝင်းမင်း/ VOA Burmese

https://burmese.voanews.com/a/nld-responses-military-press-conference-/5811664.html?withmediaplayer=1



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ