Myanmar Now သတင်းဌာန စီးနင်းရှာဖွေခံရ



Share/Bookmark
ရန်ကုန်မြို့ရှိ လမ်းတခုပေါ်မှာ တွေ့ရတဲ့ မြန်မာစစ်တပ် တပ်ဖွဲ့ဝင်များ။ (ဖေဖော်ဝါရီ ၂၈၊ ၂၀၂၁)

စစ်တပ်က အာဏာသိမ်းပြီးနောက် ဆန္ဒပြကန့်ကွက်မှုတွေကို အကြမ်းဖက်နှိမ်နင်းနေရာမှာ၊ သတင်းလိုက်ယူနေတဲ့ သတင်းမီဒီယာတွေလည်း အကြမ်းဖက်နှိမ်နင်းခံနေရပါတယ်။ ဒီကနေ့ နေ့လယ်ပိုင်းမှာ ရန်ကုန်မှာရှိတဲ့ Myanmar Now သတင်းဌာနကို လက်နက်ကိုင်တွေ ဝင်ရောက်စီးနင်းခဲ့သလို၊ သတင်းရယူနေချိန် ဖမ်းဆီးခံရတဲ့ သတင်းထောက်တွေလည်း ရှိခဲ့ပါတယ်။ အပြည့်အစုံကိုတော့ ဗွီအိုအေမြန်မာပိုင်း သတင်းထောက် မစုစုက ပြောပြမှာပါ။

ရန်ကုန်မြို့မှာရှိတဲ့ Myanmar Now သတင်းဌာနကို ဒီကနေ့ နေ့လယ်ပိုင်းတုန်းက စစ်ကား ၅ စီးနဲ့ လက်နက်ကိုင်တွေ ဝင်ရောက်စီးနင်းပြီး စာရွက်စာတမ်း တချို့ယူသွားတယ်လို့ သိရပါတယ်။ ကပ်ရောဂါကာလကတည်းက ရုံးပိတ်ထားတာဖြစ်လို့ ဖမ်းဆီးခေါ်ဆောင်ခံရသူ မရှိခဲ့ပေမဲ့ သိမ်းဆည်းသွားတဲ့ ပစ္စည်းစာရင်းတွေကိုတော့ အတိအကျမသိရသေးဘူးလို့ Myanmar Now အဖွဲ့ဝင်တဦးက ပြောပါတယ်။

"ဘယ်သူမှ မရှိတဲ့အချိန် ရုံးကိုဝင်စီးပြီး ပစ္စည်းတွေ သိမ်းသွားတယ်ပဲ သိရသေးတယ်။ ရုံးမရောက်သေးလို့ အခြေအနေအသေးစိတ်ကိုတော့ မသိရသေးဘူး။ လူကို ဖမ်းချင်တာလား၊ ခြိမ်းခြောက်ချင်တာလား၊ သူတို့ရဲ့ ရည်ရွယ်ချက်က ဘာလဲဆိုတာတော့မသိဘူး။ ရုံးအဖွဲ့အကုန်လုံးက ကိုဗစ်ကာလကတည်းက အိမ်ကနေပဲ အလုပ်လုပ်ကြတာဆိုတော့ ရုံးပိတ်ထားတာကြာပြီ။"

ပြီးခဲ့တဲ့ ဖေဖော်ဝါရီလ ၂၇ ရက်နေ့က ရန်ကုန်မြို့၊ မြေနီကုန်းမှာ သတင်းရယူနေချိန် Myanmar Now သတင်းထောက် မကေဇွန်နွေးကိုလည်း ရဲဝတ်စုံဝတ် လက်နက်ကိုင်တွေဘက်က ဖမ်းဆီးခဲ့ပါတယ်။ ရာဇသတ်ကြီး ပုဒ်မ ၅၀၅ (က) နဲ့ အမှုဖွင့်ထားပြီး၊ အင်းစိန်အကျဉ်းထောင်မှာ ဖမ်းဆီးထားတယ်လို့ သိရပါတယ်။

ဒီကနေ့ တောင်ကြီးမြို့မှာ သတင်းရယူနေချိန် အဖမ်းခံခဲ့ရတဲ့ Eastern Review သတင်းဌာနက တာဝန်ခံအယ်ဒီတာ စိုင်းဇင်ဒီဒီဇုံကိုတော့ ဖမ်းဆီးပြီး သိပ်မကြာခင်မှာ ပြန်လွှတ်ပေးခဲ့ပါတယ်။ ဖမ်းဆီးထားချိန်မှာ လက်ထိပ်ခတ် ချုပ်နှောင်ထားပြီး၊ ဖုန်းနဲ့ ကင်မရာကိုသိမ်းတာ၊ အကြမ်းဖက် ဖြိုခွင်းစဉ်တောက်လျှောက် ကားပေါ်မှာတင်ဆောင်ထားတယ်လို့ ကာကယံရှင်ဖြစ်သူ စိုင်းဇင်ဒီဒီဇုံက ပြောပါတယ်။

"အဲဒီ သူတို့ကားပေါ်မှာ ဖြိုခွဲရေးလုပ်နေချိန်မှာ ကျနော်လည်း ပါသွားတာပေါ့ဗျာ။ သူတို့လည်း ဖြိုခွဲရေးလုပ်ပြီးပြီဆိုတဲ့အချိန်မှ ကျနော့်ကို လက်မှတ်ထိုးခိုင်းပြီးမှ ပြန်လွှတ်ပေးတာပေါ့နော်။ လက်မှတ်ထိုးတယ်ဆိုတာကလည်း သူတို့သိမ်းလိုက်တဲ့ပစ္စည်းတွေ ကောင်းကောင်းမွန်မွန်ပြန်ရတယ်ဆိုတဲ့အကြောင်း၊ ကျနော့်ကို ဘာမှမလုပ်ဘူးဆိုတဲ့ အကြောင်းပေါ့ဗျာ ... ဒဏ်ရာရအောင် ဘာမှမလုပ်ပါဆိုတဲ့အကြောင်း အဲဒီလိုမျိုး လက်မှတ်ထိုးခိုင်းတယ်။ ပစ္စည်းပြန်ရရချင်းတော့ ကျနော်လည်း တချက်လိုသွားတယ်၊ ပြန်မစစ်လိုက်မိဘူး။ အပြင်ရောက်တော့မှပဲ Memory Card ပြန်ပါမလာတော့ဘူးဆိုတာ သိလိုက်ရတယ်။"

ဒီကနေ့ မြောက်ဥက္ကလာမှာ သတင်းသွားယူနေတဲ့ Red News Agency ရဲ့ အယ်ဒီတာဖြစ်သူ ကိုဝင်းဇော်နိုင်ကိုလည်း လက်နက်ကိုင်တွေက ဒီကနေ့ ညနေပိုင်းမှာ ဖမ်းဆီးခေါ်ဆောင်သွားတယ်လို့ သိရပါတယ်။

စစ်တပ်က အာဏာသိမ်းပြီးနောက် အကြမ်းဖက်နှိမ်နင်းခံရတဲ့အထဲမှာ သတင်းရယူနေချိန် ဖမ်းဆီးခံရတဲ့ သတင်းထောက် ၃၀ ကျော် ရှိခဲ့ပြီး၊ ပြန်လွတ်လာသူ တချို့လည်း ရှိခဲ့ပါတယ်။ ဒီကနေ့ မတ်လ ၈ ရက် အထိ ဖမ်းဆီးခံထားရသူ သတင်းသမား ၈ ဦးထက်မနည်း ရှိနေပြီး၊ အမှုဖွင့်ခံထားရသူတွေ ရှိသလို၊ ဖမ်းဆီးခံရပြီးချိန်ကစ မိသားစုနဲ့ တွေ့ခွင့်မရတော့ဘဲ ချုပ်နှောင်ခံထားရသူတွေလည်း ရှိပါတယ်။

ဆန္ဒပြသူတွေကို အင်အားသုံးအကြမ်းဖက် ဖြိုခွဲရာမှာ သတင်းသမားတွေကိုပါ ပစ်မှတ်ထား ဖမ်းဆီးအရေးယူတာတွေ ရှိနေတဲ့အပေါ် ကုလသမဂ္ဂနဲ့ နိုင်ငံတကာအသိုင်းအဝန်းကလည်း ဝေဖန်သတိပေးနေပါတယ်။ အမေရိကန်လွှတ်တော် သတင်းလွတ်လပ်ခွင့်အဖွဲ့ကတော့ ဖမ်းဆီးထားတဲ့ သတင်းထောက်တွေကို ပြန်လွှတ်ပေးဖို့ ကြေညာချက်ထုတ်ပြန်ထားပါတယ်။


 စုစု/ VOA Burmese

https://burmese.voanews.com/a/myanmar-military-coup-and-journalists-arrested/5805813.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ